Lalrinmawia

LALRINMAWIA..! 

Ziaktu: Toni Râlte

Invai chhuah tumin nasa takin ka inhai a, ka thaw thei tawh bawk si lo, ka pil ta riai riai. A thim ta vek mai. Vawi leh khatah tu emaw hian min rawn chawi kang dawrh ni hian ka hria a, a bak ka hre zui leh tawh lo. Ka harh chuan pool sirah min lo kil bial taih hlawm a. Ka thiannu mangang hmel chu ka han hmu hmasa ber. 

"I tha em? " tia min betu chu ka han melh a. Ka ner sawk. Engvangin nge min biak ve ngawt. Thawh ka tum a, ka chau lutuk tlat. A kut lianpui chuan min rawn dawm a, min thuttir ta a. 

"Awii, tete, ka hlauhthawn hmanzia kha.. I thih ka ring tawh alawm" ka thiannu Beth-i chuan a lo ti sawk sawk a. Mihringa kha a kalsawn ta daih. 

"Tui hleuh ka thiam reng sia, ti nge ka tlak le? " ka ti tham chhal a. Chau ngawih ngawih e ti lo chuan ka puar ul thung. 

"Nia, Lalrinmawia khan a rawn chhan hman hlauh che lawm" a ti ta a. Lalrinmawia a tih chu kha pa kha a ni. Min lo chhanchhuak a nih chu.. 

Aizawl sumdawng hmasa, pi leh pute atanga hausakna chhawm zel chhungkua atanga lo piangchhuak, retheihna awmzia hre map lo va khawvel nun hmang thin ka ni. Ka pa hming hre lo chu Aizawlah na na na hi chuan an tam lo vang. Unau pathum zinga a naupangber leh hmeichhe awmchhun ka ni a, duat sual ka ni pawh a mak lo ve. Ka pi in min la dampui a, kan in puiah kan chhungkuain kan la awm. Ka u te pahnih erawh phaiah lehkha zirin an awm thung. Keiin college ka la kal ve leu leu a. Awmpui pahnih kan nei a, sekrek hna hi a thiam pawh ka thiam lo. Ka mize chhe tak, chapo tak chu ka pu atanga ka chhawm a ni a. Chapo erawh ka inti phal lo. Mahee, chapo tia hriat ka ni. Ka thiante pawh keimah ang bawka hausa leh changkang an ni. 

Ka hleitling lem lo va, ka nu hi nu tè deuh a nia, ka chhun a ni maithei. Ka ngo hle thung. Piannalh lo mah ila, ka hmel tha a, ka hausa tho. A tawk. Engkimah a ber nih zel ka duh a, College ah pawh lar hat nih ka duh. Ngaihzawng ka kawp fô a!  Min hriat chhuah rualin ka then ve ve tawp a. A thar an lo lang leh zel mai. Mi nawlpui chuan ka khawsak sang tak leh ka nun dan hi an hrethiamin an pawh pha tak tak lo vang, hausak chu nuam ka ti a. Nawmchen lah ka hrat zèk. Kum 17 mi chauh ka nih laiin ka virginity ka hloh der tawh a ni. Mahse, ka bialpa te zawng zawng inkhawihtir chi erawh ka ni bik lo. Zu ka in thei a,  a bak thil dang ruih erawh ka duh lo. Ka nu leh pate an khirh viau hran lo bawk a; ka zalènna chu a chhe zawngin ka hman tam phah. Ka room hi in chungah a in pawn lam atang pawha kal theihah a awm a. Mipa ka hruai lut fô! An rawn kal ngai loh vangin an hre ngai lo. Min rintawk vang nge ka duh duha awm turin thuneihna min pe zawk. 

Vawiinah khan kan class kan picnic a, vamduaithlak takin tuiah ka tla anih kha. Ka mihring ngaihnep ber pawlin min la chhanchhuak zui!  Lalrinmawia kha Thingtlang tlangval satliah, a chhungte ina awm a ni a. Ka ngei em emna chhan chu class kan luh tirhin min lo star ve khanglang a. Thing ka tih chi tak a nih vangin ka ngei. Mipa sang zet mai, pumrua pawh lian angreng tak a ni a. A dar ka chen pha lo. A ngo lo va, a háng hran lo bawk. Khawpui tlangval nise chuan a luck ve mahna. Ani ang beisei phak ka ni lo. 

"Min lo star ve tawh suh.. Ka duhzawng i ni lo" ka tih bawl tak hnuah kha chuan min ngaihven ngam ta lo va. Vawiinah min lo chhan chhuak leh kher chu ka lakah beisei a neih ka hlau. Pawisa ka pe tawh mai ang. 

Zanah chuan movie ka en mai mai. Romantic te hi ka ngaina ve tehchiam lo. Underworld movie hi ka en ning hlei thei lo va, a vawi 6-nan ka en leh. Ka phone a rawn ri ral ral a, pawimawh tawpkhawkah lo chuan phone ka pick up ngai lo. Ka ning. Ka thiannu a lo nih vangin ka la hram. 

"Lalrinmawia kha lawmthu tal i hrilh ve lo va.. I nunna a chhanchhuak asin" a rawn ti a. Beth hi chu tlemin a nèm ve deuh bawk a. 

"Min lo hrilhsak mai rawh" ka ti mawl tawp!  a rawn nui hak hak a. 

Lehlam zawng chuan tlem chuan ka inthiam lo ve deuh. Min rawn chhan ta lo se ka thi maithei si a. Mahse, mi dang pawn min chhan ve tho mai thei. Min star thu hi a thianpa Lawma'n canteena kan chawlh laiin a sawi zauh a. Kha tah khan a mah pawh ka la hre lo. Mahse, ka han hmu a, Thingtlang atanga lehkha rawn zir a ni tih ka hre zui a, ka hnual phah ta ngawt kha a nia. Thingtlang ka va hmuhsit vang nge ka hre lo, kan inmil ka ring lo ve tawp. Ka mizia hi a ngeiawm ka tih tawh kha. Pawisa a awm a. Ka tha a ni mai. 

Class rooma a rawn luh lai chuan Beth chuan min rawn nghawk sawk a. Lawmthu sawi tur bawkin min nawr leh tawh. 

"Ka lawm e aw. Nimin avang khan" ka ti tawi tawp a. Min rawn melh zawk a. A bu nghat a. A kalsawn nghal daih. A mawl hle a ni. 

Banah ka sas thar David  nen kan leng leh zuai zuai phawt. Min duh hleuh hleuh lutuk hi ka hne lek lek zel. Min ei ve thei bawk a, min then phal lawk lo vang. Zanriah ei laiin ka nu ten ka u te tlawh tura an zin tur thu an sawi a. Ka pi leh kan awmpuite nen chiah kan awm dawn bawk a. Party na chance a ni mai. A zia a zia. 

Zu chu a vawi thum nan ka'n tlak leh pap a. David nen inkuahin kan han lam ve lawp lawp a. Ka nu te an zin la lain kan hot nghal. Ka pi lah patea te inah a phei daih si. Kan awmpuite erawh an mu tawh aniang. Min tibuai ngam dawn lo hrim hrim bawk. 

"Roomah chho ila" David chuan a ti sap a. Ka lo kai ve chiai tawh bawk a, ngaihsamna zawng zanwg nen, kan inkuah chho nawk nawk a. Ka khumah chuan kan inbawh bet ran mai. A vawi khatna a ni lo bawk a, awlsamte chuan kan tlingtla ve mai. A riak nghal daih zui. A tuka kan thawh chuan kan sulhnu pawr zawng zawng kha kan awmpui ten an lo chul mam leh thliam tawh a. An fel ve ngawt mai. Thingtlang lam mi ve ve an ni a, kan inbe ngai lo tluk a ni. 

Sunday te hi chuan thawmhnaw thar show pahin ka inkhawm ve ziah. Ss pawh ka la kaikim ve thap. Zan lam erawh ka peih lo. Ss kan bang haw lam, Lalrinmawia hi bike in a rawn tlan a, kan inhmu chiang ngang mai. Sunday dress in a inthuam ve thlap. Hmuh fo pawh hi ka duh lo. Min ngaizawng leh reu reu ang. 

