Amanda 12

BOSS AMANDA.. (12)

Ziaktu: Toni Râlte

Boss Amanda nen hian kan inzui rei ve ta khawp mai a. Sherlock Holmes ang èma fing a ni lo pawh a ni maithei a, mahse, Dr Waston ai chuan ka fin ka ring zawk. A hnuchhuina thenkhat ka rawn pholan hi ka nun khawih ve deuh thil te an nih hlawm vang a nia. Chhuichhuah harsa lo tak tak te pawh an ni hlawm ang. Amaherawhchu, a phèna thawnthu awm hi kei chuan ka rawn phochhuak mah mah zawk. Mizoramah angah chuan thil khirh leh harsa tak tak a la vâng bawk nen. Tun tumah pawh hian kan case pakhat, mak angreng tak mai chanchin ka rawn hrilh leh dawn che u a ni. 

Ni 23, March, 2017 (Friday)  a ni a. Zing ni chhuak pawh a mawi angreng khawp mai. Hetih lai hian Boss hi tun ang em em hian ka la ngaizawng lo tih erawh ka'n sawi ang a. Mi tam takin kan inngaihzawn leh zawn loh in hre chak tih ka hria, chhanna pe thei che u ila ka ti khawp mai. Mahse, tuna he case a chhuina ka ziah mek lai pawh hian kan la inngaizawng lo tih ka'n sawi hram ang e. Ka ta liau liau erawh nihtir ka la tum hram hram e. Min lo tawngtaipui ve dawn u nia. 

Office lam pana ka tlan laiin ka phone a ri a, a pawimawh aniang tiin ka ding a, boss a lo ni. 

"Office-ah kal lo vin hetah Zemabawk lamah rawn phei nghal mai teh aw.. Ruang an chhar a" a rawn ti a.. Nitin chu ka ti ngam lo naa a khát tawk hian ruang hi chhar a ni ve ta zut mai. Kan ram pawh a ralmuang ta lo. A sawina hmun ka va thlen chuan mipui an lo tam tawh viau mai. Zemabawk veng penhleh deuh pakhatah tuihawk luankawrah ruang chu chhar a ni a.Hmeichhia a ni nghe nghe.  An lo la khawih lo bawk a, ka hmu chiang khawp mai. Tuihawk luankawrah chuan a bawkkhup zawngin a lo mu a. A sam chu a darh deuh niah mai. Kekawr uk arh hliai a ha a, a kawr erawh a dum. Pheikhawk a bun lo thung. Ruang chu an han kuailet ta a.. A bul hnaia awm te chu kan teh hak mai. Khatiang em ema mitthi hmel rapthlak kha ka la hmu ngai lo. A hmai chu a sawr ka ti mai, acid-a theh emaw leih ang chiah hian a sawrbawk a, a mitmu te chu a rawn chhuak pur bawk. A hnar leh hmui engmah a awm lo tihtheih a ni. A rapthlak tih hian duhtawk mai ang. 

"Acid hnathawh ngei chu a nih hi". boss chuan a ti sap a. Puanin an khuh ta nghal bawk a. A taksa dangah pawh pem leh hliam chu a nei thluah mai. A ban puam veilam hi a thau lang hawkin a pilh nge a kak ti mai ang, chuan a nghawngah hruia vehna hnuhma a kual raih bawk. Tin, a malpui dinglam hmalam atang pawn thi a rawn chhuak nasa. A khang lek lek tawh zawk. Tu tak chu ni ang maw? 

Darkar tam a liam hmain mitthi hming leh a chenna veng te kan hre thei ta a. Lalramchhani a ni a, kum 26 mi niin Bawngkawn chhimvenga cheng a ni. Amah hrechiang nia insawi te chuan nula vengva ve tak, hminghliauna erawh nei ngai lo, hlim thei tak a ni. Kohhranah pawh a mawi tawka inhmang a ni bawk. A chhungte hmu turin kan kal ta nghal a. Mahse, biak hleitheih loh khawpin an lo chiái si a, office lamah kan letsan ta rih. Ruang vuiliam hnua biakah kan ti ta a ni. 

"Sam, a thattu chuan a haw ve hle a ni ngei ang. Hmel hmai hmuhtlak loh khawpin a nghaisa chu a ni sia" Boss chuan a ti sap a. 

"Nia, rapthlak ka ti khawp mai" ka lo ti ve mai a. Nilengin case dang khawihin kan buai. Sas ve deuh reuh ka nei a, kan inbe ngun a ti deuh nge, "Hna lam thil khawih lai chuan i ph kha off rih la.. I tlanbo dawn pawh a ni lo va, i bialnu pawh chuan a va ngai awm em em che ve mawle" a ti a. Ka inthlahrung deuh. Ani lah hian mipa  a ngaihsak der si lo va. 

A tuk ruang vui zawh chawhnu lamah  Rami te inah chuan kan va kal ta a. A chhungte pawh an lo ziaawm ta deuh. Ama roomah kan inzui lut ta hlawm a. Rami te hi unau pahnih chiah an lo nia!  A u mipa chuan nupui neiin a fate nen an la chengho a ni. A pa chu mizo paah chuan pa sang pawl tak a nih hmel, anu erawh a tè kher khawr viau. An hmel hmuh pawh a hahdamthlak ta deuh. Anu erawh a no zawk tih takah a la tap faih faih reng a. A lainatawm khawp mai. 

