Kawng bumboh

KAWNG BUMBOH.. 

Ziaktu: Toni Râlte

"Chhuak rawh. Chhuak nghal rawh" tia ka pain ka nu a nam chhuah lai chu kimki takin ka naute nen kan lo thlir thap a. Engmah kan sawi ngam lo. Ka nu chhuak lai chu kan te ber chuan a va au zui a, a va pan bawk a. Ka pain a pawt leng lawp. Ka insum thei ta ngang lo va, "Pa, mampuia hi chu kaltir mai la, a la te sia" ka ti a. Mitmeng sen rûma min melh khui chungin, "Saw tiang uirenu enkawl ka phal hleinem" a ti ram hmak a. Ka chhang ngam tawh lo. Chu chu Retheihna atanga retheih lehzualna hringnun bul ka tanna chu a ni. 

Ka hming chu Vanlalmalsawmi a ni a. Bungpui khua kan ni. In 300 bawr lek kan ni a, kan unau pali zinga a upa ber ka ni. Nikhua ka hriat theih tirh ata chhungkaw hausa kan ni ngai lo. Ka pa chu zu ngawlvei a ni a, nitin inhlawhchawpa eizawng a ni. Ka nu pawh inhlawhna a hmuh chuan a inhlawh thin. Kan chhangchhe si a, kan hautak chho ve zel bawk nen. Zu kan zuar ta a!  Mahse, ka pa avangin a hlawkna kan tel meuh lo. Hna a thawk ngai ta meuh lo va, zing atanga in tanin a in kal reng thin. Ka nu kha a va rethei thin tak em. Kan te ber tih loh chuan school kan kal ve vek tawh a. Ka kum ngaihtuahin ka rilru a chak a, lehkha ka zir loh ngaihtuahin ka thiam ve hle bawk. Zirtirtu ten min duhsak ve deuh bawk a, School kha nuam ka ti thin. 

Ka pa chu a bawraw tawlh tawlh a, kan buai chho telh telh mai. Inleng kan nei reng thin a, pa phawk phawhraw pui pui, hram tlahawlh zet zet te bula chen reng chuan kan tawngkam pawh a tuihnai lo chho ve tial tial a. Pawl 8 ka nih kumah thanthi ka nei ve a, ka vun te a lo mam chho ve tan a, tin, ka pa ka chhun a, ka rualpui te zingah pawh a lian pawl ka ni chho ve a. Ka nau chiah mipa hi lehkha a thiam loh chu thuhran, seilennain zir hek lo, a sual hma a. Meizial zuk ruk atangin denriteah a kai chho a, pawl 7 a zir laiin zu a tem tan der tawh a ni!  School pawh a bang ta reng a. A chhan chu hrem ngun ber pawl a ni a, a tan nuam hek lo. Sual viau e ti lo chuan thingtlang naupang tih takah a ramvachal zèk a. Luiah te kalin lui lam sa te hi kan hmeh zin phah viau. 

Ka nu hi nu tè lam, ngo ving veng hmel chhe lo tak a ni a. Ka pa pwh hi pa hmel chhia a ni hran lo, zu in a taksa a ei chhe hneh èm a, a nih tur ang a ni pha ta lo a ni. Ka nu hian a nu leh pa te phal lo chung ka pa a neih avangin an tuithlar a. Mahse, fate na ná ná chu ensan reng a har ve bawk aniang, an inbe pawp ve leh thuai a. Mahse, khaw hmun khatah kan awm lo thung. Ka pa lama kan chhungte erawh Bungpuiah an awm ve thung. Mahse, kan intlawhpawh tehchiam lo, patea te nen ka pu te chu an la awm a. Patea nupui hi kan nel vak lo deuh a, tin, ka pu te hian ka pa hi an ensan ve deuh bawk. Zu ngawlvei a ni miau a. A hnemhnanpuiawm loh ve bawk a ni. Mahse, ka pi erawh pi fel tak a ni thung. An thlai hnah leh thei rah te hi a ruk ten min rawn pe fô mai. Patea nupui hi a thu èm em a. An fate nen pawh kan inpawh vak lo. A hmingin unau kan ni a ni mai. Ka pa farnu te zawk ka niteii te nen erawh kan inpawh tha ve viau, ka pi a chhun a, a rilru a tluang em em. Mahse, an khawsak a harsa ve em em a. A hrisel loh vangin fa pawh pahnih chiah an nei a, kei aiin an nau ve ve a, mahse, patea fate aiin min ngaina zawk. Kan inlenpawh zeuh zeuh. Ka pa te unau zinga upa ber ka ni erawh Aizawlah pasal a nei a, an hausa em phei chu ka hre lo a, mi hian a vannei an tih fô danah keini ai thlawt chuan an dinhmun a tha zawk a nih ka ring. A rawn zin khât èm vangin kan inhre mang lo. 

Pawl 9 ka zir ve tawh a. Ka tleirawl ve viau tawh. Thingtlangah chuan hmeichhia hi kan nula hma a, Kohhrana in hman deuh phei chuan an senior hma hle thin. Kum 15 lai ka ni ve tawh bawk. Kan te ber dawttu hmeichhia pawh pawl 7 a rawn zir ve chiah a, kan te ber in pawl 5.. Khang kan tet lai chhung zawng khan kan hausa ngai chuang miah lo nain rualawh nachang kan la hre vak lo va. Naupang rilru thianghlim tak kan put hun lai a lo ni bawk a, hrehawm tih ruk chang zawng awm mah se; thiante leh school avang khan ka hlim ve tho thin. Class 9 ka zir kum atang chiah hian vanduainain ka hringnun chu a rawn nuai tan ta a ni. 

Ka nu chu sawi tawh ang khan a hmel chhe hran lo va, zu te kan lo zuar nen, rilru a nei ve tan bawk a. Ka pa in tur a dah hransak bak chu rilru nei takin a hralh a. Amah pawh a invawng fai chho a, nu tawp hnik hnek nih kha a sim chho ta a nih ber chu. A lawmawm lutuk rualin kawng tha loah a pen phah ta tlat si a!  Zan khat kan chaw ei laiin kan thenawmpa ti ila kan in leh an in inkarah in 3 a awm. Fa pawh pahnih nei tawh a ni. Chu pa leh a thianpa hian an rawn lam a. Ka nu kha zo nu mah nise, a mawl hauh lo. Zu hi a fate min khawihtir ngai lo hrim hrim. Ka nu chuan, "Lo nghak lawk mai ru. Kan ei kham lawk ang" a lo ti a. Kan hriat fo tawh a nih vangin ngaiah kan nei deuh tawh.,,zu zuar fanu nih hi ka duh bik lo, hmuhsitna pawh ka tawng zeuh zeuh, vawi tam ka pa te bulah pawh zuar tahw lo turin ka ngen thin. Awmzia a nei lem lo a. Ka sawi peih vak ta lo. 

Ka nu chu a kham a, Thenawmpa chu signal zauhin an inzui chhuak ta a. Zu hi inah kan kawl ngai lo va, kawmthlang ek in bula khur an laihah an dah thin. Chu chu an zuk la dawn tih kan hre ve vek. Mahse, ka nu chu a rei ta riau a. Ka pa tan a rei lehzual a ni ngei ang. A rawn luh leh chuan ka pa chuan a lo chhipthlak nghal bur mai a. Ka pa zurui hi lehlamah chuan kutthlak zawng leh in chhung bungraw tichhe zawngin a thawk lem lo va, phun erawh a phunchiar ngang mai. Ka nu makti hrilhhai chu sawi nawk nawk chungin, "Kha mihring kha tiraw i ngaihzawng chu.. Mi sawi hi a lo dik ngei a nih dawn hi.. Tenawmnu" a ti ta hrep mai a. Kei chuan ka hrethiam nghal. Mahse, ka nu ka la tan tho zawk. Rinhlelhna ka nei miau lo va. Chumizan chuan in leng pawh ka nuin a lo hnar ta vek a. Ka pa a áng reh thei si lo va. 

Khami zan atang khan kan chhungkaw hlim lohna sa chu belhchhahin a awm ta zel a. Ka pa lah a rui reng mai si. A ruih apiangin ka nu chu a ankhum a, a chhe thei ang berin a puh thin. Tuman kan khak ngam si lo. A tawi zawngin sawi ta mai ila, kum chanve kan chuangkai awrh tihah ka nu leh chu kan thenawmpa mu dun lai chu ka pa in a pháwk ta a. Uiresan kan ni ta a ni. Thil tam tak ka ngaihtuah hian ka nu kha dem vek lohna chin erawh ka nei fô!  Khatiang pasal, rui reng, hna thawk thei bawk si lo, an khum rengtu kha tu hmeichhia chuan nge dimdawih taka enkawl reng peih bik ang? Mahse, ka nu ka thiam lohna erawh min kalsan hnua vawikhatmah a fate min rawn ngaihven zui ta lo kha a ni. Nu hmangaihna chu kan tan vana rah ang a ni ta. Pa kan la nei ve naa, ka nu kha kan chhungkaw eizawngtu ber a ni miau si a. Kawng a bumboh zual ta hle. 

