Lar 2

LÂR.. (2)

Ziaktu: Toni Râlte

Engkim i la hre lo.. Khawngaihin ka thusawi hi ngun takin min ngaithlaksak la ka duh a ni. Tihnat che hi kan duh bik reng reng lo, loh theih loh avanga hmanrua i nih angai ta hi tupawn pawi kan ti vek asin..

Kum 10 lek ka nih laiin kan inah Saroni pu kha a lo thleng a. Thingtlang khaw te takte kan nih vangin mikhual kan nei zen zen lo. Kan rethei a, kan harsa em em, unau lah paruk lai kan ni a. Kan la te hlawm si. Ka pa mang hi a ang fo. Kan mikhualpa chuan ka pa chu puih a duh ta a. Mahse, thil duh a nei ve thung. Sumdawnna a nei a, mihring kâl hmangin a sumdawng thin. Damdawi a khawih tel bawk. Chu sumdawnaa ka pa in a puih phawt chuan hausakna chu kan ta a nih turzia a sawi a. Ka pa, zo pa mawl ve tak, engmah hriat nei lo, kan retheih vanga rilru hah reng reng chuan a lo hnar thei ta lo va. Amaherawhchu, chu sumdawnna chu mi dang bula a sawi chhuah emaw a bansan emaw chuan kan chhungkaw chungah anchhia a thlen tur thu a sawi a. Amah Pu Remruatfela kha khawchhak lam mi, dawi lam pawh hre tak a ni. Ka nu ngawr reng a bawlhlo eng emaw sawngbawlin a tui a in tir a. A dam ta viah mai. Tichuan, an inbiak remna ang chuan an kal chho ta a. Ka pa chuan a tirah damdawi chu a khawih ve a. Mihring hmanga sumdawn erawh a hreh em vangin a la ti lo.

Hun a kal zel a. Kan hausa tial tial a, ka pa a duhâm tial tial bawk. Mihring rukbo a ching chho ta a. Aizawlah kan pem ta bawk. Mihring an tam ta bawk a, inrukbo a hluar ta hle. Khang zawng zawng kha ka pa leh a thuihhruaite sulhnu tih kan hai bik lo va. Kan hlim thei lo va, hausa hle mah ila, kan inchhung chu hremhmun ang mai a ni. Ka pa pawn a hrethiam.

Vawi tam bansan a tum a. Vau beh a ni thin si. A tawpa tawpah thih leh thih tiin a thlah fel ta a. Thla khat chhung vel chu boruak danglam engmah a thleng lo. Mahse, thla khat dang a ral meuh chuan ka u te pathum chu a zawn deuhthawin an thi ta a. Mizoramah thil thleng rapthlak pawl tak a ni. Thah an ni tih hriat takin an ruang pawh hmuh tlak a awm ngai meuh lo. Ka pa chu a mangang em em a, kei leh ka naute pahnih chiah kan chuang tawh si..

Zan khat chu Remruatfela chu a rawn kal ta a. "I fate pathum la bang nge sumdawnna" tiin offer a rawn siam ta a.

Ka pa chuan a fate min thlangin offer chu a pawm ta a. Sumdawnnaah a let leh ta a ni. Mahse, mihring rukbo a duh ta lo va, vawi tam an hrilh hnu pawn a ti duh si lo va. Ka naute pahnih ruk bo an ni leh ta a ni. Kha zet kha chu a tuar zo ta lo va, a taksa a chhe ta rawih rawih mai. Ka nu lah thih leh dam inkarah a awm ta a. Kei chu ka lian ve tawh a, engkim ka hrethiam. Kar khat hnu lekah ka naute ruang chu kan hmu leh ta bawk. An kâl a bo tih pawh kan hria. Kan chhungkww chunga thil rapthlak tak lo thleng fo chu mi mak tih a hlawh a, min râp a ni ber. A mualphothlak lamah a kal.

Tichuan, rilru ka siam a. Ka pa sumdawnna chu ka chhunzawm ta a ni. Mihring pawh ka ru bo hman nual. Rinhlelh ka kai ngai lo. A chhan chu a tuar ber chhungkua kan ni miau a. Lehkha ka zir pah bawk a. Phaia ka zir lai chuan Pu Remruatfela te in atangin ka zir nghe nghe. Ka pa pawh a rawn tha chho leh tan a. Ka nu erawh a damkhawchhuak zo ta lo. Nupui te neiin hna te ka han nei ta a. Sumdawnna pawh kan la kalpui zel tho. Aizawlah hian keini aia sum ngah hi an tam lo maithei. Mahse, ka hlimna ber a ni si lo.