"Nizanah khan a chhuak tih chu a lang a, in hriatpui ang chu tiraw? " Boss chuan bul a han tan a. 

"Aih, aa.. Ka sawi awmzia chu kan mut hnuah a chhuak a nih ka ring, kan mut dawn thleng kha chuan a la awm " Apa chuan a lo ti var a. 

"In awmho lai chuan phone in biak a nei em? "

"Neih awm pawh ka hre lo, mahse, whatsapp vel chu a khawih a niang, a khawih pah reng" apa bawk chuan a ti a. 

"Amah hawtu emaw tihnat duhtu an awm in in hria em?  Fim takin han ngaihtuah ula"

"Ka ngaihtuah nasa, an awmin ka hre tlat lo a ni. Mami kha nula fel ber chu a ni kher lo anga, mahse, tu pawi mah a sawi ka hre lo. A hlim thei viau bawk asin" Anu zawk chuan a rawn ti ve a.. 

"Ngaihzawng a nei em? " leh tawl zel chuan, Boss hi chu aw.. 

"Um nei ve e. Nichinah pawh khan a awm ve reng tak asin. Thazuala a nia, kan veng ami tho hi" Anu bawk chuan a lo ti a. 

Boss chuan Thazuala Address chu a la nghal a.Rami chhungte atang chuan engmah han tangkaipui tur kan hre lem lo. A room chu kan han enchiang deuh a, an lo la singsa lo bawk a. Khum chu a chuar bakah rizai pawh sin tawh angin a awm. A mu tawh zet anga, tualthattu hian a rawn ko chhuak a ni maithei. Chubak hnuhma dang hmuhtur a awm lo. 

Boss a ruang chharna hmunah kan va kal leh a, lei te chu a han bih deuh ngar ngar a. Hmuh tur a vâng viau mai. 

Boss phone a ri val val a. A be mawlh mawlh. A chek hlak danah thil lawmawm lam a nih ka ring lo ve tawp. 

"Ruang an chhar leh tawh" a ti nghat a. Hmanhmawh zetin ruang chharna hmun nia an sawi lam chu kan pan ta a. Rangvamual thlen hma kawng thlang, teak huanah a ni. Huan neitute hmuh a ni nghe nghe. Hmeichhia bawk! 

Ramchhani nena intiat tak, ngo ver vawr deuh mai a ni a. Tun tum ami erawh hliam engmah a nei lo. A taksa lang thei chin chu a him pial mai. Zu rim a nam danah zu a in anih a rinawm. Mak deuh erawh puan dum plane a bih a, kawr dumpawl simple tak a ha bawk. Inkhawm bang emaw meeting haw lam emaw a nih a rinawm ta hle. Reiloteah a tu nge anih tih leh a chhungte kan hre leh thei ta a. An postmortem hlanin a chhungte kan kawm thei ta. 

"A mak ka ti em mai. A thiannu thihnaah tlaivar turin a chhuak a, a thiannu tho Veni nen, veni scooty in an kal kha a nia. Vawiina a thiannu ruang vuinaa ka va kal khan ka hmu ta mai si lo va, ka'n zawh vel khan tuman an lo ngaihven bik lo nge an hmu si lo. Khawiah emaw a tlaivar chau hi a mu aniang tiin ka inhnem a. Tihian tunah a ruang an hmuh thu an rawn sawi leh ta mai si a. Awih harsa ka ti em mai" Kan mitthi Duati nu chuan insut hlawp hlawp chungin a ti a. Rami nu ai chuan a pachang thei deuh. 

"A thiannu thi i tih chu Ramchhani kha a ni mial em? ", Boss chuan a lo ti khauh a. 

"Aw ni e, Rami kha mawle.. In hria ni maw? " a lo ti hliai a. 

"Kan chhui lai mek a nia. A mak hle mai a. Anih a thiannu Veni chu eng nge a chanchin ni ve ta? " Boss chuan a ti a. 

Duati nu chuan, "Aw ni dawn tak.. Veni pawh ka hmu miah lo. Ka zawng nasa lutuk" a lo ti ta a. Boss chu a meng zim sât mai. 

"Veni pawh a ngaihtuahawm hle mai. Duati chu i call hrim hrim em? "

"Call nasa lutuk, a ring quit thak thak a. A hnuah phei chuan a inswitch off tlat" Duati nu chuan a ti a. 

Duati hi anu ho va awm an ni a, anu hi hna sang tak thawk anih vangin an khawsak a harsa lem lo. Chanmari-a awm an ni. Unau pathum niin amah hi a upa ber bawk. Thil mak tak zawng a ni, an thianho chungah eng emaw tak zawng a thleng mek a ni. A hria te sawi hmangin Duati pawh hi nula fel tak, sawisep kai lem lo a niawm a, Rami te nen khan college an kal lai atanga inkawm tawh an ni a, MA an zir zawh thlenga inkawp an ni. Tunah Duati hi private schoolah a inhlawh ve mek a, Rami kha chuan an chhungkaw eichawp dawr a nghak thin. 

