Amanda 11

BOSS AMANDA (11)

Ziaktu: Toni Râlte

"Sam, ka malin ka khua a har thin. Ka bulah awm la, ka ta chauh ni ang che" tiin a kut nel thep chuan ka biang a rawn chûl a, hmuhnawm tizetin a hmel chu ka thlir reng a, a mit chu ka hmuiah a fu chat. A rawn kun thiam a, a hmui nem zet chuan ka hmui chu a rawn hrut thuak… vanram emaw ka ti! Mahse,. 

"Bawiha, hei,Samson, tho vat teh. I  pa Rema a thi" ka nu aw fiak that chuan ka mumang ram atang chuan min kaiharh chiang kher mai. Ka mood a chhe nghal rawih rawih nia. Phak zetin ka thu chhuak a, a thusawi kha ka hre mumal bawk si lo. Mit nuai chat chat chungin, "Tu maw thi' ka ti phak chual a. 

"I pa Rema, i nî pasal" fiah zetin ka nu chuan a lo ti leh. Ka ding nghal zawk. Pa Rema a thi maw?  Eheu! Nizan lawka an ina ka va kal pawn fiamthu thawhin a nui uar uar kha a ni si a! Mihring hian kan chin kan va hre lo em.. Ka hmai ka phih lai chuan, "In boss pawh a phei tawh ang, va phei ve vat rawh" ka nu bawk chuan a ti a. Ka pa leh mi dangho pawh an reh diak danah an phei tawh anih ka ring. 

"Eng nge boss chuan a va tih ve dawn" ka ti a. 

"Aw.. A kal lohin i Pa Rema chu tualthi alawm. Mi in an that! " ka nu hi Rálte tih takah ka lakah bik hian a aw hi a no lo ve thin hrim hrim. Bakah ka mu rei deuh chu a lungawi chiah lo tih ka hria. 

Christmas thlen nan kar hnih chiah a awm tawh a nia!  Tun anga chhiat lo tawh chu a va na dawn em.. Ka inthlak vat vat a. Hmanhmawh zetin ka ni te in lam chu ka pan ve ta a. An in thlen hma atang pawn an tap thawm chu a ring hle. Pa Rema nen hian ka ni ai mahin kan inpawh zawk a, lui kal nikhuaa ka zui ber thin a ni. Amah pawn a fate ang thoin min en ka ti mai. Ka ui ngei mai. In chhung ka va luh chuan, postmortem tura phurh chhoh an lo tum mek a. Pa Rema ruang bulah chuan Boss pawh a lo thu khar mai. Ngun zetin Pa Rema kut zungtang ho chu a lo en a. 

Ka ni in min hmuh rual chuan, "Mampui, a va pawi tak em, i pa Rema a awm tawh lo. Engtin nge kan awm ang le? " tiin min rawn kuah a, a tap bawrh bawrh mai. Kei pawh mipa e ti lo chuan ka khap per ve sak mai. Pa tha leh zaidam, fiamthu thiam, tu pawimah sawi lo kha tu phiangsen chuan nge that ang le?  A ruang chu ka zuk thlir ve zuai a, a thisen an lo hrufai tawh nge pawnlam lang theiah chuan hliam hmuh tur em em a nei lo, mahse, a nak veilama vihna hnuhma erawh tuam deuh mah se, a hriat theih deuh tho. An phurh chhoh hnuah Boss chuan min rawn pan a. 

"I ni leh a fate ka va be duh ve" a ti sap. A sarhu laia biak hi a that chang a awm ve thin bawk a. Ruang ber kil tur a awm rih lo bawk nen. Ka ni te in hnuai, choka atana an hmanah chuan kan chhukthla ta hlawm a. Sawi hmaih hauh loh tur chu ka ni fanu upa zawk Rohlui hian January thlaah pasal a nei dawn a ni. A mipa lam hi an hmanhmawh angreng a, tun thlaa inneih mai an duh rum rum nain, pa Rema khan, "Christmas te kan hmangho ve leh phawt ange" a tih deuh tlat vangin Januaryah an titlu ta kha a nia. 

