FAQ
Login
Register
PortalSTORY AWMNAMizo Story DahkhawmnaDETECTIVE STORY
Search
HEI HI I HMUH CHUAN WEBSITE THARAH I AWM TIHNA
Ad blocker off kha theihnghilh lo ang u aw, ad blocker off loh chuan ads a click theih loh
WRITER TEN KHAWIN VAWI KHAT CHIAH IN POST THAT LEH LAWK A NGAI TLAT MAI. DATA UPDATE A LAKLAWHAH A TANG TLAT A, reader ho an buaina a rei tawh si a, kan reader te tan i post that sak leh lawk mai ang u.
Post Reply
SearchAdvanced search
NgaiaSite Admin
BOSS AMANDA 3 BY Toni DA Ralte Ahmangaihi
Quote
Share this topic on
Unread post May 31st, 2016, 4:25 pm
BOSS AMANDA – 3
.
(HNUCHHUNA HAUTAK)
.
“Engvangin nge a rual deuhthawa an thih kher? Inngaizawng an nih vang em ni ang?”
.
Nula ruang chu ngun zetin a thlek vang vang a; inawkhlum anga lantir tumna chu a lakah chuan a hlawhchham. A inkhai hmain a thi tawh tih a hrethiam tlat. A thinhnuna chemte hnuhma chu hmuh a hrehawm kher mai. Nula hmeltha em ema sawi theih tur chu a nilo naa, an veng mi leh sa te chuan an veng nula chhuanvawr leh viak tha tak anih thu an sawi a ni. An inkhawm bang a rawn haw har ta deuh a, apa ngaihthalo chuan a nuta nen va zawngin, an insak mek (an in atanga hla vak lo, kawng thlanga awm) bul kawng pengah a Bible chhar a ni a, ngaihthalo takin an zuk zawng a, an inrel hnuaiah electrict cable hmanga inkhaiin an zuk hmu ta a ni. A puanbih lai chu tla thlain boxer nen a lo awm a. A kawr hmalam chu thisen hlirin a khat a ni.
.
Nula inkhawm bang, inawkhluma hmuh ringawt chu thilmak a nih tawh vei nen..an veng thenawma a bialpa, thla thar maia a pasal ni mai tawh tur, a room tukverh atanga zuangthla an han hmu leh ta zel chuan, titi a titam ta hle mai. Lianmawia (Numami bialpa) pawh hi a zuanthlak hma hian thah anih tawh loh paw’n sawisak a tuar fe tih a taksa hliam dan atangin a hriat tlat! A room hi inchung lama awm a ni a. Thawm hi a inhriatphak lutuk loh a. Inchung lama room nei ve a farnu chu Lunglei lama a zinlai a lo ni hlauh bawk. An kawmthlanga ri dawp thawm an hriat avangin A nu leh pate ngaihthalo chuan tukverh atangin an zuk en a. An kawmthlang hi a awih lutuk lova, chuktuah huan zimte a awm a, a bak chu tuihawk luankawr a ni deuh mai. Chuktuah huanah chuan zuk tla lutin, ka pawh chhawn lohin a thi zui ve nghal a ni.
.
He thil thleng hi Dt 21st, may, 2014 (sun) zing dar 1 leh a chanve bawr vela thleng a ni a, Numami thih hun kha dar 11 vel a ni maithei, a thi kha a lo khang hman tawh a, a rei thawkhat ang. Boss in min lo call angin Numami te in lamah ka phei a, kan la awm lai mekin a bialpa thih thu chu kan hre zui leh ta mai a ni. Boss mitmeng pawh a buai ta nak mai. Numami thihna hmunah khan kan va kal tha leh a. Zawn nei niawm takin lei chu a bih dun dun a. Thisen far pheuh pheuh a lo awm a, chu chu chhui zelin, hnim pik karah a chhui lut a. Torch light in a va en thuak thuak a. Phur zetin hnim karah chuan a bawkvak phei a, ka lo thlir ringawt! A rawn dinchhuah chuan CHEMTE zum leh hriam hmel zet, 8inch vela sei, a fawng dum hi a rawn lekchhuak ta a. Tualthattu hnuhma leh sulhnu kan hmuhtheih awmchhun anih avangin a lawmawm thawkhat viau mai.
.
Lianmawia thihna hmun lam kan pan ve leh a, engmah kan hmu lo. A room lamah kan chho a, engmah an lo la singsa lo bawk a. Hnuhma zawng a awm chiang e. Khum chu nasa taka tal ani tih hriat takin a lo chuar tawm tun a; plaster dum sei lutuk lo hi chhuatah a lo let reng bawk a. Lianmawia chu rak chhuak theilo tura a ka char phui ani ang tih ka ringhlel lo. Thisen erawh hmuh tur a awm lo thung. Room kiltin chu a fang kual a. Tukverh bul, bangrelah chuan glove var a lo awm a..a melh ta reng a. Kutkawr leh Chemte te chu forensic lama thawn turin min ti a. Endik anih hnuah pawh tu kutze thla mah hmuh tur a awm lo.