Nu chan ka chan a ngai ta tih chu naupang hle mah ila, ka hai lo. Kan te ber hi a la á deuh a, thil zawng zawng a la hrethiam lo a, a u te pahnih erawh chuan an hrethiam ve vek tawh. 

"Vanlal, khaw nge ka zu in tur.. Rawn la vat rawh" ka pa chuan a ti teng chhuai a. Thleng ka sil lai a ni a, ka dah vat vat a, "Û, ka zuk la dawn mi? " Mama chuan a lo ti vat a. Ka lu ka thing. Ka nu zu kawlsa kha paih ngawt ai chuan tiin hralh chhuak lem lo vin ka pa in atan kan dah tha a ni. Zu ka zuk lak chhuah lai chuan ka mittui a far!  Ka nuin min chhuahsan atanga kar hnihna chiah a ni. Zirna ka chawlhsan chu na ka ti a, school ka ngai em em. Mahse, zu zawrh chu ka duh tawh si lo va, eng emaw tal chu ka tih ve a ngai tlat si a ni. Ka pa chu a hmingin kan pa a ni ve tawp si a! Ka naute pahnih tal hi chu lehkha thiam tir ka tum ve a ni. 

Ka pa zu rui a chatthla a. Ka naute pahnihin lehkha an zir a. Mama nen a tuka zawrh tur thlai hnah kan khar chhawn chu thiam leh thiam lo vin kan tèl tha ve a. 

"Û, Anu khan min la hre ve reng ang em le? " mama chuan a ti sap a. 

"Hre reng ang. Engtikah emaw chuan min rawn hruai mai ang" 

"Ih maw, vawiinah ka tuichawi tur kha Nu Thlengi leh Mamawii te kha tuikhurah an lo awm ve a. 'In nu hurherh vangin ka fate an fahrah a. In unau hian in la tuar ang' a lo tia. Ka chhang ngam si lo va" A sawi zawng chuan a hnuk a ulh deuh tih ka hria. 

"Nu Thlengi te pawh a awm ve tho alawm, keimahni ang bawkin apa in a chhuahsan ve daih sia" ka lo ti ve mai a. Naupangtè mah ni ila, ka ngaihtuahna a kal thui ve kher mai. Ka nu leh an pa kha an inru zui ta daih si a. 

Zing karah hmanhmawh takin Mama nen chawhmeh kan zuar kual thin a, Mama hi a fel, èm te hi a phur ve mai zel a. Ka nau a ni naa ka thlamuanpui ve thin khawp mai. Kan khua kan suartluan zawhah kan haw a, Nuseni'n thiam leh thiam lo vin mei a lo nun ve a, chaw chu a chhum thiam ve tawh a. Chawhmeh ka'n siam sawk sawk a, school hi an tlai teuh thin teh e. Chhun lamah kan unau bawkin thingphur turin kan inzui chhuak leh a, thing chu kan hralh leh thin. Tuah atan kan mamawh tho bawk si a. Kan hlèp tha mang ngai lo. Inhlawh ve dawnin kan tha a la chhawr tham meuh si lo. Min khawngaih tawk chu an awm tho naa, kan la nau ve deuh èm a ni. Zu kan zuar tawh lo tih kan khaw YMA branch ten an lo hriat chuan, tanpui nan Rs. 2000 leh buhfai bag khat min rawn pe hlauh mai a. Kan va lawm tak. 

Ka pa erawh a zual telh telh a. Ka nu laka a rilru natna hrikthlak nan a fate chu min hmang ka ti mai, kei hian a kut ka tuar zing ta malh malh hle. A kawchhungah hian ramhuai a lut tawh a nih ka ring hial thin. Ka nu khan a pawisa kawl sa a keng vek bawk si a, ni khata cheng 10 neih miah loh chang pawh kan nei thin. Tebera hian hmawmsawm pai te hi a chak ve thei em em a, a thianten an lo awhthik ve thin si nen. A manganthlak thin khawp mai. Kan zirtirtute pawh an lo leng tawh a, zirna ka chawlhsan a ngai ta chu kei ang bawkin pawi an lo ti ve khawp mai a, tihngaihna ngang a awm miau si lo va le.. 

Ka la naupang bawk a, Pathian laka vuina te hi ka nei ngai miah lo va, Chawlhniah kan unau zain kan thawmhnaw neih that ber ber hain kan inkhawm dial a, zai te hi nuam kan ti thei.. Khatihlai khan rethei mah ila, ka hlim tho nia!  Mahse, Chawlhni vawi khat erawh ka zak takzet a ni. Thian hi ka ngah lo va, ka thiante ve ber hi Lawmi, Sangteii leh Mami te an ni a. School ka kal tawh loh vangin kan inkawm khât ta deuh a ni mai a. Chawlhniah erawh kan inkawm leh dial thin. Chumini SS kan kal chu an inhrilh ru a, min melh hrek hrek ni mai hian ka hria a. A tirah chuan ka hrethiam lo. Mahse, Mami chuan, "Vanlal, i kawr ngai reng hi i ha a, thlak ve tawh la' min ti ta a. Ka na ve zawk mai. Ka zak bawk si. Chhan pawh ka chhang lo, ka nui lui tawp. Khamini atang khan ka thiante chuan min kawm serh tan  ta a, thian pawh ka nei ta lo. Ka chantawk tura khuanu ruat a ni aniang e. Ka kawr neih loh vanga min kawm duh lo chu mak ka ti a, ka hrethiam lo. Mahse, tun hnua ka ngaihtuah hian ka lo thing thei em a lo ni. An ni lah tleirawl lerh hre rual an lo ni tawh a, an zinga ka tal reng khan anmahni thleng khan ka lo tithing ve thei anih dawn kha… 

Ka naute pawn diriamna an tawng ta zeuh zeuh. Tebera a rawn tap haw fô a, Nuseni'n a hnungah tap chung bawkin  a rawn zui haw thin. Chhantu an nei ve ngai lo va, kutthak hnawih nan Tebera chu an lo hmang zeuh zeuh a niawm e. Mama thinrim hian vawi khat chu a lo cháng a. Sairawkherhin a lo perh pek a. An ni an u te hnenah zualkoin, tlangval uaih tawh si khan ka nau chu an rawn luhkhung a, Mama khabe veilamah hian vawiin thlengin ser a awm phah nghe nghe. Ka pa ve tehchai lah hian zu bak a ngaihtuah si lo. 

Tlai khat chu chaw chhum tur kan lo nei tawh hauh lo mai a, hmanhmawh takin ka pi te inah ka va tlan a. Nuteii leh ka pi an lo awm a. "Nute, buhfai kan lo nei tawh miah lo va, khawngaih takin tlem min lo puktir teh u a" ka va ti tawp a. Ka naupan ngaihtuah hian tawngkam hi ka thiam ve reuh a,. A ner sak a. 

"Nangni unau lah hi.. Hmannia i pa zu man tur in puk te kha min pek in tum na nge?  " a lo ti vin thak a. Ka pi chu a tar tawh bakah a hriselna a tlahniam tawh a, a beng tha lo nen kan thusawi a hre lo maithei. 

"Nia, vawiinah thing kan phur a, kan hralh veleh ka lo pe ang che u" ka ti ve mai a. 

Fairel bel chu a hai rawk rawk a. "Chawmhlawm hlir in nih hi. Zu te kha zawrh leh mai tur ania" a ti hlawih hlawih a. Buhfai chu no 3 a suak a. "Kha kha kham tum mai ru. Kan nei bik lo" a ti. Lungawi lo ngam tur niin ka inhre lo va. Lunghnur ru tak chung siin ka haw ta hna hna a. Ka ni te inah ka peng kawi leh hram a. 

An neih bik loh tehlul nen buhfai chu no 6 min pek belh a. Ka lawm thin. Mahse, an retheih ve em vangin pur buai loh hram ka duh thin. Tun hnaiah a pum lam a sawisel fo lehnghal a. Aizawl lamah inentir an tum nghe nghe. 

"Pa, i harh em?  Pa.. " ka ti tuar tuar a. Zanriah ei khama zu a in leh kha a luak a chhuak deuh nge, leikapuiah a va uak tuar tuar a, a inthazo tawh si lo va, leikapui atang chuan a bu liam a, kawmthlang awih laiah a lum zui ta bawk si. A taksa chak loh sa nen. Thenawm an lo lut tiai tiai a, an han bawihsawm nak nak a, khatia a lum thla kha kan rak chul a, kawnga lo kal mek tlangval pahnih ten an zuk umzui ta vat a. An rawn zawn chho a ni. Ka pa chuan mi nung hmel reng a pu lo. Pa Dawnga kan thenawmpa chuan a mar a dek a, "Thana, Thana, hei.. Harh teh, i fate i tihrilhhai lutuk ania" tia a lu a sawi nawk nawk lai chuan, kan unau chuan pa kan nei ta lo tih ka hre thiam ve, pa nih tling lo teh mah se, ka pa tia kan koh ruala a lo eih ve thei ringawt pawh kha a hlu ve em em tho asin le. A that vena te ka chhuikir lo thei lo va, A khumlaizawla a mittui a hru lai hi vawi tam ka phawk thin. Kut min thlak hrep hnua inthiar tura ek in a pan te hian a zuk tap fo thin tih ka hre bawk. Zirna ka chawlhsan a ngaih vanga hrehawm a tihzia a zu inpui bula a sawi te, a nun siamthat tuma a beih ve fo thu te leh harsa a tihzia te kha… aw, ka pa, sualin a thunun tlat si che anih kha tiraw.. 

