Amanda 5

BOSS AMANDA.. (Chapter-5)

Ziaktu: Toni Râlte

"Bawiha, tho teh. Saw in hotunu a lo kal ania" ka mumang nuam zet a rawn tichhe vek mai. Ka nu zet chu aw. Phur fahran lo vin ka tho a, Boss reng reng pawh chu eng nge kan inah te a lo tih ni. Ka va thawh chhuah chuan fel takin a lo thu thán a. A nalh leh pek hle. Zing karah pawh hian a thar sar zel reng mai a nih hi.

"Eng nge thleng a? " ka ti satliah a.

"I hmai phih la, kan chhuak nghal ang, chaw chu kan order mai dawn nia.. " ka ner sawk. Ka chhungte mitmei pawh ven ve awm. A hmanhmawh leh hle a ni pek ang. Hmai ka phiha ka ha te ka nawh lai chuan ka nute nen chuan an lo ti ti a.

"Tun laiah chuan tumah kan him tawh lo a nih hi. Mami te pawh hi zana an chhuah ka phal tawh lo. A ralmuang lo è mai" ka nu chuan a ti bawrh bawrh a. Case thar kan nei tih ka hre chawpchilh nghal. Mitthi hi a hma chuan ka râp thin, mahse,  boss in min hruai hrat tawh a. Tihna leh hlauhna ka nei tawh lem lo.

Ka insiam sawk sawk a. Kan chhuak zui ta nghal a. Car a lo keng bawk a, bike ka hawl chhuak ta lo mai.

"I nu i chhun lo hle a ni" a ti sap a.

"Engvang chuan"

"A fing fel thlarh bik a, a viak tha hle tih a lang bawk.. " a nui hak a.

"Nia, ka nu mah nise, ka chhuang ve riau asin" ka la ti tak deuh deuh a.

"Tu nge kan hmuh dawn? " ka ti zui nghal a. A hmel a thutak nghal.

"Hmeichhe ruang bawk mawle.. " a hmel chu a dur deuh hlek a. Ruang chhar hi a tam zawk chu hmeichhia an ni tlat zel. Boss hi hmeichhia a ni ve miau a, a hmeichhiatpuite chunga thil tha lo thleng fo hi a haw ve hle a ni ngei ang.

Kan hmaa building lian fahran, hlui tawh lam chu ka thlir a. A kawt zimteah chuan mipui an lo zi nuai nuai mai. Tap thawm nen an ri nuai nuai a. Lung a zing angreng. Boss chuan a ID lek zauh chungin kawng a su kaw zel a. Constable pakhat hian min lo dang deuh a, mahse, in chhung lama oficer thu chuan Boss a hmuh rualin luhtir turin thu a pe ta nghal a. Boss hi chu a lal ve tlat!

Nula room lam chu kan pan nghal a. In chung kailawnah chuan chho vin, thlang lam room chu kan pan a. An lo tam vak lo zawk. Police mi leh sa tam vak lo leh nula chhungte an ni deuh mai.

Nula room tih takah a thianghlimin a felfai kher mai. Khum erawh a lo hnawk niah thung. Chunglam melhin hlau leh thlabar hmel a pu, a taksa lang thei chinah hliam na em em hmuh tur a awm lo. Boss chuan ngunthluk tak maiin a han en kual leh ta a.  A kuttin te pawh a check leh thlap. A ke phah hnuai a en chuan a bih rei deuh a.
A nghawng chu a duk ruih a. Chu ngei chu a thihpui a ni ngei ang. Nula hmel tha tak, hmai hlai lam, ngo tak mai a ni. Tawnzau dum leh boxer a ha a. Khua a lum tawh bawk a, mut dawnah chuan a inthuam themlem ve niah ka ngai.

A duhtawka a belhchian hnuah kan chhuak leh ta phawt a. Mitthi hming kha Lalnunruati a ni a, Láni tiin an ko thin. Kum 23 a ni a, an veng YMA president ka atanga kan hriat danin an veng chhungah pawh nula fel leh tlawmngai thei tak, lehkha thiam bawk si, nungchang mawi em em mai a ni awm e. SS zirtirtu a ni nghe nghe a. A páwih fak mai mai lo vang tih kan hrethiam ve.

"Sam, i ril a tam tawh awm sia, chaw kan ei dawn mi niang" ka ngaihtuahna chu a rawn tibuai a.. Chaw ei pawh ka chak vak lo. Ruang ka hmuh vang pawh a ni mahna. Chaw chu kan order a, tlem te ve ve bak kan ei lo.

"Tihian ruang vui liam hun kan nghak leh anga, vui zawh mi reh lai takin kan zuk kal leh dawn nia" a ti a. Kei pawh kan in lamah ka va phei leh zuai.

