Amanda 10

BOSS AMANDA.. (Episode-10)

Ziaktu: Toni Râlte

November thla laihawl a ni tawh a, boruak pawh a vawt suk tawh mai. Chawlh lah hi kan nei ve thei der si lo. Boss hliam pawh a dam deuh thawkhat tawh a, zin thu erawh ka la sawi lo. 

Ni 17, Thawhlehni a ni a. Boss office kawngka chu a rawn kik dat dat a. Lut tura a hrilh hnuin Pavalai pakhat hi rilru hah hmel angreng deuhin a lo lut hlawl mai. Thu rawh tih hun pawh a nghak thei lo nge chairah chuan a thu hnawk a. A rawmawl chuan a hmai vel chu a hru pawk pawk a. "Ka nupui a bo a ni" a ti tham tuak a. 

Boss chuan, "Hahdam phawt la.. Chiang zawkin min han hrilh teh" a lo ti var a. Chu pa chu kum 53-56 inkar vel a nih ka ring. Pa hmaitluak tha tak a ni a, a vun pawh a ngo angreng. Tin, a palian viau bawk. A inchei dan atang chuan pa khawsak harsa zawk zawk a ni lo vang tih pawh a rin theih. 

A aw a then kharh hnuah, "Ih, englo a nia. Kei hi Lawmsanga ka ni a. Zarkawtah sawn kan awm a. Ka pa sumdawnna chhete enkawlin nupui fanau te ka enkawl ve a. Ka nupui chu Rinpuii a ni a. Fanu pakhat leh fapa pakhat kan nei ve a. Kan nu hi a hriselna lam a tlakhniam deuh vangin Doctor ten nau pai an phal ta lo a ni. Kan inpui hnuai ber luahin kan khawsa a, kan inpuiah sawn ka nu leh ka naute chhungkua an cheng thung. Kan in chung chiaha ka û te nupa an cheng bawk. Rinpuii hi a pain a thihsan ve tawh tho va, anu hovin an khawsa a. Tunah sawn a naute chhungkua leh a nu an cheng mek. 

Rinpuii chu ka nupui anih vang ni lo vin hmeichhe hmel tha leh fel tak a ni a. Ka chhungte lam hian an ngaina em em bawk. Kan inah sawn an rawn leng lut reng mai. Fa enkawl a thiam hle bawk. Mahse, September thla tir khan zan khat kan fate lehkhazirtir chungchanga kan inhnial deuh chu a tlan ta ringawt mai a. Ka hrilhhai viau nghe nghe.

A tuk zingah keimah ngeiin ka va lam leh nghal a, chuta a nu thusawi chuan min tihrilhhai viau mai. "Ka fanu hi vawikhatmah kut lo thlak tawh suh.. Nanga kutthak hnawihna tur a ni lo" a lo ti ringawt mai a. Kan inneih atang hian vawikhatmah kut ka la thlak eih lo. Ka insawifiahna pawh a ngaithla duh ta si lo va, beidawng takin ka haw leh ta ringawt a ni. 

Mahse, zanah amah in a lo haw ve leh ta mai a. Thinrim miah lo vin tha takin ka lo dawngsawng a ni. Kei aiin a naupang ve deuh bawk a, a duat pawh ka duat ve viauin ka hria. Tichuan, tha tetein kan awm ve leh ta phawt a. Anu bula min hekna kha ka zawt a, "Dawt ka sawi anih kha" a ti mai a. Ka hau duh lem lo. 

Tichuan, October thla tawp lamah khan a ni chiah ka hre ta lo va. Ka khua a sik vangin dawr atangin ka hawng a. Kawngka chu a lo inkalh lo va, ka lut a. Kan rooma luh ka tum chu a lo inkalh tlat mai. Ka sawi a, kan nu ka ko bawk. "Ka inthlak laklawh lutuk a" a rawn ti a. Rei fe hnuah a lo hawng ta a. Inbual zo hlim pawh a ni lo, khum chu a lo chuar deuh tun bawk si. Ngaihthatlohnain min tuam ta a. Kan nu hmel lah a tim dai bawk si. Mahse, fiahna engmah ka nei lem lo va, engmah ka sawi duh lo. Mahse, kan nu chu ka chîk ru ta reng a. Tun thla tirah khan a nawmsam loh vangin sunday vawi khat kha a inkhawm peih lo va, ka rilruah mawlhtu a awm ta tlat a. Inkhawm laiin ka haw ru ta a. Kawngka a lo inkalh!  Ka ko vak vak a. Rei tak hnuah chauh a lo hawng leh a. A hmel a pawr phang mai. Eng sawi set set lo vin roomah ka lut nghal a, ka rin ang ngeiin khum chu a lo chuar leh tun mai. Ka insum thei ta thlawt lo va, ka zawt ta a. Ka rinhlelh thu pawh ka sawi. A tap ta ringawt. Engmah a sawi lo. Rilru nuam lo zetin hun ka hmang chho ta a. 

Ka  chhungte bulah ka sawi ngam bik si lo. Kei lah eizawnna vangin ka chhuah fo a ngai bawk si. Ka nupui chuan min uiresan ngei tih fiahna nei lo mah ila, ka thinlung hian a ring nghet tlat thung. Mahse, ka hmangaih em em tho si a. Kar hmasa zirtawpni zan ka haw kha zu rim a lo nam a. Ka fate hriatah ka hau duh lo va, in chungah ka fate ka tir chho va. Kan nu chu ka hau ta a. Min chhan danin a zir loh em vangin ka beng ta hial nghe nghe. Tichuan, chhuak rawh ka ti miah lo chungin a chhuak ta a. Ka nu te pawn thil awmzia min zawt nghe nghe, mahse, a kip akawiin ka hrilh duh lo. 

Ka va lam duh ta bik lo va. Sunday chawhnuah Anuin min lo call a, "Rinpuiin a phone a tibo si a. Ka lo bia ange" a rawn ti a. 

"A rawn haw kha. Zirtawpzanah khan" ka ti a. 

"Lo haw e, a nizanah a rawn haw tawh kha" a rawn ti ta a. Mak ka ti ngang mai. A rawn thleng der si lo. Ka ngaihtuahnaa rawn lang hmasa ber chu a uirena pa nen an tlan dun anih ka ring a. Mahse, anu bulah ka sawi hran lo. Zanah an rawn phei ta a. Kei hian ka thukru emaw ka tihlum niah an ngai a, FIR thehluh an tum thu an sawi. Kut ka thlak nasat vang leh ka ruih nasat vanga a hrehawm ti lutuk chhuak angin a lo insawi a!  Ka fihlim vek si. Ka chungah an thinrim em em kha a mak ka ti. Tichuan, a kip a kawiin Rinpuii chungchang chu ka sawi ve ta vek a. Mahse, ka puhchhia angin an sawi daih. 

Tichuan, niminah khan kan zawng ru deuh a, police-a han report pawh mipa nena tlan dun te an nih chuan a mualphothlak kan ti a. Mahse, Rinpuii nu te lam khan min rawn ankhum chamchi si a. Inhnamhnawihna ka neih lohzia fiah nan ka rawn pan ta tawp che a ni. Ka nupui hi mipa nen an tlan dun emaw tlan dun lo emaw khawngaihin min zawn hmuhsak hram teh" tiin Pu Lawmsanga chuan a ti dap dap a. Boss nen chuan kan lo ngaithla uluk kher mai. Case dangdai tak a nihna chen pawh a awm. Sangliana case nen pawh khan a inang lek lek. Mahse, tun ami chu uirena lam rim te a nam a. A awlsam zawk phian maithei. 

"Aw le.. Pu Lawm, a zia lo hle mai. In nu nen chuan a tlan chhung khan in inbe miah lo tihna em ni? " Boss chuan a ti sap a. 

"Zirtawpzanah chuan ka va bia a, a min be tha duh lo. Inrinni zanah chuan ka lo haw dawn tiin message min lo thawn a. Mahse, sunday chhun atang khan kan be tlang thei ta lo a ni. Inrinni zanah pawh khan a lo thleng ta si lo va, ka call a, a switch off tawh.. " a lo ti var a. A lo luh lai ai chuan a hmel hmuh pawh a nuam ta deuh. 

"Uire ni ta se, han rinhlelh tur awm i hre mai lo tihna em ni? "

"Aw.. Hre miah lo. In leng hi chu kan nei ve nak nak reng a. Mipa lam hi chu ka thiante vek an ni. Ka u te nupa hian fa an nei lo va, an lo leng thla deuh reng bawk a. Kan fate pawh an riahpui chang a tam mai" a ti duah a. 

"I thiante zingah in nu han ngamtlak zual te an awm em? "

"Awm e.. An ni deuh vek zawk, a besawm peih a, an innel viau. Mahse, tumah han rinhlelh tur ka hre chuang lo" Pu Lawmsanga chuan a ti leh thluam a. 

Boss chuan, a pen tuaivir pahin, "In fate chu kum engzat nge an nih ve tawh? " a ti a. 

"A upa zawk saw kum 8 a tling ve tawh a. A nau erawh kum 5 chauh a la ni. An inthlau ve deuh a" a lo ti a. 

"Um.. Eng pawhnise, in nu chu biak pawh ngaihna a awm si lo.. Theihtawp erawh kan lo chhuah dawn nia. In nu chhungte lam pawh biak chu an ngai ang. An address min pek theih chuan a tha ngawt ang" Boss chuan a ti hluai a. Pu Lawmsanga pawh chuan a pe ve mai a. Boss puihna a ngen leh hnuah a chhuak ta a. 

"Pawn lama thuro, in chhunga sakei nge a nih anga pasal leh pa tha tak zawk tih kan la hre ngei ang" tiin Boss chuan a chhuak lai thlir pahin a ti zui sap a. 

Kei chuan, "A uire a nih ka ring. Khawiah emaw an tlan dun daih aniang. A pasal sawi hmangah khan a ngaihthatthlak loh em mai" ka lo ti a. 

"Sam, chu chu ka ngaihtuahnaa lian zawk a ni. A chhungte bulah a pasalin kut a thlak thin thu a sawi a, a ruih thin thu te pawh. Tichuan, an pa hruai pawh duh lo vin amahin haw tur anga insawiin a chhuak a. Mahse, a pasal te in thleng lo vin a uirena pa nen an tlan dun anga ngaih theih a ni. Rinpuii chhungte lam hi bia ila a chiang deuh kuarin ka ring. Chhuak nghal mai ang hmiang.. " tiin min rawn melh ralh a. 

