Amanda 4

BOSS AMANDA.( Episode 4)

Ziaktu: Toni Râlte

(Story dah lo karin dah kan tum dawn nia. Like leh comment lamah lo tang ve ula aw. Nuam ka tiha ka taimak chhoh zel nan, in support ka phût ve tlat. In tan vek a ni lehnghal. Boss Amanda hi a hming kan phuah hmain case pathum vek kan chinfeltir tawh a. A hmalam chhiar duh tan, file ah a awm kha.. In chawh 😎

A dawhkana a phone chu a ri ral ral a.

"Hello, Detective Amanda" a ti thawp sat a. Lehlam thusawi erawh ka hre thei lo. A dah a. Min rawn en a. Nui sak chungin, "Kan chhuah a ngai" a ti a. A ding nghal a. Kei pawh ka inperh tho at. Tun tum chu bike in a lo kal a, a bike han start vel chu hmuhnawm tizetin ka lo thlir leh pek a. A sunglass changkang zet chu kuai hniamin, "Min melh hlum i duh te anih loh chuan, min rawn zui rawh" a ti leh sak a. Ka zui ve nghal zat.

Bawngkawn lamah kan tlan a, Bethesda Hospital kawtah kan ding a. Hospitalah chuan kan lut dawn emaw ka tih laiin, a thlanga kawng pengah chuan kan inzui thla ta hnak hnak a. Step atanga kal peng lehin reilote kawng peng kan zawh leh hnuah Building hlui lam lek lek tawh kawtah chuan kan ding ta chat a.

"An va reh si ve" a ti sap a. Ka ngawi reng. Eng buaina nge kan hmachhawn ka hre lo va, tul a tih hunah min hrilh mai ang chu. Kawngka chu a kik dat dat a. An rawn hawng ta a. Nu valai, sam kir chhup mai, thinchhiat hmel tak nen kan inhmachhawn ran mai.

"Ka pi, Amanda ka nia,  hei hi ka Asst Samsona a nih hi" a ti zang vah a.

"Aw.. A ni maw.. Lo lut rawh u.. Hawh u, lo thu ru.. Bawiha pa, lo chhuak teh.. Hei police an lo thleng" a ti nghal chûl a.

Room atang chuan pa ber niawm tak chu a lo chhuak ve nghal a. Pa sang angreng tak, kul deuh khun mai, hmeltha lem lo tak a ni. Anmahni pahnih bakah choka lamah chuan tleirawl thau lam hi a awm bawk a. Chu zawng chu.

"Thil thlen dan chu a bul atangin min han hrilh dawn em ni ang? " pa ber va melh zauh pah chuan a ti a.

In chhung chu a reh dûk mai. A khuh kharh a. "Ni e, kan buaina hi a tirah kha chuan eng emaw mai mai vang anih ringin kan han tlangzarh duh lo kha a nia. Kan mualpho lel ang tih kan hlauh vangin. Mahse, hei a ruang kan hmu ta mai si a. kan fanu hian i case chinfel dan te lo hriain ko ve phawt ang u a tia, kan rawn ko ta râwih che a ni e.

Ih.. Englo a nia, ni 3 liamta khan kan monu chu a bo tawp mai a ni. Tukthuan ei dawn pawha a la rawn thawh loh vangin anu hian va kaihthawh a tum a, an pa erawh a tih fo danin exer a la leh a, a thianpa Bena ten an pi lung an phun dawn vangin a puih nghal tur thu a nu a rawn hrilh a, an rooma a nu va lut chuan a va hmu ta mai si lo va. A rawn thawh lawk loh avang khan a damsam meuh lo a nih kan ring hrim hrim a, a chhan chu a rawn mo tirh atangin anu hian a thawh khalh ngai meuh loh vang a ni.

Khaw nge a kal ang tih chu kan inzawt tawn hlawm a. Kan hre mai si lo. Anu hian an pa chu va biain ani lah chuan "Ka thawh lai te chuan a la mut kha" a lo ti bawk si. Ani hi a damsam lo inthlahrung hi a lo haw ru daih mawni kan tia, a chhungte kan va bia a, a kal loh thu an lo sawi bawk si. Kan mangang ta deuh a. Thenawm hnai te kan han zawt a. A kal bawk si lo. Kar hmasa khan a phone hi tuiah a thlauh a, siam turin kan dah bawk sia, call mai ngaihna a awm bawk si lo. An pa kan ko haw a, ani pawh a mangang ta viau a. A thian thenkhat te nen an han zawng kual thuak thuak a. A vâng hrep bawk si. Kan han sawiho a, mipa dang nen an tlan dun a ni thei ang em tih te.. Zawng ru thoin mi dang pur buai rih lo ila tiin thu kan titlu a.

Mahse, nizan khan thil rim chhe tak hi a rawn nam huk zel a. Kan kawmthlang khu inhmuh angin kawr a nia, an bawlhhlawh paih a nih kan ring a. Mahse, kan thenawmpa saw a lo lut a, "Pu Siam, thil rim chu in hre ve em? Rim pangngai niin ka hre lo" a rawn ti a. Tichuan,Bawiha te nen kan pathumin kan zuk kal ta a. A lo nám tawh bawk a, kan zawng hmu thuai mai. Thisenin a bawh khat vek a, a ril a lo tla pur bawk a, Kan monu Tei ngei a ni tih erawh a hmai a lo la chhiat lem loh vangin kan hre thei. Kan uak tuar tuar a. Bawiha phei chu a khawng titih. Mangang reng renga hun hmang kha a ni bawk a, a awm ve reng mai.. "

"Ka lo pawtchat lawk che. Anih chuan nizanah ruang in hmu a, Police in hrilh lo lai tak kha"

"Kha tak kha kan tihsual leh hamhaih luat vang a ni ber. Tei chhungte lam rawn kalin a ruang chu an la phei nghal rum rum bawk si a, kan lakah an lungawi lo tih lah a hriat reng, an fanu chu kan thah angah an ngai nge phei chu ka hre lo. Kan buai atalangin police hrilh nachang reng kan hre lo. Tei pa khan, "A ruang hi kan han vuiliam te te anga, police hmel zawng in la hmu dawn khawp e" a ti a. Nizanah khan an vui nghal chuk chuk a, a nám tawh em vangin. Keini pawh kan va lang ve hram tho va, a nuam duh lo angreng khawp mai .. tukin thleng khan police hmel hmuh kan lo inring a, in rawn lang ta mai si lo va, keimahni zawkin kan lo call tawp mai che u anih kha.. "  A ti ta charh charh a.