Boss nen Veni te in lam kan pan leh ta phawt. A chhungte chu an lo mangang viau tawh mai a. Anu leh pa bakah a unau pathum te nen an chengho a. Veni hi a upa ber dawttu a ni. Ani pawh MA a zawh hnuah hna zawn pahin a putea te mobile dawr a nghak thin a ni. A phone a switch off ve bawk si, hmalak dan tur a vang hle. Ani pawh a lo thi tawh reng maithei. Veni chhung leh khatte chu police nen Duati ruang an hmuhna hmunah khan an zuk kal leh a. An zuk hmu ange maw.. Boss pawh a rilru a buai hmel khawp mai. An thianhoah Veni te hi an hausa ber a, an sawi hmangin Veni hi chu zu pawh in ve thei mai, che sang ve tak a ni awm e. Tin, a chapo ve deuh bawk niin an sawi. Apa hausakna a chhuang ve deuh a ni mahna. 

Duati ruang pawh vuiliam a ni ta. A nu a khawngaihthlak takzet a ni. Veni chin lah kan hre thei hauh si lo. Zoram chu a ti hru ni maiin ka hria, nula tam tak an hlauhlawp a, an ralti viau. Ramchhani te inah bawk boss nen kan kal leh a. Duati te erawh an thih sarhu nen nakina kal nawn leh kan tum tho. Veni chanchin pawh kan ngaihven ve reng a ni. 

E chuan ka lo sawi hmaih tep, Rami bialpa Thazuala pawh kha kan be tawh a. Rami thih hma niah khan Haulawng lama a pi lungphunaah a nu nen an lo kal daih a lo nia. Rami thih thu a hriat rualin a rawn haw ve nghal a lo ni. Ani chu rinhlelh tur awmin ka hre lo naa, enthlak erawh a tul maithei. Veni leh Duati chuan bialpa an neih awm hriat a ni lo thung. 

"Ka pi, Rami te thian hi an pathum chauh em ni?  Thian dang an la nei em? ' Boss chuan Rami nu chu a zawt a. 

"Aw nei e, an vaiin panga an ni thin. Melody te erawh nikum hmasaah khan Shillongah an pem ta daih a, pakhat zawk Mary kha chu nikum december thla khan a boral tawh a ni" Rami nu chuan a lo ti var a. 

"Mary chu engtia thi nge? "

"Muhlum an ti mai a. A nu leh pa te kha hmu hmasa bertu an nia, an postmortem ta lo nge a muhil an kaitho zo lo tih bak hriat ka nei ve lo" 

"Khawngaihin an address min hrilh thei ang em? A thih dan pawh chu a ngaihthatthlak chiah lo tlat. Chuan, Melody biak pawh theih na ka duh khawp bawk mai" Boss chuan a ti ta a. 

Melody chu Boss chuan a zuk be pawp thei ta hlauh a. A thiante chunga thil thleng pawh a lo hre ve vek mai, amah pawh a hlauhthawn thu leh a chhuah ngam loh thu thlengin a sawi. Boss chuan, Tualthattu ni thei awm rin a nei em tih a zawt a, "Rin dan ka nei thiam thlawt lo. Mary thihna kha chu a rei tawh deuh a, bakah a muhlum kha a nia, Rami te ho hi chu tu emaw tak anmahni hawtu in a that aniang.. Keipawh lehlamah kan pemna a rei ve leh tawh deuh a, chuti lutukin ka hlauthawng lo, tun hnaiah mi pwwi an sawi mawni aw ka ti zawk" a rawn ti. Ka rin dan chiah a ni. 

Ni 2 lai a liam ta. Mary te inah kan la kal lo, A chhan pawh Veni ruang hmuh a nih leh tak vang a ni. Rami ang chiah khan acid-a leih tih hriat takin a ruang chu rapthlak khawpin a chhia. Duati ruang an hmuhna atanga hla vak lo, hnawmhnawk zingah hmuh a ni. Mak zawk erawh khalai hmun te chu a hma pawha an lo zawn hrep tawhna kha a nia. An hmu si lo. A thattu hian a va dah leh emaw kha lai hmunah khan a that tihna a ni mai. Duati ruang hmuh a nih lai kha chuan veni hi a la dam ngei a rinawm. 

Mary te in lam panin kan tlan mek. Nikum December thlaa thi tawh a nia, a pawimawh em em ka ring lem lo. A thian dangte ang lo takin Mary te chu an khawsak a lo harsa viau mai. Mi in luahin an khawsa nghe nghe. A nu leh pa bakah a nau mipa pahnihte nen an cheng anih chu. Kan va luh chuan a nu leh pa an lo awm hlauh a. A lawmawm hle. Boss chuan pehhel buai lem lo vin an fanu thih dan chu a zawt leh thawr a! Thu thluaithlum dan hi zirtirtu awm se ka duh thin ngawt mai. 

Apa zawk chuan rei tak ngaihtuah ni awm hmelpu hian, "Mateii kha maw.. Ni e, kan kai tho zo lo tawp mai a ni. Mi chuan damdawi a bar thin a a od niin an sawi a. Mahse, ka hrechiang, ka fanu khan eng ruihhlo mah a ti ngai lo. Khawvel fanuah ka fanu aia fel leh nu leh pa zah thiam kha an awm ka ring lo. Ka innghahna a ni asin" a ti ta dap dap a. Mary pa chu pa te satha lam, hang lam lek lek a ni a. A fanu a hmangaihzia chu kei pawn a hmel lan dan atangin ka hre thei. 

"A thiante thil tawn chungchang hi in lo hriat ve ngei ka ring a,. " Boss chuan a ti ban chat a. 

Mary nu chuan, "Umm kan lo hre ve alawm, tv -a an puan atangin

. pawi kan lo ti khawp asin. A thiante kha Mateii hian a ngainain a duhsak thin a, amah la dam ve se chuan a rilru a na ngawt ang" A ti a. 