Ka pa chu kan vuiliam ta chu a nia. Khawtlang mite an fel a, min lainat em em tute an awm bawk a. Ka patea te pawh ka pa thih hlimchhawn lai chuan an tha hruah hruah hle. Ka ni Aizawl ami pawh kha a lo kal ve a. Innel lo tak kan ni. Nuteiin a tlawn hawrh hawrh chu ka hmu hne ve khawp mai. An ni chu an hausa tlat alawm. 

Thalai len hun a tawp tawh a. Inleng neuh neuh erawh kan la nei ve a. Ralna sum pawh ka la kawl ve thlap. In leng ho an haw zawh hnu chuan patea te ho nen kan la thu thap a. Ka ni chuan a aw a thian kharh a. "Vanlal, hei in chhungkaw dinhmun chu heti hi a ni ta a. I patea te nen kan sawiho a, mama hi Aizawl lamah hruai chho ila, a thawh theih awm te thawk se, nang pawn i zangkhai phah anga, pawisa te pawh kan lo thawn thin anga" a ti a. 

Ka ngawi reng a. Mama a awm loh chuan ka buai ngawt ang. Mahse, an sawi am sawi takah chuan a tan pawh tha zawk dawna ka hriat vangin ka remti ve ta a. Amah phei chu a phur vak lo tih ka hre tho. An innel bik si lo va. Ka pu chuan thiam takin Aizawla awm a that thu te, a nawmzia te a sawi dap dap a. Pu ber. ani bawk a, a hnial fun ngam bik lo a niang. A tuk tuk leha ka ni ruala chho tur chuan thu kan titlu ta a ni. 

Kum a tawp tep tawh a, December thla tir kan chuangkai tawh a. Khua pawh a vawt tan khawp mai. Mama awm ta lo chu khua a har duh angreng. Kan unau thuma kan han awm ho rek rek chu inkhawngaihna ka ngah tial tial a, kum 15 chauh ka la ni si. Ka la puitlng bik si lo. Chutah ka niteii pum na lah a zual zel si a, ka pa thihna vang khan an tangkhang ve bawk nen, hmunpui lama inentir tura kal turin an inpuahchah a. An khawsak a harsat ve em vangin chhung leh khatte hnenah sum an khawn kual ve a. Ka pute chuan Rs. 1000 chiah zuk pe a!  Ka pu pawh hi a mak ka ti. A rilru hi a tha vak lo aniang. Ka nuteii thu thuin an awm a ni ber. Ka niteii pasal Pa Muana lahin chhungkhat laina a nei vak si lo, khawsak harsa ve te te an ni si. Patea a lo kal a, "I pa ralna sum kha tlem azawng chu i la nei ang a, kan pe tam thei si lo va; tlem chu i sihchhuah ve mai dawn em ni? " a rawn ti! Ka niteii hi chu rethei mah se, kan harsat tawpkhawk lai pawha min khawngaih thintu a ni a, pek ka lo tum lo pawh a ni lo. Kei ni aia khawsak sang leh dinhmun tha zawk ka patea ten min phût lutuk chu ka ngei ve khawp mai. 

Rs. 3000 ka pe a, Rs 2000 leh tlem kan la nei ve. Ka niteii lawm lutuk hnukulh leh Pa Muana inthlahrung hmel chu aw.. An lawm em em tih ka hriatna chuan min tilawm ve. Keini chu kan ei a tlem a, tih dan dan a awm ka ring. Mahse, buaina ruk erawh ka nei. Masi a hnai tawh si a, ka naute hian thil thar an duh ve ngei ngei dawn. Ka ni Aizawl ami te ka pun ve tawh mai ang chu ka ti. Ka niteii te pawh Pa Muana nen Aizawl an kal ta a. An fate erawh kan inah an lo awm ve tawp. Hmun dangah an tlangnel bik si lo. Upa ber ka nihnaah ka phur a rit sawt ta hle mai. 

Pathian hian min la hre ve reng a ni mahna. Ka vanneih asiamin kan khaw field kawng laihnaah kan Vcp min sawisakna azarah inhlawhna ka hmu ve hlauh mai. Kum tling lo mah ni ila, ka dinhmun avangin khawtual mi te leh contractor ngei pawh chuan min hrethiam a. Ka va lawm tak em. An eirawngbawltuah min hmang ta hlauh a, ka vanneih lehzelna chu chawhmeh eng ilo te ka hawn thei thin a. Ka naute pawn sa an ei thei ve ta zeuh zeuh mai. Masi thuamhnaw pawh an nei ve thei ngei dawn e. 

Mobile phone chu kan tan vana  rah anga a la ni a, kan khuaah ngei pawh nei an la tam lo. Vawikhatmah a khawih pawh ka la khawih lo. Kan in hi zu kan zawrh lai khan kan sa tha ve a, Asam Type niin a lian lem lo naa in chhe tak a ni bik lo. Ka theih ang tawkin ka vawngfai ve bawk. Ka niteii kha Pumpui cancer a lo ni a!  Ka va lainat tak em. A fate erawh engmah ka hrilh duh lo. 

Ni 20-ah kan hnathawh chu kan chawl ta rih a. Hlawh pawh kan la nghal. Ka va hlim tak. Niteii te pawh an lo haw tawh a, a hmel ngui tak avang chuan sawi tur pawh ka hre lo. A fate pathum chu keimahni ang bawka fahrah dinhmuna la ding tur an ni tih ka hria, ka lainat lawk em em mai. An han inseng nasa si a, ka theih ang anga Christmas vuakvetah pawh puih ve ka tum a ni. 

Kan khaw busin Aizawl lam ka pan ve ta a. Ka kal vawikhatna tur a ni. Ka zám khawp mai. Tebera'n min ngen nasa, mahse, hruai chi a ni si lo. Ka niteii te inah Nuseni nen an lo awm ve rih dawn a ni. Ka ni te inah ka thleng a. An awmpuinuin min lo hmuak hlauh a, a tihzia khawp mai. Mama nen kan han inhmu chu kan inkuah chung chung mai. Thla khat em pawh a la awm tling lo naa a lo maih ve káng mai. Ei tha a ei tih hai rual a ni lo. Mahse, a lunglen theihzia min hrilh keuh keuh a, tirhkah ang deuhah an lo hmang a niawm a. Hna hahthlak tak erawh a ni lem lo. Ka ni pasal hi officer a ni a, fa pathum an nei a, an te ber nen kan inrual chiah. Kan innel lo angreng khawp mai. Chaw ei te chu ka zak viau. Ei pawh ka ei tam ngam meuh lo. Ka ni pasal chuan min be lo, a fate zingah chuan an upaber nula kha a fel ber. Min be tu ber a ni a, a mah vang khan ka tlangnel ve a ni mai. 

A tukah Mama nen ka ni fanu te nen kan bazar ta a. Ka naute tana awh leh it ka va ngah em. Ka pawisa ken a beitham si. Mahse, Mama hlawh ve ti mai ang, an awmpuina man chuan ka naute pahnih thawmhnaw ka lei thei a. Ka inhlawhna kha chu ka niteii fate leh mamawh hrang hrang lei nan ka hmang ve. Ka tan chuan kawrlum ka lei ve a, Mama erawh ka ni ten an leisak thung. Thil manto ni lem lo mah se; a thar an ni miau a, a nuam ve hrim hrim mai. Zanah ka thil lei chu ka han chap darh a, hmuhnawm ka va ti tak. A tuk maiah kan haw dawn si a, kan mu hma ta a. Mama chu hawn remti chiah lo mah se; Christmas hmanho kan duh ve si, Kum thar lama chho leh turin kan inthlah liam ta kha a nia. 

Tebera hlim lutuk ka hmuh chuan ka hnukte a ulh lek lek, a te ber. ani bawka tiin ka lei ám sak ve bawk a. Niteii te lah an lawm, Pa muana phei chu a tap lek lekin ka hria. Keimah vangin an faten masi kawr an nei ve thei miau si a. Urlawk zanah chhang te kan kang ve a, kan ri ve laih laih mai. Mama pawh len ka phal lo va, ani hi ka nute inthen atang khan zu han in ruk vel kha a ti ta miah lo va, meizial erawh ka hmuh laia zu ngam chiah lo vin a zu ru fo tih ka hria. Ka hau duh lem lo. 