"Tete, nui miah suh aw. Thil ka hrilh dawn che a nia" Beth chu chawhnuah a rawn leng a. Ka khumah bawkkhup chungin phone kan khawih a. 

"Sawi la" ka lo ti a. 

"Lalrinmawia nen khan kan ni maithei a" a ti!  Ka kang zawk. Rum zetin ka melh a, ka ner náwng bawk. 

"A sawi pawh i zak lo" ka ti hmuk a. A nui kar kar a, "Aih, enteh, a mak tawp. Ka star tlat mawle. Nangmah a star hma daih tawh che khan ania. Mahse, nangmah kha a star che sia, ka sawi ngam lo va. Mahse, tunah chuan a star tawh chuang lo che a, ka nihpui dawn". A ti leh a. 

"I bialpa dangte nen han compare teh. A hniam mah mah lo maw? "

"A ho ee. A mizia saw a pa em alawm, a hmel tha bawk sia. I aiawha lawmthu ka va sawi zan khan ka star thu ka hrilh hmiah alawm" Awii he nu hi chu aw. 

"Chuan a lo duh ve che mi? "

"Ka lo inngaihtuah ang a tia.. Chuan, a chhungte inah a awm tawh lo. Amahin in a luah ve tawh a. Kan nih chuan ka leng ziah ang" la ta deuh deuh chuan. 

Beth-i hi ka tette atanga ka kawm ve awmchhun a ni a. Kei ang lo takin a lian a, hmai hlai lam, ngo ve tak, nuih heh zet a ni a. A mizia hi a nelawm an tih ang chi a ni. Kei ang bawka mi hausa fanu a ni a, mahse, kei ang em chuan a tawrhhlelhawm loh. Ka zia hi a kai ve hlek tawh naa kei ai chuan a tawngkam pawh a la nemin mi hmuhsit a tina ve lem lo. Kan inkawm thei phian lawi si. 

"A tha lawm.. I duh tlat te chuan.. Mahse, i tan chuan a hniam ka la ti tho" ka ti leh a. 

"Aa.. Kha lam chu ho ka ti. Thingtlang tlangval pawh nise a fela a rinawm phawt te chuan.. Bakah note copy te hi ka ning thei sia, ani a peih sia, a tangkai dawn lutuk' a ti daih!  Ka nui hawk. Ni ve mai mai teh se. Ka tan pawh Lalrinmawia laka inlakhran reng a ngai lo anga, a zia zawk. 

An ni ve tak tak ta a niang. Class kan kal leh chuan an thu dun ta ran mai. Ka nuihte pawh a za tep. Ka thiannu bialpa a nih tak. Si ah chuan biak te pawh a ngai ve tawh dawn si a. Biak dan tur erawh ka hre hran lo. 

"Te, vawiin chu ka rawn kal dawn lo. Rinmawia nen kan leng dawn" a ti ta pang mai. A khawiah tak chuan leng ang maw.. Beth a awm loh chuan ka khua a har thin sin le. 

Hun a kal ve zel a, Beth te pawh an la tha ve zel. Rinmawia nen pawh kan inbe ve ta zeuh zeuh. Ka lo mil lohna pawh a kiam ve ta hret hret a. Chutianga mawl leh mize hniam a lo ni hauh lo tihte pawh ka hre chho ve zel. Min star tawh miah lo tih a lang reng, ka thiannu hi a tihnat vaih chuan ka sual thiam ngawt ang. David nen kan inthen a, kan college ami tho Nunpuia nen kan ni nghal zat. Ka nghei rei ngai lo anih ber hi a. Nunpuia chu ka mizia ang deuh, induhtawk ve tak a ni a. Beth leh Rinmawia te nen kan palia kan awm chang hian Rinmawia hi a hnuaichhiah lek lek thin. Rinmawia ka khawngaih vang lam ni lo vin Beth mitmei ka ven vang zawkin ka khap thin. An inkawm hleithei der lo a ni e. 

Holiday a ni a, Beth te huanah zuk leng mai mai ang u tiin kan pali bawk chuan kan inzui leh a. Nunpuia carah kan inhnawh a. Beth te huan hi a nuamin a fai a, an enkawl tha bawk nen. Eirawng bawl kan thiam der si lo va, Lalrinmawian a bawl vek. Mei chhem a ngai lem lo va, a zia tak a awm. Tuite chu kan cheng bárh bárh a. Chaw ei hma deuhin kan zu ken chu kan phawrh a. Lalrinmawia chuan a in ve si lo. 

"In ve rawh. A nuam lo. Rui lo bik an awm hian" Beth chuan a ti a. A han nawr ngial pawn a duh si lo. 

"Thing thei e. In ve mai ta che. Inlak fel vak kha a ngai lo "Nunpuia kamnam chuan a ti leh pek a!  Ka va mitmei a, a hre tha duh der lo. 

"Rui angah min ngai tawp mai ru. Ka in ngai lo va, ka luak ang" a lo ti. 

"Nimbu ka pawlh sa hi in rawh. In ve hrim hrim kha a ni mai. A nuam ve lawm" ka lo ti a. A hnar fithla thak. Hmm.. Rui ve lo tawp se a ni mai. 

Zu a tam angreng sia, kan in kan in a. Kan rui ta viau mai. Nunpui phei chu a chatthla titih tawh. 

"Chaw in ei thei dawn mi? " Lalrinmawia chuan a ti sup a. 

"Ei rawh. Nangmah khan kan lo ei ve mai ang. " Beth chuan a ti a. Ani pawh a meng dava riai tawh. 

"Duhtawk rih ru. In haw thei lo vang" tiin kan zu in lai chu a sengfel sawk sawk a. Hawn ngaihna pawh a awm tawh lo. Kan motor khalhtu ber a hnar kûk kûk tawh si. Thing lutuk. Chaw pawh kan ei thei si lo. Kan chhungte theuh min biaksak a, kan riak ringawt dawn anih awm chu. Zu hi chu aw.. 

An thlamah khum a awm lo va, mahse, puan thuah tlem a zawng chu a awm. Lalrinmawia chuan a phah vek a. Kan pali chuan kan mu ta thám mai. Ka chatthla ve daih. Ka harh chuan a lo thim vek tawh a. Ka pentawngin min tiharh a ni ber. Ka khum emaw tiin tui ban mai ka tum a, mahse, ka la let rang kher mai. Lalrinmawia hmaiah tak ka vs chul pek kha.. 

"Kha tui" a rawn ti sup a. Ka lo in khawlh khawlh. Mutthilh leh mai tumin ka inlet a. 

"Zu hi chu a tha lo ngawt mai. Bethi pawh hian in tawh lo se ka duh" a rawn ti a. Beth leh Nunpuia chu an hnar kûk kûk mai. 

"Khap la ti nia" ka lo ti chang fal a. 

"Khap dawn e. Naktuk atangin" a lo ti nghut. Ka chhang tawh lo. Ka lo muhil leh daih. A tukah nimin tlaia kan zanriah ei tur kha kan ei ta a. Kan intifai leh te te a. Kan haw ta a. 

Sihphir kan pelh hnu reivak loah motor a chhe tlat!  Huihaam.. Motor veivak a tam vak lo lehnghal. A awmchhunte lahin engmah spare parts an lo keng mumal si lo. Kan khawtlai rei kher mai.. Khua a thim dawn ta mai. 

Car pakhat a lo tlan a. Mipa pali an chuang. An ni chuan min siampui ta hlauh a. A zia hle a ni. Mahse, an kamnam deuh a, an tawng duh dan chu a ninawm angreng. 

"Fawr ve lawk ila.. " tih pahin Beth nen chuan min melh tawn vel a. 

"Thiante u, kan lawm lutuk. Mahse, kan bialnu te hi fawrpui atan chuan kan la phal lo ve a. Min hrethiam ru" Lalrinmawia chuan a ti a. Nunpuia pawh a rawn meng rum ve angreng hle. 

"A ho e, zu rim nam hak chin hmeichhiate chu tu ta bik mah an ni hleinem.. Kan lo kawl ve zuai anga.. " An zinga a lian ber chuan a la ti ham ham zui!  

