Mangchhia

MANGCHHIA… 

Ziaktu: Toni Da Rälte ('Da' hi telh tawh rawh min ti sia)  

"Pa, lo hawng ru, khawngaih takin.. Ka awm peih lo.  Ka ning ania. Ti nge hetia min khungbeh tlat a? " an fanu au thawm chu an nupaa inmelh vawng vawng chungin lungchhe takin an ngaithla a, an kalsan hla ngam chuang si lo. Lung bangin a hual vel, tukverh pawh awm, room thim zeta an fanu neihchhun khungtu te hi an nunrawng viau nge chhan tha tak a awm zawk. Chu chu an nupa thurûk a ni tlat! 

Anu nen chawhmeh leiin an bazar a, anu lah hi lei tur a hre si, a thil khai chu a rit tan riau, "Nu, a tawk tawh lo maw? " a ti a. Vawksa an lei leh hnuah an haw ve thei hram. A bike a hun that lai chuan, an in lam panin tleirawl pahnihn an lo kal phei a. 

"Apuii a awm em? " tiin an rawn mawl biak deuh tawp!  Apuii chu a farnu a ni. "Aw awm ang" a lo ti tha ve mai a. Tleirawl pahnihte chu an inah an lut zui nghal. Pakhat khan a mit a la angreng. Pakhat zawk kha chu a hmu fô tawh a, a hming erawh a hre lo. 

In chhung a zu luh ve chuan a nau chuan an chawhmeh hawn chu a lo remfel mek a, a thiante chu a be pah mawlh mawlh bawk. 

"Zing kar karah note hawh tura lo kal, a va pawimawh tak" a ti a. A nui bawk a. 

"Kan walk zo kan rawn peng kawi pah alawm. A remchang em a' pakhat chuan a lo ti var a. A nau class kalpuite an ni tih a hai lo. A mit latu zawk khan a rawn melh ve zauh zauh tih a hria, Sam dum hlap a nei a, sang takah a tawn kawh a, ria chum bat mai, a vun chu a var mah mah em tih theih deuh tur a ni a. Ti sen a nei vak lo niin a lang. Mahse, a hmel pawisawi lo zet leh zahzum hmel tak, a mitmeng cool raih leh a hmui sen hiam chuan mipa mit a la lo thei lo ani mahna. A hmel tha tihzawng tak a ni tlat. A nau note an hawh zawhah an chhuak zui leh ta mai a. 

"Apui, i thiannu pakhat zawk kha ka van hmu ve ngai lo, tu nge a? ' a ti ta nge nge a. 

"Hiihi, i star chiang, Zomuani a nih kha, Shillongah college a kal a, a hriselna lam a chiang lo aniang, kum laklawhah hetah class a rawn zawm ve a.. A fel lutuk' Apuii chuan a ti siam siam a. 

"Star hran lo, ka hmu ngai lo em a ka ti mai mai" a lo ti ve mai a. Mahse, Zomuani hming chu mawi a ti lehzel mai. 

"Nu Sawm, Khaw nge Remlala hi " a inthiar lai chuan a thianpa Tea chuan a rawn ti lut bawrh bawrh a. A inthiar zo a va chhuah chuan, "Vawiin chu min lo pui ve lawk mai teh. Dawr chu nghak lo mai rawh, hlawh ka pe ang che. Ka room rawng hnawih a ngai" a lo ti nghal a. A ngen ngawl angreng sia, dawr chu a khar rih phawt dawn anih awm chu.. 

Remlala te chhungkua hi an rual angreng a, A pi a la dam a, unau paruk an ni a, an upa ber chuan pasal a nei tawh a, a nau chiah erawh nula senior ve thawkhat tak niin a la nula a, a dawtah Remlala hi niin ani pawh a la single. A nau chiah mipain nupui a nei tawh thung a, an chengho. Fa pakhat an nei ve mek a, chumi nau leh mipa erawh a putea te bulah a cheng kual tam zawk mah a, M. Sc (phy)  a zir ve mek. An te ber Apuii hian college a la kal ve bawk a ni. Remlala patea pathlawi an awmpui bawk. An inngeih tlang a, an zahawm riau. Hausa le lu lo mah se, an taima tlang a, mi te neih ang chu an nei ve thei zel mai. Remlala hi a graduate tirhin accident a tawk a, rei tak a bawksawp a. Zirna pawh chhunzawm hleithei lo vin a hun a hmang a. A dam ve deuh tak hnuah Apa puihnain stationary dawr a hawng ve a, veng hulum lai takah a awm bawk a. A hlawk ve phian mai. 

Tukthuan ei khamah a thianpa room rawng hnawih tur chuan a phei ta a. Tea nen hian tette tanga inkawm an ni bawk a, unau ang chiahin an inen tawh a ni. Tea hian nupui a ru ve zuai a, chhungte avangin an inrem thei ta lo va, tihian a thlawi leh ta vel mai mai a ni. Remlala pawh kum 32 lai a ni ve tawh a, nupui neih hun lo a ni miah lo. Ngaihzawng chu a nei ve zul tawh a, han. Neih. Tak tak atan hian a iai leh thin nge a tu amah a thutakpui rei thei lo a ni ber e. Tlangval lian thelh thawlh tak, khabe phir taih mai, ngo lam deuh a ni a. Ama tawkah a luck ve viau. Tea room chu in hnuaiah a awm a, rawng chu an hnawih dun mawlh mawlh a. 

"U, thingpui" Tea farnu Siami chuan thingpui a rawn chawi a, a hnungah tukina an ina lo kal tleirawl a mit la deuhtu khan thingpui hmeh kengin a rawn zui ve. 

"Siami thianu kha a chhe lo ka ti"  Siami te chhoh hnu chuan a ti nghal thawr a. 

"Saw kan thenawm lawkah sawn an awm alawm. Amah hi mizoramah a awm tam lo èm a. Zomuani a nih kha. A la naupang deuh ang" a lo ti var a. 

"Tleirawl tete hi an tha zawk.. " 

"Ka lo sawi dawn mi"

"Ngai lo, ka che ve mai ang. A number lo nei la a ni mai" 

An in hrechiang dun tawh bawk a, an sawi zui tawh lem lo. Remlala mitthlaah erawh a hmel pawisawi lo zet kha a châm reng mai. 

Zomuanawmi chu khumah a let a let a, kum 18na a hmang ve mèk a. Ngaihzawng pakhatmah a la nei lo. Mahse, a thiannu Apuii û a hmuh khan amahah danglamna a awm ve tlat!  A nui hmel te chu a mitthla zut zut reng mai. Kum 10 anih atangin Shillongah a patea te bulah a khawsa a. A chhungte ngai viau thin mah se; thiannte avang in hlim takin a hun a hmang ve thin. Apatea ten an duat bawk a. Mahse, kumin kumtir atang khan a hriselna chu a tha lo chho riau mai a. Chaw a ei hlei thei lo va, mut a hmu tha thei lo bawk. An inentir pawn Doctor te pawn tih vak ngaihna an hre lo, vitamin te an chawh leh tawp zel a. Mahse, college chu a kal lui ve zel tho a, nikhaw hre lo va tluk zeuh zeuh te, a luhai nasat vanga luah vak te a ching chho a. Apa te an lo chhuk ta nge nge a. Thu tam sawi lo vin Mizoramah an hawnpui ta kha ania. Kum laklawhah collegeah an in admit ve leh hnuhnawh a. A tirah chuan thian a nei bawk si lo, hrehawm a ti ngawih ngawih zel. Mahse, a rei lo, Apuii te thianho nen an intawng ta a, Siami ngat phei chu an thenawm. Lawk a lo ni bawk a. Nuam a ti chho ve ta phian. 

Unau pathum an ni a, a u mipa hi Engineer zirin phaiah a awm a. A nau mipa tho te leh a nu leh pa an ni mai. A pa hi Department pakhatah Director ni lai a ni a. An khawsa thei thawkhat. A hriselna pawh a zia chho ta deuh chuan a hria a, mahse, damdawi a nghei chuan a rawn chhuak leh dawn dawn zel a. A natna ber lah an hre thei si lo. Apa pawn inentir tawh loh mai a rawt ta hial a nih kha. 

October thla khaw nawm hun lai ber a ni a. Zomuani inbual zo chu zai pah rát rátin a inthlak a, darthlalang hmaa a han ding to chu mawi a inti ve deuh nge a inen ngun khawp mai. A inthlak zawhah a phone chu a han hmet eng a. Whatsappah a luh chuan number save loh atangin msg a dawng. 

"Zomuan, keimah Apuii Û Remlala" tih hi. A phu zawk. Chhan dan tur a ngaihtuah vang vang a, "Umm le" tih teh tawpin a chhang. A lai lutuk tlat. Zanriah ei hma zawng an intext ve ta ngat ngat a. Mahse, thu ho tete bak an sawi lo. Remlala tak pawh tlangval thankin mah nise; a lai ve dûk nia!  Mahse, Zomuani'n a rawn reply ve zel avang chuan beiseina neih pawh sual lovin a hre ta a, a lawm viau tho. 

