Joshua

JOSHUA.. 

Ziaktu: Toni Râlte

"I dam em? " a ti sap a. Chhan nachang ka hre lo. Ni e, ramhuai ka hmu emaw tih mai turin ka meng phawk a ni. A tih dan pangngaiin a vei nuih leh sak a, a biangsum pawh a khuar leh kák mai. 

"Puii, ka biak che chu" a ti leh a. Ka harh. Ka inthing nawk nawk a. Mi â ka ang ngawt ang. 

"Ka.. Aw.. Ih. Ka dam, i dam em? " ka ti chhuak thei hram. Ka aw lah chu a thám chhal lehnghal. 

"Ka dam alawm.. I lo danglam ve ta hle mai.. Khaw nge in pa chu" a ti ta a. Kei erawh ka tawlh hnung dawrh. 

"Pa a.. Pasal ka nei hleinem" ka ti háw a. A hmela mak tihna lo lang zawk chu ka hmuh hmaih lo. Mahse, nuihzat hmel lek lek hian, "In inthen tawh zawk nge.. A boral nge eng nge? " 

"Hman atang khan nula ka la ni reng.. " ka tih lai mèkin, a nupui  lo kal phei mèk chu ka va mitsir a. 

"Ka kal mai ang. Ka buai deuh a" tiin ka nui lui a, a hmel tak ran chu hman ami ang tho kha a la ni. En rei ngam lo vin ka kalsan ta a. Pasal maw.. Kei hian pasal ka nei ang maw?! Hmana Lalthanpuii kha a la nula reng asin. 

Ka nu leh pa te fa neihchhun ka ni a, ka nu hian ka chhang a pai laiin a chi kawngah a pai tlat mai a. A puak keh lek lek lehnghal, Tichuan, an zai ta chûk chûk a, a chhul an paihsak ta a. Nau a pai thei ta lo a ni. Kan khua Lungzâr chu in 400 bawr vel kan ni a, Champhai District a ni. A khawthleng a nuam a, boruak a zo bawk a, a mi chengte pawh kan vun a dik tlang hle. Ka pi leh pu, ka nu leh pa leh ka patea te nen in khatah kan cheng ho va, kum 12 ka nih kumin ka nî pasal nei tawh a rawn haw leh a, a fate erawh a pasalin a kawl thung. Kan inngeih tlang em em a, hausa lè lû lo mah ila, a nuam em em tho. Duat rawn ka ni a, mahse, hmeichhia ka ni bawk a, duat sual ka har ve a niang, ka sual phah lem lo. Hlim taka hun kan hman laiin ka pa chu khawsikpuiin a man thut mai, kan khaw PHC-ah kan hruai a, tihtheih em em a awm vak lo. Kan doctor a awm loh lai a ni si a. Damdawiin pan dawn chuan a hla tham si. Pan pui erawh kan tum tho. Pan pui kan tum zanah ka pa chu a buai zual ta tlat mai a. Ka chhungte thlabar hmel avang chuan ka lo hlauthawng ve ngawih ngawih. Kum 15 lai chu ni ve tawh mah ila; kan in chhungah naute ang maia enkawl ka la nih vangin ka la naupangchhia em em a ni. Thihna te chu a awmzia hre ve mah ila, ka pa chu a thih ka ring lo hrim hrim. 

Mahse, Zing dar 4 velah ka pa chuan he khawvel hi a chhuahsan ta. Ka pa min duatzia leh min hmangaihzia ka hre ve, ka ngai dawn lutuk. Engkim ka la hrethiam lo mai mai zawk a. Ka tap nasa, mahse, hmalam hun leh ka pa tel lo hringnun bumboh dan tur ka ngaihtuah phak hauh lo. Tichuan, ka pa tel lo chuan kan la chengho ve zel a, ka pa thih atanga thla 3-naah ka nu nen ka nu te khua Lunglei lamah kan kal ta. Ka pi te chuan chelh duh viau mah se; ka nu a la naupang ve tho bawk si a, pasal chhia tha te pawh a la duh ang tiin thil thui tak an thlir ve a. Kei erawh ka kal an phal lo khawp mai. Mahse, ka nu fa ka ni miau a, ka chungah thu a nei zawk si. Ngai tak chunga Lungzár khua kan chhuahsan ni kha ka la hre chiang khawp mai. 

Lungleiah hi chuan a hmain vawi 2 ka zin ve tawh a. Kawng a hlat tham vangin kan zin zen zen thei ngai lo. Ka nu chhungte chu kan zuk bel ve ta poh a. Chengho ngai lo na ná ná chu ka nel vak lo, min duat ve tho nain. Ka pi leh pu ka ngai thei ngei mai. Ka ni khan kan kal dawnin min hrilh ru a, "Bawihte, i nu hian pasal a neih chuan lo haw leh daih rawh aw" a ti a. Ka nu khan pasal min neihsan duh ka ring lo. Khatihlai kha chuan. 

Ka nu pa ka pu chu a boral tawh a, ka pi erawh a la valai angreng. Ka putea leh a nupui fanau te bakah ka nuteii te nen kan awmho a. Thla khat pawh kan chenho hmain piteii chuan kan nufa chu min ngaithei lo chho ta viau mai a. Ka nu chuan chu chu a hai lo. Chhung leh khatte puihna in Ramthar vengah kan nufa chuan kan in dang ve ta ráwih a. Veng mawng lamah mi in hnuaiah kan awm ta rek rek mai. Lunglei Govt High Schoolah kum laklawh mahnnise, min lo admit thei hlauh mai a. Ka lawm ngei mai. Pawl 9 ka zir ve a. Khawpui nge nge chu an zirna pawh a tha khawp mai. Ka nu chuan thiannu tlema pa lek lek a chhar thar a, chu nu chu Nu Rami tiin ka ko mai a. A felin min duat thei khawp mai. Mahse, zu rim a nam deuh reng a, ka nel thei tak tak lo. Tichuan, ka hriat loh karin ka nu leh Nu rami te chuan damdawi an lo vawrh thin a. Chu chu kan sum hmuhna ber a lo ni ta a ni. Ka nu chu a inchei parh thei ta viau a, amah nu hmel chhe lo tak, lu zo ve tak a ni bawk a, dawrtu pawh a hmu thei khawp mai. A tirah chuan ka hrethiam lo va, kan inah chuan mipa kut leh ke lianpui pui, sual hmel tak tak an lo lut thin, mak ka lo ti viau zel a. Mahse, ka hrethiam chho ve ta zel mai. Ka nu sumdawnna chu duh lo viau mah ila, sawi theih ka nei der si lo. Phone ka la nei ve si lo va, ka pi te lehkhathawn tur hi ka ziak chamchi a. Thawn ngaihna erawh ka hre der si lo. Mi han zawh lah ka zak ve bawk si. Ka nu chuan phone a lei ve ta hlauh mai a. Lungzâr khua biakpawh theih dan kan zawng a, ka pute nen kan inbe pawp thei ta hlauh mai. Mahse, kan inbe zen zen thei bik lo. Anmahni lamin phone an la nei miau si lo va. Ka nu sumdawn dan te chu ka hrilh duh bik lem lo, an rilru a hah ka hlau ve tho bawk sia, bakah ka nu hian min vil run zel si a, ka sawi ngam lo hrim hrim. 

