Lar

LÂR...,

Ziaktu: Toni Râlte

"Min lo dang hlek suh. Ka duh duh ka tithei" ti chungin min rawn pan a. Ka lo îp chawih, tawlh hnung hret hret chungin tlanchhiatna tur ka melh kual a, a mitmeng hriam hraih leh nelawmna pakhatmah tel lo chuan min melh kul mai bawk si. Ka mangang a ni. "Hei hi a thleng tur a ni lo" tiin ka infuih mawlh mawlh a. Ni e, ka inthunun a ngai. Engkim a buai hma ngei hian..

"I ta nih hi ka duh ngai reng reng lo. Min chhuahsan rawh khawngaihin" ka ti tham chhal a. A nui hak a. A phun zui sup bawk. A ban sei zet chuan ka darah rawn vuanin, a kutphah hlai hlup chuan ka biang a chul nghal zat a. Râp zetin ka lo melh haw mai.

"I duh lo maw?  I duh kha.. I duh thin.. "A ti zui sup a. Ka inrin hmain ka hmuiah a lo fawp thut, na zet zeta min hrawm chungin min fawp a, ka dawh tawp. Ka chak lohzia leh derthawnzia hretu hian a angchhungah ka tlu lut leh dawn tih a hre tlat. Tah ka chak a, tah hun a ni lo tih ka hria. Khumah min nawr mu thlawp a, ka tawm chaih mai. Min rawn bawh a tum lai tak chuan, kawngka an rawn kik ta tlat. Ka thaw huai mai.

"Hrep taka" a ti sup a.

A chhuak zui ta nghal a. Khumah chuan ka la mu kawm ngal mai.

Ni e, ka naupanlai bawk ka chhuikir leh dawn. Khatih lai kum 12-18 ka nih thleng kha chuan natna leh hliam awmzia hre lo lèka mi hlim thei ka ni thin kha a ni a. Thingtlangah enghelh nei miah lo vin ka thiante nen khawvel kha kan chen thin. Khawpui naupangte angin toys nei tha ve lo mah ila, kan neihchhunah kan lungawi thin. Ka pa mistiri a ni a, ka nu erawh hnathawk tawp chi a ni. Unau pali zingah a naupangber dawttu ka ni a.  Hmeichhe awmchhun ka ni bawk. Duat rawn ka hlawh ve a, ka tleirawl chhuah chhoh thleng khan hnathawk tura phût ka ni ngai lo. Kan upa berin sâwn a thlak ve a, an innei zui nghal a. Mo kan neih hnu phei chuan lehkha zirna lama insawrbing turin min fuih nasa zual. Kan u ber dawttu erawh hmeichhia ngaihsak map lo, zirna lama hlawhchham, taima rumrut a ni a. Ram lamah a awm tam zawk. Ka nau nen erawh lehkha kan la zir a. Kan khuaah High school thleng chauh zirna a. awm avangin Higher chu kan khaw thenawm, Lungzarah ka kal a. Ka nite an awm tho vangin an in atangin ka kal a, min duat ve bawk a. Hrehawm ka hre lem lo. Thingtlanga awm ni mah ila, hna ka thawh ve vak loh vangin ka vun te a mam ve a, ka ngo ve reuh bawk nen.. Ka hmel hmai tak chu a tha em em lo maithei, Thingtlangah chuan vun ngo kan ngaisang hrim a. A luck pawl ka ni thin. Love letter pawh ka dawng nasa ve e. Mahse, ka zei lo va, ka zak tlat. Tumah ka ngaizawng ve ngam ngai lo. Lehkha ka thiam em em lo va, zir lamah ka ramtang taima thung a. Ka pass ve mai zel. Class 12 kan zir kumin tihtakzetin kan sir hian min ngaizawng pek a, school ka ban phah thelh a ni.

Lungzara ka awm lai hian inngaizawng hmingpu ve siin vawikhat mah inhmu fal chuang si lo vin bialpa ka nei ve a. Letter chu kan inlèmna hmanrua ber a ni. Kan induh ve em em ringawt. Kan inhmuhin kan zak leh si.. Sir Sawma chuan min duhsak bawk a, a subj ah ka fail ngai lo. Ka pa te rual tur zet, pathlawi a ni a. A tenin ka ten. Ka ni hi mi lian pák chi anih avangin be tha turin min râwn teivet thin a. A teuh lo. Ka nihpui ai chuan fail kha ka thlang.

Ka vanneih asiamin zirtirtu lo thawk thar nen an inzui ta daih a. Ka thaw huai mai. Class 12 kan exam zo va, ni khat ka chám a, a tukah kan khuaah ka haw nal nal. Ka thiante te leh ka chhungte ka ngai tawh a ni. Ka u fate pawh chhawnchhaih nuam rual an lo ni tawh a. Kan inawm thei fu. Kan mo hi a fel em em a, nau ang tak takin min en a, kan inkawmngeih khawp mai. Chhungkaw kima zanriah kan han kil leh thei chu nuam tak a ni.

Mihring chungah hian ni chang a sa lo va, ruah a sur chang te thlipui a thawh changte a awm thin. Ka chunga ni sa pawh chu a rawn inthlak hret hret a. Hripui mak danglam tak rawn leng chu ka vanduaina bul a lo ni ta a ni. Thingtlang mah ni ila, mi kan changkang tawh a, mobile phone an hum ve far tawh a. Tv lah in tinin kan kawl tawh bawk. Aizawl lama hri leng chu kan hre har bik lo. Inkaichhawn theih annih vangin pawn chhuah tam loh leh punkhawmnaa tel tam loh a ngai a ni tawp. .  Aizawl lamah mi an thi phuk phuk a, thinphu dep depin chanchinthar kan lo ngaithla ve thin.  Kan khuaa he hri avanga thi hmasa ber chu kan veng tawntirha cheng Pu Laia a ni a, parawl a ni a. A lainatawm khawp mai. He hri vei chu an luak a, an zawi ngawih ngawih thin. Engmah an ei thei lo tawp. An luak chhuak leh zel sia. Tichuan, zawi zawiin an kal mai thin. Aizawl lamah chuan inenkawlna te a lo zia deuh a, enkawl dama mual mual zawng an nei e. Mahse, thi an awm kal ve reng bawk. Zawlnei der an lo chhuak tiam tiam a, hun hnuhnung anih tawhzia leh inpeih a hunzia an tlangaupui chamchi reng bawk. Class 12 ka pass hma chu phone neih an la phal loh vangin kei chuan a hlauhawmzia leh thi an tam tawhzia ka hre tam lo zawk. Mahse, kan khuaa he natna a rawn len tak hnuah chuan ka mangang ve khawp mai. Thenkhat lahin khawvel a tawp dawn niin an lo sawi a, thenkhat ringtu inti ten Pathian rinchhana lo hmachhawn an tum a, thlamuanna neia insawiin an lo dawngsawng tawp mai. Mahse, invenna chang hre lo nafam chu thihnain a man ve tho. Chhungkuaa mi pakhatin a kai tawh chuan a chhung ten an kai lo thei si lo. A va rapthlak em. Kan khua angah inenkawlna a awm ve der si lo. Ka pa hi a fing hlauh a, ina inkhung turin thu min pe tawp mai. Mahse, thingtlang ngang kan nia, chhiat thata inlawm tawn kan nihna chu a hnawksak chho ta der mai. Chhungkaw bila an chhungte ruang kiltir chu thil tihchi nia kan ngaih loh vang nge kan inpui tawn lo thei si lo va, kan kai ta sup sup mai. Inkhunghran nachang kan hre har a, kan hriat meuh chuan kan tlai tawh. Ka pa, pa tlawmngai tak mai pawh chuan a kai ve ta. Ka nu a kai chhawng lo thei lo va, kan chhungkua pawh thihna chuan min kal kân ta bik lo.

Aww.. A va manganthlak tak em.. Ka ps ruang chunga ka tah lai te khan ka nu pawh thichhawngin a lum reng mai si. Sawrkar pawhin tihngaihna a hriat tawh loh, kan CM meuh pawhin tap chunga mipuite hnena inveng fimkhur tura min chah tawh kha a nia. Beisei a bo va, tum leh hmabak a tawi ta raih mai. Ka la puitling chiah lo nen, kan chhungkua min man ve hma kha chuan ngaihthain ka awm mai. Ka mawl vang pawh a ni ange. Mahse, chhungkaw pa berin min han kalsan takah chuan hlauhnain ka khat a. Thih ve chu ka hlau. Ka nuin ka pa a han zui ta zat bawk. Awmngaihna reng ka hre ta lo.

