Victor

VICTOR..

Ziaktu: Toni Râlte

"A harsa lai ber kan pal tlang dun a, kan hneh veleha min phatsan hi ka damchhungin ka hrethiam thei ngai lo vang"...

A hminga nurse han nih ve takah chuan thawh tur neuh neuh chu ka nei chho ve mawlh mawlh a, Tun tuma min rawn betu erawh a dang deuh. Aizawl pa lar leh hausa tawntaw tak mai a ni a. A hming hre lo chu an tam viau lo vang, ni e, Pu Zosiama sumdawng hausa, ram leh in ngah em em, kohhran leh khawtlanga thawh hlawk tak mai kha a ni miau a. Min lo be teh nawlh chu mak ka ti nasa.

"Ka fapa hi ruihhlo bawihah a tang mek a, tin, tunah hian wheel chair-a a thut a ngai mek bawk. Accident a tawk a. Chu chu min enkawlsak theih beiseiin ka lo be tawp che a ni. Mi chi hrang hrang i lo enkawl tawh thin tih ka hria a, damdawiina awm a duh lo bur bawk sia, hlawh pawh mi dang ai chuan a tam deuh turah ngai ila" tiin min rawn be nawlh mai a ni. A hnua ka hriat leh danin an thenawm hnai ami ka thiannu siamtei'n min kawhhmuh a ni awm e. Ani hi chu hospitalah a thawk a, hun nei a inti lo anih ka ring. Kei erawh private nurse angin kha chen ka lo thawk tawh a, nuam pawh ka ti zawk phian. Hlawh a chhe hran bawk si lo nen. Ka chhungte ka rawn a. An remti thlap mai.

Nu leh unaupa ka nei a. Ka pa erawh kum 18 ka nih kumin cancer vangin min boralsan tawh a ni. Ka nu hian ka pa hna chhunzawmin a hmingin sawrkar zem kan zen ve hram hram a. Ka nau erawh college a la kal ve lauh lauh thung. Nurse hi ka tette atanga ka tuina a ni bawk a, class 12 ka pass fel tihin ka training ve ta nghal kha a nia. Nuam ka ti viau. Mahse, hna a awm mai si lo va, tihian private in mi inah ka thawk kual ta mai mai a. A tirah chuan ka lungawi vak lo naa.. Ka ti chho bek bek a, hlawh lah a chhe em em si lo nen, hospital aiin kan thawkrim chuang bawk si lo va, ka thawk chhawm ta zel mai chu a nih hi. Kum khatah in pahnihah ka thawk hman tâwk a. Chhungkaw pali ka hrawn tawh a, pakhat tih loh chu vawiin thlengin chhungkhat angin kan la inpawhtawn ta zel a, hengte hi a manhla ka ti hle. Hmeithai fanu ka nih avangin phungbawm ka mamawh tih ka hre ve kar bawk a, nurse a hrana ruai thei chu an khawsak a hniam fahran ngai lo tih ka hre ve kur bawk. Mahse, thleng tlawr zuan anga awm erawh ka duh lo bur. Min mamawh huna ka awma ka mamawh ve huna min puih inhuam an nih chuan a tawk ka ti. Ka nu hi pasal nei turin kan nawr fo a, a chhan chu a khawhar leh ka pa a ngai lutuk hi kan khawngaih thin. Mahse, ka pa aiawh zo a tawng lo a niang e. Vawiin thlengin hmeithai nih a thlang ta a. A nihna takah chuan ka chhuang a, ka zah em em bawk.

Pu Zosiama khan dar 10-a an ina kal tura min tih avangin ka insiam nghal a. Inchei vût chi ka ni lo va, ka neih loh vang pawh a ni pakhat. Ka vun hi a ngo èm vangin han tih ngo belh vak a ngai lem lo bawk a, vun mam tak ka neih vang hian ka thianten min awt ve fô!  Ka hmel erawh a entu a zir a niang chu. Ka sam dum hlap chu ka dar thleng velin ka zuah ve a, ka lian lo naa te chhe tak ka ni bik lo. Ka hnute hi duh aiin a lian deuh chu a ni. A kawh bawk si, mipa fiam ka hlawh phah zèk, ka duh vang a ni tawp si lo. Ka nu ka chhun a, ka vun a pan a, thil ei teuh mah ila ka dul a kiar ve ngai meuh lo. Ka pian erawh a nalh ta lua tihna phei zawng a ni lo. Ka squat ve thin vangin ka mawng pawh ka taksa nen a inphutawk ve viau. Bialpa hi pahnih ka nei ve tawh a, pakhat chuan nupui min ruksan a. Pakhat erawh ka thiannu nen an lo ni daih a. Ka tluang fahran lo. Ka thiannu laka min phatsantu eraeh ka ngai reiin ka theihnghilh mang mang lo. Hei kum khat chu a liam dawn ta reng mai, ngaihzawng ka nei leh ta lo.

Door bell chu ka hmet a, nula nge nu tih hriat harsa zet hian kawngka chu min lo hawnsak a. A nui lo va, ka nui lui thung. Common roomah Pu Zosiama chu chanchinbu kengin a lo thu a. Min hmuh rualin a rawn tho va, kan inchibai a.

"Hei hi ka nupui Mapuii a nih hi. Ka fanu hi a hna avangin Delhi-ah a zin mek a, kan fanu upa ber erawh pasal neiin kan colony-ah tho hian an awm ve. I enkawltur hi kan milai a ni a, mipa awmchhun a ni bawk. Hawh lo kal la, ka lo hmelhriattir ang che" a ti zung zung a. Awmpui pahnih an nei tih ka hre nghal zat bawk. In chung kailawnah kan pen chho pâwk pâwk a. Thlang lam bera room kawngka chu kikin a hawng zui nghal a.

Mitmeng hriam hraih leh nelawm loh zet ka hmachhawn nghal. Khumah a lo thu  mu a, tshirt dum rang ruk mai a ha a, kekawrbul hring duk nen. A sei thlurh roh a, kei aia a upatna erawh a tam lo vang. Phone a lo keng bawk a. A sam chu viking style-in a mèt a. A khabe hmul a sei tep. A mithmul buk zet chu a dum hlap a, a hnar bang pawh a sang angreng, ka enkawl tur a ni a, ka en chîk viau chu a pawina ka hre hran lo.

"Bawiha, hei hi Tebawihi a nia, nangmah viltu tur che anih hi. Engtia rei nge in inhrawn dawn la hre lo va, thian tha tak in nih ka beisei, Tebawihi, hei hi ka fapa Victora chu anih hi" a ti leh dap dap a. Nui chungin ka kut ka va pe a, ka kut chu a melh zawk duh chauh. A phone a bih nghal. Chu chu kan bultanna a nih pek chu.

Pu Zosiama nen chuan inhnuaiah kan chhuk leh a, hlawh chungchang leh enkawl dan tur te kan sawi dun a. Pa biak nuam tak a ni. A nupui erawh kei aiin a û awrh ang tih tur a nia, a nelawm fahran loh. A thip râm reng mai. Kan titi pawh a rawn zawm ve lem lo. A nupui pahnihna a ni tih sawi ngai lo vin ka hre ve thei mai. Pu Zosiama chuan lánga kal chu buaithlak a tih thu leh an ina awm ve mai tura min duh thu a sawi a. Ka nu ka ngaihtuah sia, ka hnial ta rih. Chenho hun chu a la awm tho ka ring. A chhan chu zan lamah Victor hian suahsual a chhuah thin vang a ni. A fapa chu sual viau mah se a hmangaih tih ka hre thei. Pa tha tak zawng a ni mawle..

Chumi ni chuan ka haw hma a. A tukah erawh nilengin ka awm tawh ang. Ka huphurh hran lo naa ka phur hâwrh hran lo. A hmel kha a nelawm loh ropui si.