Ka thiante zingah rau rau chuan ka hleitling ber a, ka ria deuh thai bawk. Ngo lam aiin hang lam ka pawl mah a, mahse, hang beh erawh ka ni lo. Ka vun chu a mam èm vangin an awt ve fô!  Ka hmui chung chiahah hian khuavang chhinchhiah a awm kelh a, inhmeh min ti thin. Ka mithmul hi tih er chawp ngai miah lo vin a sei er tân bawk a, vai emaw min ti an awm châwk! Ka hnarngul a sang ve tho sia. Ka sam erawh ka pa khan tan a phal ngai lo va, ka la zuah ta reng, ka kawng chung thleng vel a ni a, sang takah ka tawn thin. School ka luh tlai ngaihtuahin thian ka ngah. An fel em em vang a nia. Bakah ka nu in damdawi a zawrh tak avangin sumah kan buai ta vak lo va, pawisa ka nei thei sia, thian siam nan a tha ve riau. Thian kawm bik erawh ka nei a, Kimkimi leh Roteii te an ni a, Kimi nen hian kan veng a inang a, Roteii erawh Rahsiveng a ni thung. A hnuah Seni kan kawm ve leh a, kan pali chuan tudang kan ngai lo. Seni hi venglai a ni thung. 

Harsatna em em tawk lo vin class IX chu ka pass ve thei ta mai a. Lehkhathiam tak ka ni hran lo naa ka zir peih ve èm a ni. Class X ka ni tawh dawn bawk a, ka nu pawh a lawm ve khawpin ka hria. A neihchhun ka ni bawk a, min ngaihsak ve khawp mai. Kan in luah chu a chep deuh vangin a chhak lawka building lianpui hnuaiah kan insawn ta a. Keima pualin room ka nei thei ta. Kan nufa chuan kan thawl mah mah. Mahse, min chenchilh tawk an awm ve reng a. A khawharthlak lem loh. Keipawh ka tlangnel chho ve zel a, kan khaw hlui erawh ka theihnghilh ngai meuh lo. Lehkha ka zir tang tang anga, hna te ka neih hunah ka pite ho kha ka chawm ang, ka nu pawn damdawi a zuar tawh lo vang tih chu ka suangtuahna a ni deuh ber. Kimi nen kan inkhawm thin a, ka nu erawh a inkhawm ngai lo. Junior Tkp-ah kan active ve hle. Nuam ka ti. Lungzarah khan ka inhmang bawk a. Ka nu eizawnna avang chuan inthlahrunna leh inkiltawihna chang pawh ka hre vak lo. Ka la mawl ve em a. Kimi nu leh pa te hi an fel a, an fanu ang chiahin min en ve niin ka hre thin. 

Music Video kan siam dawn vangin inrinni zan inkhawm banah hla kan zir thin a. Kan phur thei kher mai. Zan khat kan hla zirnaah chuan tlangval pakhat ka la hriat ngai loh hi a lo tel ve a. Kan hruaitu te zing ami a nih ka ring. Hmel tha hi ka'n ti khawp a!  A ngo si, a nuih zawng chuan a biangsum a khuar kelh zel a, a sam chu a dum hlap a, fel fai takin a mèt thlap. A fai sar bawk a, a kut zungtangte chu a sei sawl mai a. A changkang ngawih ngawih. Kan Convener U Tea chuan, kan zai hmain.. "Hei Joshua a nih hi. Kan pastor fapa a nia, Bangalore atangin niminah a rawn haw chiah a, kan drummer tur a nih hi, min rawn telpui thei a, kan lawm hle a ni" a ti ta a. Kan Pastor Pu Muantea nen pawh an inang lek lek, kan pastor hi a hranpain ka hre hranpa lo. A fel hle tih erawh ka hria. A fate zingah nula senior ve tawh lam U lapuii leh Joshua nau chu aniang, Arini te bak ka hmu ngai lo. Joshua chu an milai a ni ngei ang. Arini chu kei aiin tlemin a û hlek ang. Khami zan atang khan Joshua chu ka vei ve em em tawp. Tuma bulah erawh ka sawi ngai lo. Ngaihzawng ka la nei ngai lo va, star takngial pawh ka nei ngai lo. Mahse,  a vawikhat nan vei leh atchilh ka nei ve ta chu a nia! 

"Pui, U Joshua kha miin an star hlawm rap mawle" Kimi chuan school kan pan laiin a ti a. Ka lo hnual ve rinngawt. 

"A hmel tha em alawm" ka inrin hmain ka lo ti a. 

"U Jenny pawn a star an ti" 

Ka nghing lawih. Jenny chu kan veng nulaah a lar ber ang, a hmel tha ber bawk. A fel lehzel bawk a. An hausa bawk si. Joshua chu ka ta tur a ni lo tih ka pawm mai a ngai dawn a ni. Ka tan a sang em mai. Jenny ka khing pha dawn chai si lo. 

"Puibawih, zanin chu hla zir lo mai ta che, i Nu Rami te an lo thleng dawn a, a dawr bungrua thiarpui a ngai dawn sia" ka nu chuan a ti a. Ka chhang lem lo. Nu Rami hi kan ina cheng ve ang a ni tawh. Dawr a hawng ve a, lehlamah chuan kan tan chuan a tangkai em em. Bakah a sual lem lo va, keipawn ka ngaina tawh viau. A zin apiangin eng emaw tal min lo hawnsak ziah bawk. Hla zir chu chak viau mah ila, ka kal ta lo. Ka nu ph atangin kimi chu ka hrilh a, a lu a nat thu leh kal a tum bik loh thu a rawn sawi a. Thian tha tak hi chu. 

Nu Rami bungrua tlem azawng ka thiarpui a, ka lehkhabu chhiar lai ka va chhiar zawm daih. Kekawr bul nalh deuh min lo hawn leh a, ka lawm ngei mai. Ka nu nen hian zu an in zeuh zeuh tih ka hria, ka nu chu ka hau ngam teuh si lo. 

Ka mu tep tihin ka nu chuan, "Mate, kha an  be duh che" a rawn ti a. Kimi a nih ka ring. "Hello" ka ti a. 

"Ti nge hla in rawn zir loh " a aw chuan ka lungphu a tirang nghal mawle.. Joshua a ni. 

"Nia, ih, ka hman lo a" ka ti bah nuai a. Ka lai takzet. 

"In lo kal si lo va, kan bang hma daih alawm.. A zaithiam ber in rawn lang si lo va" a ti sup a. Ka lei ka chhuah ringawt. 

"Nia, lehpekah chuan lo kal kan tum tawh ang.. Mang tha aw" ka ti sawk sawk a. Ka hmet hlum daih. A number erawh J tiin ka save. Mawl min ti ngawt ang. Engtin nge ka nu number a neih aw.. E ka hre leh si, Jr Tkp groupah ka nu number hi ka add tir ve tak alawm. Kha ta tang khan a ni ngei ang. Mahse, min be ngai si lo va, engtin nge min lo hriat ve le.. Chumi zan chuan thil tam tak ngaihtuahin ka let ka let mai. A nuam veng veng mawle.. 

Ka nu sumdawnna lah chu a darh zau telh telh a, inleng kan ngah tial tial mai. Mahse, roomah ka tawm hmak zel a, a damdawi zawrh hi a hmuh pawh ka la hmu lo. Jr TKP ten video kan shoot ni chuan Joshua chu kan bulah a chetla ve reng a. Inbe tam lo mah ila, a nuam. Mahse, Jenny in a nek tam mah mah, a melh no thei si. Chawhnu lamah refreshment kan ei a, Kan bulah a rawn thu ve a. Ka lo lai em em ringawt. Keini ai chuan a u deuh hlek a, koh pawh ka la ko ngam lo. 

"Puii, naktuk tuk lehah ka chhuk leh tawh dawn a.. In ngaihawm ngawt ang" a ti sup a. Ka thlawk lo chauh. 

