Amanda 14

BOSS AMANDA (Season-1)

Last episode.. 

Ziaktu: Toni Râlte

Nizan chu ka thianpa Káwka phai zin a lo haw a. An in hnuaiah kan va thli kerh kerh mai. Amanda a star thu min hrilh nghek lehnghal. Ka rilru te te chuan, "Thiana, perh ka zep hmasa tawh aw.. I tlai a ni" ka ti a. A lang erawh ka sawipui ve luam kha. Zingah lu na burin ka tho, ka ha ka nawh suah suah laiin ka phone a ri a, ka nuin a lo la.. 

"Aw hei a tho ve chiah, a ha a nawt mek" a ti a. 

Min rawn pe nghal, "Umm" ka ti satliah a. 

"News te kha i la hre leh pek na nge?  Zorampari a thi" a rawn ti nghat! Ka toothpaste ka lem thelh!  Tv ka va on nghal vat. Mahse, an lo puang zo tawh aniang. Ka chhungte reng reng pawh hi news te hi ngaihthlak ve thin tur a nia. Ngawng hlawm lutuk mai. Zorampari hre lo chu Aizawlah hian an tam lutuk lo mai thei. Mizo Idol atanga bul rawn tanin singer dang aia a ngam huai leh a video a dangdai theih piah lamah a zai thiam èm vangin a lar lawtlak a ni. Kei ngei pawn a zai hi ka phoneah ka dah hnem viau mai. Nula kum 21-24 lek a la ni nachungin a sum thawh chhuah chu tam ve tawh tak a ni. Chhingchhip khua niin, Aizawlah hian mahnia in luahin a eizawnna kawng a rawn zawh a. Aizawl khawpui atang lo hi chuan thil tih tak tak hi a har ve thin bawk a. 

Tukthuan ka ei sawk sawk a. Chak zetin Zorampari in luah lam pan chuan ka lim ta nghal a. A ruang erawh an lo senghawi fel vek tawh a, A ban rek a zai thi tih chu ka thu hriat dan a ni mai. Bathroomah hmuh a ni nghe nghe. A taksa dangah hliam engmah hmuh tur a awm lo. Mahni intihlum a ni lo tih fiahna tur a awm lo tihtheih a ni. An postmortem result a tangin a chiang mai ang chu. 

Office kan thleng a, Thingpui sen háng kan han dawm leh te te a. "Kan khawih zui tur niin a lang lo, a intihlum sia" ka ti hmanhmawh a. 

Thil thui tak ngaihtuah ang mai hian, "A intihlum tak tak em tih chu kan chiang mai ang chu.. Mahse, min lo betu rawn thlen hunah ngaih dan kan siam chauh dawn nia" a ti a

A sawi zawh rual deuhthawin roomah chuan tom boy pakhat leh tleirawl ngo ving veng, chhe lo zet hi an rawn lut ta a. He tleirawl hi chu a video-ah pawh a lang tawh tak e. 

"Thu rawh u, kan lo nghak reng tawh che u alawm" Boss chuan a lo ti var a. 

An thut fel hnuah,Tom zawk chuan, "Madam, ka thiannu thihna hi min chhui chhuahsak ngei la ka duh a ni. Amah a intihlum thei lo hrim hrim" a ti pa rût a. A hmel that vei nen, a patil chu ka lo ui. 

"Engtin nge a intihlum lo tih chiang taka i sawi theih? " boss chuan a lo ti khauh a. 

"Mahni intihlum tur khawpa dawihzep a ni lo. Amah kha ka hrechiang, bakah intihhlumna chhan tur a nei lo a ni" a ti ringawt a. A heh chu a liak leh zauh thin. 

Boss chuan, Zorampari phone chu phawrhin, "Tukin Zing dar 4:23 am a instagram-a a caption hi han chhiar chiang teh.. Hei hian ngaihdan dang min neihtir tlat" a ti a. 

Zorampari chuan, a muhil lai thlalak upload-in "Engtikah emaw chu ka la muhil hlen ngei awm si a.. Ka nghakhle" tih thu captionah a hmang a. Thih a chak nia ngaih theih a ni ve tlat a ni. 

Patil chuan, "Aw ka hrethiam. Hun harsa tak a tawng chho mek a. Social media ah an troll nasa a, a nunhlui te phawrhsakin a chet chhiatna an pholang chuai chuai a. Hrehawm a tih thu a sawi fô thin. Kan thiam ang angin kan hnem ve thin a, khatiang vang ringawta a intihhlum erawh ka ring chuang lo. Amah kha la naupang mah se, luhlul ve deuh mai a nia. A chhel bawk" a ti ta duah a. 

Boss chuan, "I hriatchian hmel hle mai. Thil dang lawk in hming pawh kan hre lo va, Zorampari nen in inlaichin dan lam te? " a lo ti a. 