"Han ngaihtuah vang vang ula, Mary khan a thih dawn hnaiah khan eng emaw an thianho chungchanga ngaihbel theih tur thiltih a nei em? " Boss chuan a ti dam dap a. 

An ngawih vang vang hnuah, "Ngawi teh, chutia sawi takah chuan a thih hma kar khan ni khat chu a phone-a an thianho thlalak kha a print tir vek a, a lo hawn tak asin. Mateii kha a thih hma ni 1 velah khan a khumah tap zawih zawihin ka hmu a, a chhan ka zawh lahin engmah a nih loh thu a sawi a. Nu tan fanu tap zawih zawih chu chhan tha tak a awm ang tih a rin theih mai. Chaw pawh a ei mang lo. A tukah a hnaah a chhuak a, tlaia a rawn haw te kha a ngui tawp a, a nui lui thei thlawt lo a ni ber. Ka zawt leh ta tawp a, a bialpa nen an inthen thu a sawi ta a ni. Mahse, a bialpa chu tu nge tih kan hre ve hauh lo.. " Mary nu chuan a ti ta a. 

"Anih chuan a rilru na lutuk tuar zo lo khan damdawi chu lo barin a taksa in a zo lo a ni thei ang em? " Boss chuan nèm zet hian a lo ti khauh. 

Mary pa chu a ding thut, "Ka pi, tu nge i nih chu ka hria, mahse, ka fanu kha mahni intihlum anga i puh mai hi ka phal miah lo ania. Ni e, rilru natna chu a nei ngei ang, mahse, a intihlum lo.. Tin, tuna a thiante thihna nen hian a inzawm bawk lo. An ni chu tun hnaiah an thi a, mateii erawh thla thum a liam tawh.. Khawngaihin Mateij chungchang chu ngaihven lo mai rawh" a ti ta khawl khawl a. A lungawi fahran lo tih a lang reng. Pa ka la ni ve lo naa ka hrethiam viau mai. 

"Ka tihpalh a ni e. In pawisawi ka tum awzawng lo a nia. Mary pawh kha tualthi a ni thei mai lo maw tih thuah tualthattu chhui zui theihna a nih beiseiin kan rawn kal tawp a ni. Ka tihpalh a ni e" Boss chuan inthlahrung takin a ti a. 

"Kan pa hi chu hrethiam ru, a ri hluai thin a. A thinrim tak tak lo a nia. Mateii kha a hmangaih em a, a thihna pawh hi kei aiin a tuar na zawk tih theih a ni. Chuvang a ni e.. " Mary nu chuan a lo ti nem diai a. Fel ka ti khawp mai. 

A thiante nena an thlalak ho chu en kan dil a, album chu a va la a. An pa erawh a ngawi ngal mai. Thlalak chu a tam lem lo. An class kalna vel a mi te a ni hlawm a. Melody pawh a tel ve. An inkawmngeih hmel hlawm khawp mai. 

"Ka pi, Mary bialpa chu hriat ngaihna in hre miah lo tihna ni maw? " Boss chuan a ti sap a. 

"Umm.. Mateii kha a lerh lo viau aniang, nge kan lakaha a zep thin zawk ka hre lo, bialpa a neih awm ka la hre lo reng reng. Thian mipa hi chu a nei ve tho va, mahse, bialpa tak tak ang hi ka la hriatpui lo" a lo ti a. 

Boss chu a ngawi vang vang mai. 

Kan chhuah hnuah, "Mary thihna nen chuan a inzawm hmel lem loh.. Ramchhani te khan Melody sawi ang deuh khan tu emaw pawi an sawi em mawni dawn le.. Chhui zui theihna tur ber an phone lah hmuh tur a awm der si lo va. A khirh hle mai" a ti a. Ka ngawi reng thung. 

Veni thih atangin boruak chu a reh ta rih. Melody nen boss chu an inbe pawp reng a, a thuphungin Mary bialpa vel awm chu a zawt ve a. Melody pawh chuan bialpa a neih awm reng reng a hriat loh thu a lo sawi. 

Kar khat a liam tawh tihin, Duati nu in boss a rawn bia a. An in lamah kan chhuk ta vat a. 

Diary lian vak lo, a kawm sen hi a rawn lek chhuak a. "Duati room ka chingfel e ka tia, hei hi ka chhiar duh lo lui ngat ngat a. Mahse, a thih chhan eng emaw tal hriat ve dante a awm takin tiin ka chhiar a. Hei tun hnaia a ziahah hian in hriat duh tur thil a awmin ka hria a" a ti a. Diary chu boss a pe nghal a. Boss pawh chuan a keu nghal. 

Ni 17, march : Chhungrilah min tur na tial tial mai. Veni te thu ka lo zawm ve mai kha ka va inchhir em. Zantin deuhthaw ka mumangah ka hmu lehnghal. Ka nu hi ka hrilh tawp zawk dawn mawni le.. Ka ngam bawk si lo. Tun hnaiah hian a zual kai lehnghal. 

Ni 23, march: Awiii Lalrami a thi!  Ka duh thei lo. Lalpa,.. Kei hi engtin nge ka awm tak ang le.. Ka him bik hauh lo vang le.. Phatsanna phuba chu ka hmachhawn mai tur a ni. Thih erawh ka va hreh si em.. 

A thih hmaa a ziahah chuan chung pahnih chuan awmzia a nei ber. A bak chu tawi tete bak a ni lo. 