Christmas ni a lo thleng a. Ka nauten an dawhthlak an han en nak nak a, sweet leh wai wai vel mai mai mahnise, an lawm ve em em a, an hlimna chu ka hlimna a ni. Heti taka ka kum phu loha ka rilru puitling hi PATHIAN remruat a ni ngei ang le. Kei pawn ka kawrlum thar kha ka ha ve a, mawi ka inti ve khawp mai. Ruaitheh ni te hlei hlei kha a nuam. Duhtawka sa kan ei ve thei kha.. 

Kum a lo thar dawn ta a. Mama chu a hlim lo telh telh mai. A chhan ka zawt a, a sawi duh si lo. Ni 3 vela chho tur kha a nia, a hel ta tlat. "Dik tak chuan maw, Û, Pa Rema leh U tei te khi an sual em mai. Ka chho duh tawh lo. Zan reiah min tirh an hrat si, ULawma leh Au Rii te chu an fel tho a, tirh pawh min tir khát. Pa Rema phei chuan kut min thlak thin asin. Ka chho. Duh tawh lo". A ti ta mai a. Awih lohsak ngawt kha niin ka hre si lo. He lamah ka mamawh ve tho bawk si. A chho ta lo phawt a, mahse, Nuteii a rawn kal a, chho turin a rawn ti a. 

"Nute, he lamah kan mamawh ve tho sia, chho tawh lo mai se ka duh a" ka lo ti ve a. Kan retheihzia leh ka ni te kan mamawhzia min chham khum hrep mai. Mahse, amah Mama berin chhoh a duh miau loh chuan tihluih ngaihna awm hek lo. A thinrim hmel khawp mai. 

Ka naute pawh pawl an sawn ve dawn ta a, zirlaibu erawh mi ta hlui kan lei chhawng a, uniform pawh a hlui an la ring thei. Nuseni hi a zir peih lo naa a rilru a chak riau a, a thiam pawl chu a ni. Tebera eraeh a sak em em a, zir erawh a zir peih viau. Ka naute puitlin hun hi ka suangtuahna luahtu ber a ni thin. Ka nu chanchin kan hre ngai lo va, a hming pawh kan lam ri ngai vak lo. Ka niteii natna a zual zel a, kan tlaivarpui zak zak reng mai. February thla chawhnu lamah min peih lohsan ta nge nge a. Keimah ngeiin ka dawm hlum a ni. Na ka va ti tak. Ka pa thihna ai mahin ka tuar na zawk. Min hmangaihtu awmchhun tih hial theih kha a ni ve tlat a. An fate hmakhua tur ka ngaihtuahsakin ka lo ippik ve thin. 

A tawi zawngin sawi zel ila, Niteii fate chu chhung leh khat ten an insem ti mai ang. Pa Muana te fa mi lai chu ka ni Aizawl ami ten an la chho a, u ber leh teber ho vin an awmho ta a ni. Pa muana hi pa taima a ni a, engmah thawh hreh nei lo a ni bawk a, an eikhawp zawng a thawk chhuak ve thei mai zel e. An fanu Aizawla awm erawh a rawn haw ngai lo. Nuam a tih beisei phawt mai ang. 

"U, Liansanga ten ka lehkhabu min pawhthlersak ve a.. " tiin Tebera a rawn tap lut a, Mama nen kan leipui feh haw thingpui kan in lai mek a ni. Kan kawmthlangah leipui zimte kan vat ve a, chawhmeh tur a lo daih pawn tiin thlai kan tuh ve a ni. Mama a ter at a. Ka lo dang nghal. Keimah ngeiin Liansanga te chu hauh ka duh tlat. A vawi khatna mai a ni tawh lo, a exercise bu pawh an lo lak luihsak tawh a, keini tan a leina ringawt pawh a harsa si. Fahrah kan nih vang maia hetia min pal reng tur niin ka hre bik lo. Ka inphihfai sawk sawk a. School lamah Tebera kai chungin ka kal ta hlawk hlawk a. 

"Sir, Ka nau hian an pawi a sawi ka hre si lo va, a zirlaibu leh note book te an lo khawih fo hi ka ngaihdan a ni tawh lo. A leina tur min pe rawh se" tiin Headmaster bulah ka sawi ve hmiah. Nu leh pa chan ka chang tawh a, tumah zahpah vak hi ka tum tawh bik lo. 

Liansanga te ho chu an va ko a, Tebera chu kan huan ami tengtere pai turin an lo ti thin a, ani lahin kan hralh ve thin tih a lo hre si, a lo pai duh bik lo a lo nia. Chu chu tihduhdah nan an lo hmang a lo ni. Zirtirtu ten an hau hrep a, an vau bawk. A zirlaibu an pawh thlersak erawh school ami a thar hlak nen an thleng sak a. Keini unau pawh kan haw ve ta a. 

Zanriah kan ei dawnin pawn lamah áng thawm kan hre ta a. "Nu leh pa pawh nei tawh hlei lo hian ka fate in lo hek ngam a maw?  In zak chai na nge? " kan sumhmunah a ding a. Liansanga nu Pi Ruati a ni. Nu rapthlaka sawi kha a ni ve hrim hrim a. Tuman kan chhang lo. Kawngkaa rawn dakin, "Vawi khatmah ka fapa saw lo hek tawh suh ang che u. In lo hek leh anih vaih chuan in hre viau ang. Zu zuar fa lehnghal.. " a ti hlawih hlawih a. Nuseni ta pek chuan, "Zu kan zuar tawh leuh" a lo ti a. Mitmeiin ka khap a. A hrethiam si lo. 

"Zuar lo ula eng nge in ei ang, engmah thawh thiam nei lo " a ti leh a. Kan chhan duh tlat loh avangin án vak ngaihna a hre tawh lo nge a chhuak zui ve ta mai a. Chaw kan ei zui nghal. 

Chawhmeh pakhat chauh hmeh pawha lungawi thei mai kan nihna hi kan vanneihna a ni. Maian bai leh rawt thak ringawt pawn kan puar em em zel mai. 

"Û, tihian kan rethei reng dawn mi? " Tebera'n a tih chuan ka chaw thial lai ka chawl hmak. 

"Rethei dawn lo. Kan hausak hunah chuan motor ka khalh ang" Mama chuan a lo ti vat a. 

"Kei chu puanthui ka zir ang. Kawr nalh tawk tawk ka thui ang a, miin an awt ve thei ngawt ang" Nusenin a lo ti bawk a. 

"Kei chu Au mama handyman ka ni anga, Ih, Aizawlah te kan kal ang a.. Nuam dawn e" Tebera ve thung. 

Ka naute titi chuan ka rilru a luah rei khawp mai. Kan duhthusam la hniamzia mawlh kha… 

Khum kan dawh zawm pût a, kan vaiin kan mu mai thin. Mut dawnah ka tawngtaipui ngei ngei thin. Thawnthu hrilh ngei ngei an ngai bawk. Mama thlengin an ngaithla dauh dauh zel a. Thawnthu ka hre tlem rapthlak si. Ka phuahchawp vak zel a, ngaihnawm an ti ve tho aniang, an muhil ve mai zel. An mutthilh tawh hnuah a tuka pawisa thawhchhuah dan tur ngaihtuah chungin ka muhil ve thin. 

Hun chu a kal chho ve bek bek a. Nregs inhlawhna te a lo awm ve nen, kan thlai thar ve ang angte kan zuar ve thin bawk a, tin, thing kan la phur ve reng bawk a. Kan ei khawp chu kan la hmu ve hram hram zel. Ka naute lah sawrkar schoola kal an ni a, fees te a lo ngai lem lo bawk nen. A zia tak chu a la awm ve zel e. 

Kan in hmun chungchangah buaina kan tawk leh ta a. Kan in hmun hi a zau reuh a, kawmthlang huan lah a tha ve riau bawk. Ka patea te chuan an lo hmu tai leh aniang chu. Min rawn chuhpui ta tlat mai le. Ka pu in ka pa a pek ve kha a ni si a, an huamhauh hi ka ti ngang mai. Beihlet dan erawh kan hre ve der si lo. Pa Muanan VCP inah min kal pui a, thil awmdan a han sawi a. Vcp chu a thinrim ve ta khawp mai. 

"Heti khawpa in fahrah chung pawn ngaihsakna lantir tum si lo, chutih a hneka in leh lo an han chuhpui ngam leh che u a nia.. Ngawi tak rawh u, keiman ka tihfelsak vek ang che u.. Lungngai miah suh u" a ti nghat nghat a. Thla a muang kher mai. Tichuan, vc ten han tlan khalhin, VC pass nena office an han dawr takah chuan Revenue atangin kan in hmun te chu an rawh teh ta a. Kan ta a ni thei ta. Nuteii a thinrim leh ngei mai. Heti em ema hmeichhe rilru chhia leh duhawm chu. 