"Nangni zu rui satliah kha eng atanmah kan ti lo che u. Motor min siampui avanga min lo beisei in nih chuan in beisei ang in hmu lo khawp ang. Hur hmel hlawm ropui si" Beth chuan a ti hlak hlak a. Pakhat chuan a rawn pan a, kaih mai a rawn tum niin ka hria. Mahse, chu pa banah chuan Lalrinmawia chuan a lo chelh vat. An inmelh dun ran a. 

"Kuttum hmanga sawifel a ngai dawn ni maw.. Thiante u, thisen kan chhuah lohna a rei tawh bawk a. A nuam dawn e" Chupa chuan a ti pawr huar a. Buaina an zawng ve hrim hrim anih ka ring. 

An in hrosa chho zel a, Lalrinmawia chu hnek tumin a ban a humsek ta mai. 

"Insual kher chu ka peih vak lo sin le" ti nuah nuah chungin ani pawh a inhum ruh ve nghal hmiah. An insual chu a ni ta mai. A thiante chuan an rawn pui ta bawk si a, Nunpuia pawh a va zunglut ve ta vat. Kan lo rak chul ringawt. Pali in pahnih an sual rawn naa Lalrinmawia chu rui lo hai lo a ni bawk a. An khan lo hle. A hnek dak awrh awrh hlawm mai a. Nunpuia erawh a che thei vak lo, a mitko a kak.. Motor dang rawn tlan chuan an rawn thelh ta hram a. Kan thaw huai mai. 

"Tete, Nunpuia saw va buaipui rawh" Lalrinmawia chuan a ti a, Bethi lu-a chul chungin, "I tha em?  I hlau em.. Engkim a tha vek ania" a ti sup a. Engtin emaw hian ka lo awm. Nunpuia chu ka va buaipui a. Na chhia lutuk a ni hran lo bawk a. Motor pawh a khalh leh thei mai. Kan hnunga thute chu an in kuah dun ral mai a. Lalrinmawia chet dan vel chuan engtin emaw min hîp tlat. Nunpuia chuan ka that leh that loh pawh min zWt ve lo. Thinrim takin a inhrosa kuk kuk ringawt. Ka down vek. Beth te an induat bik ropui si. 

Zanah chuan ka chau bawk a. Ka muhil hma khawp mai. A tuk class kan kal atang chuan Rinmawia chu engtin emaw ka hmu tlat!  A chezia, Bethi a care dan vel te chu hmuh hrehawm ka ti tan a. Ka en lo phal bawk si lo. A hma kha chuan ka ngaihven loh luatah heti em em hian a lo care tih ka lo hre ngai lo. Canteenah kan han chawl a, Ni dang chu nise over ka tih dan tur chu. Beth eitur artui te chu a khehsak vel nia!  Mahse, nawm hmel ka ti. 

"Ei thak vak zel suh. I pum a na leh ang" te a ti thul. Beth chu a duh hluah hluah ni hian ka hria. Nunpuia nen ka compare lo thei lo va, an inthlau ngang mai. Beth scooty hian an haw mai zel a, aman lirthei a nei lo bawk a. A in luahah kan va leng ve a. Mipa in mah nise; a bal lo reng reng. A fel fai thlarh nia. A zim deuh mai pawh a. A nuam phian. Lehkhabu a ngah rem rem hle. A chhiar zo vek tawh chu ni awm sia. Beth hian note a nei ngai lo va, Lalrinmawia a ring tawp. A ring sual lo bawk. A lo xerox sak thlap zel mawle.. Hmela hi.. 

"Beth, inpa hian a duat riau che in ka hria" ka ti a. Lalrinmawia chuan thingpui hmeh tur a han lam a. 

"Chu chu lawm ka duh telh telh. Zu pawh ka in tawh dawn lo. A phal tawh lo va" a ti sa sa a. Nunpuia a lo ner sawk. 

Thingpui te kan in zawh chuan Nunpuia nen kan hawn san ta a. Ka rilru erawh a kim ta lo. Rinmawia chu ka vei ta tlat!  A mak a ni. Ka zak. Ka inhua. Ka inten. Mahse, ka vei tulh tulh. 

 

A mitmeng dum chiang zet, fiak kaka min melh laite ka mitthla a, ka chapona vang hian a laka inchhir erawh ka tum lo bur. Mahse, Beth a duat ang leh a care ang khan min han care ve nise ka nem em em ka ring. Tunah chuan ka thiannu bialpa a ni tawh si. Zanah biak ka chak em a, biak dan tur ka hre bawk si lo. 

"Lalrinmawi, Beth hi i tina a nih vaih chuan, i châk lo vang" ka va ti ngial a. 

"Ka tina phal lo.. " a rawn ti. Ka na zawk zawk. 

"Nia, i tihnat phak pawh a ni lo reng bawk a" ka ti tâlh. Ka chapona hmanga chhut zal chu ka la tum tak táng táng a. 

" chutiang vang pawh ni lo vin ka hmangaih tawhin ka hria" a rawn ti ta a. 

Ka ta a ni thei ngai dawn lo tih hre kur chungin a hmel ka mitthla fô a, kan awmho lai reng pawn ka lo dream veng veng zel!  Nunpuia chu ka hmu tè ta em em a, ka hne bawk. Ka then tawp. Single rih ka duh. Lalrinmawia chu ka tan a rem dawn chuang lo va, beisei loh law law ka duh. Beth ka tina dawn a, bakah aman engatanmah min ti tawh lo. Ka chawh. Ka phutawk chiah a ni e. 

Mahse, amah vanga nunphung thatna neih ve ka tumna erawh ka bansan ta lo. Ka bialpa a ni lo chungin a bialnu thiannu hi min thunun tel ve thei tlat!  Mipa chak tak zawng a lo ni e. Zu pawh kan in ngai tawh lo, Beth hian a duh tawh bawk si lo va. Mi hmusit deuh deuha nuih kual vel te pawh ka bansan tan. Kan awmpuite pawh ka be ve luam zel a, mak an ti. Ka chhungte pawn mak an ti. Ka zia a zawi ta riau chu. Mahse, chhan a awm ve a ni mai. Mipa vanga taha nat hi ka mize nasa deuh hian a phal ngai lo. Lalrinmawia avang pawn ka la tap lo. Ka duh ru tih hi a hriat ka remti lo bur!  Min hmusit dawn lutuk. A hma zawnga duh lo va hmusit vel thintu in a lo duh ve reng tih a hriat chuan ka tan a tlawmthlak. Ka pride hian min la hum hram hram ka ti lo thei lo. Beth lah hian a sawi peih si, an awmdan, a care dan zawng zawng a sawi thin a. Chák ve em emin ka lo ngaithla thin. Ka lawmpui hleithei lo chu ka inhuat phah a, a tawpah phei chuan ka inkhawngaih ta hial mai. Ni e, mi hausa fanu nih vanga chapo ngawt mai a lo that lohzia ka hre tal a. Ka lawm. Ka phutawk leh chantawk chauh chang mah ila, na ka ti tho. Mi zawng zawngin chawh min ti ang. A awm hliah hliah. Mahse, dik tak chuan retheih awmzia ka hre lo va, pawisa in engkim a lei thei emaw tiin ka nun ka hmang a. Ka level puite bulah hlir ka cheng a, an tawngkam ang hlir ka chhep a, chu chu kei aia harsa leh retheite tan chuan a lo khain chapo ngawih ngawih angin ka lan phah a ni ber. Ni e, a dik, mi chapo erawh ka ni. 

Class-a an rawn in kaih luh lai chuan note ka lo copy mek a. Ka bulah a rawn thu ve chut lehnghal. A rim te chu a tui zèk mai. 

"Nunpuia hi i then vang niang, class a rawn kal ngai taeh miah lo" Beth chuan a ti a. Ka lo nui ringawt. 

"Tete, inthen ringawt hi a tha lo asin. A duh ve che em kha" Rinmawia chuan a ti a. 

"Ka duh tawh hleinem" ka ti hmak. 

"Nang hi chu i mak a ni. I na ve bawk si lo" a ti ve mai a. A nui suk bawk. Engmah kan sawi tawh lo. 