Chawhnuah kan hna thawk tan tak tak turin kan chhuk leh ta a. Mitthi vui haw lam kan tawk zut zut mai. Uitu leh suntu a ngah hmel khawp, thalai thihna hi chuan mi hi a thawng ve reng reng bawk a. An in kan thlen chuan an lo la awm ve nak nak naa, min hrethiam turah ngai ang.

Inchung lamah kan inzui chho leh liai liai a. Láni roomah chuan kan inzui lut leh ta. An lo tifel vek tawh a. Ruang chhuahna room tih pawh a hriat tawh mang loh.

"Aw le, pehhel vak hi ka thiam ve lem lo va, Pu Sang, in fanu kha nizanah khawiah nge a kal? " Boss chuan a ti a. Mi hmanhmawh chi hi a ni ve reng reng bawk a.

"Khawiahmah a chhuak lo. " maktih hmel deuh hlekin Pu Sanga chuan a lo ti a. Pa hmaitluak tha zet mai, chal arh phak, hmel tha ver vawr tak a ni a. A lian thawkhat viau bawk. An nu erawh nu sin lam, thinchhiat hmel lek lek, hmai tai hlar mai a ni thung. An fapa, tlangval Láni û erawh cher lam deuh, lu buk angreng zet, hmel eraeh chhe lem lo tak a ni thung. An inang lo tlang kher mai.

"A chhuak ngei si a" Boss chuan a ti leh kauh.
. "Ka pi, i thusawi chu ka hrethiam lo, a chhuak lo tak tak, mut dawn thleng pawh khan tv a la en a, mut hnua ka zun leh chuan a lo mu tawh thung"

"A roomah i va en em ni? " Chaltlai ka lo ti ru viau, BOSS mahnise..

"En e" a lo ti zawi sap a. Inthlahrung hmel a pu deuh.

"Zan tin a room chu in en thin em ni?  A mut leh mut loh in en thin danah a ruka chhuah a ching thin em ni? " leh khauh mai a.

"Aa.. Ih, nia, tun hnaiah te hian a nungchang a danglam lutuk a, fimkhur thuhlaah zan hnih chu ka en tawh a, nizanah pawh khan ka va en leh alawm.. Room hi kalh lo turin ka hrilh tawh a, a lo kalh lo reng bawk a. A lo muhil tawh" a ti ta a.

Thil eng emaw ngaihtuah muk deuh hmelpu hian Boss chu a vei sek a.

"Anih chuan nizanah thawm váng eng emaw hriat in nei em?  An pathum chuan a melh kual a.

"Aih, kei chu nizanah kan inah ka riak lo, ka thianpa phai atangin a lo haw, zu kan in a. An inah ka riak nghal daih" tlangval chuan a ti a.

"Kei pawh ka hre miah lo. Ka hre lo chu ti ila, ka mang hriat rei ruai nge ni zing lamah tawh zawk khan, kawngka khar thawm ang tak ka hria a" nu ber chuan a lo ti a. Rin aiin a aw a lian.

"Kei. Chu ka fanu a mu tih ka hriat khan thlamuang takin ka muhil a, kan nuin thlabar zeta min lo kaihthawh hma kha chuan engmah ka hre lo" Pu Sanga a ni.

"Hmm.. Anih leh a nungchang danglam tan dan leh engtik atanga intan nge anih min han hrilh dawn em ni ang?  " Boss chuan a ti a. Kei pawn ka hre chak viau mai.

"Hmm.. Ka'n sawi ang a, Láni hi in la hre lo maithei. Kan fa lak (adopt)  a ni a, kan nupa hian fa kan nei thei lo ni. Hei kan fapa pawh hi kan nu nau fa a ni a, a pian hlimin a nu santen vangin kan kutah a awm nghal a, vanduaithlak takin anu chu a boral zui ta mai a. Apa lah sawi nuam lo ni lose, zu ngawl vei a lo ni bawk nen, tihian fa angin kan enkawl chho a. Láni nen kan hmangaih dan a danglam lo. Láni hi kum khat leh thla 7 a nihin kan la a, Chutihlai chuan Bawiha hi kum 4 a ni tawh.

Hmanni ti ila, thla khat vel liam ta atang khan Láni hi a inringhlel deuh niin ka hria a. Anu bulah phei chuan engkim hrilh mai a that thu ka sawi nghe nghe. Kan hrilhfiah hmain, tu te emaw ka atangjn a lo hria a. A ngui ta vek mai a ni. Anu nen tha takin kan sawipui a, mahse, a û nen thisenah inzawmna an neih loh vang nge  kan chhungkhat lamhnai a nih bik vang nge a thîk tlat niin ka hria. Min hmangaih thu erawh a sawi tho. Tih vak ngaihna kan hre bik lo va, hun a kal anga, kan hmangaihzia hriain a rawn tha chho ve leh mai turah kan ngai.