Kan buai atanga reivak lohah ka pi chu thawhah vangin a boral ta a. A tar tawh a, a awm ve reng mai. Min duat vetu tho kha a ni a, mahse, an in chhungah a lal si lo, hnawksak an ti ropui sia. A thi chu atan pawh a tha zawk daih. Kan unauin ruang pawh kan va kil ve thap mai. Ka pu pawh a tar ve ta viau, mahse, kan nel vak lem lo. Ka pi thih hnu atang phei chuan kan intlawhpawh ta lem lo viau. A fapa upa zawk fate kan ni tih hi a hre ta lo aniang e. 

"Û, lo chho vat teh" Maman a rawn tih tuar avang chuan hlauthawng takin huan atang chuan ka tlan chho a. Kan huana hmarcha hring ka mal lai tak a ni. 

In ka han lut chu, Nuseni chu a mittui a lo far fap fap a. A kun chhal bawk a. Thil awmzia ka zawt a, a sawi mai thei lo, a tap dawn zel a. Tebera leh a thianpa ve ber Sintea an lo haw a. An rawn sawi ta a. 

"Tualah an in marble a, U nuseni hian a man thei sia, an ngei lutuk. Chuan dar a ri a, kan luh tawh hnuah U Tekawki khan a marble bo thu a sawi a. U nuseni chu i la an tia. Chawlhlawk laiin school thlangah khan an hruai a, a thawmhnaw an dap veka, an hmu si lo va, chuan a kekawrte an hlihtir a, a sazu te an en sak a" a ti ta a. Ka puakkeh lo chauh. Ka thin chu a so bulh bulh mai. Nuseni kum 12 mi lek a la nia, derthawng tak, Tebera pawh chhan ngam thin lo a ni. Chuti taka a awmnèmna hmang tangkaia an timualpho leh zahmawh rawngkaia an lo diriam chu ka ngaithei bik hauh lo mai. Ka tlan chhuak a, min rawn zui ve nghal hlawm. Tekawki te in chu a hla vak lo va, ka kal hlawk hlawk mai. An kawtah chuan ka ding a, ka au a. A thiante pahnih leh a nu te nen an lo chhuak a. 

"Engvangin nge nuseni kekawrte kha in phelhtir a, mawh, sawi rawh u. Rukruah in puh a, chutah in la dap kual vel a.. I zak em? "Tih pahin Tekawki chhip sama tham ka rual nghal a, lei charah chuan ka hnuk ta a. Ka khur hlawk hlawk thei. Anu chuan min rawn pawt dawrh a, thinrim takin min an khum nghal a. A an hla pawh ka hre lo. Ka thinrim èm a ni. Mi dang an lo pungkhawm a, min rawn thelh ta a. 

Thil awmzia an han hriat chuan Tekawki te chu an thiam lo deuh vek. Mahse, engmah an sawi hran lo. Kan unauza chuan kan haw phei leh ta hnak hnak a. Ka mittui tling chu an hmuh ka hlau a, ka hru ru zauh zauh mai. Tun atang chuan an nu leh pa ka ni tawh a, an hmaah ka ding zel tawh ang. Hetia min hmuhsitna kan tawrh zel chuan an sim dawn lo. 

Zanriah kan ei laiin ka thiam ang tawkin ka naute chu ka zilhhau ve a. Tumah tihbuai loh tur, mahse, kan ngam lo chung pawha min tihbuai zel chuan huaisen taka beihlet tur tih chu ka thu rolum a ni ve ta hmiah. 

"U, khaw dangah awm daih ang u. A nuam lo em mai. Ss ah lah kan zirtirtunu pawn kawr dang lo ha ve tawh rawh u te min tia" Nuseni chuan a ti nuah nuah a. An zirtirtu Awmpuii ka mitthla nghal. Dawrkai an nia, a hausa pawl an ni. An hausak vanga ss zirtirtu ni thei a ni reng a. Kei ni ai chuan a u hlek a, ka hlau hauh lo. 

Ni e, zu kan zawrh lai ata tawh ka nu khan a fate kha min ngaihsak vak lo va, thawmhnaw tha pawh kan nei ve mang lo. Tunah phei chuan leina kan nei lo.. Zu zuar tawh kan nihna hmanruaa hmanga min la hmusit lah bo lo. Mahse, zangkhua hian bungbut hun zawng a la nei ve chèk ang chu.. 

"Vanlal, i pu a tlu a, rang takin va kal ve rawh u" kan thenawmnu chuan a rawn ti a. An lehkhazir lai te dahin kan inzui chhuak nghal a. Kan va thlen chuan a lo biak theih mang loh. Heart attack an ti mai a. Ka pi boral atanga thla hnih lekah ka pu pawh chuan a zui ve ta a ni. Ka tuar na hran lo, min ngaihsak lem lo bawk a. Tah pawh ka tap lo. Ka mittui a hul hlauh. 

Ka pi leh pute ralna sum atang chuan nuteii chuan eichawp dawr a hawng a, patean leilet a nei bawk. An che thei ta khawp mai. Mahse, dal Cheng 20 man lek pawh bat an phal ngai lo. Vawikhat Tebera a rawn vui haw leh pek a, an thianho  chu Nuteiin a lo tir a, An dawr bunrua thiarpui turin. An hlawh atan sweet a lo sem theuh a, Tebera chu a lo hmaih hmak niin. A vui em em a ni. Chaw ei hmain ka va kal a, ka hlau duh tawh bik lo. Patea te nupa chu ka va ankhum ve hrep mai. Nuteii a dak zet zet a, a insawithiam leh thliam mai. Patean min beng ta nghe nghe. Tap pur chungin ka haw ta a. Khami zan atang khan Ka patea te nena kan inzawmna chu ka thinlungah chhut chahin a awm ti mai ang, ka thinlungah an thi tawh a ni ber. 

Tumah mamawh loh ka duh, tumah pur buai lo va kan intunnun chu tikmakmawh niin ka hrira. Chumi kum chuan Christmas kawr pawh tuman kan nei lo, Tebera lumgngai leh rual awt hmel chuan a rukin min va titap zing em.. Mama pawn hrehawm a ti ve thin khawp mai. 

Kum a lo thar a, kum ka tling ve ta. Ka pumrua pawh nula puitling te nen a danglam lem lo. Nusenin High School a rap ve ta a. Tebera pawh pawl 6 lai a ni ve ta. Kan retheihna hi inbawhbehtir loh hram ka tum ve. Kan unauin kan thiam dan danin lo kan vat ve a, mi mak tih a tling. Hmeichhia angin ka awm ta meuh lo. Ngaihzawn enin tumah chuan min en lo bawk a, mipa lam ngaihtuah thei dinhmunah ka ding miau si lo va. 

Hlo thlawh nasat vang leh ni sa tawrh nasat vangin ka vun te pawh a lo thu that a, ka ke sir te pawh a no ve thei ta lo. Ka kutphah te chu a thap hrup tawh a, ka kum aiin ka lang upa daih. Ka hah em em a, zan kan mu hi ka thawnthu sawi lai te hian ka lo muhil daih thin. Mama pawh hah tak a ni. Lo va feh loh karah luiah a kal a, thing a tan thul. Ani pawh a kum aiin a lang upa a, tlemin a taksa pawh a thang lo deuh. Beiseina ka nei a, eng nge ka beisei erawh ka hre lo. Ka naute pahnih hi an inzirchhuak ve thei ang em?  An inzir chhuaha hna te an hmuh hunah ka la dam ang em? Tih te ka ngaihtuah ve nasa thin. Engpawhnise, kan chunga Pathian rorel danah vui loh hram ka tum ve thin. Inkhawm erawh ka inkhawm ngai ta lo. Ka hah em vang leh thawmhnaw tha ka neih miau loh vangin hah chawlh nan ka hmang mai thin. Ka thawmhnaw la tha deuhte chu Nuseni hak tawk turin Nu chhingi ka fit tir a. Kawr thar angin a ha ve thin. Ka naute erawh inkhawm loh ka phal lo thung. Hlo thlawh awl lai chuan kan headmaster te inah ka inhlawh thin a, a changin buh ka thlei a, darthlalang te ka nawtfai a. Ka tihtheih awm tawk hna min siamsak thin. An huan lah mama nen kan sam fai a, kan thawh phu loha tha hlawh min pe thin. Min lainata min khawngaihtu te hi ka theihnghilh ngai lo va, engtikah emaw chuan rulhlet ngei ka tum ve a ni. 

Nuseni'n thanthi a rawn nei chho va, lehkhabu atanga ka hriat, mipat hmeichhiatna lama fimkhur tur ten ka hrilh ve nasa thin. 

Zan khat chu mitthi kan nei a, lumen ngai a ni nghe nghe. Hna ka thawh nasat vangin ka inhawlh lawr vak lo a. Mahse, chumi zan chuan va lan ve zuai ka tum a ni. Mi pawh hian min phût vak bik lo hian ka hria, ka dinhmun an hre vek bawk a. Kalpui pawh nei lem lo vin keimahin ka va kal a. Zai a nuam phian mai. Dar 1 bawr velah haw tumin ka intintuah a, kawt ka thleng chu eitur siamho chuan min lo chhaih a. 