"inleng pawh in nei lem lo a ni maw? "

"Nei ve nak nak e, an reh lai tak a nih hi.. "

"In fapa chu hmuh ka va duh ve aw"

"An nute in lamah a la tâp a. Hawnpui kan tum sateh a, a duh si lo va, kan hawnsan ta ringawt a ni. Anihna takah chuan keini pawh la awm ve tur chu kan nia, apa sawn mei nei zet zetin min tawngkhum fo mai a. Nuam kan ti chiah lo a ni ber""

"Ka hrethiam.. Anih chuan saw lama kan phei phawt chu a ngai anih hmel"

"Ka pi, kan monu kha kan that miah lo ania. Bawiha nen thla khat pawh an la innei tling lo va, a fel kan tiin hei a nau nen phei chuan an innel viau tawh asin" Nu chuan a lo ti chul a. An monu thihna chu an tuar ve hle niin ka hria, a fanu nen phei chuan an mitmeng a bui lâk mai.

An in chu kan chhuahsan a. Tei te veng Chaltlang lamah kan inkhalh leh a. Tun tum zawng mi pawh an lo tam tawh e. Tei u mipain min lo danwgsawng a. A pa te kovin an room lamah kan lut ta diak a.

Tei pa chu pa thinram hmel deuh, meng rum deuh ûl a ni a, anu erawh ze zawi lam nu te ngo ving veng a ni.

"Engvangin nge an lo koh ve ngawt che u a, rinhlelh loh nan an ti a ni ngei ang"  apa chuan a ti nghal tûn tûn a.

"A chhan chu i fanu kha an that miau lo a ni" Boss pawh chuan a ti mah mah a ni. A la hrechiang si lo. Ka lo îp deuh.

"That lo se, engvangin nge a thih ang? "

"Engvang in nge an monu chu an thah ang? "

"Aw kan sawi ange, an inneih hma atang khan apa sawn a duh lo tawh. A chhan pawh kan hre lo. An inruk tak rawihah kha chuan a pawm ve mai mai a ni. A duh loh thu hi a fapa ngeiin Tei bulah khan a sawi tlat a n"

"Tei pasal, in makpa pawh kha kawm kan duh a. Min va kohsak lawk mai ta che" tiin Tei u chu a mitmei a. A chhuak nghal tharh a.

"Enteh, ka pu, in fanu in chân hi pawi kan tihpui che u. Rorelna dik pawh a phû. Mahse, chumi hma chuan kan zawhna hi tha taka min chhan a ngai a ni"

"Aw min zawt la" a nèm ve ta deuh.

Chutihlai chuan Tei pasal pawh chu a rawn lut ve a. A mit a bui lâk danah a tap nasa tih a lang.

"A hmasa berin in fanu hian hmelma a neih awm in hria em?  Han inhauhpui tahw emaw ngaihzawng lamah pawh. Amah tina duh tur ang chi"

"A neih awm ka hre miah lo. Amah hi tawmîm chi, tawm chet chet chi a nia. Thian pawh a ngah lem lo, mi pawisawi hlau tak a ni vein ka hria" anu zawk chuan a rawn ti a.

"In inneih hmain vauna emaw chuti anga rinhlelha ngaihbel theih tur in tawng em? " Tei pasal a en a.

"Aih, tawk miah lo. Ka nupui khan tu pawi mah a sawi lo bawk. " a aw chu rin aiin a nèm. Palian ve tak, bumro lek lek a ni a, a hmel chhe hran lo.

"Anih i chhungte lam nen Tei kha an boruak a tha vak lo niin ka lo hria a"

"Kan inneih hma khan ka pa hian nupui nei rual in la ni lo, inneih chu hmanhmawh suh u.. Ti zawng chuan min khap thin a, Tei bulah erawh neih loh ka hlauh em vangin ka chhung ten an duh vek angin ka sawi thung a. Mahse, mi thenkhat ten ka pa tawngkam chu lo la kawiin Tei duh lo hrim hrim angin an lo sawi a, Tei a duh loh vang ni lo vin Nupui neih vat kha a phal loh vang zawk niin ka hria"  Apa thlavang hauh pah chuan a ti a.

"Chuan, anih ti nge in inruk si? "

"Aw.. Kha chu kan inruk zan khan ka leng a, ka haw hnuah ka thiante nen zu kan in a, kan inhnial buai a, "Pa lo lutuk, ru hmiah ta che.. " ti lamin min fuihpawrh nen, ka pa hlau ta viau anga min ngai chu tlawmah ka la a.. Tei ka bia a, ani pawh khan a lo duh ve mai bawk sia.. Ka va ru ta mai a ni"

"Thla khat in la innei tling lo tiraw"

"Aw.. Naktuk tuk lehah hian thla khat a tling chiah ang"

"Aw le.. A nih leh a bo zan ti mai ang, an hmuh loh zingah khan i exer la tur i chhuah dawn thleng khan a la mu a maw? "

"Aw mu e, a mu tui khawp mai." A ti tawi tak a.

"Aw le.. Anih kan kal phawt ang. Chanchin thar a awm chuan min lo hrilh leh mai rawh u aw" hmanhmawh zetin a chhuak a. Ka zui ve nghal. A chet dan teh thut thin hi.

"Sam, ka tar ve ta aniang, engvanga an nupa room kha lo en miah lo nge maw ka nih le.. An lo singsa hman èm lo vang chu" a ti hmawk hmawk a. Kum 30 chauh a la nia, a la tar lo. Ka mitah phei chuan a tleirawl lawtlak. A la virgin ngei awm bawk sia 😁

Pu Siama te in lamah kan let leh a, Tei te ina kal tumin an lo insiam mek a. Hmanhmawh takin an nupa room chu kan endik a. Pu Siama hi a fing fel riau, engmah senghawi a la phal lo va, mahse, thil han chhinchhiahtlak em em phei chu kan hmu lo. Thlang lam tukverhah chuan a va dak veng veng a, a han hawi kual leh a, an khum bul side table chunga tarmit a glass lehlam tla hi a va lek chhuak a, "Bawiha tarmit anih kha, a vuah regular peih thin lo va, a glass pawh a tibo tih a hre tawp nang" anu chuan a lo ti var a. Khum hnuai chu a bih leh veng veng a, glass chu a zawng ni ngei tur a ni. A ding a.