"Nang pawh" ka ti ringawt. Kimi ka sik vawt vawt a. A nuih a za tih ka hria. 

"Tha deuhin lehkha lo zir u la, tha tawkin in lo pass dwwn nia, Mas kan hmang ho dawn nia" a ti leh a. 

"Nia, kan lo zir tha ang" ka ti!  Ka lai tih a hrethiam aniang, a khi suk zel a. Kimi nen an in be thiam zawk. Ani chuan a star ve tlat lo va, a lai lo alawm. 

Joshua thuchah kha ka hrereng bawk a, lehkha ka zir tha khawp mai. Ka nu pawn min fak ve thin hle. Ka ngen apiang min leisak nghal var zel a. Thil awh hi ka nei vak lo zawk a. First term examah pakhatna ka ni nghal ta reng a.Kimi erawh palina a ni. Mahse, kan hlim tho, kei phei chu hlim tak ka ni. Ka phak ang tawkin suangtuahna ka nei ve nasa thei. Ka pi leh pute nen kan inbe zeuh zeuh a, Ka pi hriselna a tha vak lo tih te ka hria a, ka tawngtaipui ve nasa thin khawp mai. Joshua ngaihtuah miah lo va ni ka vui liam hi a awm lo tluk a ni. Kum tawp thleng vat vat se ka ti thin. 

Hriat loh karin hun pawh a kal ve ta zel a. Kum tawp pawh kan lo hnaih ta kuar mai. Ka helhhawlh a ni ber. Ka za ve sek zel. Christmas present nge ka hre lo, thil thar ka nei, Pa thar. Ka nu chuan amah aia naupang fè mai pasalah a nei. A tirah chuan a lo riak thin a, ka nu ka zawt ngam lo. A awm ve tak reng avang chuan ka nu ka zawt ta tawp a. "I pa thar tur a nih hi.. " a ti ta a. A la naupan hmel sia, hriatthiam harsa ka ti khawp mai. 

Mahse, ka chungah a sual hran lo va, biak pawh kan inbe ngai lo. A mu deuh reng ni maiin ka hria. Ka nu lah chuan a care hrep. Ka thîk lek lek thin. Ni 20 December kan chuangkai ta. School pawh kan chawl tawh a. Ka nuin pawisa min pe a, Kimi nen kan bazar ve. Bazar chep zetah kan inhnawh tawt tawt a, ka banah hian tu emawin a rawn vuan chawt mai. Ka'n hawi chhuah nak chuan, ka bing chuk chuk mai. Joshua lek a lo ni. A lo haw tih ka hre miah lo. 

"Nizanah ka lo thleng a, in bazar ve mi? " a ti a. Kan lo bu nghat. Ril a lo tam deuh tawh bawk a, Restaurant hnaivaiah kan chawl a. Kimi vangin ka lai ta vak lo. 

"Naktuk zan Advent Christmas chu kal ve in tum em? " a ti a. 

"Umm, gift item pawh kan lei tawh" ka ti ve mai a. 

"That nasat chu kan kal dawn nia.. " a ti a. Thu hote te sawiin kan titi ve luam a. Nuam hi ka va ti tak. A hmel lah hi a tha telh telh lehnghal. Kalna tur dang a neih avangin kan inthen leh ta phawt a. Kan hawn kawngah, "Joshua hian a duh ve che niang" Kimi chuan a ti thut a. Ka melh haw ringawt. Kan nui vak vak. Ka la naupang sia, lerh ka inti angreng. 

Advent Christmas chu SS Hall ah kan hmang a, ka theih ang tawkin ka inchei nalh ve. Programme a boring lo bawk a, nuam tak a ni. Joshua erawh drums a vaw daih a, ka va melh leh ngawih ngawih thin. Ani pawh a khat tawkin a rawn hawi ve sek. Ani chu tlangval pangngai a ni tawh a, a nau ai pawn ka la naupang ve lehchhawng a, nau enin min en pawh a ni thei. 

Request programme kan hmang a, Zai turin tu phiangsenin nge min lo request ni, ka va zak kher em. Kimi'n min nawr chhuak tawh si. Ka tap lek lek a ni. Zai hi ka ti thei ve angreng a, mahse, Joshua a awm ve tlat vangin ka khur nasa khawp mai. Eng hla nge ka sak pawh ka hre tawh lo. Kut an ben dar dar chu ka hre ve. Tumah ka hmu lo, ka zak em a ni. Gift exchange kan nei a. Ka hriatreng turin Joshua nen kan in exchage mawle.. Nui sak chunga min chibai lai khan kei chu ka thlawk delh delh niin ka hria. Ka kut a hum nghet hle tih erawh ka hre thei. 

Urlawk zanah Kimi nen kan va zaikhawm ve a, kan thut atanga reivak loah Joshua pawh a rawn lut ve. Kan bulah a rawn thu nalh. Ka zai leh ngam tawh lo. 

"Zai ve ta che. A zahthlak loh. Ka nuih lovang che"a rawn ti sup a. Kan thutna chu a hnung lam deuh a ni bawk a, tin, kan chèp a, a tu amah chuan min notice  em em lo vang. Zai laklawh laiin ka kut chu a ruk deuhin a rawn hum ta a. Ka tang ngam lo. A hum vung vung a, kha ringawt pawh khan ka mut a va titui tak em.. Ka zun chhuak pawh ka îp tluan zak. Ka chhuak phal thlawt lo. 

Christmas vuakvet chu hlim takin kan hmang ve a,ka nu sumdawnna lah a nasa deuh deuh bawk. Kan inngaihtuah tawn lem lo khawp mai. Ruaitheh tlaiah Josua te nen a motorin kan leng. Jenny te kan tlan pel a, ka îp chawih. Theiriat tlangah kan va leng a, Kimi nen thla min laksak mawlh mawlh mai. Phone kan la nei ve bawk si lo va. Kimi chu ka hriat loh karin a lo kal bo daih. Kan pahnih chiahin kan thu dun ta. Ka va mangang kher em. 

"Puii, i la naupang viau naa, ka lo nghak lian ang che" a ti ta a. Ka hrawkah hnawhtu a awm. 

"Class X hi tha tawkin pass la, chuan kan inngaizawng dawn nia"a ti leh a. Ka chil ka lem khawlh. 

"Ti pawh hian inngaizawng ang chu kan ni tho" a la ti zui zel. Sawi tur reng reng ka hre ve lo. Ka kut a hum a, ka che chang ngam lo. Ka rilru erawh a hre vek tih ka hria. Khami ni kha ka damchhunga ka theihnghilh tawh loh tur a ni. 31st pawh kan zai khawm phawt a. Zan lai inkhawm kan neih zawhah Kimi te nen bawk kan leng leh daih. Kan inah chuan ka hruai ngam lo. Kan inleng te an sual thei si. Kimi chu motorah a muthlu daih a, kan pahnihin khaw vawt hnuaiah khua kan chuan a. Min kuah hlun a, eng emaw a sawi. Ka lo ngaithla tawp. 

"Lai viau zel suh" a ti leh ringawt thin. Ka thei der si lo. Kan hawn dawn motora kan luh hmain ka bek tawn tawnah a dawm a. Chiang zeta min melh chungin a rawn kun hniam zel a. Ka lo maimichhing tawp. A vawi khat nan ka hmuiah a rawn fawp ta a. Ka chhang let thiam lo, ka lo dawh tawp. Ka khur nasa lutuk chu a hre ve vek ang. 

"Tihpalh, ka insum thei ngang lo anih kha' a ti a. Kan haw ta. 

