Fugitive

FUGITIVE  (4)

Ziaktu: Toni Râlte

Ni a rawn chhuak suar suar a, an tho phak phak a. An hmai te an phih hnuah tukthuan tur dapin an invai chhuak leh ta a. Sangtea leh Zothana chu an kal hla fâl deuh a, an piah lam thing thelh hmun nuam takah chuan an vak lut a. Silai kha Zothana'n a pu bawk a. An vak thuk zel a, a nuam riau. Sava an chiar nak nak a, thehlei leh chepate pawh an ngampa phian. Mual letliam an thlen meuh chuan sih zau angreng tak an pawh ta hlawl a, Sakhi patuai hian sih tui chu a lo dâwt khalh khalh mai. A thlamuan kher lehnghal. Vawi khatmah Sava takngial pawh la veh ngai lo kha an ni a. Loh theih lohin Ramâr kha an kap ve a ni mai a. Sakhi sa tuiza leh a chek tuizia erawh an hre ve. Silai chuan a tin vang vang a, a thlah ta. Vanneih asiamin a zakdawhah tak a kap fuh nia!  A thal ta der mai. A ruk tak chuan themthiam a inti ru ve maithei. Kûk raih chungin Sangtea chu a tlan phei nghal a. An pahnih chuan an zawn haw ta hnûp hnûp a. 

Thlam an va thlen chuan mak an lo ti nasa mai. A then phei chuan sakhi an la hmu ngai lo lehnghal. Sakhi sa chu phur takin an chan ta a. Zara khan a siam dan a lo thiam hlauh lehnghal. Tukthuan pawh an ei tlai phah ta deuh a, mahse, an puar ngei mai. Zanriah tur lah an rèp dul mai bawk si. Eng emaw ti zawng tak chuan a nuam phian. Lo neitute an lo kal ang em tih erawh an ngaicháng ru reng a. Thlam bul hnaiah chuan buhpawl phahin a then an mu a, a then an insu bawk a. Chawhnu her thleng pawha loneitu te hmel hmuh tur awm ta si lo chu an ngui ta deuh a. Beidawn erawh an tum lo. 

Zanriah tur an rèl leh tan ta a. Buhfai erawh a tam lutuk tawh lo. Sa a awm tho alawm. Ateii leh Hruaii inthiar zo chu hlauhlawpin an lo kir a, an thaw hlawi hlawi mai.

"Saw ti laiah sawn pa tetaktè, ke pakhat chauh nei a lo sawt euh euh a, Hruaii hi ka ko a, a hre thei si lo, ka va vawm ta a. A rawn phei a, chu pa chu a la sawt euh euh reng mai. Kan hlau lutuk a, kan rawn tlan nghal" Ateii chuan hah hmel zetin a ti hlawi hlawi a. 

"Pheichham a nih chu" tih pahin Tluanga a tlan phei nghal. Mipa dangin an umzui ve nghal bawk. Mahse, an va hmu zo ta hlek lo. A hnua a nih phung an han sawi chuan, Ateii te chuan an ui hnuhnawh kher mai. An duhthusam an hmu maithei asin le. 

Zanriah chu puar èl èuhin an ei leh ta phawt. An taksa pawn ngai a rawn awh chho tan a. Tlan leh dawn pawhnise, an chak ve leh deuh tawh ang chu. 

Mizoram sipai te pawn theihtawp an chhuah ve zel a. Hel ho camp kha an va pawh ta hlawl a. Ni 2 lai an thang nghe nghe. Hel ho tlem azawng an lo awm a. Eng sawi set set lo vin Sipai te chuan an kap pawp pawp mai. Hah nen, chauh nen, thinrim bawk, an demawm miah loh. An zinga mizo tawng thiam ve ber chu thu an han zawt ta a. An tlambo thu leh zawng tura an mi leh sa tam zawk an chhuah thu te chu a han sawi a. An hotupa erawh Bangladesh khawi hmunah emaw a kal thu te nen. Sipaiho thin chu a rim kher mai. Mahse, zirlai ho tlanchhuak chu an lawm tho bawk a. Mahse, an thi nge dam tih an hre si lo. Zawn hmuh a hautak hle dawnin an hria a. Tunah phei chuan hel ho kutah an awm leh tawh maithei. Rang takin sawrkar an be pawp nghal a. Sawrkar pawn thuchhuah siamin a zawng turin thu a han pe leh nghal rap a. Mi bo chhungte pawh chanchin hrilh an ni a. An thih thu èm a la nih loh vangin an thaw huai ang chu. Mahse, ramsa kawlh leh hel ho in an pel reng si a, damin an hmu leh ang em tih chu an zawhna chhan theih loh a ni leh ta. Tlabung leh a chhehvel khua te pawn an thahnem ngaihnain zawn beihpui an lo thlak bawk a. An fakawm takzet a ni. Hel h camp awmna kha Mizoram chhung a nih tawh loh vangin, Bangladesh sawrkar leh Mizoram sawrkar inbiain, Bangladesh lam pawhin theihtawp an chhuah tur thu an lo sawi ve a. An ram chhunga hel pawl pakhat thiltih mahnise, an thurualpui lem lo a niang. Zirlai naupang 20 chuang rukbo an nih thu chu thup sen ni hek lo, ram dang te pawn lo hriain, a lar ta viau mai. An larin ngaihven an hlawh em em tih hre lèk lo vin naupangho lah an lo buai ve em em bawk a… 