"Aw nia, kei hi Lori ka nia, ka thiannu hi Makimi a nih hi. Zorami te nen hian nikum hmasa atang tawha inkawm chawt kan nia. A lar tirh vel atang khan anih mai chu.. Unau ang maiin kan awm thin" a lo ti a. Makimi erawh a la tawng miah lo. A lungchhiat hmel angreng viau. 

Boss chuan, "Aw le a tha e.. A chanchin pawh in hre chiang viauin ka ring a. A in luahna te, an khaw lama a chhungte nen an inkar te.. Engkim kan hriat atana pawimawh tur zawng zawng min hrilh theih tur ang chu min han hrilh teh u" a lo ti dam dap a. 

Lori chuan a aw a thian khak a, "Umm Zorami te khua Chhingchhip lam chu ka han hre ve em em lo. Anu hova awm an nia, a pa hi a boral tawh. Unau pathum an nia, Zorami hi a milai niin a nau hi a nu bulah a awm a. A u erawh Singapore-ah house maid in a han awm ve a. Zorami hian class Xii a pass tawh a, BA pawh IGNOU-ah a zir mek a ni. A in luahna pa saw Pa Rama kan ti mai a, Zarkawtah sawn Whole sale dawr lian deuh an nei. A nupui chu Nu Rengi a ni bawk a. An fel lutuk, Zorami nen engmah inhmuh thiam lohna an neih ka ring lo. An fate pawh an fel, phaiah an awm tam vangin kan hmu vak ngai lo zawk.. " a ti ta dap dap a. A tawngkam a felfai reuh khawp mai. 

Boss chuan a pen tuaivir pahin, "Ngaihzawng lam te" a lo ti zauh a. 

Makimi zawk chu a rawn tawng ve hlawl,  "Umm bialpa chu a nei ve thin a. Mahse, thla thum vel a liam tawh ang, an inthen a.. Khami hnu khan a neih leh awm ka hre miah lo. A ngaihsak zui tawh vak lo" a lo ti ve a. A aw thlengin a nu hnâp mai. 

"Okay, a bialpa pawh chu kan la hmuh tho a ngai ang. Tel vena nei thei awm apiang chu kan hmaih thiang lo.. Anih music industry lamah buaina te a tawk ngai em?  Producer nena han in hnial satliah ang te pawh" boss chuan a ti a. 

Lori bawk chuan, "Tawh awm ka la hre miah lo.. An be tha vek zawk. A thawh hlawk ber pawl a ni miau sia" a lo ti a. 

An chhuah dawnah chuan, Makimi chuan "Ka pi, khawngaihin ka thian leh ka unau ni bawk thattu hi chhui chhuak hram rawh aw" a ti a. A ngenngawl viau mai. 

Zorampari phone chu lek larh larhin, "Heta tang hian thil tam tak kan hriat theih beisei ang aw" a ti sap a. Facebook inboxah a lut hmasa ber. A chhan chu whatsapp app a nei miau lo va!  Hei tak hi a mak ka ti deuh. A whatsapp ve em em ang tih chu rin sa a nia, mahse, a thih veleha a whatsapp bo ta daih chu ni. Inbox lamah pawh boss rin ang ngawt kha a ni lo. Eng em em mah hmuh tur a awm tlat lo. Instagram lamah phei chuan hmuh tur a awm lo lehzual. Ni e, face book leh insta lamah Amah troll na post a tam viau. Kei pawn ka hmu ve fô!  Eng he huah ka lo ngai lem lo va. 

Swagliana troll pakhatah chuan, Zorampari ruak deuh keng kunga a awmna captionah "Officer choice, thenkhat te rizai lum tak ni mai mai atan chuan a uiawm reuh" tih a ni. Chu chuan ngaihtuah a tithui ve deuh. Mahse, a fb inbox lamah ngaihbel theih tur engmah a awm lo va. A call log- a fai phiar bawk. A galleryah lah a thiante nena an thlalak ho bak a awm lo, video neuh neuh a awm bawk. A ho nget ngawt hle. 

Postmortem result kan dawng a. Thu thar a awm ta. Zorampari chuan nau thla 3 mi a lo pai reng mai le!  A thih chhan dik tak pawh hriat a ni ta. A kawchhungah tur chi khat (a hming hi sawi a rem thin lo. Damdawi pahnih chawhpawlh, tur chak tak a ni)  hmuh a ni. Chu zawk chu a thihpui a lo ni. A banreka zaina hnuhma kha chu a thattu hian police tihbuai nan a siamchawp a ni maithei. Boss mitmeng pawh a phur ve ta deuh e. Zorampari ruang chu Chhingchhip lamah phurh chhoh a ni ta a. Keini erawh a thlan nghah niin kan chho ve. 

Chhingchhip leh Aizawl inkar hi Silchar leh Aizawl inkar ang vel nise ka va ti tak. Kha hun tlemte ah khan Boss chanchin tlem azawng ka hriat phah miau si a. 

Hmalam bih ngur ngur chungin, "Ka chanchin hriat chu i chak viau a maw? " a ti sap a. "Lutuk" ka lo ti chung. 