Boss chu chairah a thu a, mi dang erawh thutthleng seiah an thu thap.. 

"Thil thlen dan in hriat theih ang ang ka va hre ve ve" Boss chuan a ti a. 

Ka ni chuan, a mittui hru chawt chawtin, "Kei chuan engmah ka hre lo. Nizanah pawh a hlim em em kha a ni sia, hei Mampuia pawh hian a hria ang. Kan mut hun pangngaiah kan mu leh mai a, ka thawh chuan a lo awm tawh lo va, a tho hma thin hrim hrim a. Mak ka ti lem lo. In hnuaiah hian ka chhuk a, a lo awm lo. Tikhan eirawng ka bawl tan nghal a, hei ka fanu te zawk Senteii rawn au tuar tuar ka hria a. Hmanhmawh zetin ka tlan chho va, In chung thlanglam bathlara kan bathroomah khian  kan pa chu a lo tlu der mai a ni. A nak kha a thi zur zur a. Ka hamhaih em vangin engmah tihnachang ka hre lo. Mipa kan awm si lo, Mami (Rohlui) hian thenawm te va punin an rawn senghawi ta a ni.. "A ti a. A inhnit faih faih bawk. 

Senteii chuan mit sen râm chungin, "Nia, ka inthiar tur khan ka va hmu nghal mai a ni. Ka nu sawi ang khan engmah a hma lamin ka hre bik lo" a ti a. Rohlui erawh biak hleitheih pawh a ni lo, a tap khur ngat ngat reng mai. A awm ve bawk e. Pa Rema nen khan an inpafa deuh bik a, Pa Rema zu in lai pawha hau ngam bertu leh a fate zinga a zah ber a ni miau a. Ka ni te hian fa pathum neiin an u ber mipa hian nupui nei ve tawhin an nu hian Muthi-ah hna a neih vangin Muthi lamah an khawsa daih a, an rawn zin zeuh zeuh chauh. Chuan Rolhlui leh Senteii hi an ni mai. Rohlui nen hian kan inrual chiah a, Seni hi a piang tlai deuh a, a tleirawl ek ek chauh a ni. 

Rohlui chuan in hnit hlawp hlawpin, "Ka pa khan tu pawi mah a sawi lo. Pa tha tâwp a ni asin. A thattu hi ka hre duh. Thi ve rawh se" a ti a. A kut ka va chelhsak a, a khur ngat ngat mai. Kan inkawmngeih bawk a, ka lainat takzet a ni. 

"In pa chhungte lam hi eng nge an chanchin ve le? " boss chuan ka ni a en a. 

"Sesawng khua daih an nia. He lamah keiin hna ka thawk sia, tihian kan awm ta mai kha a nia. An fel reng, kan pa nu hi a la dam ve a, tlem lai deuh pawh khan a rawn zin nghe nghe. Kan pa hi an unauah a upa ber a, a nau chiah mipa niin an teber hi hmeichhia a nia, nupui pasal an nei ve ve tawh. Sesawngah vek an awm.. " ka ni chuan a lo ti a. 

Boss chuan, "In pa thihna hlawkpui thei tur an awm em? " a ti leh a. 

"Chutiang an awm ka hre miah lo mai.. " a lo ti a. Ka farnute erawh an ngawi reng. Nia, pa Rema khan hnathawh em em a nei bik lo va, ka pa in an inneih tirh khan kan huan sir lamah ram zau lutuk lo a pe ve a, chutah chuan balhla leh serthlum te ching vein a feh ve deuh reng kha a ni mai a. Pa hausa a ni hauh lo. 

"Nizanah tu te nge in inah lo kal'?  Boss chuan a ti a. 