"Chaw i ei lo tih i pain min hrilh a, chaw hi chu ei hram hram a tha asin" ka ti sap a. A khum chuar chu ka pawt mar pah a.

A ngawi reng. Biak tawng zawh loh khawp zawng a ni èm bik lo vang chu.

"Chuan, tui ka lum tir mek a, i kawng hnuailam hi kan zût dawn nia, chu mi hmain hei hian ka jection che a ngai dawn a" ka ti a. Damdawi chu ka siam fel mawlh mawlh a. A la tawng chuang lo. Ka jection zawh chuan tuilum chu ka zuk la leh a, a kekawr chu ka phelh a, boxer erawh phelh kher tul ka ti lo. Ka tih ang ang chuan a awm tawp mai a ni.

A malpui vel te chu a duk thluah a, a vun erawh a hâng lo tih ka hria. Sawi mai tur ka hre bik lo bawk a, ngawi rengin kan hna kan thawk mawlh mawlh a ni ber mai.

"Dar 11ah ka damdawi chah a lo thleng dawn a. Ka pa in a hre tur a ni lo. Min rawn laksak ang che" a ti thum chhak a. Ka lo îp chawih. No. 4 a ni tih ka hai lo. Khuma mu chung pawn a la sim chuang miah lo chu ania. Enkawl man a va awm dawn lo tak. Apa ka hrilh duh angem tihah ka buai, "Ka pa i hrilh chuan i chhuak nghal ang" a rawn ti leh a.

"Heta i awm chhan chu ka ke ka hman leh theih nan a ni. Damdawi min simtir tur ni lo vin" ka thaw hawk ringawt. A mitah ka va melh a, chiang zetin min lo melh let a. Ka hawisawn rang ngei mai.

"Mahse, damdawi i tih kal reng chuan damna chance i nei hleinem. " ka ti a. A rum nghut ringawt.

Dar 11ah chuan a thianpa niawm tak a rawn kal ta chiah a, roomah ka awm ve lai rengin an inchiu nia mawle!  A thianpa rui pheng lah chuan, "Nurse, min enkawl ve teh.. " a ti deuh sek. An han kai ta chu an tawng duh barh barh hle. Kei erawh a wardrope ka ching fel a, a hnawk hran lo naa ka tih dan thin a ni ve reng reng a. Chawhnu lamah thingpui ka zuk lumtir a. A thianpa a haw ta bawk a, kan pahnihin kan in dun a.

Kawngka an rawn kik a, A nuhrawn a rawn lut a, "Vica, i pa ka hrilh tawh ang. Kha mihring kha a rawn lang tawh tur a ni lo. Heti khawp hian kan ngaihtuah che a, min rulhlet dan hi ka lung a awi tawh lo" a rwwn ti bawrh bawrh a.

"Aw i chhuak thei" a lo ti chang bul.. A mitmengah chuan chu nu a huatna chu ka hmu thei. Ka lo tîm dûi thung a. A chhuah hnu chuan kan ngawi leh veng veng a.

"Ani khan ka nu dinhmun luah a tum a, ka nu ai awh zo emaw a inti ve a. A teuh lo. Engtikah mah ka nu ai hi a awh thei lo vang" a ti fak fak a.

"I pa nupui a ni asin"

"Chu chu eng nge a tangkaina.. "

"I nu ang chu a ni ve tho alawm"

"Pangpar lem pawn a tak a an poh leh a lem anihzia a lang chiang thin" tehkhin thu te chu a sawi thiam zèk a.

"Engpawhnise, ruihhlo chu i bansan a tha a ni. I taksa tan " ka ti a.

"Ka bansan daihin engtin nge he khuma mu reng chung hian ka hlim ve theih ang" beidawnna aw ri chu ka hre thei.

"I dam hun atan i khek thei alawm"

"Engmah ka sawi peih lo. Chhuak tawh teh. Kal teh" a ti hmawk hmawk a. A mitmeng zim san ka hmuh chuan a ranf arangin a room chu ka chhuahsan ta a.

Tuna a ke a hman theih loh chhan hi a thiante nen luia riak turin an chhuak a, an kai deuph nge kawng thlangah an tlan liam a, an thianpa pakhat phei chuan a nunna a chân phah ta hial a, ani leh mi dang pahnih erawh nunna èm chân lo vin tihian enkawl ngaiin an bawksawp ta a ni.

Doctor ka ráwn lawk vek bawk a, tin, an chhungkaw doctor chawh ang zelin treatment ka pe dawn bawk. Hna hahthlak tak zawng a nih loh hram ka beisei.

Ni 4 lai chu kan invil ve ta chu ania. Kan inbe tam lo thin kher mai. A la rui reng tih ka hria. Pawi ka ti. Apa hi hrilh mai pawi ka ti vak tawh lo. Mahse, hèk chan ka chang dawn a. Nuam ka ti chiah si lo. Mahse, ka hrilh ngai lo vin a nuhrawnin a lo hrilh a ni ngei ang. Rooma ka awm laiin a rawn lut a.

"Victor, i ruihhlo tih i ka sim si loh chuan enkawl i ngaihna ka hre miah lo" a ti ram hmak a. Chhuah chu thaa ka hriat vangin ka chhuak ta daih a. A pa chhuah hnua ka va luh leh chuan rum elkhen hian min melh a, thinrim tih hai rual loh khawpa nasa hian a hmai a sen vek bawk.

"Mi kamtam ni lo vin nurse in min enkawl dawn emaw ka tia"

"Ka sawi lo engmah. "

"Dawheh"

"Ka sawi lo takzet" chawhnu pum chuan ka khawih a duh ta lo va, khawih luih ka tum lo bawk. Damdawi a ei duh lo bawk nen, a manganthlak angreng.

Ka haw hma chuan, Pu zosiama a lo kal a, "Tebawih, titeh lo riak lut ve phawt mai teh. Ka fapa dinhmun i hre tho si a. Khawngaihin" a ti ta a. A tuk atanga an bula cheng rih turin kan inbe fel ta a. Hun dangah pawh ka riah fo thin vangin ka nu pawn mak a ti lem lo. A khua erawh a har leh rih deuh dawn a ni mai. Victora room dawt chiahah chuan ka innghat ve ta phawt chu a nia. A nau hmeichhia pawh a rawn haw a, apa ang chiaha nelawm leh kawm nuam anihna chuan ka thla a timuang ta deuh. Mahse, hna a ngah theih em vangin kan inkawm tam hman vak lo.

Apa nen an inhauh atang khan min la be duh miah lo va, damdawi a la ei duh chuang lo bawk. A taksa ka khawih leh sawngbawl erawh a phal nge ka la ti thei a. Ka biak pawha min chhan ngai loh vangin lungtum biak reng ai chuan tiin ngawi rengin ka hna ka thawk thin. Thil nuam zawk zawk erawh a ni lo. A la rui fô tih pawh ka hria.

"Victor, i nurse ka nih angin hei hi ka ngen duh che. Ruihhlo hi chu buaipui tawh rih lo teh. Doctor ten i dinhmun hi an ngaihven ve reng a, heti ringawt chuan i ke i hmang thei dawn lo ania.. Damdawi i ei duh bawk si lo" ka ti ta nge nge a.

"Ka pa lung tih awi nan maw.. " a la ti hram.

"I tan" ka lo ti hmuk.

Min rawn melh a, thinrim hmel erawh a pu tawh lo. "Ka lo inngaihtuah ang. Mahse, thil harsa tak a ni dawn ania" a ti sap a. Ka tan erawh thu lawmawm lutuk a ni. Dam leh hi a chak ve ngawih ngawih tih ka hria, a chakawm ve reng bawk a. Zana ka va jection leh chuan, "Naktuk atangin thlah ka tum anga, mahse, ka suffer laiin nangmah chiah ka bulah i awm tur a ni" a ti ta a. Ka nui sak. Ka hlim a ni.