.
Chemte zawrhna dawr zawng zawng chu kan lutchhuak tawhin ka hria, mahse, kan chemte chhar leitu erawh kan hrechhuak maithei lo. A tawpberah Lianzahluta dawrah kan lut ta a. dawr te takte a nih vangin beisei a bo hle. Chemte chu kan han entir a, a han lek kang vel a, thil hriatchhuah tum niawm takin a chhing duar duar a.
.
“Hmm..ka chemte zawrh ngei a ni e. A leitu pawh ka hria” a ti ta a. Putar mahnise, beiseina min petu anih vangin ka hmu tha ngei mai. A lehkhabu te chu a han keu thuak thuak a. A kutin a kawk thla zai zai a.
.
“Hei le..nimin piahah ka hralh a, a leitu chu Lalnunhlua, chawnpui veng a nih hi” a ti ta mai..phur zetin Boss chuan a han en ve a. Chawnpui veng tih loh, a phone number vel erawh hmuh tur a awm lo.
.
“Engang hmelpu nge?”
.
“Ria lam a nia, kamiz uk leh duma tial a ha, hetia ka hriat theih chhan pawh pawisa nawi kir tur ka neih loh avangin ‘ nei mai rawh’ min tia, ka hlep bakah cheng 70 in ka hlawk phah a” a nui huah huah a.
.
“hmu leh ta la, I la hre thei ang maw?’
“Ka hriatna hi a tha ve lutuk a lawm..nula, ka la hre thei ngei ang”
.
“Numami hian hmelma a neih awm ka hre ngailo. Tupawh hia kawm thei a, heivang hian mi fak pawh a hlawh ve thin hle. A bialpa nen an inkarah buaina a awm ngai ka hre lo bawk. Harsatna chhete chu an tawk ve tawh a, vawikhat chu Numami hian ‘ Pathian kohna ka dawng’ tiin missionary-a inpek a tum thut thut a! Lianmawia hian a remti chiah lova, inneih vat a duh ve tawh bawk nen..chutah chuan an buai ve deuh a. Mahse, missionary interview-ah a tling ta lo a, khatatang khan a sawi leh ta ngailo a, a pawm thiam viau niin ka hria, a thih hma chhunah khn Mawia nen an lengchhuak a, a rawn haw pawh a hlim sarh mai. Danglamna a neih awm ka hre lo. Zanah inkhawm turin a chhuak a; banah pawh a la rawn haw loh avangin hla an zir leh nghal dawn anih ringin a pa nen chuan kan mutsan a.Mawia pawh a rawn leng lo; dar 1 vela ka harh chu ka va zung a, mami room lam chu ka va thlek kher a, a lo la haw awzawng lo mai a! apa ka kaitho a, Mawia biak a tum a, a tlang thei bawk silo, Anni hi an lo tlan dun ta mai em mawni le kan ti rilru a, ,mahse, thla thar maia innei tur an ni bawk si. Tichuan zawng turin an chhuak ta ngawt mai a ni” Numami nu chuan a ti dam dap a. Anu aimah hian apa hian a tuar zawk emaw tihtur a ni a, an induat pafa hle nia sawi ani bawk a, a awmlo lutuk lo e.
.
“Bawiha hian tu pawimah a sawi ngailo a sin. Khamizan khan inkhawm banah an group an inmhmukhawm a, sumtuak dan tur vel an sawi khawm a. Kan inah hian a ni nghe nghe. A thiante pahnih chu awm hnufualin inkhel an en ho a, kan mutsan ve mai a. Mahse, a thawm kan hriat leh chuan tikhan kan hmu ta mai a ni. A mahah danglamna ka hmu hauh lo, nidang aia a pangngailohna reng ka hre lo..ka fapa thattu hi a phutawk hremna pek ngei ka duh a ni” Lianmawia pa tawngkam ve thung a ni. Numami thattu leh Mawia thattu hi mi thuhmun an nih a rinawm , a chhan chu a rual deuhthawa an pahnih kher a thah anihna chu a ni.
.
“Helai hmuna min ko ngawt hi a chhan ka hre hauh lo ania” A ti bal bal a. Putara sawi ang khan a ria thal mai a, hmeltha fahran chu a ni bik lo mawle. Boss chuan amita en kal chungin, “ Lalnunhlua maw? Ni 20 khan Pu Lianzahluta dawrah chemte I lei tih kan lo hria a, I chemte lei ngei mai chu tualthahna hmunah chhar a ni. Engvanga khang inhmangaihte pahnih kha rawng taka that nge I nih le?” Chupa mitmu chu a pawng zawrh zawrh thei hial mawle! A hmela maktihna leh hlauhthawnna lo lang chu kan lo thlir reng a.
.
“Ka pi, chemte chu ka lei ngei mai. Tualthahna thlen zan khan ka thianpa te inah ka riak a, zinga ina ka hawn chuan a lo awm tawh reng reng hleinem! keimaha inluah ka ni a, ka in ah chuan lut an awm ngei tih hriat takin ka kawngka pawh karchhiat a nia, thildang an lak phei zawng ka hrelo, rawk tur thil hlu ka nei lem lo bawk a”
.