A tawi zawngin sawi ta ila, ka u chiah ram lama tal tam em em nen chiah chuan chu natna chuan min zuah ta hram!  A rapthlak turzia i hrethiam em?  Chhungkaw tinah lusûn lo reng an awm lo. A chhung chhunga mang thak pawh zuk awm a!  Kan khua chu kan pherh zo ta a. Ka u chuan ramah min awmpui a, ka be tawng zo ngai lo. A ruka awrawl chhuah ngam si lo va a tap zawih zawih lai ka phawk thin. A chang chuan thi ve law law ila tiin ka ngaihtuah fô. Ka nu ka ngai a, ka u fate ka ngai em em bawk. Tupawh ka ngai a ni tawp. School kal leh tih vel a lang hrih lo va, lan result pawh a chhuak thei rih lo. Mipui kan thlabar a, ei leh in kan tlachham a. Kan tám chu a ni ta ber e. Khawpui lamah a kiang tan tihin thingtlang lamah a thawk ve chauh kha a ni si a. Engvangin nge Pathian pawhin keini unau hi min zuah bik le..

Chumi kum chhung zawng chu ka u nen ramhnuaiah kan táp a. Rammi tih takah kan ei tur chu a awm ve zel mai. Thlamah kan unau chauha kan han cheng dun ral chu a khawharthlak tih piahlam a ni. A chang changin khaw lamah boruak a ralmuang tawh em tih a han en fo a. A tawng tam lo em a, kan khua kan rauh tawhzia a sawi ngai lem lo. Ka thiante zingah thi an awm nual a, ka va ngai thin tak em..

Kum a lo thar ta hlawl mai. Kei pawh kum 19 ka ni ve dawn ta. Ka tituai a nalh chhoin ka uin ram hna thawh a la phal chuan loh vangin ka no sar reng a. Ka vanduai âi a ni ta ve ang. Natna hripui pawh zawi zawiin a kiang ta a. Keini pawh khaw lamah kan insawn ve leh ta a. Chhungkaw kim tumah kan awm ta lo. Thenkhat la tap rawi rawi hriat tur a la awm fô va, kan thenawmte phei chu tumah am dam khawchhuak lo, Pathian ring intia inveng duh lo lui kha an ni bawk a. A mang hmasaah an tang. Pathian a awm lo ve ka ti lo, Pathianin kha natna laka inveng tur khan min duh ve em em thoa ka rin vangin pawngpaw lo hmachhawn ngawt kha ka ngaihdan a ni miah lo. Mahse, Pathian ka dem zeuh zeuh, ka chhungkaw tam zawk min lakbosak nia ka ngaih vangin. Ka la piangthar lo va, engmah ka ngaihtuah thiam lo.

"Naute, Aizawla awm daih i chak em? Kan in leh ram thenkhat hi hralh ila, pem daih ang hmiang" Zanriah kan ei laiin a ti ta thut a. Kan khua ka tih ve theih, kan in tia ka chhal theih awmchhun, damchhung atana han hnungchhawn chu harsa dawn hlein ka hria a. Mahse, ka u thu thu a ni mai.

Tichuan, ka u chuan zwi zawiin hma a la tan a. Aizawl ami te hnenah kan in leh lo leh kan ram neihchhunte chu a hralh ta a. Cheng tam kan kawl ve ta. Kan bungraw neih ang angte kan tel a, kan khaw motor lian neih ve chhun Pu Ramate LPK chuan Aizawl kan pan ta. Min thlahtu tur thiante pawh ka nei tawh lo. Kan kal hmain ka chhungte thlanah kan zuk kal a, pangpar kan dah ve.. Engmah kan sawi lo. Kan tap ru teuh tih mai loh chu..

Ka muthlu kawng tluan a. Ka u chu ka innghahna a ni tawp. Ani chuan in luah tur te a lo be fel diam tawh a. Dinthar vengah mi in hnuai luahin hun kan hmang chho ve tan ta a ni. Kan in chu thla khatah cheng 2000-in kan luah a, in neitu te an fel a, ka kawm rual tur pawh an awm. Kan dinhmun an hre vek a, in luah man pawh 1500 in an tlahniam leh. Kan lawm unau asin aw.  In luah man a to tehreng nen. Kan unau tan chuan in chu a zau mah mah em aw tih theih a ni a, Kan result kha a lo chhuak a, 2nd div ah ka pass ve a. Ka u chuan college kal turin min duh a, ka hnial naa, a thu awih loh ka hreh em vangin ka in admit ve hram. Nitin hnathawk turin a chhuak a, a taima em a, inhlawhna chu a hmu nitin. Kan unau ei khawp chu a thawkchhuak kal reng. Kan in leh lo hralhna tam zawk kha chu bankah kan dah ve a. A tum dan chuan ka zirna senso atan leh ram ruak te kan hmuh hlauha in sak ve nan a ni. Ka u hi lehkhathiam lo ni mah se, ka ngaisang a, ka hero a ni.

In chung nu Teteii nen class kan kal nitin ve a. Ka subj thiam ve ber Education ka la a, ani eraeh chuan english a la thung. Mahse, kan inkawm thei tho. Kei aiin kum khatin a naupang a, a tawng duh a, a nui duh bawk. A bula awm a nuam khawp mai. U hmeichhia leh nau mipa a nei a, an u ber chu pasal neiin a rawn let leh a, a fate pahnih nen an inah chuan an khawsa ve a, a nau mipa erawh class 12 a zir ve mek a ni. Apa Pa Dawnga hi ka pa ang chiaha ka en theih a ni a, anu Nu puiteii lah ri hluai chi, thinchhia rilru tha si a ni a. Kan innel em em vek.

"Zai, enteh, saw pa saw ka u pasal hlui chu. A tenawmzia saw, ngaihzawng a nei leh thei ngjal a nia" tiin kan hmaa hmeichhia nena lo phei mek chu min kawhhmuh a. Zu a heh hmel nasa. Teteii hian engkim min hrilh ve thin a, bialpa thlengin. Thla hmasa lawk khan a bialpa nen an inthen a, a tuar na ve khawp mai. Kei erawh bialpa ka la nei lo tluang zel. Thingtlang nula ka nihna chu ka hmu lian a, thing bik riaua inngaaihna a la reh thei lo. Thian pawh ka nei ve nual tawh a. Mahse, Teteii bak kawm thûk ka nei lem lo.

Tlaiah Tetein chaw a lo ei dawn a, a tih fo dan ania, eirawng kan bawl dun a.

"I u hi a inkhawm ngai lo reng reng, ti nge le?" A ti thut a. Ka lo nui ringawt.

"Hrilh rawh. Kohhran hi chu bel hram hram ila a tha" puitling fe hian a ti a.

"Ka hrilh ve reng, a thu hi a duh ve a. " ka ti liam puat a.

Ka u a lo haw a,  a inbual a. Chaw kan ei ta nghal a.

"U Sawm, inkhawm ve tawh rawh, a tha lo, engmah i ti chuang lo" Teteii bawk chuan a ti a. A khi suk duh chauh.

"Hmm.. Tawng thei lo hi chu i ni chiang alawm" a ti nghat a. Rum deuh hian a melh a. Ka lo nui char char thung.

Zanah Assignment kan ti dun leh a. Ka u hi a leng chhuak ngai meuh lo, in chung ten an tv hlui min pe bawk a. A en thin. Smart phone te chu a nei ve naa a khawih zen zen lo.

"Kha thingpui" a rawn ti dût a. Keima u tak hi chu aw.. Thingpui te hi min lumsak a tam zawk. A nau hi chu min hmangaih a ni.

"Zai, i u hian bialnu a nei ve tawh em? " a ti sar sar a.

"Neih ka la hre miah lo, ih.. Hman deuha a hnathawhna te fanu Zuali kha chuan a bem in ka hria"
.
"A zei lo ang chu aw" a nui har har a. Tun hnaiah ka u chanchin hi a ngaihven riauin ka hria, a ngaizawng mi le.. Ka ngaihtuahna chu ka nuihpui a. Ka u hi pa te chhe lo tak, a hnathawh nasat vanga vun uk kharh mai, hang beh ni si lo a ni a. Mithmul buk tha zet, mutmeng lian deuh mai a ni. Kan unauah a hmel tha ber an tih kha a ni reng bawk a. Mi lerh lo leh zei lo tak anih vangin ngaihzawng a ngaihsak lo mai pawh a. A duhtu tan chuan veiawm zet, pa hliah hliah tih tur a ni.