"Samsona, mi chak"  a ti zui sap. Ka lo ner khum ringawt. Mi hi a hnehsawh thei siah. 

Rinpuii nu te in kan va thlen chuan an lo awm deuh liai a. Kan han insawi a, "Lo kal kan lo tum ve mek tak asin" anu niawm tak chuan a lo ti var a. A la valai angreng phian. Boss chuan Rinpuii bo dan vel chu a han zawt ve a. A pasal nen an inkar a chhungte bula a sawi dan te.. Rinpuii nu chuan muangchangin a sawi ta a. 

"Lawmsanga nen hian an inngaizawng rei lem lo, Amah Lawmsanga hi a lo hmanhmawh ve deuh nen, inneih a rawt vat a. Pa tha pui nia ka hriat vangin kei pawn ka remti ve mai kha a nia. Fa te an neih hnu kum eng emaw ti chhung kha chu Rinpuii hian sawiselna eng em em a nei ngai lo. He lamah pawh a rawn leng khát angreng. Tichuan, sawi tawh ang khan september thlaa a rawn tlan ve khan a tawrh rei tawhzia leh engmah a sawi ngam ngai loh thu te chu a sawi fai ta vek a. Kut a thlak nasat thu bakah ngaihzawngte hial a neihsan thu pawh a sawi a ni. Mahse, a fate vang khan hruai pawh ngai lo vin a haw leh ta mai kha a nia. Hei a nau phei hi chuan hawn kha a phal lo lek lek, Rinpuii nen hian an inunau bik bawk a. Tha tetein an awm ang chu tih laiin hmanni khan a rawn haw leh ta tlat mai a. Chumi tum phei chuan a ban leh a hnung a duk ruih mai a, a mal pui pawh a sen vual tût mai. A pasal kutthlakna a nih thu a zep lem lo. A tap a tap mai bawk a. An pa khan a rawn lam leh mai lo bawk a, bungraw lak thleng kan sawi hman. Mahse, inrinni zanah khan a fate a ngai si, "Nu, tun tum chauh chu ka tuar leh poh mai ang.. Ka theih loh tawpah ka fate nen kan rawn fin tawh mai ang che u" a ti a. Khatiang ngawih ngawih kha chu tiin ka dang ta lo va. A nauin a va thlah thlap a, in chhungah erawh a zu lut ve lem lo thung. A phoneah ka be tlang thei si lo va.  Mahse, ka ngaihltuah deuh vangin sundayah khan an pa chu ka va be ta kha ania, ani lah khan khatiang khan min lo chhang ta mai si a" tiin a sawi a. Kan ngawi thap mai. A nau nupui niawm tak chuan thingpui min rawn pe a. 

Boss chuan, Rinpuii nuta chu a melh a, "I u chuan khawi laiah nge i drop le? " a ti a. 

"U Lawma te in kawtah, mahse, an inah khan chhuk ve a phal lo va, i thinchhe si a,  i insum thei lo vang a ti tlat a, kei lahin U Lawma kha ka hmu chak hran lo bawk nen, ka kalsan ta mai a ni" a lo ti a. 

"Anih hmutu che u an awm em? "

"Ka hre chiah lo, an in pui kha chu kawngka a inkhar phui a, an thenawm te ho pawh an inkhawm nge veivak an awm pawh ka hre lo" a lo ti ve leh mai a. Rinpuii nen an inang hle. 

"Anih ka pi, Pu Lawmsanga saw makpa tha tak a ni in i hria em? " Boss chuan a ti a. 

"An inneih tirh atanga Rinpuii rawn tlan hma thleng kha chuan sawiselna tur reng ka hre lo. Amah Rinpuii khan engmah a sawi ngai bawk si lo va. Sum lama kan buai chang pawn min pui vattu a ni ziah a, Rinpuii kut a thlak thin tih pawh kha ka awih lo lek lek a, mahse, a rawn tlan hnuhnuna a taksa ka hmuh khan ka awih ve chauh a ni.. Mak ka ti khawp mai" Rinpuii nu chuan a lo ti dam diai a. Nu. Sual tak zawng a nih loh hmel. 

Rinpuii hi sawi tawh angin a nu ho va awm an ni a. An pa ber hi a boralna a rei tawh angreng a niawm e. Anu hi Middle school zirtirtu niin kum thum liamtaah khan voluntary pension in a lo chawl tawh a, Rinpuii u hi pasal nei tawhin an pa nen in hrang an chang tawh a. An naupangber mipa hian nikum khan nupui neiin tihian An nu hoin an khawsa kha a nia. Rinpuii thlalak te kan han en leh hnuhnawh a. Hmeichhe hmel tha leh nunnem hmel tak a ni. Pu Lawma nen erawh an kum a inthlau ve hlek ang tih a rin theih mai. 

"Anih ka pi, rin dan neih thiam a harsa a, an pa lah nangmahni ang thoin a mangang ve a, kan puihna a rawn ngen ve tho va, in fanu hi a bo nge mipa dang nen an tlan dun tih kan hre lo. Damin nge thiin kan hmuh ang tih pawh kan hre hek lo, kan inthláwp tawn zel a ngai dawn a ni. A pasal sawn a chungah thil eng emaw tak a ti anih in ring tihna chu ania tiraw? " tiin a han thawi kual leh a. 

"Kei tak hi chuan rin dan neih thiam harsa ka ti khawp mai a. Lawma saw han rinchhiat viau pawh hrehawm ka ti. Mahse, hei a unaute hi an thinrim angreng si a, kei chuan ka hrethiam lo. Lawma lahin uire tluk deuhthawin a sawi ve bawk si.. Mahse, Rinpuii kha a uire ka ring thei hlawl lo, a nulat lai pawha nula lerh lo tak, chut lek lek kha a ni roh a. Mipa kha a ngaihsak vak lem lo. Lawma nen an han innei a, a mizia te pawh thlakin Lawma chhungte tan pawh fak tlakin a han awm leh kha a nia.. Hmeichhiat mipatna lamah chuan ka fanu anih vang pawh a ni maithei, ka ring chhe phal ngang lo a ni" a ti leh thliam a. 

"U Lawma sawn engtin emaw a ti a ni mai. Sawi vak a ngai lo. Ka u kha a derdep ve si a, kei chu a in saw dap ula ka ti em mai" Rinpuii nau Sawma chuan a lo ti hluk hluk a. A makpa chu a ngaina vak lo a nih hmel. 

Rinpuii u hmeichhia, pasal nei tawh pawh chuan, "Nia, ka nau khan mipa dang a zui mai theih ka ring tlat lo. A pasal sawn a chungah thil tha lo tak a ni ngei ang. A chhungte pawh saw an tel ngei ka ring" a lo ti ve hlak hlak bawk a. A pasal leh an monu  erawh an ngawi reng thung. 

Boss nen kan chhuahsan leh ta phawt a. Ngaihtuah dan vak ka thiam leh pek lo hle. Boss pawh a rilru a buai hmel angreng. 

"An sawi ang khan house warrant kan neih chu a ngaiin ka hria.. An in  khawimaw laiah emaw sawn a lo awm reng maithei asin.. " A ti sap a. 

"Kei chu Pu Lawma kha ka la ring zawk tho. Rinpuii unaute khan an duh sa pung pung em mai. Eng emaw tak an ti zawk a ni maithei sin" ka lo ti ve a. 

"A dik tho, tin, amah Rinpuii hi actress turu tak a lo ni thei bawk. Mahse, remruatna fel tak nei pawh nise, engvangin nge mi bo anga a inlantir kher ang le.. A chhungte leh a pasalin mawh an phur dawn tih a hre sa tho awm sia.. Hm.. A mak hle. a ni" a ti a. 

Office kan thleng a, Pu Lawmsanga in dap theihna kawng chu a ngaihtuah nghal a. A lo harsa lem lo bawk a. Mahse, coffee kan han in leh te te a. 

"I hnute.. Oh!  I awm bawr chu a dam chiang tawh em? " ka ti a. Ka nui deuh bawk. Thutak zet hian, "Ka hnute chu i la hisap ta reng em ni? " a ti daih!  Ka nui tawp hmak. 

"Teuh lo mai" ka ti hmuk. 

"Hnute mawi tak ka nei tih hi an awih kher lo vang. Nang erawh chuan i hmu tawh ania, inchhuang hle rawh" a ti leh nghat. A la nui duh miah lo lehnghal. Ka chhang peih tawh lo e a. Kan in zo va, Pu Lawmsanga in lam chu kan pan ta nghal a. Kan biak lawk tawh vangin a lo awm a. A chhungte pawh an awm ve. 

"Ee.. Dap vek rawh u.. " a lo ti sawt sawt a. Hlauthawng hmel reng a pu lo. An roomah kan kut a, nupui awm ta lo nafam chu a lo hnawk ve deuh niah a. Khum pawh a insiam fel chiah lo. Mipa pawh hi kan mak.. Khum te hi siamfel a harsat loh tehlul thin nen hian.. Boss chuan Almira te chu a hawng zung zung a, kei pawh bathroomah te lutin en tur lai chu ka en kual ve thuak thuak a, kan duh leh beisei kan hmu lo. Room dangah pawh kan hlawhchham. Ka rinsa tho ania, mak ka ti lem lo. Pu Lawmsanga fate chu boss chuan a kawm ve nghal a. An fel reuh khawp mai. A u zawk hmeichhia phei chu thu zawh tlak tak a lo ni reuh!  

Room dangah a hruai hrang ta daih a. Rinpuii thlalaka a hmel ang chiah kha a pu tihtheih a ni. A nau zawk erawh chuan a nu a chhun lem lo. 

"Bawihi, anu i ngai em? " boss aw chu a nem ngang mai. Ka nuih te pawh a za deuh. 

"Umm.. Ngai ve tho" a ti a. 