Ka pa pawh a tar ve ta hle a. A chang chuan a thutlukna avang khan a lakah ka lungawi lo fô, mahse,  a fate min hmangaih vang tih ka hria. Keimah chauh ka dam tawh bawk nen, duat takin ka enkawl thin. Fapa ka nei ta a. Lara chiah fapa ka nei. Ka fapa hi chuan kan chhungkaw thuruk tenawm tak hi chhawm ve lo se ka duh takzet a.

Remruatfela fapa pawhin fanu a nei ve ta chiah. Saroni kha a ni. Kan chhungkaw hnih chu sumdawnnain min suihzawm tawh bawk nen, Saroni leh Lara chu an han inhmuh fo takah chuan an lo inhmel duh ta hial a. Lawm tur nge lungngai tur tih ka hre lo.

Pu Remruatfela bawk chuan kan fate inneih theih dan tur kawng a dap leh ta a. Lara zirna a la laklawh deuh a. Kan hmanhmawh lem lo. Inhualna an neih tawh hnuah Saroni chuan nau a pai thei lo tih kan hre ta a. Ka fapa neih chhunin fa nei thei lo a han nei ngawt tur chu ka ngaingam ngang lo va, ka pa ka râwn bawk a. Inhualna chu kan chhu chat ta a. Remruatfela thinrimzia chu rapthlak tak a ni. Mahse, hei hi chu hnam chhawm zel thil a nih vangin ka pawisa duh ta bik lo va. Mahse, kaw hreuh a thiam èm a, a tunu Saroni leh Lara chu an inneih theih dan ngawt a ngaihtuah ta a. Sumdawnna bansan kan duhzia a hria a, chumi hmang chuan min hruai kawi leh ta a ni.

"I fapa leh ka tunu hi an inneih hlauh chuan, sumdawnna hi in bansan thiang ang. A nih loh chuan i fapa pawh hian tupawh nei se, sumdawnna erawh a thlah thiang lo. A thlah a nih vaih chuan in thlah te thlengin anchhia in chungah a tla leh ang" a ti hmiah mai. Ka rilru a buai a, ka mang a ang a ni. Lara hi kum 23 a ni ve tawh a. Thil a hrethiam ve ruak tawh bawk a. Ka pa nen engkim ka hrilh ta tawp a. Saroni a hmangaih em em tho bawk a, pawi a ti lo.

Mahse, Remruatfela bawk chuan ruahmanna dang a lo chèu!  Home vela fa lak a lo duh ikhaw lo mai a. A tunu hmel anpui, nula thianghlim ngat leh ka fapa Lara thisen ngei chu a tunu pawmtir a duh tlat!  Chutihlai chuan a hriselna a tlakhniam thut vangin a hmanhmawh hle a, a thi anih vaih chuan, a fapa rothap zet Hrangluaia thuhnuaiah kan kun dawn tih a lang reng mai si. Sumdawnna tenawm tak banasan ka duh luatah a offer chu ka pawm leh ta a. Chutianga kan tihtheih phawt chuan, ka fapa chuan a ro hmun thuma thena hmun khat a chang thei dawn a ni.

Tichuan, a bak chu i hre taeh ang. Hma kan la a, kan chhungkuain theihtawp kan chhuah ta a. Kan hlim lo asin. Kan lainat em em che. Fa i neih hunah i fa chu ruk boin a awm dawn a, nang pawh khawiah emaw thehthang i ni dawn. I chungchang erawh hmanni Pune kan zu kal khan nasa takin ka ngen a, i chunga engmah ti lo turin.. A hma angin i u bulah i let leh thei ang tih an sawi.. Mahse, kan thuruk i hre ta si a. I hria tih an hriat vaih chuan i nunna thlengin a hlauhawm thei dawn a ni.

Zaite, min ngaidam raeh aw.. Ka pa atanga ka chhawm he sumdawnna hi ka duh hun hunah ka bansan thei ta si lo. Mihring chu ka khawih tawh lo va, Damdawi eraeh ka la khawih reng. Sum chu ka ngah mahse, ka rethei asin"

Ka pa chu ka melh ngawt ngawt. Dawt a sawi ka ring miah lo. Ka khawngaih ta em em zawk a. Lara ka melh leh, pawnlam a thlir daih. Ka nu chu a men puai a, nu sual tak a ni lo asin. Vanduaina namen lo vin a tlakbuak chu a ni si a. Ka vanduaina kha ka ngaihtuah a, a natzia kha.. Lara pu in a fate panga ngawt a hloh dan ka ngaihtuahin a thiltih chu dem chi ah ka ngai bik lo.