Boss chuan, "Nikum lama a diary i hmu mial lo maw? " a ti a. 

"Aih, hmu miah lo. Bakah diary a ziah ngai ka hre lo kuminah a birthdayah a putean a present a, a ziak ve mai zawk niin ka hria" a ti a. 

Boss chu a inngaihtuah muk hmel kher mai. Kei chuan a ngaihna ka hre lo. 

Office kan thlen thlengin a tawng tawh lo.

"Phuba lakna a nih ka ring. I ring ve em? " ka ti ta tawp a. 

"Ring e. Phuba latu hi tu nge ni ta ang?  A eng phuba nge a lak tak ang? " a ti sak sak a. Lungawi lo hmel a pu deuh. Melody a be leh a, "Dik tak chuan kan pem atang khan kan inbe khât tial tial tawh a. An chungchang engvak mah hi ka hre tawh lo a ni.. " a lo ti mai a. Dawt a sawi ka ring lo. A hlauthawng ve em em tho si a. 

"Sam, he tualthahna phènah hian thawnthu eng emaw tak zawng a inphûm mèk a ni.. A ngaihnawm lam aiin a lungchhiatthlak ngei ang" Boss chuan a ti zawi sap a. Ngaihtuahna a buai. Tuin nge khang mi pathum kha that ta ang le… 

A tukah Veni te in lamah kan kal leh a. Apa a awm lo va, anu nen kan inkawm ta a. 

"Veni khan diary a ziak ngai em? " boss chuan a ti a. 

"Ziah ngai pawh ka hre lo. A room pawh kan la chingfel lo." Anu chuan a ti a. 

"Khawngaihin a roomah chuan kan kal thei ang em? A pawimawh si a" 

"Aw tehreng mai.. " tiin Veni room chu min kawhhmuh a. Kan va lut ta a. Nula room tih takah a thianghlimin a felfai khawp mai. Khum pawh a mar tha et awt viau. Boss chu a teikual vel a, almira te chu hawngin eng nge a zawn ber pawh ka hre chuang lo. Stag um khat a rawn rekchhuak nawlh,. A nui sak bawk. Veni laptop chu on in folder hrang hrangah a lut kual a, a duh a hmu thei lo nge a ner sak mai. 

. "aw.. Hei ngei hi" a tih tak hlutah ka phone bih lai chu ka dak chhuak vat a. Laptop screenah chuan Veni leh a thiante pahnih, saruak keng kunga an awmna chu a lo lang ta a. Veni phei chu ruak ngalngatin a awm. Duati leh Rami eraeh chuan kekawrte an ha thung. A keu zel a, thlalak dang pawh a hmu nual. An lak hun erawh nikum lam daih a ni thung. 

"Hei enteh le.. " tiin laptop a kawk a. Ka thu hnai ve nghal. Mary leh mipa pakhat, la upa vak lo tur hi ruak thawthangin khumah an mu dun a. Mary chu a muhil niin ka hria. 

"Ni 4,dec.. ami a nih hi.. Hei a date hi en la.. Mary kha ni 11-ah a thi tih kan hria. Hei hian awmzia a neih ka ring ta tlat.. Ka la chhuizawn thiam lo mai pawh a" a ti zung zung a. Ka bo hû!  Chu bak chu mary lan vena dang a awm tawh lo. Veni leh Rami thlalak a tam viau, ruak veka an inkiss lai te, an inkhawih tawn velna ang te.. A mak ka ti tawlh tawlh! Duati pawh a lang ve tho naa an ni pahnih ai chuan a ngam huai lo deuh niin ka hria. Engvanga hetiang hi ti nge an nih le.. 

Room atanga kan chhuah hnuah, Veni nu bulah chuan, "E taka ka pi, veni te thiannu Mary kha i hre ve em? " a ti a. 

"Mary maw.. Aw ka hria lawm.. Nikumah a thih kha.. " a lo ti a. 

"A thihnaah khan Veni te hi an kal ve em le? "

"Kal ve kha mawle.. Pangpar te pawh an lei nghe nghe kha" 

"Aw le.. Ka lawm e aw.. In fanu thattu hi kan hre tep tawh ang" tiin kan inthlah ta phawt. 

Duati nu bawk kan be leh. "Han ngaihtuah leh chu a harsa viau maithei a. Mahse, han insawrbing hram la, Duati te thiannu Mary thih lai bawr vela Duati awm dan ka hre duh a ni" Boss chuan a ti a. 

Duati nu chu a chhing diar diar a. A hmui a tisawi pah bawk, "Umm… nia.. Ka ngaihtuah thei mai. A chhan chu Duati khan Mary thihna kha a tuar na lutuk tlat. Chaw pawh a ei ngai vak lo, a roomah a inkhung deuh tlawk tlawk mai a ni. A tap deuh reng bawk a.. " a ti ta a.. 

Boss chuan, "Mary thih zan khan Duati kha inah a awm em?  Tuin nge a thih thu rawn hrilh le..? "

"Awm e.. Aw lawk.. A chhuak tak e.. Mahse, hla zirin a nia a chhuah. Mary thih thu kha chu zingah a sawi. Tu nge hrilh tih erawh ka hre bik hauh lo mai" a ti a. 

Boss chuan, "Zawhna pakhat chiah, sawi nuam a ni lo maithei. Mahse, a pawimawh si a. Ka pi, i fanu kha zanah a chhuak zeuh zeuh thin em?  Kohhran programme angah pawh.. "A ti a. 