Zomuani te pawn zanriah a ei ta a. Ni dang ang lo takin a nu leh pa chu an ngui nghiai hian a hria a, "Dik lo a awm mi? Nu" a ti sap a. 

"Awm lo ve. Ngati nge" a lo ti há a. 

"Apa nen hian in ngui tawp" a lo ti ve mai a. 

"Ka nuamsam mang lo va, chuvang aniang. I pa chu a chau ve deuh anih dawn hi' a lo ti thliam a. Rilru nuam deuh in chaw chu a ei chhunzawm ve leh ta a. 

Thla chu a eng hle. Thla bial zan a ni nghe nghe. Zomuani chu a roomah movie a en a, ear phone a vuah bawk a. A khat tawkin a phone a hmet leh zeuh thin. Remlala khan a rawn biak leh tak mialin tiin. Zak thei lo a inti ru hle. A thiannu u a la ni zui!  A nu leh pate a rooma an lo luh chuan a thu chhuak a. 

"Mate, hawh lo kal teh" tiin a pa chuan a kai tho a, a ngaihna hre lo zetin a zui ve ringawt. A pa mitmenga nuam tih lohna lo lang pawh chu a hmuthiam ve vek. A pa te chuan in hnuai lamah kai thlain, an store roomah an luhpui a. A bo telh telh. Store room kil lama Almira chu apa chuan a hawng a, almira chhunga hmehna lo pawng chhuak chu hmetin kawngka dang a lo inhawng ta phak a. Room lian lutuk lo, tukverh engmah awm lo a ni a. Chhuatah dunlop a inphah a. Sin tur niawm tak rizai tumtel a lo awm bawk. Tui bottle a inhung bawk a. Chu bak engmah a awm lo. 

"Hetah hian zanin chu i riak dawn a ni" apa aw chu a ri chang chang ringawt. 

"Eng a?!  Engvangin? ' a ti hû a. 

"Naktukah ka hrilhfiah ang che. Ka thu awih la, riak phawt mai rawh" a ti chang ta fak a. Anu a va melh a, lainat hmel zetin a lo melh let. A ngaihna reng a hre lo. Engvangin nge he room ruak lutuk leh phui lutukah hian zan chu a tumtawi ngawt ang. Eng nge a chhan?  Tia a ngaihtuah buai lai chuan a nute chu an chhuak nalh a. Kawngka an kalh ri khep bawk. Rang lutukin kawngka chu a va chum a, a rak tuar tuar bawk. Kawngka lehlama ding ngawi rengte chuan mittui tling pam chungin an chhuahsan ta a. 

Dunlop chungah chuan a thu hnawk. Zawhna chhiarsen loh tam tak a kawl tûn!  A mak em mai. A tap ta ringawt a. Lungchhe taka a tah hliam hliam lai chuan kawngka chu a rawn inhawng a, kho niawm tak hi anuin a rawn dah lut a. A kal leh nghal. Kho chu a va hawng a. Vawksa hring a lo awm nia!  Mak a ti telh telh. Puithuna eng emaw vang em ni ang? A tah pawh a chhuak leh tawh lo. Mutchhuakin a zem chiai chiai a. A muhil ta. A mumangah chuan ramhnuaiah chak zetin a lo tlan a, thingte chu a thlawh khum ziai ziai mai. Mahse, a kalna kawng chu lengkir sang takah a tawp ta tlat mai. Hnunglam a hawi let a, ramsa hlauhawm pui pui hovin pawhsawm vek tumin an lo um mek si. Mangang zetin a hawi kual a, an rawn hnaih tawh em vangin thih leh thih tiin lengkir sang takah chuan a zuangthla ta vawn vawn a. Tuiah a tla ri burh. A harh zawk mai. 

A thlanin a lo bual huh hnèp a. Room chhung chu eng deuh riai a. Hlauhna mak takin a rawn tuam nghal. Mahse, chu aia rapthlak zawk chu a chungah a lo thleng ta tlat. A taksa chu a za nuai nuai a, awmngaihna reng a hre lo. A lu a hai chiai chiai a, a kut leh ke te chu a insangmar teuh a, a taksa chu lian ta riau hian a hre bawk. Chutah a ban a zuk en nak chuan a hmul te chu an lo tho sung a. A kuttin te chu an rawn dawk chhuak pur mai. A hmai erawh a hmu thei miau lo va, danglam zawng a awm chiang. A ha uingho chuan a heh chu a rawn tawn mar ta pung mai. Hlauthawng takin a ha chu a khawih a, a rawn dawk chhuak vung mai. Râp zetin a rak tuar tuar a, a tal awrh awrh bawk. Namèn lo vin a ril a tam a, a ding chhuak a, pai khat khat chungin kho-a vawksa hring chu a hap ta bawrh bawrh mai. Sa thisen te chu tui ti takin a liak hlap hlap a. A hawi hruk hruk a, bang chhak lama light bulb eng lutuk lo chu a han zuan dawrh a, a beng keh chhuai mai. A thim ta vek a. 

Remlala chuan a phone chu a bih vang vang a, msg khati zozai a thawn tawh hnua a seen loh danah a muhil tawh emaw a buai emaw a nih a ring. Zomuani hmel chu a mitthlaah a rawn lang nawn leh thin a, a ngai veng veng nia!  A bialnu pawh la ni hawt lo chuan.. A nui suk a, "Ka bialnu zawng i la ni dawn chiang" a ti sap a. A phone chu dahin mutthilh tumin a chhing ta vang vang a. 

Zomuani Pa Pu Dinga chuan ding takin an pindan rûk chu a pan a. A rilru a hah hmel takzet. A fanu chu engtin nge a lo awm ang tih a ngaihtuah thiam lo. A thi ang nge a dam ang tih a hre lo. A tawngtai ru mawlh mawlh a. Kawngka chu a hawng ri rak a. Room chhak lama saruak ngal ngata a fanu neihchhun lo let ngât a hmuh chuan a nghing dawt mai. Hmanhmawh zetin a va pan a, a thawmhnaw lo let phung chu a chhar khawm a, a fanu chu a khuh tha ta thuai a. A nupui rawn lut thawm hriain, "A thawmhnaw hi va haktir rawh" a ti a. 

Chawhnu dar 1 bawr velah Zomuani chu a rawn meng diar diar a. A hawi kual a, a mutna chu a ma room kha a lo ni tawh. Nizan lama thil thleng kha a mumang emaw a ti hman. A rawl thûm a, a taksa pum chu a chet zawng chuan a na zawk zawkin a hria. A room kawngka a ri rak a, a nu leh pa te lo lut a hmuh chuan a mu tha leh thuai a. A khumah chuan an rawn thu ve a, a nuin mittui tling piau chunga a melh reng lai chuan, "Nu, engvang nge" a ti tham chhal a. Apa a melh leh a, an mitmenga amah khawngaihna leh lainatna lo lang chu a hmu thei, mahse, engvanga chutiang mitmenga melh ngawih ngawih nge an nih tih a hrethiam lo. 

"Bawihte, tunah chuan kum i tling tawh bawk a, thudik hrilh che hi a hun tain ka hria" Apa chuan a aw a thian kharh a. 

"Ni e, bawihte, uluk takin i pa thusawi hi lo ngaithla rawh aw" anu chuan a lo ti ve a. A inpeih nia an hriat takah chuan, Apa chuan a aw thian leh kharhin rei tak an nupaa an lo up tawh thurûk rapthlak tak mai chu a sawi ta a. 

"Kum 4 mi lek i nih lai khan nasa takin i dam lo va, Mizoram Doctor ten tihngaihna an hriat loh vangin phai min refer ta tawp a. Kan fanu neihchhun i ni a, theihtawp chhuaha i nunna chu chhanhim kan tum a ni. Vellore-ah kan hruai che a. Thla 3 chhung zet kan zuk awm nghe nghe. Test hrang hrang hmangin an en kual che a, i natna an hre thei si lo. Kan beidawn lek lek tawh hnuah German Doctor lar tak pakhat a rawn lang hlawl mai a. Doctor dangten min rawn angin chu pa chu kan panpui ta che a ni. 

Chu Doctor chuan theihtawp chhuahin a han test ve ta che a. A tawpah natna rapthlak tak, Khawvel mihring 100-a 3 vel chauhin an vei theih, "Lycanthropy" natna i nei tih a hmu chhuak ta a ni. Chu natna chu amah ngei pawn a vawikhat hmuhchhuahna a ni a, a zir nasa thin khawp mai che. I natna a rawn chhuah chang chuan, ni eng i hlau a, i hmul te rawn to seiin i ha te a rawn thang thut a, i taksa insangmarin a rawn lian a, thisenah i tuihal thin. Mahse, khatihlai khan naupang mai i la ni a, a lan dan tur angin a la langchhuak lo zawk a. Doctor chuan theibtawp min chhuahpui a, a thian hetiang lam natna zirchiang zual te a rawn bawk a. A dam hlenna damdawi hmuh chhuah a la nih miau loh vangin i taksa a puitlin tak tak hmaa thunun thei tur che damdawi min dapsak ta a. 