Ka hritlang awmna deuh a, class pawh ni 2 lai ka chawl tawh. Beth-in min rawn ngaihven ve reng a, Lalrinmawia erawh chuan engmah a rawn sawi ngai lo. Ka dem lo. Ka phût ngam hek lo. 

Zan khat Beth chu a rawn phul leh hlut. "Awii, te, hrehawm ka ti e, U Bena a lo haw a, min rawn renew leh a, ka rilru a buai tawp. Lalrinmawia ka duh tho bawk sia. Awmngaihna ka hre lo" tiin. Ka rilru a lo buai ve em em bawk. 

Bena hi a tleirawl chhuah tirh atanga a bialpa kumhlun a ni. Kum 4 dawn an inngaizawng nia!  A duh hlum lo chauh a ni mai. Mi hausa fapa ve tho a nia, kei ni aiin a û hlek thung. Phaiah a awm thin a, an rinawm dun ve hle thin. Mahse, vawi khat chu Bena hian a lo kawp ve zuai chu niin, a kawpna nu lah Beth cousin a la ni zui a. Kha khan an inkar a tichhe ta vek a. Beth chu a rilru a na ngang mai. A nun a chhiat phah ti ila ka sawi sual lo vang. Bialpa a nei duah a, mahse, a tu amah a hmangaih thei lo. A tui thei tak tak lo a ni ber. A tawpah Lalrinmawiaah a bur ta deuh a, an nghet ve dawn chauh tihah Bena a lo lang leh ta si!  Hmm… ka hrethiam tawh lo e a. 

"I thiannu chuan a ex hnenah min kirsan ta" Lalrinmawia msg chu vawi thum ka chhiar chhuak. Beth chuan engmah min la rawn hrilh lo. Ka be ta nge nge a. 

"Min huat ka hlau a, ka hrilh duh rih lo che anih kha. Nizanah a lo leng a, U bena chu. Te, a mak lutuk, ka haw thei lo. A insawi thiam bawk sia, ka lo la hmangaihzia ka hre chhuak aniang. Lalrinmawia pawh fair takin ka hrilh tawp. Mipa pangngai kha annia, 'Kal rawh. I hlimna kha a tha ber. Thian kan ni zel dawn nia' a tia. Mipa dik tak a nia, min hriatthiam tak tak ka ring bawk a. Ka kalsan ta mai a ni" a ti a. Lalrinmawia ka khawngaih. 

"Anih chuan ka nihpui dawn aw" ka ti fiamthu a, a rukin ka thutak. 

"Umm.. A tha lawm.. A star hnuah che ka nihpui ve tho lawm.. Haha.. Mahse, amah hian toy emaw a inti ange" a ti hlut a. Lalrinmawia nen hian ni ta pawh ni ila, Beth hian min huat phah dawn lo tih ka hria, hmanah Bena nen an inthen hlim khan ka bialpa Kima ka tihpui hmiah tawh. Kan hoh dunzia leh kan serious lohzia chu tikhan a hriat mai. Bialpa kan intawm lo a ni mai. Mahse, Lalrinmawia chu a danglam. Beth na dawn lo mah se; amah hian uicho tlukah pawh min ngai tawh kherin ka ring lo. 

"Ka ti mai mai anih kha.  I chul hnu ka rit duh lo" ka ti a. A rawn nui leh awr awr mai. 

A tukah class ka kal ve ta a. Beth a rawn kal lo. Rinmawia nen kan inzui ta ngawt. 

"I na em? " ka ti a. 

"Na ve deuh, mahse, tawrh zawh loh tur chu a ni lo" a ti halh a. 

"Beth chu kei pawn ka hau tho, mahse, a duh tawhna lamah chuan a luhlul ve èm a. Hrethiam hrma rawh. Bena nen an history i hriat tawh tho ka ring a.. " 

"Ka hria lawm.. Nia, ka hrethiam lutuk. A ho em mai. Thil dang sawi ang. I hritlangte chu a zia tawh maw? " a ti a. 

Thudang sawiin kan titi ta daih a. A pawisawi hlau leh a lungawi lohna tih hlau reng rengin ka awm a. Ka thla a ngam lo. Ka sawi thiam lo. A thian atan pawh min duh loh ka ring a ni ber. Kan inzawmna ber Beth nen lah an inthen si. 

Ni 2 lai class a rawn kal loh vang chuan ka ngaihtuah ta deuh a. Ka va zawt ta tawp a. "Ka class bang in ka lut tur kha lungte ka rap hrual a, ka ke ka bilh a. Ke chuan a kalpui ngam awm si loh a, ka chawl ta mai" a lo ti. Lirthei nei se a tih dan dan a awm tur. Beth nen an inphur thei tawh bawk si lo. Beth reng reng pawn ngaihsak zui ve tho tur hi a nia. 

Class ban veleh keimahin ka va kal hmiah. Eitur te ka leisak ve a. Ka zak ve tho naa, tul ka ti a niang. Beth pawh ka hrilh lo. 

Bai suih suih chungin kawngka a rawn hawng a. Min hmu chu mak a tih hmel. Lehkhabu a lo chhiar leh a ni ngei ang. Tawnzau leh boxer nen chauh a lo awm a. A sexy tawp!  Haha.. 

Ka eitur ken te chu ka siam a. Kan ei dun a. Beth hming kan lam ri lo. 

"Rinmawi, in khua hi khaw nge? " ka ti tawl a. 

"Champhai lamah daih ania, Biate i hre ngai em? ' a ti a. 

"Hre ve e.. Ehe.. A van pui leh si" ka lo ti hu a. 

"Umm chuan zawhna dangte i la nei em? "

"Unau engzat nge in nih? I pa ten eng nge an thawh? "

"Unau pali kan nia, ka upa ber dawttu. Chuan ka pa chu kan khaw High schoolah Headmaster a nia. Ka nu chuan engmah a thawk lo. "

"Chu in retheih loh chu" 

"Rethei e.. Nangni lakah chuan" 

A tawngkam chuan min tina deuh. A hmaa ka tawngkam dengkhawng tak tak avang khan. Kan chhungkaw chanchin te min zawt ve bawk a. Part timea inhlawhna tur a duh thu te. asawi. Ka pa hian a nei ang em le.. Ka zawhsak ang. Khua a tlai ta deuh bawk a, hawn mai ka tum a. 

"I fel ka ti, i lo leng a. Ka khua a har loh phah.. " a ti ve luam a. Min thlah tur a ding chhuak chu a luhai deuh nge a pai deuh khut khut a, a ke a na bawk si. Ka lo chelh vat a, a lian ropui si. Ka chelh hneh lo ngang mai. A thutthleng seiah chuan kan tlu dun ta rawp a. Ka zuk bawh titih a ni ber. Hnai takah kan inmelh dun ta reng a. Heti taka a lo hmel that hi ka lo hre ngai lo reng reng. Ka zah theih lohna leh pawisak neih lohna a rawn chhuak thut. Ka fawp hmiah!  

A tirah a hamhaih deuh nge a chechang lo. Mahse, ka fawh tak zelah chuan min chhanglet ve, ka hnungzangah min dawm bawk a. Ka harh chhuak thut. Ka va zak leh si em.. Ka tho tharh a. Meng phelh phang chungin, " Ka tihpalh.. Ka kal" ka ti nawk nawk a. Ka chhuak daih. 

Zanah, "Fawh i van nuam" a rawn ti zui!  Ka lei ka chhuah nghek ringawt. Ka bialpa te hi chu ka fawh hmasak chang a awm fô. Ka thiannu ex ka fawp hmasa ngam chu annia. Hmeichhe nasa tak zawng ka lo nih ngei hi. 

"Ka tum vang a ni lo nia.. Ka hai thut che a" te va ti vel. 

"Ka ring. A ho em mai. A zahthlak loh" a ti. Ka bezui ngam tawh teuh lo. 

Ka pa bulah inhlawhna chu ka sawi sak a. Ka fak bawk a. A lo ngaihtuahsak tur thu a sawi. A tana thil tha tihsaktu zinga ka tel ve theih phawt chuan ka lawm em em ang. 