"Sakawli a nih saw.. Ramhuai pawn a hlau tawh zawk ang. A pa thiha khawtlang an that tehlul nen, mi a lawm lo ee, chhiat an tawh hunah a hrethiam mai ang" an tih chu ka hria. Ka ding chawt. Khinbuai ka tum hran lo, an sawi kha a dikna chen a awm. Mahse, ka dinhmunah ding ve ta se, an lang hman bik hian ka ring lo. Ka thalaipui thenkhat te min ngaihdan chu ka hre ta a, Mahse, a hma aia danglam ka tum hran lo. Chhiat tawh erawh ka hlau ru khawp mai. 

"U, kan hralh thei lo reng reng, paih mai ang u" Nuseni chuan a rawn ti lut bawrh bawrh a. Telhawng ka bawl sa chu a khai bawk a. 

"Ka ten e a.. ' an ti zel a.. " a la ti zui. Ni e, keini ang fahrah satliah thilsiam te chu an ei ten reng ang chu.. Engmah sawi lo vin ka paih vek. Mi tawp ka ni hauh lo, kan in phei chu kan khuaah a aia fai a tam bik kher lo vang. Ka hah em vangin duh angin ka che hman lo zawk a. Nuseni hian eirawngbawl a thiam. Ve sawlh sawlh tawh a, in tihfel leh chet ngai erawh keimah vekin ka ti thin. 

Kan retheihna khua a sei chho zel a, hun pawh a kal ve zel bawk a. Beidawn erawh ka tum ngai lo. Nuseni'n pawl 10 a pass tih kan hriat nia ka hlimna khan van a tawng hial ta ve ang. Kan unau chuan kan inkuah a, kei chu ka insum zo lo. Ka tap. Tebera erawh a zuang vak vak thung. Kan khuaah Higher a awm si lo va, kan buai ta deuh. Ka nite han tihbuai ka hreh si. Hostela dah dawnin sum kan nei si lo. Engtin nge kan tih tak ang le… Kan vcp ka va rawn a, Pa muana nen. An hre bik si lo. Pa muana khan nupui dang a nei leh tawh a. Nu sual tak a ni lem lo. Kan la intlawhpawh reng tho a ni. Mama nen muthmunah kan sawi dun a, Aizawla pem mai te kan sawi hial!  Ka nite ina Nuseni dah chu a remti si lo. An zia a lo hre tawh si. Kal zawmtir ngei kan duh ve bawk. si. Kan va buai unau tak em… 

A tawpa tawpah chuan kan kawmthlang huan chu hralh a, pem mai kan rilruk ta a, in hmun erawh nakinah mamawhna a la awm ang kan ti a ni. Huan kan zuar tih a hriat chuan Patea chu hmanhmawh takin a lo kal a, min hau hrep!  Kan ta a ni miau a, tihtheih a nei lo. Khaw thenawm ami Pu Luaia an tih mai, sumdawng hausa ve tak chuan kan huan chu a lei ta a. Pawisa tam kan tihzia te kha. Kan chhiar ning thei thlawt lo. Kan in erawh mi kan luahtir dawn a ni. Huan leitu Pu Luaia khan a huan enkawltute luah atan a hauh nghal bawk a, ihe lo vin kan luahtir. Luah man erawh a sang thei lo. Thingtlang ngang kha a nia. 

Headmaster chuan min khawngaih si, Kan unaua Aizawla han vakvai tur ringawta chhoh chu a ngaingam ngang lo aniang. A hna thil buaipui pahin a hovin Aizawl kan pan ta a. Kan bungraw neih ang ang kan keng a, kan bawr ve khawp mai. Kan khua chu ka ngai hranpa lo. Hmuhsit kan tawhna hmun kha a ni miau a. Ka nauten Aizawl an han hmu chu ka lung an tichhe zawk. An rak chul a, an hawi nasa bawk si. Headmaster naute inah kan innghat a, an lo fel khawp mai. In luah tur te min han dap pui a, an thenawm lawkah kaw khat a lo la ruak hlauh mai a, kan va lawm em. Kan insawn chuk chuk a, Bungbel te pawh min pe ve, kan in luahna nu khan min khawngaih ngang aniang, rizai min pe ngawt bawk. Kan pawisa khawl ve chu fimkhur takin ka thuru ve tat a. In luah man a tam lutuk lo bawk a, kan awm ve theih mai ka ring. 

Kan in chu a zau lem lo naa kan leng tawk ve tho mai. Kawmthlang lawkah tuikhur a awm lehnghal. Nuseni leh Tebera school kalna tur kan tifel ta bawk a, vanneihthlak takin kan thenawmpa chu mistiri a lo ni hlauh a, Mama chu a helperah a chhawrzui thei dawn hlauh mai. Kei pawh kan in luahna nu thurawn angin chawhmeh kharchhawn tur ka zawng ve dawn bawk a ni. Khawpuiah nge nge chuan kan khawsak a ziaawm deuh zawk ka beisei. 

Aizawl kan awm atangin kum khat zet a liam ve ta reng mai. Kohhran leh khawtlangah kan lang tam lem lo thung a, khawsak dinhmunah erawh kan khua aiin a zia zawk. Chawmeh chu ni khat danah kan vengah ka zuar kual thin a, min khawngaih bawk nen, ka hralh zo hma thei khawp mai. A tam zawk hi chuan min ring tawh a, an bazar ngai tawh lem lo. Mama leh Pa Faka an inzui chhuak nitin bawk a,  a hlawhchhuah ve amg amg min hlan thin bawk. Ka nau hi lehkha thiam lo mah nise, ka chhuangin ka thlamuanpui thin khawp mai. Nuseni pawh a tirah bil deuh mah se, a rilru a chak bawk a, kar lohah a thiam pawl a rawn ni ta thuai a, Tebera pawh a lian ve tawh bawk a, thahnem a ngai chho tan khawp mai. 

Zan khat chu tlangval pahnih hian min rawn rim teh tlat a!  Ka lo chhaw huih mai. Inleng ka nei ngai tlat si lo va. An hmingte an sawi a, ka hre ve nghal mai. Pakhat chu kan veng ami ka chawhmeh zawrhpui thin Nu Dami fapa a ni a, Sanga a ni. A thianpa erawh veng thenawm ami a ni a. Ramtea a ni thung. Khawsak sang lo ve ve an ni bawk a, kan titi pawh a rual viau mai. An ni thian dun hi insaknaah an inhlawh thin a, Cement work lam an khawih thin. An lo leng ve ta zeuh zeuh a, Ramtea chuan min ngaizawng tih ka hria. Mahse, ngaihzawng neih ka tum lem lo. Ka ngaihtuah ngai miah lo bawk. Ka zei lo va, ka zak zum em em a ni. Vawi tam min duhthu a sawi thin. Mahse, lo duh let vein lo inngaizawng ta ila, nupuia min neih te a duh anga, ka naute hi pasal neihsan chi ah ka ngai lo a ni. Ka hnar zel a, a fel a, a hmel pawh a chhe lo. Ka ngaina ve reng. Mahse, ka naute avangin aw ka pawh ngam lo a ni ber. Lo len a thulh phah chuang hlei lo va, ka naute nen pawh an innel ve ta khawp mai. 

Nuseni'n Pawl 12 a zir kumah thil rapthlak tak kan tawng leh ta. Nuseni a rai!  A rai tih ka hre lawk lo, a insawisel fo a, a khuate sikin a luak te a chhuak thin. Ka hrethiam si lo. A uak tuar ruar laiin in chungnu a lo leng a. Nuseni chu a en chik hle nghe nghe. Nuseni'n tui a chawi hlanin, " Vanlal, Nuseni hi a ruak lo a ni lo maw?  A mah ka hmuh khan nau pai a ang ka ti deuh tlat" a ti ta mai a. Rin harsa ka ti kher mai. Ka nuihte lam a za hial zawk. Zanah Nuseni chu a thuphungin ka zawt mai mai a, "U, ka hrilh ngam lo che a. Ka rai alawm" a ti ta a nih chu! Ka rilru hi chhun angin a na. Ka beiseina ve ber kha a ni asin. Amah lah a tap hliam hliam mai si. Mama pawh a vei nghut nghut ringawt. Tu fa nge ka tih chuan, an school ami tho a lo nia! Engtin nge hetiang kum lekah a rai theih?  Sex chu engtin nge a hman ngam zawk.. Ka thinrim si, ka rilru na bawk si chu engmah ka sawi thei lo. Ka tap zankhua a ni ber e. In chungte ka ráwn a, an ni ruahmannain palai kan tir ta a. Sawn man thing turin. An la naupang si, inneih chu thil tihchiah an ngai bik lo nge sawn man chu ihe lo vin min pe a. A tawp a ni der mai. 