Kum thar kan chuangkai a, kan inhmu fal thei ta vak lo. Ni 6-ah a chhuk zui a. Keini pawh study camp kan nei nghal. Ngaihzawng nei ka ni ve ta a. Ka lehkha zir pawh a tibuai lek lek fô!  Mahse, amah vang bawkin fail chu ka hlau a, a rei a, ka zir tha leh thei mai. Exam kan tan a, har ka ti hran lo. Exam chawlh chhung chuan ka nu hnenah zin ka dil a, a phal thak lo mawle. Ka pahrawn kha Hriata a ni a, ka ngaina lo naa a sual hran lo bawk a, ka tha en ve mai.. 

Kan result a lo chhuak ta.. Ka pass chiang hle. Subject pathumah letter ka hmu. Ka nu chuan a lo intiam tawh angin ka awh em em, smart phone min leisak ta. Ka pi leh pute ka be hmasa ber. Ka la zin thuai thu ka hrilh a, min ngai ve hle. Joshua chu ka be ngam lawk lo. Mahse, phone ber ka nei ve tawh a ka tia, ka zuk be ve ta râwih a. Ka nu phone atanga inbiak reng kha a zahthlak ve a. A tan pawh a nuam lo ve bawk nen. A hlim hle. Duh hun huna kan inbe thei ta chu kei pawn sawi tur ka hre chho ve zel a, msg pawh thui deuh deuh ka type ngam ve tawh. Ralkhat atangin kan induhin kan inthlahlel tawn ve em em thin. Ka hlimna kha tuman an lei zo kher lo vang. 

Mahse, ka chungah vanduaina a rawn thleng tan a,  ka nu chu a eizawnna vangin Ramthar veng khawtlang hruai tu ten an veng atangin an hnawtchhuak ta. Mahse, ka nu chu a zám lo khawp. Venglaiah kan insawn ta daih a. Ka thiantenho ka va ngai tak em. Kimi nen chuan kan inbe reng tho. Kohhranah mi thar ka ni leh a. Thian pawh ka nei thuai tho naa, Ramthar kha ka ngai thin. Ka nu lah hian bansan a tum hmel si lo. 

Clss XI chu Govt HSS ah tho ka kal leh a. Kimi pawh a la kal. School chiah nuam ka ti tawh. Joshua pawh engkim ka hrilh ve vek a, pawi a ti ve viau. Ka nu eizawnna vang hian min hnualsuat ka hlau ngawih ngawih thin. Mahse, engmah a sawi ngai lo. Kum tawp a hnai a, a rawn haw ve leh ta. A lo thlen zanin kan inah a rawn leng nghal. Ka nu a kamnam deuh bawk a, a lo polite ngang mai. Veng khatah awm tawh lo mah ila; a lo leng deuh reng a. Kan leng kual zeuh zeuh bawk. Fawh pawh kan infawp zing ve ta viau. Ka hnute pawh a khawih tawh. A bak erawh kan kal ngai lo. Pastor fapa a ni a, a insum thei khawp mai. 

Zan khat ka msg dawn erawh chuan min tilungngai hle mai. Jenny khan min rawn text a, "Pastor fapa a ni a, in eizawnna in bansan theih nan a be tha ve mai mai che anih kha.. Nang lahin i lo ngaizawng a. Zak ve deuh rawh. Naupang i la nih kha, baka i phu hlawl lo".a rawn ti. Ka sa vek thei. Chhan ngaihna ka hre bawk si lo. Joshua chu ka va hrilh ta tawp. Min rawn call ta vat a, Jenny hian hman atanga a ngaihzawn tawh thu leh ani chuan thian ang baka a en loh thu a sawi a. Ka lo awih thlap. Harsatna dang kan tawk leh ta rih lo phawt. Christmas vuakvet pawh a hma kum ang thoin hlim takin kan la hmang thei. 

Kum lo thar erawh ka tan kum anchhia a ni ta a ni. Joshua pawh a chhuk tawh a. Kan exam zo tawh bawk a. Kan chawl veng veng rih a. Ka pahrawn chu a mizia a dang ta tlat. Ka nu awm loh lai hian awmze nei deuha min chhaih a hrat thin a, ka ngawihsan mai thin. Tlai khat ka eirawng bawl laiin ka hnunglam atangin min rawn kuah thawr mai a. Ka phu chiang hle. 

"I nu ai hian i nei nuam hrim hrim ang. In nufa hian ka phîr dawn che u" a ti a. Zu rim a nam huam bawk. 

"I va zak lo e.. Kal teh. Min thlah vat rawh" ka ti a. Ka tal aih aih a. Ka hlau takzet. Ka nu te lo haw thawm a hriat chuan min thlah ta a. Ka nu hrilh mai ka duh tawh. 

Zanah a mut hnuah ka nu chu ka hrilh ta a, "A ruih vang anih chu" min tihsak daih. Ka hrilhhai angreng. 

School kan tan chho a, ka tang khawp mai. Joshua vangin. Ka pahrawn vang chuan ka nu chu a ralmuang ta vak lo a. Hrehawm ka ti. A hmel te chu ka ten hluah hluah mai. Zan khat ka nu chahthlak hlanin min sual a tum ta a. Ka hmui a hup tlat si a, ka tal nasa ngang mai. Thih thlenga tan pawh ka inhuam. Ka nu lah a hnar bur bur mai si. A dar veilamah ka seh ta nghek a, a rak thawt. Min beng thuai a, a na kher mai. Mahse, ka beidawng duh lo. A tho ta tuih tuih a. Ka tap nasa khawp mai. 

Ka nu chu remchang hmasa berah ka hrilh leh a, a ngawi reng. A hnuah an nupa inhau chu ka hria, "Nang ka nei che a. I fanu chu ka fanu a ni ve mai. Mahni fanu te engtin nge ka khawih duh ang a, amah hian min mil lo sa a, ka chhuah theih nan tan a la ve anih hi" a lo ti thèn. Ka nu a tilawm thiam si a, ka nu chuan min thiam lo zawk daih. A na mang e. 

Kum chanve pelh hnuah Joshua a rawn haw hlawl. Apa hriselna a that vak loh vang leh thil dang buaipui tur a neih vang a lo nia. Kan inhmuh chuan ka lungngaihna te kha a kiam duak duak mai. Ka pahrawn chungchang pawh ka hrilh hmiah. A mitmengah chuan min ngaihtuah takzet tih ka hria. Tihtheih kan nei rih si lo. Clss XII ka pass veleh innei turin thu kan tiam ta ringawt. Zan khat a lo leng chu buaina lian tak a chhuak ta. 

Ka nu chuan Rahsivenga ka pi dam lo a zuk tlawh a, ka pahrawn erawh inah a awm leh tlat!  Min veng aniang. Zak lo lutuk. Rui phelh phawlhin Joshua te chu a be suam suam a. Ka lo ten kher mai. Ka nu te chu an rei ta phian mai. Dar 10 velah Joshua chu a haw ta a. Anuin a lo call reng si. A haw fel chiah tihin Hriata chuan min kai dawrh a, an roomah min pawt lut ta a. A rui deuh bawk a, min hneh vak lo. 

"I virgin hi chu ka hawng dawn khawp" a ti pawr huar a. A meng sen rum bawk. Vawi lehkhatah room kawngka chu a rawh in hawng thuai a, Joshua chu kut humruhin thinrim zetin a ding to mai. Hnehsawh zetin Hriata chu a tham tho a, a hnek ta buan buan mai. A thisen a chhuah nasat tawh em vangin ka thelh ta a. Hriata chu a tap pur mai. Ka nu te an lo hawng zui a, thil awmzia a kip a kawia an hriat hmain Joshua chu a ankhum hrep a, a nam chhuak ta a. Ka muhil lo tawp mai. 

