Amanda 13

BOSS AMANDA (13)

Ziaktu: Toni Râlte

Ka nî pasal, Pa Muana boral vangin Christmas vuakvet pawh ka hmang nuam fahran lo hle. Chawlh kan nei ve thei der bawk si lo. Mahse, vanneih asiamin hunpui vuakvetah chuan rukrukna lian tham lo te te bak case a awm lo va. A tihzia ngawt mai. Amanda nen pawh kan inhmu khât angreng. A hnua ka hriat leh danin ni 21-ah Aizawl veng hrang hranga chanhai leh rethei deuhte hnenah pawisa a lo sem a niawm e. Mihring hi chu a ni ve chiang a ni. Ka vei telh telh lehnghal. 

Kum a lo thar ta. Ka kumthar thutiam ve tehchai chu, "Amanda bem thluk" a ni tawp mai. Ka hlawhtling ang em le.. Detective hnungzui nisia mahni boss hisap char char hi an awm ve ang nge mawle.. 

2nd Feb a ni a. Thawhlehni zing a ni a, Boss min lo kohna angin Chawnpui vengah ka lim phei a. Kan Sir hlui Sir Ruata te in thlang chiaha building la thar tha takah chuan kan lut ta a. Mihring an lo tam viau. Chhungkaw pa ber a tualthi miau si a. Kan va luh lai chuan mipui nawlpui chu an lo dang mek a, ID hmuhin keini chu kan lut phei ta a. An nupa roomah lutin an khum nghenchhana lo thu mu deuh, chhungkaw pa ber ruang chu kan va hmu ta a. Pa valai tak, hang lam lek lek a ni a. Pyzama tial rek ruk hain, tshirt var a ha a. A mu tawh a ni ngei ang. A hrawk chu chem hriam taka zaina tih hriat takin a kak phei ruah a, thi kharin a bawh luai bawk. A lu chu a kun deuh chhul a, a hrawka zaina chu a thihpui a ni maithei. Chubak hliam dang a neih awm ka hmu miah lo. Boss chuan a hmai chu a han kuaidak a, a meng kuau a, hlauhlawp hmel a pu deuh. A tshirt var hak chu thisen hlirin a khat a ni mai e. Thla te an lak hnuah postmortem turin an phur chho ta a. 

Police officer ho vin nu ber te nen an nupa room piah chiaha study room niawm takah chuan kan inzui lut ta a. Nu ber chu nuvalai, hmel tha zet mai a ni a. An pa nen khan an inhmeh lo hlein ka lo hre ve. Ngo ser sawr, vun nung zet a ni a. Mahse, hliam a tuar ve tih erawh a hriat. A biang veilam chu a duk chur mai a. A ban dinglam chu a vûng bâr a, a ti che ngam lo tih a lang reng mai. Ka sawi hmaih tak, an nupa room kha a hnawk viau a, inrawkna a nih hmel. An safe a inhawng huau a, an nu tlereuh a let phung bawk. 

Boss chuan nu ber chu nelawm takin thu a zawt tan ta a. 

"Thil thlen dan i hriat theih ang ang han sawi teh le" a ti a. 

Inhnit hraih pahin, "Hmm.. Nia, ka hamhaih vek. Kan mu tawh a, kei hi ka mutthilh tawh chuan ka mu nghet thei viau, kan pa erawh thawm ri hlekah pawh harh thei mai chi a ni thung. Zing lam dar 3 leh dar 4 inkar bawr velah khan kan pa chuan min sawi nawk nawk a. Ka harh chuan zaizirin tawng lo turin min khap a. A ngaihna ka hre vak lo. Mahse, kan room kawngka chu rawn inhawng thutin hmaituam pahnih an rawn lut a, mipa ve ve an niin ka hria. Leh pawh tih hman hmain kan pa nen chuan an hmanraw ken rit nelh nawlh chuan min chhu vak a, hei ka chhip hi a la dûp ul mai. Na tak a ni. Kan tlu dun ta a. Ka harh leh meuh chuan, khum keah min lo phuarbet tawh a, kan pa pawh ka bulah a awm. Pakhat zawk chuan safe chu hawngin kan pawisa kawlsa zawng zawng a la fai vek a, ka tlereuh bawm hawngin a hlu tur zual ho an khawm leh vek bawk. Kan pa chu a ngawi reng si a, ka va nek thin a, mahse, a chechang si lo. Ka che lai chu min rawn hmuh chuan, ka ban an phuarna chu phelh lehin pakhat zawk chuan a herh ta vak a, a tliak niin ka hria. Na tak a ni. Tichuan, min phuar leh ta a ni. An chhuah hnuah ka au ta vak a. Kan awmpui Hruaiin min lo phelh ta a ni. Kan pa chu a lo thi fel der tawh. Ka va nek vel lai pawh khan a lo thi daih tawh a lo ni.. Chu zawng chu ka sawi theih a ni" a ti a. A tap hlawp hlawp nghal. 

"Ti nge an chhuah hnuah chauh i au? " boss chuan a lo ti leh khauh a! 

"Pakhat zawk khan an talhtum nen khan min dinchilh reng si a, ka au chuan min thah ngei ka ring a ni" a ti ve mai a. Ka dem hran lo. 

"In chhungkua hi engzat nge ni che u a, in eizawnna te? " tiin a lo zawt leh a. 