"Umm.. Ka duhtawk e. Engpawhnise ka pi, thil thleng danglam deuh a awm chuan, min rawn hrilh hre vat ru aw" a ti a. Confi zetin a chhuak leh nulh.

Zanah a ina chaw ei turin min sawm a. Ihe lovin ka pawm leh hmiah. Eirawng kan bawl dun ngei. Artui a kang sar sar a, keiin vawksa ka chan mek.

"Rema (Tei pasal)  pa kha tualthattu a ni lo tih i chiang a mi?  Tei pa bulah khan i sawi ringawt sia" ka vei ruk reng chu ka sawi ta nge nge a. A khi sak a.

"Pu Siama kha a hmel tha vak lo naa pa rilru tha tak a nih kha.. A that lo vang. An chhungkaw hnih zingah hian tualthattu an awm lo. Mi dang an inrawlh" a ti a. Ka lo awih ve leh hmiah.

Chaw ei hmain wine kan lem dun a, awmhmun thawmhnaw mai mai a hak pawn a nalh!  Boss hian min nei mai se.. Aa.. Mahse, a rorum si a, ka tlin lo vang.

"Heiii.. Sama, a mak.. Min hisap vak zel suh. Chaw ei tawh ang" a rawn ti a. Zahah pawh ka la peih tawh lo. Min manchhuak zing tawh em mai.

Ka haw lamah chuan Chanmari kawnah intibuai an lo awm a. Ka hawkdak pheng chuan ka va thlir ve dâwk dâwk a. Tei Pasal Rema ka hmu tel nia!  A ruih hmel viau lehnghal. Ani nupui sûn mangang tal vel hi ruih lamah a ramtang ta a nih ka ring ringawt. A thiante pahnih nen an lo inpawt laih laih a, inrawlh chu ka hreh viau naa.. Min mawlhtu a awm tlat. Ka va pan ve a.

"Rema, min hria em?  Amanda Asst kha ka nia, hetia awm tur hi i ni lo asin. I nupuite in lama awm tur i nih kha" ka va ti a. Min rawn melh kâwk a. Inthiam loh hmel deuh hian, "Nia.. Aa.. Ih, ka lo rui ve deuh a ni e.. Ni e, ka haw dawn. Hei ka thianten min thlah dawn alawm" a ti tha ve mai a. A thiante chuan an hruai hrang a, an hawnpui ta nge an tlan liam ta a. Kei pawh peng khawtlai lo vin ka haw ta nghal a.

A tuka Rema chanchin vel chu BOss ka hrilh a. A ngaithla uluk kher mai. Chawhnuah kan chhuak leh a. Rema leh a thiante hmu turin.

"Nizan kha chu tlaiaah khan hei Bena leh Tka hi an lo kal a, min tawrhpuitu te an nia, min hnem thiam ve ber danin zu min khilai a, ka rui sual deuh a ni maithei. A zia lo khawp mai" a ti niah niah a.

"Bena hi em ni?  In nu bo nia a pi lung phun te kha" a ti sap a. A lo bu nghat a.

"Rema leh Tei inkarah hian tu emaw tlazep te an awm lo maw?  A thiante in nih angin eng emaw hriat in neih ka ring tlat.. Han ngaihbel tur" Bena a en a. Lu lian lam, hmaitluak tha zet a ni a, nula ho vin an star theih tur hmel a pu. Tka eraeh hang lam, ria lam deuh, meng pawng hlawt a ni a. A ngaihzawnawm fahran loh.

"Engmah chutiang kan hre bik lo. An inngeih a, an inngai hle bawk. Kawm pawh kan inkawm khât tawh angreng" a lo ti a.

"Nia, an nu a ngeih leh lutuk a, a thiante pawh min thlah titih alawm" Tka hmel chu a nui sâwng a, ruih nei te pawh a ang.

"Umm.. Engpawhnise, tualthattu hi kan la zawngchhuak ngei turah ngai ila, in thianpa nunna atan pawh a hlauhawm theih dawn vangin in lo thlithlai thin dawn nia" an bu nghat nghat a.

A vei thauh thauh a. "A mak angreng hle mai. Sulhnu engmah min hnutchhiag mang si lo. An pa exer la tur kal lai pawha mu reng si, khami kar leka a bo ringawt kha thil ni thei a ni lo. Rema khan dawt zawng a sawi a ni"
A ti dap dap a.

"A pasal chuan a that tihna a ni thei ang em? "

"Ka chiang ngam lo. A that anih chuan a chhan a awm ngei tur a ni" a hmela tumruhna chu chiang takin ka hmu.

Tei te inneih album kan en dun a. Nupa inhmeh tak zawng an ni. Rema chuan Bena kha thianah a hmang nghe nghe. Thil danglam engmah a awm bawk si lo. Rinhlelh tur an váng lutuk chu a ngaihthatthlak loh a ni ber.

Tei ruang hmuh atangin ni 4 a liam leh tawh. Eng kan la ang thei lo. Boss pawh tun tum chu a beidawng ve deuh em mawni aw ka ti. Mahse, lang lo lamah a che maithei bawk.

Zanin chu teichhuak ve teh ang tiin Cindy (ka biak ve thin)  te inlamah ka phei a. Zodin ka tlanpel tihin ka tlan let leh ngat. Hmeichhe pakhat Bridge bula lo ding chu ka hmuh tawh hnu a ang em a ni. Ni e, eng ang pawn inchei danglam mah se; boss Amanda ngei a ni tih ka hai hauh lo mai. A ruka ka en reng lai chuan mipa pahnih hian an bekbawr sur sur a. An bula car tawng tawh lamah chuan an kal a, an lut ta daih mai. Kan case chungchang anih ringin tihbuai ka duh ta bik lo va. Cindy te in lam bawk ka pan leh ta a.

A tukah fai sarin office ah min lo dawngsawng leh nghal thei. He nu tak hi chu a.. A pen chu a tuai vir hauh hauh a.

"Sam, thil mak i tih ber han sawi teh" a ti thut a. Ka lo hamhaih. Ka khi hui ringawt.

"Oh.. Sawi tur ber i hre lo anih dawn kha. Thil mak pawh a ni lo, ka hrilh tur che hi. Tei kha an inneih atanga ni 3na lekah a tlan mawle.. " a ti a. Thil mak em em zawng a ni lo. Chhan a awm ve a ni mai.