"Nih leh Anu kha engtik nge i hmuh hnuhnun ber le.. I la hre thei em? " boss chu a nui sáng a. Naupang chu a ngawi vang vang a, a mit te chu a han chhing leh deuh vang vang a, a ngaihtuah ve a ni ngei ang, "ih.. Ka hre tawh lo. Sunday zanah khan Mampuia nen api rualin kan inkhawm a, chuan ih, kan biak in bulah ka hmu tlatin ka hria" a ti ta mai a! Boss nen kan inmelh zawk. 

"Anu chuan a hmu ve lo che u a mi? " tiin a zawt leh a. 

"Koh ka tum lai takin an tlan leh daih a. Ih, motor ah ania." A ti ta reuh a. Boss chu a hmanhmawh tih ka hria. Mahse, dawhtheih a ngai si. Naupang han biak vel chu a thiam vak ka rin loh nen a zei ve fû.. Lalfamkimi a nih mai hi a. 

"Bawihte, anu i hmuh thu chu api i hrilh lo em ni? "

"Hrilh e. Api anu ka hmu ka tia, Khawiah a ti vat a. Mahse, an tlan liam tawh sia" a ti ta zel a. 

"Anu bulah chuan tu nge thu i la hria em? "

"Tumah an thu lo.. Amahin a thu a.. " a ti leh mai a. Boss hmel chu a nur deuh. 

A nau zawk erawh a â buang a, eng han zawh vak theih pawh a ni lo. 

"Anute, ih, a nu leh apa hi an inthen dawn a mi?" Kan chhuahpui dawn chuan a ti ta reuh a. 

"Then dawn lo ve.. Anu chu a buai rih a, a lo haw leh vat ang" tiin a hnem ve thluam a. An unau chu a kai chhuak ta a. 

"Ka pi, i tunuin anu a hmuh thu kha i sawi miah lo va" Pu Lawma nu chu a melh a. A lo hamhaih deuh. 

"Awii.. Ni e, kha kha Bawihteii khan a sawi tak a, mahse, ka hmu ve bawk si lo va, ka awih lo ta deuh ringawt a ni. Sawi nachang ka lo hre tawh lo a ni" a ti ve mai a. Boss pawn a rinhlelh hmel lem loh. 

Pu Lawma fate chu dawrah a tir a, Pu Lawma lam hawiin, "Rinpuii chhungte lam chuan kut i thlak nasat thu leh a taksaa hliam pawh an hmuh thu an sawi asin.. " a ti ta a. 

Pu Lawma chuan pangngai takin, "Ni e, ka bulah pawh an sawi alawm. Kha tak kha mak ka ti angreng khawp mak. Kut ka thlak chu ka ben kha a ni mai. Kha bak kha kan inneih atanga tun thlenga ka kutthlak awmchhun a ni. Ka chhungte hian an hre chiang ang" a ti dam thlup a. 

"Ka lo inrawlh ve lawk, ni e, ka nau hi ka hrechiang viau mai. An nu kha kutthlak chu sawi loh, hauh pawh a hau ngai lo tih theih a ni. Fiamthu hian i thaibawih kan ti hial thin.. " Pu Lawma û chuan a lo ti ve a. Kei pawn chu chu ka ring. Pu Lawma hi pa sual tak hmel a pu tlat lo a ni. 

"Khami zan a lo haw zan nia an sawi zan Inrinni zanah khan eng nge in tih hlawm min hrilh thei ang em? " tiin a melh kual hlawm a. Pu Lawma nu chuan a inkhawm thu leh inkhawm bana an memberpui dam lo kana a pen kawi thu a sawi a. 

Pu Lawma nau mipa chuan an nute in lamah an len phei thu a lo sawi ve bawk. An nuin a lo thlawp nghal. Pu Lawma u Pi Sangi chuan, "Zanriah ei kham hlimah khan ka pum a nuam lo riau a, kan pa hian min bawihsawm a, damdawiina kal a rawt nghe nghe. Mama pawh hi a zuk ko nghe nghe. Mahse, kan kawmchhak nurse kan ko va, nachhawknain min tir a, ka zia leh ta a. Kan pa hian Bawihteii te unau a ko chho a. Lehkha te an inzirtir a, kei erawh ka pum a zia tak hnuah khan ka mu ta daih a" a ti a. 

Pi Sangi pasal, Pu Tluanga chuan, "Bawihteii te unau ka zuk dah a.. Reivak lo ka thu leh a, ka haw a. Ka mu zui ve nghal mai" a lo ti ve a. Pu Lawmsanga erawh chuan, "Zanriah ei kham atangin inkhel ka en char char. Ka chhuak lo" a ti. Bawk. A makpain a fate a zuk dah lai pawhin inkhel a lo la en a ni. A tu amah chuan Rinpuii an hmu lo a nih ber chu.. A va hnawk tan si em.. A fanu lahin sunday zanah ka hmu a ti tlat bawk si. 

Boss nen chuan kan chhuahsan leh ta phawt. "Rinpuii hi a tlanbo tih a hriatreng.. Zawn zawn pawh a ngai mawni le" ka ti leh zawt zawt a. 

Dam thlapin, "Report a lut miau sia, kan hmuh ngei chu a ngaih hmel.. Thil dik lo a awm anih chuan, thil thleng eng emaw a awm leh em em ang" a lo ti sap a. 

Ka tau bûr mai. 

Zanah kan vengah chhiat tawk an awm vangin ka kal a. Boss nen kan inbe lem lo. Kan case chinfel vel hi an lo hre ve thin si a. Min ngai fing ve deuh nge zawhna eng emaw hi min zawt ve zen a. Ka bo thei si!  Ka ning. Ka lu lian puiah hian boss thluak chanve zat vel a awm chai si lo. A tuka office ka va kal chuan boss chu a lo la kal lo teh tlat a. File vel chu ka rem thatsak a, Cofffee va lam bawk. 

A rawn lut a. A nalh leh kher mai. Vawiin chu body fit zaih kekawr dum a ha a, a mawng bawr tut al mai pawh ka hmu chiang thei zual. Aaa.. Boss nen hian inngaihzawn ka chák.. 

"Hei le.. sam, sim card hi kha lai phone-ah khan han thun teh le" a ti a. Sim card chu a rawn lek va a. Kan office-a hmanna tur apianga hman tura kan dah phone-ah chuan sim card chu ka thun ta a. 

"Rinpuii kha ka call ve ngial pawn a sim card chawp khan a phone an tichhia a ni maithei. A nung tawh tlat lo. Chuvang chu a number ang chiah kha ka va dil chhuak a nih kha. Hmuh chhuah tur eng emaw tal zawng kan neih ka beisei" a ti nghal zung zung a. 

"Anih Rinpuii hi a la dam i ring em? " ka ti a. 

"Ngaihtuahna hi a phir khawp mai. A pasal saw a tirah khan ka ringhlel nghal. Pa tha duam anga lang siin a lo nunrawng ve viau thei tiin. Mahse, nimin i haw hnu khan a hnathawhna hmunah ka va kal a, kan zawt vel a. Tupawh mai khan an fak. A hnathawk te pawn pa tha leh zaidam tak niin an sawi. An thenawm khawveng te lah chuan sawiselna tur an hre miah lo. Vawiinah a thiante ho ka ko va, kan zawt leh dawn nia. Pu Lawma hian tel vena a nei lo anih chuan, Rinpuii unaute pawh saw kan enthlak a ngai maithei.. " a ti duah a. Ka zawhna a chhang miah lo. 

"A thih nge i rin a la dam" ka ti nghut. 

"A dam ka ring tawh lo" a ti zawi raih. A chhan erawh ka zawt buai duh lo. Ka hriat tur chin bak ka hre leh dawn chuang lo bawk a. 

"Mahse, Rinpuii chhungte lam chuan tel vena an nei thei dawn mi?  Hlawkna tel tur an nei si lo va"ka ti a. 

"Hlawkna tel tur nei lo mah se; tun lai khawvel chhiat tawhzia ngaihtuah chuan thisen zawmpui leh zawmpui loh pawh a danglam tawh loh hi. Eng emaw vangin an inhmu thiam lo pawh a ni thei. Emaw inthen ta se;Rinpuii leh a fate an awm ve tawh dawn vangin a nau sawn hnawk a ti dawn a, chutiang a thlen hma chuan a dahtha a ni ve thei tho" A zeldin thu a sawi a. 

Ka ring ve vak lo. Mahse, thil ni thei a ni ve tho mai. 

"Pu LAwma chhungte lam pawh saw enthlak an ngai tho lo maw? " ka lo ti a. 

"Ngai ve tho e, an nu ber lah khan a tunuin a monu a hmuh thu kha a sawi duh miah lo va. A theihnghilh tak tak nge thil dang vang tih hriat a ni lo tlat.. " a lo ti ve a. 

Rei vak loah Pu Lawma thian, an ina leng lut thang deuhte chu an lo thleng a. Panga lai an ni. Pu Lawma ang rual vel tur chu pakhat a ni a, a bak erawh Rinpuii nena inrual khat tlang vek hmel an pu. Boss chuan titi ang deuhin a han sawipui hlawm a. Mahse, Rinpuii fel an tihzia leh a uire an rin loh thu te, Pu Lawma fel leh zaidamzia bak sawi tur an hre meuh lo. 

"Rinhlelh tur awma a awm ka hre lo. Rinpuii kha. Zan lamah kan leng lut ber a, hmel hlim tak khan min lo be siam siam zel a, thingpui nise kan sawi ngai lo vin min chhawpsak reng bawk a. Corrom kan pen thin a, kan bulah te pawh a rawn thu ve fô!  Mipa han lem kual vel chi niin a lang lo" Pu Sanga chuan a ti boh boh a. 

An zinga naupan hmel ber pathlawi Siamtea chuan, "Chutianga kutthlakna duk vel chu kei ka hmu ngai hauh lo. Bakah Rinpuii khan kawr ban tluan a ha deuh reng a, nge Pu Lawma hian kan hriatpui si loh hian a lo vaw thin em ka hre lo naa.. Chutiang ti tur chuan ka ring bawk si lo. A mak hle tak mai. Nupa inngeih leh inzah tawn tak an ni asin" a lo ti ve bawk a. An zingah chuan Rinpuii nena han uire duhtur ka hre leh pek lo. An felin an phawk hmel hlawm viau.. 