"Kum a tlina a taksa a puitlin hunah chuan he damdawi hian a vengin a thunun thei tawh dawn lo va, amah leh amah a inhneh a ngai a ni tawp. Anih loh chuan mental hospital lamah in dah mai a ngai ang. Enkawl in inzuam loh chuan ka kutah in dah thei ang, enkawlna tha tak pe chunga zir chian ka duh a ni" tiin Doctor chuan min hrilh a. A offer pahnih chu kan hnawl ve ve. Kan fanu i ni a, kan damchhung chuan Mi â dahna hmunah i awm kan remti lo, chutiang bawkin kan hriat ngai pawh ni lo, hnam dang lehnghal kutah kan dah phal bawk lo che. Enkawl tur chein thu kan titlu ta a ni. 

I damdawi chu i hria ang a, thla khata vawikhat i injection ziahna kha a ni. Nang leh mi dangho chuan i tetlaia i dam loh vak vanga jection la thinah an ngai chein nang pawn i ngai anih kha. Kha damdawi khan tunah chuan i taksa a thunun zo tawh lo va, thla bial emaw thla en zual zanah chuan i natna khan i taksa a thunun zel tawh dawn a ni. Nizan kha kumina thla bial zan dangah room teah kan dah ve loh che tih zawhna i nei maithei. Thla bial zan zan tinin i nu nen hian tlaivar zakin i room pawnah hian kan ngaichang thin che asin. Kan beisei leh duh ang ngeiin kumin chhungah chuan tlema danglamna nei deuh mah la, kan hlauh em em ang kha a la thleng lo va, mahse, Hmanni lawk khan Doctora nen kan inbia a, nizan kha i tana hun hlauhawm leh i natna rawn lan chhuahna tak tak hun a nih a rin thu leh fimkhur turin min rawn chah a. 

Shillonga i awm chhung zawng pawh khan i nu nen rilru nuamin kan awm ngai lo. Kum i la tlin lohna khan min thlamuan ve tho mah se, accident thleng thei anih miau avangin kan hlauthawng thin. I patea kha chu engkim ka hrilh vek a, ani khan kan aiawhin a vil reng thin che a ni. Mahse, i taksa a puitling ve tawh aniang e, i natna chuan a rawn thing tan ta che a. Kan hmuh phak loa i awm kan phal tak loh vangin helamah kan hruai chho ta che a ni. 

Bawihte, a thawng lutuk che tih ka hria, mahse, i lakah zep neih ka duh lo. Hre ve la ka duh a ni. Chuan, i nu nen kan pathumin kan tang rual anga, he natna anchhedawng hi kan hneh em em ang. I piangsual lo va, natna chi khat i vei ve a ni mai. I hneh thei, hlau suh aw.. Engkim a tha vek dawn alawm.. A damdawi pawh an hmu chhuak tep tawh ang" 

Apa thusawi zawng zawng ten a shock zia chu Zomuani hmel hmaiah chuan a langsar nghal hle. A dâng sáwp sâwp a. A kut a humruh tlat bawk. A melh ngai a melh tlawk tlawk ringawt mai a ni. 

"Bawihte, khawngaihin hrethiam rawh aw.  Kan hmangaih em che vangin nizanah khan kha roomah khan kan dah ta ringawt che a ni. A chhan chu i taksa kha thunun zo lovin in atang ten chhuak la, tu emaw nunna i la hial mai thei.. Chu chu i duh lo tih kan hria.. I hrethiam ang tiraw? " anu chuan a rawn ti dam thlap a. 

Zomuani chuan a heh a pet fan fan a. A mittui luang ngiai ngiai chungin, "Warewolf maw ka nih a? " a ti hrâwih a. Tap lo tura a insum hmel chuan a nu thinlung a dek ngang aniang, a kalsawn a, tukverhah a va dak ta daih a. 

"I ni lo, warewolf i ni hauh lo. Nakinah nangmah ngeiin i natna hi i la zirchiang dawn nia. Ramsa i ni lo, bawihte, natna i nei chauh a ni" Apa chuan aw khur lek lekin a lo ti vat a. A fanu lu chu a chul hliau hliau a. Zomuani chuan engmah a sawi tawh lo. A thin tawt lutuk avang chuan a âmai dawnin a inhria. 

A nu ten an chhuahsan dawn chuan, zawite hian, "Engvangin nge min thihtir mai loh? " a ti sap a. An ding chawt. "I thih kan phal lo. I thi dawn lo. Thihna lam chu ngaihtuah lo hram ang che aw" Apa chuan a rawn ti a. A ngenngawl takzet a ni. 

Remlala pawh a dawrah a buai map map hle. Phone pawh a khawih hman meuh lo. Bungrua a lo thleng thar bawk nen. Apuii te class bang an rawn peng kawi a, a tel ve a lo beisei ruk hmel a hmu hauh lo. A hnual rawih mai. A msg a la chhan loh fo vangin a be zui tawh bik lo va, a lo ning viau te pawh a ni thei tih te a ngaihtuah a. Hmuh leh erawh a chak khawp mai. 

Zomuani chuan zanriah pawh a ei peih lo. A pum lah chu a na riai riai reng mai. Mahse, a pain damdawi mum a rawn pe a, a ei a, kaw thuahna a ni maithei. A va inthiar a,  a thawl ta hawk. A vawksa hring ei kha a ni mahna. Mahse, vawksa hring a ei tih a inhre leh tawh miah lo thung. Apa thusawi te kha a bengah a ri nawn awn awn reng a, eng dang mah a ngaihtuah thei thlawt lo a ni ber. Warewolf tih hming a ngaihtuah zawng ringawt pawn a khur thei a ni si a. Rapthlak a va ti em.. A phone ri ral ral chuan a ngaihtuahna a ta a rawn kai harh a. 

"Hello" a ti sap a. 

"I va reh ve. I dam tha lo nge i buai? " lehlam ami chuan  a rawn ti a. A chhing sawk. Remlala hmel nelawm leh zaidam hmel tak kha a mitthlaah a rawn lang zawk a. A tah a chhuak. 

"Nia ka buai ve deuh a" a ti ve mai a. A insehruh nasa hle. 

"Ka msg i seen thei bawk si lo va, nilengin i reh leh bawk si nen, min hua a nih ka ring mah zawk a" 

"Haw lo ve.. Ka.. Ih, ph ka la khawih lo reng reng a"

"Anih dawn kha.. I hman hunah ka msg kha lo chhiar la aw" tiin Remlala chuan a dah ta a. 

Remlala msg chu a han hawng a, "Ka ngainat zawng tak i ni a. I duhawm bawk. Ka vei tlat che a. Sawi loh tha zawka ka hriat hnuah sawi leh mai hi ka duh zawk a"

Tih te, "I mu tawh mi?  I van reh em em.. "Tih te a ni nual. A thinlung chanve chu a lawm ru em em, mahse, lehlamah erawh a ná thung. A natna avangin. Hetiang natna nei te chu tu chuan nge ngaizawng duh ta ang?  Pasal pawh a nei ve thei dawn em ni? Dam pawh a dam rei lo vang. Remlala hi ani pawn a hmuh tirh atang khan a vei ve daih tawh. Mipa a star vawikhatna a ni hial ang. Nizan thil thlen hma kha chuan hmalam hun hlimawm tak te a beisei in a suangtuah ve anih kha mawle.. Tleirawl khawngaihthlak.. 

"Kei chu duh tlak ka ni ve lo" tiin Remlala chu a chhang a. 

"I ni" a rawn ti teh ngawt a. A inrin loh laiin a nui hawk. 

"Min hrechiang lo anih kha" a va ti ve leh a. 

"Ka hrechiang zel mai dawn che lawm.. " 

A chhang ngam tawh lo. A hnar thei dawnin a inhre lo a ni. 

Class pawh a tan ve leh ta a. Natna rapthlak tak a nei tih a ngaihtuah apiangin a ngui nghal vek thin. Tleirawl hlim ve thei tak a nih vei nen, a thiante pawn a mize dang ta lutuk chu mak an ti a, zawhna an nei hial. "Ka dam tha vak lo va" a ti mai a. Engkim a hrilh thei si lo. 

Remlala nen pawh an inbe leh nge nge zel a, a chhang lo phal bik si lo. A ui thlawt.. A nei thei dawn chuanga a inhriat loh vangin block hmak mai te a duh ut ut thin a. Mahse, a nun ngui tak chawkhlim thei tu awmchhun a ni miah si. Warewolf leh Lycanthropy chungchangte chu a theih ang tawkin a zir ve a. Apa ten an fuih reng bawk. Amah leh amah chu a inhneh theih mai beiseina te a nei ve leh ta hial a. Thu a tiam thul, "Ka mihringpui taksa chu ka ei tur. ani lo" ti ten. A va rapthlak em… 

Inrinni a ni a,  Apuii te huanah an kal dawn a, a nu te pawn an phal. Phur takin a insiam a. Vahharh a mamawh ve bawk a. Mami'n a rawn sawm a. Siami an sawm phei leh a, Apuii te in an va thlen chuan chaw an lo eikham awrh a. A hmuh chak em em pawh a lo thu váng mai. A rawn nuih suk a. Hmel tha a va ti tak. 