Kan workshop pakhatah zing dar 6-9, Tlai dar 3-5 thleng a thawk thei dawn ta a. A lawm ve bawk aniang, lawmthu min hrilh chamchi mai. Workshopah chaw an oder mai zel a, chu chu a ring ve thei zel dawn bawk. A inkhawl thei ngawt ang. Kar khat zet a thawh ve hnuah ka pa pawn a fak ta hial. A lo fel em em si a. A tlawmngaiin a tha a tho si, ka pa chuan a duhsak ta viau a. An chhungkaw chanchinte a zawt a. Amaha in luah annih thu te a hriat chuan, "Kan in hnuai ber khu a ruak dawn tak alawm.. Lo insawn rawh. I tan veivah pawh a awlsam zawk ang. Luah man pawh 50% in min pe mai dawn nia" a ti hial. Ka nu hi chuan engmah a ngaihven ve vak lo hrim hrim a. A lo support mawl ve tawp. 

Lalrinmawia chu a rawn insawn tak tak. Ka lawm viau laiin ka duh lo bawk. A chhan chu kan inhnaih tawh si, ka ngaizawng nasa si. Ka tan inthunnun a harsa dawn em mai. Class pawh ka scooty in kan kal thin. Aman a khalh chang a tam zawk. Kan inah a rawn teilut ve zeuh zeuh a, ka nu nen pawh an in kawm thei fû. Keimah ang lo tak mizia an nei a ni bawk a. A felna kha an hmu langsar nalh zel. Ka lo hlim ru ve veng veng thin nia. Beth te nen pawh kan inkawm chhunzawm ta zel tho a. Thian tha tak angin an awm. An thei ka ti hle. 

"Mate, Lalrinmawia nen hian ni tak tak teh u" tih changte a nei a. Ka nui mai zel. Kan infawh atang khan eng boruak mah a awm tawh lo. A ina zuk kal zawk chang chu ka nei a. Mahse, engmah a thleng taeh ngai lo. Ka zak. 

"En teh, julie nih kha.. Min lo be thin a. Ka chhang ve mai dawn mi le ka ti" tiin a phone chu min hmuh a. Kei aia hmel tha mah tur a lo ni. A ruka na ti em em chungin, "A tha lawm.. Khawi mi nge" ka ti zui zat a. A sawi a. Ka ngaithla mumal tawh lo. Ka na takzet. Ka chawh nawn leh dawn anih hi. 

Julie nen chuan an ni ta a ni ngei ang. Inrinni vawi hnih lai a lo leng tawh. A rwn lenchilh ngam danah an ni tihna a ni mai. Kei erawh ka inla hrang tial tial a, kal pawh ka kal ngai ta mang lo. 

"I van reh " a rawn ti reng a. Class kan chawlh rih vangin kan inhmu khât baek a ni. 

. "Nia, ka buai ve a" 

"I buai thlawt lo"

"Buai lo pawh ni ila, ka dal ang che u tih ka hlau a. Ka rawn leng peih lo"

"Hmm.. Chu chu i rilru a ni lo" a rawn ti. Ka chhang ngam tawh lo. 

Ka lo tuar na deuh nge kan driver zu ka laktir a. Ka roomah in leh mai ka tum. Mahse, Lalrinmawia a rawn chho a, "Karleh test tur kha zir ang" a rawn ti. Ka va ngei tak. Ka nu te lah chuan zir ru an lo ti thèn a. A inah kan inzui thla. Mahse, zu ka pai ru khiau. 

Lehkhabu a phawrh laiin zu ka lo thli thung. Zawhna min zawt mawlh mawlh. Ka in lohna a rei ve tawh angreng sia, mak a ti ve aniang. 

"Ka in chak thut a. Ka in" ka ti hmiah. No 4 vel ka in chuan ka kai nuam tawh hle. Lehkhazir chu kaha se a ni ringawt. Ka tawng reng bawk a. Ka chezia chu nuihzat hmel takin min lo thlir. 

"Min nuihzat ve law.. Hmela" tih pahin a tukhumah na lo tein ka va beng a. Ka kut a lo la chat, a malchungah ka thu hnawk.

"In belh tawh lo la" a ti a. Kan bek a insi run mai. 

"Ka chatthla duh lawm"

"A ho.. " tih pahin min rawn fawp thut mai. Ka hamhaih rei vak lo. Ruih tawh nen ka lo welcome tha ngang mai. A thaw a rang tan a, ka hnute a khal bawk. Kei lahin a tukhum ka lo chul ruai bawk. Rei fe hmui hmanga kan innawr hnuah min pawm tho lawp a, roomah min luhpui. A khumah chuan min nghat a, a rawn bawk nghal zat. Ka lo za et et lehnghal. A nawmna tem tawhtu ka ni a, ka mipa vei ruk ngawih ngawih nena hman chu ka thlahlel a ni mahna. 

Ka hmui fawp pah reng chungin ka kawng hnuailam a chul a, ka kap chu a zen lut ta. Kei pawn chet lak dan tur ka haihchham bik lo. A kekawr ka phelh a, ka kut hmangin a mipatna chu ka sawngbawl ve bawk. A rum nghut nghut a. Kei chu ka ngawi reng. Ka thaw erawh a ring. 

A che bawrh bawrh. Ramsa koham ang maiin, min mamawhzia chu a tilang nghal mwlh mawlh nia. A khum che lawih lawih leh a rum ham ham thawm karah ka lo ngik faih thin a. A nawm dan a danglam. A ril thlawt. Kan zawh hnuah a rawn mu thla hlawl a. Ka chalah a rawn fawp a. 

"Ka ta chauh i ni thei tawh ang em? ", a ti sup a. 

"Julie " ka lo ti hmanhmawh. 

A nui a. " Nangmah a ni ve lo. Ka duhzawng a ni lo" a ti a. Ka lo thaw huai. Thil tam tak sawi dun tur kan nei naa kan sawi zui lo. Beth chungchang, a hmaaa a laka ka chetdan mawi lo tak te a tam mai. Sawi ngaiah kan ngai lo a ni mahna.

"Kan inngaizawng dawn mi? " ka ti a. 

"A ni mai ang chu.. I duh lo mi? "

"Sex vang khan maw? "

"A ni thei anga. Sex vang ngawr ngawr erawh a ni lo. "

"Min duh vang nge sex vang" ka ti leh tâlh a. 

"A pahnihin"...  

Hmm.. Ka hlim tho mai ang. Ka lo inthunun tawhna te hlih a nih takah chuan ka thawl huai naa a hmaa ka lo chet tawhna te avang erawh chuan nuam lo ka la ti tho. A lakah ka inthlahrung thar a ni ber. Mahse, ka ngaizawng lo phal chuang si lo va. 

Ka ruih em vangin min paw chho a, min mut thattir thlap hnuah a haw leh. A tuk zing ni chhuak chu a mawi mang e. Rinmawia nen chuan kan inzui ve ta dat dat reng a. Beth pawn a man rang kher mai. Kan inthianthatna a chhe chuang lo. Bena pawh a la awm ve rih a, kan lengho thin. Min care a, mipa dang mamawh thei miah lo va min siam a thiam. Ka sawi thiam lo, over si lo hian a zei em em tlat. Kan intext changin duat duat kan ti ve hluak hluak lo, kan inhnial fiam a, thu ho mai mai pawh a nuihzatthlak zawngin smiley zawng zawng nen a ti thiam. Min tihlim thlawt. Sex pawh kan hmang nasa. Damdawi ei a phal lo va, ka rai har ngawt mai. 

Ka chhungte an zin leh a, an zin zanin a rawn riak nghal. Karleh maiah an khuaah a haw dawn bawk sia. Kan âm dun viau. Thian ang maiin kan inpawh tawh tho si, hetiang em em hian ngaihzawng ka hlimpui theih ka ring ngai lo.  Ka nute an lo haw a, thil te an lo hawn ve. Ka u te nen pawh an inpawh ve mai. A fel tlat alawm.. Ka bialpa hi chu.. 