"Umm.. Ih, fa hi pahnih kan nei a, ti mai ila, dik tak chuan kan pa fa bikte an nia. Mipa pahnih an ni. Kum 13 leh kum 10 mi an nia. Boarding Schoolah luhtirin hostelah an awm mek a ni. Awmpui hi pakhat Hruaii hi kan nei a. A bak chu kan driver hi a ni deuh mai. Ani hian kan in hnuai ber khu a luah nghal a, kan inhnuai chiah hi tlem lai khan kan siam duh vangin luah theih lohin kan dah rih a, hei an la luah rih lo a ni. Eizawnna lamah chuan Zarkawtah sawn Electronics Dawr kan nei ve a, chu chu a ni deuh mai e" fel fai angreng tak hian Pi Zovi chuan a ti a. 

Hruaii a rawn lut ve chiah. Nula te lam deuh, dawldang tak a ni a, a mitmeng atang chuan a la hlau hle tih a lang reng mai. Boss chuan a besawm vel a, a tihtlangnel deuh hnuah, "I pute rooma i va luha i thil hmuhte kha hmaih nei miah lo vin min han hrilh ta che" a ti dam thlap a. 

"Aw ka pi te thawm ka hriat khan ka harh nghal a, mangang au rawl nia ka hriat vangin hlau chung chungin ka tho va, ka va kal ta a. An kawngka chu a lo inkhar phui lo nghe nghe. Ka pu chu nichina in hmuh ang khan a lo awm a, ka pi erawh ka pu bul chetah an lo phuar bet a, chet nachang pawh ka hre lo. Chuan, ka pi hian tihtur min hrilh ta a ni.. " a ti a. A aw pawh a la khur thei. A hlau ve khawp ang le.. 

"A hmain thawm riva engmah i hre miah lo tihna? " boss chuan a lo ti a. 

"Umm hre lo, choka lama roomah sawn ka mu daih a. A inhlat ve bawk nen, ka hre miah lo" a ti ve mai a. 

"Anih pi Zo, chutia Hruaii nen in inbuaipui lai chuan mi dang an rawn lut tihna nge? "

"Umm Ti ila, kan driver Lawma a rawn lut a, ka au  thawm a hre ve a ni maithei. Rang takin thenawm te a va pun kual ta a ni" a ti a. 

Lawma chu tlangval emaw pathlawi emaw a ni maithei. Sa tha nelh nawlh, hmel nelawm zet a ni a. 

"Au thawm niawm tak ka hria a, mahse, ka mutchhuah em vangin ka tho lo. Mahse, a rawn ri leh a, in chung atanga rawn chhuak nia ka hriat vangin ka han tho chhuak ta a ni. Ka han luh lai chuan ka pi phuarna an lo phelh tawh a. Ka pu erawh ka pi hian khawi che lo tur leh police lo thlen nghak tura min tih vangin kan khawih ta lo hrim hrim a ni" tiin a sawi. 

Chhungkaw pa ber, ama in lum ngeiah a nupui bulah ngei thia hmuh a ni a. Inrawkna rapthlak tak a ni. Tu te tak ni ang maw?  An pawisa lak zawng zawng kha Rs. 240000 a ni a, tlereuh man hu kha Rs. 130000 vel a ni bawk. Engvanga a sum faia pawisa chu kawl teuh nge an nih tih bossin a zawh chuan, "Vawiinah hian bank-ah dah luh kan tum a,niminah khan kan pa in a rawn hawn chauh a ni" Pi Zovi chuan a ti. 

An in kan chhuahsan hnu chuan Boss nen Hotel naran takah tukthuan kan ei a. "A harsat hmel em? " ka ti a. 

Antui a hawp hraih a, "A harsat loh ka beisei. Misual thiltih a ni tak tak em tih erawh chhui deuh chu a ngaih hmel" a ti a

"Maw.. Tu thiltih nge? " ka lo ti vat.

Office-a kan awm hnuah Chanchinbumi pahnih an rawn lut a. Boss te nen an inkawm ho va. Pakhat zawk in boss a en dan chu ka lo ngei ru hle. Ka thîk.. 

Pu Sawma thih dan runthlak tak mai chuan Zoram khawvel a dengchhuak leh ta chu a nia. Police lam pawh kan tangin, inrawkna a ni tak tak anih chuan tiin tlereu an tihralna tur nia kan rinah enthlatu kan dah fur a. Bank tinah kan awm bawk. 

A tukah boss chuan min thlen khalh a. Coffee a lo in mek a. "Nizan chu i awih lo hial ang. Tlangval ka date ve asin" a lo ti sar sar a. Ka che lawih. 

"Tu chu maw? " ka lo ti ram hmak a. 

"Ele, mapuia kha.. Nimina rawn kal te kha" a ti duh chauh.

"Hmm.. Chuan in ni maw? " ka ti a. 

"A bula awm a nuam riau a, bakah kawm a nuam khawp mai thil a hre bawk si. Tuna kan case kal laiah pawh hian min puih theih ka beisei" a lo ti a. 

"Nia nia.. Kei ai chuan a laktlak deuh ang chu" ka lo ti ve hmak. A nui deuh tih ka hre tho naa ka nuih a za ve hlawl lo. Ka mood a chhe nghal vek thei mawle.. 

"Vawiin chawhnuah Pi Zovi kan hmu leh dawn nia" a ti a. 