Tunah hian M. Com final semester a zir mek a, lehkha a thiam thei a, ka chhuang ru ve viau reng a ni. Mahse, ni khat chu an Professor-in min lo bia a. Class a kal ngai loh thu a rawn sawi ta mai a!  Nitin a chhuak ve ziah kha a ni si a. Tichuan, a lo haw veleh ka zawt ta a. A ngawi reng thung. A tukah keimah ngeiin ka zuk thlah ta a. Class chu a kal nitin ve leh ta a. Mahse, test an han nei a, zahthlak khawpin a thiam lo anih chu! An Proffessor bawkin min lo be leh a, topper tura an hual a ni bawk a, an ngaihven ve hle tih ka hria. An test result ka hriat chuan ka thinrim ta em em a, a tiluiah ka ngai hmiah. Chumi zan chuan ka beng nghe nghe. Engmah a sawi ngai lo thung.

Kan bulah chaw a ei duh ngai lo va, chhungkaw tawngtaiah a tel ngai hek lo. Roomah a inkhung chawt chawt a, ni khat class kal tura a chhuak emaw kan tih chu a rawn haw ta miah lo va. Kan mangang khawp mai. Kan call a pick up duh si lo. A luhlul ve reuh vang hian ka lakah a titauah ka ngai a, ka beisei ang ngeiin zingah a rawn haw veleh mai. Nun pangngai takin ni hnih thum vel kha chu kan khawsa a, Hetia a danglam hnu hian kohhran leh khawtlanga a tel vena ho chu a thlah vek a ni. An hruaitu te pawn min zawt fo a, zan khat phei chu an rawn leng hial. Mahse, roomah a tawm leh tlat!  Han hauh vak dawnin ka tîm thin a. Kan thisen a nih lohna nen, mahse, kan hmangaihin kan ngaihtuah em em tho.

Kar kalta zirtawpzan khan kan mutthilh hnuah kan safe-chabi ruchhuakin pawisa fai kan kawl zawng zawng a lo ru chhuak a. A tirah chuan rukru an nih kan ring a, mahse, kan thenawm pitar zing tawngtai turin Láni, kan in atanga bag ak chunga chhuak a lo hmu a. Rinhlelhna tizual turin chumini atanga thawhtan thleng khan a rawl bo ta char char a ni. Khawiah emaw nuam an va chen a nih ka ring ta ber. Chhungkua kan inrawnkhawm a, tlangthantir kan duh bawk si lo. Anu phei hi chu a rilru a na ngawih ngawih, chaw pawh a ei thei lo. Mutmu kan tuah tha thei hek lo.

Hetia a rawl bo chhung hian thil rapthlak tak kan tawk ta a. In tan chuan a ho viau maithei, kan tan erawh a zahthlakin a rapthlak a ni. Sunday zingah khan envelope kan dawng nawlh mai a. Kan han hawn nak chuan, Láni leh mipa chi hrang hrang thlalak a alo awm ruih mai!  Thlalak satliah nise chuti em emin kan na lo vang. Mahse, ruak keng kung hlira an lak anih vangin a zahthlak a ni. An thiltih a hriat reng bawk si..

Thuziak a lo awm bawk a. "Tun kar zirtawpzanah kan sawina hmunah pawisa fai cheng nuai 10 kengin i lo kal tur a ni. I lo kal lo emaw police i pun anih vaih chuan, i fanu leh i chhungkua in mualpho ang. Thlalak ni lo, video kan la kawl tih hrereng ang che. Inhmuhna hmun tur chu lehkha i dawng leh ang" tih thu hi.. Kan rilru a mang vek. Awmngaihna reng kan hre lo a ni ber. Chutiang zah zah sum kan nei bawk si lo. A hmingin kei hi Bank-ah Manager hna ka thawk ve a, kan nu hian eichawp dawr a nghak ve bawk a. Chu zawng chu kan chhungkaw eizawnna a ni mai a. Kan rilru a hah takzet a ni.

Bawiha hian, "Pa, pe reng reng suh, police hrilh zawk ang u" a ti a. Chumini chuan nilengin rilru nuam lo reng rengin hun kan hmang ta a.

Thawhtan zing khan Láni chu a rawn haw ta hlawl mai. A pawr em em a, a cher kuamin ka hre bawk. Kei chuan thlalak chu hmuhin ka an khum a, kut ka thlak nual hman.