Kan chhungkaw chaw ei khawm a awm dawn a. Tun tum chu patea te in lamah kan hmang dawn thung. Rinmawia pawh ka sawm ve naa chhuanlam a siam a, ka nawr lui duh lo. A nuam lo ve ang tih ka ring thiam. Rinmawia tel ve lohna hmun chu a ho tlat. Ka kim lo. Haw thuai thuai ka chak angreng. Zan dar 8 bawr velah kan haw a. Ka inbual sawk sawk a, ka inthlak fel hnuah ka zuk chhuk. Kawngka a lo kalh a. Ka kik a. A rawn hawng har hrep. 

A rawn hawng a, kawr a ha lo va, boxer nen a lo awm!  'I mu twwh law" ka ti a. Ka lut nghal. Mahse, a room atang chuan Julie a rawn chhuak!  Kan inmelh ta reng mai. Ka harh chhuak thut, Rinmawia chu ka melh a, ka khur deuh, "Hetiang hian maw min thungrulh dawn. Hmana i laka ka chetdan avang khan phuba lak nan min lo kawp mai mai a ni maw? " ka ti. Hei hi ka rilrua riak reng thin, ka sawi chhuah ngam ngai loh kha a ni a. Tun hi sawi chhuah nan ka hmang ta a ni. 

"Ka sawi fiah thei.. Ngaithla la" a ti dam dap a. 

"Ka ngaihthlak chak zawng a ni hrep lo ve. Ka hre thiam vek e. A tawk. I chak zawk e. Zanin la la hian kan in hi chhuahsan nghal bawk ang che" ka ti ta a. Ka hawi larh bawk. Ka natzia chu ka inhria, mahse, a lakah ka tlawm tawh a. Ka tlawm nawn tawh lo vang. A ngawi reng a. Julie pawh a ngawi. 

"Phuba i la tawh a. Tihtur i nei tawh lo ve. Insiam ru.. In pahnih khan ka hmu peih tawh lo che u" ka ti leh hmak hmak a. Tap lo turin ka insûm nasa hle bawk. 

"Ka tihpalh a ni. In inkarah ka lo inrawlh ve a.mahse, i ngaih ang kha engmah a thleng lo ania. Kan inngaizawng lo.  Keimah vang chuan hnawtchhuak lo hram rawh. Ka rawn kal tawh miah lo vang" Julie chuan a ti a. A insiam sawk sawk a. Chhuah a tum a, Lalrinmawia chuan a lo chelh nia!  

"Kal suh. Min hnawtchhuak a. Kan chhuak dun dawn nia. I kal a ngai lo. Ka rualin i haw ve dawn nia. "a ti chang fak a. Min rawn melh a. 

"Engmah i ngaithla duh lo bawk a. Ka sawifiah bik lo bawk ang. I duh ang ngei chuan ka chhuak ang" a ti leh a. 

"Aw sawi tam a ngai lo. Chhuak rang rawh u' ka ti a. Ka chhuahsan nghal. Thinrim zetin khumah ka mu tau sawk. Rei vak loah ka nuin min rawn ko a, ka va chhuak. 

"Rinmawia i hnawtchhuak e law? Engvang nge? "A ti a. 

"Chhan a awm a ni mai" ka lo ti hmuk. 

"Tun ang zanah lehnghal, a chi loh reng reng. I pa te pawh hrilh ve ta che"

"Hrilh kher a ngai lo. Ka thu thu.. An chhuak ngei ngei tur a ni" ka au thawthang a ni ber. 

Mahse, ka pa a lo haw a. Rinmawia chhuah chu a phal lo bur. Ka thusawi pakhatmahin a ngaithla lo. Ka hnawhchhuah chhan ka sawi thei bik si lo. Mahse, Rinmawia mipa inti ve nafam chuan a tukah a chhuah tur thu a sawi tho. Hm.. A pawi chai lo. 

An khuaah a hawng a. Julie pawh a hruai ve aniang. Ka ngaihtuah zui tur. ani lo. Mahse, ka va ngaihtuah nasa si em.. A inah ka zuk chhuk a, a lo ruak hiai tawh. Chokah ka ding vang vang a, wai wai ka chhumsak laia ka kawngah min rawn kuah chunga ka chhip a chhem vel lai te, a bathroomah ka bual lai te, a khuma nasa taka nawmna kan lo chen tawh dan te… Aaa.. Engkim chuan amah min hriatchhuahtir vek mai si. Tah loh chu ka tum thin. Mahse, ka zan mut hmunah erawh lukham chunga hmai phumin ka tap thin. Mi tha tak ka ni lo va, a laka ka chet dan mawi lo tak tak te avang khan phuba a la a ni mai. Ka chantawk mah nise; tawrh a va harsa si em.. Lem a chan chhung zawng khan a der mai mai a nih ka ring phal lo. Engkim kha a tak vek ang mai a ni si a. Min ngai ve tho ang em le?  Min ngaihtuah ve ngai ang em? Ka ring lo. Julie bulah hlim takin a nui anga, keimah min care ang bawkin a care ve awm si a. Na ka va ti em.. 

Zu ka in nasat phah. Ka block fai vek vangin inbiak ngaihna a awm lo. 

"Tete, i mak ka ti. Khati khawp khan i tuar tho sia, a thusawi ngaithla ve la.. Hei lo chhiar teh.. " tiin Beth chuan a msg ss chu min lo thawn a. 

Lalrinmawia nen an inbiakna a ni. 

"Ka thusawi a ngaithla duh lo va. A thinrim hle tih ka hria. Julie kha ka thianpa bialnu hlui a ni a. Kan khua a mi anih kha. Hetah thil zirin a awm ve a. Ka thianpa nen an inthen hlimin min lo be ve thin a, min ngaizawng tih chu ka hria. Amah tetei pawh min rawn biak tirh chuan ka hrilh nghe nghe. Mahse, ka ngaizawng ve lo. Khamini khan a awmna a chhungte nen an intithiam lo va, a rawn tlan a. Chaw te pawh a ei. A tuka kan khuaa hawn a tum nghe nghe, Tetei pawh ka thiam ve tho, kan mut tawh hnuah a lo kal bawk sia, ka lu a nat em. Vangin ka mu hma kher bawk sia.. Tunah chuan engkim a titawp tawh a. Kei pawn ngaihven ka tum lo. A luhlul em a, a lo kir duh tawh lo vang.. Kei pawh ka rawn chhuk tawh lo vang. " tih thu chu. 

Eng nge ka tih ang tih ka hre lo. Va tlawm leh dûk dûk ka hreh a, tin, ka lakah a beidawng tawh bawk. Va tlawm ta ila min lo hmuhsit ka ring. Reh ve hmak mai ka tum ta a. Mahse, beiseina eng emaw tak zawng ka la nei tho. Eng nge ka beisei tih erawh ka hre lo. Christmas pawh nuamti takin ka hmang ta lo. Ka chhungte hian an hrethiam deuh bawk, zawhna eraeh an nei lo. 

Kum thar kan chuangkai a. Lalrinmawia zûn chu a nasa dawn chauh. Ka ngai takzet a ni. Aizawlah hian hmuh mai inring ten ka zawng ru thin. A awm si lo. Amah ang mipa kha ka tawng leh ang em le.. Kan inthen ringawt chu ka ring lo thut thut zel a, ka lo hmanhmawh lu deuh a ni tih chang ka nei fô!  Mahse, ka dinhmun angah khan tupawh ding se, an tih ve tho ka rinna hian thiam min chantir leh deuh thin. Ka unblock zan chuan a online lo va. Ka be duh bik lo. 

A tuka a status chu, "A tha ang em le? " tih thu chu.. Keimah min tihchhan a nih rinna ka nei tho. Ka be ngam chuang bawk si lo. 

Zanriah kan ei laiin ka pa chuan, "Nauteii pawh hei i nula chho ve tak tak dawn a. Ka sumdawnpui I pa Ruata kha i hria anga, a fapa Hmangaiha kha USA atangin a rawn haw dawn a. He lamah hna a thawk tawh dawn. In tetlai atanga kan sawi dun fo tawh angin, inhualna nei ula kan tia.. Hei hi kan chhungkaw kalphung a ni tih i hriat kha" a ti chuar chuar a. Hmangaiha chu ka hria. A lar ve a. A hmel pawh a tha. Mahse, hmakhalhtu a nei. 