"Hei Sama hi a nia, ka pasal tur Zaia leh a thianpa Aldrina te an ni leh mai.. " Rohlui chuan a lo ti a. Ka lo bu ve nghat.

"I pasal neih tur chungchangah i pa hian sawi buai te a nei em? "

"Nei lo. Zaia hi mipa fel ve tak a nia, kan inngaihzawn atangin ka pa hian engmah sawiselna a nei ngai lo, an innel lutuk.. " Rohlui chuan a lo ti a. 

Boss pawh a rilru a buai hmel hle. He inthahna rapthlak tak hi phuba lakna nge tihpalh thilthu ni ta ang le.. 

Pa Rema chu ropui taka vuiliam a ni ta a. A náka vihna leh a tukhuma thil rit taka vuakna a thihpui a nih ber chu. An in chhung ngeiah chutiang thil chu a thleng ta si a!  Mi dang thihna chhuiin boss hnung ka zui thin. Kan chhungkaw thihna kan chhui hi ka ring pha ngai miah lo. Kei chuan ngaigtuah dan ka hre lo va, bultanna tur engmah ka nei hek lo. Zan lamah pawh ka awm ve reng a, zai pawh a nuam phian mai. Boss chuan min tihbuai a hlau deuh nge a reh veng veng mai. A tuk thlan nghahniah pawh ka hna ka kal lo. Thlan kan va siam a, awm ve dangte pawn pa Rema thih ngawt dan chu mak an ti hle niin a lang. 

An inah ka riak nghal a. Rohlui roomah sofaah ka mu mai a. Ani khumah. Senteii erawh a nu bulah a mu thung. Pa Rema te chhung lam pawh an la cham ve a. Mikhual roomah chhuatah an mu ve mai. Rohluii leh senteii hian room an intawm thin a, Sawi zahthlak khawpin Senteii hi a dawih a ni. Room hranah mu ngam hek lo. A room tura an tih chu mikhual roomah an hmang ta then a ni. Seni chu a pa ruang pawh kha a kil rei lo. Hriatthiam loh ngawt chi an ni lo, mitthi hlau  hi an awm ve tlat a ni. 

A thih sarhu lai khan boss chuan bathroom vel kha a enfiah vek tawh a. Hnuchhuina tur hmanrua engmah a hmu lo anih hmel. Kei pawh ni 3na atangin hnaah ka kal a. Thil dangin min tlakbuak pawh nise, pa Rema thihna chu chhuichhuah phawt ka ngen ang. Chutikhawp chuan ka tum a ruh ve a ni. 

Pa Rema te inah erawh ka la riak a, A thlan nghah ni khan Senteii thiannu Lunglei lam ami Apuii a lo zin ve a. Pa Rema rawn râl tur a nih bakah bazar pah turin. Min nel khawp mai a, Boss hi star hmasa lo ila chuan ka bem ang. A no nguak mai a, a hlim thei bawk si. Seni khawhar pawh a hnem khawpin ka hria. Rohlui erawh kan hnem thei tak tak lo, ka ni aimahin a tuar tihtheih a ni. Inleng an tin tan a, Kei erawh la riak ve reng tura min chelh avangin ka la haw lo, ka ni fapa te chhungkua pawh an la awm ve bawk. Zan khat kan mu chu Zan laiah Seni a rawn rak hluah mai a, kan harh nghal vek. Anuin a han bawihsawm a, a khawng titih tlat mai. Apuii te nen an pathumin an mu a, kan va tlan lut ve nghal a, chunglam a melh a, hlauh nei niawm tak hian a awm. A kut leh ke khawng chu kan hmet a, "Mate, eng nge i hmuh? " ka ni chuan a ti sek sek a. 

"Apa ka hmu" a ti ta mai a!  Apuii lo inhup châwih chu ka va hmu. A râp a nih ka ring. 