Za vak lo va nui in, "A ho viau asin. Kan khua hi chu ka sawi lo mai ang e. Kum 9 ka nih atangin ka pa nen khawvel kan hmachhawn dun a ni. A chhan i hre duh a maw?sam, Kan case hrang hranga uirena ka huat theihzia leh ka thinlung zawng zawnga ka vei thinzia atang hian ngaihtuah la i hrethiamin ka ring. Ka pa leh ka nau mipa te nen rethei takin nun kan hmang a, mi te hmuhsitna pawh kan tawng lo bik lo. Ka pa chu mi taima rumrut a ni a, ramhnuaiah kan cheng tam zawk. Mahse, Zirna thlahthlam ngawt chi a ni bik si lo va.. 

Kum 16 ka niha pawl sawm ka pass khan ka pa hriselna a tlahniam ta viau mai a. Chhungte belh tur kan nei vak si lo. Kan neihchhunte lah rethei ve tak tak hlir an ni si. Aizawlah kan rawn pem ta chawt a. Tlemin thil awlsam zawk mah se, rualawt rual kan ni si a. Ka pa lu kha a hai nasa thin awm ka ti.. 

Openah class Xii ka pass a, a chhan chu hna ka thawh a ngai tlat. Ka pa nen nitin kan inhlawhfa thin. Ka nau erawh school pangngaiah kan kaltir a. Ni khat chu mikhual danglam tak kan nei ta a. Punjabi a ni a, a fel thluam thluam viau. Kei chu tleirawl ka ni ve tawh a. Chu pa chuan an khaw lama hnathawk turin min sawm ta a. A sawi danin hotel lian tak a nei a, chuta thawk tur chuan a ni. Kan mawl a, engmah kan ngaihtuah thiam lo. Ka pa nen kan rethei si a. Ka pa remti vak lo chungin chupa hnena hnathawk tur chuan phai lam ka pan ta a ni. Pawisa tam zawk ka thawh chhuah theih chuan ka pa leh ka nau ka thawn thei anga, kei pawh college ka kal ve leh ang tiin ka inhnèm a. 

Mahse.. Sam, ka mawlzia ka hriat meuh chuan a tlai tawh. Kum 18 lek ka nih atangin tihluihna hmanga nawhchi zwrhtir ka ni ta a ni. Bum ka ni tih ka inhriat khan keimah chiah ka indem. Mahse, pa fa zaa rei tak khawsa tawh, chhel tura tuai hriam ka ni tawh a. Ka hna chu lungawi awm taka thawkin ka thawhchhuah ang ang ka khawl ve zel a. Ka pa nen kan inbe pawp thei si lo. Mizo ka hmu ngai lo va, hmu hlauh ila a tha tur. 

Kum 3 zet sumdawnna bawlhhlawh zeta ka tangkhang hnuah kan hotunu rawkin ka thurualpui te nen kan tlanchhuak a. Kha lai hmuna ka chettlat dan pawh kha ziak dawn la, i ziak ngaihnawm thei khawpin ka ring. Chiang zawkin ka la hrilh dawn che nia. Kan tlanchhuah dan zawng zawng te pawh kha.. 

A tawi zawngin Ka sum kawlsa nen Mizoram House ka pan ta tawp a. Mizo bulah chuan ka him ta. Mizoramah ka rawn haw a. Ka pa a lo thi lek lek tih ka hmuh chuan ka kehchhe tep a ni. Ka nau lah chu ka nu in a lo awmpui daih chu niin.. Ka pa dam nan tiin ka pawisa neihsa zawng zanwg deuhthaw ka hmang a. Mahse, ka chhan zo ta lo. Kar khat chiah kan inenkawl hman tihin ka pa a kal ta. Kei chu ka mal leh ta tlawk tlawk mai. Ka nu te chu Aizawlah hian an awm ve tho va, mahse, zawnchhuaha belh ka tum eih lo. Phaia ka awm chhung khan thil tam tak ka zir chhuak ve a. Ka damkhawchhuah theih ka ring tlat a ni. Tichuan, IGNOU atangin B.A ka pass ta a. Restaurant ah inhlawhin, ka inren thiam a, harsatna em em ka nei lo. Ka chanchin hi tuman ngaihven lo se ka duh. Tumah ka ngaihven ngai hek lo. 

Uirena te, hurna te,pawngsual te hi ka hua. Heti ang issue a awm chuan awmhmunah nasa takin ka lo ngaiven vein ka lo thinrim thin. Detective nih hi ka tum ber. ani bik lo. He hna ka thawh tan dan erawh hun dangah kan sawi dawn nia.. 

Chuan, nang ai fe hian ka û zawk tih i hria tiraw? " Boss Amanda hmel chu ka melh tlawk tlawk ringawt. Khawngaihna leh lainatna aimah chuan a damkhawchhuahna kawng chhuk chho Chu ngaihnawm ka ti a. Ka ngaisang sawt. Nawhchizuar a lo nih tawhna avang khan hnualsuatna pakhatmah ka nei lo. Nunhlui tha tak a neih hi ka ring lo sa reng a ni. 