“Chu chu ka awih I ring amaw?” Boss aw chu a chang kher mai.
.
“Thudik ani ka sawi ni. Keipawn mahnia inluah ka nih vangin inven ve nana ka lei a nia, ka ui ngawt a sin. Tualthah duhna rilru ka pu ngailo hrim hrim. Chubakah thi te kha ka hriatmi pawh an nilo bawk, thahna chhan tur ka neilo a ni” a inringtawk ta hle tih a hriat mai. Tualthat duh hmel zawng a pu miah lo naa tualthat duh hmel pu te pawh hian tual chu an that vek kher lo bawk si!
.
“Chuan, I in rawk thu chu report kan dawng miah lo mai” Boss chuan a ti leh khauh a.
.
“Chemte bak kha a bo silo a, a mualphothlak mai mai ka tia” a ti ve mai a. Dawt a sawi nge sawilo tih hriat tum takin Boss chuan a melh kar a. Chupa chuan zam hmel a pu hauh lo naa, nuam a ti chiah lo tih chu a hriat. Kan sezawl chhuah leh ta phawt a. Tualthahna a thlen zana a bula awm leh a riahna te chhungkaw thusawi atang chuan Nunhlua hi tualthattu anih a rinawm lem loh. Amah hi kum 30 awm vel, Hmun Hmeltha khua a ni a, Mobile Repairing hnathawk a ni a, pawisawilo, nun ho ve tak, kohhrana inhawlh lawr lutuk lo, a changa lem ve thei mai a ni a . A in chu thiante lenluh tamna, chaw eikhawm nikhua pawha an venue ber a ni thin. Khamizan khan a rui viau mai a, a thianpa, a in atanga hla lo te te inah chaw a ei a. a ruih em avangin a riak nghal a lo ni. A thianpa leh a chhungte chuan a chahthlak hmak thu leh zingah pawh a tho hma lem lo niin an sawi a, thuhretu a nei miau si a, man ngawt dan a awm lo.
.
“I chemte lei lai emaw chemte I nei tih hria an awm em? Tih zawhna chu..” Kan inchungte inah ka peng haw a, ka hmuh a, an hmu vek, an ni bak hria an awm ka hre lo” a ti bawk si. A inchungte lah pa ber tih loh chu hmeichhe rual thah, nunnem hmel fe fe an ni hlawm a. Chhungkaw pa ber lah damlo bawksawp, che hleitheilo a lo ni chhap nen..rilru a buai ta khawp mai.
.
Ni 5 a liam leh ta ruai mai. Boss nen office-ah coffee kan in dun a, tualthahna chungchang chauh chu a ngaihtuah niin a lang, biak pawh ka be ngam mang lo. A phone a rawn ri ral ral a. A meng phawk zuau chu ka hmu a, ka va thut hnaih a.
.
“Sam, Nunhlua leh a bialnu an thi ve leh tawh, tirawh le, tun tum zawng hnuhma chiang deuh hmuhchhuah tur a awm tawh ngei tur a ni” a ti fiak thak a. A thinrim tih a hriat, a che deuh sawk sawk a, ka hamhaih kher mai. Ti nge a ruala mi pahnih an thih leh tak?! He tualthattu hi mi naran ngawt zawng a ni hauh lo mai le..
.
Nunhlua chu inchungnu sawi danin, thu kan zawhfiah tukah khan an khuaa haw turin a insawi a, tlai lama haw a tum thu te a sawi ani awm e. A chhan pawh apa cancer a zual thut aniawm e. Chumi ni chawhma chhung chu a bialnu nen a inah an awm dun a; a bialnu hi a awmna veng ami tho a ni a, thlahpawlh (a nu mizo, a pa vai) a ni. Chawhnu lamah Nunhlua haw tur chu a va thlah a, mahse, thim thet thetah Nunhlua chu rawn let lehin, “Ka haw na tur sumo kha alo chhia a, naktuk zingah kan chhuak leh zawk dawn anih chu” a ti a. Chaw te pawh inchungah a ei nghe nghe a ni. Tichuan, thawh hma a duh vangin a mu hma a, zingah an inchungnu a zuk chhuk chuan a in chu a lo inkalh tawh a, a lo chhuak tawh anih chu..
.