"I pa chuan a rawn tlawh che a ni maw.. A ngai che anih dawn chu.. Hlauh tur a awm hleinem.. " ka ni chuan a ti mai a. Kei erawh ka awm a nuam vak lo. Rohluii erawh a inpet leh fan fan tawh. Seni a that tak deuh hnua a rooma kan inzui phei laiin, "Ka ngaih tehlul nen ka hnenah inlar zawk tur alawm le" a ti niah niah a. Huai hi ka'n ti khawp a! Seni chu a buai. Deuh fô mai a. Kan hmuhpui ve der si lo. 

Boss nen chhun lamah ka ni te chu kan va tlawh a, ka ni fapa te chhung erawh an nu hna a laklawh deuh vangin vawiinah khan an chhuk thla ve tawh a ni. Apuii erawh a la châm ve a. Amah a fel reuh em vangin leh a thiannu ber Seni a that meuh loh vangin Chrstmas pawh hmang ve mai turin kan chelh a, thutlukna a la siam chiah lo a ni. 

"Thil dang vang em ema rawn kal pawh ka ni lo. Ka rawn râl ve duh che u a, ka thawhpui chhungte in ni sia" Boss chuan a ti a. A aw chu a zangkhai hle. Seni awm dan vel te kha ka lo hrilh hre tawh bawk a, rawn zawh ve deuh a tum thoin ka hria. Ka ni nen chuan an inkawm a, Rohluiin thingpui a rawn dah, a kun zawng chuan a hnute chung bawr vela belkang niawm tak chu Boss chuan, "Zawhte i vulh ni maw? " a ti sap a. Rohlui chu a inhup vat. Nui hmelpu deuh hian, "Vulh lo ve, ka innawh pilhna a nih hi" a ti a. Chokaah a chhuk leh nghal daih. Apuii leh Seni bazar an rawn haw ta bawk a. An rawn hlim haw phian mai. 

"Sente, i lei nalh bawk maw? " boss chuan a lo ti var a. 

"Umm nalh ve reng, Apuii hian min thlansak deuh vek zawk. Thil mawi ka hre lo ve lutuk a" a lo ti a. 

Thingpui an in ve nghal a. "Apuii pawh i fel hle mai, hei Sama hian i chanchinte min lo hrilh a, Lungleiah maw in awm? " a ti leh a. A nelawm viau chu mak ka lo ti deuh. Rohluii a rawn chho mek a, a roomah lutin a kawr a va thlak a. 

"Umm.. Nia, hei ka khawngaih ve sia. Ka pa te pawh ka bia a, heta mas hman pawh an phal " Apuii chuan a lo ti vat a. 

"Lunglei chu ka rawn zin zeuh zeuh tawh, kha an hotel lar ber kha i hria em aw.. Fairy hotel kha.. Khata an manager kha ka thian tha lutuk ania, i haw hunah min lo biak dawn nia" Boss chuan a ti leh zung zung a. A nui sáng bawk. 

"Umm ka hre lutuk, Fairy hotelah te chuan kan kal ve fo alawm.. Biak dawn che nia" a lo ti ve sar sar a. Ka melh tawn chhen ringawt, pakhat tleirawl, pakhat senior.. An that dan inang lo tak erawh a ni. An tha ve ve. 

"Chuan Sente, i inpeih tawh chuan, i pa i hmuh thin dan hi i sawi thei ang em?  I pa thattu chhuina kawngah hian a pawimawh ve tlat si a" tiin Seni lam chu a hawi ta a. Seni pawh a insiam tha deuh a, a aw a thian káwk kâwk a. 

"Umm.. Ka hmuh hmasak ber zanah kha chuan kan khum mawngah a ding a. A hmel ka hmu chiang, a dam lai hmel ang chiah kha a ni. Chuan a dawt lehah chuan saw bathrooma ka va zung tur kawngka ka hawng chiah kha Comode ah sawn a lo thu a. Ka tlu nghal tawpin ka hria… chuan a dawt leh kha chu choka thutthlengah khuan kan uite pawmin a lo thu bawk a" tiin Seni chuan a sawi ta a. Boss chuan a chal a chuar nâng a, eng nge a ngaihtuah ang ka hre lo. 