"Aw.. Chhuak ve deuh reng, ka dang duh lem lo va. Kohhrana inhman tluk a awm lo ka tia" a lo ti a. Boss pawn a duhkhawp a hmu ta nge kan chhuahsan ta a. 

A tukah Mary te in lamah kan kal leh. Anu chauh a lo awm thung. A tha zawk, an pa kha chu a hlauhawm tlat. 

"Ka pi, i fanu kha i rindan tak takin sawi la, amah a intihhlum i ring em? " a ti leh tawl.. 

"Aih ring lo" a ti bur mai si. 

"Umm.. Kei pawn ka ring lo.. Thudang alai chuan inpa hian hnathawh tur a haihchham ngai vak lo ni maw? " a ti zang vah a. 

" Umm ni ve mai. An hlawh a tam lo naa hetia a thawh ve reng hi chuan kan zia ve mai… " a lo ti ve var a. 

"Chuan, mary chungchang bawk.. Ih, a thiante kha an lo leng ve thin em.. "

"Leng vak lo. Class an kal lai kha chuan melody leh Duati kha chu an rawn leng ve zeuh zeuh. Veni te chu an rawn kal ngai lo"

"Anih Mary kha zanah a chhuak ve fo em?  Ka sawi awmzia chu kohhran programme angah te hian" 

"Aih, chhuak vak lo. Mahse, sawi tawh ang khan a thih hma kar khat velah khan amah kha a pangngai hlawl lo ka ti mai. Zan hnih kha chu a chhuak ve.. Rami a dam lo va ka va kan ange a tia, chuan zan khat kha chu pawimawh a awm a, a tia a chhuak. Kan ringtawk a, kan dang ngai lem lo" 

"A thih zan khan a chhuak miah lo maw? "

"Chhuah pawh ka hre lo." a lo ti hmiah mai. 

"Anih ka pi, inpa hian ngaihzawng a nei tih i hria em? " boss chuan a ti ta daih!  Ka phawk khawp mai kei pawh. Mary nu chu a meng phar nasa ngang mai. 

"Eng nge i sawi awmzia? " a ti hlut a. 

"Mary thiannu Rami thih zan khan Kan pu nupui dam lo kanin ka chhuak a, ka hawn lamah Inpa leh hmeichhe pakhat ka hmu a ni.. An inkai rial lehnghal.. Inpa a awm lo bawk a, ka sawi mai mai a nih chu.. Chuan, Mary thiannu tho Veni bo lai vel pawh khan veni kan zawnna lamah Ka hmu dun leh nawlh bawk a" Boss chuan a ti leh a. A va timing lo tak, eng thu nge maw a sawi le.. A lo hmu annih pawn sawi kher a ngai lo sin le.. 

" A va mak dawn ve le.. Ni e, tun hnaiah a chhuak tam ka ti reng a. Rami thih zan phei kha chuan a thianpa Rina pa, damdawiina awm a serious deuh avangin a riahpui ve daih tak asin. Mahse, a riah tak tak ka ring miah lo. I sawi takah chuan, a chhuanlam mai mai a niang.. "mary nu chuan a ti a. A lungchhiat hmel takzet. 

"Lo lungngai lutuk lo la.. A tha ve leh mai ang.. " boss chuan a ti sap a. Mary nu chu lainat hmel zetin a melh bawk. 

A tuka Mary pa leh Boss inhmachhawn chu boruak a tang ru hle. "Kan nu bulah engvangin nge dawt i lo sawi a? Engvangin nge min umzui reng? I eng pawi nge ka sawi.. I dawt sawi pawizia hi i hria em? " a ti tâwn tâwn a. A thinrim ngang mai. 

Boss chuan dam thlapin, "Ka sawi dik lo em ni?  Bialnu i neih loh chuan khatiang zan laiah nula nen eng nge in tih? " a lo ti mai si. 

"Tu nula mah ka kalpui lo ve. Rina pa damdawiina awm ka riahpui daih aw"

"I riahpui loh thu ka dawng zo chiah" fiahfai zetin a lo ti a. 

Mary pa chu a dang ta deuh, "Kha chu ka thu thu. Eng pawh ka ti ang, i lo inrawlh vena tur a awm lo ve"

"Ka inrawlh tam chuan hmeichhe pathum te ang khan min dah tha ve dawn tihna em ni? " Boss aw chu a zawi naa a fiah kher mai. Ka lo phawk nghal hru bawk. Mary pa pawh a ding khawng lah mai. A hmaa ding hmeichhia, inringtawk taka amah melh rantu chu a melh let ve sak a. "I sawi awmzia ka hre lo ve" a ti hul hak. 

"Kei chuan ka dem hran lo che. I fanu phuba i la a ni mai a.. A ni lawm ni? " ngaipawimawh lo zetin boss chuan a lo ti sak. 

"Eng nge i hriat a.. Nang nu hi" a aw pawh a ring chho tan.. 

"Thu phawt la.. A chinchhuakin min han hrilh teh. A theih ang anga puih che ka tum dawn nia. Mahse, hremna erawh a namai dawn lo va, nunna pathum i la tlat si a" Boss chuan a ti a. Chair chu a hung rem bawk. 

"I intifing ve hle mai.. Engvangin nge ka fanu thiante chu ka thah ngawt ang. Thah nachhan tur ka nei tlat lo mai" elsen rawngkai lek lek hian mary pa. Chuan a ti a. 