Chumi ni tho chuan a bialnu unaupa a lo kal a, a nau chu a rawn zawng a ni awm e. A ngaihna an lo hre silo; an inru ta mai aniang tih ngaihdan an nei a. A bialnu chhungte pawn engmah an sawi hrih lo. Call an tum lahin switch off a inti zel bawk si a! ngaichang phawt mai ang an ti ve aniawm e. A tukah chuan, inchungnu chuan Nunhlua nu a call ta a. “A lo la haw lo hrim hrim, kan be pawp thei silo a, rawn biak che u kan tum mek zawk a” a lo ti a!! chutah pawh chuan ngaihthat lohna an la nei lem lo. A bialnu nen hmundangah an tlan dun anih an la ring fan a. A tukah Inchung tleirawl zualteii vawkchaw pe tur chuan thil rim na tak a hre ta a. Vawkin hi Nunhlua in thlangah a awm a. An vawkin vang anih ringin a silafai nghe nghe. Chhunlai velah nu ber vawkchaw zuk la chuan thil rimchhe tak chu a hre ve leh a. Nunhlua in atang a lo chhuak ni tlata hriatna a nei a. An pa han punin, chabi spare an kawl chuan kawngka kalhna chu an hawng ta a..
.
Chhuatah Nunhlua leh a bialnu Zoteii te chu insi rialin thisen nena inchiahpiah nuaihin an lo mu a! an thi chiang tawh hle tih a hriat. Nunhlua chu a ril rawn lawr chhuak khawpin a dul zaithler a ni a. zoteii erawh a bek dinglam a dup ul a, a chal a kak duai bawk.Nunhlua ringruh chu a tliak tih hriat takin a thle hawl a, Zoteii chu a saisir deuh a, Nunhlua chu a va kuah titih a; Nunhlua erawh a zangthal thung. Ruang pahnihte chu rapawm viau mahse, an lainatawm riau! An awmdan kher kher chuan thinlung a dek tlat nia mawle..
.
Boss chuan inchhung chu a dap kual a, hmeithai ina zang (hihi) zawn ang vel a ni. A hmuh duh leh beisei chu a them takngial pawh a hmu hauh lo. Tuisilna ah chuan thisen khang tawh a val kulh kulh a, tualthattu insilfaina thli anih a rinawm. Chubak engmah a awm lo chuan Boss thin a tirim teuh a, a mitmeng de sawr sawr chu a hlauhawm takzet a ni. Chak zeta motor khalh chung chuan, “Sam, he kan miveh lai hi mi piangsual diktak a ni, sa chah kan tawktarh loh chuan midang nunna a la leh duh mai ang, ka kawm chak tawh khawp mai” a ti nghat nghat a. Hmalam a bih ngur a, hnehna chan ngei chu a tumruh kher mai.
.
“Ka pi, Nunhlua khan hmelma a neih awm ka hre lo. A bialnu chhungte hian an be tha lutuk lova, mahse, thah duhna tur khawpa an huat ka ring lo. “ Nunhlua thianthaber, Maste-a , tlangval lian lam, hmelchhe lo tak chuan a ti a. Numami te thih zana a riahna kha a ni. A thianpa thihna chuan a thinlung a tina hle tih a hriat mai.
.
“A haw tur thu kha a hrilh che em?”
.
“Aw, anu in a lo biak lai pawn ka awm ve reng alawm..a hawnna tur sumo driver kha ka thianpa ve tho ania, ka biaksak nghe nghe; mahse, zanah khan min lo bia a, a hawna tur a chhiat leh si vanga zinga a hawn tur thu leh leng tura min duhthu a ni. Keipawh chu ka inbual zo a, ka va leng phei a, mahse, Zoteii nen an lo awmdun a. “thianpa, ka hruai haw ve mai dawn mi le, a haw ngam tawh bawk silo” a ti nuah nuah a. Ka rui phur chuan, “Inru nghal zaih ula ani mai lawm” ka lo ti mai a. Reipawh ka awm lo, mut te an duh hma takin ka tia, ka chhuak thuai a. Zingah khan a haw mai turah ka ngai a. Zoteii chhungte pawn Zoteii awmna min lo zawh pawn “Engmah ka hrelo” ka ti ve tlat! An inru anih ka rin vangin..khatia an thuruk lo sawi bawrh bawrh kha nuam ka tilo a. “
.
“Khamihnu khan in inbe ta miah lo tihna ami?”
.
“Umm…diktak chuan thian tha tak nimahila, pawimawhah lo chuan text message han inthawn vel hi kan uar lova, vawihnih chu call ka tum a, a off tlat sia! Chanchin min rawn hrilh tho ang tiin ka try leh ta lo a ni”
.
“Numami te thihnaah khan I thianpa kha a inhnamhnawih lo chiahin I ring amaw?”
.
“Ka thianpa hi ka hrechiang ve viau chuan ka hria, khamizan ngat phei kha chuan ka bulah a awm a, a chatthla hmak a, che chhuak thei chi ziazang a nilo, ka mutthilh hlana a lo chhuak te anih ngawt loh chuan..zingah lah ka thawh hnu fe ah a lo tho a, rinhlelhna chhan tur ka hre lo a ni.”
.
“ A chemte lei kha I hmuh pui ve em?”
.
“Hmuhpui nang aw..chemte alei thu leh inven nan a tih thu erawh a sawi a, ka fiam hlut nghe nghe, a hmang ngam tak tak chuanga ka rin loh avangin” a ti a. “Khawngaihin ka thianpa hi rorelna dik pe hram ang che, puih inngaih phawt chuan, ka inhuam reng a nia” a ti zui a..Boss chuan lainat hmel fe in a melh a, a bu nghat a. Mastea chhuah hnu chuan chair a thuin, pawnlam a thlir leh ta veng veng mai.