"In inah hian i u mama tih loh chu Sama chiah mipa an riak tawh tiraw? " a ti a. Ka ni zawk chuan a nih thu a lo sawi a. 

"Thla leh huai hi ka la hmuh loh vang nge ka ring chiah lo. Mahse, a awm ve thei tho. I pa thattu hian a la tibuai zui zel zawk che u pawh a ni thei" a ti a. Tlemin ka awm a nuam sawt. Thlahrang hi ka ngaina tehchai si lo va. 

Chumi zan chuan Boss nen kan intext a. Seni a danglam leh veleh rang taka va en nghal turin min chah a. Mahse, eng mah thawm danglamna awm lo. Bakah kan intext laiin ka muhil daih. Rohluii lah nula ve si a hnar kuk kuk mai a. Kei pawh mutui tak ka ni. Seni pawh rak se ka hre kher lo maithei a ni. 

Zing thingpui ka in laiin ka ni chuan, "Seni pawh a tha chho dawn aniang. Hei zan hnih chu a reh ta phawt chu a nia". ati a. Ka lo tuihnih ve. Rohluii mawlh hi. apa thih atang khan a zia hi a dang tlat. A tawng mawh ta hle a, a bialpa pawh a be tha vak peih tlat lo. Mahse, Zaia te chu an rawn leng zantin tho va. Chaw a ei tlem a, a mu tlem hle bawk aniang, a hmel hmai landan atangin a hriat ve mai. Mahse, nizanah kha chuan a hnar vei sûk sûk si a.

Office ka va thlen rual deuhthaw chuan, "Sam, i nute call la, zanin tlaiah i nite chhungkua chaw eiah sawm. Teh se. An vaiin. Tichuan, an room saw ka en duh" a ti zung zung a. Ka hamhaih deuh. Mahse, ka nu chu ka be tho va, ani pawh mak a tih hmel deuh, mahse, pa Rema thihna chhuina tur a ni tih ka sawi erawh chuan a pawm thiam ta a. Tlai lam dar 4 bawrah ka ni te in lam chu kan pan a. An lo chhuak tawh aniang, kawngka a inkalh tawh. Mahse, boss chuan a bakkilh tè hmangin a hawng ve leh mai. Thenawm ten min hmu mah se; a vahpa ka ni miau a. Chhuanlam siam tur a tam. Mahse, eng ber nge en fiah a tum ka hre bik hauh lo. 

Room tinah chuan a lut dan dan a, ka zui ve zel. An khum hnuai leh dustbin te chu a melh dûk dûk a. Engmah a hmu lo nge khumah a thu a. Lukham chu la in a hnîm ta vang vang a. Phur zetin room danga lukham ho chu a hnîm ta zel a. Ka lukham pawh telin. Kei ka lo ding zum reng thung. 

"Awmzia a nei chho tan e.. Sam, ka thil chhuiah hian rilru i pe tak tak thei dawn lo tih ka hriat vangin engmah ka hrilh duh lo law law che anih kha. He thil hi rin aiin a khirh lo. He in chhungah ngei hian tualthattu a awm ve a ni. Mahse, tu ber nge tih tak hi ka la bawk fuh thei lo' a ti ta charh charh a. Mak tiin ka lo meng phawk. Ka mitthlain ka ni leh a fate ka hmu uai uai a. Tuin nge mahni pa emaw pasal that duh ang. Ka ni chu a ni lo hul hual ang. Ka phal lo. 