"Zai, naktuk zan kha i theihnghilh ang e aw" class rooma ka thutpui ber Dami chuan a ti a. Ka lo hre taeh miah lo. A birthday a nia, a lawm dawn a. Min sawm ve.

"Ka u ka lo dil ang. A phal pawh ka ring chiah lo" ka ti niah niah a.

"Ka dilsak dawn che mi?  "

"Ngai lo, ka lo dil ang"

Ka thiante hi khawpui hlun vek an ni a. An felin an zau em em vek. An hausa hlawm bawk a, eitur min treat hi a tam zawk. Ka inthlahrung fô. Mahse, khawpui mi nge nge an changkang a, min hmuhsitna tel miah lo vin min kawm thei zel a. Kan inah pawh an rawn leng ve tawh. Ka u an star thu an sawi thin. Ka lo lawm ve tumhrang a!  Dami te ngat phei chu apa hi Department pakhata Director ni lai a ni a, An upa ber mipa lah MCS a ni bawk. Dami u chiah nula hi designer lar lutuk kan ngaihsan em em a ni a. Dami hi a laktlak loh ta ber anih hi.. Han ruih zeuh zeuh changte a nei thin. Mahse, a fel em em tih ka hrechiang. Min duhsak a, kei pawn min mamawhna zawnah chuan tlanchhiatsan loh hram ka tum.

Zanah ka u bulah ka sawi a. Ka rin loh deuhin, "Kal ve rawh. Khawpui nun hi a tha zawnga tem ve pawh a tha lawm.. " a lo ti diam a. Ka lawm tawp.

Teteiin ka kawr hak tur mawlh a lo dap. Ani chu a kal ve dawn lo thung. A kawr min hawh a, ka awm thiam lo. A chhing deuh em aw ka ti. Pheikhawk erawh sang vak lo ka bun a. Ka u chuan min melh vung vung a, "Naute, i nalh lutuk. Thingtlang nula i ang miah lo" a ti a. Kan nui dun a. Aizawla kan awm hnu hian vawi hnih chiah kan khua leh ka chhungte chanchin kan sawi. Ka u hian a pehhel hram zel tih ka hriat avangin ka sawi duh ngai bik lo. Zan muthmunah erawh ka tah ruk chang a la tam. Hei eraeh ka thup ve tlat.

"Te, lo kal ve la ka ti. Ka zâm eee"

"Lo kal ve chu ka chak lutuk, mahse, ka ke ka tina sia.. Tihngaihna a awm lo a ni" a ke a bilh hlauh a, a vung bur sia, tihngaihna. a awm bik lo  a ni.

Ka thian ten min rawn lam a. Hlimi scootyah ka chuang a, "Naute, zu te kha han in ve lo la, rui lo hai loin a hlim theih ania" ka u thu min chah chu ka vawng reng ang.

Dami te inah hian vawi hnih ka leng ve tawh a. An fel vek. Anu phei chu a nui duh si, nelawm tak a ni. An hausakna chhuang tur nise inchhuang thei an ni vein ka hria. Mahse, Pathian an tih tlat avangin malsawmna pawh an dawng ka ti mai. In chhung pawh an chei nuam khawp mai. Pa berin hunserh a hmang a. Rei kan rial hmain chaw kan ei ta a. Chaw ei kham party chu an nghahhlelh ber a ni.

"Zai, Mama i la hmu ve lo tiraw.. Hawh ka inhmelhriattir ang che" a rawn ti a. Zu rim a nam hiam mai. Min kaihna lamah ka kal ve mai a.

Ka hmaa palian zet ding chu ka chhoh en ha a. "Mama a nih hi kan u ber, nichin mai khan a rawn haw a. Min duattu ber a nih h, mam, hei hi ka thianthaber Zaii anih hi" a ti a. A polite mang e.

Kan inchibai a. A kut chu a dam thlup mai. Chutianga mipa hmel tha leh lian chu ka la hmu ngai lo nge ka melh deuh reng niin ka hria. MCS a ni tih ka hria, mahse, a lan dan chu a sual hmel. A sam lah a punk ropui si, a ngo lam a pawl a, a hmui chu a chhah lek lek, a mitmeng chu a na lam deuh a ni. Milarah hian an deuh anei, tu nge ka hre tawh lo. Eee.. Zayan malik a mi khah.. Gigi hadid bialpa kha.. Kha kha a ang. Zayan aiin a palian zawk maithei. A nelawm fahran lo bawk. Min be zui lo va, biak ka tum lo bawk.

Theitui ka in ve a. Ka u min chah kha ka hre reng mai. Mi che tla chu hmuhnawm ti takin ka lo thlir reng ringawt. An lam tan ta. An hnehsawh teh e.

"Lam ve ila" Ka hre ngai lo. Dami thiante zing ami tho aniang. Hmel chhe vak lo, sam kir lek lek a ni. Ka lu ka lo thing a. Ka thiam teuh si lo va.

"Bena ka nia, Dami thianpa" tih pahin a rawn thu ve a.

Ka lo insawi ve vat a. Kan titi ta reng a. Tawng rin a ngai deuh a,  a hahthlak. Kawm eraeh a nuam angreng. Ka hawi kualna lamah Dami u, min lo melh rengtu ka va hmu. Ka lai ngei mai. Ka en rei ve ngam hauh lo. Bena chuan ka number te min dil a. Ka pe ve mai. Hawn ka duh ta riau mai. Dami ka zawng a ka hmu mai si lo.

"A roomah a awm aniang, an pa nen" Seniin a tih chuan a room lamah ka chho a, ka hawn tur thu hrilh lo va hawnsan ngawt chu nuam ka ti chiah lo. Bakah min thlah tu tur ka nei si lo va.

A room kawngka chu ka kik a, an laklawh nge a lo hawng thei si lo. Let leh mai tuma ka inher lai tak chuan, kut tha chak zet hian min rawn pawt lâwp mai. A mitmeng na zet chu ka hmachhawn ta ran a.

"Engmah sawi lo vin min lo zui rawh" a ti vawt raih a. Ka hamhaih vek. Min kai a, inchung balcony-ah min hruai phei a. Mi 10 vel tur an lo awm a. Mipa leh hmeichhia an ni.

"Hei hi ka nupui hual chu a nih hi. Zaii a nih hi" a ti ta mai. Chhei le.. Ka mumang a ni ngei ngei ang. Kut an lo beng dar dar a, tumah chu hmuh chiah ka nei lo. Hmeichhe hleitling zet hi a rawn kal phei a, a hmui a sen tha ngei mai. A hmel pawh a tha.

"Lar, ka awih thei lo zawk. Hetiang naupang hi maw i sava bu hual chu" a ti a. A dar a san zauh a. Ngunthluk zetin min melh bawk.

"Ka tan chuan hmeichhe tha ber a ni"a ti leh hmiah.

"Thil ka hrechhuak. Zaii hian tu emaw min hriatchhuahtir.. Aw.. Ni e, Lar, a mak lo ve. Saroni nen danglamna an nei lo" Mipa pakhat rawn ding hluai chuan a ti ve a.

"A dik ang" ka bula ding chuan a lo ti leh sup. A ngaihna ka hre ta lo.

"Wow!  Saroni avang in he nu hi i thlang tihna em ni? " hmeichhia khan a ti leh a.

"A ni thei ang chu" leh hmak mai a. Ka mawl ka ti. Engmah ka sawi ve lo chu. Mi lian nula leh tlangval ho hmaah dawt hmangin min tlangzarh a, eng emaw tak sawi tur ka ni asin. An hmuh lai reng chuan duh thawh zetin min rawn fawp lehnghal. Ka dawh tawp. Khatih lai khan ka â vek alawm.. Nia, ka chhaw huih nia.

Min kai chhuak leh a. "Ka lawm e" a ti sup a. Dami room kawngka a kik a, "Mate, i thiannu hi ka va thlah ang e" a ti satliah a. Kawngka a lo hawng a, phelh phang hian, "Zai, min hrethiam rawh. Ka awm a nuam lo lutuk a, ka mu lawk a. Hei ka tho harh dawn e" a ti a. A u laka inthup mawi a tum a nu tih ka hai lo. A u fing lutuk pawh chuan a hai lo vang.

Engmah ka la sawi ta chuang lo. Kan in kan thlen dawnah a ding dawt a.

"Lungtum i ni em ni? Nge sangha zawk? " a ti hriam hraih a.

"Ka hre lo" ka ti mawl tawp.

"Ka tihamhaih che tih ka hria alawm.. Kha hmeichhe hnar bo nan khan hmanraw dang ka nei tlat lo a ni" a ti ta a.