"Ka hmangaih lo" ka ti hmak. 

"Nangni ang rualin hmangaihna awmzia in la hre lo. Kan sumdawnna chhunzawm thei tur in ni dawn a, an chhungkua leh kan chhungkua kan inzawm zel hi a tha " a ti leh nghut. 

"Ka nei lo vang" tih leh thawh ka rual a. Ka ei lui thei tawh ngang lo a ni. Engmah an sawi zui lo. Fate haua zilh vak vak chi an ni lo va, min nawr lui chiam ngai lo naa an tih tawh chu kan tih ngei a ngai thung. Hun min pe rih mai chauh zawk a ni. 

Class kan tan a. Ka ning. Lalrinmawia a tel ve lo. Hmangaiha a lo haw ta ngei a. Beth leh mi dang chuan min duhpui vek. Min thîk hial. Ka thinlung an hrethiam si lo. Beth ngei pawn Rinmawia vanga ka tawrhna kha ka dam tawhah a ngai. A teuh si lo. 

Hmangaiha chu mi sual a ni hauh lo.  A lo leng fo a. Ka nu leh pa te nen an inkawm ngeih hle. Ka rilru a la hel zia a hria a, a nghak peih ngat ngat viau. Ka nei dawn si lo va ka khawngaih deuh. Ka haw hran lo. Mahse, a mah aia pawimawh ka thinlunga a chen chhung chuan engtin nge ka pasal dinhmun ka luahtir theih ang. 

"I la inpeih chiah lo tih ka hria, mahse, ka nghak thei che ania. Inneih te chu MA te pawh i chhuak ve phawt anga, a hmanhmawhthlak loh" a ti thin. 

"U Hma, i hre thiam lo a ni. Nang leh kei chu kan in mil lo" ka tih thawr pawn engahmah a ngai lo. Hmangaihna aia sum dah pawimawhtu fapa kha a ni miau a. Kei pawh ka pa fanu mah ni ila, hmangaihnaah ka tuiral ve tlat si. 

Ka uak tuar tuar a, ka chau nghulh mai. Kan awmpuinu zaiteii chuan, "U tete, i rai mi? " a ti thut a. Ka chhungte an awm hnai lo hlauh. Rum. Deuhin ka melh a, "Rai mai mai lo" ka ti a. A nui thaw zui. 

Nia, khawsik ser ser, pum nuam lo leh luak chhuak ka nei fo a. Inrinhlelh nachang ka hre si lo. Zaiteii vangin in test tul tihna ka nei ve ta a. Beth chiah ka hrilh thung. Aman test kit min leisak nghe nghe. Ka test ta a.. 

Ka rai!  Lalrinmawia fa ka pai!  

Loh theih lohin ka biak a ngai ta a. A harsa mang e. 

"Ka rai" tih thu chiah ka thawn. 

"Chuan.. " a rawn ti vat. 

"Ka hre lo. Engtin nge ni dawn? "

"Hmangaiha nen in inhual dawn sia" engtin nge a lo hriat le.. 

"Chu chu a pawimawh lo. I fa hi engtin nge kan tih dawn? "

"Titla rawh"... Ka phu zawk. Lalrinmawia ngei chu a ni sia maw..! 

"Eng a?!  Ka titla ang maw?  I fa hi i duh lo tihna maw ni a? " 

"Hmangaiha nen in hlim lohna thlen thei a ni dawn si a. Hring lo la a tha zawk" 

"Lalrinmawi" 

"I pa ten an thtlaksak tho ang che" 

"Chu chu ka tihtir lo vang. Ka pai tlang ang. Ka mamawh lo che. Mang tha" 

Khumah ka bawk a, ka tap zawih zawih. A va nunrawng em em ve.. 

Ka inthup hram hram rih a. Beth chuan a hre thung. Lalrinmawia tawngkam chu mak a ti ve hle. Hmangaiha vang a nih a ringa, kei in a chhuanlamah ka ngai thung. 

"Te, i harh em?  Tho vat rawh. Vat" Lal Beth-i mai mai chu. Zan dar 11 ah min lo call harh. Ka chauh em vangin ka muttui ve tehreng nen. 

"Eng nge" ka pawr hle. 

"Lalrinmawia'n kan inah a nghak che" 

Ka thu chhuak hlawl. "Eng a? " ka ti tuar a. 

"Nangmah ru chhuak tur chein.. Te, hei hi i damchhunga duhthlanna pawimawh tawpkhawk a ni e. I kal dawn nge Sawn i pawm dawn? " thutak zetin a rawn ti a. Ka chhing sawk. Ka pa ka mitthlaah a lo lang a. Na a va tiin a va thinrim dawn em. 

Mahse, Lalrinmawia kut dam thlupin ka dul zut paha, "Tah hian Vansangpuii leh Lalrinmawia fa tur a la awm dawn" a tih lai kha a lo lang leh a. Ka tho va. Ka thawmhnaw ka pack. 

Khua a la vawt a, ka khur hleuh hleuh mai. Beth chuan min kai vat, in hnuaiah min chhuk thlakpui, a room hi in hnuaiah a awm ve thung a. Khumah chuan Lalrinmawia chu a lo thu ran mai. Chiang zetin min melh kal a, "I lo kal ka ring reng a". ati a. Min rawn kuah thlawp. 

Beth a la awm tih hre chang miah lo vin ka tap!  Ka lo ngaih tawhzia leh a angchhunga tlukluh nawmzia ka hria, ka inkhawngaih a, ka ngai bawk si. Engkim chuan ka tah a tichhuak. Duat deuhin min lo chul hliau hliau a. 

"Zingah i awm lo tih an hriat chuan hetah an rawn zawng dawn che. Kal ru.. Ka lo sawifel vek ang" Beth tluka thian tha ka tawn ka ring tawh lo. 

Bolero a lo keng a. A zan la lain an khua kan pan hmiah. Kawng tluanin kan inhau!  Mahse, kan thinrim miah lo. Zing lam dar 4 bawr vel a niang, kawng pengah min luh phei pui a. Back seatah min kai lut. "Ka khawih chak tawh lutuk che. Ti lawk ang" a ti. Huiham.. 

"Ka rai hi" ka ti a. 

" A la pawi tham lo vang. A la te awm em mai" a ti tlat. Ka hnar thei teuh si lo. Rem leh rem lo vin kan han tlingtla leh zuai a. Inhrethiam tawn takin kan inkuah a, khua kan nghak var ta mai. Kan muhil ta daih. 

Beth-in engkim a lo sawifiah a. Ka awmna chin an hre ta bawk a. Ka bo satliah lo tih an hriat chuan a tawk mai. An thinrim dan tur ka ngaihtuah peih lo. An inah min luhpui hmiah si a, ka va zak em.. Engmah ka thiam. Bawk. si lo, ka thatchhe bawk si. Mahse, an fel em em a,  anu ngat phei chu ka ngaina nghal. Roomah kan tawm deuh reng mai. 

Kar khat a la tling lo tihin ka pa ten min rawn hruai, "Hetia nau hial in pai tak  siah chuan inneih loh theih pawh a ni lo va. Duh ai chuan in la naupang deuh chu ka ti. Mahse, a nih nih kan ni mai aniang chu" tiin thu an dehkilh a. Kan hawng ta. Palai hmel kan hmu zui nghal zat a. Mahse, ka pa rilru ka lo hre lo a ni. Palai te bulah chuan, "Nau hi nei fel phawt se.. Tiin kan chhungkua chuan thutlukna kan siam a" tiin a lo chhang daih. 

Kei erawh min khung hrang nghal a. Phone ka kawl lo va, engmah neih ka nei lo. Doctor in ni khat danah min rawn en thin. Ka nau pai chu an titla dawn a ni ngei ang. Ka thih thlengin ka tang ang. 

Mahse, ni 2 leh zan 2 zet ka mutthilh chhung chuan engkim an lo ti hman a. Ka harh meuh chuan naute ka pai tawh lo. A bo tawh. Mi â ang maiin ka rak tuar tuar a, ka pa chuan ka rai thu hria an la awm mang lo va, nula anga leng leh turin min duh a lo ni. A teuh lo. Nula ka ni tawh lo. Lalrinmawia nupui ka nih hi. 