Zinga a tho phang hmel chu ka thlir a, mipa hmel tha tak zawng a ni chiang alawm. Kan inkawmngeih tak tak hunah a bialnu vel ka la zawt khawp ang. Phone hi chu a khawih ve reng a, tu nge a biak zawng ka hre lo. Thingpui a in a, chaw a ei peih loh thu a sawi nghal a. Ka lo tum hmak. Ka barh lui tho vang.

"Ka ei duh lo ka tih kha" chaw ka ken luh rual chuan a lo ti a.

"I ruih tawh dwn loh phei chuan chaw hi i mamawh" ka ti a.

Tlemte zawng a ei ve hram kha. A lawmawm lamah ngai zel ang. Chawhma lamah ka bual zel thin a, vawiin erawh tui a hlau tlat!  Ka hrethiam. Nidangah chuan a ruih laiin ka bual thin a, a duh ve mai zel kha a nia. Vawiinah erawh damdawi a ti si lo va tui a ngaina ta lo. Ka lo inrinlawk ve vek avangin tramadol ka eitir ta a. Tlem ka nghak hlek a, ka bual leh thei ta mai.

A thawmhnaw ka thlak fel hnu chuan, "Ka engkim hi i hmu vek zel sia, ka zak ve thin" a ti sup a. Nia, hmuh loh reng ka nei si lo va. Mahse, ka tih dan, ka hna a nih vangin engah teh vak ka ngai lem lo.

"I zah chuan hrehawm i insiam mai mai. Hmu lo angah min ngai tawp rawh " ka ti ve mai a.

Chawhnu lam, zanriah ei hma si vel atangin a rawn suffer zual ta a. Doctor min chawh damdawi, suffer chhawkna chu ka eitir ta vat a. Mum 4 in a chhawk tâwk. Chu pawh hrehawm a ti tho. Ni e, kum eng emaw zat a thisenah a lo kap lut tawh si a, thil tawrh awlsam a ni dawn lo chiang.

Pu Zosiama bulah engmah ka la sawi hrih lo. Victora hian a thu a zûk leh thut ang tih ka hlauh vangin. Zanriah chu a tihluih theih hlawl lo va, ka tum lui bik lo. A ei theih ang chi ka siam sak a, tlem a ei. A khua a sik vut vut a, a nau a rawn lut a. A rawn thu ve reng a.

A û muthilh hnu pawh chuan kan titi ta zel a.

"I la thawk rei ber a nih hi. I chhuak ve daih ang tih ka hlau" a ti a. Mak ka ti deuh, "Eng nge a awmzia? " ka ti a.

"Nangma hmaah hian pahnih an lo thawk tawh alawm, pakhat chuan ka û a ngaizawng tlat a, ka û in ngaithei hek lo, a hnawtchhuak a. Pakhat ve thung chu a chapo ve deuh nge ka û mizia kha a mil hlawl lo va, amahin a chhuak tawp" a ti a.

"A va mak ve, i pain a sawi si lo va ka lo hre ve hleinem"

"A sawi hreh ve aniang. Dik tak chuan ka dem lo, ka û hi a khirh ve èm a, a chapoin a thu a duh bawk si. Awmpui ang deuhthawin a cheibawl a, nurse inti ve tan chuan a hrehawm ve viau ang. "

"Keimahah chuan chuti ang chu a la thleng pawn ka hre lo"

"I danglam bik aniang.. Ka hre bik lo. Bakah i dawhthei èm a, i luhlul tel bawk nen, nang hi chu chhuak tawh miah suh aw" nelawm zetin a ti leh siam siam a.

"Hrawn hrehawm tak chu a la ni rih lo, mahse, a thinchhiat thut chang hi a awm ve a" nui chungin ka ti a.

"Ka nu a hmuh hian a mood a chhe vek zel a, chuvang ania ka nu pawn a rawn hmuh duh ngai loh" a mitmenga eng emaw inphûm chu ka hmuh hmaih lo.

"Nia ka hrethiam ve deuh hei chu"

"Dik tak chuan ka nu (a nu tak tak)  boral kha a tuar èm a, a thih hlim phei kha chuan a â emaw tih tur hialin a khawsa thin. Kan mangang thei ania, hetia nuhrawn kan neih takah hian a tuar thiam lo a ni ber, a pawm thei lo a ni ber ang chu"

"In zawh nuam tak chu a ni lo va, i nu kha engvanga thi nge? "

"Awii engmah i la hre lo tak tak anih hi. Amah hian a hrilh hmel bawk si lo che a, haha, nia ka nu kha cancer vangin a thi a. A chuap a cancer a, kan inenkawl hman vak lo, a rang lutuk" a lungchhe deuh aniang, a insut hraih a.

"Sente, tihpalh.. I nu chanchin chu sawi tawh lo vang"ka lo ti vat a.

"Ka û hi a duat em em a, kan thik hial thin. Mipa awmchhun a lo ni bawk nen, ka nu kha la dam se chuan ka û hian damdawi pawh a ti miah lo vang. Ka pa lah hian nupui a nei leh hma ve bawk sia. Ka û hi dem lohna chen ka nei ve tho"

Victora muhil hmel chu ka zuk melh a, ka lainat thar riau. Keipawn ka pa ka lo chân tawh a, a natzia ka hrethiam. Chumi zan chuan Voctora nun chhe mek hi chhanchhuah duhnain ka khat a, ka muhil tlem angreng khawp mai.

"Morning, tukin chu balcony-ah inhung chhuak ang aw. " phur sarhin ka ti a. Makti hmel a pu deuh.

Ka tihfai zawhah. Wheel chairah ka kuah thu a, Balcony-ah chuan ka nawr chhuak ta a. Zing boruak hi a tam thei ang ber hip se ka duh a ni.

"Ti daih ila, bialnu te i nei ve lo mi?  Hmeichhia an va rawn kal ngai lo em em" ka ti a. Ka inring lawk hman bik lo, ka sawi thut.

A nui hawk a, "Hmeichhia chu eng atan nge ka tih ang?  Tangkaina in nei hleinem" a ti tawl a. Ka hrilhhai letling.

"Kan tangkai ve tho e aw.. Mipa hi in tangkai lo fee" ka ti hmak a.

"Hlîng in nih hi, hlîng. A ho. Ngaihzawng nei thei pawh ka nih loh hi, sex pawh ka hmanpui thei nang"

"Hmm.. Sex hmanpui kher i tum anih chu"

"Tum ve lohin"

Ka nui tawp. Ani pawh a  nui. A nunah hmangaihna vanga natna a lo hmachhawn ve tawh anih ka ring. Senteiin min la hrilh leh em ang chu.

Tramadol bawkin a suffer bul tanna ka han thawi dam leh a. Damdawi pawh a ei tha ve ta. Chaw erawh a lem hleithei lo achha a ni e. Nilengin a roomah ka awm tih theih a ni. A phunchiar lutuk tlat!  Min tir reng a ni ringawt. A muhil duh si lo. Che thei si lo hian tihtur min kawhhmuh chamchi a, ka ning tep. Ka hna a ni ve miau bawk sia. Chawhnu lama a suffer leh chuan ka hrem ve deuh a, tlem ka tawrhtir kha. A hnap fim nen a thlan nen, mittui nen.. Hmuh a hrehawm èm vangin damdawi ka pe leh ta nge nge a. Zanah a muhil hma a, a khua pawh a sik lo. Ka roomah ka awm ve thei ta. Ka nu te ka bia a, naktuk hi sat a ni bawk a, tlaiah ka hawng anga, sunday tlaiah hetah ka riak lut leh ang. Mahse, a suffer lai a ni sia, han kalsan ngawt chu a huphurhawm dawn hle mai. Senteii kutah dah mah ila, thil zawng zawng a hrethiam dawn si lo.

"Tebawih, i awm maw? " Pu Zosiama a ni. Ka va hawng vat a.

"Naktukah hawn i tum deuh em ni? " a ti a.