School erawh a la kal lui tang tang. Hria an la tam vak lo bawk a. Kar khat hnuah zan khat chu zan laiah min rawn kaitho a, a pum a dawm a, a vial ngawlh ngawlh mai. "U, a na lutuk. Nau ka nei dawn aniang" a ti a. Thla 3 vel awrh a nia, a neih a la hun lo nasa si. Mangang takin kan buaipui a, bathroomah a va thu. Ta tawp. A serh. Chu na a ti ngang mai. Thisen duk zet zet a rawn chhuak a, a thlan te chu a bawl tawk tawk mai. Nau a chhiat a lo ni reng mai. Lehlam takah chuan ka lawm ru viau. Thisen mai chauh kha a la ni bawk a. Ani pawn han tawrh vak ngaihna a hre lem lo. Ni hnih thum hnuah school a kal ve leh mai a. A nau chhiat thu erawh in chung te leh Pa faka te bakin an hre lo. A rai thu pawh kha hria an tam lem lo. 

Awlsamte chuan Class 12 chu a pass ve leh ta mai a. Ka lawm ngei mai. College pawh College thaa an sawiah ka admit a, sum lam chu hek deuh dawn mah se, ka naute hian a tha ber an phû a ni. Mahse, Nuseni chu nuthlawi ang deuh a lo ni bawk a, College life chu a zo ta meuh lo. A nun a thlahdah sawt riau mai a, lo haw tlai te, thiante ina riah mai mai te a ching chho ta a. Hauh lah a sawt meuh si lo. Ka mangang ru thin khawp mai. Tebera pawn Class 10 a pass ve ta bawk a, A tuina ber Science kan laktir a. A u mama handymana tan aiin Doctor nih a thlang ta zawk a, ka phurpui khawp mai. 

Zan khat chu Nuseni a rawn haw tlai leh pek a, dar 9 rik dawnah a rawn haw a. Kan lo la meng thap. A mitmeng chu a dik lo, a rui tih a hriat lutuk. Kal ngil tuma a insangmar pawh chu ka hai hauh lo. Ka thinin a diar ta bik lo va, kawngka ka kalh sauh sauh a. Ka hau ta hrep mai. 

"Nang pawh eng nge i nih bik?  Nang ang û thing lutuk, khawpui nun hrethiam lo ka lo nei che hi a pawi a ni" a ti ta a. Ka te rawih rawih mai. Ka nau ka atang ngeia hmuhsitna ka dawng chu tawrh harsa ka va ti em.. Mama a rawn ding zawk, a farnu chu a beng ta thuai mai. Nuseni chu a thu hnawk a. 

"Lalthanpui, i va zak lo ve. Ka u te khatianga i tawngkhum ngam zwk a. Ani hi awm lo se, tun dinhmun hi i thleng lo vang, keimahni avangin engmah thawh hreh nei lovin zah pawh dawn zo lo vin hna a thawk asin. I va han zak thei lo em em ve leh.. Ka'n hlap teh ang che" a ti a, a insehruh nasa mai. Tebera'n a lo chelh vat a, "Mama duhtawk ru, miin kan thawm an hre palh ang. U nusen, nang pawh rui chung ten i rawn haw a, i zak lo em mai. Aû ngat phei chu khatianga tawngkhum ngam tur i ni lo" a ti ve a. Kei erawh ka ngawi reng. 

A rui lungpuam ni maw, tap pur chungin, " I u chu chawhmeh zuar kha ami an tih te hian ka zak thin, mi te chuan nitin thawmhnaw thar an rawn ha thei a, kei ve chuan i second hand thin vel bak ka ha ve ngai lo. Kan college bulah te sawn chawhmeh rawn zuar tawh suh, ka zak ania" a ti bah nuaih a. Ka chhing sawk mai. Ka thinhnun hi a na vawng vawng nia, sawi tur reng ka hre lo. Ka nau ngei mai, ka hmangaih em em chuan min lo zahpui ngawih ngawih thin dawn anih chu. Thawmhnaw nise second hand bak ka pe thei si lo, kei hian ka enkawl zo meuh lo ani ange. A va na em.. 

Mama thinrim lutukin hmunphiaha a hlap zawt zawt chu mittui kar atangin ka va hmu phe ruai a. Tebera pawn a en tawp. 

"Mam, a tawk, duhtawk tawh rawh. A tawk tawh e.. Ni e, nusen, i u hian i duhthusam ka tihsak thei lo che a, min ngaidam rawh aw… " ka ti a. Tap lo turin ka insum hram hram a ni. Chumi zan chuan a vawikhat nan Pathian lakah ka vui. Ti nge û zahawm leh hausa taka min siam ve loh tiin. Ti nge nitin ka thawk chung pawhin ka naute awh zawng ka leisak ve theih loh tiin. Engvangin nge midang û te anga hmel tha leh mawi tak ka nih ve loh tiin. 

Ka tlaivar chiang kher mai. 

Nuseni nen kan inkar chu a hla ta duai a. U zawk ka nih angin theihtawpa hnaih erawh ka tum. A titau bur reng a, pawisak a nei lo tial tial bawk. Hauh ka phal tawh loh vangin kan enliam deuh tawp. A duh dan leh a hlim dan ang tur chuan a nun chu hmang ang hmiang. Ni khat chu min dawrtu pakhat walet thlauh ka chhar hlauh mai a. Ka va pe leh nal nal a, fel min ti ve nge mitvar man atan cheng 1000 lai min pe ta a. Ka la lo phal lo. Kan piah laawka hmeichhe thawmhnaw dawrah chuan ka lut nghal a. Nuseni inhmeh ber tura ka ngaih Kawr sen nalh tak mai chu cheng 800 in ka va lei a, 200 chuan Tebera leh Mama silipar tur ka lei bawk a. Hlim takin ka haw ta a. 

An lo haw khawm a, ka thil hawn ka han pek chuan Mama leh Tebera chu an lawm ngang mai. An in en a, an nui ruh ruh a. Nuseni erawh a dan a dang. A kawr ka leisak chu hak pawh a hak chhin hmain, " Hetiang kawr thing lutuk, eng atanmah ka ti lo ve.. Paih rawh" tiin mim rawn vawm anih chu!  Ka thin tertek a chhuak ve ta tlat! Theihtawpa duata ngaihsakna ka lantir pawn awmzia a nei ta lo chu a nia. A kawr chu ka la lawk a, kan chempuiin ka sat sawm vek. Tuman engmah annsawi ngam lo. 

"Nusen, hei hi hre rawh. Theihtawp chu ka chhuah ve. Mahse, i duhthu ka sam ngang lo anih chuan, min chhuahsan thei ang. Keini aia hmangaihtu che nia i hriat. Chu pan mawlh ang che" ka ti a. Ka mu hmak. Tuman an be zui lo. 

A tuk tuk lawkah a bialpa nen an inru zui ta reng a. Ka ngaihsak awm lo em mai. Palai an rawn kal a, tha tak chuan kan lo dawngsawng. Kan dinhmunin a zir miau loh avangin an inru ta sa sa, tlan koh ang maia innei turin thu kan titlu ta a. Ka rilru erawh a na em em thung. Ka suangtuahnaah kha chuan keiin pasal ka neih hmel si loh a, nuseni tal hi chuan Biak in hawngin nei ve se tiin duhthu ka sam thin kha a nia. A thleng ngai dawn lo anih hi. 

Man ei tir tur pawh ka hre ve lo. Ka ni te erawh ka va hrilh hre ve a. Bed sheet an rawn leisak ve. Hun kan ngah bawk si lo va, mama nen a thuam chhawm tur kan tuak ngat ngat mai. Vanneih asiamin in chungpa te pu ber huanah hnathawh tur a awm ta hlauh a. Kan unauin kan theka a, chauh pawh sawi lovin kan zuk riah chilh a. Pawisa hlawm a rawn lut ve. Engtinntin emaw a pawimawh zual. Chu kan lei ve thei mai a. Steel almira a ti thul, aww, a u te hi min va tibuai tak em. A to si, engtin hian nge kan lei zawh tehlul ang le.. A ngen tlut tlut mai si a, A rukin in chungte pawisa ka puk ta ngawt mai. A lawina ten an hmuhsit ka hlau ve tho bawk si. Kan huan zu riahna lamah malaria ka chhar zui a, khawsik hluah hluah chunga chawhmeh ka zawrh chang lah a tam. Ka laizawn neihchhun pasal neihna tur a ni miau si a. 

Min khawngaihtu te zarah mualpho lo vin an innei ve thei ta hram a. Ka thaw huai mai. A pasal lah engnah thawh nei lem lo, college kal lai ve tho kha a nia. An khawsak erawh keini ai chuan an zia deuh. Ka thiam ang tawkin mo tha nih phungte ka hrilh ve a, zawm ve tak ang maw?  Nuseni awm ta lo chu a reh huai mai. Ani hi a tawng duh ber kha a ni ve a, sual ve zeuh mah se, a awm lai kha ka ngai thin. Mama pawn bialnu angreng deuh chu a nei ve a, Veng thenawm ami niin hmeithai fanu a ni. A la naupang a, Mama pawh fimkhur turin ka hrilh fo mai. Tebera erawh lehkhazir a atchilh tlut a, min tilawm hle. Ani hi kan innghahna awmchhun a ni ta. 