.
“Sam, Mastea kha ala tangkai maithei, Zualteii kha ka va be lawk ange” a ti sap a. A chhuak ani nghal mai.
.
Ni 2 aliam a, chanchinthar a la awm lo. Zoram mipuite chu tualthattu hre chakin an phun mur mur tawh a. Thil thlen dan hi a dangdai em avangin mipui rilru a la peng lo theilo a ni. Numami leh Mawia chhungte nen pawh kan la inbe pawp reng bawk a. Boss erawh a nui ngailo a, office-ah pawh a awm tam meuh lo.
.
“Sam, Dr Hrekima ka va hmu a, kawng chu a eng tan e” a rawn ti lut a, tlemin a mitmeng pawh a phur ta deuh e. Engvanga Pu Hrekima chu va hmu nge anih tih ka hrethiam lo a; zawh buai vel pawh ka tum buai peih lo. A chinfel hma chu min hrilh thui leh dawn chuang lo.
.
“Zanin chu maw, ka bialpa I nih angai dawn ania”
.
“Takzet!!” ka meng pawng leh hlawt ang chu..A nui saih a. A bu nghat bawk a, zawhna zawt lo turin min ti bawk a. Kan case vang a ni tih hre tho mahila..ka phur ru em em tih tu nge hria? Vanlalfingi hian a hria anih ngawt loh chuan..hehe..
.
“Sam, min duh em em tur a ni..i hrethiam em? Mipa in a hmangaih ngawih ngawih hmeichhia a en angin min en tur a ni..a harsa viau angem?”
.
“Aih..teuh lo lutuk” ka tihruala a nuiri zet chuan min va run tak..ka rilru a hre leh pek tawh anih hi..
.
Zanah chuan nalh taka incheiin Zualteii (Nunhlua in luahna te) te in lam chu kan pan a. Kwrfual sen, a malte thleng vela chhing si, fit fahran a ha a, a sam chu a thlah mawl tawp a, a kawngfek rat leh a mawngbawr vawng lah te chu han hrawm nawk nawk hi ka chak a! a hnute kawh lah, khalh tam ala ni lovang tih ka rin ruk chu dim baksak lova piai nawk nawk atan ka it a ni. Huiham..kan thleng a, in duh hmel em emin inchhung kan lut a. Zualteii chuan min lo dawngsawng a, Zualteii b’day party a nih avangin keimah ang rual thalai 15 vel zet tur chu an lo phu mar mar a. Boruak a zangkhai hle..Mastea pawh ka va hmu a, min lo kiai sak a, Boss nen plan an nei ang tih ka ringhlel lo. Eng nge kan hmachhawn dawn a..tu nge kan veh mek tih engmah ka hre lo. Ka hriat a tul anih chuan Boss in a sawi mai ang.Tuna ka tih tur awmchhun chu boss bialpa rinawm tak nih a ni mai e.
.
“Min lo hrethiam lawk teh u..khawngaihin..zanin hi kan thiannu Zualteii pianchampha anih rualin, a piancham pual hian kei leh ka bialnu tan hriatreng tur thil tih ka duh a. Ka hmangaih em em, ka boss ni bawk, ka tana rinawm leh ka duhthusam hi nupui atan sawm ka duh a ni..” ka ti a. Ka aw khur lo chu ka lawm hle. Boss hmachhawn zawnga ding chunga chutiang thu sawi chu normal a har ve fat a sin..sawi turin min ti miau sia lawm.. A lo nui sak a. Amitah chuan a lem telloa min ngainatna ka va hmu a, tak taka lawm..ka hmu chiang lutuk..ka thingthi a, Zungbun ka phawrh a, “Amanda, min nei ta che..khawngaihin” ka ti a. Thawm chu a reh hmak a, ka khur chhe lo chauh a ni. Mastea aw hian, “Yes rawh..vat “ a lo ti a..Midang chuan an lo zawm ve tliar tliar a. “Tehreng mai” a tih rual chuan ka ding a, a kutah chuan zungbun chu ka rawlh lut a, a vawikhat nan, ka lo suangtuah thin leh ka mut leak nachhan tamber , ka boss hmui chu duhthawh em emin ka fawp ta..!! a thlum a ni..a thlum..
.
Ka mitsir chuan, Zualteii ka va hmu a, midang an nuih sang hlawm laiin a lo tum hmak hian ka hria a..mahse, ka ngaihtuah peih lo. Ka bialnu pawh a ni hleinem..Chumizan hun chu hlim leh nuam takin kan hmang a, Boss leh mastea inbe urhsun zet chu tihbuai ka duh lova, midang ho chu ka kawm ve liam liam a. Zualteii bialpa niawm tak, hang ren run, nelawm ru riau si nen zu no kan dawm dun a..Nunhlua thihna chungchag kan sawi a..
.