"Umm.. "

"Theihnghilh vek rawh"

"Aw le"

"Hmm.. Hrep tak che hian" a ti sup a. Kan in kawtah a ding a. Ka chhuk. Kan inmang tha lo.

Kawngka chu ka hawng a, ka u a mu tawh mawni le.. Thawm ka nei lem lo bawk a. A reh hle. Rooma ka inthlak lai chuan a rawn khuh ta kherh a, mahse, "Zai, i lo haw tawh law.. Thawm te rawn nei. Ve ta che" Teteii aw in a rawn ti a. Ka meng phawk hru..

Ka inthlak zo va, ka chhuak a. An lo chhuak ve a. "I u hi a nuamsam lo deuh a, ka lo awmpui alawm" a hmel pha deuh dai chuan ka nuih a tiza. Ka u phei chu lai chhe tak a ni. Ka nui chhuak ang tih ka hlauh vangin intifai turin ka kal ta daih a. Teteii pawh a haw zui nghal. Thinrim angah min ngai ang tih ka hlau hnuhnawh. Ka hlauh ang ngeiin, "I van lungawi loh hmel. I u ka lo awmpui chu" a rawn ti ta reng a.

"Lungawi mah mah. Ka nuih a za a, ka kal daih nih kha"

"Hmm.. Nge i nuihzat? "

"Ka hrethiam ve lawm.. 😌😂"

"Eng nge hriatthiam tur awm a 😏"

"In awmdan vel kha 🙄🤔"

"I zak lo 😑🤐"

"Ka mu dawn.. Muttui.. Ka thinrim lo. Ka lawm zawk aw"

"Muttui le.. Naktukah ka hrilh ang che"

Ka u chuan bialnu a nei ta chu ania. Ka thiannu lehnghal. Mahse, ka lawm. Teteii felzia leh rilru thatzia ka hria. Mahse, kha pa kha.. Ni e, Lara kha.. A mak e, ti nge khatia a awm. Kha nu hnawhbo nan khan maw.. Ngaihtuah zui reng chungin ka lo muhil a, ka mumangah Lara khan min lo khawih lehnghal. Mangpui an tih chu ka mang ve ta.. Ka va zak e.. Hihi..

"I kal hnu lawk khan haw chhoh ve mai ka tum a. A phal tlat lo va. Tv kan en dun a, ka nute lah an zin daih bawk si. Phone kan khawih dun char char a, whatsappah 'ka lo thu phei dawn' a rawn ti a. Ka nui nasa, sawi ve mai awm. "Aw" ka va tia. A rawn thu thurh a. A ngawi leh veng veng a. "I awmdanah hian min duh tih ka hria" a rawn ti ta hlawl a. Awii ka zahzia chu, a frank mai bawk sia.. Ka ngawi reng ringawt. Min rawn kuah a. A zei lo nasa bawk sia e.

'Tete, kei chu heti mai hi ka nia, ka nau hi ka damchhan a ni mai. Ka hausa lo va, mahse, ka nau a hlim chuan ka hlim a ni mai. Chuti chung chuan min la duh tho em? Engmah ka ni lo chung hian" a ti ta a. Ka thinlung a dek tawp. I u ka starzia chu i lakah pawh ka thup hleithei lo a nia. Ka lawm bawk si.

"U sawm, ka ngaisang lutuk che. Chuan ka duh bawk che" ka ti ve tawp a. Chuan min fawp daen emaw ka tia, ka lo inring ve em em a, ka kut a hum daih.. Haha.. Mahse, ka hlim tawp. Lalzai, ka nau i ni dawn aw.. Ka thu i awih loh vaih" a ti ham ham a. Ka lo khi thaw ringawt. Kan lawm a kim e. Ka u hmel pawh hmuh a nuam. Pa Dawnga te lahin an duhsak si, harsatna an tawh ka ring lo. Ka lawmpui e.

"Zaithantluang" teh bawl a. Msg mah nise, a chaltlai mah mah. A number ka save hauh lo lehnghal.

"Eih" ka va ti a.

"Hmuh che ka duh. Khaw nge niang"

"Ve ringawt a che. Tu nge i nih pawh ka hre lo"..

"Ka dp kha en teh"

Kan en nak chuan, ka thlalak a lo hmang. A hming dah dan ka en chuan ka ner sak. Lara lek lo niin. Kei aiin a upa naa, û a rem chiah si lo.

"I va zak lo ve"

"I la hre dawn chauh. Ka rawn hmu ang che. Khaw nge i awm? "

"I â tawh nih chu"

"Ka lo kal"

Awii.. Hmela hi a lo tak tak angem le.. Class ka kal lo va, vawiin chu. Ka nawmsam loh deuh vangin.

Ka thil eina ka sil lai chuan hlauhthawnn ang ngeiin kawngka a lo kik. Phur fahran lo vin ka va hawng a. A lo ding zuah mai. Sawi tur pawh ka hre lo.

A thut hnu chuan tui in tur ka laksak a.

"Ti nge class i kal loh? "

"Ka nuamsam lo va"

"Lo thu teh" ka thu ve mai. A thu hnial hi ka ngam lo aniang.

"Hei enteh.. " tiin a phone min entir a.

IG-a Mi larte pic postnaah chuan, khami zana min rawn kiss lai thlalak leh ka hmel chiang taka a lanna hi an lo dah nia! 

Caption mawlh chu, "Lara chuan a Lungdumtu a tawng ta. A savatê chu" tih an lo dah.

"Eng nge awmzia? "

"A awmzia chu nang leh kei hi kan innei dawn"

"Maw..!? "

"Lawm lutuk teh suh"

Hmela mai mai chu. Mi lar anih pawh ka hre lo. Ti nge mi lar huangah te an dah ve ngawt. IG ka khawih loh vang a ni ta ve ang.

"Engvang in nge ka neih ngawt ang che? "

"A chhan a awm a ni mai. College pawh i kal zawm thei ang"

Engkim chu a mak ka ti em em a, ka hamhaih vek.

"I û ka titipui hunah a hun leh ni chu kan ruat dawn nia"

" i va han zak lo tak.. "

"I hre zel ang. Ka duh apiang ka nei thin"

Min chhuahsan hnu thleng chuan awmngaihna reng ka hre lo. Dami ka biak a ngai.

"Zai, ka hrethiam bik lo. Ka u khan a sawi reng che a, a duh ve tak tak che aniang. " a ti ringawt. Ka va awih lo tak.

"Anih saroni i hre ngai em? "

"Umm… ka u bialnu hlui ania, in inang khawp mai. Chuvang chu aniang a duh che"

Huizzz.. Ka chunga thil thleng teh hrep chu. Zanah Teteii leh ka u bulah ka sawi ta vek a. Teteii lah chuan Lara chu a lo hre nasa, min lawmpui viau mai. Ka u erawh a ngawi ngal a, a ngaihtuah muk hmel khawp mai.

Kar khat a ral a, a reh ta rih. Dami te farm-ah picnic turin kan liam a. Khawpui nun chu nuam ka ti chho ve zel. Ruihhlo leh a kaihhnawiha inhnamhnawih erawh ka duh lo. An rui suau suau a, kan tam lem lo. Eirawng ka bawl thung.

"Kha hei in ve rawh. A ruih theih loh"khi thaw chungin Dami chuan a ti a. Ka lo in ve mai. Chaw kan ei a, thenkhat chuan an ei hleithei meuh lo a ni e.

Khua a thim ruai tawh a, motor khalh tur ber te an rui si. Mang a ang tan deuh. Ka u ka bia a, thil awmzia ka sawi a. Damiin ka ph min chhuh a, "U sawm, farm house-ah kan riak mai ang. Naktuk sat a ni tho bawk a. Lo ngaihtuah suh. A fel lutuk, engmah a rui ve lo ania. Pawi ka ti lutuk" a ti a. Ka u pawh chuan hrethiam takin, "Mate, fimkhur la aw.  " a rawn ti a. Rilru nuam chiah lo vin farm house-ah chuan ka riak dawn ta. An chatthla phung tawh a. Thenkhat la in belh mek pawh an awm. Nuam tuar thawm lah a ri ve reng bawk a. Ka zo lo lam chu a ni.

Engtik laiin nge a lo kal ve ka hre lo. Min kai lawp a, kan riahna tur farm house piahah min kai phei dawt dawt a. In te fel ren rawnah min luhpui a. A reh dûk mai.