"A pa khan a sawi si lo va"

"Nia, ka va zawt tha leh a. Tuman a chhan an hre lo. Rema ruih vangah an ngai tawp. A haw ve leh mai bawk a" a ti leh thliam a.

"Rema hian a that a ni thei ang em?  A pawnlam landan ringawt hi a ni lo ve thei a" ka lo ti hmanhmawh.

"Maithei.. A chhan chu dâwt a sawi miau a"

"Dâwt a?! "

"An nupa rooma kan luh khan dawt a sawi tih ka hre nghal. An khum kha han mitthla teh. Lukham pahnih a awm a. Pakhat chauh a khuar bik kalh!  A sir zawk ami a nih nghe nghe kha. Pa zawk chu a sir lamah an mu tlangpui. Tin, an riizai kha a pharh tha tawk lo, pakhat chiahin a sin tih hriat takin a hlawm te bik. Tichuan, thil chiang tak chu khami zan khan Tei emaw Rema emaw hi kha khumah khan an riak lo tihna.. " a ti ta a.

"Chuan"

"Khamizan khan Tei chu thah a ni tawh. Atthlak lutuk tak maiin Tei pa khan a fanu kha postmortem tir lo vin a zan la lain a phum tir nghal a. Saw pa lungmawl lutuk vang sawn kan ke chheh a buai thlelh a nih hi. "

"Chuan tu nge kan rinhlelh ber tur ni ta"

"Rema leh Tei pa hi mark deuh ta ila, a makpa te chhungkua a rinhlelh nghal ngawt danah thah ngei niin a fanu chu a ring a, chutih a hnu engvangin nge postmortem nghak zo lo va a phum chung chung ang.

Tin, Rema chungchang bikah dawt a sawi tak kha a rinhlelhawmna, an inneih atanga ni 3na leka Tei a tlan ringawt pawh kha"

Thil chu a kal dik chho tan dawn niin ka hria a. Ka hlim leh deuh. Tei ruang an hmuhna hmunah kan zu tâp nileng deuhthaw a. Ka ning hman viau. A dap chikim si, lei te a hai thul.. A tawpah Tei ruang an hmuhna piah maia changel kung bulah a duh a hmu ta nge a khek raih a. Tei te rooma Rema tarmit glass lehlam tla kha niin a lang. Umm.. Rema chu tinzawn a hun ta riau.

"A glass kha a bona a rei tawh. Ka bun that peih loh vang hian ka pate ka dil hreh tawh a. A thar han lei leh pawh kha ka tum ta chiah lo a ni. Engtin nge khalai hmunah khan a awm ka hre lo'
Rema chuan zam miah lo vin a ti leh bawk si. Hmm..

Kan pahnih chauha kan awm hnuin hman zana Zodina ka hmuh thu ka sawi a. A nui hak hak a, "Bena leh Tka kha Rema mizia leh nunphung zawh fiah ka duh vangin ka hrai rui a. Ka inchei danglam loh chuan an sawi that duh ka ring lo mawle.. Rema bialnu hlui ang in ka insawi a, a nupui thihna tawrhpui viau ang leh lawmawm ka tih rukzia te ka sawi a. Mahse, an thianpa chu an tan ve lutuk..

"Thiannu, kan thianpa hian hmeichhiaah Tei bak hmangaih a nei lo, hetiang i lo lawm ve viau pawh a ngai lo" an ti hmiah. Ka duh dan tak chuan Rema kha lo kal ve se, hrai rui deuh ila khalhfala dawp kual vel ka tum kha a nia. A rawn kal ta bawk si lo va, ka vanneih asiamin Bena te kha ka hmu fuh ta hlauh a, tka lah nula râwp ta reng reng, ks emaw tiin kan intawng fuh kual vel anih kha. Eng tehchiam erawh ka ang ta lo anih kha.. Ka hlawhchham ti tawp ang. " a ti a. Thu a khuh ve ngai lem lo.

Rema hmu turin zanin chu kan kal dawn a, ka chaw ei kham kám ka thuah laiin min lo call a. "Sam, ka hlauh ang ngeiin Rema a thi" a rawn ti ta mai.

Rema te in kan thlen chuan a ruang chu postmortem tir turin an lo thawn tawh a. Tap thawm nen an ri nuai nuai mai. Pu Siam chu kan be fal thei ta hram a. A fapa thihna chuan a tina hle tih a lang reng mai. Anu erawh biak hleitheih loh khawpa a tah vangin kan tum buai lo law law.

"Chhun lamah khan Tei thlan siam leh khawhar in riak te ho nen tlai lama chawhlui kil an tih vangin a phei daih a. Keini pawh tlai lamah kan phei tho a. A thiante nen rui angreng takin chaw an lo ei a. A rui fo hi ka khak chakna a rei tawh angreng a, remchang ka la hmuh loh bakah a lusun hlim te a ni a tiin.. Rei vak lo kan awm hnufual ve a. Innhriat angin Tei pa nen kan la inbe hleithei bawk lo nen, Mamiin hawn a rawt sek bawk sia, kan haw a.

Zing lam a ni mah zawk ang, dar khat velah kan kawmchhakah an insual buai deuh a, ka han tei chhuak ve a, ka hlauh ang ngeiin Rema te bawk an lo ni. Rang takin a thiante nen kan hruai thla a. Veng danga a thianten an zu in honaah "I nupui sûn kan lawm anih ber hi, min khilai bawk sia" ti zanwgin an lo sawi niawm tak a ni. Ani rui lungpuam tawh kha a thinrim a, zu rui ho tih fo dan angin a tawpah an inbakkaih ta hial a nih hmel.. Tikhan an rawn in um zel a nih awm kha..

Tha tetein a mu ve mai a. Tka leh Bena pawn an hawnsan. Kei hi ka harh vâng bawk a, thawm ri dup in min tiharh leh a. Dar 4 a ri tep. Ka beng ka han chhi ngawrh a, a reh leh tlawk tlawk sia.. Ka bengchheri a ni ange tiin ka muhil zui leh mai a. Zinga a nuin a va kaitho tur chu a lo inkhai reng a lo nia!  A rak chul a. Kan han lakthlak chuan a lo thi fel der tawh a ni" a ti dap dap a. A chiâi lutuk lo chu ka ngaihsan phah viau.