“ Kei chu Zoteii chhungte lam hi ka ringhlel tlat mawle..mizo pure an nih lohnaah pawisak an neilo viau thei tlat! An farnu an hauhna avangin tualthah chu pawi an ti lo ve maithei a ni” a ti a. Ka va mawl tak, Boss pawn ti nge a ngaihtuah chhuah loh chu le! Nunhlua kha mitmeitha an hmuh vak lo anih tak kha mawle..boss hrilh ka chak tawh kher mai.
.
“Amanda, hmaih kan nei, Zoteii chhungte kha rinhlelhna chang kan lo hre miah lo a, kan mawl lutuk” ka ti sawt sawt a. Ka rui deuh bawk nen, aman motor a khalh a.
.
“Ka be vek tawh a lawm” a ti sap a. Engmah kan sawi dun leh ta lo. A inah kan lut a, “Riak ve mai rawh, I rui sia” a ti satliah a. “Aw” ka lo ti hmiah..A inbual a, ka rilru a lo hmul leh thin..a inbual lai taksa huh hliam te chu ka lo hisap tak tawk tawk a! kei hi inbual harh ka ngai chiang lutuk. Awmhmun kawr hain a tei ngauh ngauh a. coffee no a dawm pah bawk a. A ngaihtuahna a kawm leh tawh anih pek saw..Romantic lo si..mutsan daih ang..hmm..
A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***
Show post links
Top
NgaiaSite Admin
Quote
Unread post May 31st, 2016, 4:25 pm
Thaw ham ham ka hria a, ka hmai bulah a ni. Ka meng phal lo a. Ka hrawk bawk a rawn hmet kal rulh rulh a, ka rilruin ka lo nui mai a, a va zeilo tak..tiin..Mahse, vawilehkhatah na zetin ka hrawk chu a rek bet ta tlat mai..ka meng ta hlawl a! a thim ruai a..engmah ka hmu fiah thei lo. Min rehna kut chu laksawn tumin ka han dap a. Amanda kut nel thep a ni awzawng lo mai le..ka mangang ta..Ka au chhuak thei der silo. Ka thaw a sa phat phat a, ka ke ka leng awrh awrh a, ka rui a la reh fel chiah silo a, zawi hun lai tak nen a lo innang bawk nen..ka che thei der lo. KA thi ngei dawn anih hi ka ti a…engkim chu a phe ruai tawh..a thim riai riai a..thawm ri sawk ka hria, mahse, a thim..
.
“Sam, Sam” ka chalah chuan tuivawtin a lo dep a. Ka men ruala min ngaihtuah hmel zeta min lo en rengtu hmel avang chuan thih hlauhawma awm fo pawh a zia deuh a lawm ka ti hman hial..mahse, bangbo hmel takin ka hawi a hu hu a..,”Engkim a tha vek e” tih pahin ka biang a rawn chul a. A tho a. Ka inbeng kang ve nghal a. KA thil hmuh chu mak ka ti kher mai..
.
Nikhaw hrelo tih hriat zetin chhuatah chuan a lo mu kawm ngal a, a mutna bulah chuan paper weight a let bal bawk a. Boss a rawn kir leh chuan no pahnih a rawn chawi a, pakhat chu min pe a, Coffee a lo ni a. Boss chu a biang dinglam a duk raih a, a vung tan mek tur chu vurin a dep pah a.
.
“Eg nge thil awmzia?” ka ti thei hram.
.
“Ni e, sam, ani hi tualthattu a ni”
.
“MASTE-A hi maw?!!” ka ti hrawk a! mak ka tihna chuan ka mumang emaw min tihtir thei hial mai..
.
“Damlohna I nei a, nasa taka damlohna..i taksa chu a dam a, a him, I rilru erwh a rethei a, mi khawngaihthlak tak I ni e. Engvanga ringhlel che nge ka nih I hre chak tiraw? Numami te thih zan khan Nunhlua kha I bulah a riak a, Nunhlua kha a inah a awm lo tih hretu awmchhun I ni. A chemte kha I hmuhpuilo tih I sawi a, Zualteii hian a vawkchaw pe turin chemte I lek va va lai a hmu tlat che alawm..Nunhlua inbual hlan anih vangin Nunhlua khan I hmuhpui tih a hre lo thung. Mahse, Numami te thihnaah kha chuan ka la ringhlel lo che. Nunhlua te I thah tak chiah khan rinhlelh tur zawngin kiltin ka dap a. Thil awmlo leh nih duh loh hmel apiang hi rinhlelh hmasak ka ching a, mahse, ka tisual khat khawp a sin.
.