An chhuah hnuah boss chu a vei a vei a. "Pu Lawma thiante chu dah tha rih phawt ang. Rinpuii nena lo inmitmei duh tur khawpa rilru tenawm pu an nih hmel tlat lo.. Mahse, a ruka mitmei chu a pawi hran lo vang a. I hna tur nise" a ti a. Ka lo bu nghat. 

Dawhkana phone kan dah chu a rawn ti ta tlang mai. Rang lutukin boss chuan a hmet nghal a. 

"Biak tlang i va har ve mawle.. Vawiinah ka rawn haw dawn a. Naktuk chhunah a rem ang em? " tih hi a lo ni.

"Zaninah inhmu lawk ang" tiin boss chuan a thawn nghal zat. A lo call a, Boss chuan a rawmawla a hmui tuamin a be ta a. 

An inbiak zawhah min rawn melh a, "Kan thangkam chu a fuh dawn e. Zaninah Della Hotelah kan inhmu dawn. He pa hnen atang hian eng emaw tak zawng kan hre dawn chiang e" a ti ta a. Ka lo thaw ve huai ringawt. Rinpuii chuan call neuh neuh a dawng reng a. Mahse, boss chuan a off ta hmiah. Thil dik lo eng emaw a thlen a hlau a ni mahna. Kha pa rawn betu hmasaber kha a ring tawk pawh a ni mahna le.. 

Chawhnuah Pu Lawma thiante ho chenna in lamah keimahin ka va kal mai mai a. Inthenawm khawveng deuh vek an ni bawk a, a zia angreng. An thenawm hnaiah lutin an thian hlui anga insawiin ka han thawi kual vel ngial a. Boss sawi ang deuh khan nupui fanau nei deuh vek tawh, chhun lama hnathawk thin an ni a. Hmeichhiat mipatna lama sawisep kai an awm lem lo. Sawi nuam pawh a ni bik lo bawk anga. Pathlawi Sanga erawh chuan bialnu deuh reuh a neih thu an sawi a. A bialnu erawh tuman an hre lem lo, a inah a hruai luh zeuh zeuh thu an sawi. Tlemin Pu Sanga chu enthlak ve deuh a ngaiin ka hria. Mahse, Rinpuii a ni kher ang em tih hriat a ni lo va, pawng rinhlelh ngawt erawh a fuh lo thei. 

Zanriah chu boss thu angin, Della hotelah chuan kan order nghal a. Rinpuii phone ti tawh mai ang, chu chu a keng ve zel bawk a. Kan ei khamah inhmuhna hmun tura an sawi room no 034-ah chuan kan tawm ta ran mai. Dar 9 a ri tep tihin a rawn thleng a. Kawngka ka va hawng a, let leh mai a tum lai chuan, "Lo lut rawh" Boss chuan a lo ti vawt raih a. Boss hmel a hmuh chuan a rilru a thlak nge a rawn lut ta a. Mak a ti hle tih erawh a hriat. Khumah chuan a thu a. 

"Hei eng nge a awmzia.. Amanda kha i ni tiraw? " tiin Boss chu a en a. 

Boss chuan, "Aw ni e, he tah hian kan inpuihtawn beiseiin kan inhmu a nih hi.. Rinpuii bo chungchangah" a ti a. Rinpuii bo dan chu a sawi nghal zung zung a. Chupa chu a hawi hruk hruk ringawt. Mak a ti takzet tih a lang. 

"Engtik nge in inbiak hnuhnun ber? " boss chuan a ti a. 

"Vawiin kha a ni mai ang chu.. Eee.. Nagwi rawh kha chu nangmah i ni tak. Kar hmasa Ningani zanah kan inbia. Messagein ka zin thu leh ka zin hawn veleh inhmuh ka duh thu ka hrilh" a ti a. Hna zahawm tak thawk a ni a, a hna thil vanga zin a ni bawk. A hming chu Zuala a ni. A hna hming erawh sawi ta lo mai ila. 

"Rinpuii nen in inkar thil thleng zawng zawng chipchiar taka hriat ka duh.. Khawngaihin" Boss chuan a ti a. Khawngaih dil mah se, thupek a ni tih erawh a awrawl atangin a hriat theih. 

A chil a lem khawlh a, "Ka hna in hria a, khawngaihtakin min timualpho lo hram ula ka duh a ni. Chu chu min tiam hmasa phawt ru" a ti te te a. Boss chuan, "Tel vena i neih loh phawt chuan i hming leh i hnathawh hi tuman an hre lo vang" a ti a. 

Pu Zuala chuan, " Aw ni e, Rinpuii nen hian kumin July thla vel atanga inhria kan ni a. Zep thu a cheng lo, kei hi kan nu nen kan inkar boruak a tha vak lo va, kan nu saw a hrisel vak lo nen, sex ah ka sang si a. Han thena nupui dang han lakluh em chu ka hreh ve bawk si a. Rinpuii ka tawn hma pawh hian call girl ka dawr zeuh zeuh. Vawi khat chu website link pakhat hi ka number hriat ngai loh atangin ka dawng nawlh mai a. Link-ah chuan lutin Rinpuii thlalak leh dawr theih a nih thu te, dawr man te a lo awm a. Mizo zingah hetiang lama sumdawng hi ka la hre ngai lo va, mak ka ti viau nghe nghe.min lo thawnna number chu ka call a, a tirah chuan hetiang site tlawh tura min lo ti chu thinrim taka hauh ka tum a ni. Ka zahawmna tichhe thei a nih vangin. 

Call a chhang duh lo va, msg in, "Call ka la ngai lo. I hriatchian duh chuan hetan hian rawn type mai rawh" a rawn ti a. Ka zahawmna humhim nan min lo tibuai tawh lo turin ka hrilh a. A reh ta phawt. Chumi hnu atanga ni reivak loah ka thianpa, ka thawhpui pakhat hian chu website chu a lo tlawh thu leh Rinpuii a va dawr thu te chu a ruih laiin a sawi chhuak ta a. A lo dawng ve tho chu mak ka ti khawp mai. Rinpuii chu chhunah chauh dawr theih a nih thu leh pasal nei lai a nih thu te a sawi a. A hmel that thu leh dawr a manhla thu te nen lam.. 

Ka rilruah dawr ve chakna a awm ta a. Tichuan, link min lo thawntu kha ka va be ve ta a. Ka han zawt chiang a, Rinpuii number chu min pein, chhunah chauh hmuh theih a nih thu a sawi bawk. Ka zah deuh vangin ka be lawk lo nghe nghe. Ka nula dawr thin a remchang ta si lo va, Rinpuii chu ka va be ta nge nge a. Call in a ni nghe nghe. Tichuan, ka biak tukah chawhnu lamah a address a sawiah chuan ka va kal ta a. Amahin a lo awm a. Kan mudun ta a ni. A taksa a nalh bakah a hmel tha a, zei tak eraeh a ni lo. A itawm riau a, mahse, a hlim miah lo tih ka hre ve thei tlat. A chhan erawh ka zawt hran lo. Tichuan, kan indawr ta fo a, kan innel ta viau bawk. Ka thianpa pawn a dawr thin, keini thiandun chauh lo pawn an dawr ka ring. A chhan chu kar khatah vawi khat bak kan inhmu thei lo. Min hmuh loh kar khan mi dang a hmu a nih ka ring. Vawikhat chu engvanga hetiang thil hi ti nge anih ka zawt ta tawp a. "Ka pasal hian enhmah min pe ve ngai lo va, ka rethei sia.. Inkhawl ka duh a ni. Tichuan, ka inkhawl ngah hunah ka then ang" tiin min chhang. 

A pasal hi tlai khawhnuah ka hre ve chauh. Kan inhre tha viau lehnghal. A nupui ka mutpui thin tih hria se min that duh maiin ka ring. Pa tha pui nisi a nupui a ngaihsak lo chu mak ka ti khawp mai" A ti ta dap dap a. Chil pawh lem tha ngam lo vin ka lo ngaithla. 

Boss pawh a mitmeng a buai nak mai. Kan beisei loh lutuk thil a ni tlat a. Ka rindan chuan a uirena thin satliah a nih ka ring a, mahse, Rinpuii chu a inzuar tlat si!  A mak mang e aw. 

"Link lo thawntu che number chu min han pe ta che" boss chuan a ti ta a. A phone a phawrh a, a pe ta nghal a. 

"Anih Pu Zual, Rinpuii pasal emaw a pasal chhungte lamin engmah an hre ve miah lo nge. I lutchhuak lai pawh an hmu ngai lo em ni? " tiin a zawt a. 

"Aw hmu lo aniang. An inpui saw a inkhar reng mai a. Mahse, vawi khat erawh min man tep. An pa a lo haw thut sia, kan laklawh si, mahse, Rinpuii khan remruatna tha tak a lo nei sa diam anih hmel, an Almira kha a nem sawn a, mihring leng vel hian a lo inker puk a, tah chuan ka tawm ta ringawt a. An pa inbual hlanin ka chhuak ta a ni. Midang chuan min hmu ngai lo anih ka ring, an inchunga Rinpuii pasal u te nupa lah saw an awm ngai lo nge an ka kal hian an lo inkalh thiap zel bawk.. Chhun reh lai tak kha a ni ve thin bawk a. An thenawm lah saw an hla ve deuh bawk a, an in chhak building atang saw chuan min hmu thei maithei" a ti ta duah a. 

"Anih lawkin Rinpuii taksaah khan duk emaw han inhliamna hnuhma a lang thin em? " 

"Aw lang e. Tun hnaia an ina a va tlawn hma lawka kan inhmuh tum pawn a taksa duk chu ka hmu a, kan pa min khawihna a nih hi a ti mai" a lo ti a. 

Boss chuan, "Inrinni zan emaw sunday chawhnuah emaw khan a lo bia che em? "

"Be lo ka tih kha.. Kan inbiak hnuhnunber chu ninganiah khan a ni e" 

Pu Zuala chhuah hnu lawkah keini pawh kan chhuak ve ta nghal a. Pu Zuala number min pek kha a call a, a in switch off. A tuka chhui atan kan dah ta rih a. Kan inmang tha ta phawt. Ka mut hmunah ka ngaihtuah ve nasa. Rinpuii awmdan chu mak ka ti telh telh. Apasal chhuah hlanin a inzuar thin tihna a nia!  A hmel kha chutiang ti chi a ni si lo. 