"Mahse, Amanda, ka rilru a danglam phah miah lo.. Kan pahnih hian.. " tiin ka sawi zawm ngam lehpek lo. A nui sak a, "ok.. Kan pahnih chuan khawvel chu kan han hmachhawn ve chhin dawn em ni ang? " a ti ta a. Ka thaw huai mai. 

Zorampari te in kan thlen chuan inleng an lo la nei nual a. Anu te nen chuan an thenawm, anu nuta te inah chuan kan phei ta hlawm a. 

"Ka pi, i fanu khan a thih hma khan eng emaw ngaihbel tur sawi a nei em?  I bulah" tiin bul a tan a. 

Zorami nu chu la valai angreng tak, ngo lam a ni a. A hmel pawh a chhe hran lo. A tap nasa tih erawh a hriat, "Han ngaihbel tur ting chuan a thih hma zanah khan, 'Nu, lo haw ka duh. Programme chu ka nei tho va, mahse.. Ka cancel mai ang. I bula tah vak vak ka chak' a rawn ti a. Ka zawh chian leh pawn thudang a sawi leh daih si. A nau hian fb vela a u an sawiselna a lo hmu ve thin a, chung vang chu aniang ka ti ve tawp a. Lo haw mai rawh ka ti nghe nghe. Mahse, a lo haw hmain ti hi a ni ta mai si a" a ti a. A insut hlap hlap mai. 

Boss chuan, "Chuan ka pi, i fanu khan nau thla thum mi a pai mek tih i hria em? " a ti ta a. Pi Zuali chu a meng phar awk mai, "Maw.. Eng nge i sawi.. Mami a rai a maw?  Chu chu ka hre miah lo" a ti ta chiam a. A thawn danah a hre lo tak tak anih hmel. 

"Mami hi kan eibel ber anihna chen a awm tawh a,natna benvawn ka neih vang hian hna rim ka thawk thei tawh lo va, a û hlawh leh mami thawhchhuah hian kan inchawm a ni ve ber mai. Mahse, tihian a ni ta mai sia. Awih harsa hi ka ti em mai" Zorami nu Pi Zuali chu a tap hawm hawm a. Heta tang chuan engmah hriat vak theih niin ka hre lo. Kan haw hmain ka ex te inah kan peng zuai. Chhingchhip ho hi an chhe lo riau, lehkha an thiam tlangpui bawk si. Ka ex nen pawh hian kan ni rei ve viau hman. Ka ruih phur laia mi dang ka lo ck pui khanglang vangin kan inthen kha a nia. Huiham. 

Aizawl kan thlen leh hnuah Zorami in luah lam kan pan a. A in luahna te pa ber  erawh Chhingchhipah khan a la awm ve daih a. Nu ber erawh a lo awm. A fel fu mai. 

"Amah Zorami te kha a felin phung a thlu reuh a, ka fate ang tak takin ka en ve thin. Chaw te pawh a rawn ei fô mai. A hlim thei a, a titi siam siam zel bawk si. A thih hma ni khan a chhuak a, ngui deuhin a rawn haw a, i mood a va chhe ve ka lo ti hlut nghe nghe. 'Nu Reng, haw lawk ka tum a. Ka han hahdam ve lawk ang' a ti a. A inah a chhuk a, kha kha ka hmuh hnuhnun ber chu a ni ta ringawt mai a ni. Nimin piah zinga a thiannu Makim leh Lori te rak chulah khan ka zuk chhuk  ve a. Tikhan a ruang kha ka hmu ve ta mai a ni" Tiin a sawi. 

Ni e, a ruang kha Lori te hmuh a nia. Ka lo sawi lehpek lo anih hi. Lori sawi hmangin, "Khami zingah khan ka walk leh a, ka nitin tih dan ania, Zorami in kawngka hi kalh mah se, keini thianho chuan hawn dan kn hre tawh a, a nem hawn theih a. Ka peng deuh ziah thin. A lo la mut pawn ka kai tho ngai lem lo,a chang phei chuan ka inthlak a, ka va mu ve tawp thin. Khami zingah Makimi nen kan walk a, ani hi kei angin a regular ve lem lo. Zorami inah chuan kan peng leh a, a lo reh thap. Tui ka innhnuah a roomah ka va lut a. A lo mu si lo, a va tho hma ve em em ti chungin ka ko va. Makimi zun tum bathroom a va lut chu a rak ta tuar a. Ka va luh ve chuan tikhan Zorami kha kan hmu ta mai a ni" tiin Zorami ruang an hmuh dan chu a sawi anih kha. 

Zorampari bialpa hlui hnuhnungber Nunpuia chu kan va hmu leh a. Tlangval hmelchhe lo tak, khawsak pawh sang tak mai a ni a. A tawngkam pawh a fel phian mai. 