"Pa, ka lo tisual a ni. Min ngaidam rawh. Fa lak ka ni tih ka hriat khan ka rilru a na em a, tin, in hriat tur chu u mama hian min ngaizawng a, zanah te hian in mut tawh hnuah min sual a tum thin. Hrilh che u ka ngam si lo va, ka tuar tlawk tlawk zel a, pa, khawngaihtakin pawisa chu pe hram la, tichuan kei pawh in duh danin ka awm tawh ang. Ka intiam e" a ti a. A tap faih faih a. A û eraeh a lo ter at, "Nunruat, i va zak lo ve. Tiangtea min puh.. Vawikhatmah khawih che ka tum ngai lo, ka ngaizawng hek lo" a ti ta phiar phiar a. Awih tur leh awih loh tur pawh ka hre thiam lo. Lehlamah unau pianghmun an nih lohnaah boruak a kal dik lo thei ve tho tih ka hria. Mahse, Mama pawh ka ring chhe phal chuang lo. Ka duh ber chu ka fanu kha a ni. Hmana ka fanu ka chhuan em em thin kha.

Anu nen kan inrawn a. Mi dang pawh hrilh lem lo vin Bank atangin pawisa ka puk ta ngawt a. Inhmuhna tur hmun an rawn sawi hun kan nghak ta chawt mai a ni. Nimin zing khan thenawm naupang sawn lehkha min rawn pe leh a. "Zirtawp zan dar 11-ah,  Vanapa Hall hnuaiah" tih zawng hi a ni. Ka hrethiam nghal mai. Naupangte chu a petu ka zawt a, "ih, puitling a nia. Lian deuh " a ti ringawt.

Mahse, Hei vawiin hi zirtawp chu a ni ta reng mai a. Kan fanu erawh a awm ta si lo. Kan fanu a awm lo ta sa sa, pawisa pek tumna ka nei ta lo bawk" Pu Sanga thusawi chu ngaihnawm ka ti kher mai. Mama chu ka va melh a, a farnu ngaizawng duhtu tur hmel ka hmu lo. Boss in a la chhui ang chu.

"Pawisa chu i pe ngei tur a ni" Boss chu makti zetin kan en thap a.

"A awmzia chu ka zui ang che. A rukin, tichuan, i fanu nunna latute kan man thei maithei asin.. "

Ka hrethiam ta deuh. A ngaihdan chuan Láni thattu te chu blackmailtu te an nih a ring a ni ngei ang.

"I farnu chu i lo melh tai reng reng em ni? " Mama chu a va melh kâwk a.

"A teuh lo mai. Ka nau ka thisen zawmpui angah ka ngai. Hetia a danglam hma kha chuan kan inkawmngeih thei lutuk. Engkim kan inhrilhtawn vek thin" a nau thihna chu a tawrh ve hmel viau bawk si.. Aa.. Thluak a buai leh tawh.

"Pu Sang, kan kal hmain i lehkhathawn dawn leh thlalak te chu kan lo zir chiang ve lawk dawn em ni? Min lo pe thei ang em? " a ti a. Rang takin a rawn pe a. Kan chhuahsan ta a.

Coffee no dawm chungin thlalak chu a zir chiang a. Kei erawh a inah chaw ka ei dawn vangin ka thiam ang angin rawng ka bawl ve. Artui kan bak ka thiam vak si lo va, sa erawh ka siam thiam ve. Vawksa a lo la nei hlauh a. Ka fry a.

"Sam, lo kal lawk.. Hei.. En lawk teh.. Thil danglam i hmu em? " tiin thlalak pahnih hi a rawn lek a. Ka lo en ve a. Thlalak pakhatah chuan Láni chuan underware ha chungin putar lam tawh hi thu saisirin a lo kuah a, camera a melh bawk. Pakhat lehah chuan, panty a ha a, bra erawh  a hreng lo, Tlangval niawm tak palian lam hi thy saisir bawkin ing euh zet hian a kuah a. Ka en ka en a. Mipa pahnih bak danglam ka hmu lo.

"Pakhatah putar, pakhatah tlangval" ka ti a. Ka pe let a. A thaw hawk. Beidawn hmel zet hian min rawn melh a, ka lo nui pût pût ringawt. Min hauh hmain choka lamah ka phei leh daih. Eng nge thil danglam ka hmu ve miau hleinem.

Lehkhathawna kutziak chu mipa kutziak ni ngeiin a lang, a hraw danah. Zanriah ei hmain "Ka chhuak lawk dawn. Lo awm rawh. Ka rei lo vang" a ti a. A chhuak zui nghal. Ka dar ka chhin âk ringawt. In neitu ber a chhuak miau sia tiin inthlahrung ru tho siin a roomah ka lut a. A felfai ngei mai. A rim tui chèk bawk. A khum chu a zau mah mah. Saw khumah sawn engtikah emaw chuan ka la mut ngei ka beisei. Ka ngaibtuahna chu ka khikpui suk suk a. A library roomah ka lut leh a, hei chu ka kal fô!  Ka rin ang ngeiin, Mipa thlalak lian zet chu a lo intar leh kulh a. Tu nge anih ka hre lo va, ka zawt ngam hek lo. Mipa hmel tha tak, ngo vuah mai, palian tih hriat tak a ni. A bialpa a nih ka ring thin a, mahse, bialpa nei angin a awm ngai si lo. A bialpa thi tawh thlalak a nih ka ring tawp.