A tukah Aitel office-ah kan inzui lut leh ta a. Thawkte pawh hian min lo hre ve tawh khawp mai. An zarah thil kan hre thei viau a, a lawmawm. Kan number kawl kha tu hminga book nge tih kan han chhui ta zar zar a. Lalngilneii hminga book niin Tuithiangah an awm tih kan hre thei ta bawk. 

Lalngilneii te in lam chu kan pan leh ta vang vang a. Boss a ngawi ngul si, ka tawng peih bik lo. Kan thleng a, khawsak nuam tak an nih hmel loh. An in pawh a hlui ve bám tawh mai. Nu pakhatin min lo dawngsawng a. Amah chu Lalngilneii ber chu a lo ni nghe nghe. A fate niawm tak nula leh rawlthar an lo awm ve bawk. 

"Ka phone min ruksak atang khan ka simcard pawh hi a bo tel ve ta daih a. Tunah chuan sim card dang ka hmang tawh" a ti!  A phone chu june thla laihawl vela a tihbo thu leh a bank dawr zo, bank bula second hand a thin lai vela bo nia a rin thu a sawi. Bank a dawr lai kha chuan a la khawih a, a thawmhnaw lei man pe tura a bag a zen khan a phone chu a awm tawh loh thu a sawi. Thil a buai leh zo tawh. Bakah amah Pi Ngilneii hi khatiang ti duh tur chi niin a lang tlat lo. Beidawng takin kan chhuahsan leh ta phawt. 

Pu Lawma te in ah kan peng kawi a, a fate chu school an kal a, ani erawh an nu bo boruak nen a hnaah pawh a lo kal thei lo. Boss chuan, "Hmanni in room kan dap khan ka pen ka theihnghilh niin ka hria, niminah khan rawn en ka tum uk uk a, i thiannte ho kha ka ko leh ta sia, kha pen kha chu ka pa min leisak liau liau ania, i lo hmu mial lo maw? " a ti a. Pen mai mai a ho ee.. 

"Hmuh awm pawh ka va hre lo ve.. Hmun dangah i thlauh te hi a ni thei ang em? " a lo ti a. 

"Ka thlauhna hmun nia ka rinah ka zawng vek tawh. Ka hmu si lo va, rem i tih chuan ka va zawng lawk dawn mawni ka tia. Kha pen kha ka ngaihlu a, a bo ka phal thei lo" Boss chuan a ti a. 

Pu Lawma pawh chuan, "Va en ve teh. Bawihteii te roomah pawh khan a ni thei tho bawk" a lo ti var a. Boss chu an roomah chuan a lut a, a luh pahin, "Sam, Naupangte roomah khan va en ve teh" a ti nghal a. Ka lut phei ve nghal. A pen ka hre si lo, pen hran hran a ak ziah a, chutianga a ngaihhlut bik ka hre ngai lo reng reng. Ka phone a ri tlang, ka en a, boss msg a lo ni. "Room bang leh chhuat te kha ngun takin en teh.. Hnuhma thar deuh a awm em? " tih hi. Ka bo leh map. Mahse, boss nei ka ni miau a. Ka theih ang tawk chuan ka han en ngun ve a. Naupang room tih takah milem a intar nasa a, toys a tam hle bawk. Engmah ka hmu lo. 

Ka chhuah atanga rei vak loah Boss chu a rawn chhuak a, pen rawng uk kharh hi a rawn lek chhuak a, "Hei ka hmu e.. Ka va lawm em.. " a ti a. A nui var var mai. Kha pen te chu Pi Ngilneii kan va hmuh pawn a lek larh larh sia. Game eng emaw tak a khel tih a hriat mai. 

"Pu Lawm, i fate hian an sawi ngai em?  In nu chungchang hi" Boss chuan a ti a. 

"Umm.. Nizanah pawh an sawi. A lo haw har tawh e an tia. Mampuia phei chu a tap fô. Nu ngai rual lek a la ni ve bawk nen. Ka u te nupa khi an fel hlauh a, zan hnih lai chu hei an riahpui tawh. Kei lah rilru hah nen ka ngaihsak thiam vak si lo va. A manganthlak duh khawp mai" a ti a. A hmel pawh a pawr ve fap mai. A mu mang lo a nih ka ring. 

"In nu khan pawisa a dil ngai che em? " Boss chuan a ti a. 

"Dil ngai lo ti ila, a ac-ah hian ka dahsak ve zeuh zeuh thin a, chutia sawi takah chuan june thla niin ka hria, khatah khan a pass. Book ka update sak tumin balance 500 chiah a lo nei a. Ka zawt nghe nghe. Ka nute an buai sia, ka pui ta mai anih kha.. tihbuai che ka hreh sia a tia.. Ka ngawi zui ve leh ta mai a" a ti a. 

"Tunah engzat nge a ac-ah chuan awm ta ang. I dahsak leh reng reng em? " 

"Dahsak leh e.. Ka hre bik lo, a la tam lo vang. 10000 bawr vel chu a ni maithei" Pu Lawma chuan a lo ti a. 

"Engpawhnise, kan la hmu em em ang tih hi ka beisei" Boss chuan a ti a. "Rinpuii chhungte lam in eng nge an rawn sawi? " a tih zawm zat a. 

"Eng em em chu an sawi lo. A nau sawn min rawn vau deuh titih thin a, mahse, ka namnul thei mai.. " a lo ti a. Keini pawh awm khawmuang tawh lo vin kan chhuak ve nghal a. Veranda thleng min lo thlah ve a, "Hei insak te i tum deuh em ni?"Boss chuan Veranda kila cement bag leh rora bag chanve lo inhung lam chu a hawi a. "Tum hran lo e. Tangkaina a awm thin ka tia, ka lei ve mai mai anih kha" a lo ti ve mai a. Boss mitmeng de sar sar chu ka va hmu thei. Phurna eng emaw tak zawng a nei chiang mai. 

Office lam kan pan laiin, "Kan kal hmasak khan Cement leh rora kha a awm lo va. A nupui bo lai laia in lama hna dang a khawih bawrh bawrh thei kha a mak lo em ni? " a ti sap. 

"Mak vak a mi?  Tihtur em em a nei si lo va… " ka lo ti. 

"Naupangho roomah khan engmah hmuh i nei lo maw? " a ti a. 

"Nei nang.. " ka ti liam puat. 

Pu Lawma fate school bulah a ding chat. "Naupangte kha ka be duh tlat" tiin a chhuak vut. Ka zui ve nghal. An principal chu kan va hmu a, a lo remti vak lo naa, a hmanhmawhthlak bakah case pawimawhzia sawiin kan hmin hram. Principal roomah A u zawk Bawihteii an tih chu a lo kal a. 

"Bawihte, min la hria em?, hei chocolate ka rawn lei che a. Hei i nau ta ve tur.. Chuan.. Tu nge schoolah hruai thin che u" nelawm zet hian bOss chuan a lo dwngsawng a. 

"Apa Muana'n min hruai thin" a ti a. A zah hmel hle. Apa muana chu a pa u pasal kha a ni. 

"Anih zanah ani te inah khan in riak thin a mi? "

"Umm.. Ani te bulah kan mu thin a. Min duat lutuk" a ti a. 

"Chuanin apa in eng nge a tih thin.. Tlaia in school banah te " a ti leh a. 

"Ih.. Bathroom a siam tha a. Ani te bathroomah kan inbual thin" a ti a, chocolate chu a ei a. 

"Umm.. I fel reuh sia aw.. Anu kha i hmu leh tawh em? " 

"Aih, hmu tawh miah lo. Anute, anu chu a lo haw leh ang tiraw? ' tiin boss chu a melh kiau a. Boss chuan a lainat hmel kher mai. 

"Ka hre lo bawihte, lo haw leh thei se ka ti khawp mai" a ti a. 

Ofiice kan thleng a,coke a in a. Tukverhah a dak leh vang vang mai. A mood a fuh vak lo niin ka hria. Kei erawh games te ka khel ta vel mai mai. 

Rinpuii nau leh anu an rawn lut ta hlawl a!  Kei pawn ka games khelh lai ka dah nghal. 

"Hei hi kan dawng a" tiin Rinpuii nau chuan a phone chu boss a pe a. Ka va bih ve nghal a. Rinpuii leh Pa pakhat ka la hmuh ngai loh mutdunna a ni. An hmel a lang chiang viau bawk. Boss chuan en zo lo vin a pe let nghal a. 

"Engtika i dawn nge.. Tu number atangin nge? " a ti zui zat. 

"Tukin tunkhuan ei kham dar 10 bawr velah khan a ni maithei. Hei a lo thawntu chu" tiin number a rawn tilang a. Eheu!  Pi Ngilneii hminga book kan va chhui number ngei kha a ni. Boss chuan mak a tih hmel vak loh. 

"Anih Pu Lawma i va vau deuh em. Ni? " a ti ta daih a. 

"Vau pawh a ni chiah lo, zingah khan ka va bia a, chanchin eng emaw a hriat leh hriat loh te.. A la hriat bik loh thu leh a report thehluh pawh laklet leh mai a duh thu a sawi a. Ka thinrim thut a, 'Ka u khan a hmangaih em em che a, khatianga case laklet duhna rilru i pu anih chuan keimahni ngeiin report thehlutin kan lo zawng ve tawh ange" ka tia. Amah pawh ka thiam lo hran lo, ka u a lo ngaih tawn dan atang khan mipa dang nen tlan dun angah a ngai nghet hmiah zawk anih ka ring. He video te hi a lo dawng ve tawh zawk hial nge mawni ka ti hnuhmawh" Rinpuii nau chuan a ti a. 

"Tihian i farnu chuan mipa dang a mutpui ngei tih a chiang ta a.. Eng nge ti tura min duh..? " Boss chuan a ti a. 

"Ka hrethiam lo a ni. Video rawn thawntu lah biak kan tumin a off leh daih bawk si. Mahse, a hnu lawkah hei chhiar la, min blakmail a ni.. Cheng nuai khat kan pek a phût a. Ka u awm lo nen, ka rawn kal ta mai a ni" tiin a phone a hmet leh a, kha number atanga pawisa phûtna chu kan chhiar a. Rinpuii nu erawh a fanu video vang nge a ngui rawih mai. A tar sawt ni hian ka hria a. Ka lainat angreng. 