"Phuba vek mawle.. I fanu thihna phuba kha.. I fanu kha amah leh amah intihlum duh tur khawpa nawr a ni a, mawrtu te chu a thiante kha an ni.. ka sawi dik em? " a lo ti salh. Mary pa chu a thu ta hnawk a. A kut chu a tukhumah suihin, chunglam a melh vang vang a, a rum leh nghat thin. 

"Ni e.. Mateii kha ka hmangaih em a ni. Thih kha a phu lo asin. Ka la phal hleinem" a ti dam thlup a. A hnuk a ulh tih a hriat reng mai. Kei erawh ka lo takam chem bo din ve reng ringawt. 

"Han sawi teh. A vaiin"boss chuan a ti a. 

"Engtin nge min rinhlelh theih? " Mary pa chuan a ti thung. 

"I fing khawp mai. Hnuhma engmah i hnutchhiah duh lo va, i indang ping thiam viau. In ina kan lo kala i thinur tum khan ngaihtuahna dang ka nei deuh a, tin, anuin Mary thih hmaa an thianho thlalak a print tih a sawi khan, mary thihna leh a thiante thihna hian inzawmna eng emaw tak a neih ka ring deuh bawk. Duati diary ka chhiar khan tu emaw chu an phatsan vang in a rilru a hah hle tih a lang a, chu tu emaw chu i fanu anih ngei ka ring bawk. Veni laptop kan check tuma Mary leh mipakhat thlalak ka hmuh leh Veni te thlalak dang ka hmuh atang khan ngaihtuahna mak deuh ka nei ta a. Kawng ka insial chawp a ni deuh ber, i fanu mizia kha ka zawh apiangten a tha zawngin an sawi vek. Khatia saruaka mipa nena an thlalak kha tihluihna a tel ka ring ta deuh tlat a. Chu tihluihna hmangtu te chu a thiante an nih ka ring bawk. 

Kha inphatsanna leh inbumna kha tuar zo lo vin Mary khan a nunna ngei a lak phah ta a.. Chu chu i tan palzam mai chi niin ka hre lo. I fanu thlavang i hauh natzia hre tawhtu ka ni tlat si a. In nu bulah Rami thih zana i chhuah leh chhuah loh ka hriat duh vangin tikhan ka sawi ta mai a nih kha.. I chhuak ngei a, Rina pa i riahpui lo tih pawh ka fiah vek tawn. Nang bak rinhlelh tur ka hre ngang lo a ni" Boss thusawi chu ngaihnawm ka ti hle. 

Mary pa chuan a aw a thian kak kak a. A kut humruhin, "Um… ka sawi ang. Mahse,  he ka thiltih vang hian ka inchhir lo tih erawh ka sawi duh. Ka fanu kha ni e ka hmangaih, ka innghahna a ni. MA a zawh te khan ka hlim ber awm e. Hna la hmu lo mah se, beiseina sang tak kan nei ve thin. A tawi zawngin a thih hma kara anuin a tap  a phawk lai vel khan kei pawn a rukin ka ngaihven ve reng. A thih hma niah khan ka hnathawhpui ka thianpa chuan, "I fanu hi nizan hmasa khan zan reiah mipa nen ka hmu tlat a nia. A ruih hmel viau lehnghal" a ti ta mai a. Ka awm a nuam ta lo. Thinrim takin ka hawng a, anu erawh engmah ka hrilh duh rih lo. Mary chu a rawn haw a, a naute erawh an awm lo. Thil awmzia ka zawt ta a. A tap ta a. A phone chu min pein, "en rawh" a ti a. Ka'n en nak chuan mipa nen khuma an mu dun lai a lo ni a. Ka beng nghe nghe. Mahse,.. Mary chuan anu nen tihian min hrilh ta a. 

"Veni te thiltih vek a ni. Pa, hrehawm ka ti lutuk. November thla khan zan khat chu Veni hian min lo bia a, sumdawnna tha deuh a hriat thu leh hna hmuh hmaa thawk ve tura min duh thu a rawn sawi a. Eng hna nge tih ka zawh chuan a tuk zana amah hmu tur leh min hrilhfiah tur thu a sawi a. Kan khawsak a harsa si a, sum hmuhna ka duh ve tho nen, nangmahni pawh hrilh lem lo chein Veni hmu tur chuan a tuk zanah chuan ka chhuak ta a. In bulah erawh Kohhran programme vanga chhuak angin ka insawi anih kha.. Veni bakah Duati leh Rami te pawh an lo awm ve a. Hna chu ka sawi nghal a, an inmelh hrek hrek ringawt. 

A hnu deuhah chuan, an hna sawi chu saruaka hmeichhia leh hmeichhia inkhalh kual a ni tih ka hre ta a. An inkhalh kualna video chu sum tam takin an lo hralh thin a lo ni!  Mahse, mask an vuah zel a, tuman tu nge an nih an hre lo. Mak ka tiin rapthlak ka ti em em a, ka ten ngawih ngawih bawk. Veni chuan Rami nen an video te min entir a, mi râp zawk. Sim hmak tur leh chu thil tenawmzia chu hrilhin ka chhuahsan ta a. Mahse, khata tang khan min rawn zar ta reng a. A hlawkzia te, mipa nena sex hman ai chuan a that zawkzia te.. A tam mai. Ka hnial zel a. Zan khat erawh Veni hian buaina ka tawk min lo hruai hram teh a rawn tih vangin ka chhuak a. Hotelah a lo awm a. A rui viau nghe nghe. Hawnpui tuma ka buaipui laiin mipa pakhat a rawn lut a, Rami leh Duati an tel bawk. Mak ka ti deuh a, mahse, engmah ka sawi hmain an vai chuan min pawm bet a, min phuarbet ta a ni. Tichuan, an hmuh lai rengin mipa chuan min khawih ta a. Min khawih lai vel hian Veni chuan eng damdawi nge ka hre lo, min rawn jection a. Kei lah ka che thei si lo, min phuar bet tlat si. Engmah ka hre ta lo va, ka harh leh chuan saruak in khumah keimah chiahin ka lo mu. 