Boss hmel chu a tur khai mai a. Biak ngam pawh a ni lo. Rema room chu kan han enfel thuak thuak a, amaha inthat ni mai tura ka ngaih laiin Boss chuan a endik rei mah mah. Khum chu inhnuhbuaina sulhnu awm lo ang in a fel thlap a. Almira chu a va hai rawk rawk a, eng tak zawng ang maw… a duh a hmu lo a ni ngei ang. A khar tau hmak a.

"Ka pu, anih Rema kha amah a intihlum angin i ngai em?"

"Ngaihdan siamfel harsa ka ti khawp mai. Amah intihlum tur khawpin a huaisen lo a ni. " a ti sup a. A fapa chu a hriatchian hmel khawp mai.

Office-ah Rema thiante ho, a intihbuaipui te nen kan inhmachhawn thap mai.

"Nimina a awmdan kha a mak hrim hrim, chaw ei hma atang khan a phi sek niin ka hria. Rv ah kan zu down a. A show vek. Pawisa a ak nual. Apa hian a duat ve a, a ak tam ber. ani deuh ziah a, mak kan ti hran lo. Zanah khan lam belh a rawt tlat a. Kan zu kal leh a, hei Hnehzova te nen hian kan inhmu ta a, kan in ho ta a ni. Hnehzova lahin uangthuang takin a nupui hming a rawn lam a, a ngaithei ta lo a ni ber" Tka chuan a ti chuar chuar a. A ngui rawih mai. Bena phei chu a meng sen rám a, biak tlak a ni vak lo. Tette atanga inkawm an ni tawh bawk a, a tuar viau ngei ang.

"Kha thil kha ka duh vanga sawi pawh ka ni lo. A nuihpui ve mai ka ring a. Ka tidik lo takzet a ni. A show ve nasa bawk sia, ka kai phur mawl lutuk vang a ni" Hnehzova chuan a ti var a. A tawngkam a felfai phian.

"Tichuan,  i thinrim insum zo lo chuan zan laiah luhchilhin i va rekhlum a, inawkhlum angin i lantir tihna a ni thei mai em? " boss chuan a ti khauh a.

Meng phawk hrá chungin, "A teuh lo. Ka haw kha ka chatthla zui, a thih thu pawh Bena'n min rawn hrilh"

"Ka pi, Hnehzova bak hi rinhlelh tur ka hre lo, zu chu in thin mah se, Rema khan tu pawimah a sawi lo. I hriat tura ka duh bawk chu, Tei leh Hnehzova cousin hi Rema nen an nih hma khan an inzui ve nasa tih hi. Tichuan, a thah chhan tur pawh a awm belh tihna" Bena chuan a ti ta piap piap a. A thinrim tih lah hai rual a ni lo.

"Zuala nen chuan an inzui ve thin ngei, mahse, zuala pawn nupui a nei tawh a, engvangin nge chutiang vang maiin ka thah ang. Ka thianpa ve tho ania sin" Hnehzova ve thung.

Boss chuan a hawtir leh ta dial a. A ngaihtuahna a kawm leh melh melh aniang, pawn lam a thlir leh ta veng veng mai.

"Tei thattu nen khan mi thuhmun an nih ngei ka beisei" a rawn ti chang rât a.

"Rema kha amah intihlum pawh a ni thei" ka lo ti ve koh a.

"Postmortem result kan hre tep ang.. Aa.. Hei a rawn thleng mai alawm" tiin lehkha an rawn pek chu a bih nghal vat a.

"Ka rindan chiah, Morphine tam tak a thisenah kah luh a ni a, a thihpui a nih hi.. Tun tum zawng kan hlawhchham tawh lo vang. Rema hmuh kan tum tih hriain Rema hian a thu hriatte kan hnenah a sawi a hlau a, a dah tha leh tih a chiang reng. " a ti hmak hmak a.

"Rema chhungte emaw Tei chhungte lam atangin emaw an nih i ring em? " ka ti ve a.

"Ka ring lo ve ve. Mahse, Tei pa saw chu enthlak deuh tulin a lang. A mitmeng rèm râwm sawn pawisak a nei lo tlat" a ti ta a.

Kan hnuchhui lai chu a khirh telh telh ni maiin ka hria. Tualthattu hi a fing viau aniang e.

"Pu Siam, ka rawn tibuai fo che a, a inthlahrunawm viau mai. Mahse, zawh hmaih palh che lian lutuk ka nei atin ni.. " Boss chuan Rema pa bulah chuan a ti a.

"Ee.. Inthlahrung reng reng suh u. Kan fapate nupa in rorelna dik an hmuh theihna a nih phawt chuan" a lo ti ve mai a.

"Tei kha ngaihtuah kir ta la, a bo hma zan, a bo zan kan ti zawk dawn nge khami zan khan eng nge a tih a.. Inah a awm char char nge.. Kan va hre duh ve"

" ngawi rawh aw.. Hmm.. (A mit a chhing duar duar a)  ngawi teh, khami zan khan kan meeting daih tak e, ka hawn chuan an lo mu vek tawh. Sente, lo kal teh.. I U tei bo hma zan khan Tei kha inah a awm em? " tiin a fanu tleirawl kha a ko a.

"Au Rema nen Roomah an awm reng a, an inhnialin ka hria. Mahse, a hnuah tv ka en laiin an lo chhuak dun a, anu chu pi Zingteii dam lo kanin a chhuak daih a. Chuan, Au Rema chuan, "I U Tei te inah kan phei lawk dawn aw.. " a tia. An chhuak a. Anu a lo haw thleng pawn an lo haw lo. Kan mut tawh hnu, apa a lo la haw hma siin an lo haw. An thawm atangin ka hria" a ti ta a. Boss chuan a chal a dawm vawng vawng ringawt.

"Tun tum chu ka che phelh tlat a ni.. Min hrethiam teh u" a ti ringawt a.

"Kan ina in lo kal khan min zawh ka ring a. Minnzawt bawk si lo va" tleirawl chuan a ti ta reuh a.

"Tleirawl fel tak i ni e. Anih leh an lo hawn chuan an tawng thawm i hria em? An inbe thawm te"

"Aih, kan mut tawh vangin thawm an dim ve aniang, an inbiak pawn ri mang lo vin an phun a. Mahse, an lo haw ngei tih chu ka hria" a ti ve tlat.