Khaw thim hnuah a rawn let leh a. A inbual a. Chaw kan ei ta nghal a. Kan tawng lem lo.

"Riak ve mai la" a ti satliah a. Zan programme ka neih loh zan a ni bawk a. Ka yes rang teh e. Mahse, chance ka nei ta chuang lo. A library roomah a inkhung leh hmak. Hmm.. Movie te ka en ta mai mai. Sofaah ka lo muhil daih, ka harh chuan puan ka lo sin thlap. Min sintirtu avangin ka nui sak. A nuam ve reng reng e.

"Vawiin chu Mama kha va enthla teh aw. Inchei danglam ve deuh la" a ti a. Ka rinhlelh loh ber kha a nia, mahse, thuawih a ngai si. Engtin tin emaw ka inchei danglam a, Láni te in chu ka pan ta a. Mama ber pawh ka va hmu ta chuang lo. Mahse, thu thar ka hre thung. An kawmchhak dawrtè-ah ka thu reng a, a nghaktunu chu nutling, phawk zet a ni roh a. Ka thiam ang tawka Láni chungchang ka sawi hnuah kan la hriat loh a rawn sawi chhuak ta nual mai.

"Apa khuan a chhuang viau ringawt a, mahse, a rin ang a ni miah lo. Tlem lai deuh khan hotela mipa nen an lut dun leh room an book lai hmu an awm nual mai. Ka fapa pawh hian a hmu ve a. A tawngtam lo èm a, a thih khan a sawi ve chiah. Putar deuh te pawh a kawp viau a ni awm e. Mak kan ti khawp mai. Mihring hi kan landan ang ringawt kan ni lo tih hi.. " A tawng duh riau chu ka tan a lawmawm.

"Mahse, apa ten a mize danglam an hriat hnu kha chuan mipa a kawp leh tawh miah lo lawi a!  A inkhung chawrh chawrh mai a ni" a thusawi tawh thluaithum tum niawm fahrain a ti leh roh a!

Mama chungchang ka han sawipui ve leh a. Sawi tur a lo hre zet mai. "Zu khu a in nasa ve a, hmeichhhe hruai luh changte pawh a nei. A nu leh pa dik tak an ni lo tih a hriat atang phei kha chuan a zah ta vak lo va, Pu Sanga te hi an khawngaihthlak asin. Chutih lai mekin Mama pa lah khan a fapa kheuh hrangin, ro chungchangah buaina an siam thul.. An chhungkaw boruak khu a hahthlak tak tak a ni" ka beng a verh riau mai.

"Mama pa chuan a rawn ngaihven leh tihna em ni? "

Customer an lo kal vangin a chawl det a. An chhuah hnuah, "ngaihven e mawle.. A zak lo ka ti khawp mai. A fapa tikhawp khuan an hmangaih ania" a ti bawrh bawrh a. Thil ka lo zeldin ve vak ringawt.

Zanah ka thianpa bialnu kan rim daih. Sas hi ka nei rei ve thei si lo. Ka ning. Thiante chance pek reng ngai bik hi.

"Sam, vawiin chu keimahin ka chhuak leh dawn a. I duh chuan i haw thei" a aw chu a zang leh vah mai. Hmm.. Mu nileng mai ang.

Láni thih atangin kar khat a liam dawn ta reng mai. Thu thar ka hre lo, Boss hi amahin a che kual bawk si. Min hlamchhiah riau, ka lawm lo.

Let leh lawk ila, Boss thu rawn ang khan Pu Sanga khan pawisa kengin Zirtawp zan khan Vanapa Hall lamah chuan a va kal ta ngei a, Boss in a zui. Kei erawh movie ka en ka tih kha. Boss a lo kir chuan tumah an rawn lan loh thu a rawn sawi a ni. Heng misual te hi an mawl hlawm tawp lo tih chu a lang reng mai.

"Sam, ka thusawi i hria em?  Amanda kha hospitalah a awm" min rawn betu chu Officer Faka a ni. Ka mit sulh mai. Ka tel lo vin chet a la char char a, ka thu hriat thar chu boss in hliam a tuar tih chauh chu a ni.

Hmanhmawh takin Hospital ka pan a. Ka thlan a bawl tek tek mai.

"Khaw nge a awm" ka ti nghal tâwng a. Cabinah an lo dah lut tawh a. Ka va luh chuan a lo muhil. A hnarah pipe an lo vuah a, drip an khai bawk. A ban dinglam chu an lo cher khawng at a, a lu pawh an tuam. Amah a muhil bawk si, ka thu ve ta reng a. Keimah bak buaipui tur dang an awm bik chuangin ka ring lo.