Helhkam nei tûnin zanah pawh chuan ka riak leh a. Engtin emaw ka awm. Boss in min rawn be der si lo. Mahse, kan kal hran hma khan "Sam, i lukham saw kham tawh lo vin thil dang kham la, i thil hriat te naktukah min hrilh dawn nia" a ti kha a nia. A sawi ang khan ka mut dawn tak takah lukham ka thlak a. Nizan ka mut tui nen boss thusawi vang kha nge ka meng kar reng mai a. Games khelh ka tum, a moodah ka cheng thei si lo. Ninawm. Rohlui erawh a muhil leh tawh. Nge a muhil der zawk.. 

Zawite tea phun sep sep niawm tak ka hria. Rohluii ka va melh, a muhil si. Room lehlam thawm em mawni zawk le.. A chang leh a nui her her a. A ring lo naa ka bengah a fiah viau. Ka hlau ta riau mai. Eng nge a sawi lah ka hre thei der si lo. Pa Rema thla hian min lo kan ve dawn em ni ang?  Ka rizai chu ka hmer ngawt ngawt, hah hmel taka thaw hlawi hlawi ang deuh te ka hre thul. Ka tho anga ka va enfiah dawn mawni aw ka tih laiin ka khuh a chhuak lutuk, ka hrawk a za si. Ka inrin hmain ka khuh ta thuai a. Thawm chu a reh hmiah. Thlahrang nge mihring? Ka hre lo ve ve. 

A tukah boss chu report ka pe a. Hmel hlim sárhin min hmachhawn. "Ka beisei ang ngei anih chu' a la ti tak deuh deuh. 

"Zingah tuman an hriat ve thu an sawi lo mi? " a ti a. 

"Sawi lo, hria nise an sawi ka ring" ka ti a. 

"Tihian a hmun lo nghak la, i duh leh games te kha va khel rawh. Vawiin chu Travel Agency lam ka va dawr ange.. " a ti a. A chhuak zui nghal. Zui ve a phal lo aniang. Ka ning. Tlai dar 3 dawnah a rawn haw a. A chauh hmel viau nain a hlim thung. Ka lo hlim ve tawp. 

"Naktukah chuan a hmawr bawk kan tum dawn nia" a ti mai a. Ni danga kan hnuchhui nen a inang lo angreng. Ka blind tawp. Rin dan pawh ka nei thiam lo. Kan hawn dawnah, "Zanah a mu hnuhnungberah tang la, kawngka kha kalh suh ang che" tih thu min chah. Ka vawng reng mai. Zan tirah ka ni te in lamah ka phei duh lo lui a, movie te ka en kual. Dar 10 a ri tep tihin ka chhuak phei a. An lo mu tawh. Kawngkapui chu kalh niawm takin ka ti ri a. Mahse, ka kalh lo. Ka mu ve nghal a. Thawm erawh ka ngaicháng reng. Rohluii a mutui leh khawp mai. Ka lawmpui e. 

Ka lo chhing ve sek aniang, Hmeichhe rak tuar riah ka harh zawk a. Ka inbeng tho nghal. Zing dar 2:34 chiah a ni. Room atangin ka chhuak a, thawm lo chhuahna lam mikhual room chu ka pan a. Ka va hawng chu ka thil hmuh vang chuan ka tawlh hnung dâwrh mai. 

Seni leh Apuii chu ruak deuhthaw hian khumah an lo thu a, rizai chuan an inhliah ve deuh naa an saruakzia a lang thei tho. An hmaah tak Boss Amanda chu a lo ding khawng lah a. An inmelh tawn reng mai. 

"I pa in thah vangin ka man dawn che u a ni" a ti hriam hraih a. A aw chu a nelawm loh kher mai. Rang takin ka ni leh Rohlui ka kai tho nghal a. An thil hmuh leh hriat chuan a nghawng ve hle aniang, ka ni phei chu a khawlo titih hial a ni. An inha tha a.. Ka nute ka call, kan chhung leh khat dangte pawh. Thenawm khawvengte erawh a mualphothlak ka tih vangin hrilh loh kan ti a. Kan thawm erawh an hre maithei. Rohluii lah a lo tap bawk nen. Ka nu te pawh an rawn phei vat a. Ka patea leh papui te ho te pawh. Ka ni te inchhungah chuan kan kim thap mai. 