"Umm sunday chu kan vengah ka va hmang ve ang chu ka tia"

"Nia, a dik reng. Mahse, Victora hi kan enkawl thiam ve vak si lo va, zan khat lek zawng kan lo ti ve naw naw aniang chu" a ti dam thluam a.

A tukah ka hawn tur thu chu Victora ka hrilh a. A ner sawk.

"Tuin nge min enkawl anga? "

"Senteii hnenah engkim ka hrilh dawn alawm, timing leh thil dang pawh"

"Ka suffer hi.. I hmu lo mi? Ani khan engtinmah min enkawl thiam lo vang'

"Damdawi pek che a ni mai. Ka hrilh vek dawn alawm"

"Haw lo mai rawh. A buaithlak" zuk ti tlat pek a. A tûm bur roh bawk sia. Ka khawngaih angreng.

Ka bual fai a, a ngawi hmuk a, a hnungzáng sahbawn ka hnawih lai chuan, "I danglam bik alawm nang hi chu" a rawn ti thut a. Ka hamhaih deuh.

"Tu aiin"

"Khang mite ai khan". Ka awm hmaa nurse te a sawina tih ka hria.

"Hmm.. Ka danglamna ka hre lo"

"Ka taksa i hmu a, saruakin ka awm a. Mipa ka nih angin mipa angin min en ve ngai lo ringawt pawh hi a mak tawh alawm"

"Ehh.. Chuti ang zawng chuan maw.. " ka ti ringawt.

"Ni e, ni e.. A tawk, min tleng tawh rawh" a ti leh sawk sawk a. Ka nuih a za deuh.

Ka thlak fel hnu chuan, damdawi ka eitur a, a eitur ka zuk siam sak a. Buhhawp kengin ka chho leh a. Tu emaw phone in a lo be mek a.

"I aw hriat ringawt pawh hian ka luak a chhuak, mipa ka nih angin tumah block ka duh lo va, min block thei lo anih pawhin min rawn be tawh suh" a lo ti. A mitmeng ling hlar chu a nuihzatthlak miah loh.

"Ka ei peih lo" a ti leh hmuk.

"I ei ang. I mamawh. "

"I thu thua awm tur ka ni lo"

"I ni ka ti lo. I mood uih zet kha dah bo la, ei mai rawh"

"I zak si lo vah"

"A pawi lo"

"Hmeli"

"Eih"

Ka barh lui hmiah. Ner nawng chungin a ei ve hram kha. A chang chuan naupangchhia taka a chetna hian min tihlim thin. A intipa thei bawk sia.

"Hmeichhia te hi in duhnaah chuan in lo zak thei lo ka ti" a ti leh a.

"Duhnaa zah tlat thu awm hek lo" ka lo ti ve hmak.

"Hnial hneh pawh i ni lo e, nang nu hi"

"Min hnial hneh tum buai tawh suh"

Ka ding a. "Ka haw tawh dawn a, senteii pawh ka hrilh vek tawh kha aw. Tha deuhin lo awm ang che. A tul viau chuan min lo call la, ka lo kal mai ang. Thil ei tha bawk la.. " ka ti a. A hmel a ngui nghal rawih thei.

"Aw" a ti chhum hmak a. Lehlam a hawi ngât nia. Min tihtauhkhum te pawh a ang.

Ka nu nen eirawng kan bawl a, a titi leh siam siam a. Kan thenawmnu, nu kamtam leh bengvar angreng tak si a lo tek lut a. Ka hnathawhna te min zawt a, a lo hre phian lehnghal.

"Aw.. An fapa kha maw.. Khi kan jenny nen khian rei fe an inzui ve tak kha mawle, Jenny nu lah chuan a pâk huam a, mahse, Victora a accident hnu hian an inthlah ta nge khi bialpa dang a zui leh ta daih sia" a ti bawrh bawrh a. Jenny chu kan veng chhung ami, nula hmel tha zet a ni a. Mahse, a nun a ho ve deuh zeuh zeuh thin. Nikum hmasa pawh khan chapchar kut miss a ni ve tawh tak e.

"Tebawih, Pu Zosiama nupui rîm rèm saw i ngei ve em?  A induh ve sia, biak te saw a hrehawm ania" a ti leh a. Ka lo nui ringawt. Rèl ka duh lo, he nu bulah ngat phei chuan. A haw hnuah ka nu bulah an chhungkaw chanchin ka hriat theih ang angte chu ka sawi ve a.

"A lo hrehawm deuh anih pawhin amah pu Zosiama a zahawm, a rawn tahawh takmeuh ve che sia, karleh atang phei chuan rawn haw tawh rih lo mai rawh. Ka ngaih viau che chuan ka lo be mai dawn che nia. Chhel takin awm la, Victora pawh chu mi pangngai anih leh theih nan theihtawp i chhuah dawn nia. Pathian hnenah thlen zel la" a ti a. Ka nu tihdan reng a nia, ka ngaisang thin.

Chhungkuaa zanriah kan han kil leh ta chu ka ei hnem leh hle. Sawtah kha chuan ka zah vang ni miah lo vin, an chawhmeh siam dan kha ka ngaina lo va, ka ei tam ngai lo. Ka nu bai hi ka ngai vawng vawng zel.

Dar 11 a ri tep tihin call ka dawng a. Victora a ni. Ka mu daih tawh nghe nghe.

"Lo phei rawh. Ka muhil thei lo" a rawn ti nghal thawr a.

"Damdawi i ei lo mi? "

"Ei ei.. Ka muhil thei chuang lo"

"I mut a chhuak lo ve hrim hrim aniang"

"A mak, a ni lo. Lo phei rawh. Kan driver ka lo bia ang"

"Victor"

"Eng nge"

"Ka mu tawh. Zanin chu lo tuar ve mai la, naktukah ka lo phei dawn tho lawm"

"Jection ka mamawh alawm, engmahin min chhawk hleinem"

"I mak ee.. Min ngaih vang a ni lo maw? "

"A teuh lo, nang kha tu phiangsenin nge ngai ang che. "

"Anih chuan naktukah ka lo phei ang"

"Kan driver chu kan bia ange" a dah daih. Hmela mai mai chuh!  Ka nu ka kaitho a, ani lah chuan, "Phei mai la" a lo ti sam èt a. Ka tûm vuau mai. Mi mah mutchhuah ve nak alaiin. Rei rial lo vin motor a rawn thleng. Phak chuapin ka phei leh ta. Ka mood a dik hlawl lo.

A roomah ka lut nghal a. A zangthal zanwga muin a lo meng kur a. Rum zetin ka melh a, a lo nui! 

"Engtin mah i awm loh kha, hmela.. Min tihbuai i duh ve hrim hrim anih kha" ka ti nghal hmawk hmawk a.

"Hei lo khawih teh" tih pahin ka kut a la a,  a biang min dehtir a. A lo sa vur mai. Senteii pawh koh ve mai tur ania. Damdawi ka siam sawk sawk a, ka jection a. Kal leh mai ka tum chu ka kutah a chelh tlat.

"Ka mutthilh hma chu tihian thu ve rawh"

"Ka mut a chhuak ve sin. Ninawm" ka ti vin hlak hlak a. Zaidam hmel zetin a nui thung.

"Jenny i ngai em? " ka ti ta thut a. Sawi loh tur tur lah hi ka sawi a.

"Ngai lo. "

"Ka awih lo"

"Ngaihna chhan tur ka nei hleinem"

"I ex anih kha"

"Tu nge ex te ngai reng duh ang"

Ka dang ve ta tlat. A sawi dik phian sia.

"Muhil tawh la a nih"

"Min kalsan suh aw" chu aw phèna min mamawhna chu a ril riau.

"Aw ka kalsan lo vang che"

Ka kut hum run reng chuan a muhil ve ta hram a. Zawitein ka phelh a. Ka roomah ka lut ve ta a.