Chhan pawh ka chhang peih lo. Pi Zovi hmu tura kan chhuah pawh chuan ka la tawng duh chuang lo. Ka na tlat. Pu Sawma te in kan va thlen chuan thlan nghah ni a lo  ni bawk nen, an lo awm leh tiai a. Kan va luh chuan Pi Zovi chuan min lo dawngsawng nghal vat a. A inlengte bulah va sawiin study roomah bawk chuan min luhpui leh ta a. Study room ka ti mai a, naupang toys bakah an lehkhazirna dawhkan leh lehkhabbu a awm niaih vang ania khitia ka han sawi mai. 

"In fate pawh an chhuak ang chu tiraw? " boss chuan a ti a. Hruai'n thingpui a rawn chawi lut a. He nau hlauthawng hmel pu reng hi mak ka ti. A thil hmuh khan a la thawng viau a ni ngei ang. 

"Umm niminah khan an lo chhuak nghal a, ka khua a har deuh bawk nen, ka la chelh rih ang.. Eng nge chanchin, misualte chu in hre thei tawh em? " a ti a. Nimin lam ai chuan a hmel hmuh a hahdamthlak ta deuh. 

Boss chuan, "Kan la chhui ve zel e. Ti daih ila, in pa khan zai a lo tawk a ni maw? A thih hma lawk khan" a ti a. Chu zawng ka hriat ve loh thil a ni. 

Pi Zovi chuan makti hmel pu hian, "Ka hre hauh lo mai. Engmah a sawi lo. Dam lohna a nei bawk si lo va, a va mak ve" a ti hliai a. 

"Zaina hnuhma kha a la thar viau mai a. I hriatpui si loh chuan thil mak tak a nih dawn chu" a ti liam puat a. 

Pi Zovi hmela maktihna la chambang chu kei pawn ka hmu thei. Chutia kan ngawih deuh lai chuan naupang pahnih an rawn tlan lut a, an fate tih ka hre ve mai. "Nuu, ih, Apu Lawma te nen kan leng dawn nia" a u zawk chuan a ti a. Pi Zovi chuan phalna a pe a. An chhuak lehnghal. 

"I pasal fa bikte an nihnaah i tan enkawl a harsa em? " boss chuan a ti leh ta khawl mai a. 

"Teuh lo. Ka fate ang chiahin ka hmangaih. Min en hrang lo bawk a. Dik tak chuan ka hrin an ni lo tih hi hre lo se ka duh khawp zawk asin" Pi Zovi chuan a lo ti thliam a. A rilru a that ka ring keipawn. 

"Anih an nu hi i hre ve reng reng em? I tan a harsat loh chuan inpa nen in inneih dan te thlengin hriat kan va duh ve" boss chuan a ti leh ta zung zung a. 

Pi Zovi chu lungchhiat hmel takin a kun a. Ngui deuha rawn dak chhuak lehin,"Kei hi Orphanage home atanga seilian ka ni a. Ka nu leh pate ka hre lo. Ka nulat thleng in home ah ka awm ta zel a, ka thawk pah a nih ber chu. Kan pa leh a thiante hian kum tawpah kan home chu rawn tlawhin tanpuina an rawn sem thin a. Kum 3na atangin kan inngaina ve tan a, a nupuiin a boralsan tih ka hriat chuan ka lo khawngaih ve em em a ni. Tichuan, kum 5naah min la chhuakin a tirah chuan a fate enkawl turin min lalut a, a rei ta zel a. Inhmelduhna kan lo nei ve ta mai si a. Nupa angin kan awmzui ta mai a ni. Kan inneih dan hi a tan chuan thil zahthlak tak ang ni mah se ka tan chuan zalenna kawng min hawnsaktu a nih bakah pathian tluk deuhthaw a ni a. Ka hmangaih em em bawk. Min duat a, a fate pawh ka lo enkawl rei tawh vangin kan inngaina sa tawh a, an nu anga han awm kha a harsa lutuk tawh lo. Kan inneih tirh chuan a nupui thi ta chhungte khan an helh deuh a, an rawn ankhum hial nghe nghe. Mahse, ka thlavang a hauh ve tlat zel a, amah kan pa kha keimah ang tho va zik bul ve deuh mai a nia. A nu leh pa an thi tawh a. A u hi Hnahthialah sawn a nupui fanaute nen an awm a. A farnu erawh Khawbung lamah an awm thung. Aizawlah tak hian chhungkhat tia sawi theih a nei bik hauh lo a ni" A ti ta dap dap a. 

"A ngaihnawm hle mai. Ni e, mi ka atanga ka hriat danin inpa kha pa tha tak niin ka lo hre ve a. A dawr saw chu a nupui damlaia an lo sualchhuah kha niin ka hria, a dik em? " boss chuan a ti a. 

Pi Zovi chuan, "Aw ni e, a tirah rethei takim bul an tan ve a niawm e. Mahse, hei a rei ve ta tial tial a. A hlawkna pawh a tel ve hle tawh a ni" a lo ti a. 

Thu ho te te sawia an titi leh hnuah kan chhuak ta a. An kawtah chuan kan ding ren rawn a. Boss chu in hnuai lamah a chhuk ta vut a. Ka zui ve mai. Pi Zovi sawi ang khan in hnuai chiah chu a lo inkalh bám a. A hnuai ber chu a te deuh a, an driver khan a luah a ni. Lawma in luah kawngka bulah chuan kan ding ren rawn a. Eng nge kan tih ka hre hauh lo. A chho leh ta vut a. Ka zui leh mai. Ka la tawng peih lo bawk a. Engmah ka zawt duh bik lo. 

Mapuia chu a rawn leng zing mah mah. An hna kaihhnawih mah nise; boss chu ka duh aiin a hnaih a ni. Boss lahin a huat loh hmel si. Thin tawt teuh chungin ka lo thlir leh reng thin a. Amanda thleng chuan ka haw hlur tawh. Nge kei hian ka phutawk ka lo hai zawk?  