Engmah a sawi lo, min rawn fawp nghal bawrh bawrh a, a tirah chuan ka hlau deuh, ka lo insangmar teuh a. Engtik laiin nge a fawhna chu ka dawnsawn ka hre lo. Mak tak maiin ka mamawh ngawih ngwih. Ka chhungril hi a za ta et et a. Ka kap lah chu a hnawng pur lehnghal. Nula thianghlim ka ni asin. Amah ai mah chuan ka tuihal zawk a, mipain min la khawih ngai lo va, ka zei lem lo. A tih ang ang chuan ka awm ve tawp. Min phelh ruah lai te chuan ka hnute te chu ka lo khal nia!  Heti em ema hurnain min chiahpiah hi ka damchhungin ka la hre lo. A hmanhmawh lo hi ka ti khawp a. Ka lo ban hiang hiang mai. Rilru fim ka pu miah lo.

"Ka hria ka hria, min mamawh tih hi" a ti sup sup a. A rawn nawr ta a. A na zawk mai. Ka îp chawih a, ka then nag nang mai. Mahse, dim tein bul a tan a.

"Ka beisei ang chiah" a ti leh sup a. A rei a, a uar telh telh a. Nawmna nasa tak avang chuan ka thaw hlawi hlawi a. Zah reng ka hre tawh lo. Vawi hnih lai nawmna nasa lutuk vangin ka rak chhuak. Hei hi maw sex chu.. Ka virgin ta lo. Chu chu ka ngaihtuah duh lo lui tlat!  Zankhua deuhthawin nawmna lipui min hleuhpui a. Ka chau thei lo chu a mak!  Khawvela mi tenawm ber ka lo ni.

A tuk chawhnua thil thleng erawh chuan ka nun zawng zawng a ei chhe ta. Ka u rawn hawng chu a thu hnawk a, a kun ngawih ngawih mai.

"U, i tha em? " ka ti a.

"Ka tha lo ang tih ka hlau ngawt mai"

Tih pahin a phone min pe. Kareii!  Ph ka thlauh tawp. Lara nena kan chetla lai zawng zawng chu ka mithmuhah pholanin a awm ta. Ka hrawkah hnawhtu a awm. Ka tawng thei lo.

"Naute, engtin nge i tih theih? " beidawn hmel em emin a ti a. Ka u chu ka va zah tak em.. Thih nghal mai ka chak a ni.

"Kha vid kha Lara min lo thawn ania, i nau nen hian kan induh a, kan inhmangaih. Min neihtir rawh" a rawn ti a. Mi dang chuan an hmuh ve loh tur thu a sawi bawk" a ti a. Tlemin ka thaw huai.

"U, he pa hi a mak em a ni. Ka hre bik lo. Nizan khan ka chungah eng nge thleng tih hi"
. "ka rin danin a duh ve tak tak che anga, a neih theih nan che he vid hi a hmang tangkai aniang"

"Mahse, û, pasal nei rual ka la ni hleinem. Kum 20 chauh ka nih hi"

" A la timualpho duh hial maithei che asin"

"Amah kha ka duh ve hleinem"

"I duh miah loh hnenah i thianghlimna i hlan si a nih hi"

Engmah ka sawi ngam tawh lo. Lara a rawn kal fó va, ka u nen an titi thin. Mipa sual tak chu niin ka hre lo. Min pawngsual a ni si lo va, thiam lohna a nei si lo. Ka tan kawng a ping em em.

Ka u duh dan angin kum 20 ka nih kum, kum tawp lam Oct ni 17ah Lara nen chuan mawl mang takin sawm bikte nen kan inkutsuih ta. Ka chunga thil thleng hi engmah ka hrethiam lo. Nang pawh ni la mak i ti ang. Film a ang i ti ve tho ang. Thingtlang naupang kha Aizawl milian nupui ka ni ta daih. Kum naupangtein pasal ka nei a, inngaihzawnna boruak tem miah lo vin. A nihna takah chuan blackmail ka ni tihna a nih chu. Vanneihthlak takin ka pasal hi a hausa a, a chhungte an fel bawk.  Mumang mai mai anih hi tia insih harh ka tum chang hi a tam mai. Kan nupa thlalak chu IG te, fbah te an post chei chuai a. Tuma hriat hlawh lo, thingtlang atanga lo pem ve mai, nu leh pa pawh nei tawh lo kha vawi leh khatah mi nawlpui hriat ka hlawh thut a, awmdan ka thiam lo. Vannei min ti fe fe leh min thik em em an kat nuk a. An ni aiin mak ka la ti fo zawk tih hria se mak an ti ngawt ang. Kan inneih zanah kan mu dun lo.

A chhan chu ka period tlat!  Pawi ka ti lo nasa.

A mizia engmah ka la hre lo va, an chhungkaw inenkawl dan lah ka bangbo em em bawk. Thil dik lo eng emaw tak ka chungah a thleng a ni ang tih rin chang ka nei ve thin, mahse, kan inneih atanga thla khat a liam meuh chuan, "Lara hian min hmangaih tak tak anih dawn hi" ka ti ve thei ta. Ka tana mipa hmasa ber a ni bawk a, ka nun pawh a hlim chho tan ta. Ka u nen pawh kan inbepawpin kan intlawhpawh reng a. Lara pa thurawn angin class 12 certificate kan lei a, an office-ah 4th grade hna a pe lehnghal. Hna rum thawk taeh lo va thla bi hlawh a nei ve ta chu amah ai mahin ka lawm awm e. Teteii nen pawh an la tha chho ve zel e.

Nupa kan nih hnua sex kan hman hmasak ber zanah chuan, " Fapa duhawm tak min hrinsak ang che" a ti a. Hmangaihna lam thu min hrilh ngai lo mah se; min duat a, pasalin nupui laka a tihtur zawng zawng a hlen chhuak vek. Ka nute lahin min duat bawk. Lara nau designer erawh phai lamah a awm tam a,kan innel tehchiam lo. Dami nen lah thian tha kan la ni reng a, college erawh ka kal zawm ta lo mai. Awmpui pahnih lai kan neih avangin ka hahdam a, mahse, eirawngbawl hi nuam ka tih em vangin ka bawl ziah tho. Ka pa hian min fak bang lo thin. Ka va nuamsa em. Ka nute kha la dam se, he dinhmun hi ka luah kher ang em ka hre lo. Pathian hian kan thatna turin ro a rel tak tak anih dawn hi.

Ka nu hian nau ka pai leh pai loh min zawh a ching riau,  tu hmel hmuh a chak tawh voau aniang. Kei lah ka la ruak reng ringawt si.

Zan khat a inbual hlanin a phone a ri a. Ka pick up sak a, "Hello"

"Amah a awm na nge? " hmeichhe aw tliang ral. Hian a rawn ti a.

"A inbual a"

"Aw min lo hrilh sak la, min lo be lawk teh se aw"

"Aw le"

A lo chhuah chuan ka lo hrilh a, number a hmuh chuan min rawn melh hrawk a. Eng emaw. a awm. Ngaihthat lohna eraeh ka nei lem lo. Pawnah a va be ta daih a.

Kar khat lai chu min zinsan leh ta. An hna vang hian zin a ngai fo si a. Ka u ina leng turin ka insiam a. Ka tlawh khat riau mai. Ka ngai ve deuh.

Vawiin chu holiday a ni bawk a. Ka va thlen chuan inchungte chhuar tur a lo siam a. An makpa la ni mai tur chu an lo kil laih a. Ka nuih a za angreng.

"Zaii hi chu i vannei teh e.. " nu ber chuan a lo ti vat a.

"Kei pawh hi ka vannei" teteiin a lo ti zauh. Mitmeiin ka u chu a kawk a, kan nui zo ta vek mai. An chhungkaw inpawhzia ka hria a, an bula awm hi a nuam thei ania.

"Vawiina inpa kalpui kha nangmah emaw ka tia, auh ka tum lai takin 'Saron, i lo kal a ni maw' hmeichhe pakhatin a rawn ti a" Tetteii u khan a ti a. Ka nui lai ka tawp chawt. Kan pa chu a zin daih bawk sia, naktuk tuk leha lo haw a tum kha a ni si a. Tin, saroni tih hming ka hriat chuan ka danglam bawk. Mahse, an ngaihthat loh ka hlauh vangin ka sawi zui duh lo.

Zanriah kan kil laiin Teteii u thusawi kha ka sawi chhuak ta a.

"An hai aniang, mama ang deuh hi a awm ve lawm" ka nu chuan a lo ti sam èt a. Ka awih miah lo. Ngaihtha mang lo zetin ka mu a. Kan pa chu ka call ta tawp a.