A ni telin kan innel ve tial tial a, nachhawkna tel lo va a suffer a tawrh theih hun tur te kan sawi dun a, an chhungkaw chanchin erawh pehhel hram kan tum ve ve. Jenny nen an inkar erawh senteiin min hrilh thung. Accident a tawh thleng khan an la inzui a, khatia a nata a chet theih tak lohah chuan Jenny chu a reh ta hmak mai a ni. Chu mawlh chu Victora tawrh theih loh a lo ni a. A rilru leh taksa dam lo chuan a bul hnaia cheng vete thlengin a tina a lo ni. Jenny chu mak ka ti viau. A bialpain a mamawh ber laiin a kalsan thei a nia.

Victora pawh a zia chho ve zel a, kar tin thursday apiangin incheck up a nei ziah a. Hma a sawn tih kan hawnpui ziah bawk. A suffer pawh a zia ve tial tial a,  a hau erawh chuan tawrh a la inzuam chiah lo a ni. Zing tin exer kan la tan ta bawk a, a khel bawr dik loh vanga a ke la hmang thei lo a nih vangin exer lak a mamawh zual tlat a ni.

"Tebawih, bialpa i nei em? " a ti thut a.

"Nei mai mai lo" ka lo ti hlar thung. A nui ruh ruh a, "I thinchhe em a, tuman an duh lo che aniang"

"A pawi ka ti mai mai lo"

"I lawmwwm ee"

"Heiii, naupang chhia angin min cheibawl suh. Nang aiin ka û aw"

"I zak em?  Kei aiin kum 2 in i naupang aw"

Engtin nge maw a hriat le..

Nu Mapuii (ti ve tawh mai ang)  nen pawh kan inbe thei ve viau tawh a. Nitin hian nalh zetin a chhuak deuh reng a, kan inhmu khât em zawk a. Victora chanchin min zawt ngai lo va, ka hrilh ngai bik hek lo.

"Zanin chu ka thiante an rawn leng dawn a." Vica chuan a ti a.

"Tu te.. "

"Ih.. Mama te, sama te ho. An awm nual ang"

"In rui leh ange aw"

"Hei chen ka nghei tawh a, ka tih leh phal i ring a mi? "

"Umm ka ringtawk che lawm"

Chiang zetin kan inmelh tawn reng a. Ka zak deuh.

A thiante chu an lo lut phak phak a, an changkang hlawm kher mai. An rui lem lo bawkin ka hria. Victora chuan min hmelhriattir hlawm a. An fel hlawm angreng viau. Nuam lo an tih ka hlauh vangin ka chhuak ta daih a. An thawm erawh ka hre pha reng.

"Nangni hi in inenkawl rai daih ange aw" an ti lawng lawng a. Ka nui hawk.

"A hma mi te ang kha a ni ve miah lo. A danglam tawp"

"Tak taka Braa, min lo tihpui la, nurse hi ka la ngaizawng miah lo, a chhe lo reuh ka ti.. " tu ber nge ka hre lo.

"Nangman hma la ve mai la"

Ngaihthlak zel ka hreh tawh vangin inhnuaiah ka chhuk ta daih a. An hawn hnuah ka jection a. Ka chhuah dawn chuan, "Tebawih, Sama khan a star che a" a ti ta a.

"A ho" ka lo ti mawl tawp.

A tawng leh ta bawk si lo va, ka chhuak zui ta nghal a.

Sama chuan min lo be ta fô mai. Call leh whatsappah te. Pangngai takin ka chhang ve mai zel a. Ka duh zawng a ni lem lo. A hmel zawng a chhe hran lo. Vica pawn min zawt a. Ka duh loh thu ka hrilh hmiah. Ngaihzawng buaia buai hman ka ni hrih lo.

Thla hnih lai kan inawmpui hnu chuan Victora hmasawn dan chu a awihawm loh zawk, a suffer pawh a tuar dam thei ta. Mahse, khang kan paltlang hun zawng zawng kha thil hrehawm tak a tling ve tho a, ka tlaivar zak zak chang lah a tam. Ani lah chuti bawk, a changin kan inhau a, thinrim hmaisen inhmuhin rei tak chhung kan inbe duh lo va. Kan exercise lak danah pawh luhlul chhuah a chin avangin kan pamtul chang awm fô!  A thinchhiat zualpui thlen lai phei chuan chawhmeh a paih darh a, bang a tauh chawrh chawrh thul. Zan khat phei chu a lo chhuak ru daih a. Engtin nnge a chhuah kan hre lo reng reng. Zan khuaa kan zawn hnuah a thianpa te inah zu an lo in a lo nia. Apa a thinrim kher mai. Kei pawh ka thinrim. Mahse,  ka hna a ni miau si a.

Hei tunah erawh ziaawm lam a pan chho a, a ke pawh a hmang thei tan. Kei erawh ka thu that a, ka rihna a tlahniam hle bawk. Harsatna tam. Tak kan lo hmachhawn dun ani bawk a, victora chu ka ngai em em reng tawh a ni ber. Ka ngaizawng chu ka ti lo, mahse, kalsan te, hawnsan te ka huphurh vek tawh thin. Ani pawh a ni ve tho.

Delhi lamah senteii a chhuk leh tawh bawk si nen, ka khua a har thei viau. Vica hi titi bawrh bawrh chi a ni bawk si lo va.

"Naktuk chu lo phei ta che. I piteii dam lo an rawn hruai dawn sia, ka buai awm em mai" ka nuin a rawn ti a.

"Naktukah ka hawn a ngai a, eng thleng nge ka va cham dawn ka hre lo, piteii dam lo an rawn kalpui dawn a, buaipui an ngai ve dawn sia. Damdawi ei hun leh exercise lak hun te i hre vek tawh bawk a, tha takin i lo inenkawl dawn nia, i pa pawh ka hrilh tawh kha" ka ti a. A tûm hmak. Engmah a sawi tawh lo. Ka chhuahsan thlengin. Rilru nuam lo ru teuhin ka haw ta kha a nia.

Piteii lah a lo serious phian a. Ka hahdam ve hman mang lo a ni e. Damdawiinah ka riahpui a, engkim ka buaipui leh a ni ber. Ka tihtur a ni ve bawk a. Ka nuin in lamah a tih theih ang ang a lo ti bawk a. Zan 2 lai chu ka riak ta. Victora nen kan la inbe miah lo. Ka be chak lutuk, mahse, ka ngam lo. Min huat ka rin vangin. Whatsapp lama a status te chu ka view duh lo lui a. Ka hmu chak tho sia.

"A tel lo chuan a harsa a ni" tih thu a update chu ka view ta hram. Ka hnîm nghal ruih. Keimah min sawi chhan  a ni thei ang em?  Mahse, min be si lo. A online kulh pawn a msg ka dawng si lo.

Ka nuin chaw a lo keng a, ka thlah liam hnuah piteii khum bula thutthlengah chuan ka thu a. Magazine ka chhiar a. Khua a thim ruai tawh a, piteii a la muhil sia, chaw pawh kan la ei lo. Kaihthawh ka hreh bawk sia.

"Lal jenny" ti hluttu te lam chu ka va hawi zawk a. Jenny leh tuai pakhat hi an lo inkuah chung a, kan ward ami tho dam lo an kan ve ni ngei tur a ni. An riahpui dawn pawh aniang, inkan hun a ni tawh si lo va. An tawng ring angreng sia, ka hre lo thei si lo.

"Vica chuan min lo bia a, naktukah ka va leng ang ka tia. Bakah senteii a awm lo va. Nurse a awm lo bawk a" a ti sar sar a. Min hre lo a ni ngei ang.

"Nia, va kal rawh. Tak takin tha leh rawh u, ani pawn chang dang a kan thei meuh lo anih hi.. " a nui har har a. Tuai ho tak hi chu.