Pu Sawma thih cham thleng pawh chuan thawm riva leh misual man mai tur kan hre ta hauh lo. Boss chu a che muang deuh em aw ka ti. Mapuia vang a nih ka ring. Bialpa a neih chuan a ngaihtuahna a sawrbing thei lo a ni mahna. 

"Pi Zovi seilenna hmun homeah khan ka va kal a" tiin chawhnuah a rawn lut a. A hah hmel angreng. 

"Chuan" ka lo ti hmuk. 

"Dawt a sawi lo" a ti teh tawp a. 

"Tuin nge dawt sawi ti reng reng? " ka lo ti ve hmak. 

"A mak!  Samson, i mood uih zet kha thunun hram teh. Pi Zovi hian fa a nei thei lo tih i hria em? " a ti ta a. 

"Chungte thleng thleng chuan engtin nge ka hriat ang? " ka ti duh lek.. 

Nui sâng chung hian, "Nula apumpa, home-a seilian lehnghal fa neih theih loh ngawt chhan kha a taksa chhunglam. Fel loh vang nge thil dang vang tih kan la ngaihtuah ang chu.. " a ti a. Chu erawh chuan awmzia a nei deuh. 

"Anih chuan an pa thihna leh  fa neih theih loh chuan inzawmna a nei em ni? " ka la ti tâlh a. 

"Maithei. Kum 15 ka nih lai atangin mipa chi hrang hrang mutpui ta ila, rai ka duh si loh chuan pills ka hmawm ngun viau a ngai anga. Damdawi chuan ka damchhunga fa nei thei tawh lo turin ka chi a titawp thei dawn a ni. Tin maw, i hriat leh tur chu, pu Sawma te thianho khan home saw an tanpui fô tih chu thudik a ni. Mahse, home an tanpui atanga Pi Zovi nen intawng an ni lo. Pu Sawma thianpa sawi hmangin Home an tanpui thin lai khan Zovi an hmuh awm reng a hre lo. 

Mahse, Pu Sawma nen an inneih hma hian kum khat dawn chu a fate a enkawlsak tih erawh thudik a ni thung. Ka zeldinna hi a kal tluang anih ngat chuan Pi Zovi hmel tha tak phena a nunrawnna saw ka la rekchhuak ngeiin ka ring. Beisei ang" a ti khalh khalh a. 

Pi Zovi chu ka ringhlel ve lem lo. Amah pawh khan hliam a tuar na viau si a. Bakah sawi tawh khan an thenawm hnai te kan han zawh khan a that lohna leh a fahrawn te chunga a sualna sawi tur pakhatmah an hre lo anih kha. Chutiang hmeichhia chuan a pasal a that ngawt lo vang. 

"Insiam rawh. Pu Sawma ukil kan hmuh a ngai" a ti leh thut. 

Pu Sawma ukil chu Pu James-a a ni a. A la naupan hmel viau mai. Min lo dawngsawng tha phian a. 

Boss chuan hun khawhral tum lo takin" Pu James, kan lo kal chhan chu ka rawn sawi thuak tawh ang khan Pu Sawma khan tun hnaiah a thurochhiah tihdanglam a nei em tih kha a ni ber" tiin Pu James chu a a melh a. 

Nelawm tak mai hian, "Umm.. Ni e, a thih hma ni 3 ah khan min rawn bia a. Ka office ah min rawn hmu zui nghal. A nupui hminga a ro dah thenkhat chu a rawn thlak danglam alawm.. In leh lo saw an nu kutah a dah thin a, a dawr leh a bank account bakah a fapa te hminga a account hawn erawh a fate tan a ni thung. Chu chu tidanglamin in leh lo pawh a fapa naupang zawk kutah dahin, a u zawk kutah dawr. Chuan ama account bik erawh an nu chanah a ti ta kha a nia.. A chhan ka zawh lahin, 'A fate an nih lohnaah thil fel lo a awm thei' a ti mai a. A mak ka ti rilru viau nghe nghe. " Pu James chuan a ti a. 

"Chu chu an nu sawn a hre tawh em? " boss chuan a lo ti vat a

"Hria e. Pu Sawma thihchamah khan a fate nu chhungte lam khan min rawn bia a. An tute hmakhua ngaih vanga insawiin, Pi Zovi chu ka bia a. Hrilh a pawi anh em tiin.. Pawi a tih loh thu leh amah pawn a hriat ve duh thu a sawi a. Tichuan ka va hrilh ta vek a ni. Mahse, mak ka tihzawk chu, pawiti awmin a awm hauh lo. A thinrim hek lo.. " James chuan a ti a. 

Boss chu muk zetin a inngaihtuah. Biak ngam a ni rih lo. 

Office kan thlen rualin constable pakhat hian boss hnenah, 'Naupang bo report kan dawng a. Kan pu hi a buai sia, min enpui hman lawk ang em le a tia". a lo ti sur sur a. Boss pawh chu Officer roomah a lut zui nghal. Naupang bo… huiham.. Hna hnih. 

Coffee ka in laiin a lo lut a. "Mipa naupang kum 7 mi lek a ni. A school bang a la haw lo. Darkar 24 a liam phawt loh chuan report ziah luh theih a ni lo naa.. Ngaihven tho a tha" a ti a. Coffee chu a in zui ve nghal. 