"Ni e, kan ni rei ve khawp mai. A duh pawh ka duh, neih ngei pawh ka tum. Zorami kha rilru tha tak mai, enghelh nei lem lo, thiante tan pawh thil phal tak mai a ni. Inren turin ka hrilh fo thin. Chuan thla thum vel liam taah khan a mizia chu a danglam ta tlat a. Zu rim nam chang te kha a nei a, zan rei lutuk tawha haw te a ching a, kan inbe khat angreng riau bawk, ka ngaih a tha lo tan a. Chuan, ka thianpa Rempuia hnen atang hian Zorami chu hotel pakhatah mipa dang nen an lut dun lai a hmuh thu te a sawi a, tin, WBR lama rui phial phuala a hmuh zeuh zeuh thu te pawh a sawi. Zorami chu ka va hmu ta a. Programme a neih deuh reng vang hian hmuh mai mai te hi a harsa ve thin a. Kei lah hun awl ka nei hleithei bik si lo. 

Kan inhau ta hrep a. A awmdan tha ka tih loh thu ka sawi chuan, 'I sawi tur a awm lo. Ka nuam tih zawnga ka awm hi i sawisel dawn anih chuan inthen ang' a ti ta mai a. Kei inla pa ve tak chuan ka ngai thiam ta bik lo va. Bakah chutia kan inhauh lai te chuan min runluih na niawm fahranin zu te a in pah a. Ka beng lek lek hial a ni. Mahse, ngawi rnegin ka chhuahsan a. Min block nghal hmak. Chuti na na na chu tiin ka ngawi ve ta hmak a ni. Mahse, a zai te chu ka la en ve reng tho va, khawlaiah pawh ka la hmu zeuh zeuh. A thiannu patil leh makimi te nen khan rui phet phawta an awm ka hmu fô. A hmingchhe ta reng a, ka lo khawngaih ve viau thin naa ka rilru a hel phah daih thung. A thih thu ka hriat erawh kha chuan min thawng ve khawp mai" tiin a sawi. 

Lori leh Makimi te bawk kan hmu leh. 

"Ni e, zu kan in thin. Mahse, kan pathum chauhin kan in thin. Tin, an sawina zawng zawng hi dawt a ni. Mipa a kawp kan hre lo. Hmeichhiat mipatnaah kher chuan a nghal lo asin.. " tiin an thiannu thlavangnchu an hauh ve tlat. 

"Nau a pai tih in hriatpui lo takzet maw? " tih zawhna chu "Aih, kan hre lo takzet. A rilru a hah hmel thin kan tihte kha a rai vang a lo nih dawn chu" an ti!  A mak e.. A rai thu tuman an hriatpui lo chu. 

Kar khat dawn a liam tawh. Hnuhma engmah chhuizui tur kan hre si lo. A hahthlak. Boss pawh a thawkrim viau. Kan intext zeuh zeuh nain a romantic viau ngai lo. Han duat hliak hi ka zak ve bawk si. Kiss pawh ka la kiss lo chu ania. Hun remchang awm thei hek lo le.. 

"Sam, a fa paina hi kan hriat a ngai a ni" a ti sap a. A chauh hmel riau. 

"Engtin? " ka lo ti vat a. 

"Social media lama a chanchin hriatchian hmel deuh pakhat ka zawng chhuak alawm.. " a ti ta a

Rei loteah tlangval cher lam, meng pwng hlawt hi a rawn lut ta zan zan a. 

"Rumour mai mai chu a ni lo alawm.. Kan veng pa nen an inphur hi ka hmu zing mai. " a ti ta a. 

"Inphurh ringawt chu fiahna a tling hleinem" boss chuan a lo ti a. 

Zara chuan, "An inphur satliah hleinem. Hotelah pawh an riak dun tih ka chiang khawp asin.. Sex an hmang ngei em tih erawh  ka chiang bik lo. Mahse, hmeichhia leh mipa room khata zan khuaa an awm dun ngawt chhan tur thil dang chu a váng ve riau. Ka rin dan chuan chu pa chuan sum pawh a pe hnem thawkhat viau ang. Ngaihtuah la, a zai hlawhna ringawt hi chuti em ema tam a ni hran lo. Singer te hlawh tlangpui chu ka hre ve alawm.. " a ti ta duah a. A sawi dik ve viau lawi mai. 

"Anih engvanga Zorami chungchang hi ngaihven viau nge i nih? " boss chuan a ti chang ta khalh a. 

"A chhan dik tak chu Zorami kawp thin hi ka thian tha ber Jerry pa anih vang a ni" a ti ta sap a. Boss nen kan inmelh ralh. Thil a kal dik dawn tan e. 

Zara chu Boss in a zilh hlak hnuah kan kaltir ta a. Jerry te in lam kan pan ta nghal. Kan hrilh lawk tawh vangin a nu leh pa te nen an lo awm thap. Jerry chu ria lam, sang tha ve tak a ni a. A hmel chhe hran lo. Apa, Pu Dina chu pa thau lam lek lek, hrisel hmel tak a ni a. An nu Pi Lawmi erawh jerry ang maia cher leh ria thalh mai, hlauthawng hmel pu deuh renh mai a ni. Nupa inhmeh lo ber pawl an ni ngei ang. 