Ka nu chuan palai a va thlak a, inenkawlna man tal tum turin. Ka va zak tak em. Pastor fapa a ni si. A hmingchhiat ka duh lo. FIR thehlut zawk se chuan Hriata chan hi a tha lo tawp ang. Joshua pa zak lutuk chuan chumi ni la la chuan Joshua chu phaiah a kal tir leh nghal a. Thlah pawh kan inthlah hman lo. Hriata enkawlna senso chu an rawn tum a. Ni 2 hnuah Joshua nuin inhmu turin min rawn sawm. 

School banah min lo nghahna lam chu ka pan ta a. Ka va huphurh tak em… 

"I hriat angin ka fapa hi pastor nih tir ve ngei kan tum a. Tin, nupui pawh ka hualsak vek tawh. Hei hi lo hrereng rawh. Ruihhlo zuar chhungkua nen inzawmna kan nei ngai lo vang. Ka fapa hi i hmangaih anih chuan bansan vang vang ang che. Engtikahmah ka mo i ni dawn lo. Ka dam chhung chuan" a tih sak sak laia ka thinlung natzia kha aw.. 

Ka nu lahin min hau reng bawk. Mahse, ka bansan phal ngang si lo. Anu min tawngkhum dan te chu ka hrilh duh lo. Tlemin ka rilru a lo puitling ve ta deuh bawk a. Ka nu hi a eizawnna bansan tir ka tum a ngai. A beidawnthlak hle si. School pawh nuam ka ti ta vak lo. Lehkha lah ka zir tha hlei thei tawh bawk si lo. Kimi hian min khawngaih thin ngawt mai. 

November thla kan chuangkai a, min ngaizawng deuhtu Aldrina a lo leng thin. Damdawi ti ve thinntho ania, mi sual tak erawh a ni hran lo. Mahse, tuman ka thinlungah hmun an chang lo. Chutih lai mekin Joshua chuan a phone a tibo hlauh mai a. A thiante ph atangin min rawn bia a. Kan inbe hleithei tawh si lo, ka va ngai tak. Kum tawpah lo hawn a tum tho vangin tlem chuan ka hlim tho. November ni 16 a ni a. Nu Rami kulcho chu damdawiin lamah an dah chho a, kei erawh inah ka awm. Ka nu chuan a awmpui nghal a, Hriata chu ka mut tawh hnuah a rawn haw. Ka room kawngka ka kalh vek a. Ka hlau vak lo. Mahse, engtin lek nge a lo hawn ka hre lo ka harh meuh chuan min lo bawhbet run tawh a. Ka hmui a hup tlat. A rui chhe lo va a chak phian mai. Tawngtai chungin ka theihtawpin ka tang a, ka tal chhuak thei hram. Room atangin ka tlan chhuak a, min rawn umzui zel si avangin in chu ka chhuahsan ta ringawt. Zan a rei tawh si, kalna tur ka ngaihtuah a, ke ngatin Kimi te in ka pan tawp. An lo mu vek tawh a. Min hmuh chuan mak an ti kher mai. Tap hlawp hlawpin ka chanchin ka sawi a, min khawngaih kher mai. Kimi nen kan mu dun ta a. Kan muhil lem lo. 

A tukah Kimi pa chuan kan inah min zuk hruai a, ka nu pawh a lo haw tawh. Min hmuh rual chuan min ankhum nghal hlawih hlawih. "Naupangte si, rilru chhe reuh lutuk, saw thisen te i lo chhuah vel a, heti hrim chuan kan bulah i awm thei tawh lo vang. I duh duhnaah awm rawh" a lo ti. A ngaihna ka hre hauh lo. Hriata chu a lu tuam burin a rawn chhuak a. Ka nu bulah chuan keiman ka hnawtchhuak ang leh chemte hmanga ka vau thu te a lo sawi daih. A hliam te chu a ma siamchawp vek. Rapthlak ka va ti em.. 

Kimi pain thil awmzia sawi a tum dek dek a, "Kan in chhung buainaah lo inrawlh ve suh" a ti hmak. Roomah min kalh hnan a. Kimi pa pawh a haw ve leh tawp. Chumi zan chuan ka thawmhnaw a siam a, a tukah Lungzárah min thawn chhoh a tum thu min hrilh. Ka â vek. Joshua lah chanchin hrilh ngaihna a awm lo. Ka phone kha an thuru nge an paih nge ka hmu zo tawh miah si lo. 

Thil chu a thleng chho zut zut mai. A tukah pawisa ka mamawh tawk min pe a, Sumo Counter min pan pui a, kam khat mahin min thlahna thu pawh a sawi lo. Chu chu ka nu nen kan inthenna bul tanna a ni ta. 

Kawngtluanin ka tap ti tawp mai ang. Lungzar ka thleng a, ka pite chu an lo lawm ngang mai. Kan inhmu lo rei ta bawk a, kan inngai bawk a ni. Ka pi chu a lo tar tawh viau mai. Ka pu erawh a la chak tha. Ka patea chuan nupui a lo nei tawh a, fa pakhat an lo nei tawh. Ka ni erawh ala thlawi ve zel a. Ka chhungkaw dikntak te bula ka awm chu lehlam takah chuan ka thla a muang. Mahse, Joshua ka ngaihtuah chhuah chuan ka hnîm ruih zel. Chanchin engmah ka hrilh thei tawh si lo. Phone pawh ka nei tawh bawk si lo. Ani lah a phone tibo bawk. Lung a zîng ngei mai. Zirna erawh ka chawlhsan ta phawt. Patea chuan nakkum lamah kan khuaah chuan admission lak sak min tum a. Patea nupui chu khaw thenawm ami a ni a, a tawng duh reuh a, a sual hran lo. Mahse,  a taima vak bik lo va, ka awm tak chinah phei chuan a tih ai zawng zawng ka ti ta a. Pawi ka ti hran lo. Ka patea leh ka ni chu an feh thin a, in lam hna erawh ka ko ah a tla ta. Kan naute chu ka duat khawp mai. Ka thian hlui thenkhat te chuan pasal an lo nei tawh mawle.. Thingtlang ngang a ni bawk a. Joshua chuan engtikah emaw min la rawn zawnchhuah ka beisei. 

Kum 10 hnuah kan intawng leh ta reng a. Kei pawh kum 30 ka tling ve ta. Ka pi leh pu te an boral tawh a, Ka ni pawn pasal neiin fa pahnih lai an nei tawh bawk. Patea te pawn fa pali an nei tawh a. Class XII kha ka pass ve naa College kal tura ka intintuah laiin ka pi a boral ta thut si a, ka tangkhang zo ta a ni ber. Kan khawsak a lo harsa zual ta bawk nen. Ka inthlahrung ve bawk si a, ka kal zawm ta lo. Kum 5 vel chhung chu Primaryah mi ai ka kal a, a zia ve viau. Ka pu a boral a, patea lah pumpui na a nei chho a, hna a thawk vak thei ta si lo. Ka hlawh a beitham si a. Ram lamah ka tul ta a ni. Nuteii a tawrhhlelhawm tan riau bawk. Mahse, patea hian min duat ve èm a. Min ti vak ngam lo. An fate an rawn lian chho a, a hautak rual an rawn ni chho ve nen.. Ka hah ve thei khawp mai. Nuteii hi taima ve deuh chu nise a zia ve ang mawle. 