"Khaw nge i awm? "

"Tunah chuan hotelah, dar 8ah meeting ka nei a, ka chhuak tep"

"Aw le.. Nih chu.. Bye" ka ti a. Sawi tur dang ka hre lo. Rilru nuam lo deuhin a lo hawn hma chu ka awm ta a. Thil tam tak ka ngaihtuah bawk. A lo haw a, kawr leh rangkachak thi min lo hawn a. Ka lawm viau rualin min kaptu a awm tlat si.

Nupa nun min hmanpui lai te chuan keimahah kim lo a awm. Mahse, ka ngawi reng.

Nunphung pangngai ang chuan kan kal leh ta phawt a. Ph call a dawng deuh reng a, a ph ka en ang tih hlau niawm takin a keng deuh reng bawk. Zan khat a inbual hlan thoin luh ruk ka tum a, pattern a thlak daih tawh. Hmm.. Thil dik lo chu a awm.

"Ti nge i ph pattern i thlak? " huaisen ka inti mang e.

"Ka thlak thei lo mi?  Ka ph a nia"

"Saroni nen khan in inbe thin tirae? "

"Be thin e. Mahse, thian angin" ka na zawk mai.

"Anih tak chu" ka ti nghat a. A sam hnawng chap chungin min rawn pan a. "I thikthu tereuh hi ka duh thin ngawt mai. Ka nupui i nih hi. Chu chu hre reng rawh. Nupui ka thlak lo vang" a ti sup a. Ka biang a nul thuak a. Ka lo hlim leh sawt mai.

Lehkhabu ka chhiar nasa a, pasal tihlawm dan te chu ka zah loh chinah ka apply ve reng a. Tawng tam te ka ching chho ve a, kan inbiak tam poh leh kan innelin kan inngaina dawn tih ka hria. Thianhoa party tih luklak hi a nei fo a, min hruai zeuh zeuu bawk. Ka ngawng lutuk tawh bik lo va, nuam erawh ka ti em em ngai lo. Ka pasal vangin ka kal a ni mai.

Ham bai bai chungin stepah chuan ka pen thla hlak hlak a, ka rin loh deuhin an lo tho vek tawh mawle.. Sana ka en a, an thawh hun a la ni si lo. Kan pa erawh gym ah a kal ziah vangin ka thawh khalh ngai lo. Mak ka ti deuh a, helhkam nei hmel an pu run lehnghal.

"Nu, in va tho hma hlawm ve.. " ka ti satliah a.

"Nia, Pune lama i pa chhung ten chhiat an tawk a. Kan buai anih hi"

"Ehe.. A van pawi ve. Engtin nge niang"

"Kei leh i pa leh mama kan zuk kal anga, tha deuhin in in lo nghak dawn nia"

Hmm.. Ka khua a har leh dawn mang e. Kar khat lai an zu châm a. An rawn hawn zan chuan an chau ve bawk nen, an ngui nghiai mai.

"Ka pa chhungte tu ber nge? ' kan pa bulah mut tawh hnuah ka ti a.

"Ka pa nu ka pi nuta a nia.. "

"Umm.. Pune ah daih daih an awm a.. Ti nge? "

"Tette atanga awm an nia, pasal a nei zui ngjal bawk nen,. "

'I chau awm sia, muhil tawh rawh"

"Umm.. Zanin chu ka duat lo mai ang che" a nui suk a. A va hmel tha tak. Zinga ka harh chuan ka khi sak a, ka kawngah a lo kuah thlup mai. Nau hi pai thei tawh ila ka ti mang e.

Chhunah ka nu a damsam loh vangin a dawr ka va nghahsak a, ka inhralh thei phian.

Dar 5 velah ka hawng a. Ka inbual a, zanriah kan ei nghal. "Zaite, hmanni in inentir khan Doctor khan i tha. ati maw khah" a ti a.

Nia, nau ka pai lawk loh vangin kan inentir kha a nia. Thla nga lai kan innei tawh a. Tu hmel hmun an chak si chu ka hmanhmawh ve vek.

"Umm.. I tha vek min ti"

"I indang bawk si lo va tiraw? " ka nu. ani.

"Indang nang" ka inthlahrung deuh. Lara'n min rawn melh a, min lainatna chambang ka hmu ve thiam tlat.

Zan muthmunah, "Ka nu te hi chu hrethiam rawh. Tu hmel hmuh an chak tawh em a ni" ka hnute khal niap niap chungin a ti a.

"Ka hrethiam alawm. Ka inthlahrung, rai ve tawh ka chakzia hi"

Min rawn en a. A nui suk a. Duhthawh zetin khumlaizawlah kan inbuan leh ta thiak thiak mai.

"Damdawiinah chuan ka drop che anga, duh leh i thiante pawh tlawh la, kan haw rual dawn nia" a ti a. A nectie chu ka suih a. A sang si a, thutphahte ka dawh thin.

Nimin piah atang khan ka khua a sik ser ser zel a, ka pum lam chiangkuang lo nen ka luak a chhuak reng bawk. Vawiinah ka inentir dawn a ni.

"Nuuu.. Nu.. Lo haw hma rawh aw" ka au chul mai. A ngaihna hre lo zetin, "Aw le.. " a rawn ti tha ve mai a. Kan pa eraeh ka be duh thak lo. Roomah ka tawm tlat. A office bang a rawn haw a. Khumah ka lo thu tûm bur.. A nectie phelh thawl chungin, "I mood a va chhe ve.. Eng nge thleng? " a ti a.

"Doctorin min hau hrep alawm"

"Engvang? "

"Ka lam kualna lamah ka tlu a"

"Eng a?!  I lam maw.. Eng nge awmzia"

Ka ding a. Hmai pho lahin, "A chhan chu Lara fa ka pai miau alawm" ka ti ta a.

Minute reilote a hamhaih. A rang arangin min rawn pawm thlawp a. Min virpui ta chiam mai. Ka lu a hai leh roh si. A inthiam lo leh hnuhnawh. Inthlak pawh inthlak lo chuan, in hnuaiah min pawm thla a.

"Ka nuuuu, pi i ni tawh dawn.. I hria maw.. " a ti vak a. Ka hlimnain a tawnsan lai ber a ni hial awm e. Ka nu leh pa te lawmzia chu hai rual a ni lo. Dami pawh a phi chung mai. Chumi zan chuan damsam mang lo zetin kan pain ka rai lawm nan min han vawi khat hram a! Hmm..

Nau ka pai tak atang chuan duat theihtawpa duat ka ni a, awm dan ka thiam lo lek lek zawk. Nau pai ka haw lem lo nge a tira ka luak zeuh zeuh bak kha ka vir ta hle zawk a. Ka ei chak zawng ka sawi tawh hlek chu leisak ka ni zel. A nuam a ni mai. A nuam.

"Mipa anih chuan Rochanpuia kan ti ang" ka dula zut chungin a ti a. A chhuak ngai mang lo, zan lamah chuan.

Zin pawh min zinsan ngai hek lo. Thla 6 a nih chuan ka puar ve tawh viau a. Thawmhnaw lamah ka buai lo, ka u in phai atangin a lo design a, mawi zet zet ka ha thei reng mai. Mi vannei ka va ni em..

"Aw.. A hrin a hunah chuan chhuanlam tur a awm mai ang. Tha tetein han hring phawt se, umm.. Nia, inenkawl tha rawh se, Nu a ni tawh dawn sia.. Haha.. Chuan ka pu pawh a tha chho zel turah ngai ang. Aw.. Cu chu lawm fapa ngei a nei lo vang tih kan hlau theuh. Amah Lara hian a duat thiam bawk a, a hrisel viau chuan ka hria.. Kan nghak rei ta bawk a, a tawpa tawpah chuan.. " ka nuin ph a biak lai chuan ka ding khawng reng ringawt. Ngaihthlak ruk ka tum pawh a ni lo, Ka u nupui neih tur chungchanga ka pa biak rawn tuma ka kal in ka hre fuh ta hlauh a ni. Ka chungchang a ni tih ka hria, mahse, engmah ka hrethiam lo.

Ka ngawih chawih em vangin Lara chuan mak a ti deuh aniang, min be sek a. Ka chhang mang lo. Ka nu thusawi awmzia kha ka hre duh a ni. Nau ka pai an nghahhlelh chhan hi tu hmel an hmuh chak vang a ni lo tih ka hria. Engvang nge?  Tu vang nge?  Ka hriat a ngai. Thil dik lo zawng a awm chiang.

Ka muhil der tlat a, Lara computer hmaah thuin an office thil a buaipui a ni ngei ang.

"Hello"

Min rawn thlek a. Ka meng ru tih a hre lo a ni ngei ang.