Boss chuan, "Zorampari nen in inkawp thin tih hi dawt a ni lo tiraw? " a ti chang fak a. 

Pu Dina chuan, "Aw a dik alawm.. " a lo ti hmiah mai. Pehhel a tum loh hmel viau. 

"A nau pai saw i fa a ni em? " a ti leh a. 

"Aw ni e" a lo ti leh hmiah. Mak ka lo ti angreng. An nu a awm ve reng sia. 

"Anih Zorampari account-ah pawisa i dah lut thin em?  Engtik atanga inkawp nge in nih? " tiin a zawt leh a. 

Pu Dina chuan a sam a tuai puat a, "A la rei em em lo, thla nga liam ta velah khan a ni maithei. Kan office functionah zai turin kan sawm a. Khata tanga inhmelhriat tan kha kan nia, kan la inkawp nghal mai lo. Chumi hnu thla khat velah chuan pawisa a mamawh thu leh a mangan thu a rawn sawi a. Kei chuan puk ka phal thu ka sawi a. Kan inhmu ta nghal ani. Zu kan in dun ta nghal si a, thil kha a thleng ve tawp. Amah khan khatianga tih kha a tum sa mawni aw ka ti zawk. Tikhan kan inkawp nghal chu a ni ta der a. Langsara inkawp erawh kan duh lo ve ve. Pawisa pawh ka pe hnem hman viau. Ka nupui fanauten an hriat takah leh ka fa hial a pai takah kha chuan, ka mangang ve tan ta a. Ka titawp mai thei tawh bawk si lo, amah khan a rai tih a hriat rual khan nei turin min nawr lehnghal a. Neih atan chuan ka lo suangtuah ngai miah lo.. Kan buai vanglai takin tikhan a thi ta si a nih kha" a ti ta a.. Amah bak rinhlelh tur an váng ta hrep mai. 

Jerry pawh chuan Zara nena an chhui dan te a sawi ve bawk. Pi Lawmi eraeh an pa vanga a rilru nat thu bak sawi tur vak a hre lo. 

"A thih zanah khan khaw nge i awm? " tiin Boss chuan a mal te tein a zawt ta hlawm a. 

Jerry chuan, "Zara nen Pubg kan khel, zantin kan tihdan ania. A roomah a ni nghe nge.. A chhungte pawn an hria ang" a ti a. 

Pi Lawmi ve thung chuan, "Kohhran hmeichhia kan meeting a, kan ban veleh ka haw a, ka mu nghal deuh mai. Kan awmpui Tei hian. ahria ang" a ti a. 

"Ka zin daih alawm, Serchhipah kan hna chungchangah ka thawhpui Pu Siama nen kan zin" pu Dina ve thung. 

Kan chhuah hnuah Boss chuan, "An pathum khan enthlak vek tur.. An ringlelhawm vek" a ti a. 

A inah kalin zanriah kan ei dawn a ni. Ka hlim veng veng. A inbual hlanin chawhmeh ka lo kang a, a kut vawt thlar leh nel thepin ka kawnga a rawn kuah chuan ka phu zawk. Ka khi sak mai. Ka lehhawi a, bathrobe nen chauh a lo la awm a. Ka pawm thawk. A vawi khat nan ka fawp ta.. A va nuam danglam em.. Mahse, a inlahrang thiam khawp mai. A pawi lo, a hun hmaa khawih chak ngawih ngawih khawpa tuah ka ni hran lo ve. 

"Pu Dina kha chu tun laia pa tam tak ngawl vei ang a vei ve tlat anih kha.. Nupui nei reng chunga nula dang kawp kual ang kha. " zanriah kan ei lai chuan a ti a. Nia, a hmel te reng reng kha a.. Hur hmel ka ti.. Haha.. 

A tukah Pu Dina te thenawm hnaiah kan lut kual a, an chhungkaw chanchin kan zawt a ni deuh mai. Pu Dina chu pa fel tak angin an sawi vek. Ngaihzawng a neih awm an hriat ngai loh thu pawh an sawi tel. Pi Lawmi thung chu a tuallim lo khawp a, amaha tawm chet chet thin. ani a, a tha ve tawp. Tih chu an sawi dan tlangpui a ni. Jerry farnu hi nurse niin ani pawh an fak, Jerry erawh ruih zeuh zeuh a hrat tih loh chu engmah han selna tur an hre hran lo. 

Zorami in luah kan zu chhui leh. An lo la khawih danglam lem lo bawk a. Mahse, han chhui zawn theih tur engvak a awm chuang lo. Boss chuan zorami khum bula bottle-a tui chu a hnim vang vang a. Khum hnuai te chu bih lehin eng emaw tak a zawng a ni. Choka lamah pheiin thleng dahna te chu a hai kual a, no te chu a hnim dun dun mai. 