"Aw kan lawm e. Tihi chuan tualthattu chu kan rek chhuak thei turah ngai ang" a ti a.

Rema te chhungkaw Album kan en a. Ka en kual ve satliah. Danglam tehchiam ka hre lo.

"Ka pi, Rema khan natna benvawn a nei em? Na em em lo, mahse, rawn chhuak ve zauh thin ang hi"

"Aih, a neih awm ka hre miah lo.. "

"Anih han ngaihtuah kir vang vang la, a nunah thil thleng eng emaw awm tawhin i hria em?  Danglam eng emaw tak"

"Hmm.. Chutia sawi takah chuan kum 12 anih vel lai a niawm e, zan khat an tuition kal haw hi Bena nen sawn an rawn tlan lut a, ramhuai kan hmu tiin. Reife chu a buai phah a ni. A hlau em em a, a taksa deh hlek te khan a phu zawk zawk zel. Ramhuai kha an lo hmu tak tak nge apa hian a ngaiho tlat a, mahse, a reh chhawm ve mai. Chuan, a nupui neih hma kar hnih velah khan kan safe karchhiain Pawisa a lo ru chhuak nual a. A tih ngai reng reng loh a nia, mak kan ti khawp mai. A chhan kan zawh lahin Nupui ka nei dawn sia, thian ten min dil dawn a.. A tia, mahse, thil pangngai tak chu a ni lo" a ti a. Ngaihtuahna siam dan pawh ka hre lo e a.

"Bena, ngaihtuah kir teh, kum 12 vel in nih laia Rema nenna ramhuai in hmuh vel kha.. " Bena chu a cher kuam mai.

"Aw.. Kha mi zan kha ka theihnghilh thei bik hleinem. Kan sir te in atanga kan chhuah hnu lawkah meizial kan zu ru a, thlanmual kan kal tlang thin a, kan hlau bik lem lo. Chuan, thlanmual kan thlen chuan min tawk zawngin mi pakhat a lo kal a, a dum vek a, mak deuh maiin a taksaah chuan kan kal tlang ringawt!  Mak tak a ni. Kan rak ta hlut a. Kei phei chu ka dawih zawk lehnghal. Kan tlanna lamah kan lum deuh lehnghal. Min rawn um ni ngeiin kan hria a. Mahse, kan au vak vak a, saw lai thlanmual hnaia awm te khan an lo hre pha a, minnrawn pui ta hlauh a ni" a ti ta a. Mak ka lo ti ve hle.

"Anih an inneih dawn hnaiha a pawisa ruk kha i hriatpui em"

"Aih, a hnuah a nu sawn min hrilh a, a chhan ka zawt chhuak thei bik lo"

Huizzz.. He case zet chuh!  Ka hne tawh. Boss mood pawh a fuh hleithei lo.

"Sam, Damdawiinah ka kal dawn a, i duh chuan lo va chawl hahdam rawh" a ti a. Lawm takin ka pawm. A bula chettlat chu nuam ti viau mah ila, ka mut a chhuak em a ni.

A tuka office-a kan lehkhathawn dawn chu a hraw viau!  Pentui senin lian zet hian, "Rema leh a nupui thihna i chhui hi bansan rawh. I man dawn chuang lo. " tih a ni tlawng mai. Boss chu a hlim hmel viau lawi a!

"Mawl lutuk" a ti hlak a. Kutziak hraw zet chu uluk zetin a bih bawk a.

"Ka pi, lo kal vat teh u" Pu Siama aw ah chuan thlaphanna piah lamah beiseina ka hre tlat.

"Bena pawn kut a tuar a ni" a lo ti ngjal tawp a. Bena pain min kohtir a lo ni. An ina kan va phei chuan, a lu an lo tuam bur a, a kut dinglam chu a lo awrh bawk a. A hmai pawh a khem nian mai. Hlauhlawp hmel a pu bawk.

"Ti nge damdawiin lam in pan pui loh? " boss chuan a ti sap a.

"Amah hian duh tlat hek lo. Kan inah ka him zawk ang.. A ti mauh sia.. "Apa chuan a lo ti vat a.

"Bena, tu lak atangin maw i him ang? " boss a ni.

"Rema leh Tei te thattu lak atangin. Kei pawh min thah a tum ve a ni. Kha ramhuai khan" a lo ti khur hlak hlak a.

" Hmana Rema nen in hmuh ramhuai kha maw? " boss mitmengah chuan engmah a hriat theih loh. A zawhna ho ho ka lo tihsak ve khanglang a.

"Aw.. Ni e, kha ngei kha.. Nizanah pawh khan a chalah khan chhu vak lo ila chuan ka rawn tlanchhuak thei lo vang. " a la hlauh hmel kher mai.

"Eng nge thleng.. Fiah takin min han hrilh teh"

"Umm.. Nizan khan ka thiannu mimi te ina leng turin ka chhuak a, hla a lo zir daih avangin Rema te inah ka chhuk leh a, min ngai ve bawk nen, kan titi ta reng a. Dar 9 velah ka haw ta a. Innhriat angin kan in leh Rema te in inkarah kawr angreng a awm khu.. Khulai chu kan tet lai atanga kan hlauh thin ania, tunah chuan in a awm tawh a, mahse, ka la tih tho. Chuan ka pel fel chiah tihin ka hnung atangin minnrawn bawh a, ka rak tuar a. Ka lehhawi chuan hmana kan ramhuai hmuh ang chiah khan a inthuam a, a hmel ka hmu thei lo. Min hnuk a, ka au ve chuan ka hria.. Tuman an hre lo nge chuan min khawih ta hrep mai a ni. Ka lung hmuh hmasak ber chuan a chalah ka chhu ta vak a. Hmanhmawh takin ka tlan chho ta a ni. "

"Khu kawra awm Pu Dinga te khu an awm loh lai, an nute khuaa an zin lai tak a nia" apa chuan a lo ti var a.

A inah kan awm a. Coffee a in a.

"Sam, ngaihdan i nei tawh em? " a ti thut.

"Aih" ka lo ti. Ka chhang rang ngei mai. A nui sak a.

" Kan case chu ka rin loh lam daihin a tawp dawn anih hi.. Nang pawn mak i ti viau ang. Tunah chuan Pu Siama kan dâwp a ngai" a ti ta mai.

"Pu Siaman a monu leh a fapa a that tihna em ni? " ka lo ti hû a.