"Naupang bo mai mai te chu mi dangin khawih ve mai se.. Kan buai em hi" ka lo ti hlar a. 

"Sam, naupang mai mai tih tawngkam hi khawngaihin hmang tawh suh. Naupang i lo ni ve tawh thin tih theihnghilh ngai suh. Mitthi tawh ai chuan a la dam nge dam lo tih hriat loha bo mek hi ka ngaipawimawh zawk fô ania" a lo ti chang rât!  Ka ngawi hmak. 

A tuka naupang bo te in lam kan pan a. An lo mangang ngang mai. An khawsak pawh a lo awlsam vak lo aniang, mi inhnuai luahin nitin inhlawhchawpin an lo khawsa ve a lo ni. Fa pahnih chiah an nei a, a nau zawk hmeichhia chu a la te hle. 

A pa chuan, "Kan thenawma taxi saw he lai veng ho hian kan hmang mai thin a. An kal lam leh haw lam hruaiin thla tawpah a man kan pe thin. Puia sawi danin mi dang an lo luh vek tawh hnu pawn a rawn lang ve thei si lo va, a chuanpui te ho hi amah aia class sang vek an ni a, an ban hun a ainang lo thin. Puia chu an schoolah va lutin a va zawng kual a, naupang zawng zawng an ban vek tawh hnuah pawh hmuh tur a awm tak si loah chuan an zirtirtu te biain a zawt a. An miss chuan an ban daih tawh thu leh amah Bawihtea pawh a chhuak lai ngei a hmuh thu a lo sawi si a. Amahin a haw ve aniang tiin an rawn haw a. Kan nu hian a lo hmuak leh a, a rawn tel ve ta si lo, kan buai ta nghal a ni.. " a ti a. A mang a an hmel kher mai. 

Phone call an dawn leh dawn lohte zawtin an dawn loh thu an sawi. Boss pawh a rilru a buai hmel viau mai. Kan chhuah hnuah an in luahna te inah lutin, Puia te chhungkaw chanchin chu a zawt leh a. 

"Rethei bakberh ve te mah nise, an hlimin an awhawm lutuk, an inngeih si. Thingtlang atanga rawn pem lut an ni ve a. An taima bawk a, an changkang sawt khawp mai. Engmah buaina an neih kan hre ngai lo.. Amaherawhchu, kan inlenpawh khât ve a, buaina te pawh kan hriat lohin an lo nei ve thei tho mai" tiin nu ber chuan a sawi a. Mi dang pawh chuan fakna lam hlir an sawi. 

Kan hawn lamah, "Inrukbona satliah nge an nupa buai rukna vanga game khelh ni ang aw" a ti vawng vawng a. 

"Kidnap ni ta se, call an dawn a hun tawhin ka hria" ka lo ti ve khauh. 

"Nia, a dik.. Chutak chu min tibuaitu a ni. Pawisa duh vanga rukbo ni ta se, an ni aia hausa leh pawisa ngah zawk tur rukbo tur an tam lulai em mai. Hei vang hi a nia an nupa inkar ka hriat chian duh" a ti sap a. Kan ngaihtuahna a inchen thin si lo va, a buaithlak. 

Pu Sawma thihna case lah chinfel hleihtheih lohin a la awm ta reng mai si a. Hun kan hmang rei ta viau mai. Naupang bo atang pawn ni 2 lai a liam leh ta. Boss chu hmuh tur a awm ngai meuh lo. Mapuia nen an inzui lai vawikhat chu ka hmu tawh a, thîkna nena khat in ka thlir. Boss tan ka pawimawh ve lo tial tial tih ka hriatna chuan min eichhe mek a ni. Hnathawh ka phur lo va, ka engtihmah a nuam thei lo. 

Vawiin erawh Pi Zovi te in lamah kan pahnihin kan kal dun a. Inleng an nei tawh lem lo va, an fate pawh hostelah an lut leh tawh a ni. Hruaii leh api leh mi pakhat ka la hmuh ngai loh an lo awm a. Pi zovi chuan nui sáng chungin, "Hei hi Rintea a nih hi.. Home ah khan kan seilian dun a, unau ang maiin kan inen thin. Hei min rawn zawng chhuak leh vang vang anih hi. Ani hi chu kum 13 anihin Shimla lama mizo chhungkua ten fa atan an la ta daih a. Tunah kan inhmu leh ta chiah a nih hi.. " a ti sar sar a. A phur hmel chu hmuh a nuam riau. 

Hruaii pawh a ngaite bawkin a ti leh dâk mai. 

Boss chuan, "Nia, khi inkawmchhakah hian kan rawn kal lawk a. Kan rawn peng mai mai. A remchan chuan in nupa room kha en fiah leh lawk ka duh riau a" a ti a. Pi Zovi chuan mak tih hmel deuh hian, "kan tifai vek tawh sia. Bakah a rei tawh sia. Mahse, i duh phawt chuan rem tehreng mai" a lo ti thliam a. 

Roomah chuan kan va lut dun a. Engmah thil thar ka hmu lem lo. Khum chu a mar tha hle tih bak. Pi Zovi hi nu inchengvawng tak zawng a ni ngei ang le.. "Sam, engmah hmuh ka inbeisei lo reng a ni. A pawi lo ve" a ti sap a. Kan chhuak leh daih. Awm pawh kan awm rei lo. 

Naupang bo te inah kan va lawr leh. Anu chu a tap nasa tih a lang reng mai. Apa pawh chuti bawk. Hmuh an hrehawm. Ka khawngaih takzet a ni. 