Kan khuaah Baptist Kohhran a dinna a la rei lo va, tam pawh an tam lo. A vawi khat nan Bialtu Pastor an nei ve a. Chu ngei chu Joshua kha a ni. A nupui pawh Jenny a ni. A kherh tlu ta nge nge a nih awm chu. Fapa pahnih duhawm deuh deuh an nei tawh a. Joshua pawh a lo patling ve ta deuh. Pasal nei tawh anga min ngai ringawt kha mak ka ti deuh. Ka nu nen kan inbiak hnuhnunber tum chuan Venghlunah an lo insawn leh daih tawh a. Ka thiannu Kimi thih thu ka hriat erawh chuan ka mit sulh mai. A va mak em.. Kan inbe thei ta bawk si lo va, a thih thu pawh a chhungte tan hrilh ngaihna ka awm lo ve bawk a ni. Hmanni lawk khan ka nu chu an man thu leh jail-a a tan thu ka hre leh a, whatsapp atanga ka hriat a ni thung. 

Joshua te nen khaw khatah kan awm leh dawn ta chu a nia. Ka tiril a khur. Hmana ka hmel kha ka paih tawh viau ang, hna ka thawk nasa si a. Ka vun lah a ngo vak lo sa nen, ka beh tawh ngawt ang. Mipa ka ngaihsak loh em vangin tuman ngaihzawn en pawn min en tawh lo. Ka haw tirh kha chuan ka lck ve viau. Mahse, ka thinlunga Joshua pindan hi a ruak thei hlawl lo a ni e. 

Presbyterian-ah ka lawi vangin ka hmu tam lo va, ka lawm. Min rawn zawnchhuah beiseiin kum eng emaw zat kha ka nghak a. Beiseina nen ka thlir reng thin. Mahse, lo lan tik reng a nei si lo va, a lo lan niah erawh nupui fanau a lo nei ta. Ka tan chuan beisei chi a ni ta lo va, chumi anih vang chuan pasal neiin mi dang nen chhungkaw din ka tum chuang lo. Lentar mai pawi ka ti ta lo. ani ber. Patea fate lahin an nu ai mahin min ngainain min ngheng tam zawk a, ka fa an ni mah zawk. 

"Puii, tukin i huan kal hlanin Baptist pastor kha a lo kal tak asin. Lungleiah khan kan inkawm ve thin a a tia" Nuteii chuan a ti a. Ka phu zawk. Kan in thleng thelnga a lo kal ka beisei lo. Hmuh fo pawh ka duh lo. Ka chhang lem hlei lo va. Chaw kan ei kham a, Patea a nawmsam loh deuh vangin lo ah kan feh thei ta si lo va, thing tal ka va phur ange ka ti a. Ka chhuak ta a. 

Ka thing fawmsa chu èmah ka thawn mawlh mawlh a. Ka ngaihtuahna ka kawm pah veng veng bawk. "Puii" tih ri avang chuan ka tawp chawt. Ka hawi kual a, ka hnung lam atangin min rawn ko leh a. Amah a ni. 

"Puii, i la rethei reng a ni maw?" A mitmenga min khawngaihna lo lang chu a thup zo meuh lo a ni e. Min melh vawng vawng ringawt. Sawi tur ka haihchham ve bawk. 

"Hawh, thu lawk ang. Titi teh ang. Sawt tawh dawn lo mah se;" a ti a. Ka ding uaih chu min nam thu leh a. Ipte pui a ak ve a, eng emaw a tih ve ni. 

" Saw lai Pu Lawma huan kha ka lei a, ka va fang ve lawk alawm le.. " a ti a. 

"Nih chu.. " tih bak sawi tur ka hre lo. Min rawn en a. Ngilnei takin. 

"I nu khan pasal a um kha a ti si che a. Chu chu mi zawng zawng sawi dan a nia. Biak pawh ngaihna che ka hre bawk si lo. Rilru hrehawm takin rei tak chhung kha ka awm asin. Ka pa a boral a, Pastor nihtir min tum em vangin ka zah a. AICS lamah ka va zir leh a, englaimahin ka theihnghilh ngai lo che. Tichuan, ka zir chhuak a, Pro Pastor ka nih kumah ka nu te nawrluihnain Jenny hi ka nei ta a. A sualna ka hre hran lo naa Puii, nangmah a ni si lo. Lungzar khuaah kan rawn awm. Dwn tih ka hriat khan hmuh thut che ka inring reng a.. Ka rin loh deuhin pasal i lo la nei reng reng si lo va" a thusawi engkim chuan min chhun na zawk zawk. Ka nu ka huatzia chu ka sawi thiam lo zawk. Ka kut ka humruh teuh mai. 

"Ka phone kha a bo daih a. Ka nu khan a dah bo anih ka ring. Ka pahrawn kha a tan a hlu zawk anih ka ring, Lungzarah min thawn haw ta daih a. A chanchin pawh ka hre ngai tawh lo" ka ti ve a. Ka kut a rawn la a, hman ang bawk khan a hum leh vang vang. Kan vun chu a in no hleih ngei mai. 

"Chuan, min lo nghak ngat ngat em ni? " a ti ta a. Ka mittui a tling. Ka khap sak sak a. "Nghak tawh lo" ka ti tawp. Mahse, ka mittui a far. Ka dang zo thlawt lo a ni. Ka inrin hmain min rawn kuah thlawp a. Kum tam tak chhunga ka lo up beh tawh ka natna leh lunglenna, ka lungchhiatna zawng zawng te chu a rawn kal khawm vek ni maiin ka hria. Ka tap ta hlawp hlawp a. Ka samah a chul a, duat takin ka hnungah a chul bawk a. Insum tih hriat zetin, "min ngaidam rawh aw. Thudik zawng lo va, ka phatsan che avangin. Engkim hi ka thiam loh a ni" a ti a. 

Ka in la hrang ta a. Intipachang takin, "Tun atang chuan la inhre ngai lo angin awm tawh ang. Pastor i ni a, hoteah i hmingchhe thei. I nupuiin min hre bawk si. I nupui fanaute tan pa tha tak i ni dawn nia. Kei chu min ngaihtuah suh. Ka tha aw" ka ti a. Hman ai khan ka lo zak lo be tawh a, ka puitling viau tawh bawk. Kumin min chaldelh ta bawk nen. 

Thawm kan hriat vangin rang takin a insaseng ta a. Fimkhur a va ngai tak em. Ka thlakhlelhzia kha ka inhaw zawk. A angchhunga awm nawmzia tak te kha aw. Chumini atang chuan eng dangmah ka ngaihtuah hleithei lo. Keimah zawk ka inthiarfihlim loh chuan ka ti a. Ka theih ang angin ka hel thin. Kohhran a inan loh miau vangin kan inhmu tam lo hlauh a. Kawnga intawh chang eraeh a awm lo thei lo va, kan va lai dun thin tak. 

Jenny in min hmuh ve chuan min lo la hre ve reng mai. Kan inchibai tak naa a hmela khakna kha ka hmu thei. "Lo la leng ve la, rual hlui te chu in ngaihawm ve lawm" a ti tak naa ka len loh turzia a hre chiang. 

YMA kan hnatlang a, nula ho vin rawng kan bawl a. Baptist nula pahnih awm ve te chuan an pastor te chanchin an sawi a. Ngaithla lo anga lang siin ka bengkhawn ru viau. 

"A fel ngawt mai. Bakah a hmel that zia aw.. Haha, thusawi a thiam bawk si, nelawm bawk si hi ni tawp" pakhat chuan a ti a. A nui har har a. 

"Mahse, an nu saw ka nel ve thei lo reng reng, a ti rèm mai a. A in lak ve hmel bawk si" Pakhat ve thung. Mi dang an kohhran ni ve lem lo te pawn an lo sawi ve tliar tliar a. Jenny chu a mize chhe zawk an lo hre ve anih dawn hi. Joshua erawh fak lo an awm lo. Ni e, hmana Joshua kha a la ni miau a. Ka bialpa hlui tih sawi ila tuman an awih lo vang. Ka sawi dawn lo bawk. 