"Hei Au Rema te pawh an lo kal ve dawn a. Kan hman tep" Apuii chuan a ti láng làng a. Remlala kal ve tur chuan a tiphur zual. Remlala thianpa Ruata te nen chuan an huan lam panin an inkhalh ta par par a. Remlala pawh a thawveng kher mai. Vawiin hi satliah taka hman a tum lo bur tawp. Ruata pawh engkim a hrilh sa thlap. 

Huan an thleng a, huan puitling tawh a ni bawk a, a nuamin a hahdamthlak hle. An thlamah chuan an han thu hahchawl phawt a. Ruata leh Remlala te chu Nimbu lo turin an chhuak zui ta nghal a. An ni thianho eraeh tuikhuaha cheng turin an inzui thla thám thám a. Tui a la vawt lutuk lo bawk a, nuam an ti hle. An rak chul reng mai. Remlala te pawh an rawn lang leh vat a. Ruata pawh tuiah chuan a cheng ve bawrh bawrh a. A tawngtam lem lo bawk a, an inbe vak lo. 

"Khutan Coconut huanah zuk chhuk lawk ila" Remlala msg chu a chhiar a chhiar ringawt. A thiante chu a melh kual a, an hriat a hlau ve bawk si. Remlala chuan chu chu a hriatthiampui vangin,  Ruata chu a signal zauh a. 

"Lo kal teh u, sangha saw va man teh ang u.. Nghakuai kha ka han la lawk ange" a ti a. An lo phur nasa mai. Sangha an dahna tuikhuah lam panin an tlan chawn chawn a. Chutia engdang ngaihtuah lo va an awm lai tak chuan, Remlala chuan Zomuani chu a kai a, Coconut huan lamah a chhuk thlakpui ta daih a. 

Hmun zawl deuh, phul hmunah coconut hnah thutin an thu dun vang vang a. "I zak viau a mi? " Remlala chuan a ti sap a. 

"Zak e" a lo ti! 

A chhan dan teh tawp chuan a nuih a tiza a, "Nge a nuihzathhlak a mi? " a lo ti leh hû a. 

"I hmel tha lutuk" tih pahin a beka lo uai a sam chu a va bengzehtir a. An inmelh ta reng mai. "Zoi, ka duh che. Min duh ve chuan sawi tawp rawh" a ti ta tawp a. Hmeichhe bem a huai ve thin tehlul nen he tleirawl hmaah hian a lai ve tlat zel. A huhang a na deuh aniang e. 

"Ih.. Min hrechiang lo.. " a tih lai takin, "Chhuanlam siam lo vin i rilru diktak sawi tawp rawh" a lo tih khalh a. 

Zomuani rilru buai zia leh a rilru insual nasatzia a hre si lo. Remlala chuan a kut a rawn hum a, "Ih.. Ka duh ve chuan ka hria". ati ta nge nge a. A kut pawh a la sawn bik lo. 

"Ka lawm e. Tun atang chuan ka bialnu i ni tawh aw. Lerh awih loh" a lo ti a. 

"Ka bialpa hmasa ber i ni tihna a nih chu.. Mahse, Apuii u i nia, ka zak e" a sen tán tán a. Hrethiam takin Remlala chuan a va nuih a, "Apuii chu keiman ka hrilh ang, a lawm viau zawk ang.. Lungngai suh" a ti a. An ngawih det laiin a kuah hnai a, "Ka fawp dawn che nia" a ti sup a. A lamah a kuai dak a, a hmui vam hiam, tuma la hmuamlum ngai reng reng loh chu dimtein a fawp ta a. A lo dawh mawl tawp. Remlala chuan a hrethiam lutuk, a lawm letling. He tleirawl thianghlim leh pawisawi lo lutuk hi ka venghim tur a ni a ti rilru hial a ni. 

An thiante bula an han chhoh leh chuan an awm lo tih pawh hrechang lo lekin sangha manin an lo la buai a. Zomuani chu a thaw huai mai. Mahse, Apuii chu a zah ru tlat tawh thung. Sangha vawi khat ei leh thei hrang hrang an hawn ve a. An hlimin nuam an ti tlang hle. 

Thlasik rim a lo nam tan ta a. Zomuani pawh a natna in a la rawn tibuai rih lem lo. Remlala vang chauhin a natna pawh a theihnghilh ve thin. An inhmu tam tial tial a, a zahzumna leh a lai lutuk thin pawh a zia ve hlek hlek. Apuii bakah a thianten an hre vek tawh law law a. A lehlam zawng chuan a thawventhlak a ti. Remlala chuan a duat in a ngaihsak em em a, an kum a inthlau deuh bawk a, a pa ang maia en changte pawh a nei lek lek zel. A kum mila han biak leh chhawnchhaih a thiam si, a dah pawimawh thiam bawk si. Remlala chu a tan a hlu takzet a ni. Anu te pawn bialpa a nei tih an hria, mahse, tu nge anih an la hre chiah lo. Bialpa a han nei chu lehlam zanwg tak chuan an lawmpui angreng, a hlim hmel an hmu fô si a. 

December thla an chuangkai ta der mai. Class pawh an chawl tawh a. A nute phalna thlapin Remlala dawr a va nghahpui thin. Nuam an tiin thianghlim taka an inngaihzawnna chu an hlimpui. Remlala tak pawh hian han khawihchhiata han hrawm vel hi a tum ngai lem lo. Amah pawn mak a inti. A duh phawt chuan chu tleirawl taksa nalh lutuk chu a bumin a khawih thei ngei ang. Mahse, a hmangaih niin a inhria, Zomuani ngam tawk chinah chuan a lungawi tlat zel nia. 

December ni 11 a ni a. Zanah thla a bial dawn tih hre kartu mi pathum an awm. Zan tirah Remlala hnenah dawt a sawi sa tawp. A chau lutuk a, a mu hma dawn tiin. Apa bawkin room ruakah khan a hruai leh a. A hma ang khan mak tihna a nei tawh lo bawk a. Eitur erawh a duh tawh loh thu a sawi. Zan dar 11 vel atang chuan a za tan ta a. Ralkhata sihal û ruah ruah thawm chuan a rawn nawr ni berin a hria. Harhfim taka hmachhawn a tum a, a thei ang em.. 

A hmul rawn parh hak hak te, a tin rawn khawng zual te chu a en kar a, a râp takzet. A hmui a rawn siksawi tan a, a ha pawh a rawn lawr leh ta.. A kawchhung chu a sa huam huam a, tui chu thei leh thei lovin a in khawlh khawlh mai. A taksa chu a rawn lian tual tual a, a kawr te chu a tet hawk hawk mai. Bawk vak in roomah chuan a vei thuak thuak a, a chakzia chu a taksa neitu a ni a, a inhre thei. A ril atam a, mahse, eitur a awm lo. Chutah a insum thei ta ngang lo va, rem zeta bawkvakin aw tial ren ruan hian a û ta ruah ruah a! 

A tuka a pa ten an zuk hruai lai chuan saruak bawkin a lo muhil a. Bang chu a ham nasa hle tih a hriat. A tin pawh a bung nual mai. Lainat takin an kuah chho a, ama khumah ngei a muhil ta vang vang a. 

Christmas pawh a lo thleng ve leh ta hlawl mai. Zomuani te inah Remlala pawh a lut ngam ve ta. A nu leh pate nen pawh an inbe thei phian. Pu Sawma erawh chuan Remlala chu a lainat ru em em a, a fanu natna hria se a phatsanin a hnualsuat mai angem tih te thleng a ngaihtuah thin. Christmas ruaitheh zanah Remlala chu a rawn leng a. An ni nupa pawh zaikhawm turin an chhuak ve nghal a. Zomuani û leh a nau te pawh an thiante nen an leng chhuak bawk a. An free bawk a, an inthut hnaih kher mai. 

"Lal û, thi ta ila i tap ve ang em? " Zomuani chuan a ti thut a! 

"Tap lo vang. Ka nui ang" nui chungin a lo ti a. Sofa lianpuiah chuan chep zetin an thu a. Shawl an bat bawk a. Zomuani kut chu a khal neuh neuh a, "Ih diktak chuan kan inneih theih pawh ka ring lo.. " Zomuani chuan a ti leh a. A mitmeng chu a dul raih bawk. 

"Innei thei ang. Pasal i neih ngam hun thleng ka nghak thei che alawm. Mahse, ka hlauhthawn zawk chu pasal neih i ngam hunah ka upa tawh dawn sia, min hnawl leh daih si ang a" Remlala chuan thutak zawkin a ti ve a. 

"Teuh lo mai. Ka bialpa hmasa ber i nia, a tawpna pawh i ni ang" A thinlung tak takin a sawi. 