Beth pawh ka hmuh an phal tha tawh lo. Mahse, vawi khat erawh an chhuah hlanin a lo kal a. Lalrinmawia nen an inbiak thu te a sawi. Keipawn engkim ka hrilh ta vek a. Min raen la chhuak turin ka hrilh bawk. Ka phone hi khaw nge an thehthang ka hre lo. Biak ngaihna ka hre thlawt lo. Beth zarah a phone hmangin kan inbe thei ta a. Tap chungin naute an paih thu ka sawi. Min lo hruai turin ka ti bawk. 

"Tete, nang leh kei chu a rem ngang lo a nih dawn hi. In dinhmun leh kan dinhmun a inthlau ve bawk a ni. Tihian intheihnghilh tum tawh zawk mai ang. Ka dem ngai lo vang che. Mahse, mitthi angah min ngai tawh ang che. Tun atang hian engkim ka titawp ta mai aw.. Min hrethiam rawh" a ti ta. Ka puakdarh vek. Ka kehsawm takmeuh a ni. 

Beth chuan min tahpui. Kawng dap a tum thu a sawi a. Mahse, ka phal lo. Hei chen ka zui ngam a, kawng laka min kalsan duhtu chu ka chelh lui tawh lo vang. A duh ang ngei chuan ka liam tawh ang. Chu chu ka tum ber a ni ta. Ka pa te bulah pawh ka tum dan ka sawi a. Min ringtawk a. Min dah zalen leh ta. Lalrinmawia tel lo hian ka damkhawchhuak ngei tur a ni.. 

Hun a ral ve zel a. Class pawh pangngai takin ka kal. Hmangaiha pawh ka be chhe lo. Kan inzui chhuak ta fo a. Inhualpui pawh ka hnial ta lem lo. Lalrinmawia, beisei tlak loh, mi dawihzep avangin ka tlu dawn tawh lo. Ka inhuam thukzia hre tu khan ka thlen ngam chin a thleng ngam ve tlat si lo va. A tawk viau. Tunah chuan hmana Teteii, mi. Chapo leh induhtawk tak kha ka ni leh tawh. Hmangaiha a lo lar ve thawkhat bawk sia. Kan pahnih thlalak te hi IG leh fb ah te an post fô!  

Ka kut zungtangah inhualna zungbun a bet va tawh a, tu mipa mahin min beisei ngai ta lo. Lalrinmawia erawh englaimahin ka la theihnghilh ta chuang lo. Mahse, thinrimna nen ka dawngsawng thin a, a tawrh dan a zia zawk. Ka naute erawh awm ve se ka ti thin. 

"I dam maw.. I lo danglam ta hle mai" Ka hmaa Dinga a kut rawn pharchhuaktu ka hmuh hnuhnun ber chu kum 2 liamtaah khan a ni. 

"Ka dam e. Nang zawk.. " satliah zetin a kut chu ka lo vuan a. A lo lang upa ve deuh ta a, a hma aiin a hmel tha zawk mah. 

"Eng nge i tih tak zel? " a ti a. A nui deuh bawk. 

"MA ka zir ve leh lauh lauh chu a nih hi. Nang? "

"Kei pawh Goa a tangin ka rawn haw ve chiah.. Naktukah ka haw chho ang. Thil ka zir a.. " 

"Nih chu.. Lo hlawhtling ngei ang che". Dengkhawng angreng fain ka ti a. 

"Ka lawm e. Nang pawh fanu fel tak i ni zel dawn nia" a aw chu a la dam thlap mai. 

Ka kalsan ta a. Ka lo la hmangaihzia erawh ka hre thar leh ta. A va mak em.. 

Ka inbual sar sar a. Hmangaiha te chhungkua nen chaw kan ei ho dawn a. Ka inchei zuai zuai. In hnuaia ka zuk chhuk chuan an lo kim thap tawh a. Kan inpawh tawh hlawm bawk a, titi pawh a rual tlang. Hmangaiha pawh ka ngaina ve tawh khawp mai. A mi fawh leh tu emaw fawh a dang deuh e tih lohah chuan.. 

Zanriah ei khamah ka pa leh Pa Ruata chu a office ah an inkawm a. Ka nuin thingpui pe turin min ti a. Ka va chawi phei a. Kawngka an lo khar phui lo, ka luh dawn lai mekin, "Ni e, Rinmawia kha tlangval fel tak zawng ania lawm. Mahse, a dinhmun kha khati kha a ni a. Ka fanu hmang khan vau lo phei ila chuan an tlan bo maithei a ni" ka pain a tih ri avang chuan ka let leh. Ngawi rengin kawngka bulah chuan ka ding a. 

"A sawi chhuak miah lo tihna chu aniang a… Teteii hian a hriat vaih chuan a luhlul si a. Thil a pawi thui viau ang" Pa Ruata a ni. 

"A hre lo vang.. " ka pa. 

Ka insangmar teuh a, kawngka chu ka kik ta a. Ka va lut a, hmel pangngai put hram tuma ka insanmarzia chu… ka nui lui bawk. 

Roomah ka tlan chho, Rinmawia number ka hmet chhuak. A tlang thei lo. A hmang tawh lo ani maithei. Kan inbe ngai tawh miah lo va. Beth ka call a, Rinmawia number ngaihtuah turin ka ngen tawp. A lo ngaihtuah nasa aniang. Engtin tin emaw a lo nei thei hlauh. Ka va lawm em.. 

"Khaw nge i awm.. Inhmuh ka duh.. " ka ti nghal thâwr.. 

"Eng nge awmzia.. "

"Sawi vat mai rawh. Khaw nge i awm? "

"Regency-ah.. Tete, dik lo a awm mi? " 

"Ka lo kal" tih leh ph dah ka rual a. Kekawr ka ha a. In chung atangin ka chhuak thla. Scooty ka la chhuak a, chak zetin Regency lam ka pan nghal. 

"Engkim ka hre duh. Engtin nge ka pain a vau che.. Sawi rawh" ka ti tuar tuar a. Ka tap bawk. 

Rei fe a ngawih hnuah, "Hahdam rawh.. Tete, inthlahdul rawh.. "Tiin ka lu a rawn chul a. 

"Sawi rawh.. Lalrinmawi" ka ti tuar. 

"Aw le, ni e, i pa khan ka kalsan lo che anih chuan, i nunna leh naute nunna lak a tum thu a sawi a ni. A ti duh ngei dawn tih fiah nan naute an tihtlak lai thlalak min lo thawn. Police ah ka report anih chuan nangman i tawrh tur thu leh ka kalsan lo che anih chuan, i nunna a lak tur thu a sawi nawn bawk… ka hmangaih che a. I thih ai chuan, ka hmangaihna che hi hetia lo vawn nun reng a, thihpui mai ka thlang ta zawk a ni" 

A thusawi tin te chuan min chhun sup sup a ni ber. Awmngaihna ka hre lo. Ka pa chuan chutiang chu a lo ti maw.. Hrep taka.. Ka tel lo va thinlung rethei taka a hun lo hmang thin, Hmangaiha nen kan thlalak dun mittui nen a lo thlir thintu chu ka melh ngawih ngawih a. Keimah aiin ka khawngaih zawk. Min hmangaih tih hi ka chiang tawk bawk e. 

"Anih chuan naktukah i rualin ka chho ve ang.. Tun tum chu min phatsan thiang lo. Minnkalsan pawn ka rawn kal ve tho ang" ka ti. Ka luhlulzia a hre tawh a. Engmah a sawi lo. Min rinhlelh loh nan ka haw leh ta phawt. 

A tukah ka pa pawisa ka ruk chhuah leh ka thawmhnaw nen Beth puihna tel bawkin Biate lam kan pan ta. Lehkha ka hnutchhiah a. An hrethiam ang chu. 

Lalrinmawia nen chuan vahvaih dun pawh ka thlang zawk si a. 

.! 

A tawp… a tawp a ni mai. In chawh 😌