"Ka pi, i fanu khan pawisa a dil thin che em? " Boss chuan Rinpuii nu chu a melh a. 

"Dil ngai miah lo" a ti tawl mai. 

"Umm.. Engpawhnise, pawisa kha a rawn dil leh che u chuan lo pe lo phawt ula, he number neitu hi kan chhui chhuak thuai turah ngai ila.. Ngaihtha deuhin va haw phawt rawh u" Boss chuan a ti ta a. 

"Kei chu ka buai vek tawh. Rinpuii hian game a khel a ni mai lo maw? " An chhuah hnu chuan ka ti hluai a. 

"Ka hre lo. Nia, a mak viau mai. Tunah chuan kha number hmangtu kha kan zawnchhuah a ngai a ni mai. Chuan engkim a fel thuak ang" a ti a. 

Theihtawpin kan han chhui a, a in off miau chuan tihngaihna a awm der si lo. Rinpuii numberah erawh eng thu em em mah a rawn thleng tawh lo. A lo hmang lo rei tawh deuh a, an rawn dikdak ta vak lo a ni maithei. Tin, pu Zuala site sawiah pawh khan luh ve kan tum a. A fai duak, engmah hmuh tur a awm lo. 

"Hmm.. He thil titu a bultantu hi a fing ve hle a nih hi. Rinpuii pawh a ni thei.. Pu Lawma pawh a ni thei" Boss chuan a ti fiah kak a. Tlemin a phur hmel leh deuh. 

Zanah min lo call avangin ka chhuak a, Pu Lawma te in lam kan pan leh. Eng nge kan tih dawn erawh ka hre hauh lo. Kan zuk thlen chuan, A u te nupa nen an lo awm a. Min lo dawngsawng tha viau. 

"Pu Lawm, he thil hi i hmu tawh em? " tiin Video kha a hmuhtir ta a. Pu Lawma chu a meng phawk deuh, "Hei hi khawi atanga i neih nge.. " a ti hluai a. 

"Ka nei ve tawp.. I hmu tawh tiraw? " a ti chang fak a. 

"Hmu miah lo. Ka hmuh vawikhatna" a ti tham tuak. 

Pu Lawma u chuan, "A va mak em.. Rinpuiin khatiang thil kha a ti a maw? Ka nau sawi kha a lo dik tak tak anih dawn hi" a lo ti ve bawrh bawrh a. An makpa eraeh a ngawi reng. 

Thingpui kan in a, boss a chesual palh!  A no ken lai chu thlauhin a kekawr a buak a, a sa deuh nge a ding hluai a, rang takin bathroomah a tlan lut  a, a kekawr chu a va leih huh a. Ka ngaihtuah ve deuh bawk sia, ka va ngaihven a. "I tha em? " ka ti a. 

"Umm.. A sa reuh lutuk a, ka va che thing tak.. Ka rei lo vang.. " tiin min lo chhang a. Rei vak lohah a lo chhuak ta a. A kekawr chu a huh hluam mai. 

"A zia lo hle mai.. Tun lai chu ka chesual zing tawp" nui chungin a ti a. 

"Rinpuii kekawr emaw ka kekawr pawh a awm ang, i ha duh mai em? " Pu Lawma u, Pi Dini chuan a lo ti var a. 

"Aih a ngai lo. A ro ve leh mai ang" a lo ti a. 

Pu Lawma lam a hawi a, "I thiante hi an rawn leng ngai tawh na nge? " a ti zui a. 

"Umm ti ila, nizan hmasaah kha chuan an rawn kal, min tawrhpui ve khawp mai.. " a lo ti a. 

Thudang sawiin kan han titi leh phawt a. Kan hawnsan ta a. Kan kalna chhan ka hre hauh lo. 

Pu Lawma thianpa Pu Sanga, pathlawi ka tih inah kan peng kawi a. A bialnu niawm tak a lo awm ve. Rinpuii ani lo. 

"Rinpuii bo hnuah in va lang vak lo em. Ni? " Boss chuan a ti a. 

Pathlawia chuan, "Lang zeuh zeuh tho e. Mahse, kan leng rei ngai lo. Amah pu. lawma a ngui si a, kan boruak a nuam thei meuh lo a ni" a ti ve mai a. 

"A hna saw a la kal lo tihna ni maw? "

"Aw la kal lo.. Nilai chawhnuah khan ka tlawh kawi a, 'Sanga, Rinpuii hi kan hmuh ka ring tawh lo. An tlanbo aniang' a lo ti a. A ngui khawp mai. Ka lainat teh asin" a ti suam suam a. Thudang zawh belh tawh loin kan chhuahsan ta a. 

A tuk nilengin boss a chhuak. Number kha a chhui anih ka ring. Ka zui ve loh chhan pawh case hlui, Nupui nei lai pakhatin nula pakhat a pawngsual chungchang ka buaipui vang a ni. Buaipui tihah pawngsuala puh nupuiin a rawn tharthawh leh thu ka lo ziak fel a ni. Boss duhdan a nia. Rinpuii te chungchang erawh ka ngaihtuah ve reng mai. 

Office ban hma deuhin a rawn hawng a, "Kha number kha kan chhui zui tih a hria anga. A tichhe tawh aniang. Chhui zui ngaihna a awm tawh lo" a ti a. A chauh hmel viau mai. Tui a in khawlh khawlh a, "Sam, zanin chu hna kan nei aw.  Dar 9ah Pu Lawma te in piah tuikhur hlui awmnaah khan i lo kal dawn nia" a ti a. 

Zanriah pawh ka ei tui hrep lo. Eng hna tak hmachhawn leh ang imaw.. Ka helhhawlh deuh nge ka za sek lehnghal. 

Dar 8:30 ah in atangin ka chhuak a, Boss sawina hmun ka va thlen chuan a lo awm ran tawh. Motor chu kan park tha a, Pu Lawma in lam chu kan pan ta a. An in pui chu a lo inkhar thap. Kan kal apiang hian a inkhar phui reng ni maiin ka hria. Pu Lawma te in chung, Pi Dini te in pawh a in khar naa, an la meng tih erawh an tukverh atanga tv va hmuh chuan a hriat theih. Thawm dim takin kan chhuk a. Kawngka chu a lo inkalh bâr a, boss chuan bakkilh niawm tak hi rawn phawrhin tala ah chuan a va rawlh lut a, engtin tin emaw a herh kual hnuah a inhawng ta hram a. "Khaw nge pu Lawma " ka ti sar sar a. 

"Pathlawi Sanga inah khan.. " a ti zawi sap. Inah chuan lutin, light chu a lo in on sa a. Bathroomah min luhpui nghal. A chhuak leh vut a, an veranda thlanglama thirtiang leh suahdur lo intiang ral chu a va la a. Kawngka chu a khar nghal. Bathroom chhuat chungah chuan a ding vang vang a. 

"Lai ang le" a ti ta sap a. Floor tile a inphah vek si avangin a tile chu kan kar thlawn phawt a. Thawm dim a ngai tho si. Tawng pawh ka tawng ngam lo. Tile kan thlawn zawh hnuah cement chu kan lai tan ta a. Rin aiin a chang lo. A zutna a la rei vak lo bawk a. In chung ten an hriat a hlauhawm si, kan han chawl leh vang vang zel a. Chutah thil rimchhe lutuk a rawn nam tan ta. Ka uak tuarh a. Ka ka ka hup rang rap. Mitthi tawih rim ngei a ni. Kan lai zel a, thuk vak lohah saranga intuam tlat, ruang kan laichhuak ta a ni. Ka hah bawk si, rimchhe bawk si chu khawvawh lai mahnise, ka thlan a tla bat bat mai. Boss erawh a insum thei viau. Inchung lamah pawh a nam a ni ngei ang,pi Dini chu a uak tuar tuar mai. 

Bathroom kan chhuahsan a, Boss chuan Pu Sanga kha a call a. "Rawn hruai rawh u" a ti ta sap a. Kan lo nghak ta veng veng mai. 

Kawngka a ri rak a. Pu Lawma leh a thiante pahnih chu an rawn lut ta a. Min hmuh chuan a meng phawk ngang mai. A let zuk a, mahse, "Ding rawh" Boss chuan a ti hriam hraih a. A ding chawt mai. 

Pi Dini te nupa pawh an rawn lang ve nghal zat, dar 11 a ri thuak tawh. An hnar an hup far a, pu Lawma nu leh a fate nupa pawh an rawn chhuk. 

"Le.. Pu Lawm, i nupui i thah vangin ka man dawn che a ni" Boss chuan a ti ta a. Pu Lawma chu a thu hnawk. A lu a dawm a, a kun ngawih ngawih mai. Boss chuan police phonein an rawn thleng chawpchilh nghal a, Ruang chu an la chhuak ta a. Kei pawn engkim chu mak ka lo ti ve ngawih ngawih. A hamhaih zingah ka tel chiang. Boss thluak zawng ka la pha chiah lo a ni. Pu Lawma chu stationah kan hruai ta a. A ngawi reng. Mak deuh maiin ka lainat tlat. Tualthattu tam zawk hi chu ka lo ngei ve em em thin a, pu Lawma erawh a hmel khawngaihthlak lutuk vang nge ka lainat ngawih ngawih. 

Pu Lawma inpuanna chu hei hi a ni. 

"Khatia inrinni zana lo haw tur anga insawi si a lo haw ta lo kha mak ka ti deuh a, ka call lahin a la thei si lo. Sunday khan ka inkhawm lo va, a bo thu te kha ka hre zui ve nen. Chawhnuah khan number ka la hriat ngai loh atangin video kha ka dawng ta a. Ka rilru natzia leh thinrimzia chu sawiin a siak lo vang. Ka na a ni tawp. Ka hmangaih tehlul nen. Ka call leh char char a, tum nghet tak ka nei a ni. A lo la mial a, "Lo haw rawh.. Ka ngai lutuk che" ka ti a. Zanah lo haw a tum thu a sawi ta a. 

Zana ka fanu inkhawm turin a hmuh pawh kha a dik, Rinpuii ngei a ni. Ka u te nupa pawh an inkhawm. Inkhawm reh lai khan a rawn haw ta a. A rawn luh rualin kawngkhar ka kalh nghal. Eng sawi set set lovin ka beng thal thuai a, mittui tla chungin a nghawngah la rek bet ta a ni. 