Zing dar 4 a ri chiah. A la hma hle naa tumah mutchhuak hmel ka hmu lo. 

Boss chuan, Seni te pahnih chu a melh a. 

"A tirah tumah ka ringhlel lo. Misual tu emaw rukhmang thiltih anih ka ring a, hnuhma a hnutchhiah dah law maw tiin in huan lam te pawh khu ka zuk fang kual a, khu in choka hrula theihai lian vak lo bul hnim zingah khuan chemte lian vak lo, zum tha deuh si ka chhar ta a. Chemte zawrhna dawr tin ka fang kual a, tuman chutiang chemte chu an nei lo. Engpawhnise tiin ka dah tha a. Hei Apuii lo zin thu Saman a sawi khan, engmah hmaih neih ka duh loh vangin a thlalak ka dil a. A lo nei remchang hlauh a. Apuii ka hmuh khan ngaihdan ka thlak ta a ni. A lo zin ni nia Sama sawi leh Apuii ka hmuh ni kha a inpersan tlat. Pu Rema thlan nghah nia lo thleng si kha Pu Rema thih hma niah chiah khan ka motor ke ka siamtirna bulah Seni nen inkai riala an lo kal ka hmu tlat. Engvanga chhinchhiah thei nge ka niih tih chu Seni zawk hi Scooty in a su tèp a. Apuii hian Scooty khalhtu a tim nek vang a ni. An ni chuan min hmu ve kher lo vang. 

Seni thlahrang hmuh thu vel kha chu thutak nge dawt ka hre bik lo. Amah thattu a fanu kha rawn tihthaih a duh ve pawh a ni mahna le. Mahse, buaina ka nei. Pu Rema kut tinah khan tisa them a bet a. Amah thattu hi a beilet ve nasa tih a lang, a ham nasa tih pawh. Amah Pu Rema kha a lian riau a, An hmai velah a nih loh chuan an âwm bawr velah a ham ka ring a. Chutiang chu ka hmu mai si lo. Rohluii awma belkang ka hmuh khan ka zawt satliah a. A mitmengah hlauhthawnna engmah ka hmuh loh vangin dawt a sawi ka ring lo. 

Thil zeldin ve tho chi ka nia, Sama nen kan intext zan khan min mutthilhsan daih mai a. Nidanga min ngaihpawimawh thin nen. Ngaihtuahna danglam ka nei leh a. Room tin hi fan ka duh ta tlat. Tichuan, Sama te ina chaw in ei hlan khan ka fang kual ta a. Ka duh ka hmuh loh hnuah lukham kha tihpalh thilthu talmeuhin ka khawih a, ka hnim ta a ni. Tah khan Sleeping spray, tui taka mihring an mutthilh theihna rim kha a lo nam ta a. Lukham pahnihah chiah a nam lo. Seni leh Apuii te lukhamah. A hmawr bawk a hun tawh viau nain finfiahna ka la nei thei tlat lo va, Travel Agency ka va dawr a, Apuii thlalak nen. Ani hi December thla tirah mizoramah hian a lo awm reng tawh a lo ni. Gauhati-ah a nu hna avangin an awm reng a, December ni 2-ah khan Mizoram a rawn thleng. Hei a ticket pawh ka kawl thlap e. Anih chuan engvangin nge a pa chu an thah ang tih ka ngaihtuah a. Apuii profile te checkin a mesenger ka hack ta a. Ka rin ang ngeiin Lesbian a lo ni!  Seni ka check ve leh a, ani pawh mipa ngaihsak miah lo, ngaihzawng tia sawi theih la nei lo. ani bawk. Engkim a dik ta thlup. 