I thianpa thihna chungchanga kan inkawm ni khan dawt sawi zeuh zeuh lo nila chuan, rinhlelh zingah pawh a tlar hnungpawl I luah tur. Nunhlua bialnu chhungte khan Nunhlua an duh vak lo niawmin I sawi a, ka va fiah ta ngat a. A lo dik ikhaw lo mai a. An inah pawh Nunhlua hi a riak fo tawh tlat! Zoteii pa ngeiin min hrilh a ni. Nunhlua hawn dawn zana I va len tum khan I haw lamin Zualteii I tawk a, “Mut a duh tawh a, a tho zing viau ang” I ti anih kha..Zoteii chhungten an lo biak che khan pawi tak maiin I tawngsual ta zauh a. “Nunhlua nen an inhau a, an chanchin engmah ka hre tawh lo” tiin. I intlawhkhalh lawk nasa ve khawp mai. Thia an hmuh hnuah pawh Nunhlua thah anih an rinhlelh nan I ti niawm taka ni. Mahse, I rilru a damlo ka tih tawh kha..i phelh phung a, I tladah a ni. Zualteii ka va biak ni khan, Nunhlua te thih hnu ni 1 a tang khan I va lan sek thu leh, a hma zawnga en ngai hleilo, an vawk te kha I va en vel thu a sawi a. I mi thah te ruang an hmuh tawh leh tawh loh I ngaihven animahna..I chanchin ka chhui chiang deuh a, I bialnu in a thihsan che avanga I rilru na mangangin depression I neih thu te, tun thlenga I la pangngai chiah loh thu te ka hria a. Pu Hrekima ka hmuh nachhan pawh kha a ni. Ani khan I chanchin chu min lo hrilh ve bawk a. I harsatna chu Mi inhmangaih takte hlim dun I hmu theilo a, thah chaknain I khat thin. Numami leh mawia te, Nunhlua leh Zoteii te thihna chhan pawh kha I hmuh laia inhmangaih taka an inlawm dun vang a ni..a dik em”
.
A chalah chuan thlan fim a bawl tawk tawk a..a thaw hawk a..”Le..tunah chuan, khang mi pali te I thah dan kha sawi tawh rawh le”
.
“Khamini inrinni khan, Numami leh a bialpa te lenna hmunah khan ka awm ve a. Ka awm ve tih hre chang lo lekin an inlawm a, an infawp a, an hmelhriatloh nimah ila, min zahna tlem tal chu neih ve tur a nia. An hlim hawr hawr lutuk khan ka bialnu min tihrechhuak a, khawhar takin ka awm phah a ni. Ka thunun theih loh khawpa chakin dahbo duhna chuan min nawr et et a. Chemte hriam tawka zai thler vek ka chak a ni. Chemte ka ngaihtuah rual chuan ka thianpa Nunhlua chemte lei kha ka mitthla nghal a. Pawisak ka nei tawh lo. Tichuan khamite kha ka zuiru ta a. An in awmna ka hre ta ve ve a. chaw eihmain Nunhlua chu leng turin ka ko phei a, ka roomah zu ka inpui a. A rui ta ngei bawk a. A chahthlak hlanin a inah ka va kal a, khatia tala ka tihchhiat kher chhan kha chu rawk anga a lan theih nan a ni. Chemte chu lachhuakin Numami te veng lamah ka kal a. Inkhawm an lo bang tawh a, ka vanneih asiamin, Numami chu thiannu te inah a lo pengkawi hlauh mai a. An inkawt thim chinah ka lo chang a.
.
A lo thlen chuan “thiannu, min pui thei angem? Ka bialnu in hliam a tuar a,puih kan ngai a ni..midang ka hrilh ngam lo, kan inru ve a..” tiin hlauhthawn hmel takin ka ngen a. Nula fing tih takah a awih hlek lo. Ngawi renga ina luh a tum a, a kutah ka man a, a auchhuak tur chu ka hup bawk a. Mi an lo kal avangin a hnunga chemtea tin chungin “ I chet hlek chuan ka vit ng che” ka ti a, a ngawi ve hle hle mai. Motorah ka nawrlut a. Ring tawkin a au tuarh a, ka tlanchhe hman thelh a ni. Mahse, an hrelo nge tumah an lo chhuak lo (numami te in kha a fal ve deuh reng reng bawk a, misualpa tan a vanneihthlak zel anih awm chu maw) ka phur ta a. A au dawn avangin ka chemte kenlai chuan ka va vit nghal thawih mai a ni. Rilru fim ka pu lo a, kmchang takin ka hre tawh lo. Zan reh hun ka nghak a, insak mekah khan ka pawm thla ta a ni. An in a ni tih pawh ka hre chuang lo. Tichuan inawkhlum anga an ngaih theih nan ka khai ta a. Ka mawl ngawt mai, Thisen a chhuak hnem sia, ka hlauthawg a, chemte kha ka paih a. Mawia te in lam ka pan leh ta a ni.
.