Zan khat chu whatsappah min rawn be nawlh a. Thu hote te kan sawi a. A number pawh ka save duh lo lui tlat! 

"I U puii lah hian pasal neih reng a tum hmel si loh a, kan thihsan hunah che u pawh amah hian a enkawl vek danw che u anih hi" Patea hian a ti thin a. Ka naute ni mah se, 'Apui" tiin min ko vek. Nuteii nena kan inkhak nikhua te hian min tan zawk zel. An lakah ka sual miau lo va, an te ber dawttu Lily phei chu ka fa ang a ni mai. A tete atanga ka enkawla ka mutpui kha a ni tlat a. A unau dangte pawn an thik deuh thin. Vawikhat nuteii chu patea bulah a vui a, "In lamah hian ka buai tehlul nen min puih pawh a tum lo, ram hna thawh bak hi tih tum reng reng lo" tiin. Ka che ziah tho sia, a mak thin. 

"Sawi ziah lo teh. I sawi leh chuan i chhuak tawh ang. I tel lo pawn kan awm thei tho vang. I chet tlem tehlul nen, ka mit a del hleinem. Ram lamah hah takin a thawk a, in lamah chuan awl ve ta zawk che. Kan fate lah heti khawp hian a duat a, lawm tak aruanga selna tur la dap tak reng mai. Ka ning. I sawi rual rualin i chhuak tawh ang" a ti hmak mai. Nuteii pawh a ngawi dâk!  Vanneih asiamin Kan kohhranah rivival camping a awm a. Nuteii pawh a harh thar ve ta hlauh mai a. A danglam chho tan ta. Ramah pawh a kal ve ta zauh zauh a, min phût ngai tawh lo va, eng emaw thil lian tham a lei dawn emaw mamawh kan neih pawn min rawn zel tawh. Kan chhungkaw sum chu ka manage a ni deuh ber tawh. Ka lal chho ve tan ta a, ka awm dan erawh a ngai reng. Va intihthu viau kha ka thiam chuang lo. 

"Pui, naktukah kan haw lawk dawn a. Ka nu kha chuap cancer vangin tunah damdawiinah a awm mek a.. " a rawn ti a. Hmana a nuin na zeta min tawngkhum lai kha ka hre chhuak lo thei lo. 

"A va zia lo em.. Lo dam rawh se. Tluang takin innkal dawn nia" ka ti ve mai a. 

Lunglei an awm chhung khan kan inbe tam hman khawp mai. Chanchin min rawn hrilh ve zel si a. Kei lahin ka chhang lo phal bik chiah si lo. Ka ngai thar leh tan a, a tha dawn hauh lo ti thin mah ila, ka nep si. Tawnhriat pakhatmah ka nei der bawk si lo. Amah chiahin min la fâwp. 

Anu chuan a peih lohsan ta nge nge a. A upa ve tawh bawk a, a awm tho mai. Ka han hnem ve liai a, kan inbe ngawrh sauh. Call te thlengin kan inbe tawh. Anihna leh a nupui avang pawn biak tawh loh ka duh thin. "Puii" a rawn tih tawh chuan ka nem leh duai duai si thin. An lo haw hnu thleng pawn kan inbe zel a. Hmuh erawh kan inhmu ngai lo. Inbia tihah thian huang chin bak pelin kan inbe ngai chuang lo, mahse, tawngtai tam te Pathian nen an inkar a that ang bawkin, inbiak reng na na na chuan inthlakhlelhna a pung deuh deuh zel a. Tihtawp kan duh, kan thei meuh tawh lo. A la mualpho mai ang tih ka hlau. Kei chu mualpho mah ila pawi ka ti lo, miin an hmuhsita an diriam tur ka ngaihtuah hian ka na vek thei. Ka phal hlawl lo. 

"Puii, kan pa hi rawn be tawh lo la ka duh khawp mai" Jenny msg chu. Ka tim sawk mai. 

"Aw le" ti chiahin ka chhang. Ka tum bawk. 

Ka block ta ngawt a. Zantin a mi mang thana thu chhiar thei lo va mut chu ngaihtuah a thui ta hle mai. Ka khua a har ngawih ngawih zel. Mahse, an nupa kar tikhia a nihna thlenga tihhmelhem ka duh lo. Ani chu ka hun liam tawh a ni. 

Patea leh Nuteii te an inentir a, Lily leh mama  hruaiin lo lamah chawhmeh eng ilo ka va dap a. An unauin thlamah an awm a, an zai vak vak mai. 

"Apuiiii… mi an lo kal" an rawn ti vau vau a. Tu tak ni ang maw.. Ka han chho a. Thlam namthlaka lo thu ka hmuh chuan ka thinrim ringawt. Lily leh mama te chu vau tui chawi an ngen leh tlat a, fimkhur tura hrilhin ka kaltir a. An kal liam chiah tihin, "Eng nge i hriat?  Hetiang hian awm tawh suh. Khawngaihin. Nang leh kei chu a theih tawh loh" ka ti lawng lawng a. Ri kan nei lem lo bawk a. Venthawn ka nei lo. 

"Puii,  a harsa em a ni. Ka inthiam lohna hian nitin min vaw chau telh telh mai si a. Ka hmangaihna che kha chhetemahin a la kiam bawk si lo va. Pastor hna hi ka bansan anga, innei mai ang" a ti ta. Ka inrin hmain ka beng.. 

"A sawi pawh i zak na nge?  Kei chu i nupui ni tlak ka ni lo. Tin, hna zahawm lutuk hi keimah vanga i bansan ka remti lo hul hual bawk. Pathian thu i awih anih chuan min hmu tawh suh. I fate ngaihtuah la, khawngaihtakin inthlah hlen tawh ang" ka ti a. Ka tap leh bawk. A mak! Min rawn kuah leh thlawp. 

"Ka naute, a harsa a ni tiraw?  Pathian hian min hua ang em le? Ka thinlung hi a uire tlat bawk si a. Ka hmangaih che. Ka hmangaih reng ang che" a ti a. Min kuai dak a. Hman ang bawk khan ka lo maimichhing leh. Min rawn fawp leh ta. Hman ang tho khan a la thlum.. 

"Hman ami tho kha i la ni" a ti sup a. Kan inmelh vawng vawng ringawt. Mama te thawm kan hria a. Kan inthlah nghal. An huan peng thleng kan inchhawm chho a. An huanah a peng ta a. 

Ka la unblock duh chuang lo. A chang chuan thih daih mai te ka chak thin. Awm ve lo law law ila a nun khua pawh a zia zawk ang. 

"Baptist Pastor nupui kha a chhul a cancer. anih awm chu. A zia lo tak tak a ni" Joshua nen kan infawh atanga kar hnihna velah ka nuteii chuan a ti a. Min chhun zawk mai. Chanchin min hrilh thei tawj si lo va, a reh ve ta vang vang kha a nia. Aizawl lamah inentirin an kal a lo nia. Jenny chu a pawi ka tihpui khawp mai. Mahse, chhul te chu a dam ve leh thei mai turah ka ngai ngawt. 