Kum 1 erh awrh a liam hnuah  Nuseni chu an rawn ma leh tawp. A pasal te chhung hi an tha vak lo ve bawk a. Nuseni lahin zir hek suh. Taimak zawng a taima ve reng, a pasalin ruihtheihthil a tih hma kha chuan an hlim. Ve viau khan ka. Hria. A. A ruihsan tak zeuh zeuhah chuan an buai chho ta a. A pasal chhungte lahin amah an mawhpuh zel si. Thil bo awm se, amah an burbun vek zel a. Fa an han nei a, lakchhawktu a nei ngai si lo, a hmaa a sawn pai kha an lo hria ni tur a ni. Hmuhsit nan tak an lo hmang thin a. A nau tap reng mah se, tuman an lakchhawk ngai lo, a hnathawh lah a bang chuang hek lo. Ka nau anih vanga tan ka ni hran lo. An thenawm te ngei pawn an sawi dan ania. A pasal farnu a lal em em a, Nuseni lakah a sual thiam hle bawk. Mi hausa deuh zawng ni ve ila, an hmusit ngam bik miah lo vang mawle. Zan khat an pa zu rui nen an inhau a, kut te an inthlak ani awm e. Tuman thelh an tum si lo va, thenawm. Te inah a tlan lut ta rawih a. An thenawmpain a va hruai leh a, thil nihphung a va sawi chu min timualpho tiin A pasal nu chuan a rawn hnawtchhuak ta a ni. A fanu nen an lo kir leh ta chu a nia. A fanu pawh thla 4 lek a la ni. 

Retheihna kan hmachhawn ho leh dawn ta chu a nia. Mahse, Nuseni chuan a tunhma nun a sim phah vek. A lawmawm ka ti tho mai. A inngaitlawm em em tawh a, a inchhirzia hi a chetziaah ka hre thei. Ka khawngaih ta em em a, tleirawl â, fuihpawrh nuam tawk lek kha a ni a, thian te neiin a thiante an lo changkang ve si. A dinhmun kha a lungawipui zo lo ve ni maiah ka ngai. Unau kan ni a, intuamhlawm tur kan ni tlat a ni. 

A fanu chu Lawmsangpuii a ni a, Bawihteii tiin kan ko thung. Kan duat em em vek a, Mama hian a atchilh zual. Zan lamah erawh a nu bulah aiin ka. Bula a mut a tam zawk. Mut duh rual lek an la ni si a, ka khawngaih a, keiman ka buaipui mai thin. 

Bawihteiin kum 2 tlin chuan thenawm lawka puanthui zirnaah a nu nen an inpaw chhuak thin. A tetlai atanga a chak kha a tihlawhtling dawn ta a ni maithei. Nau erawh a hruai lo thei lo, kan chhuak vek thin si. Keipawn ka sumdawnna huang ka. Zauh ve hret hret a. Thian pakhat nen inthurualin dawr bungrua kan la ve ta a. Silcharah te, Tiau lamah te kan kal chhawk a, dawrah kan dah thin. A rei a a hlawk ve telh telh mai. Sum hrawm a nat ang bawkin lakluh pawh a hraw chho ve zel mai. Nakinah phei chuan dawr hawn te pawh ka mitthla ve ta hial mai. Tebera pawh pawl 12 kha distinctionah a pass a, Doctor zir turin tunah chuan phaiah a awm ta vang mai. A hautakzia erawh ka hria. Mahse, ka nau duhthusam hi a hlawhtling tur a ni tawp. Aman a tum bawk a. Kan phurpui khawp mai. 

Harsatna tam tak kan tawk chho ve reng naa kan tangrual ve tawh a, kan hmachhawn ho va, kan hneh ve leh nge nge thin. Kei erawh ka cher kuam reng a, pianhmang mawina pawh ka nei ve vak lo. "Sum i duh leh lutuk, nangmah hi inngaihtuah ve rawh" min ngamtlak ten min ti fô. Ka nui mai zel. Ka hlawhtling ve tep tawh alawm le.. 

Kum 7 a liam leh meuh chuan kan dinhmun a danglam ve a. 

"Pa Muan, min lo nghah tur alawm le aw.. Kan tlai chu a va pawi tak em" tiin Pa Muana thlanah chuan ka tap hlawp hlawp a. A piah lawka kan VCP thlanah chuan phei lehin, "Pu Sawi, min khawngaiha min lainat thintu, kan dinhmun danglam ve tawhzia hi han hmu ve la, i va lawm dawn em aw" tiin ka tap leh bawrh bawrh a. Kan Headmaster erawh Aizawlah an lo phum tawh a. Min khawngaihtu te khan mual min lo liamsan vek tawh. Kan khua pawh hmana kan retheihna khua ai khan a lo changkangin a lo pui hle tawh a. Min hria pawh an tam tawh lo. Thalai lam chu a tu amah hriat ka nei tawh lo. Nuteii pawh a lo lang tar ve riap tawh a, an dawr kha a tlachhia a, Patea lah a hrisel lo chho nen. An fate lah laktlak an awm mang si lo va. An lo rethei tawh hle a lo ni. Ngaihdam miin dil lem lo bawk a, tanpui ngaiin ka hre bik lo. Vcp leh Pa muana te eraeh pawisa tam tham takin ka râl a, an nupui fanaute lawm hmel khan ka naupanlai min tihrechhuak. 

Kan in pawh chu Pu Luaia khan a lo enkawl tha hle mai a. Sak that erawh a ngai tawh. Kan la sa tha ang chu. Hralh tumna ka nei lem lo. Headmaster te pawh Aizawlah tlawhchhuakin a fate hnenah a pa min khawngaihzia te sawiin, ralna sum ka pe bawk. Headmaster nau te kha Lunglei lamah an pem daih vangin chanchin kan inhre pawh thei ta lo a ni. Headmaster thih thu pawh. 

Nuseni leh a pasal, Liandinga an thu dun a. Tebera leh a bialnu Sangpuii te dawtah Mama leh an mu Mahruaii leh an fapa te pahnih in an dawt bawk a. Min en thap mai. Ka bulah ka fanu (Nuseni fanu kha)  a thu bawk a. A nui sen sen mai. Ani hi tunah chuan ka neihchhun a ni ta. Vawiinah hian kha kawng. Bumboh tak chanchin kha ka mo te leh ka mo la ni mai tur leh ka makpa te bulah ka sawi a ni. A changin an mittui a tla a, a changin an nui bawk. Thawnthu ngaihnawm tak chu a ni lo maithei, mahse, ka damkhawchhuahna kawng bumboh kha kei chuan ka chhuang ber zel ang. 

Mizorama Doctor lar ber pawl Tebera chu ka nau a ni. Nuseni lah ama pualin puanthuina dawr a nei tawh a. A pasal pawh High School zirtirtu ngat, Mama erawh helper atangin mistiriah a kai sang a, nupui fel em em leh mo tha táwp a nei bawk. A fate lah an duhawm em em. Kan in luahna piah lawka in ding lai chu kan in a ni tawh a. Kan sa tha thung. Vawiinah in thar hawnna hun kan hmang mek a ni. Mama te pawh in hrang an chan ka phal lo va, kan in lianpuiah chuan Teberan nupui a neih hunah pawh kan chengho zel ang. Sangpuii lah nula fel leh ngainatawm em em, rilru tha tak mai a ni a. Min paldarh ka ring lo. 

"Ka û hi kan nu leh pa a ni kawp a, amah vanga tun dinhmun thleng thei kan ni. Kan hmangaihna hi tunah chuan kan lantir ve tawh ang" tia ka nau ten ka chanchin an sawi. Chu nui ru ver ver. Chungin ka lo ngaithla a. Nula hnahkhat ngat, virgin chiang tak mai ka la ni. Mahse, Nuseni fa erawh ka fa atan ka la ta a. Anu ka ni lo tih a hre lo tihtheih a ni. Ani hian ka tar hunah pawh min la enkawl ang chu. 

"Û, pasal nei ve la.. Ih, u Sanga kha a pathlawi asin" Nuseni chuan nui chungin a ti a. 

A lu a tuai zauh pahin, "Ka mamawh em ni? " ka ti a. 

"Mawina, û, nei suh. Kan bulah hahdam taka i awm ka duh zawk. Pasal i neij chuan i hah leh ang" Teberan a lo ti thung. 

"Khawvel û zawng zawngah nang hi ka û i ni lo vang tih ka hlau ber mai.. Tiraw.. Mahruai" tia an nu melh zauh chungin Mama chuan a lo ti ve mèk bawk a. 

Ka dawr bungraw lo thlen thu min rawn hrilh a, hmanhmawh takin Bawihteii nen kan chhuak ta a.. 

"Hmm.. Sum hlutna a hre tawh lutuk a, sumdawn erawh a bansan thei lo a nih hi" Mama'n a tih sap ri chu ka hre hman.. Ka nui sak a. Khawvel chu a mawi ka ti ta hle mai. 

(Tiang lam hi ziah ka chakna a rei tawh a. A ho viau maithei. A ngaihnawm loh leh in chawh aw 😒😂