"Umm.. Kan tha alawm. Ka lo biak loh che chuan min lo be taeh suh ka tih kha"

"Engpawh nise, tha takin a hring em em ang. Hahdam takin awm rawh"

Ka chungchang bwwk maw.. Ka pasal pawh hian thup zawng a nei ngei mai. Eng nge tih hriat chu ka hna a ni ta. Fing taka ka chet a ngai dawn tih ka hria. Chet dan tur ka bangbo nasa, ka hriat laiin tuman ph an hmang duh dawn lo, an ph khawih theihna lah ka nei hauh lo. Saroni an tih fo kha ka hriatchhuah a ngai, mahse, engtin… huizzz.. Ka mawl bawk si.. A va hrehawm tak em..

Kawng ka dap ka dap a. Ka hmu zo si lo. Kan pa laptop te chu ka han bih ngial a. Ka hmuh phakah engmah a dah duh ka ring si lo. Document ah ka lut a, Zaii tih ringawt folder lo awmah chuan ka lut ta a.

"A danglam a, a duhawm bawk. Eng rilru puin nge he buainaah hian ka hnuh luh ka hre lo. Ngilneihna nei hauh lo ka ni bik lo va, a hmel ka en a, ka thlir a. Ka melh ngawih ngawih thin. Ka lainat a, tihtheih erawh ka nei tawh si lo" tih zawng hi a lo inziak!  Ni e, nupa nun kan hman lai te hian min melh vawng vawng fô!  Min hmangaih vangah ka lo ngai mai thin. Tin, kan pahniha kan chhuah dun changte hian ka chet dan ka awm dan ka nui te hi min melh reng thin. A mitmeng ka chhiar ngai lo va, ka hrethiam thin lo anih kha..

Engvangin nge ka pasal hian min lainat? 

Mahnin inthiam lohnaa khat chungin hacker ka ruai ta tawp. Kan pa phone chu min hack sak ta a. Ka hmuh theih tura engkim pholan a nih takah chuan ka hlimna zawng zawng chu phumbo a ni ta. A va mak em!  A rapthlak  a ni. Mahse, thuruk a la awm cheu!  Ka hmuh leh hriat phak loh thil inthup a la kuh tun ang tih ka ring.

Soroni nen an inbiak dan hi ka'n tarlang ang e.

"Doctor chu i la hmuhpui lo mi? "Saroni..

"Aw.. Chhuanlam ka la dap mek"

"Chhuanlam vak a ngai em ni? Mipa nge hmeichhia a pai tih te chu hriat a chak ve tho ang chu'

"Nia, ka lo ngaihtuah ang"

"Chuan, i thawk rim sia, i hriselna te kha ngaipawimawh la"

"Nang pawh.. Fa i nei tep tawh sia"

"Lar, kan beisei leh duhthusam chu a thleng tep ta.. Ka hlim. Ka pu pawh a chak sawtin ka hria. A sumdawnna pawh a la kal tluang zel e"

"Sasa, kei chu a chang chuan nuam tih lohnain ka khat thin. Kan lo innei ta anih pawhin i pu sumdawnna kha chu ka chhawm dawn lo ania"

"I sawi ziah ka hria. I thu vek ka tih kha. I pa khan a chhawm mai ang chu"

"Mak ka tih fo chu ka pa hian hna sang tak thawk tho siin engvangin nge khatiang sumdawnna kha a kalpui ve tlat le"

"Kan hriat phak pawh a nih loh chu.. A pawimawh ber chu nang leh kei kan inhmangaihna hi a ni. Fapa emaw fanu paeh nise kan neih hunah chuan, ka hlimna hian van a tawng tawh ang. Lar, ka hmangaih che"

"Kei pawn ka hmangaih che"..

Heng ka hmuh chinah hian ka duhtawk mai. Engkim ka man thiam bawk. Lar leh Saroni chuan ka fa pai mek hi an fa anga enkawla kei chu min thehthang an tum tih hi. Ka hmuh tirha ka thidang lo kha a mak!  Ka pasal hian min hmangaih emaw ka lo ti ve tak tak hman asin. Mahse, ka mawl em a, thil ngaihtuah vak chi ka ni lo kha an tan malsawmna a ni. Kan intawn dan, ka virgin a hawn dan, video leh ka u thlengin ka ngaihtuah kim barh a. Engkim ruahman lawk a ni tih ka ringhlel hauh lo. Ka mawl luat ka tuar ta a ni ber e. Chet lak dan tur ka hre lo, ka u ka hrilh ang nge hrilh lo vang tih ka ngaihtuah a, hrilh rih loh tha ka ti. A hlimna tihchhiat ka duh lo. A damchhan ka ni tih ka theihnghilh ngai lo.

Ka intihlum daih mai dawn em mawni leh ka ti a, kei min hnawla ka thisen ka fa lo piang tur an lak dawn vang pawhin. Mahse, thi ta ringawt ila, hmeichhe dang nun an tichhe leh si ang em.. Saroni hian fa a nei thei lo nge engvangin nge ka fapa chu an mamawh em em?

Ni hnih thum chhung chu mumalin ka khawsa thei lo. Kan pa lah ka be ngai mang lo. Lemchan hi ka thiam ve mawlh si lo. Ka dam lo der twp. Ka fa avang chauhin min ngaihtuah em em a. Min duat lutuk bawk. Mahse, chung an thiltih chu ka ten hluah hluah. An thuruk chu hriat ka chak ngawih ngawih bawk.

Kan awmpui pakhat zawk an khuaah a haw a. Pakhat lah ka nuin dawrah a hruai. Keimahin ka awm ta. Chet lak hun lai tak a ni. Tuman min hmu lo mah se, thawm. Dim leh rukru ang maiin ka pa library roomah chuan ka lut ta a. Lehkhabu lo intiang ûrh chu ka kal pel a, eng nge ka zawn ka hre lo. A dawhkan pawhdawh chu ka hai a. Ka duh ang ka hmu lo. Lehkhabu ka hai chiam a. Ka beidawng. Ka rit ve tan deuh nen, chumi ni chu ka hlawhchham phawt. Min rinhlelh loh nan lem ka chan ve a ngai tih ka inhrilh mawlh mawlh a. Ka inbualfai a, hmel hlim sarh put luih tumin in hnuai lamah ka chhuk ta a.

"Naute a che nasa thei lutuk a, dinglamah a che thin a, ka thian ten mipa a nih chu an tia" chaw hmuam tun chungin ka ti a. An inmelh ralh ralh chu ka hmu ve..

"Ni hlauh se" Dami'n a rawn ti hliai a.

"Kei pawn ka ti. Mahse, hmeichhia pawh nise ka lawm tho" kan pa chuan a ti a. Ka nuin mak tih hmel deuha a va melh pawh ka hmu ve kar. Ka meng ve kar tawh dawn. Mawl reng hi ka tum tawh bik lo.

A tukah hlawhtlinn ngei tumin ka pa te room leh library chu ka kar tawn ta a. Chabi ka hmu ta. A mil tur tala ka zawng, ka pa te almirah chhunga thingrem te nen chuan a inmil ta riau. Ka herh a. A rawn inperh auh. Ka thaw huai mai. Hun ka la ngah em tiin sana ka en a. Dar 3 a pel tawh. Ka dah leh tete a. A tuk lama chhunzawm turin ka kalsan ta rih. Mawnga hawlh ang mai ka ni.

Zanah ka puar tawh tehlul nen kan pa chuan a châk tlat!  A châkna hrikthlakna mai mai ka ni tih ka hre tawh a. Engvanga lo hnar lo nge ka nih ka hre tawh lo. Ka lo hmangaih hle tih chauh lo chu. Huat ka duh ngawih ngawih lai pawn a hmel ka hmuha min duat hiam hiam chuan ka chhungril so bawrh bawrh hi a dai nghal duak duak zel a. Min set up tih hre kur chungin a fawhna ka dawngsawng lo thei lo. A laka pangchan lah ka la sim thei chuang lo. A chang chuan, min hmangaih lo mah se, mib ngainatna hi chu a nei ve tawh aniang tih theih turin ka lakah a dawhthei a, mipa hlauhawm tak kha mipa nèm ber angin ka lakah zawl a dawh thin si. Mahse, hei pawh ka laka a lemchanna vek.. A hmangaih chu kei ni lovin saroni alawm tih chu ka thutawp a ni leh thin.

"I cher riau, thil i tha tlat lo va. Nau i nei hnai tawh si" thaw ham ham chungin a ti a. A bialnu nen ka fa an pawm tur mitthla chungin ka nui lui a. Ka thian, a harsat turzia i hrethiam em?  A na asin. Ka hmangaih tawh si a.