"U lawm, ka sawifiah thei" a ti tâwk tâwk a. Mahse, kha a video khan ka nun a tichhe vek tawh. Amah huatna hlirin ka khat tawh si a. Ka kut ka lak chuan a lo thi fel der tawh. Ka ngaihtuahna a buai zo ta a. Amah kha ka la hmangaih ngawih ngawih tho asin. Khami zan khan ka fate chu a ni te bula riak turin ka ti a. Ka nupui ruang kha ka mutpui hial a ni. Min uiresan duhtawk lo va video hial a siam khan chhun angin ka thinlung a tina a ni. 

Tichuan, a tukah khan a ruang an hmuh chuan ka buai vek dawn tih ka hria a, sarangin ka tuam phui tlat a, kan khum saw a mawng saw a zuk thuk hlek a, kan mattress saw a chhah vangin a zuk thuk tih a hriat loh. Chutah chuan ka thukru ta a ni. Mahse, rim a la nei dawn tih ka hriat vangin dah that dan tur ka ngaibtuah reng tho va. Nangni lah in rawn lang sek si. Thawhlehni chawhnu atang khan bathroom chhuat saw ka lai ta a. Mi dang bulah zut that a ngai tiin. Tichuan, kan nu chu ka phum ta a ni. Tikhan ka fate school kal hlanin ka zut mam leh ta vek a.. Ka nupui kha ka that tih ka zep lo. Tu pasal mah hian dama an chhuah theih ka ring bik lo" tiin.. 

Pu Lawma chu Central jail-ah dah luh a ni ta a. A fate an va khawngaihthlak em… Mahse, a ni te saw an fel hlauh a. A zia zia a la awm. 

"Engtin nge bathroomah khan a phum tih i hriat theih? " tiin Boss ka zawt a. 

"Thil ka ngaihtuah kual vak vak a, ni e, Pu Zuala atang khan ka chhui dawn thiam tan. Mipa dang nen tlan nise tu emaw tal chuan an hmu anga, an chanchin sawi a awm ngei tur a ni. A chhan chu a thlalak nen lam kan phochhuak a, mi bo anih thu kan tarlang chuai chuai a nih kha.. Mahse, thei reh takin a reh vawng vawng si a. 

Pu Lawma bak kha rinhlelh tur ka hre ta tlat lo a ni. An chhungte dang inrawlh tur awmin ka hre lo. Ka pen tibo anga ka insawi nia a room ka va luh khan hnuhma engmah ka va hmu bik lo. Mahse, khum bula dawhkan ke bulah khan black tabe them leh sarang them ka hmu a.. Chu ringawt erawh hnemhnanpui chi a ni lem lo. Mahse, ka beisei loh deuhin verandaa cement leh rora khan ngaihtuahna min neihtir ta a. Ka zawh nghe nghe. Chhanna mumal min pek theih loh atang khan beiseina ka nei ta a ni. 

Tichuan, kan leng leh a.. Chesual  palhin an bathroomah ka tlan lut ta anih kha.. Chhuat kha ka kein ka han khawng chhin a. Thawm neih ka hlau si.. Uluk taka ka en hnuah zut tharna hnuhma ka hmu ta chiah a. Ka zuang lo chauh. A fanu khan ka beisei ang ngeiin bathroom chhuat a zut thu a sawi kha.. Bathroom chhuat hnuaiah khan Rinpuii ruang zalh a nih ka ring nghal.. Pu Sanga kha ka thawhpui ta a, a thianpa chu zana hruai chhuaka lo awmpui rih turin.. Tikhan chet kan lak theih phah ta a ni" a ti ta dap dap a. A va hmel tha tak. 

"Tikhan case chu kan close thei mai lawm ni? " ka ti a. 

A ngawi vang vang a," A la kim lo deuh chu a ni" a ti sap a. Ka lo ner nawk. 

Rinpuii chhungten a ruang chu an vui liam ta a. An khawngaihthlak khawp mai. Pu Lawma chhungte lam pawn an ui thu leh mak an tih thu an sawi ve reng mai. Rinpuii vuiliam anih atangin ni 6 a liam tawh a. Keini pawn case chinfel loh tuaihnum ngai deuhte kan enfel a, boss hian eng emaw tak chu a la buaipui ru reng tih ka hria. A la hlim kim tlat lo a ni. Ni e, Rinpuii video thehdarhtu kha tu nge tih hriat a la duh tih ka hria. Mahse, kha number kha chhui ngaihna a awm tawh si lo. Kei chu ka beidawng tawh. Pu Lawma thiltih vek tho a nih ka ring. Mahse, Rinpuii inzawrh chhan tak kha chu ka hre ve chak khawp mai. 

Phone a ri ral ral a, Boss chuan a la vat. "Aw" a ti satliah a. Lehlam tawng chu ka hre thei lo naa Boss hlim hmel chuan min tihlim ve tawp. Phone a dah a. "Sam, Tun ah mai khan Rinpuii Ac atangin pawisa lakchhuah a ni. A ATM card hmangin" a ti ta a. 

Bankah kan va kal a. Mak deuhin Rinpuii khan account pahnih a lo nei reng mai. Pakhat chu SBI ah a nia, tuna kan va kalna erawh MRB ah a ni thung. A pawisa lakchhuahna Atm booth lamah kan va kal leh a. Cvtv a awm a, thil chu a fiah chho tan dawn e.. 

Mahse, kan rinhleh ber chuan a hmel a tilang duh hauh lo. Mask a vuah a, jumper lian hek hawk hain a jumper lukhum chu a khum bawk a. Mipa lian lam a ni tih chu a hriat. Boss pawh a ner nâng mai. Pawisa chu 10000  a la chhuak a ni. 

"Ka man dawn khawp mai che" Boss chuan a ti ram hmak mai. He misual hi tu tak ni ang maw? 

Boss chuan Rinpuii video kha ngunthluk takin a en tha leh a, camera angle vel daih ania a en.. An in  kungfu lai chu keiin ka lo en thung. "Sam, i mit kha a tla ang e.. " a rawn ti sap. Ka nui tawp. 

"En teh, Pu Lawma te nupa room ngei kha. ani tih chu a lang reng mai. An parda leh Almira vel atang hian.. Camera hi an room luh chiah kawngka chung velah dah a nih hmel bawk.. An rooma lut thang tak an nih loh pawn amah Rinpuii hian a dah a ni thei. Mahse, a dah a nih a rinawm loh. Mualpho a hlauh dawn tehlul nen" a ti leh zung zung a. Ka han en chian chuan a sawi ang chu a nih hmel. 

Pu Lawma in lam kan pan leh ta a. Pi Dini te khan chabi an kawl a, Pu Lawma fate erawh an awmpui ta mai. Rinpuii te chhung lamin rawn ngaihven deuh mah se, naupang ten an duh tlat lo. A nite bula awm chu an thlang zawk a nih hmel. Pi Dini ho in Pu Lawma in chu kan zuk endik leh a. Roomah lutin camera dahna lai awm chu kan han chhut a. Kawngka chung chu a han sang angreng. Thutthleng emaw dawh anih loh chuan lei atanga camera dah phak a ni lo. 

"Pi Din, ti daih ila, in nupa hian eng nge in thawh ve.. Pu Lawma dawr saw in enkawl zui niin ka lo hria a" a ti daih a. Pi Dini pawh a hawihai hman deuh. "Kan pa hi cement mistiri a nia, kei erawh eng em em ka thawk lo. Dawr chu ka nuin enkawlsak turin min tia" a lo ti ve mai a. 

A tuka office ka va thlen chuan boss dawhkanah chuan thlalak chi hrang hrang a lo let phung mai a. Ka'n en nak chuan, Pu Lawma thiante ho te, Rinpuii chhung leh khat te an ni. Zawhna neih ngam chi niin ka hre lo va, min tirh angin Phunchawngah mi kan zuk man daih. Chawhnu lamah office ka thleng leh a, Valtea, Aizawl khawpuia computer thiam ber pawl leh Boss chuan computer an lo bih dun a. Kha website kha an zawng niin ka hria. Mahse, Rinpuii siam vek niin a lang tlat si. Tin, tunah phei chuan engmah sulhnu hmuh tur a awm tawh lo bawk. 

"Nangmah anga comouter chinchang hre ve tak kan zawn a ngai dawn anih hi" Boss chuan a ti sap a. Valtea pawh a khi sak mai. 

Valtea chhuah hnuah,  boss chuan dawhkana thlalak chu a lek diat diat a, "Hei hi Pu Tluanga a ni a, Ar chaw dawr a nghak thin. Hei hi Sanga kha a nia, Civil hospitalah 4th grade-hna a thawk thung, chuan hei hi Romawia a ni a, Agricultureah a thawk bawk. Hei ve thung hi Sawmtea a ni a, Electric wearing a khawih thin…. Wearing.. Ngawi teh.. Sam,. A dik dawn tan" a ti hlut a. Thalak dang chu a khawm sawk sawk a. Sawmtea bik chu a thlur bing ta a. Hmanhmawh zetin kan tlanchhuak a, Sawmtea te in lam kan pan. 

An inah lut lovin an kawmchhak te inah kan lut thung. Boss chuan, "Sawmtea te khu an la harsa viau em? Zu kal kan tum a, mahse, an lo reh thiap sia. Ka cousin ania, Shillong atangin kan rawn zin a, tanpui ka duh viau asin mawle" a ti zung zung a. Ka lo ngawi dák. An nu nu ber niawm tak chuan thingpui min rawn pek pahin, "Harsa vak tawh em mawni le.. An khawsa thei ve riau tawhin ka hria. Tlem lai pawh khan a farnuin scooty a lei nghe nghe kha" a ti ta a. Sawmtea hian nupui nei tawhin fa pakhat an nei tawh a. A la upa vak lo. An zingah a naupang ber hial maithei. 

"Anih chu mawle.. A that hlauh chu. An khawsak kha a harsa ve thin si a. Kan inhlat ve bawk nen, chanchin kan inhre pawp khát deuh a, tu tu nge la khawsa ve a" Boss chuan a ti leh duah a. 