"Pa, ka hrethiam e. Engmah ka sawi chhuak lo vang. Ka lakah in sual lo va, min enkawl danah sawisel tur ka hre hek lo. Ka chhungkua in ni tawh a. Chuvang chuan in tan ka hmachhawn ang e. Mahse, miin mak an tih loh nan, Khawiah emaw min dah bo na tur in lo ngaihtuah dawn nia.. Saroni pawh a khawngaihthlak tho. " ka ti a. Mak ti hmel ka hmachhawn nghal.

Ka nu chu a insut hlawp hlawp a. Min rawn kuah a. Kei eraeh ka hul hlauh.

Ka pa te chhuah hnu chuan Lara nen kan awm dun ta ran mai.

"I ngaihtuah chiang maw?  I tithei ang maw? " a ti sap a.

"Lar, i sawi kha.. 'Nang hian min hmangaih' i tih kha. A dik, ka hmangaih che a. Hei hi i tan ka tihtheih tha ber tih ka hria alawm.. Saroni nen chuan ka fa chu tha takin in enkawl ang tih ka ring" tap lo turin ka insehruh a.

Dam thlapin min rawn kuah a. "Ka dam chhungin ka theihnghilh tawh lo vang che" a ti a. Dawt a sawi ka ring lo.

Khata tang khan kan nupa inkar chu a zau ta hle a. Laran zu a in nasa. Biak theih miah lohin a inkhung hrang a, khum khatah kan mu ngai hek lo. Min duat tawh ngai lo va, vei nei tih hriat taka a vei sek thin te chu ngaiah ka nei tawh.

Ka nau neih a lo hun ta. A na hle mai. An vaiin min buaipui a, Ward-a min nawr luh dawn a Lara hmel kha ka theihnghilh theih ka ring lo. A mangang em em a, min lainat ngawih ngawih hmel a pu a ni. Hrin pangngaiin ka hring thei ta hlauh. Ni e, fapa ka nei asin. Fapa ngei chu..
Ka fapa chu ka rekhlum mai dawn mawni le tih rilru te ka pu thut thut a. Rapthlak ka ti si. Ka ta ni ve thei ngai lo tur, ka thisen nisi chu ka melh vawng vawng a. Ka va hmangaih em.. Thla 9 chhung ka pai a, kan inzawm asin. A hnar te, a mit te chu keimah ang a ni. A hmel tha a, duat taka enkawl ve theih ka va chak em..

Fapa ka neih atanga zan thumnaah mang bo thak khawpin ka muhil a. A tuk zingah ka fapa chu a awm ta lo. Thei leh thei lo vin thawh ka tum a, min hliamna a la na si.. Khuma tlu leh hnawkin ka hmai ka hup a, ka tap ta tlawk tlawk mai. Police ka hmachhawn a. Engkim sawi ka châk. Lara hmel ka hmu thin. Ka ngam ngang lo a ni. Ka u leh Teteii te pawh an rawn lang var a. Min khawngaih ngei mai.

A tawpah Lara a rawn lang ve ta. A pawr fap a, mut a hmu tha lo tih a hriat hle. A hmuihmul te pawh a to sung mai.

"Ka tlai ta a ni mw… mipa nep tak chu ka lo ni e" a sam a kek a. Bang chu a tauh chawrh chawrh a. Thil thleng tur nisa a kara lem a chang vel chu ka hua. Melh pawh ka melh duh lo. Ka hmangaih a. Ka haw bawk.

Kar khat Damdawiina ka awm hnuah kan haw a, kan fapa ruk bo chungchanga inhnial buai, thinrim inthen tur anga ruahman kan ni. Kan inbe eih lo. Ka insiam a. A tuk maiah ka chhuak tawh dawn. Khumah a thu reng a. A kun chhul reng bawk.

Inneih zungbun chu ka phwwi a, kan inneih thlalak hmaah chuan ka dah a. Ka kut chu min en lem lo vin a lo vuan chat a. Min rawn melh chho a. A mittui a tling nia! 

"Zai.. I thei ang maw? " a ti sap a.

"Ka tum ang" ka ti thei tâwk.. Nghet zetin min chelh a. Min pawt a. Ka va bawh uai a. Ka inhliamna te a la dam chiang lo va, sex hmang chi kan ni lo.

Dam thlapin min fawp a. Haw tur ka ni asin le..