Ka zun chhuakin min tiharh a, ka nikhua lo thei, ka lo muhil daih. Amanda chu thei leh thei lo vin a inbeng kang a, thawh a lo tum mèk a. Luhai chhu chungin ka va kuah a, ka pai deuh at at mai. Min melh kawk a, a mitmeng chu a fim kák mai.

Zunram te kan thiar zawh chuan dim tein ka muttir a. Tui ka in a. A mut a chhuak vak bik lo nia ka hriat vangin, 'Ka hriat ve a tul lo maw? " ka ti sup a.

"I tihtur awm chhun chu tihian ka bulah awm la, meng kar ang che. I hrethiam em?  Tu pawh eng mi pawh rawn lut se, chîk takin i lo en tur a ni. Tin, min kai tho bawk ang" a ti a. A la chauh hmel viau.

"Chu chu ka ti ang. Mahse, hetia hliamtu che hi tu nge? " ka ti hrâwk a. Ka lungawi chiah lo.

"Sam, a tawp ka thleng teuh viau tawh asin le aw.. Lâni thattu ngei khan ka chhui zui tih hriain min thah a tum anih hi"

"Chu chu tu nge?  Report ka lo thehlut ang.. Sawi rawh"

"Ni lo ve, kan hloh palh ang, amah ngeiin min rawn pan anga, awlsam takin kan lo man dawn a ni" a thusawi awmzia chu ka hrethiam lo. Ti nge a zep tlat? 

A mutthilh hlan chuan ka meng kar thung. Ka lainat tlat nia!  Rorumin chhel viau thin mah se; hmeichhia a ni ve tlat si. Nemna riau annei ve a, a thla pawh a phang ve thin ngei ang. Engtikah emaw chuan ka la duat thei em ang chu.

Zingkarah ka inphih harh a, ka va luh leh chuan Doctor leh mal nurse an lo lut chiah a. Doctor chuan a han en kual vel a, damdawi lei tur a ziak malh malh a. An chhuak leh nghal. Damdawi te chu ka zuk lamkhawm a. Ka nute ka bia a, inthlakna tur ka chah a, chaw nen. Rei rial lo vin an rawn keng ta vat a. Boss erawh a muhil chiah chiah mai. Ni a san fe hnuah a rawn harh a, chaw chu tlem azawng ka ei luihtir a.

Nilengin kan pahnihin kan awm dun ral mai. Lehkhabu te ka chhiar ta vel mai mai. A maha a thawhchhuah thin na chhan ka zawh chuan, "Hmabak tam tak i la nei a, uitu tur che chhungkaw duhawm tak i la nei bawk. I thih ka duh hleinem" a ti. Thu lah hi a pehhel thiam thei siah.

Whatsapp-ah ka lut a, news groupa ka lut chu ka phu zawk mai. Ka ner nawk bawk. 'Detective Amanda chu ICU-ah an dah lut ta" tih thu chu. Khawi lama ICU, a la tawng zawt zawt tho si. Ka hrilh ve a. A nui sak ringawt. "Ka tihtir anih kha" A la ti zui.

Kawngka a rawn inhawng a. Constable pakhat a rawn lut.

"Zanin atan kan inpeih tawh e"  a rawn ti ta a. Mak ka lo ti deuh a! Boss hmelah erawh mak tihna a lang lo. A phur hmel hle zawk. Thil chu ka ngaihtuah thiam vak lo. Ka hriatpui ve lohin a lo kal thui tawh lutuk. Engvanga min thlim tlat nge maw anih le.. Mama enthla tura min tih nia ka thu hriat te kha ka sawi nawn leh a. Mama pa ka rinhlelh thu te.

"Zaninah heng zawng zawng chhanna hi in hre tawh dawn alawm.. Ka tel lo vin" a ti sap a.

Zan dar 8 a rik meuh chuan, Boss thupek angin Zemabawk tlanpelin Huan pakhat kan pan mek a ni.  Mi 8 kan ni a. Silai kan keng far bawk. Tu nge kan man dawn a, eng nge kan hmachhawn dawn ka hre lo.

Thla chu a eng ruai a, gate lawnliamin thlam lian ve tawk tak lam chu thawm dim takin kan pan ta thâm thâm a. Thawm chu a reh vawng vawng mai.

"Kan chet vat a ngai. Hawh le" tih thawm a awm rual chuan, mi pahnih an rawn inzui chhuak a. Ka rin ang ngeiin Mama te an ni. Pakhat chu a pa anih loh reng ka ring lo.

Thlam thlanga serthlum kung bul awl zau lai chu an lai ta turh turh a.

An lai thuk telh telh a, thil rimchhe zet a rawn nam tan ta. Mitthi tawih rim ngei a ni. An ni pawh chu an uak tuarh tuarh a. Keini tan lah insum a har tawh angreng. Signal kan inpe zauh a. Kan chhuk thla ve ta a.