An infawp a,duhtawh takin. Remlala pawh hun dang aia an free deuh vang nge a kut a hlei viau. Zomuani hnute lian lutuk lo chu a kutphah hlai pui chuan a hum a, a khal neuh neuh reng bawk a. An duhthawh ta tial tial mai. Dipdaltu awm hek lo. Sofa chungah chuan Zomuani chu a bawhthlu a, an infawp kal reng bawk, inkiss pawh a zei ve tawh viau. Remlala'n a zirtir pawh a ni mahna. Zomuani kawrlum chu a hlihsak a, a hnuaia a tshirt hak chu pawt hlimin a hnute var hai chu a fawp ta mawlh mawlh a. Zomuani chu zahnain a la tuam deuh vangin nuam pawh a ti chiah lo. Mahse, Remlala tihlungawi loh chu a hlau a ni ber mai. Zomuani tukhum sam tham nghet nghet chungin a nghawng leh irno, a hnute leh a hmui chu a fawh chhawk zak zak reng a. A mipatna rawn khawng luah pawh chuan zomuani kap zawn chu a dek run mai. An thaw dun halh halh tawh a, an mitmeng pawh a vai riai mai. 

"Zo, ka insum thei dawn tlat lo" a ti hrâwih a. 

"I duh em? " a ti nawn sak a. Zomuani chuan chhan ngaihna a hre hauh lo. Sex hman chu a hreh si, Remlala a thinrim a hlau bawk si. A buai a ni ber. 

"Um… ka nupui i nih hmaa khawih che hi ka duh bik lo va. Mahse, min hrawt tlaksak la.. " a ti ta tawp a. 

"Engtin" a ti a. Remlala chuan a kekawr phelin tih dan tur a hrilh a, Zomuani chuan nuam ti vak lo chungin a thiam ang angin a khawihsak a. Fawhsak èm chu a hreh a ni. Remlala pawh a tilui duh ta bik lo. An taksa peng te chu an inkhawihsak tawn a, Zomuani pawh  a zahna chu nawmna in a rawn thlak tan a, a thaw hliam hliam a, Remlala kutzungtang tiche zei lutuk chuan hnuailamah a rawn nawr et et reng mai. 

"Lal û, ti mai ang" a ti ta thlawt a.. Remlala chu a khi suk. Mahse, Zomuani la naupanzia leh thianghlimzia a ngaibtuah a, a nu leh pa ten an rinzia te. Amah zawk chu insaseng a ngai tih a hrethiam. Harsa takin a insangseng ta a.. Zomuani pawh bathroomah a lut nghal. A zak ngei mai. Mahse, nuam a ti bawk si. Remlala insumtheihna avang chuan amah Remlala a ngaihsanna leh duhna chu a pung sawt mai. 

Christmas vuakvet chu Pathian lam hnaih tehchiam lo vin hlim takin an hmag ve a. An inhmangaihna pawh a hma aiin a parvul zual a, inzah tit tetna ang kha an nei tawh lem lo bawk. 

Kum thar pawh an lo chuangkai ve leh ta a. Class erawh an la tan lo. Remlala pawh a dawr bungrua lain a zin a. An inbe ngun khawp mai. Zomuani putea BP sang chu nikhaw hre lo vin a tlu a, Damdawiin lamah an dah chho va, Zomuani pawh zanah a nute rualin a han lang ve a. A putea nen hian an inngai angreng a, A lo harh deuh tawh naa an la awm khawmuang deuh a. Zomuani chu zung turin a va chhuak a, Toilet rooma a zun lai chuan thla eng chuan a rawn chhun raih a. Eng nge a hriat pawh a hre lo, bathlar lamah va chhuakin thla chu a han thlir vauh vauh a. Amahah danglam a awm. A chhungrilah chuan thil eng emaw inmung mek a rawn awm leh ta. Hlauthawng takin bathlar hungna chu a chelh ngat ngat a. A taksa rawn danglam tan chu a feel thei. Insaseng turin a tlai tawh. Anih dan tur angin a rawn awm vek tawh. A khur hlawk hlawk a, miin an hmu nge hmu lo tih pawh ngaihtuah miah lo vin bathlar atang chuan a zuangthla a, a na miah lo. In kan hun a tawh tawh vangin mi an tam vak lo va, mahse, a zuangthla. Lai lo hmu erawh an awm. An te dual a, mahse, an va thlen phei hmain bawkvaka kal in chak zetin an piah lawka motor lo ding phenah chuan a lut ta daih!  Motor an va en chuan a lo awm tawh lo. Tuman a hmel an hmu hman ta lo a ni. 

A taksa thununtu chuan chak zetin a limtir puat puat a, Kawmkarah kalin veng mawng lamah a chhuk zel a, In fal angreng tak lo awmah chuan a tawp chat. An in hnuaiah chuan a tawm khar a, ralkhatah sihal an û chuah chuah bawk. Reivak lo ah in atang chuan tlangval pahnih an lo chhuak a, an titi nuah nuah a. An hnunglama nguk thawm niawm tak an hriat chuan an hawi rual thawt. Mahse, an rak hmain chu ramsa niawm tak hmel hmai rapthlak tak mai chuan a rawn zuan a, pakhat zawk chu a dar dinglamah a rawn seh ta ngawr ngawr mai. Pakhat zawk hamhaih lah chuan engmah tih nachang a hre lo. Chutah chu ramsa chuan a rawn melh ling vâwt a, a rawn zuan leh chat. Theihtawpa lo nam kian tum mah se; a chak dan chu a rapthlak zawk. An zal ta raih raih mai. An pumpui chu haiin an ril te chu a keih bawrh bawrh a, thla eng lah chuan a rawn umzui zel emaw tih turin. arawn chhun kulh mai a. Thawm a hriat vangin rang taka insasengin ramhnuai lamah a lim ta puat puat a. 

Zomuani nu chuan a fanu chu a zawng nasa tawh ngang mai. A mangang takzet a ni. Apa pawh rawn chho ve in mi dang hrilh ngam si lo vin an zawng kual a. Thla en zia an hmuh khan thil awmdan an hrethiam nghal vek. A zun hma khan a phone kha a putea mutna khumah a hnutchhiah vangin call chi a ni der bawk si lo. Lo keng ta tehreng pawh nise, a pickup lul lo vang. Damdawiin pawn lama awm ten mihring lo zuang thla an awm thu an sawi phei chuan Zomuani ngei a ni tih an hrechiang. Khaw nge a awm anga.. Tu nge a thah ang tih ngawt an ngaihtuah. 

Zing lam dar 2 bawr velah an kawngkapui chu a ri rak a. An fanu neihchhun chu a thawmhnaw tet phung chungin bal leh thisen kai nuanin a rawn lang ta hlawl mai. Rang takin an va pan a, a sam bawrchhawr zetah chuan hnahthel ro te a bet tai hlawm a. Ramhnuaiah a zuk chetla tih an hrethiam. 

"Pa, mi ka that" a ti tham chhal a. A sawi zawh rual chuan a tlu thlawrh. Rang taka zawnin a roomah an han muttir ta a. A unaute erawh an mu tawh. An nupa chuan an fanu hmel dâng bai chu thinlung na ngawih ngawih chungin an thlir a, sawi tur an hre lo. 

A tukah chanchinbuah leh social media lamah tlangval pahnih ruang chhar thu chu an rawn chhuah ta chuai chuai mai. An ruang hmuh hrehawm zet erawh an dah tel lo va, an kaw chhung hai a nih thu te, damdawi addict an nih thu te an sawi a. Khalai veng mawnga in fal deuh kha damdawi zuar an lo ni a. Hetih lai mek hian Damdawiin atanga mi pakhat zuan thlak thu leh amah an hmuh zui loh thu pawh an lo chhuah ve mek bawk a. Hmutu an awm nual avangin dawt han intihsak chi a ni si lo. Mak an ti tlang hle. Remlala pawn a lo hmu ve a, nizan khan Zomuani chu damdawiinah a kal ve si a, a hre ve ang em le tihte a ngaihtuah a, a zin a la haw lo va, a lung a leng  tawh viau mai. 

"Pa, ka hre lo. Engvangin nge ka thah ka hre lo.. Thah kha ka duh bik lo asin" a ti zawi raih a. A hmela inthlahrunna leh inthiam lohna chuan a tilang duhawm kher mai. 

"Bawihte, kan thiam loh zawk a ni. Kan lo inthlahdah deuh a, i duh vang renga ti i ni lo tih kan hria alawm" a pa chuan a lo tidam vat a. 

"Anih chuan policeah ka inpe mai dawn nge.. Engtin nge ka tih dawn"

"Ni lo ve, inpe lo vang. Zoram mipui ten an hriat dan tur che hi ka duh lo. A theih chinah chuan ka hum zel ang che" apa inringtawk hmel chuan a thlamuan huai mai. Mahse, tual a that tlat si. Remlala a ngaihtuah a, a na zawk. A bialnuin rawng takin mi pahnih lai a that tih hre ta se, engtin tak ngai ang maw.. 

Police te pawn theihtawp chhuah mah se; tualthattu chu an man thei chuang lo. Man ngaihna a vang ve bawk a. 

Class te an tan leh ta bawk a, nunphung pangngai a zawm chho ve leh tan a. Remlala nen pawh an la tha chho ve zel e. A mumangah a mi thah te hmel kha a hmu zeuh zeuh thin a, hlauhlawpin a thangharh leh thin. Thih daih mai a chak chang a awm thin, chutiang hunah chuan Remlala hmel a lo lang a, chu chuan nun ve zel duhna a neihtir thin. 