Ka pa thingremtè chu kan roomah ka chawi phei a. Lehkha inzial thuah tûn chu ka pawt pharh a.

"Kei Sangthanpuia hian ka pa thurochhiah angin Pu Remruatliana tu nu Saroni chu ka fapa Lalrohlua nen ka inneihtir ngei ang tih ka tiam e. Ka ti lo anih chuan, Saroni pu in ka pa laka a thutiam a hlen loh pawhin engmah ka sawi buai lo vang. An chhungkaw anchhia ka chunga a tla anih pawhin tumah ka mawhpuh hek lo vang" tiin
.

Ka hriat lawk tawh vangin mak ka ti lo. Lehkha inthuah dang ho chu ka en kual leh a. Lehthawn an ni deuh mai.

"Ramri bulah.. Pathum"

"Zokhawtharah Piangliana rûnah panga" tih angreng te an nia. Ka hrethiam ve lo.

Dairy niawm tak chu ka en ta zawk a. Ka keu fe hnuah ka hming ka hmu ta.

"Zaithantluangi a ni a, Saroni nen danglamna an nei lo. Pu Remruatfela duhthusam ang chiah a ni. Nula thianghlim a la ni ngei bawk ang. Thingtlang atanga lo pem, khawpui nun hrethiam lo a ni a. Chhandami atangin bul kan tan thei ang chu.. " Dami pawh a tel ve tih ka chiang ta.

"Saroni dam lehna tur chuan engpawh kan ti mai ang chu.. Lara hmangaih ber a ni bawk a. Kan tum leh duh ang ngeiin Zaii kan hmin thei ta. Fapa hring vat se, Saroni dam bawk se.. Chhungkaw hnih insuihfina a awm hunah ka thla a muang tawh ang. An sumdawnnna hi ka mamawh ber tawh lo, Ka chhungkaw venhim ka duh a ni" eheu!  A mak telh telh mai ka ti.

Ka thluak hi a na ut ut in ka ring. Kei mi mawl hian he chhungkaw thuruk hi ka hrechhuak thei ngai daen lo a nih hi..

Dami hian ka lakah eng chiah nge a thup tih hriat chaknain ka khat leh a. Ka hman bawk a, a room ka chinglet. A diary ka hmu fuh hlauh. Mi nasa Dami chuan a mipa mut dan te a ziak chipchiar angreng. Ka keu kân zel a.

"Ka pa min hrilh angin kan chhungkaw thuruk tipuitling turin Zaii chu hnaih ta a, rilru kawi engmah a pu lo bawk a, kan inkawmngeih nghal. He buainaa ka hnuklut tel hi pawi ka ti"

"A theitui in tura damdawi ka pawlh laia hrehaem ka tihzia kha.. Ka tih ngei a ngai si. Ka û nen cottage an pan lai te khan ka mittui a tla.. Ka û pawn nuam a ti chiah lo tih ka hria. Hmanhmawh taka Zaiii a neih kha a ngai miau si a. Inlem kual nan hun a nei lo a ni. Saroni hi ka u hmangaih mah nise, ka hua. He buaina hi ka hua.. Ka ning. Reh thuai se ka ti"

Chu bak chu engmah ka chungchang a ziak tawh lo. Dami chuan farm house ah khan ka in turah damdawi a lo pawlh reng anih kha.. Kha vang khan ani ka lo nasat em em. Thil chu a fiah chho zel e. Mahse, ka hriat chak ber engvangin nge kei kher tih leh ka fa chu engvanga pawimawh em em nge a nih?  Eng anchhia nge an hlauh?  Tih te chu a ni.

Lara'n mitmeng hriam hraih chunga min melh chu rapthlak ka ti a, min khawih tuma a lo kal zel chu dan ka duh. A hmel chu huatna in a inthlak a, min ten ngawih ngawih hmel a pu bawk. Khuma min namthluka min bawh a tum lai takin kawngka an rawn kik a. A tira ka rawn sawi ang khian min chhuahsan ta kha a nia. Mahse, kawngka chu a rawn inhawng thuai a, Ka hmel anpui chiah chiah, kei aia hleitling hret hmeichhia nen kan inmelh ta reng a, nuihsawh tih hriat zeta min nuihin, a kut chu ka lamah a rawn phar dû a!  Min rehhlum ngei tuma min rawn hnaih tial tial takah chuan ka rak tuar tuar a.. Thawh ka tum a, ka thei mai si lo.

"Zai.. Zaiii.. Heiii… harh teh" ka pasal nen kan inmelh ta reng a. Ka mumang mai mai chuh.. Hlauhlawpin ka pasal chu ka kuah a. Ka khur zawih zawih mai.

"Engkim a tha vek alawm.. Hahdam rawh. I bulah ka awm reng ania" a ti sup sup a. A lungphu dat dat chuan min muan ta deuh. Amah vanga mangchhia mang ka ni tih pawh ka theihnghilj leh tawh. Hmelma hnawksak ber ka thinlung hi ka pasal ta a ni tawh si. Ka vanduai a ni.

"I duh chuan i sawi thei ania" a ban ka lukham a, ani a zangthal a. A hahdam hmel bik.

"Lar.. "

"Umm.. "

"Min hmangaih em? " vawi khatmah ka hmangaih che kan la inti lo ve ve. Sawi hmasatu nih ka hreh atin ni.

"Ngati nge? "

"Ka zawt che"

"Ka hre lo.. " ka na zawk mai. Engah nge maw ka lo zawh kher kher ni..

"Anih kan fa lo piang tur hi i hmangaih ang em? "

"Ka theihtawpin ka hmangaih ang"

"Tu ten emaw ru bo ta se, i zawng chhuak ang em? " a tho thut a. Min melh ta reng a.

"Zai"

"Mak i ti mi?  A mak i ti maw?  Engkim ka hre vek tawh" ka ti ta tâwn tâwn a.

A hmel buai nak chu ka thlir reng a. A tho chhuak ta nge nge a. A vei a vei a. Ka lo thu ngawi reng thung.

"Ka tihpalh aw" a ti ta a.

"Ka nun i tihchhiat vek tawh hnua tihpalh tih sawi hian ka nun kha a pangngai leh dawn em ni? "

"Zai, ka sawi tum chu.. Aa.. Ka hre lo. Engkim hi a buai tawh. Kir leh thei kan ni tawh lo. Pawi ka ti lutuk"

"Pawi i ti lo"

"Ka ti takzet.. "

"He in ka chhuahsan lohna chhan tur pakhat tal sawi rawh"

"Nang hian min hmangaih a ni" ka lungphu ri chu ring tak a ni. Ka mittui rawn luang chu ka hru pawk pawk a.

"Ka hmangaih che anih pawhin ka fa lo piang tur hi tu emaw damna turin ka hlan thei lo vang. Ka chhuahsan dawn che a ni"

"I ti lo vang. I ti miah lo vang"

"I bialnu leh nang in hlim nan fa ka hring ang maw?  Ka thi zawk mai ang" ka ti tuar tuar a. Ka lo up beh tawh thinrimna te, khakna te leh huatnate chu ka leih baw hawk hawk a ni ber.

"Min ngaithla teh.. Ni lo, khatin awm suh.. Khawngaihin"

"Nupuiah min nei a. Bialnu i lo nei reng a. Chu ringawt chu ka la tuar dam thei mahna.. Ka fa, harsa taka ka pai lehzelin a tuar tur hi chu ka damchhungin ka thlentir lo vang, duh leh ka fa nen kan thi dun mai ang"

"Zaii.. Khawngaihin.. Engkim ka sawi fiah thei"

Engahmah ka ngai lo lui tlat. Ka thawmhnaw ka siam a. Zan rei pawh sawi lo va kal ka tum ut ut chu keipawh ka inhrethiam bik lo. Thuruk nei chhungkuaah hian ka leng tawh lo. Ka bag chu ka khai a, kawngka ka hawng a. Min lo umzui zel. Ngawi rengin ka pen hlawk hlawk a.

Kawngkapui ka hawng dawn chiah tihin ka hmuiah tu emawin a rawn hup a, Lara a ni lo tih ka chiang. Thil rim na tak ka hip lut kawk a. Nikhua ka hre lo zui nghal.

Ka harh chuan ka khumah ka lo mu a. Min lo kil bial laih mai.

"Ni 2 zet i mu tawh" ka nu chuan a lo ti a.

"Ka haw duh" ka ti tham tiak a.

"Chu chu kan thlen tir thei lo a ni" ka pa ve thung.

Dami erawh a awm lo va.

"Engkim ka hre tawh alawm"ka ti sap a.