Tichuan, kha pa nen kan mu dun lai thlalak leh video kha min rawn thawnin, "Kan sumdawnna i rawn zawm ve loh chuan he thil hi a darh nghal ang.. I lo inbarhluh ve a ngai tlat. A chhan chu engkim i hre tawh a. I ka kan hup a ngai.. " tiin min vau ta a. Ka thiante an ni sia.. Ka natzia chu ka sawinthiam lo zawk. Nula virgin ka ni thin, mahse, ka thian nia ka ngaih ten min phatsanin khatiang thil rapthlak kha ka chungah an ti ta si!  An sumdawnna chu zawm ve ka tum eih lo va, video leh thlalak kha thehdarh mah se pawi ka ti lo, an thehdarh ngam pawh ka ring hek lo. Mahse, min phasan duhna rilru an pu kha na ka ti ngawih ngawih a ni.. " tiin ka fanu chuan a sawi ta a. 

Ka rilru na tho mah se, ka dam huai. Ka fanu chu ka khawngaih hnuhnawh zawk. Tichuan..zanah khan kan mu a. Zingah a roomah inawkhlumin kan hmu ta kha a nia. Mahse, ka nupui fanaute ka khap ta vat. Mahni intihlum anga miin an hriat chuan a chhan zawn chhuah an tum anga, ka fanu phuba ka lak theih dawn loh bakah a video te thlenginna darh anga, ka fanu hi a thih hnuah a hmingchher èrh ang tih ka hlau a ni. Mu hlum angin kan sawi ta a nih kha. A thinlung na lutuk inawkhlum a nih ka ring. Tichuan, ka tihtur chu ka ti vr ta mai a ni. 

Kum thar ka nghak te te a, mi in min ringhlel lo ang tih hnuah ka che ta chauh a ni. Number dang hmangin ac ka siam a, an video chu lei duh angin ka insawi ta a. A tirah an fimkhur khawp. Mahse, zo pa mawl tak mah ni ila, hetiang mi hur leh duham ho biak dan tawk chu ka lo hre ve zel a. Pawisa ngah lutuk anga ka lan takah chuan an remti tlang a niang. An tih theih tur thu an sawi ta a. 

Rami kha a mut tawh hnuah ka bia a, Veni leh Duati te nen kan awm tlan thu leh an ruih vanga ka buai thu ka sawi a. A rawn chhuak ta a. Motora va lam tur anga ka insawi vangin min lo nghahna hmun tur nia ka sawiah a ding a. Keiin a hnunglam atangin ka pawm bet a, nikhaw hre lo vin ka siam ta nghal a ni. Duai leh veni pawh kha ruang an kil lai khan biain, Macau-a ka kal leh thut dawn vanga pawisa ka pek lawk duh thu ka hrilh a, rang takin an rawn chhuak anih kha. Min lo nghahna tur hmuna an awm laiin ka bei leh a. Duati kha ka that nghal. Veni erawh ka hrem rei ta deuh a. Ani kha chuan a thih chhan dik tak a hre hman ta a nih kha. Ani kha a hnarkaitu ber a ni bawk a, a hrehawm rei ta deuh a nih hmel… 

Tunah chuan Mateii pawh thlamuang takin a chawl thei tawh ang chu" Mary pa chuan hahdam hmel takin a ti ta a. Thaw huai hmel a pu zawk chu mak ka lo ti. A fanu phuba lak chu a nuam a tih hmel hlein ka hria. 

"Phuba reng reng Pathian lak tur a ni asin" Boss chuan a ti a. 

"Pathian chet hun ka nghak zo lo a ni mahna. Eng hremna pawh ka hmachhawn ngam e" inringtawk takin a lo ti nia! 

A nupui fanaute erawh an khawngaihthlak deuh dawn a nih hmel. 

Mary pa chu dan hmanga hrem niin, Damchhung Lung in tang tura tih a ni ta a. Boss khan engtin tin emaw sawipuiin, magistrate hriatpuiin Mary chunga Veni ten an thiltih zangnadawmna ni pah fáwmin an sumdawnna atanga an sum hmuh chu Mary nu kutah a lut ta a ni. Eng emaw chen chu an intuamhlawm thei ang chu… 

"Sam, mary pa dinhmunah angah hian ding vein a pheikhawk bun ve ni ta ila, thisen ka chhuah ve tho maithei a ni.. Chuvang chuan, tu pawh eng mi pawh hian an hringnun phènah thawnthu an nei vek a, dema sawisel nghal ngawt loh tur.. Tin, kei pawh hian thawnthu ka nei ve asin. Mahse, chu erawh ka inpeih hunah ka la hrilh ang che" a ti dam thlap a. Ngaisang zetin ka melh hâ a..