Hun a liam ve zel a, an exam zo ve ta. Titha thawkhat chuan a inhria. Exam chawlh laiin tiin An thianho chuan ramhnuaia camp va neih an rèl a. Semester thar khawih leh hma ngeia kal an rel thlu a. Aizawl hmar lama khaw pakhat Chhinlung an tih ram chhunga puk pakhat leh a chhehvela hmanlai thil hlui te ena fan an tum a ni. An thianho tihah mipa te pawh an awm ve a. An class te pawh a tihtheih ang chu. Thla fang awm dan ngun taka an zir chian hnuah Zomuanin kal a lo chak ve bawk nen, a nute chuan kal an phalsak ve ta mial a. A tan vahharh a pawimawh ve bawk si. Remlalan kal kawnga ei tur a leisak khai bawrh laih chungin busah chuan a lut tharh a. Apuii nen an thu dun nghe nghe. Hlim takin an tum ram chu an pan ta a. 

An vaiin mi pa 12 an ni a. Mipa 6 an awm a. A bak hmeichhia an ni. Driver te erawh an haw leh rih a, hawn dawnah an lo hruai dawn a ni. Aizawl atangin a hla lem lo bawk a. Puan in te an han kaih a, an che sang sang mai. An tih ve theih theih ang lo ti vein eirawngte an bawl a. Nuam an ti chho tan hle. Zanriah te an eikhamah meipui chhepin an zai ho dar dar a. Ramhnuai la kal tam lo a tam zawk chu ni mah se; mipaho vang pawn an thlamuang viau. Tui takin chumi zan chu an muhil ta a. 

A tukah an tihtur ang angte tiin an tlawh tur te chu an tlawh a, camera a rim leh hle., Zomuani pawh a tho ve viau mai, puk an lut chhuak phawt a. A thuk lem lo bawk. Tin, Chhinlung khua ten an theih ang angin an lo chei hnûm ve bawk a. Chawhnu lamah hman lai kawtchhuah an va tlawh leh a, nuam an ti hle.. A tuk chawhnu lamah hawn mai an tum ta a, chawhma lamah kawtchhuah piaha tianhrang thlan an tih mai chu tlawh leh zawk an tum thung. Zanriah an ei khamah zan hmasa ang bawkin an zaiho leh a, mipaho leh hmeichhe thenkhat ten zu an in bawk!  Tumah chuan mak an ti lem lo. A nuam phian zawk ang. Zan rei vak lo ah mut zai an rel ta a. 

Chinghne û ruah ruah thawm chuan a tiharh hlawl a!  Chinghne awmna erawh a hlat hmel viau. A thlan sain a lo bual huh hnèp a. A taksa khur der der leh za chiai chiai chu hlauthawng takin a ngaichang a. A bula mu a thiante ho thaw sák sâk ri chu chinghne û thawm bawkin a rawn luah khat leh ta. A danglam leh ta vek mai. Hmanhmawh takin a tho a, puan in atang chuan chhuakin a thawm hriatna lamah chuan a lim chhuak ta nghal a. 

Chinghne rual lo awm khawm taih chu a va pawh ta hlawl mai. An rawn hnaih tiau tiau a, an ngur chher chher bawk. Mahse, an zinga tel ve tur niawm renga ngaiin an mei phut hleuh hleuh pahin an rawn lawm cheng cheng a. Ring zetin an û ta chuah chuah mai. Thisena tuihal nafam chu chinghne ho nen an camp lam an pan ta tham tham mai le.. 

An thlen hma deuhin Mipa leh hmeichhe pakhat, thing bul ngheng lo infawp bawrh bawrh chuan an mit a la ta chat mai. Thawm nei hauh lo va pan hriau hriauin an inrin hmain an va zuan ta suau a. An ching darh hneh ngei mai. Zomuani pawh chuan an kawchhung chu tui titakin a ei thawih thawih a, thisen rim chu tui ti zetin a hnim leh vang vang thin bawk. An duh an hmu ta bawk a, mi dang khawih chu an tum ta lo nge ni an kirsan ta diak hlawm a. Zing dar 3 bawr velah a harh ta hlawl mai. A taksa na thèm thûm chu a hre hmasa mai a. Saruakin a awm tih a inhre bawk. Lei charah a lo mu reng a, a han inbengkang a,  a taksa chu a bawlhhlawhin thisen thang rim a nam huam huam a, a uak tuar tuar mai. Pai khat khat chungin tui awmna a zawng a, vanneih asiamin kawr te pakhata tui lo tling chu a hmu ta a. A insil bawrh bawrh a, tui pawh chu a in khawlh khawlh a. A pawi khawih chu hre tho mah se, a hma ang em em khan inthiam lohna leh nuam tih lohna a nei mang tlat lo! A nih dan tur renga ngaihna a nei tawh tlat a ni. 

Saruak ngal ngat chuan an riahna hmun a pan ta a. Tumah an la tho lo. Tuala an mei chhem pawh a dai diak tawk a. A piah lawka mipa leh hmeichhe ruang darh nuaih chu a hmu. A ner sawk a. Mahse, tuman an hre chhuak tur a ni lo tiin a infuih nghal. Thawm dim takin puan inah chuan a lut a, a bag la chhuakin pawnah a va inthlak leh te te a, a mu ve leh ta kâk mai. Eng chen nge hetiang thil ti chunga a damkhawchhuah theih tak ang le… 

A tuk zinga a thiante rak tuar tuar thawm chuan a tiharh a, ruang an hmu tih a hai lo. Engmah hre lo niawm takin a va chhuak ve a. An lo pawtsawm hneh hle tih a va hmu chhuak,. Mitthi te chu Rina leh Lawmi an ni a, inngaizawng tir an ni nghe nghe. Police te pawh an rawn thleng chawpchilh nghal a. Chanchinbu mi te pawh an ther leh fur tawh. Tlangval pahnih te ruang nen khan a inan deuh vangin a thattu thuhmun ni ngeiah an ngai. Mihring pangngai thah ni theiin an ngai tlat lo, ramsa eng emaw tak a nih an ring. An ringsual lo khawp mai. 

Tuman eng thawm mah an hriat loh thu an sawi sap sap lai chuan, "Sir, nizan zan lai vel khan sihal nge chinghnia nge ka hre lo, an û chuah chuah a, chinghne rual an nih chuan an rawn that a ni mai lo maw? ". Zomuani chuan a lo ti a. An en thap. 

"Chinghne rual hi Mizoramah an váng tawh viau asin. Mahse, thil ni thei erawh a ni".. Police chuan a ti ve a. 

An riahna bul vel chu ngun takin an dap kual a, Zomuani chuan hlauthawng takin a lo thlir ve reng. A thawmhnaw kha khaw nge a awm a hre bik lo va, an hmuh hlauh chuan rinhlelh a ni dawn tih a hai bik lo. A thiante hamhaih atalang chuan nizan mut dawna a hak kha a ha tawh lo tih an hre lo nge engmah an zawt lo hlauh. A thawmhnaw phelh zawnga chet tawh loh a tum rilru ta a. Chutiang thil raptlak tak a ngaihtuah tih a inhriatna chuan a inthiam loh tir leh hnuhnawh. Mahse, hei hi a hria, ramsa a nih lai khan nuam a ti tih hi. 

In lama an chhungte leh thiante pawn an lo ngaihtuah ve hle hlawm a. Apa te nen pawh an inbia, Remlala pawh hlauthawng takin chanchin kimchang a han hrilh ve. Engtin nge kha ze duhawm tak kha mi bum hmang takah a chhuah theih ni.. Amah pawn mak a inti. 

A nu leh pate bulah chuan engmah a sawi lo. Ama thiltih a ni tih an hre tho a, sawi tur dang a hre lem lo a ni. Aizawl lam chu a ralmuang ta vak lo. Hun a kal leh deuh a, Remlala nen pawh an inzui chhuak fô a, khaw hmun nisi an inngai em em reng chu mak an ti thin. Remlalan inneih a sawi erawh chuan thu dang a sawi daih thin. Ramsa kawlh pasal ni turin a phal lo. A thlah thei bawk si lo. Thla bial zan leh bial loh zan pawn an thunun ta mang lo va, amahah nawrtu a neih chuan a duh hun hunah ramsa ang maiin a danglam thei tih a hre tawh. Apa te erawh chuan an hre kher lo vang. Mihring kher khawih lo va ran vulh lai khawih zeuh zeuh pawh a nei thin. Nuam a ti telh telh a, ramhnuaia chak zet zeta lim puat puat leh han zuan dawrh dáwrh te chuan a tiphur zual thin. A tlangpuiin zan dar 12- 3 thleng hian a che chhuak thin. Mut a hmu tha vak lo bawk a, tin, chaw pangngai a ngaina ta vak lo nen a taksa chu a cher deuh kuam a. A vun pawh a dáng telh telh mai. 

A nu nen an bazar hawng lam chuan Remlala dawra hmeichhe chhe lo zet lo thu leh a bula nui var var chunga Remlala lo titi siam siam lai chu a va hmu a, a melh reng mai. Hmeichhia chuan a tawng pah chuan a khawih thuak thuak a, an hlim hmel takzet. Thikthu avang hian an inhau ngai lo va, inhauh hrim hrim hi an nei khât. Tun tum erawh chu nu chu a thîk ve tlat!  