"Che tawh suh u" Officer Faka chuan a ti  hriam hraih a. An hamhaih hmel kher mai. Mama chu tlan chhiat a tum a, a tlan hla hman lo thung. Silai a puak dawt a, a tlu hlawm tal mai. Mahse, a malpui ania, a thih phah em lo vang chu. Ruang chu kan zuk la chhuak a, rei tak chhung chaw ka ei leh thei dawn lo anih hi. Ruang hmel ka hmuh rual chuan ka te thawt!  Ani te chu an veng thlanmualah phum anih kha.. Ni e, Lalnunruati ngei a ni.. Kha mitthi kha.

Boss chu a ban awrh chungin roomah chuan a rawn lut a. A fai leh sar mai. Chairah a thu hnawk a. Rei a thut hmain Pu Sanga leh an nu an rawn inzui lut ve nghal a. Mak an ti hle tih an hmel atangin a lang thei.

Kan hmaa thu te chu an meng val kalh a, pafa niawm reng an ni. An inang tlat.

"Sawi ru le" boss chuan a ti satliah a.

"Sawi tur kan nei lo. Engmah tih kan nei lo" pa zawk chuan a ti ram hmak a.

"Ka hun hi khawhral lo hram teh u"

"Emg nge kan sawi anga.. Engmah kan ti lo" mama chuan a lo ti pawr ve hlak a. Constable pakhatin ben a tum chu boss chuan a lo khap a.

"Sama takngial pawhin a la hre lo va. Ka chhui chhuah dan che u hi ka sawi phawt anga. A dik lo lai in lo siamtha anga.. In sawi zawm dawn nia"a nui saih a. Thawk la halhin.. "Lâni an blackmailna thlalak atang khan bul tan ang. Kha thlalakah khan Láni kheimitah  tataoo a awm a. Mahse, a ruang kan rawn endik ni khan a ke lam kha ka bih ngun viau a, a ke hnuai a balh avang khan.. A kheimit kha ka ngaihtuah letin tatoo ka hmu lo tih ka hria. Kha khan min tibuai ta riau a, a thlalak pangngai ka va la ta hial a. Kheimit veilam lanna a nei tam lo naa a lanna chinah tatoo a nei lo tih ka hmuchhuak ta phawt. Anih chuan, kha thlalak ami kha Lâni a ni lo tihna a ni thei. A mize danglam thut thu kan hria a, ka zeldin kual a. Lâni an adopt na home address ka dil a. Keimahin ka va kal a ni.

A tirah an remti lo viau naa, kan hnuchhuina tur thil anih thu ka sawi chuan ka duh tak chu ka hmu thei ta a. Lâni khan phirpui a lo nei ngei a. Ani erawh home-ah kum 17 thleng a awm a. A tlanbo ta a ni. Chu ngei chu ka zawn hmuh a ngai tih ka hria.

Chutih rualin Mama leh apa pawh enthlak hna ka thawk reng bawk a. A chhan chu Rosumah in buai pafa hle tih ka hriat vangin. Tichuan, zan khat chu hotel tawp zetah ka lut ta a. Tuman Amanda ka ni tih an hriat loh ngei ka beisei. Chutah chuan ka mi duh chu ka hmu ta a. Ka zui ru ta zel a. Mama pa in luahah ka zui lut ta a nih kha.. Ka kirsan leh a, a tukah kawng dang ka neih miau loh vangin ks anga lem changin chu nu chu kawmngeih ka tum ta a. Engkim ka han treat takah chuan kan inpawh ta phian. Mahse, a fimkhur ve khawp.

"Ka hausa tep tawh a. Ka la treat ve ang che" a ti deuh sek a. Thil ka man thiam tan. Tin, kha nu khan a kheimitah tatoo a lo nei ngei bawk. Mampa pa in thleng chuan kan inzui lut thei ta a. Khami zan khan min lo melh no tehchiam lo reng a. Plan in nei tlat si a.

"Chhuak tawh suh kan tih kha.. i hmel hi i thup thei lo " in tih lai te khan ka lo chatthla daih a. Thil dang erawh in sawi kai lo.