"Kan thei lo. Hei hi kan tithei lo. Kan hria" a ti hrâwk a. Ka lo chhing sawk. Chumi zan chuan puan pawh sin lo vin inkuah rialin kan mu ta a. Ka muhil zeuh zeuh, ka harh apianga a lo harh. Ve ziah danah a muhil. Bik lo tih ka hria.

Ka nu leh pa leh Dami ten min kuah a. Ka nu leh Dami an tap.

"Zaite, tihtheih neih ka va chak em.. Min ngaidam mawlh rawh aw" ka pa chuan a ti a. Inchung ka han melh. Ka pasal chuan min thlah pawh a tum ve lo aniang e.

Ka u bulah chuan, kan fapa bo chungchangah kan inhnial a. Ka rawn haw rih tiin chhuanlam ka siam a. A thinur hle. Mahse, ka khap hram hram a.

Kar a liam a, engmah ka ei thei lo. Ka mu thei bawk si lo. Ka fapa hmel leh Lara hmel ka hmu kawp zantin a. A tawpah ka tap leh thin. Hei hi ka chunga Pathian ruat bawk maw ni leh ang. A va fair lo em… tunah chuan Saroni nen ka fapa kha an thlir dun anga, an infawp mek awm si a. Ka tuar zo lo. A na em mai. Lalpa..

Tumah nen inbiak pawh ka duh loh vangin ka block vek a. Ka phone pawh ka khawih duh meuh lo. Mumal nei lo zeta kar hnih zet ka tal hnuah, zan khat chu ruah a sur bur bur a, ka let chhen mai. Kawngka chu a ri bur bur a. Ka hlau viau nghe nghe. A ri leh bur bur a. Ka tho ta nge nge a.

Makti em emin ka melh tlawk tlawk a. Ngenngawl zetin min melh..

"Zai, min luhtir vat loh chuan, kan fapa hi a huh vek dawn" a ti hrâwk a. Ka harh thut. Ka petek dawrh a. A rawn lut ta. A awma a pawm beh tlat chu a rawn ngek ta raih raih a. Ka hnute tang teuh chu ka hre nghal. Rang fahranin ka laksak a. Hnute ka pe nghal. Ka u a lo tho a. Thil thleng chu a rang lutuk a, ka hamhaih vek.

"Hetah hian kan awm rei thei lo. Insiam vat la.. Kan tlanbo a ngai" a ti ta  a.

Ka u chu thil awmzia a hrilh. Kei ka insiam. Ka fapa pawh a muhil ta. Nihliapa inzawnin kawngpuiah kan chhuak chho. A motor lo dingah chuan kan lut a. Ka u in ka chalah a rawn fawp. Engtin chiah nge Lara nen khan an inbiak ka hre lo.

Chak zetin Tanhril lamah kan kal a. Tanhril. Dai kan thleng a. A ding ta a. A huh vek sia, ka lo ngaihtuah chang miah lo.

"Khaw nge kan kal dawn? "

"Min hmuh theih lohna tur hmunah"

"Engvang in nge hei hi i tih? "

"Hman zanah khan sawi kim loh ka nei alawm.. Nang chauhin min hmangaih a ni lo, kei pawh hian ka hmangaih che a ni" a ti ta a.

"Lar"

"Ka nupui tak tak i ni duh ang em? "

Ka melh reng a. Ka lungchhe takzet. Lawm vanga mittui luang chuangin, "Aw tehreng mai" ka ti a. Huh hluam chungin min rawn fawp a.

"Mahse, ka pa te? "

"An hre vek. Ka pa remruatna vek anih hi.. Kan hneh em em ang. Nang ka bulah i awm dawn bawk a"

Motor chu a start leh a. Kan tlan leh ta a. Ka chunga thil thlen dan chu hrethiam lo takin ka ngaihtuahna ka kawm a.

"Ramhnuaiah kan chen rih a ngai dawn a. Ka pa a inpeih hunah kan chhungkua chu chirhtheh kan ni dawn a. Min la nei duh tho ang maw? "

"Ka phatsan ngai lo vang che"

"Hetiang hmeichhia i nih vang hian alawm.. Ka hmangaih che. Tin, a hmasaber ka nih zan atang khan tuman an khawih che ka phal lo bur tawh"

Ka nui tawp.

Ka pasal ni tha leh chu ka va melh a. A va hmel tha tak 😍❤

(Duhtawk mai ang aw. Ka nuin min melh rum tawh em mai.

In chawh leh chiah chiah 😎😂