"Album en lawk kan duh a, pawi intih loh chuan, khawngaihin" Boss chuan a ti a. An fapa bo chhuitu te kan ni bawk a. Min hnial lo chiang kher mai. Album thar vak tawh lo chu kan keu a. Naute thlalak pawh a tam hle. 

Puia leh a nau thlalak dawt chiah thlalak chu boss chuan a melh rei ngat ngat hle. Ka zuk bih chiang ve a, Puia pa tlangval lai niawm tak a ni, amah bakah mipa pahnih leh hmeichhe pakhat an ni a, hmeichhia chu hnim chungah a thu thluang diai a, mipa ho erawh an ding kawisawi hle. An vai chuan hmuh tawhna ka nei tlat a ni. Mahse, ka hrechhuak thei tawh lo. 

"Ti daih ila, Aizawla in lo awm hma hian khawiah nge in awm le? " boss chuan a ti a.. 

"Sekhumah hei kan nute khua hi a nia. Tah chuan kan awm ren rawn a. Khawpuiah eizawnna pawh a awlsam zawk ang tiin kan rawn pem ve ta rawih a ni" Puia Pa Chhuana chuan a ti a. An nu nen an in upat hleih hmel angreng. An nu chu a la nula riau. Chhuana erawh tlemin a lang upa deuh, hna a thawh nasat vang a ni pakhat ang. 

Kan chhuahsan leh ta phawt. A tukah Pi Zovi awm tawhna home ah kan kal leh. Kan case hi thlur hnihin a kal si a, pakhat zawk ngaihven laiin pakhat zawk a hlamchhiah loh theih loh a ni. An thlalak hlui ho en kan dil a, vanduaithlak takin an album dahna hmun a kang palh a, a kan ral vek thu an sawi. Boss tan a pawimawh dawn si a, pawi ka lo ti ve tawp. 

Pu Sawma fate awmna hostel lam panin kan inkhalh phei leh a. Eitur tlem azawng kan leisak bawk. A u zawk David hi a fel riau a, a tawngkam a fingfel. A nau zawk Mama erawh â phuang mai a ni a. A lawmawm phian.. Mahse, boss chuan thu pawimawh tura ka ngaih a zawt miah lo. An hostel nawm leh nawm loh bak a zawt vak lo. Mama zawk chu a pawm hlu hlu a, ani lahin a lo nel phian.. "In hostel mess a chhe awm sia, chaw i eipuar ngai em? " a ti a. 

"Puar vak lo. Sa ka ei chak thei lutuk'" a ti a. Eitur kan kensak chu a ei tan tan a. A ei zawhna bawm ruak chu boss chuan a khawm a. 

"Tunah chuan i puar tawh ang a.. Khaw maw i dulah ka lo pen chhin" tih pahin a kawr chu a hlimsak a. A lo puar lang tak a.. Boss chuan a pen keuh a. A nui awr awr mai. David pawh a khi ve suk suk. 

Kan hawn lamah chuan, "Tunah chuan tihtur pakhat chiah kan nei ta. Zaninah chet kan la ang" a ti a. Ka lo hawi hruk hruk. Office kan thlen rual deuhthawin mapuia a lo lut nghal a. An inthutchilh nghal. Chhuanlam siamin ka chhuak daih. Hmuh hrehawm ka ti. 

Zanriah ka ei laiin Boss chuan min lo call a,zan dar 10ah pu Sawma kawmchhak, Sir Ruata te ina kal turin. Engmah ka zawt lem lo. Dar 9 velah ka insiam a, ka nute thil awmzia hrilhin ka inkhalh phei ta a. Khua a la vawt vur mai. Sir Ruata te in ka va thlen chuan sikri aiin an lo thu bial laih a. Mapuia bawk ka hmu leh tawh. 

"Ee.. Samson, hetianga puitling i lo ni tawh hi awih a harsa zawk alawm le.. " tiin Sir nen kan inchibai lawp lawp a. A dik ang, kan school kal ve laia ka harhzia leh ka zir thatchhiazia hre tawhtu a ni tlat a. 

Sikri ai chuan ka thu ve a. Dar 10 leh a chanve a ri hnai tihin Pu Sawma te in lam hawi chuan Boss chu a zu dak a, "Ti ru le" a ti sap a. Kan tho sang sang. Kan vaiin mi panga kan ni. 

Thawm dim takin Pu Sawma te in hnuai chiah verandaah chuan kan tawlh hriau hriau a. Tuma luah ni si lo kha in chhung chu a eng teng teng mai. Inbe sur sur thawm a awm bawk. Kawngkhar chu a inkalh tlat si a. 

Boss chuan aw fiak thak hian, "Kawngka hi in rawn hawng dawn nge kan tichhe dawn" a ti ta a

.. In chhung thawm chu a ri nghal sawt sawt. Ke pen tlat tlat in a zui bawk. Kawngka kalhna chu a ri rak a, Hruaii leh Boss chu an inhmachhawn ta ran mai.. Thawm chu a reh nghal dûk nia!  