"Nia, nizan phei chu kan inbe rei tawp. A rui deuh mawni ka tia, min ngai vel tawp." Ka na zawk thei mawle.. A chhan ka hre lo.

"A dam ve tawh em saw, hmanni deuh khan an kawta a thu ka hmu a, a ke pawh a hmang thei sawlh sawlh tawh a ni awm e. Ni leh ngei ngei ru" ka lo ner nawk mai.

Engvanga lo na ve ringawt nge maw ka nih le.. Hrep taka..

Ka rilru no na chuan runluih chakna min siam a, ka thiam bawk si lo. Victora last seen ka check chhen a. Eng ka ang thei lo. Jenny chuan call a dawng deuh reng a, ka lo chîk ve em em lehnghal. Ka inzahpui.

"Awii hei vica chu min lo call keh tawh" tih pahin a pick up nghal a. Pawnah a va be daih a. Eng nge an sawi ka hre lo.

"Zu a rui aniang, in atangin a chhuak a, a thiante a inlamtir mek" a rawn ti lut a. A hrim hrimin dam lo dangte pawh an awm thup a, an tawng ring sia, midang an vengthawng lo chu ka lo mil lo hman. Victora a chhuak maw?  Kei hian engmah ka hre ve si lo. Zu a rui leh a maw?  Chu pawh ka hre ve leh chuang lo. Hmm.. A nih nih ni teh se.

Zing kar karah Pu Zosiaman min lo bia a, "Tebawih, kan mangang a ni, nizanah pawh a lo chhuak leh a, mama ten an rawn dah hlauh a, tihian ti mai teh ang, i piteii buaipuitu tur chu ka rawihsak mai ang che u, nang eraeh lo haw leh tawh mai teh" tiin. Ka rilru a tibuai ve khawp mai. Ka nu ka hrilh a, kan han rèl tlang a. Mi dang rawih tih vel kha chu kan tlawmngai ve a, kan hnial ta rih. Ka putea chuan riahpui mai se kan ti a, mipa riahpui theih loh a ni ber hi a nia, ka hmelhriat te an tam ve bawk a, kan dinhmun ka han sawi a. Min phalsak ve ta mai a. A tihzia hlauh e.

Victora nen kan inhmachhwwn leh chuan a hmaa kan boruak ang kha a ni thei tawh dawn lo tih ka man thiam nghal a. Biak chakna ka nei bik lo bawk a, ngawi rengin ka sawngbawl tawp.

"Ka tihpalh" a rawn ti hlawl a.

"Tihsual i nei lo" ka lo ti tawi tâk..

"I chhungte tan pawh hun insiam thei lo khawpin ka tibuai che a"

"In rawih lai ka nih hi. "

"Chupawhnise"

"Theihnghilh rawh. Muttui le"

Ka chhuahsan nal nal. Ka hre lo ka awmdan hi. Ka lungawi lo va, ka tau a ni ber mai. Jenny vang a nih loh hram erawh ka beisei a ni.

Zingah boruak ka hip pui leh a. Tiang rinchhanin a bai ve sawih sawih thei tawh. Kan ding ngawi reng a.

"Sama nen chuan intha zel em? " a ti sup a.

"Kan inbe ngai tawh lo"

"Maw.. Tak tak maw.. Ti nge? "

"I bialnu ni lo pui i be reng peih a mi? "

"In ni emaw ka tia"

"I ti lo"

"Ka ti reng, bakah aman a sawi alawm.. Kan tha a ti mai sia. In ni char char emaw ka tia"

"Lo ni pawh ni ila, i buaina tur a awm em ni? Kei pawn i mimal nun ka zawt ngai lo che. Jenny nen in tha leh tih pawh ka zawt tawh che mi? " ka duh aiin ka aw a vin. Makti hmel a pu a, na tuar hmel pawh.

"Ni e, ka buaina tur a ni lo. Ka hria e. Ka zawt leh tawh lo vang che"

" aw le"

Ka kalsan daih. Amahin a rawn inhawl lut ve tawh mai ang chu.

Kan pahnih inkar chu a nuam lo ru ta khawp mai. Tumah chuan tlawm kan tum si lo. Doctor ka panpui ni chuan Hospital kawtah jenny a lo awm ve a. A lo nghak a ni mah ang chu. Kan chhuah veleh a rawn kal vat a..

"Eheh, nangmah law" tih pahin min thlek ang hâw a. Veng khat ta na na na chu min lo hre ve a nih dawn hi.

"Umm.. Nih ve hi" ka ti satliah a.

"Vica hi chhuahpui lawk ka tum a, ka rawn thlah leh ang.. " a aw-a victora s intihneitu zia chu ka hai hlawl lo.

Tehreng mai, kan in lamah tihtur ka ngah sia,  a remchang phian ang, Pa zoa te chu ka lo be mai ang. " ka ti a. Ka theihtawpin ka inti confi lui. Victora min melh rengna chu melh let duh lo vin an pahnih chuan ka kalsan ta a. Ka zawi rawih thei mawle. Ni e, chiang takin jenny hi ka thîk. Hei hi ania ka duh loh em em, lo thleng lo se ka duh kha. Victora hi ngaihzawn ka duh lo.

Kan inah zanriah ka ei nghal a, zan tirah taxi lain an in lamah ka phei leh nghal. An lo la haw lo mawle!  Pa Zoa chu a phi leh ruai tawh. Ka call ta nge nge a.

"Lo hawn a hun tawh viau asin" ka ti a.

"Lo buai suh. Ka mimal nun a nia, i buaina tur a awm lo ve" a rawn ti. Phone a dah hmak bawk. Ka chhing sawk a, ka thinrimzia chu ka thunun hleithei lo.

Ka insawh tauh fe hnuah an rawn hawng a, a roomah an inkuah lut dun., zu rim an nam bawk. Jenny pawh zu te lo inpui reng reng. A hmangaih lo tawp anih dawn hi. A haw hnuah ka va lut a, a meng sen râm a. A thawmhnaw pawh ka thlak duh bik lo, a ti ve thei vek tawh. Damdawi ka pe a, ka jection a. Chhuah nghal ka tum chu..

"Ka mamawh tawh lo chein ka hria, ka pa hrilh la, heta i thawh hi a ngai tawh lo vang" a ti ta a. Ka khur deuh.

"Aw le" tih bakin ka chhang thei lo. Ka tah a chhuak. Ni e, min mamawh tawh lo. Thla thum a tling lek lek tawh a, min hne ta aniang e. A pawi lo. A tha zawk.

Pa Zoa chu ka be ta a. A thinrim kher mai. A fapa chu va biak a duh nghal rum rum a, mahse, ka dang tlat. Engpawhnise, min mamawh huna min lo ko tura inchah chungin a zan azanin ka haw phei ta a.

A tukah senteiin min lo call nghal, an ina let leh turin min thlem a, a lo haw tep thu te a sawi bawk. A û min tawngkhum dan ka hrilh chuan, "Tebawih, ka u rilru a ni lo kha kha. A mamawh lutuk vang zawk che anih kha. Ka sawi thiam lo. Ka u hi i hriatthiam a ngai" a rawn ti lawm lawm a. Ka luhlul ve tlat si. Hmm..

Khua a thim a, a hma kha chuan kan inah haw thin mah ila, nakin lawkah Victora te inah ka phei leh mai dawn tih ka hriatna khan min la tihlim thin a. Tunah erawh ka chhuak hlen tawh si. Ka ngai em em, huat ka duh tehlul nen ka ngaihna hi a buk a rit zawk si. Engvangin nge a danglam tak em em.. Ka piteii avanga ka hawnsan atang khan a intan niin ka hria. A laka ka rilru ang hi a lo pu ve reng zawk nge le.. Ka be ngam bawk si lo.

Dar 8 a pel tawh a, ka phone ri tlang tlang chu ka en a. Victor..