"Vawiin kha chu nuam inti hle mai tiraw? " a va ti a. 

"Engah maw.. " a rawn ti. 

"Hmeichhia kha a hmel tha bawk a, nang pawh i hlim khawp mai"

"Sarahi kha mi i sawi le.. Kan college kal laia ka thian a nih kha.. "

"A ni tak ang. " 

"I thinrim tihna mi? "

"Rim lo"

"Hmuk hmuk a che"

"A ho. Ka mu dawn. Bye" 

A phone chu a off hmak. A thin chu a rawn rim chawpchilh nghal et et, a taksa pawh a danglam tan. Zan a la rei vak si lo va, chet chhuah nan chuan hma a la ti. Mahse,  a inthunun thei tawh lo. A room bathlarah chuan a chhuak phei a, a thawmhnaw a hlip a. A zuangthla ta. Lei a thlen chuan a ding chat a. Pawisak nei lo ang maiin a tlankual ta chiam mai. A hma kha chuan inthup takin leh zanrei lamah a ni thin a, tunah erawh mi thenkhat ten an lo hmu ta. An rak ruai ruai hlawm a, an rawn um ta mai. Ani lah hram nghur nghur pahin a tlan vâwk vâwk a. Khawpui chhungah erawh a tlan lut duh lo. An um tawh lo nia a hriat vangin a ding a. Thawm a ngaichang vang vang a. Salem veng lamah tlanin a mihring hmuh hmasak ber chu a zuan thlu tawp a, dimna tel miah lo vin a ching ta hrep mai. Nula la upat hmel vak loh a ni nghe nghe. A kawchhung a hai a. A kalsan leh ta. A la duhtawk mai lo, Venghlui lamah kal lehin veng mawng lam deuh a hrut a. Mi pahnih a that leh ta mai. 

A tukah erawh a thiltih rapthlakzia chuan a mang a tiang leh si!  Mihring khawih tawh loh a tum kha a ni si a. Nasa taka a thinrimna leh a thikthu chhiatna khan pawisak a neihtir thei ta lo a ni ber. A pa mitmeng buai tak pawh chu a hmachhawn ngam meuh lo. Remlala awm lo se a thi tawh tur. 

A rawn call a, dam thlapin a rawn thlem heuh heuh a. A lo nem leh thliam tawh. A ngai bawk si. Tlai lama inhmu turin an inthlah ta a. Remlala pawn nizan lama thil thleng rapthlak tak leh ramsa niawm tak mihring ni bawk si an hmuh thu te chu a lo chhiar ve a. Mak a ti ve hle. A hmangaih a bialnu ngei ani ang tih rin ngaihna reng a hre lo. Aizawl mihring chu an ralti ta hru hlawm a. Zanah pawh khaw lai a reh dûk tawh. Khawpui hulum lai erawh a la ngai reng thung. Veng hmawr lama awm te phei chu an riak chhuak hial nghe nghe. Warewolf thiltih tia chanchin lo vawrh darh tawk an awm bawk a, sawizui a hlawh takzet. Zomuani pawn a lo chhiar ve. Hrehawm a ti takzet a ni. 

"Inpuan mai ka duh tawh.. Pa" a ti a. 

"Bawihte, engmah hi ka hrethiam tawh lo a ni.. Phai lamah mental hospitalah te khuan i zuk awm bo rih lawk dawn em mawni le? " apa pawh chu a mangang ve tawk tawh a niang e. 

"Thi ta zawk ila" a mittui a rawn tla a. 

"Thih thu chu sawi tawh lul suh" anu chu a tap tuau mai. 

"A nasat tak tak hunah chuan a chhungte in nih leh nih loh a pawisa dawn hauh lo va, in tan pawh a la hlauhawm thei dawn a ni" tia Doctor thusawi kha a pa chhuan a ngaihtuah let vang vang a. A fanu bawraw chho zel chu eng chen nge a hum theih ang?  A hmangaih ngawih ngawih bawk si. 

Remlala nen an inhmuh chuan tlemin a zia chho leh ta deuh. An han infawh vel hian a zauthau hma em em tawh a, a natna kaihhnawih tho a nih a ring. A tawp thleng turin a inpeih titih nghal zel thin. Mahse, Remlala bawk hian a kirpui leh thin. Zana a taksa a danglam hnua khuma a mut leh te hian nasa takin a châkna a chhuak ringawt thin a. Amah leh amah a inkhalh chang a awm zeuh zeuh. Chungte chu a harhfim kák hnua a ngaihtuah let leh hian a zak ngawih ngawih thin. 

Anu rak tuar tuar thawm chuan a kai harh a. Rang takin a zuk thla. Kareii!  A nau mipa kha an bathlar hnuai lamah kawchhung lang vekin a lo thi reng mai. A khur zawih zawih a, eng thil nge a tih tak… nizan a chhuikir a. Remlala a lo leng a, a hawn hnu lawkah a chhuak ve nghal mai kha a nia. Ramhnuai lamah zuk chetlain eitur erawh a zuk hmu lo. A room pana bawkvaka a vah chhoh zai zai laiin a nau games khel tui mengrei rawn zung chuan a hmu ta a. A rak tuar a, mahse, a au leh hma chiahin a va zuan thlu tawp a. A ching zal ta nghal kha a ni a."Zomuaawm, i thiltih pawizia hi.. I thi ngei tur a ni" tiin amah leh amah chu a inhrilh a. A nau ruang chu a rimchhiat hmain an phum fel a, ramsa kawlh takin a that tih chu tlang hriat a ni. An veng chhung thlenga a kankai tak avangin veng chhung mipui pawh an fimkhur khawp ang le… 

A nau thih atanga ni 3-na velah, Remlala a rawn lut hlawl. 

"Zomuani hi ka be thei miah lo va, in chhiat tawh vangin in la buai deuh aniang ka tia. Ka zin ve daih bawk nen, nizan khan ka rawn thleng chiah a. Khaw nge a mah a awm le" tiin Zomuani nute chu a zawt a. An pa nen an inmelh tawn sek. 

"A nau thihnain a nghawng deuh a, a taksa a khawih deuh nen, Shillongah kan zuk awm harhtir ve lawk anih kha. Phone pawh a khawih thei rih lo aniang" Apa chuan a lo ti a. Remlala pawh leng rei lo vin a haw ve leh mai a. 

Remlala rilru chu a nuam thei miah lo. A bialnu chu a ngai si, biak hleitheih lova awm reng chu a hrethiam lo a ni. Zomuani nu a va call a, Zomuani patea number a va dil a. Mahse, "Remlal, zaninah lo phei lawk mai ta che" a rawn ti ta zawk a. Eng emaw dik lo zawng a awm chiang a ni. 

A va thlen phei chuan inleng an la awm tiai a. Inriak erawh an inpuchhuak hlawm tawh thung. A thu ve ta mai mai rih a. An haw ta pheuh pheuh a. An haw zawh vek hnuah, "Hawh le.. Ka fanu chu i zuk hmu ang hmiang" tiin Pu Sawma chuan a rawn bek bawr sup a. Store room lam an pan ta. Kawngka rûk kha a hawng ta khep a. Room eng vak lo karah a hmangaih em em, Dunlop chunga khawhar hmel taka lo mu chu a va hmu ta a ni. A ngaihna reng a hre thiam lo. 

Zomuani chu a cher em em a, a sam chu a bawrchhawrin a tla nuai a. A thawmhnaw pawh a tet hrup mai. A lo muhil a. 

"Zoi, harh teh… keimah" tiin a biang a va chul a. A rawn harha Remlala hmel a hmuh rual chuan, "Lal û, " tih leh tah a rual nghal a. An inkuah vawng vawng mai. An hnungah mittui tling khat vek chungin Pu Sawma chuan a lo thlir vawng vawng a. 

"Ti nge? Hetah in dah.. Eng vang nge.. ". Pu Sawma lam a en a. Pu Sawma chu rawn kal hnaiin Dunlop chungah chuan a thu ve a. 

Engkim zawng zawng, a chin chhuakin a hrilh fai ta vek a. Remlala makti lo mengphar pawh a ngaipawimawh thei tawh lo. Rinhlelh a la kai chiah loh vang chauha police lamin an la veh loh thu te pawh a sawi a. 

" A nau ngei mai a thah tak avang khan amah hian awmngaihna a hre ta lo va, he rooma khung turin min ngen ta a ni. Engtin nge kan la awm zel dawn tih ka hre lo.. " 

Remlala chuan Zomuani chu a va melh a, zak kimki takin a lo melh ve kiau mai. A hmangaih em em chu ramsa kawlh ang maia thisena tuihal leh a mihringpuite râwng taka that thintu ni mah se; a lo hmangaih tawhna kha a lalet thei lo. A hmangaih sauh emaw tih tur a ni. 

"Kawng engmaw tal chu a awm ang? " a ti a. A awm si lo. 