"Lori, zorami thih zan ti mai ang, kha mi zan khan i kal miah lo maw? " tiin Lori a bia a. 

"Aw kal lo, ka hritlang lutuk a, ka nuin damdawi min siamsak a, ka ei a. Ka mu daih. Biak pawh kan inbe vak lo, ka kal loh tur thu ka va hrilh a, chu zawng chu" a lo ti a. 

"Keipawh Lori a kal dawn loh bakah ka nuteii te an lo zin a, ka nuin chhuah a phal lo hrim hrim a. Ka chhuak bik lo" Makimi'n a ti ve bawk. A thih zana inleng a neih thu hriat a ni lo va, anih chuan he tualthattu tan hian a remchang hle ang. 

"Sam, he bengbeh hi khawiah emaw ka hmu tawh a ni. Tu berin nge beh tih ka hre thei tawh lo" tiin Bengbeh a bet chi a dum hi Zorami khum ke bula a chhar chu a lek va a. Ka lo ngaihtuah, "Aw… lorin a beh. A beng dinglam nge veilamah emawni a beh" ka ti ta chul a. A khi sak. 

Zorami ruang thlalak kha en nawn lehin a bih leh vang vang mai. Eng tak ngaibtuah ang maw. Chumi hnuah Social media lamah tuan lehin, Zorami sawiselna post a hmuh theih ang ang chu hai khawm lehin comment a chhiar chhuak leh dap. Hrechiang inti fe fe an tam si, Zara bik kha chuan a comment a lo delete vek tawh a. 

"Khang ho kha kawm leh i tum tihna  ni? " ka ti a. A lu a thing nar nar a, "Fake account atanga comment tu ka zawng mek zawk" a lo ti a. 

Teh daih zel hian a. Lori a lo lut, bossin a koh vang a nia. "Hei hi i bengbeh tiraw? " tiin bengbeh kha a pe a. 

"Aw ni e. Mahse, Zorami ka pek ania. Kan beng dinglamah ve ve kan beh thin a" a lo ti a. A ngaihna a hriat loh hmel viau. 

"Lori, hei hi thil pawimawh tak ani a. Min puih pawh a ngai dawn a ni. Zorampari chungchang dik lo deuh emaw uchuak deuh hleka rawn hrilh thintu che an an awm em? " a ti thawp sat a. Lori chu a ingaihtuah deuh a. 

"Hm.. Awm e, mahse, fake ania, ka ngaipawimawh lem lo.. Hei hi nia" tiin a phone. aphawrh a. A fb messenger atanga rawn betu proname chu a rawn tilang a. Boss chu a khi sak. 

Zorami troll post comment lama sawi huai thei tak, duhthawh taka comment thintu ngei kha a ni. 

"A tawp tep e" a ti ta sap a. Lori nen kan lo bo hû thung. 

Lori chu eng emaw a hrilh keuh keuh a, "I thiannu khan a dikna chanvo a hmuh nan hei hi i tih a ngai a ni. I tithei ang tiraw? " tiin a tawp a khar a. Lori chu tumruh hmel takin a bu nghat. A chhuak ta a. Boss nen kan inmelh leh relh ringawt. Ka lai deuh tlat zel. Ani lah hi a danglam phah der si lo. Ka ngei lek lek. 

A tuk zan dar 10:30 ah Lori call kan dawng ta a. Hmanghmawh takin Lori sawina hmunah chuan kan kal ta nghal a. Hotel manager hnenah engkim kan sawisa tawh vangin zawhna a nei lem lo. 

Room kawngka chu Boss chuan a kik ta dat dat a. Lori ngei chuan a rawn hawng a. Khumah chuan Makimi chu a lo chatthla bal mai. A phone chu boss chuan a la vat a, a lut kual ta zung zung a. A khi sak. 

"Ka sawi dawt ngam si lo va. Mahse, Zorami ka ngaih thu ka sawi chhen a, ka sawi apiangin zu a in.. I ngaihdan kha a dik anih hmel.. " lori chuan a ti sar sar a. 

Boss chuan, "He a fake account hian a tichiang thawkhat viau. Tin, khami zana thil thleng kha chu ka dâwp chhuah theih mai ka beisei" a ti a. Makimi chu ka pua a, office lam kan panpui ta a. 

Zing dar 6:30 a ri chiah. Makimi hmel ngui bar leh Boss inhmatawn ran chu ka lo thlir reng a. 

"He fake account hi i thiannu ngei Zorampari sawi chhiat nan hrim hrima siam i ni tiraw? " boss chuan a ti a. 

"Ni lo. A hmain ka nei sa daih tawh" a lo ti hmak. 

"Anih chuan engvangin nge amah saeichhiatna hlir i post a, i comment si.. Lori ngei pawh inbox lamah i va fah chiam kha a nia. I thiannu nisi kha i va haw awm em em ve" boss chuan a ti duah a. 

Makimi chu a nui hak, "Ka hua ang chu.. Ka hmangaih ber min chhuhsak alawm" a ti ta a. 