Tîm dái chungin ka la a, "Te.. Khawngaihin lo phei rawh" a rawn ti ta thlawt a!  Vawikhatmah 'Te" tiin min la ko lo. Ka thinlung a dek tlat..lungchhiatnain min tuam nghal a. Ka nu ka hrilh, ka insiam sawk sawk a. Ka chhuak chu a ni der.

A room kawngka chu ka kik a, a reh vawng vawng. Ka hawng a, ka lut ta a. Kawngka hnungchhawn zawngin tukverh hawngin pawnlam a lo thlir a.

"Vic" zawitein ka ti a. A rawn lehhawi rang kher mai.

Thei leh thei lo vin min rawn pan a, ka inrin hmain min rawn kuah thawk mai. Nghet zeta min pawmin ka beng bulah a thaw ham ham a. Kei pawn ka lo kuah let ve.

"Min kalsan tawh suh aw. I tel lo chuan engmah ka ni lo. " a ti a. Ka mitmeiin ka chhang. Ka tawng thei lo. Ka hnuk a ulh zel. Chumi zan chuan apa te hriat lohin a khumah kan mu dun. Sex erawh kan hmang lo. Chu chu kan bultanna a ni.

Councellor te biain theitawp chhuaha nun thar neihtir tumin apa te nen chuan bul kan han tan leh ta a. Inngaizawng kan nih tawh miau avangin engkim a nuam. Thu pawh a awih, a changin kan inhau a, kan nui leh bawk a. Senteii a rawn haw a, a manthiam nghal vek. Pawi kan ti lem lo. Zanah ber hian a buaithlak, a ruka ka rooma rawn kal a ching a. Zan khat phei chu pa zoan min phawk thelh.. Min biak duh vangin a rawn lut a, vica lah khumah puan sinin a lo mu hlun tawh si.

"Pa, ka riak dawn lo ania, ka leng ve lawk anih hi" te kha a ti ta mai mai a. Pa zoa nui hmel ka hmuh chuan ka hahdam huai.

Jenny chungchang kan khel fô. Ka laka a thinrim leh rilru na mangangin a biak leh thu te, engtinmah a khawih loh thu leh keiin hnawl pawh niila jenny kher chu kawp a tum tawh lohzia a sawi. A mamawh ber laia phatsantu kha a ni miau a. A thu sawi chu ka ring hmiah mai.

A hnuihmul leh khabe hmul kan meh fai ni chuan, A nuhrawn a rawn lut ve a. A hnungah nula hleitling ziah zuah deuh a rawn tel ve a.

"Victor, hei hi ka thiannu fanu Puii a nih hi.. Doctor a zir zo chiah a, vanneihthlak takin Falkawnah a thawk thei nghal dawn lehnghal. A pui thei dawn che a, a lawmawm tak tak a ni. Tebawihi pawn hna dang a zawng ve thei tawh ang chu" a rawn ti a.

Kan inmelh reng ringawt.

A tukah Pa Zoa chuan Puii a awm tawh vanga ka hna ka bansan theih tawh thu min hrilh ta a. Nurse mai chauh ka ni a, ka tihtheih hi a tawk zo ta lo aniang e. victoran a hriat chuan nasa theihtawpin a thinrim ta a.

"Kan mamawh ngawih ngawih laiin buai eng ang mah se, sawiselna awm lo vin a rawn kal nghal zel a. Tun ataka inbansantir leh te chu. In doctor sawi ai hian ka ring zawk. A chhuak lo vang' a ti bur nia..

Ka khap thin.. A sawt si lo. "Bawiha, chutia rilru kawi pua chhuahtir tum kan ni lo. A hna thawh leh tur pawh ka zawnsak thlap tawh, ka thianpa Pu Rinliana nupui enkawl turin ka biaksak alawm, amah pawh hian a pawm vek bawk. Tebawihin kan tana a thiltih hi kan hnualsuat reng reng lo, tihian a duh hun hunah a rawn kan thei che alawm.. " Pa zoa chuan a ti a.

"Puii chu doctor ania, Tebawihi chu nurse, an tihtheih a inang lo" Nu Mapuii tawngkam zet chu..

"Nang kha ngawi rawh. Ka chungchangah engmah sawi theih i nei lo" a lo ti tuar. Ka kheuh zawk a. A ngawi ve mai. Kan boruak chu sosang viau mah se, ka tan cham reng a mawi tawh si lo va, hreh zetin ka chhuahsan ta a. Thil tam. Tak ka chah a, kei hian ka thunun thei ber.

"Vic, i dam a ngai, kei hian ka tidam thei lo che. Doctor kha chuan a thei. Lo dam tum la, ka lo nghak reng dawn che alawm.. Ka lo kal zeuh zeuh bawk ang. I dam vat ang tih min tiam rawh" ti zawnga ka biak takah chuan a nèm ve ta hle a. Ka awm a nuam ta huai mai.

Ka chhuah atanga thla khat vel chhung kha chu ka tlawh zeuh zeuh thin a. Hma a sawn tih ka hria. Ka lawm. Kan inngai thei em em a, kan awmdun tawh chuan kan insi reng a ni mai. Puii pawh kan zah zo meuh lo. Puii hi shillong-a awm a nih avangin Victora te inah a awm ve nghal a, ka room kha a luah..

Tunah chuan ke in a kal leh thei ta a. Tiang tel lo vin thui tak a kal leh thei ta. Chaw kan ei chhuak zeuh zeuh a. Palai lo tirh a duh thu a sawi chamchi. Mahse, hna nghet pawh a la nei chiah lo va, han dam fel se, apa sumdawnna lama kal ve a tum thu a sawi thin a.chu chu thleng phawt se tiin thu kan tithlu a ni.

Ka nu in rilru a thlak ni maw, Hna nghet dil ve turin min tur chho a, Pu Rinliana te inah khan ka thawk leh ta lo va, ka peih loh vang a ni pakhat. An nu kha chhul tha lo a ni a, enkawl a hautak sia, damdawi in lama indah lut turin thu ka ráwn ta zawk a ni. Hna chu ka han dil ve leh ngial a. Vanneih asiamin ka hmu ve ta. Sawrkar hnathawk chu ka ni ve ta reng mai. Kan hlawh erawh a la chuti lua lo. Hah erawh ka hah ta deuh. Vica nen pawh kan inhmu khât ta hle. Biak erawh kan inbe reng tho a.

Ka lu na bûr chu tawrh a hrehawm ta hle, nachhwwkna ka hmawm ta ringawt a. Min chhawk hnu chuan whatsappah ka lut a, vica msg ka hmu lo. Mak ka ti deuh. Kar khat liam ta atang khan ka biak hmasak loh chuan min biak a tum tawh ngai miah lo. Kei lah ka buaiin ka hah ve thin sia.. Ka lo be reng hman bik lo nen. Kan inkar chu a hla ta riau hian ka hria a. Ka call a, a switch off. Msg ka hnutchhiah ta tho va.

Ka lo muhil tlang daih a, a tukah pawh a msg ka dawng chuang lo. Ka mood a chhe hle. Ka nu chuan min lo chîk bawk aniang, min zawt ta chat reng a. Dawt ka sawi hram kha. Hnaah ka kal a, ka engtih mah a tui hrep lo ve.

Mood off nak alaiin ka haw tur leh vica leh puii inphur ka hmu zui!  Min hmu ve reng, min hre awmin a awm miah lo. A va mak em.. Eng nge maw thleng ta le..

Zana ka thu hriat chuan nasa takin min tina a ni. Victora leh Doctor Puii an innei dawn.. Kei chu ka chhe ta vek mai. Ka tlaivar thak a, a tukah ka khuasik hluah hluah, ka nuin min vil reng a. Khawsik chungin hnaah ka kal hram. Ka tawng peih lo va, keimah chauha awm ka duh a ni. Engtin nge a theih?  Engtin nge hetiang hi ka chungah a tih theih?  Victor, a va mak em.. Hun harsa zawng zawng kan paltlang dun a. Hei hi maw min rulh letna chu.. Tah vak mai ka chak a, ka tap hleithei bawk si lo.