Tichuan, ka rawn kal leh a, ka thiannu kha ka rawn zawng anih kha. A chhuah thu in lo sawi a, mahse, tui in tura fridge ka hawn lai khan tui khawihnaa thisen val kalh kalh ka hmu ta a. Thil ka hrethiam tan. Luhlul chhuahin ka han awm lui deuh a, min ngai thei ta lo va, min hnawtchhuak a, min khawihna lamah k inchei danglamna a tla palh a, min hrechhuak ta anih kha.. Hliam ka tuar ta hial a. Mahse, ka beidawng duh lo. Hospital thlenga min umzui ka rin vangin ka fimkhur ve khawp mai. Thu thang dik lo ka thehdarhtir ta a. ICU-a ka awm thu kha. Kha mi ni khan Hmeichhe pakhat a bo thu leh zawn mek a nih thu te, a hming chu Sarah a nih thu pawh chhuah tel  a nih nghe nghe kha. Hmanhmawh taka chet innlak a ngai ta a. Khami zan hliam ka tawrh zan khan in phum nghal ngei ka ring a, mahse, khaw nge in phum ang tihah ka buai ta a ni. Pu Sanga ka bia a, Huan an lo neih thu ka hriat chuan ka thaw huai mai. Ramhnuai khawilai emawah paih ni ula, ruang hmuh anih rualin rinhlelh in kai thei. A chhan chu in ina a lut leh chhuak kha hmutu an awm ve tho si a!  Anih loh pawhin a chhungte in nih miau vangin koh in ni ngei dawn bawk. Chuvang chuan in phumbo ka ring ve tawp. Mama pawh in in tak tak lamah i tal tam lo hle a, khami zan ruang in phum zawha i va haw khan i kekawra lei a kai thu i pa ka atang khan ka hre thei tlat a ni. Ka duhthusamin in che ta zel a.

ICU-a ka awm avang leh mi bo zawn anih tak avangin nizan aia hun tha kha in tan a awm ta lo va. Risk lian tak ka la anih kha. Pathianin min pui a. Kan hlawhtling ta reng a ni.. "

Ka tel lo va a chetlak dan chu ngaihnawm ti takin ka lo ngaithla a.

"Aw le.. Anih nih kan ni tawh bawk a. Sawi ve teh u" a ti tham chhal a. A chauh hmel deuh.

Insangmar teuh chungin, mama chu a rawn tawng chhuak ta nge nge a.

"Ka pa in min rawn zawn chhuah khan mak ka lo ti viau a, zu ngawlvei anih thu kha ka hre si a. Mahse, a lo dam thain a hrisel hmel viau mai. Ani chuan tuna ka nu leh pa te hian fa an awh luatah ka nu kha damdawi dik lo pein an hrai hlum thu a sawi ta a. Ka awih mai bik lo. Mahse, ka pa te bula ka nu leh pa chungchang ka sawi apiangin ngaihven tawh lontur leh ka pa pawh a thih daih tawh an rin thu an sawi thin a. Ka rilru chu a kal dik lo tan ta a ni.

Ka pa hian ro chungchang min sawipui fo a. "Lâni saw nang aiin an la dah lal dawn, ro pawh i kutah a awm dawn lo" tia ka thluak a suk fo takah chuan, Láni chu ka hmumawh tan ta a. Vanneihthlak takin Lâni phirpui hi ka pain a lo hmu hlauh mai a. Ruihhlo ngai a ni a, a duh ang kan pek chuan hman tangkai theih kan inring ta a ni. Ka pa in luahah a insawn ve ta nghal a. Tichuan, Lâni kha kan ru bo a, ka pa in luahah kan phuar hlawm ta a. Kan hrai rui thin bawk. Inleng kan nei ngai lo va, tuman an hre lo. Tichuan, Lâni ai chu Sarah khan a va awh ta a. An mzia a danglam em vangin mak an ti ta reng anih kha. Kei erawh chuan ka hre kar. Kan tum dan chuan blackmaila ka pa hnen atanga sum dawn kha a ni. A safe-a pawisa ru chhuaktu kha chu keimah ka ni. Khatih lai khan ka pa hriselna a tlahniam thut a, kan mamawh si a ni. Lâni an rinhlelh nan Sarah khan zingkarah a ak chhuak anih kha. Tichuan kan blackmail ta a, sarah khan Lâni angin ka pa hnenah ngenna a siam ta a. Kan duhthusam a hlawhtlin dawn mek laiin, Lâni a tlanchhhuak ta tlat. Ka pa nen kan umzui a, a tlan hla hman lo. A rui â tiin mi bulah chuan kan sawi. Sarah kha an hmu fo tawh a. An awih lo lem lo.

Tum lo deuhin ka rek hlum ta a. Ka duh vang renga that ka ni bik lo. Engkim a buai zo ta a. Tichuan, Sarah ka bia a, a rawn chhuak a, Láni ruang chu a khumah kan dah ta anih kha. Sarah pawh a rawn chhuak zui ta nghal a.  A bak chu in hriat ang kha a ni tawh mai" mama inpuanna chu..

"Sam, ka tan i hlu hle mai" tih pahin ka biangah a rawn fawp zauh a. Ka lo hawi â huih ringawt..

{Tun tum zet chu ka ngaihtuahna ka sawrbing hleithei lo a ni e. Ka ziak tha zing khawp mai. A plot ka duan lawk loh vang a ni pakhat.. Ni khata engmah chhiar tur in neih loh ka hlau ve bawk si a. A pherh nuaih ang. Min hrethiam teh u.. Lehpekah chuan a dik thlap tawh ang.. Mi chwwhho)