"Hmm.. Lori tiraw?  Zorami thih hlima heta in lo kal khan Lori kha i ngaizawng tih ka ring daih tawh. I melh dan leh Zorami chungchang a sawi laia i hmel landan atang khan " Boss chuan a ti a. 

Makimi chuan, " A dik alawm.. " a lo ti tawi ták a. 

"Chuan, i lak atanga Lori a rukbo vangin i hua a, tihchhiat i duh a. I that ta hial a" a lo ti sak. 

"Ka that lo. Ka that duh kher lo. " a lo ti hlar a. 

"Khami zan khan i chhuak lo ngei a, mahse, zing dar 3 bawr vela exercise la tura in i chhuahsan chhan kha a awm tur a ni. Lori nen in walk dun lo, Zorami in piah lawkah in intawk chauh a nih kha.. A dik em? " Boss chuan a ti ta zel a. 

Makimi chu a ngawi det a, " Dawt vek anih chu" a ti sap. 

"Zorami inah lutin a mutthilh laiin a tui bottle-ah damdawi i pawlh a, a thawh hlimah tui a in ziah tih hriain, tichuan, i kai tho va, exer i lak thu sawiin ani chuan tui chu a in nghal a. A in atanga rei vak lo ah a zawi tan ta a. A pum a na bawk. Nang chuan Lori i hmangaih thu hrilhin in inhau a. Lori pek bengbeh chu pawhthlaksakin i paihsak a. Ani na tuar lai chu bathroomah hnuk pheiin,  a banrekah i zaisak ta a. 

A phone password i hriatsa vangin amah ang thei ber turin a muhil lai thlalak a neihsa chu uploadin caption dangdai tak i siam bawk a. Zorampari khan mizo tawng a type kim ngai lo va, a short cut chu thuhran, IG-ah mizo tawngin caption a siam ngai lo. Chu chu theihnghilhin mizo tawng kim thlapin caption i siam ta a. Record awm thei zawng zawng delete vekin i chhuahsan leh ta a ni. 

Tichuan, Lori lo kal hun nghakin Zorami te in atanga phei lehin i lo cháng a, tikhan Zorami inah in zuk peng leh anih kha.. Nangmah tih a chianna pakhat chu maw.. Tui bottle a tui awm kha i la paih si lo va; Lori khan a in ang tih hlauin tui paih ruakin a thar i va fill anih kha. Chu chu Lori ka kawm nawn leh hnua a sawi a ni.. A chiang tawh em? ' boss chuan a ti ta sak sak a. 

Makimi chu a dáng sawp sawp a. Sawi tur reng a hre ta lo. Boss chuan a lo dai khalh hneh hle tih a lang. sawi belh tur reng a awm ta lo. Kha fake account kha chhui mai a lo harsa riau a. A hmanhmawhthlak tawh bawk si. Boss khan risk lain Lori kha Makimi zu in pui turin a hrilh anib kha. Tin, lem kual vel tur pawn. achah nghe nghe. Mahse, lori chuan a theih ngang loh thu a hnuah a sawi leh. A chahthlak hnuah boss khan Makimi Kut hmehbelin a fingerprint hmangin a phoneah a lut thei ta a. Tah khan a fake account chu a chiang ta a ni. 

"Engtin nge Makimi kha i rinhlelh mai theih le? " tia ka zawhna chu "Mi tam tak rinhlelhawm ka dap a, i hriat lohin ka chhui nasa alawm. Mahse, Zorami thih zan dar 3:30 bawr vela Makimi an in atanga a chhuak lai kha an thenawma chawhmeh kharchhawng, a chawhmeh kharchhawn tum tho hma khan a lo hmu hlauh pek a. Ka zeldin ta chiam ani. Pu Dina te chhung chu an sawi ang khan a thih zan khan rinhlelh turin an awm lo tak tak a. Ka chhui viau pawn a tawp tlat a ni" a ti ta a

"Mahse, Sam, Zorampari'n Pu Dina a kawp hial chhan, sum a mamawh chhan kha thil dang a awm ka ring tlat!  Eng emaw tak la inphûm ru hi chu a la awm ani. Mahse, hei zawng lo zeldin kual ve phawt rawh" a tih zawm zat a.. 

"Zaninah ka lo leng thei ang em" ka ti a. 

Nui saih chungin, "I riah nghal dawn loh chuan lo leng rawh.. " a ti a. A lai hmel chu ka hmu ve tlat!  Nia a lai ve tak tak.. 

Zanriah eikham veleh Boss Amanda in lam panin phur zetin ka tlan chhuak ta vawn vawn a. 

(Boss Amanda Season-1 chu a tawp ta. 

Chhiartute zawng zanwg chungah ka lawm hle a. Thurûk lama insawrbing ka duh vangin ka tawp lailawh rih a ni e. Thurûk ka zawh veleh Amanda a rawn come back leh ang. Ka hmangaih vek che u.😍😍