Zanah ka nu bulah ka sawi ta nge nge a. Makti hmel pawh a pu lo. "Ka rin lawk reng a ni. Mipa leh hmeichhia thisena inzawm lo nafam chu an innawk thlawn reng lo vang tih hi" a ti hmiah mai. Mahse, mak ka la ti tho. Min phatsan theih ka ring lo asin. A thutiam zawng zawng te kha..

Ka insum thei ta ngang lo va, msgin ka va be ta nge nge a. A seen a, min reply eih lo. Hmm.. Min lo duh tawh lo takzet a nih dawn hi. A tawk e. A tawk..

"Vic, mak ti hle mah ila, na tiin hrehawm ti ngawih ngawih mah ila, min phatsantu i nih avang hian ka hriatrengna che hi damkhawchhuahpui ka lo tum tawh ang e. Mang tha hlen tawh le" tiin ka thutawp chu ka va thawn a. Ph ka dah a. Ka inlukhup a, ka tap ta zawih zawih a. Ka thawl hawk mai.

Min tawk zawnga lo kal mek te chu biruksan ka va châk tak em.. Khawiahmah pumpelhna a awm si lo.

"I dam maw?  I va rawn leng khât tawh ve,.. Taka card pawh kan lo thawn tawh kha aw" Puii chuan a ti siam siam a. A hlim hmel chuan mi run takzet.

"Nia, i lo kal ve ngei ang chu tiraw? " Vica..

Ka mittui a tling kiau ang tih ka ring, tla lo tura inhumruh chungin, "Nia.. Tehreng mai. Ka lo tum dawn nia" ka ti a. Ka kalsan nghal. Victor leh..

Chaw ka ei peih lo va, ka chau tho bawk si. Ka nu a rawn kal, min lainat tih ka hria. "Naute, hetiang tur hi chu a ni lo asin.. Mi chak tak i nih kha. Ani lo pawh i la hmu dawn lutuk" a ti a. Ka en ngai ka en reng ringawt.

An inneih hma ni chiah in Pa Zoan min lo bia a, Puii thiana ding turin min rawn ngen! A thian tura an tih kha rokhawlhna a neih leh thut vangin min rawn ngen a lo nia. Ka tap tawp. Heti em em zawng Lalpa.. Ka tuar zo tawh lo.

Min lo call reng hlawm a, Puii ngei pawn. A thawhpui te pawh hman ve mai awm. Kei kher kher. A pasal tur nen kan lo inkawp tawh thin tih a hre reng sia. Min va hmusit tak em.. Mahse, ka nuin, "Chuti khawpa ngentu che chu dinsak mai rawh. I chak tawkzia fiahna tur a nih kha. Ka fanu i ni a, i tithei tih ka hria". A ti a. A tawp nan Victora tan ka tihtheih hnuhnungber ka ti leh dawn ta. Ka ti em em ang.

Zingah min lo hruai a, Senteiin min chei vek. Ka hlim lohzia hretu awmchhun a ni ngei ang.

"Thil dik lo a awm aniang, ka û hian engtin nge hetiang hi a tihtheih ka hrethiam lo" a ti tawp ringawt. Engmah sawi tur a awm tawh lo..

Biak in dar a ri val val a. Mitthi dar ri ang maiin ka bengah a ri a ni. Ka thaw hawk a, ka chakna la neih ve beithamtè chu sawmkhawmin ka ding chhuak a. Kawngka bula victora lo ding chu mittui parawl kiang chungin ka melh vawng vawng a. A mitmengah chuan maktihna leh eng emaw inphûm a awm. Min hmangaihna zawng zawngte kha a bo ta vek em ni?  Puii chu a nalh takzet. A bula ding nih pawh a inthlahrunawm. Inneih thutiam an chham lai chuan ka lo thaw dèp dèp a. Ka kut ka hum ruh nasatzia chu ka hah vek thei.

Thlalak chhungte chu a rei ngawih ngawih. Ka hne. Ka chau. Ka luak te a chhuak. Zanah erawh hotelah an riak dawn a. A zia e. Ka haw a. Ka intifai a. Ka mu hmak. Mumang te pawh a ang zawk a ni.

Thla 3 a liam ta. Victora ka ngaihna erawh a la kiam eih lo. A nun a hlim viau aniang. Ani zawng, a reh vang vang mai si a. Ka nu chuan min en ngawih ngawih zel. Min lainat tih ka hria.

"Pasal chu i va ne har si ve" tih thu hi a hnen atangin ka dawng nawlh mai.

"I va hmanhmawh ve" ka ti ve hmak.

"I nu kha a hmanhmawh sia ka ti mai mai mawle"...

"Eng a?! "

"Min lo sawm ve rawh aw.. "

"Victor, ka nu chungchang hi sawifiah rawh"

"Amah zawt la ti nia. Min phatsan lo niawm taka i mittui lem lutuk luantir reng lo khan" a tawngkam hi a na thei sia..

"Anih tak chu. Nang anga phatsan hmang ka ni ve lo. Mi pasal i ni tawh a. Min lo be tawh suh"

Ka haw veleh ka nu ka zawt nghal. A ngawi reng a. Ka zawh sek sek avangin hreh hmel zetin a sawi ta a.

"Mate, i nu hian ka tidik lo hle tih ka hria. Min ngaihdam theih pawh ka ring lo. An in atanga i chhuah hnu lawk khan a nuhrawn a rawn kal a, a fapa tana i tlin tawk lohzia leh i that twwk lohzia, neihtir che a tum lohzia te leh puii neihtir a tum thu min rawn hrilh a. A tirah chuan fuihpawrh che ka nâp hial a. Mahse, ka chapo vena te avang khan tlawmah ka la a. An fapa tana ka phal bik lohzia che te ka hrilh ta hmiah a. Tin, in inthen ngei tur thu ka tiam bawk. Tichuan, vica ka ko va, i pasal tur ka hualsak thu te, in inkara inrawlh lo tura ka duh thu te ka hrilh ta a ni. Kha kha ani mipa inti tan chuan a na lutuk a, a tlawmthlak bawk a. A nuhrawn duh ang ngeiin a kal ta anih saw"

Ka nu chu ka melh tlawk tlawk ringawt. Chumi zan zankhua chuan tuman min be tawng zo lo.

Mahse, ka ngaihtuah a, a tlai tawh. Inneih thutiam an chham lai chiang taka hretu ka ni a. A harsa lai ber ka tuarchhuak tawh. Mi dang tihnat tel leh kher hi a tulna ka hre tawh lo. Ka nu pawh demna ka nei lo, a mizia ka hria. A tihtur dik tak a ti a ni. Tu nuin nge khatiang thu dengkhawng kha palzam thei bik ang. Mahse, victora nen kan inhmangaihna kha a der a ni lo tih eraeh an hre lo a ni.

"I nu chu i zawt tawh maw" a la rawn ti. Engah nge maw min rawn biak chhen le..

"Aw.. Tihdik loh a nei hleinem" ka ti hmak.

"Anih chu.. " tih chiah a sawi. Mahse, ka la nula reng dawn si a. Thup theih loh hun zawng a la awm ngei ang.

"Te,.. Thudik ka hre tawh. Senteiin ka nuhrawn leh puii nu inbiakna a lo hria a. Engkim an lo plan vek. Puii leh ka nuhrawnte hi cousin an nia, ro chungchangah an buai loh nan kei hi min lo hmang alawm.. Te, a tlai tawh tih ka hria.. Eng nge ka tih ang? "

Victora msg chu vawi 10 ka chhiar chhuak. Chhan ngaihna ka hre lo. Engkim a tlai vek tawh si a. Mahse, ka hmangaih a ni. Ka hmangaih èm èm..

In chawh 😌😎