"Aih.. Ani hian kawng min kawhhmuh dawn" ka lo thaw huai mai. Pu Siama hi ka ngaina ta riau aniang. A fing fel em a..

"Khai le.. Pu Siam, i fapa hian rorelna dik a hmuh theih nan i thuruk kha sawi chhuak tawh rawh le.. " a ti a. A lo meng â huih mai.

"Aa.. Khatin mak ti vak suh. Thuruk tih lemah i fapa chungchanga i hriat ruk kha mawle.. Tei nen an inneih i phal loh chhan nen pawh a inzawm kha mawle.. "

"Aa.. Ni e, aw le.. Ka lo zep rei deuh a ni maw.. Chuvang chuan em ni ka fapa kha thah a nih? "

"Maithei"

"Aw.. Khatia Tei nen an inngaihzawn hma kha chuan ka fapa kha mipa pangngai angah ka ngai a, rinhlelhna tur ka hre lo. Tei nen an han inzui a, iaina ka nei hran lo. Ni khat chu a hna dilna atangin hmanhmawh takin min rawn bia a, a file lachhuaka a document pawimawh pakhat chu a thla la turin min rawn ti a. Ka va zawng a. Ka hmu ta ngei bawk a, ka va thawn ta nghe nghe. Chhuah mai ka tum lai takin thil mak deuh ka hmu ta a. A file ka lakchhuahna Almirah-ah chuan hmeichhe thawmhnaw maksak zet, pheikhawk sang em em mai te ka hmu ta a. Ka hai zel a, cd pakhat hi a lo awm a. En chaknain ka khat a. Ka'n en nak chuan, kareii.. Kan fapa hi tuai a lo ni reng mai tih ka hmuchhuak ta a ni. A sex hmanpui chu a lang ve lo va, mahni fapa neihchhun, mipa pangngai ang lo taka a chettla lai hmuh chu a rapthlak turzia in hrethiam ang. Ka thinrim a. Ka rilru a na bawk.

Lo hlap hrep kha ka duh a. Anu pawh ka hrilh ngam lo. A hrisel si lo va. A tawrh ka hlau a ni. Ka inngaihtuah nasa, a lo haw a. A hlim hmel te kha en hrehawm ka ti a. Ka ngaihtuah thui zel a. Ka fapa a ni a, ka hmangaih bawk. A mualpho ka duh hek lo. Tei neih a duh thu a sawi bawk nen.. Ka rilru a buai takzet. Tei chu a neih chuan a mualpho mai ang tih ka hlau a, ka hel leh ta thut a nih kha. Engkim ka hria tih a hriat chuan a zak dawn lutuk si, ka ngaingam ngang lo a ni.

Tei a rawn ruk tak ráwihah khan beiseina ka nei ta a. Mipa angin a awm maithei asin tiin. Ka hlauh ang ngeiin Tei chu ni 3na lekah a tlan kha a nia, rindan ka nei a. Ka sawi ngam si lo..

Hei hi ka fapa thuruk chu a ni e. Khawngaihin anu leh anau te chu hrilh lo hram ang che u" Pu Siama hmel lan dan chu a khawngaihthlak kher mai.

Mahse, Rema kha Gay anih vang ringawtin tualthattu niawm tur ka la zeldin thiam chuang lo..

"Sam, i inpeih maw.. Tunah chuan kan mi piangsual, tualthattu chu i va man tawh ang hmiang" a phur hmel kher mai.

"Tu nge tih ka la chhuizawn thiam chuang lo"

Beidawn hmel taka min melhin, "Thil tam tak i hmuh vei nen" a ti sap a. Kan chhuak zui nghal a. Ka rin lohna deuhah kan lut.

"I thiante nupa i thah avangin man i ni e" inringtawk zetin Boss chuan a ti a. Lo awm ve dangte chu an ding suau a ni ber..

Bena hmai chu a sen tawlh tawlh a, a insehruh nasa mai. Bena ber kher hian a that a maW?! A va mak em..

"Le.. Bena, khatin na tuar hmel pu lui duh suh. I nat tak tak lohzia kan hre ve ve. Thudik sawi la, i thawnthu chu kan ngaithla chak tawh ania"a ti leh dap dap a.

"Nang phiangsen hian dawtin min puh suh. Engvangin nge ka thiantha ber ka thah anga.. Ka ngai ngawih ngawih asin" a mittui a parawl kuang a.

"Ni e, i ngai viau ang. A bialnu kha a ni tlat a!  Tiraw.. A dik em?  I nawm amaka i chaih kual theih that tura thutlukna siam a harsat turzia ka hrethiam asin. Mahse, i him nan a ngai tlat bawk sia"

"Uichonu, ka thianpa chu ka bialnu maw.. Khanglang a che" a na tih reng hrechang lo niawm takin a ban chu a phar hliai a, dawhkan a chum rap bawk.

"Awii.. I kut kha a na ta na nge? " elsen zet hian a lo tihsan hmak. Ka lawm thei he nu chezia hi..

Inhrechhuak leh hnuhnawh niawm takin a ban chu a dawm vut roh a. Ka lo nui ve kei pawh.

"Hmana kum 12 in nih lai khan kha ramhuai khan a pawngsual che u a. A dik em?  Chu chuan in nun a tikhaw lo zo ta a ni. Rema kha chu damkhawchhuah tumin theihtawp a chhuah a, mahse, nang erawh chuan hmeichhia aiin mipa i ngaina zawk a, i thianthaber Rema ngat phei chu i ît hle anih kha. Tichuan, in lo thanglian zel a, zu te in han in chho a, remchangah hmangin Rema chu i thlem thlu thei ta a. Tenawm takin nuam in chen anih kha.. Rema tak pawh kha a piangsual tawh avangin a hnar zo tak tak lo. Video te hial i siampui a. Fing takin i hmel erawh i tilang duh lo. Mahse, kha video-a i kut phah chunga kutchuk awm kha kei chuan ka hmuh hmaih awzawng lo. Khami vid ka en hma khan ka ringhlel tawh che.