"An nupa leh a pa leh a farnu khu an ni mai. An fapa nen.. Amah Sawmtea hi a fel reuh a, a naupan ngaihtuahin a puitling phian, a thian kawmte reng reng pawh an patling thei em mai. Thiam thil a lo ngah ve bawk nen" Pa ber chuan a lo ti ve a. 

"Wearing lam kha a la khawih em? " 

"Khawih vak tawh lo nge ni.. an nu khuan thawmhnaw te lain bazarah a va pho ve thin a. A hlawk viau aniang, hei an che thei ta riau" pa bawk chuan a lo ti a. 

Boss chuan, "Computer te kha a la khawih thiam reng em le.. Ka laptop chhe lai te saw siamtir ka duh riau a ni. Ani hi chhawr theih si loh hian a thiam ve zul roh a" a ti leh a. 

"La khawih reng e.. Nizanah pawh maman a computer a siamtir tak kha.. Dik chiah, eizawn nan te khuan hmang se a tha ania" nu zawk chuan a lo ti hlut a. Boss mitmeng chu a nung ta sar mai le… a hmawr kan bawk hnai ta. 

A tukah Bankah kal in, Rinpuii Account-a balance awmzat chu kan zawt ngial a. Nuai thum leh Siang riat a lo la awm!  Bank manager biain a ATM kan block tir a. Tupawh Rinpuii accounta pawisa la tur an rawn kal chuan lo pe tur leh min rawn hrilh vat turin thu kan chah a. Kan hawnsan ta rih. Thawm a reh ta vung vung phawt. Chumi tlai boss nen kan haw chu J. Thankima college lamah kan tlan ta daih a. Boss a ngawi tlat. 

An college parkingah kan lut phei a, Two wheeler a lo intlar dul mai. Mi mitmei ven a ngai bawk si. Boss chuan scooty chu a enkual zel a, a tawpah Rodeo dum pawl chu a ngheng ta chat. "Sam, min lo hliah rawh le" tiin a bur nghal chat. Ka din hliah vat. Mi an awm hnai vak lo va a zia. A englai nge. akhawih ka zuk hmu lo. Ka hnungchhawn miau si a. 

"Ka zo e" a ti a. A ding nghal. Hmanhmawh takin kan kalsan ta a. 

Zanah zu ka in pek!  Ka thianpa Elvis-a phai atangin a lo haw a. A rawn hawn nual sia, insum thei hek lo ila, kan tauh leh nghek kha.. 

Zingah lu na burin office ka thleng a. Boss erawh a lo thu vang tawh. "I rim chuh" a ti fak a. "Sorry" ka ti.. A thinrim lem lo tih erawh ka hria. A thing rim hi ka nam duh bik hirm hrim. A mak. 

Chawhma dar 11:07 ah Bank Managerin min lo call ta. Boss nen rang takin Bank lam kan pan ta a. Eng emaw ti tiin an lo hreng khawtlai ve a, an titha khawp mai. Sawmtea chu kan hling ta chat mai. Office-ah kan hruai a, a hawi hruk hruk. A meng tal leh tap thin bawk. 

"Min man ngawt chhan hi ka hre lo " a ti a. 

"Min la hrilh dawn alawm" a lo tihsan hmiah. 

Kan pu ber leh Rinpuii chhungte an lo thlen hnu chuan.. Boss chuan, 

"Umm.. Le,Rinpuii i blackmail dan leh nawhchizuar tura i nawr dan zawng zawng thawnthu hre turin kan inpeih e" a ti chang ta fak a. 

"I sawi awmzia ka hre hauh lo mai" a lo ti  lawi rut a. 

Boss a ding at, Sawmtea kut dinglam chu a va herh sak a, Sawmtea na ti chu a rak thawt. Boss hian tumah kut thawhin a la dâwp ngai lo. Tun tum chu a thinrim hle tih. a lang. 

"Ka sawi ang.. Ka sawi ang" a ti ta chul a. Boss pawh a thu zui nghal. 

Sawmtea chuan, "Aw ni e, kan khawsak a harsa a, rual ka awt ve si. Kawng dang ka hre lo anih kha. Rinpuii nen khan a nulat laiin kan inngaizawng tawh a. Mahse, tu vak mahin an hre lo. A virgin ka hawnsak nghe nghe. Hotela kan inhmuh tumin kan sex hmang lai chu ka cover a, a duh lo viau nghe nghe. Kei pawn ka tidarh chuang lo. Nupui ka nei a, Rinpuii pawn pasal a nei ta bawk. Kan vengah a ni lehzel a. Ka hmu ta zeuh zeuh,  Tichuan, ngaihdan thar ka nei ta a. A pasal Pu Lawma kha ka û rual daih mah nise, hnaiah dan ka ngaihtuah a, an thianho zingah khan ka tal lut ve ta a ni. Rinpuii eraeh chuan min zah a, an pa in kan inngaizawng tawh tih a hriat a hlau bawk. 

Ni khat chu Pu Lawma khan an room wearing ti turin min ngen a. Chutah tak chuan ka inveng zo ta lo a ni. Wearing ka tih pahin an khum lang tam thei tur ang berin camera ka fit ta a. An nupa nun hmang lai zawng zawng chu ka nei thei ta a ni. Pu Lawman bank-a a pawisa khawl tamzia ka hria a. Hman tangkai ka tum ta a ni. Rinpuii chu an nupa mudun lai video chu ka thawn ta a. A hlauthawng khawp mai, ka phut zat pawisa min pe ta reng bawk a. Mahse, ka la duhtawk thei lo. Kan inngaihzawn laia ka lak video kha phawrh tha lehin ka thawn leh ta a. Ka duh anga a awm loh chuan thehdarhsakah ka vau ta a ni. 

Amah kha ze zawi, hlauthawng hma ve tak a ni a. Kei lahin a pasal leh afate thahah ka vau zui zel bawk nen. Ama siam angin website ka siam ta a. Ka number pangngai ka hman chuan man chhuah ka la ni dawn tih hriain nu pakhat phone ka ruk sak a. A simcard hmang chuan call girl dawr thin, sum nei deuh, nupui te duhkhawp si lo ho chu ka be kual ta a ni. Khang miho kha hriat an harsa lem lo. An office tinah ka va leng kual a, han chhui deuh chuan an lo hrat ru ve hle tih ka hre nghal mai. Tichuan, Rinpuii chu a duh lo chung ka inzawrhntir ta a. Bankah account ka hawntir bawk. A chhan chu man chhuah emaw pawh lo ni ila, amah duhthlanna ngeia ti anga a lan theih nan a ni. Ka vau reng avang leh vawikhat phei chu a fapa ei tura damdawi ka pawlh avangin ka sawi ang apiang chu a ti ta zel mai a ni. 

A tlan hmasak khan a nute bulah engkim sawiah min vau pek a. Mahse, video ka va thawn nual a. A ngam leh ta lo a ni. A tlan vawihnihnah khan police hnen thlen a tum a, ka umzui a, ka sawisa ta hrep a!  Min hlau si. Chung ka kutthlakna te chu a chhungte bulah apasal tih anga sawi turin ka ti nghe nghe. A hma pawh khan a lo sawi tawh tho va. Hliam te a neih takah kha chuan an lo awihsak ta reng kha a nia. Mahse, inrinni zanah haw a tum thu ka hre ta a. Chutihlai chuan kam customer hlun tak, pawisa pawh pe hnem thei deuh hian dawr a duh ta tlat a. Rinpuii chu ka call a, tun chiah ti la, i zalen tawh ang ka tih vangin chu pa chu a mutpui leh ta a ni. 

A tuk sundayah ka chhungte inkhawm hlanin hotelah ka va hmu ta a. Kan inhau ta chiam a, ka pasal ka hrilj vek. Dawn.. Min ngaihdam theih loh pawn a pawi lo. Duh leh ka thi mai ang. Ka thei tawh lo a ti a. 

Kei chuan i tih a ngai tawh hleinem, zaninah i haw anga, engmah a thleng tawh lo vang,. Ka ti a. Mahse, video pakhat chu a pasal ka thawn ta a ni. Rinpuii khan min la hailang dawn tih ka hria, a hnawksak tawh. Ka thah chuan ka tang dawn si. Risk lain a pasal kha video ka thawn a, a ngaihdam theih ka ring lo ve tawp. Lo ngaidamin lo pawm ta se ka chhe vek dawn tih ka hai lo. Ka hlauthawng teh asin. 

Tichuan, a haw ta a. A reh tak hmak danah Pu Lawma khan a dah tha ta a nih ka ring. Ka thlamuang thei ta a. A account-a sum erawh ka khawih duh rih lo. Website ka tichhia a, number kha ka tichhe bawk. E chuan, Rinpuii nutapa hi video kha ka thawn ve tak.. A chhan pawh Pu Lawma kha ringhlel se man se ka duh vang a ni. A nupui a uire vangin a that. Tih kha miin hre vat se, him thuai ila ka duh a ni ber.. Rinpuii vuiliam a nih hnuah kan nu bungraw lakna tur kan haihchham vangin ka la chhuak a, min chhui zui nghal tih ka hria. Pawisa pawh lak tawh rih loh ka tum. Mahse, ka farnu scooty kha a chhe ta si a, sum kawlsa a siamna man daih kan lo nei hauh lo mai a. Loh theih lohin ka lakchhuah a ngai ta a ni. Atm ka hmang thei ta bawk si lo va.. Nang hian min dai khalh hneh khawp mai" a ti ta a. 

Boss a tho va, a kuttum chu Sawmtea chuan a head lawlh mai. Boss hi a thinrim. Takzet a ni. 

"Pu Lawma chu ka va khawngaih tak.. " ka ti sup a. 

"Central jailah a nupui nena lahrangtu kha a lo sawisak ngei ka beisei" a ti nghat a. "Tin, theihtawpa sawipuia bail chhuah theih ngei ka duh' a ti zui sap bawk. 

"Christmas hma hi chuan engmah thleng tawh lo hram se aw" ka ti vawng vawng a. 

"Zin duna hotel room pakhata ka hnute nalhzia min chhamkhum i chak viau pek anih kha… ka duhsak a che" a ti hmuk a. Min tlansan daih. 

Aw.. Ni e.. Engoawhnise, inhnute chauh lo pawh kha ka la hmu dawn.. Amanda..