An in atanga kohchhuah dan tur ka hre lo a, luhchilh mai ka tum ta a. An kawngka chu ka han pawt a, a lo inkalh miah lo mai! Ka hawng a, ka va dak a, tumah an lo awm lo, mahse, tv ah inkhel a lo chhuak mek a, Bathroom lam ri rak ka hria a, awm an awm tih ka hriat vangin rang takin an fridge phenah ka tlum lut nghal a. Fridge chu a rawn hawng a, tui a in a. Tv a a off a, inchung lamah a chho ta a. Mahse, a lo let leh a, kawngka a va kalh a. Min hmu miah lo kha a mak ka ti keipawn. Tichuan rei fe ka nghah hnuah a mithilh tawh ringin a room lam ka pan chho a. Kawngka chu chhunglamah a lo inkalh a, vanneihthlak takin hetiang hi ka thiam ve zawng a nia. Zawitein choka lamah ka chhuk leh a, chemte ka la a, a kawngka kalhna chu ka karchhe ta a ni. A lo muhil tui hle mai a. Ka haw hluah hluah , ka thik a ni ber mai.
.
A dawhkana plaster lo awm chuan a hmui ka char a, a rawn harh a, a tal nasa hle, a chak ve bawk nen, kan in bei tawkhawp mai. Mahse, ka lian zawk a, ka bawhbet a, ka hnek a, ka tlawh a, a lu te chu ka khupin ka tauh chawrh chawrh a. A la thi lo deuh tihah tukverh ka hawng a, ka namthla ta a ni. A nu leh pa ten huan lam an zuk en lai khan, an hawn sa kawngkaah chuan ka chhuak ta nghal a, ka motor dahna lam ka pan a, ka haw ta nal nal a.
.
Zingah khan ka rilru a lo fim leh a, ka thiltih kha pawi ka tiin ka thla a muang lo khawp mai. Nunhlua ka thah chhan chu..apa damloh vanga hawn a tum thu min hrilh zan khan, Zoteii te inah ka lenpui a, an hlim dun bik em em a, kan hawn dawn chuan inthlah nan ka hmulo emaw tiin an infawp a. Ka thin akhei leh ta zar mai. Mahse, ka thianpa a ni a, insum ka tum ve nasa lutuk. A tukah khan a inah an lo awmdun leh a. Ka insum theihna apel ta, remchang ka zawng ta a.A hawna tur sumo kha ka cousinte ta anih avangin an kawtah a ding thin. A driver pawh ka thian ve tho ka tih kha..tichuan, sumo chu dar 2 a chhuak tur anih vangin hmanhmawh takin ka pan a. Ka cousinte bulah ka motor a chhiat vangin hman lawk ka dil a, workshop lam panin chhe lo pui chu chhia angin ka sawi a. Motor chinchang ka hre vak lo a, an driver ka ko phei a, zu ka khilai a, a ruih tawh em avangin, motor chu a chhia anga sawi mai tur leh naktuk zinga kal mai turin ka rawn a. A lo duh ve mai bawk a. Sumo chuan kan lengkual ta daih a ni.
.
Nunhlua chu a haw thei ta lo reng a. Remchangah la in, zoteii koh ka rawt a, a call a, a lo phei ve mai. Anni chu an hlim dun leh tawh viau a. Haw tur angin ka chhuak ta a. Zualteii bula zoteii awm ve thu ka sawiloh chhan chu nakinah buaina a la awm ka hlauh vang a ni. Dar 2 velah a inah chuan ka kal leh a, ka duhdan ang ngeiin an lo riak dun a. A kawngka chu ka kik a, aman min lo hawnsak nghe nghe. Rui lutuk haw ngamlo angin ka awm a. Inchungten kan thawm an hre phak lo tih ka hre bawk a, ka phur kher mai. A tui inzo rawn let leh lam chu ka lo bawh nghal a, Zoteii erawh a mutui angreng. A ringruh chu ka elh ngat ngat a, Nunhlua thahrui neih loh zia chu a taksa atangin inhria ang, ,a hamhaih leh chi-ai chhugin a ringruh chu ka elh tliak hman, a rak eih lo kha ka tan vanneihna a ni. Zoteii erawh a luah Nunhlua chempuiin a phek zawngin ka hlap a. Nunhlua dul ka zai thler a, an ruang chu ka rem tha a. Ka duh ang taka ka tih zawh hnuah ka kut ka silfai a. Ka chhuak ta a ni”
.
A rapthlak tih bak sawi tur ka hre lo e. Mission veng leh kulikawn mipui thinrim in an pawtsawm lo kha a vannei khawp mai.
.
“Ti nge min thah a tum ve kher?” ka hrethiam reng a, ka hrethiam duh lo lui!
.
“A chhan chu kan hlim dun em alawm”
.
“A rukin min lo zui anga, a lo lut dawn tih I hmuawk a mi?”
.
“Risk ka la mawle..khata awm ve hote kha ka rawih vek an nih kha..zoteii b’day tak tak chu karleh nilaini khi a nia”
.
“Ka nunna min chhansak a, ka lawm e”
.
“Ka bialpa I ni sia lawm..hehe”
.
Uluk zetin ka va melh a. kan mit a intawng siah mai.
.
“Sam, a lem nimahse, a tak a ang ka ti” a ti zawi sap a. Mipa ka nia ,,ka chet angai..ka va kunhniam a, a hmui sen hiam ka chuktuah dawn lai tak chuan ..a phone a rawn ri ta tleng tlenga.
Comments
Post a Comment