"Lal u, min rawn hmu tawh suh aw.. Mi dang ngaizawng la, kei chu min theihnghilh daih ang che. Tihian kei chu ka thi mai ang. A tha zawk. Mi danf nunna ka lak fo dawn ai chuan thih hi a tha zawk.keimah leh keimah ka intihlum ngam bawk si lo va.. Mahse, tihian ka awm char char anga, ka thi ve mai ang" Zomuani aw tham chhel chuan a thinlung a dek ngawih ngawih. Khawngaihna leh lainatnain a khat a. A luah a va tuai a, a sam te chu a zut mam sak a. 

"Aih, ka theihnghilh dawn lo che. Kawng eng emaw tal chu a awm ang. Pathian pawn a tidam maithei che asin. Kan inneih dawn kha.. Zo, ka nupui tur i nih kha" a ti mawlh mawlh a. Pu Sawma chu a insum thei lo thelh a ni. A hmai a hup tlawk tlawk mai. Remlala pawn a khap per sak sak mai. Mahse, a la beidawng lo. Chu chuan a la tipachang hram hram a ni. 

"Remlal, mipa fel tak i ni a, Zomuani pa ka nih angin ka fanu hi kalsan la ka duh a ni. I nunkhua a tihhrehawm tak tak hma hian. I hmangaih tak tak chuan i kalsan tur. ani" intih pachan tum takin Pu Sawma chuan a ti ta a. 

"Aih, ka pu, i fanu hi a tawp thlengin ka chelh dawn. A thiam loh a ni lo, a natna vang chauh a ni. Ka tan chuan pawisawi lo leh thianghlim ber. ala ni reng" a ti tlat. 

Chumi zan atang chuan Remlala chuan Pathian a auh tam phah a. Hetiang lam natna a zir chiang nasa bawk. Mahse, tihdamna erawh a hmu thei si lo. A khat tawkin a va kan reng a, Apuii leh a thiante pawn Zomuani chu Shillonga awm angin an ngai vek. Thuruk chu puanzar ngam chi a ni hlawl si lo va. 

May thla khaw lum vanglai tak a ni a. Thawhtan zan niin thla bial zan a ni. Remlala chu an in atanga chhuakin ding takin pu Sawma te in lam a pan a. An nupa chuan vei nei tih hriat zetin tv an lo en dun a. Zomuani nau thih hnu atang khan ramsa kha a reh tak daih vangin an sawi em em tawh lo. Fimkhur tawk erawh an awm tho mai. 

"Zo, zanin chu ka lo riahpui dawn che a.. " A ti a. Ama roomah an dah chho tawh a ni. Zaninah hian risk lak a tum. A hlawhtling ang nge a thih phah ang tih erawh hriat a ni lo. 

Zomuani khumah chuan inkuah rialin an mu a, Zomuanin tap faih faih chunga a mi thah dan a sawi lai chuan thinlung na ru em em chungin a lo ngaithla a. Tihhlim tumin thil dang a sawipui a. An inneih huna an fa neih zat tur te.. Zomuani hmel pawh a hlim ve leh ta deuh. An infawp zeuh zeuh bawk. Zomuani rilruah thil dang a lang thut. Room kawngka a va kalh te te a,. A thawmhnaw chu a phelh vek a, saruakin Remlala hmaah a ding teu mai. 

"Ka la thi maithei. Engtikah emaw chuan. Ka thih hma ngei hian ka thianghlimna hi hlan che ka duh a ni" a ti ta a. Remlala maktihzia chu hai rual a ni lo. A hmangaih em em taksa ruak a hmuh meuh chuan warewolf lam pawh a ngaihtuah thei bik lo. Khumah chuan an let dun ta thiak thiak a, Zomuani duhthawhzia leh zauthau nasatzia a hmuh chuan mak ti tho mahse, a phur zual sauh a. Amah pawh inhlipin dim tein Zomuani kapkarah chuan a tla lut ta a. An rum hawk mai. A na zualpui a reh ta maw tihah an uar tak tak mai chu Zomuani a rak titih, Remlala pawh a rum nghut nghut mai. Khum pawh a che laih laih a, a nu leh pa te in chhungah an awm ve reng tih reng an hre chang tawh lo. 

"Lal u, a nuam lutuk.. Hei hi maw sex chu.. " hnuailam atangin a rawn ti tham tiak a, a thaw chu a kaah a leng lo deuh nge a thaw hlawi hlawi bawk. Chu a tawngkam. Te chuan Remlala chu a tiphur zual sauh a. Vawihnih lai nawmna vawrtawp an thleng ta anih kha.. 

Tui taka an muhil lai chu an harh dun hlawl mai. Ral khata chinghne û thawm vang nge Zomuani taksa a danglam vang. Remlala chu a tho vat a, Zomuani taksa insangmar teuh, rapthlak taka rawn inthlak lai chu hmuh nuam tak ni lo mah se, a en lui ngat ngat. 

"Zoi, i hneh thei, beidawng suh. Beilet rawh. I hria em?  Ka hmangaih che. Hmabak tam tak kan la neih kha.. Kan hneh thei. Kan pahnihin.. " tiin a fuih ngat ngat a. Remlala aw chu a hre ruai ruai, mumang ang maiin. Remlala aw ri chu a hla tial tial a, thla eng chu a lo hnai tial tial thung. 

A hmaa Remlala ding chu a melh run run a, "Zoi, Remlala i hmangaih ka nih hi.. " tia hrilh mawlh mawlh tu thusawi chu a hre fiah thei lo. A riltam lutuk chuan a rawn nawr ut ut a. A zuan thlu ta tawp mai. A thisen hip a, a kaw chhung hai a tum mek laiin a hmaa darthlalangah chuan a va inhmu kher a!  A tawlhhnung dawrh. A hmel lan dan rapthlakzia chu.. A mit te chu a tung lek lek a, a sen rûm bawk. A hnar pawh a zum vûn a, a ha lah a rawn chhuak zum fur a, a taksa lah hmul in a khat vek. A kut leh ke tin khawng leh sei zul chu a thlek tawn sek a. Chhuata let reng mihring chu a zuk melh a. A rak thawt. Chhuatah a let ta tawp tawp a. 

Pu Sawma te nupa pawh mangang takin room pawn lamah an tei sek a. Kawngka chu an chum thin, an rawn hawngnthei si lo. Remlala ngenna a lo phalsak kha pawi a ti kher mai. " Risk lak ka duh. Ka thih leh ka thi mai ang. Ka thunun thei maithei asin. Khawngaih takin min tihtir rawh" tiin a ngen ngawih ngawih kha. ania. Zan tir atang khan an la muhil miah lo va, thawm an ngaichang ve reng a ni. Sex an hman lai erawh kha chuan in hnuaia an awm lai anih vang an hre lo. Remlala tlu thawm niawm tak an hriat vangin rang takin an va chhuak kha a ni a. 

Zomuani chu a insangmar vak a, a taksa chuan ngai a rawn awh chho tan ta.. Chhuata nunna nei tawh lo, thisen nena inchiahpiah nuai chu a melh vawng vawng a. A mittui chu dan rual lohin a luang ngiai ngiai a. Beidawn hmel em emin a thusawp niah a, "Ti lo la a tha zawk tur.. Hmangaih tlak ka ni lo ka tih mawlh mawlh kha. Ti nge min hmangaih?  Mawh.. Ka nuna mi pawimawh tawpkhawk nunna ka la ta chu a ni si a.. Tihtur pakhat chiah ka nei ta… ka hmangaih, Lal û, min hmangaih vanga i thihna hi a thlawn lo vang. Tun chinah tumahin he ramsa kawlh hi an hmu leh tawh ngai lo vang" tia phun sep sep chungin a tho a. Remlala ruang let reng bulah chuan a zuk kun a. A hmai a chul a, a hmui chu a zuk fawp a. 

"Ka hmangaih che. Ka hmangaih lutuk che. Thih hnu piah lam ram a awm anih ngai chuan, ramsa ka ni tawh lo vang a, min nei duh ang tiraw? " tiin a phun leh sep sep a. 

"Bawihte, i awm tih ka hria, kawngka hi lo hawng teh" tia a room kawngka rawn chum vak vaktu a pa vang chuan a ding det a. Mahse, a pawhdawh hawngin Shillonga a lei, chemte sei vak lo, hriam hmel tak chu a lek chhuak a. 

Tîm na nei miah lo vin a banrek chu a zai a. Thisen baw hawk hawk chung chung chuan Remlala bulah a va inthawlh a, a kut zai lohna lamin a kuah a, a âwmah a bei thán a. Thlamuan hmel takin a chhing ta riai riai a. 

Room kawngka chu a rawn inhawng phak a. An tichhe ta ringawt kha a nia. Chhuat laia a fanu leh Remlala ruang inkuah riala lo let reng an hmuh chuan an tawlh hnung dawrh a. Anu chu hmai hupin a tap khur nghal hlawk hlawk mai. Pu Sawma erawh hlauthawng reng reng leh thinthi miah lo va a lo awm tawhna kha a kiang ta hawk zawk a. A fanu thi chu a lawm erawh a ni lo. 

Police a call a. An nu chu kuahin, "Mangchhia ang maia rapthlak chu a tawp ta.. " a ti ta a. 

The End..