In chhung kan va lut chu, Inzaina dawhkan sei pûtah hian mipa naupang bo kan zawn lai mek kha a lo mu a. Nikhua engmah a hre lo tih a lang. Chu aia mak zawk erawh chu kil thim lai atanga rawn chhuak pa hmel chu a ni. Naupang bo pa, Chhuana a ni tlat!  Tin, Lawma leh Pi Zovin Rintea tia a sawi kha an awm bawk. Hruaii hmel ti tak thin kha a bo fai vek tawh a. Hlauh leh pawisak nei lo hmel a pu. Mak ka tihna chu ka thup seng lo a ni ber. An palia an han din thap takah chuan Pu Chhuana te ina kan kal tuma Albuma thlalaka lang, bossin a bih ngun deuh te kha an ni tih ka chiang ve ta chauh. Pi Zovi kan man dawn emaw tih laiin ka rin loh daih an ni chuan min thawng a ni ber. Kan doctor hruai lai chuan naupang chu a han check vel a, an chiu mut thu a sawi. Kan pawm chho va, Pi Zovi inah kan lut ta a. Pi Zovi erawh a roomah tui tak maiin a lo muhil bawrh bawrh nia!  Kan kai tho va, mak tih hmel zetin min melh kual a, engmah a hrethiam lo tih a lang reng. Khawngaihthlak zawk hian.. 

Boss chuan a aw a thian a, "Le.. A thawng viau ang che u tih ka ring. Kei ngei pawn mak ka ti reng a ni. Pu Sawma thattu te chu heng mi pali te hi an ni a, naupang rubotu pawh anmahni tho hi" a ti ta a. 

An ngawi reng. Kan man ta dial a. A tukah an inpuanna kan ngaithla ang chu. 

Mahse, an tawng duh lawk lo, boss chuan a rinhlelh dan a sawi leh phawt. 

"A tirah pi Zovi ka ringhlel hmasa ber tih ka'n sawi hram ange. Kha kha in plan a ni reng a. Pi Zovi min rinhllehtir kha.. An pa thih zan a sawi dan kha han ngaihtuah ta ila, a ban an phuar vek tawh phelh leh a, herh sak leh hnua phuar leh khan awmzia a nei lo, misual ni ve ta ila, thawm emaw chet lak tum an awm chuan an ka ka hnawh mai bakah an taksa dangah hriam ka lek ang. Pi Zovi khan a au tuar thu bak a sawi loh rualin Lawma chuan a vawihnih aunaah a hriat thu leh a han chhoh thu a sawi a. Tin, Lawma in atang hian in chung ber thawm hi a hriat theih loh tluk a ni. Lawma hian engkim a hresa anih ka ring nghal phawt. Hruaii kha.. Lemchan i thiam luatah min bum hman thelh anih kha.. I pite rooma thil thleng engmah hre si lo kha i pi vawikhat au thawmah i harh nghal a. Kha kha ka point out nghal keuh. Mahse, hun dangah rinhlelhawmin i khawsa duh ta miah lo. Nang chu ka dah tha leh ta rih che a. Pi Zovi ka um zui char char. Home ah te kalin ukil thlengin. Thil thleng apiang khan amah an kawk char char si a. 

Rintea a lo lang ve leh ta chiah a, Home-a a awmpui thin anih thu a sawi. Ka awih lo hran lo. Naupang a bo a. An inah kan va kal a. Pu Sawma thihna nen inzawmna a neih ka ring hran lo. Mahse, an album en kha a lang ta tlat!  A chhan pawh Chhuana hi Home atanga seilian ve tho tih ka hriat vang a ni. Ka en ta a. Ka duh ka hmu ta a ni. Hruaii te nen in pathuma in thlalakna ngei kha. Khata Hruaii kha tuna kan Hruaii hi a la ni ta reng mai. Tlemin a lang upa ve ta deuh tih mai loh chu.. 

Thil ka ngaihtuah kual chiam a, Hei Mapuia puihnain chanchinbu hlui kan hai kual nasa. Kum 2000 hmalamah khan naupang bo an awm nual a, mahse, hmuh leh vek an ni. 2000 hnu lama naupang bo te erawh thi in anih loh chuan, an taksaah hliam eng emaw tak neiin hmuh leh an ni tlangpui a. Naupang bo hnuhnung ber hriat theih record haiin, a chhungte ka va hmu a. Dama an hmuh leh thu leh a dulah zaina hnuhma erawh a awm thu an lo sawi a. Ngaihdan min neihtir thei ta. Hruaii thlalak chu entirin an hmuh tawh leh hmuh tawh loh ka zawt a, An rak chul.. An awmpuinu a nih thin thu leh an fapa bo atanga thla khat velah a chhungte buaina vanga a haw thu an lo sawi.. Tin, swi hmaih hauh loh tur chu Pu Sawma khan kal pakhat chiah a nei tih kha.. Kha erawh kan puangzar duh ta lem lo va, an nu erawh a thuphungin ka zawt. Amah ka rinhlelhsa tlat vangin engmah chiangkuangin ka sawi duh lo anih kha.. 

Mahse, fiah leh zel ka duh vangin Kal (kidney)  hmanga sumdawnna ka chhui zui ta a. Ka chhui dan zawng zawng chu a sei deuh dawn vangin ka sawi lo mai ang. Chutah chuan Gauhati thingtlang khaw pakhata naupang pali ngawt kal hralh a nih thu bakah rinhlelh zingah he pa Rintea ngei hi a tel thu ka hmu ta a. Rintea i ni nge Dr Angus-a tih erawh min la hrilh ang chu… 

Tunah chuan Pu Sawma in thah dan leh naupang bo nen  in inzawmna bakah innsumdawnna tenawm tak in kalpui dan in sawi tawh ang. Tu nge tan dawn le.. " tiin Boss chuan a melh kual ta ralh ralh a. A nelawmna a bo vek. A hlauhawm tawh ngei mai. 