Mahse, Jenny natna chu alo nasa tawh viau a lo ni a. Aizawlah an han cham ta reng mai. That lam a pan thei ta meuh lo ani awm e. Phaiah te an zuk kal ta hial. Ka unblock tawh a, chanchin min rawn hrilh ve zeuh zeuh. Ka khawngaih hle a ni. A fate erawh Aniten an buaipui a. Jenny chu a chhul an paihsak ta a. Lungleia an in lamah a hahchawl rih a. Bial nei a nih miau vangin Joshua erawh a rawn let leh thung. Amah maia a awm vangin an Kohhran nuho in eirawngte an va bawlsak thin a, chaw eiah an sawm thin bawk. A pawr fap mai a, a meng rim thawkhat aniang. Biak erawh kan inbe kal reng a. An ina va kal ka chak viau naa, ka ngam ngang lo. Amah pawn minnsawm ngam hek lo. Bial a fang zeuh zeuh a, a nupui dinhmun in a zir lo bawk nen,  a bial te pawn an hrethiam khawp mai. 

"Kan pa kha i va rim thin vel em? " Jenny bawk chu. Min la thîk ál ál hle mai. 

"Rim nang, Nula dangin an rim thin" ka ti ve ngat!  Inbe fó mah ila; inngaihzawnna lam kan hawi ngai lo. Inhmuh ka duh hek lo. Pathian thu te min sawipui thin a, ka bengkhawn vak lo naa ka lo ngaihthlaksak ve mai zel. Pathian hi ka ring lo a ni lo va, hman ai khan ka ngaihsak ta vak lo anni mai. Hna ka thawknrim a, ka chau thin si. 

Jenny chuan ral khat atangin min rawn tâwng fo a. Ka ngaipawimawh duh lem lo. Ka hrethiam ve tho. 

"Vawiin chu ka khua sik ringawt a. Ka mu nileng deuhthaw" Joshua a ni. Ka ngaihtuah ru kher mai. Damdawi te ei turin ka ti a. 

"Zaninah lo kal hram ta che. Engtinmah ka ti lo vang che" a rawn ti ta thlawt a. Ka thin a phu dup dup mai. Ka khawngaih bawk si. An quarter hi veng tawp lam deuhah a awm a. Ka kal ngam kher ang em le.. 

Dar 8 a ri ta. "Ka nghak che" a la rawn ti. Ka mang a ang. Ruah a tla siar siar a, chhuakvak an awm ka ring vak lo. Nihliap ka khum a, "Rami te inah ka va kal lawk" tih leh chhuah ka rual nghal a. 

Nula puitling ka ni tawh a. Zawhna an nei lem lo vang. Ding takin an in lam ka pan a. Tlangval pahnih ka tawk tih loh chu tumah ka tawk lo. Ka rilru chuan sual lam ka hnaih niin ka hria a, ka pen zel tho si. A lo thim thiap a, kawngka ka kik, a rawn hawng nghal var. Kan inhmachhawn ta ran mai. Towel a rawn la a, ruahin min theh huhna te chu a hru puat puat a. 

Thutthlengah min nam thu a, ka bulah a rawn thu zui nghal. Ngawinrengin min pawm a, "Tihian reilote awm lawk ang. Khawngaihin" a ti a. A pang ka dek a, a lo dai diak. 

"Pui, a hrehawm em mai. Ka bang mai ang aw.. Hna te chu ka hmu ve leh mai ang.. ". ati leh a. Ka hau duh tawh lo. 

"Pastor i ni asin" ka ti sap a. 

"Chuvang tak chuan alawm bansan ka duh. Pathian lakah ka inthiam thei si lo va, ka bansan thei bawk si lo che a. Awmngaihna ka hre tawh lo a ni" 

"Josh, ih maw, Pastor ni tur dik tak i ni. Kei hi setana angah min ngai tawp la, i hneh thei mai ang" ka ti a. Ka thaw halh. 

"Ka tum, ka bei ve nasa ssin. Kum tam tak ka lo up beh tawh kha i hmel ka hmuh atang khan a rawn irh chhuak ka ti tawp. Ka neih loh che chuan thlamuang taka ka thih pawh ka ring lo" a ti ta thlawt a. Min hmangaih tih hi ka ringhlel lo.. A bek tawn tawnah ka vuan a, chiang takin kan inen.. A mitmeng ngenngawl zet chu tawrh a va har em.. 

Min rawn fawp a, ka lo chhanglet ve zat. Thutthleng seiah chuan chep zetin kan inbuan ta thial thial a, ka hnute a thám, ka lo thaw hawk. Ka nghawng leh ir no vel te chu a fawp kual dan dan a. Ka hmangaih èm vang aniang ka lungphu a rang tan a, ani pawh mipa a ni tih a lang tan. 

A tho thut a. A thaw ham ham, "A dik lo. Hei zawng kan ti thei lo' a ti hrâwk a. A inhumruh a. Kei pawh ka insiam tha vat vat. Ka hawnsan ta a. A mi fawhna te chulna te chu ka mangphan zui.. Ka tan mipa awmchhun a ni miau a. 

Kum a tawp a, Jenny te pawh an lo hawng ve leh ta. A cher kuam mai. Joshua nen kan inhmu fal leh tawh lo. Tenawm ka inti a, ka inhua. Keimah hian ka dang ngam tur a ni. Ka tum. 

Kum a lo thar a. Ka tan engmah a ni hran lo. Fiamthuin chhungten pasal nei turin min nawr fo. Nei dawn tak tak ila an phal ka ring lo. Ka pawimawh vet vet em… march thla chawhma velah Jemny natna kha lo chhuak lehin, Aizawl lamah an chhuk leh ta. A chau zual zel a, nikhua a hre lo chho ta hial a. A fate vang pawn pawi ka lo ti ve em em thin. 

April thla ni 7 ah Jenny chu a kal ta nge nge a. Nu la upa lo tak, hmel tha tak kha cancerin a ei hlum ta. A va runthlak thin em.. Jenny thih sarhu lai. Vek hian ka nu dam loh thu ka hre zui ve zat a. Intihhahrhna ni pah fâwmin Lunglei lamah ka chhuk ve ta daih a. Ka nu chu a lo lang tar ta hle mai. Zu in a ei chhe ve bawk a. A pasal kha chuan a lo then daih tawh a, a jail tanpui pa upa lam nen an lo inkawp leh tawh zawk a. Kan han inenkawl chho a, a zia chho ve ta deuh. A pasal chu a fel phian a, a duat zèk mai. Ngaihtuahawm a ni ta lo tihah ka hawnsan leh ta a. Joshua hnena dawt a sawi chhan erawh ka zawt ta lo. Hriat kha a tulna ka hre tawh lo a ni. 

"Tunah chuan engman min dal ta lo. Nupui sûn ka ni a, nupui nei leh tura phalna pek ka ni' Joshua msg chu.. Jenny thlarau a zahawm ka ti a, mahse, Pathian hian kan inhmangaihzia hriaiin rem min min ruatsak a ni ve thei mai ang em?  Kum 13 dawn mipa dang hnaih miah lo va ka lo nghah ve tang tangna man kha ka hmu ve dawn ta em ni ang? 

Kan inbe chho leh ta a. A danglam ta deuh. Inngaizawng angin kan inbe tawh. Mahse, inneih chu kan hmanhmawh lo. Jenny a zahawm ve tlat. Pastor te pawh mihring ve tho an nia, Joshua chu demna ka nei lo. Hmangaihna hian pawisak a nei miau si lo va. 

"Ka fate hi min hmangaih pui thei ang tiraw? " inthlahrung takin a ti sap a. 

"I fa an ni miau a. Ka theih i ring em? " ka ti ha a. Ka bianga rawn piai zeuhin, "Fanu pakhat nei leh ila, i kum a tam ve tawh tho sia.. A tawk lek lo maw? " a ti zui a. Ka lo nui tawp. 

Lalpa, tun tum chauh zawng ka hmangaih hi la bo tawh lul suh aw… 

The End..