Rema te room kan enkual khan a tarmit glass avangin ka rilru a buai a, tin, doctor lehkha ka hmu bawk. Kha eraeh ka thup bo lui. Doctor kha ka va hmu a, Tei khan a lo pan ngei. A chhan pawh a pasal chuan amahah duhkhawp loh a neih vang nge ama lam dik loh vang tia a inrinhlelh a vangin. Tarmit glass, Tei ruang bul maia ka chhar avang khan Rema ka ringhlel ta a. Gay ani ang tih ka la ring phal lo. Ka rin dan chuan ngaihzawng dang a nei anga, Tei lakah inlahrangin sex pawh a hmanpui duh lo ni turah ka ngai. Chu thil Teiin a hriatchhuah avnga dahbo ni ngeia ka hriat vangin kawm ka tum nghe nghe anih kha. Mabse, chu chu i lo hre ve si a, Rema ka dâwp i hlauh vangin Rema pawh i dah tha ta a ni.

Engtin nge ka ringlelh theih che tih zawhna i nei ngei ang. Kut i tuar hma leh ramhuai in hmuh zan i sawi hma kha chuan ringhlel bik nang. Kum 12 in nih laia ramhuai in hmuh dan i sawi kha a lem lutuk a, ka nui chhuak lo kha a mak!  Kut i tuar ta a. I kut tuar dan leh ramhuai sawizawm i tum kha i mawlna. Engtin nge awih se min tih?  Tualthattu chu mi dang anga min rintir i tum vena a ni tih ka hrethiam. Mahse, ka awih beisei lutuka ramhuai i rawn hmehbel khan ka ringhlel zual daih zawk che.

Khami zan kan lo kal zanah khan zan reiah ka rawn kal leh a, Sama hi chuan a hre ve lo, in inrawk tum an awm thu zingah pawh a lar em kha. I roomah rawn lut ruin kan inbuan thiak thiak kha. I. Nat lohzia ka rawn fiah mai anih kha.. Police hmel hmuh tam loh i duh vangin in ina mi lo luh thu pawh report i duh lo va, hospitala awm i duh hek lo.

Tin, a hmalamah kir ta lawk ila, Zodina hmeichhe tenghneng zet, Tka nena innkawm zan kha ngaihtuah la, i thianpa Rema thlavang hauh i tihnatzia leh bialnu a neih i phal lohzia kha mak ka lo ti daih tawh. Tka thung kha chu a rui bawk a. A ngaisam em kha..

A fiah vek lo maithei. I sawi ve a hun tawhin ka hria.. "

"Pii, Rema kha gay pawh lo nise, kei hi gay ka ni ve tih fiahna i nei lo tlat. I fing viau naa"

"I luhlul mang e… Rema i blackmailna video kha thlir nawn leh i duh em ni? " a ti ta khawl khawl a.

"Ka kutchuk vang ringawtin maw.. Mipa tam tak kutchuk nei ve an awm thei asin" a la ti hram a.

"Aw le.. I doctor rawn thin kha koh kher i phût em ni? " zaidam takin a ti ta a. Bena chu a ngawi hmak. Luhlul chu a sâwt lo tih a hria ani mahna. A aw a thian kharh kharh a..

"Khami zan khan Rema leh kei chu pawngsual kan ni a. A na em em a, Tuma bulah kan sawi ngam si loh vangin Ramhuai hmu angin kan insawi ta ngawt anih kha.. Kei chu ka dik lo chho ta zel a. Rema chuan a nihna hloh a duh lo va, mipa dik tak anga awm a tum thin. Mahse, ka ît a, mipa dang pawh ka mutpui nual mai. Zan khat kan rui chu Rema ka ît a zual a, ka khawih kual vel a, mak deuh maiin a lo tang miah lo va, videoin ka cover ta nghe nghe anih kha.. Mahse, kan hmang zawm lo rei, ka piangsual chho zel a, Rema chu hmeichhia anga awmtir te suangtuah thin. Ka blackmail ta thin a. Vid kha tihdarhah vauin ka duh angin ka awmtir ta thin a. A thiantha ber ka ni chung khan a hmelma lian ber ka ni bawk. Tei te kha neih ka phal lo va, mahse, insiam that a duh em vangin a nei lui a. Ka rilru a na sin.

Kan inhlat telh telh a, keiin ka ngai si. Tei thih zan khan chhuahpuiah ka sawm a, Tei nen an inhnial phah nghe nghe. Tei te inah an leng phei tih ka hria a, ka lo cháng tawp. Ka rui deuh bawk nen kan inbakkaih ta deuh a. Ka duh loh pui pui ka sawi chhuak ta a. Tei chuan mak a ti a, rapthlak a ti bawk. An in lama hawna a chhungte hrilh a tum avangin ka man bet a, motorah ka nawr lut a. Rema pawh a rawn lut ve. Zemabawk lamah ka tlanpui a, Tei chu engkim ka hrilh ta law law a. A tap zawih zawih mai. Sawi chhuah a tum tlat avangin kawng awmchhun nia kan hriat hmangin kan dahbo tawp anih kha.. Engkim ka ti vek. Rema chuan min lo thlir tawp. A ruang kha paih nghal daih ka duh a, mahse, motor a rawn tlan kal ve reng bawk nen, kan hawnpui leh a, an kawmthlang kawrah khan kan paih ta a ni. A roomah kan lut a, riah ka tum. A phal lo va, ka chhuak tau. Ngaihtuahna dang ka nei bawk a, a tarmit glass lehlam chhuata tla kha ka chhar a, an huanah khan ka zuk paih leh ngat. Ka fihlim ta tiin thawveng takin ka awm ta a.

Rema kha a rilru a buai chho a, zu a in char char bawk sia. A ka a ang ang tih ka hlau em em a, a bulah ka tâp chawt ta reng a ni. Tichuan, Nangman Rema i kawm dawn tih ka hriat khan chet a ngai tih ka hre ta a. A thisenah damdawi chiu lutin inawkhlum angin ka lantir a nih kha.. Rei tak kan inkawm tawh avangin an kawngka khu hawn dan ka thiam ve tawh bawk a. Awlsam takin ka lut thei mai a ni. A bak chu i sawi ang kha a ni e. Hlauthawng reng rengin hun ka hmang a, tunah chuan ka thawveng huai tawh e"

Engkim chu keimahah a chiang thei chuang lo. Mahse, Boss kha ka hriat phak lohna hmunah a lo thqwkrim hle tih ka hre thei.

Ziah hmaih leh kim lo lai a awm maithei. Min hrethiam ru, Boss ang chiahin tun lai chu ka haihawt riau a. A lehpekah case dangdai tak nen inhmuh kan tum leh theuh dawn nia.