Pi Zovi erawh a lo hawi â vek. Ni e, tel vena a nei lo chu mak ka la ti fó nia. 

Hruaii chu a rawn tawngchhuak ta nge nge a.. 

"Aw le.. Ni e, ka sawi ang. Vanneihna hian min kal kan ve hun pawh a awm a ngai alawm.. Aw. adik, kan tleirawl chhuah thlengin home ah kan awmho vek a. Zovi te nen pawh hian kan inkawm thin tho. Mahse, ani erawh a tlan chhuak a, in bulah khan a zèp ve bawk anih kha. A chhan chu Pu Sawma nen khan an inngaihzawn rukna a rei tawh. Nupui a neih vangin an la innei thei lo mai a ni. Tichuan a nupui kha a thi ta a. Tikhan an innei ta anih kha. A nupui kha an that nge that lo tih zawng ka hre bik lo.. 

Keini pawh kan puitling deuh ta tihin kan chhuak ta a.Rintea erawh kan chhuah hma daihin an fa atan sn rawn la tawh a. Kan inthendarh ve ta hlawm a. A tirah he sumdawnna hi tih kan tum hran lo. Kei phei chu belh tur ka nei lo a. Mi awmpuiah ka tang kawi reng mai. Ka vui ngai hran lo. Kum 5  liam taah khan Rintea hian min rawn zawng chhuak hlawl mai a. Chutah chuan he sumdawnna hi min sawi hmuh ta a ni. A tirah ka hlau a, a ngaihna ka hre lo. Mahse, a hlawkzia te a sawi thiam si a. Ka rethei si. Ka pawm ta a. Mahse, kan pahnih mai chuan tihngaihna a awm loh vangin kan thian dangte hi kan zawng chhuak leh ta phawt a ni. 

A tawi zanwgin sawi ta ila, Rintea hian zai hlum a nei fô a, ruang chhar tih angreng hi a zai hlum an ni deuh vek. Chhui zui ngaihna an hre lo nge kan la him hram zel a. Sum pawh kan inkhawl ve tan. Zovi hi kan hre pawp ta a. Kan tan hmanraw tangkai tak anih beiseiin kan hnaih chho ta ani. Kei chu min lo hre tawh awzawng lo mai a. A lawmawm lamah ka ngai mai. An awmpuiah tangin ruahmanna kan siam chho ta zel a. A hmasa berah amah Zovi kha khawih kan tum a, mahse, a hriselna a tlak hniam tak thut vangin a pasal zawk kha kan khawih ta a ni. An eiturah damdawi pawlhin an mutthilh hnuah an inah ngei sawn, Pu Sawma kal kha kan zai a ni. A zaina hmuamhma a hmuh khan a mangang a, an nu lahin engmah a hre ve si lo, an nu kha a rinhlelh phah ta nge nge anih kha..Report thehluh a tum ut ut hman hial a, mahse, a la dam tho va a ti deuh nge a ngawi zui ta mai a ni. An fate pawh kha khawih ngei kan tum. Mahse, hun remchang kan hmu thei lo a ni. Hostelah an awm char char si a. 

Chhuana fapa kan rukbo chhan kha chu Phai lam atanga nawrna a nasat em vang  a ni. Chuti maiin naupang rukbo hi a awlai tawh lo va, an fing ve thûm tawh si. Chhuana fapa kha kan hmatheh ta ngawt mai a ni. Amah ngeiin a fapa kha a va hruai alawm.. Tichuan, Zovi te in hnuaiah khuan kan thukru char char a, kan chiu mu deuh reng a, thawm a nei ngai lem lo. Khati zawng kha a ni mai e.. Ka hriatthiam loh chu engvangin nge Zovi te in hnuai kha in rinhlelh tih hi" A ti ta  a. 

Boss chuan nui sak chungin, " In hnuai an luahtir loh chhan ka zawh kual khan a hrân thu an sawi a. Tu emaw chuan khu in khu tuman luah lo se tikhuan rual reng se a duh tihnaah ka ngai mai" a lo ti a. 

An chhuah hnuah, "Pi. zovi rai theih loh chhan te.. Home a chhuahsan hnua a awm dan te.. Engkim kha hriat loh ka la ngah e" ka ti a. 

"Home a chhuahsan hnu khan Pu Sawma hian a awmna tur a ngaihtuahsak a, a hmei angin a chawm zui mai mawle.. A rai theih loh chhan erawh ka hre mai bik lo… " a ti sap a. 

"Chuan, Mapuia nen in lawm dawn em? " ka lo ti daih a. Chiang zetin min rawn melh kâwk, "Sam, mipa thikthu chhe tak hi ka ngaina miah lo a nia " a ti ram hmak a. 

"Ka thik lo bawk" ka lo ti. 

"I thîk lo tih chu i mitmeng khan lantir ve tal la.. Lemchan thiam lo lutuk" a ti hlak a. 

"Aw.. Nia.. Ka thîk.. Ka thîk" ka ti ta nghek a. Ka thawl huai. 

"Samson, Lei hnuai atanga rawn chawr chhuak ringawt ka ni bik lo tih hria la.. Ka chanchin hi engmah i hre lo.. " a ti ta a. 

"Hre turin ka inpeih reng alawm" ka lo ti vat. 

"Lehpekah le.. I kut a kham tawh ang… dah rih la.. Coffee tak ngèk ngâwk in teh ang" a ti dam thlap a. 

Kei pawn ka laptop chu khupin.. Amanda bawp sei thlarh pen sau pawk pawk chu ka umzui ve ta nghal a..