Chimawm ka chhuah ve duh hrim hrim a. Zaninah rawn phâwk che u ka duh vangin Sama kha kawngka kalh lo turin ka ti anih kha. Ka rin dan chiahin in lo mu dunin in lo insuasam mek a.. Ka rawn nangching ta che u a nih kha… Sam, hman zana i thawm hriat pawh kha i naute nuam tuar thawm a nih ka ring… le.. Engtin nge i pa kha in thah han sawi teh u le" A ti a. Seni te chu a melh kal mai. 

An ngawih rei deuh vangin Rohlui thin a thawk nge, "Nunsang, sawi ta che. Engvangin nge ka pa i thah? "Tiin a va kek a. Chutia a va inhambuaina lamah chuan seni kawr hma lam chu a thler kâwk a. A awmbawr chungah ve tho apa hamna niawm tak chu a lo belkang raih mai. Boss chuan Rohluii chu a beng dai te te a. Tichuan, Seni chuan inhnit hlap hlap chungin thil awmdan chu a sawi ta a ni. 

"Ih.. Apuii nen hian whatsapp group pakhat atangin kan inhria a. Kan mizia leh duhzawng kan inhre chho zel a. Kan duh a thuhmun tihte.. Chuan ralkhat atangin kan inngaizawng ta a. Chu chu November thla vel lawk kha a la ni. Chuan a lo zin ta a. Kan inhmu fô naa, hotela kal em kan hreh sia, chance pawh kan nei hleithei lo. Apuii hian rem a ruat ta a. Sleeping spray kha min pe a, ka chhungte lukhamah ka kap ta vek a, kawngka ka kalh lo bawk. Tichuan, zan laiah a lo lut a, mikhual roomah sawn kan mu dun ta a. A zan hnihnaah khan ka pa khan a lukham a lo thlak nge ka hre bik lo, a rawn tho ta mai sia. Mahse, a tirah min hmu lo. Zan reiah thawm a ring hma si a, tiin thlanglam bathlarah sawn kan insawn ta daih a. Kan inngai ve em em bawk si. Mahse, ka pa khan kan thawm a hre tho aniang, a rawn tho leh ta a. Min rawn hmu ta a ni. Min beng sawk sawk a, ka nute erawh an muttui em vangin engmah an hre lo. Chutia min sawisak lai chuan Apuii tihngaihna hre tawh lo hian pipe hlui, zawm that atana ka pa in a dah chu la in ka pa tukhumah chuan a rawn hlap ta zawt a. Ka pa chu a tlu nghal. Rohluii chu mikhual roomah khan va lutin chemte a va lachhuak a, a nakah khan a vit ta nghal a ni. Kan hlauthawng leh sia, chemte kha a paih a. Ka pa chu kan zawn a, bathroomah khan kan muttir ta a. Ka awm hi a rawn thi ser ser a, kan buai lutukna lamah min ham tih pawh ka hre tawh lo. Ka rin danin a tukhuma Apuiin a rawn vuak khan a tlu tur chechang khan min ham a nih ka ring. A bak zawng chu in hriat kha.. Ni e, ka pa kha ka lakah a thinrim a, min rawn tihthaih a niang.. " tiin a sawi ta a. A sawi zawh rualin ka ni im chhuatah a hnuk thla tawp. Apuii pawh Rohluiin a beng nawk nawk mai. Thin a rim tlang a ni e. 

Kum an tling ve tawh miau si a. Central jail lamah an liam thla dun ta. 

"Sam, hurherhna hi a pawi vawng vawng teh e tiraw?  Lehlamah an khawngaihthlak tho bawk si.. " a ti sap a. 

"Lesbian ni turah ka ngai ve thin che" ka ti hmiah. Ka nui tho va. 

"Ka nih lohzia fiah i chak vang a nih chu' a ti. 

"Chak e.. " ka ti zauh a, min melh rum hmain ka kalsan daih. 

Pa Rema pawh thlamuang takin a chawlh ka beisei e.