Zan hun chu a lo thleng leh ta chu a nia. Hmeichhia an laitat leh a. 

Ralkhatah chingpirinu a hrám dût dût a. Kátchát te pawh an kât noh noh mai. Arsi leh thla te chu chhum dum chhah tak chuan a rawn hliah a, khawpui a ri dur dur mai. Ruah a sur dawn tih chu a lang reng. A pawi lo e. Tawmhulna an nei tawh alawm. Ruah chu a rawn baw tan a, thlam chung chu a phui tha viau mai. Ruah sur thawm chuan an mut a tichhuak a, an muhil burh burh mai. Ateii leh Zothana erawh insi chat chungin an meng kar thung. An ngaihtuahna ve ve chu an kawm a ni mahna. 

"Kha chu ka ei chak lo. " Sarah chu a rawn tangvai a, Intiam rual ang maiin Atei leh Zothana chu an khi sak. Inhal viau anga lang siin an lo inhnaih leh hle thin. Ateii hian Zothana chu a hrechiang tawh a, a ringngam ber tlat. Mahse, a lo intiam tawhna bawh pelh erawh a hlau ve khawp. A inveng ve hram hram a ni ber. Chhunah khan Julie nen an inbual dun a, Zothana hnung a nawhsak lai te kha thinrim teuhin a lo thlir a nih kha. Engvanga thinrim ve ngawt nge anih tih a inhre thiam lo. Mut dawnah lah khan, "Zothana leh Sangtea inkarah ka mu ang kei chu" Julie'in a tih rual khan, "Ka tho sek zel a, ka zun chhuak hi. Kawngka hnaihah ka mu zawk mai ang" a lo ti vat anihnkha. Kawngka depah Zothana a mu miau si a!  Julie hian an bo hma khan a ngaizawng tawh tih an hre fur a, mahse, Zothana hian a hawi lo èm a. Bialpa a nei zui ta tih pawh an hria. Mahse, hetia an han bo takah chuan Zothana chetla vel avang chu ni fa hmiang, mitmei a hmuh leh ta zeuh zeuh a. Tin, invenhimna leh innghahna a mamawh tih a hai lo bawk. Ateii hian a chet khalh zar zar thung. Ateii thinrim hmachhawn a duh loh vang chauha ngampa lo mai pawh a ni. Ateii hian Zothana a ngaizawng angin an hre thûm tawh. Mahse, a tu amah chuan an sawi ngai lem lo. 

"Ka zun a chhuak leh tawh" a ti sap a. Ruah a baw tlawrh tlawrh si. A tho, Zothana tho ve tur chu a nam mu a. "Kawngka bulah hian ka zung mai ang. Lo maimichhing mai rawh" a ti a. Kawngka chu a nam tawlh a, ruah chuan a rawn theh thawt. A vawt sûk nghal mai. Rem leh rem lo vin a zung ta a. Pawnlam a melh duh lo lui tlat thung. A zung zo, a kekawrte pawh a pawh chhoh hmain thlam leikaah chuan eng emawni a rawn tla tawk a. Thing bung a ni maithei. A phu zawk a, kawngka pawh khar hman lo vin Zothana del zawng takin a tlu ta a. Ani Zothana lo inveng ve chuan Ateii Point tak a lo vuan chat!  Mahse, rei hamhaih lo vin amah chuan kawngka chu a va khar ta vat a. Ateii lo inha tha sawt sawt chu a hmu lo der ve mai. 

An lung chu a phu dat dat a, an mut a chhuak miah lo bawk. Titi chi a ni lo va, ngawi reng chuan an mu leh ta ngawt ngawt a. Zothana khawihna lai kha a zuk dap a, a zak takzet. Zothana lahin a thil khawih kha a ngaihtuah let a, a zauthau titih ringawt lehnghal. Thil dang ngaihtuah an tum paw'n an thei lo a chha chu a ni. Intiam rual ang hrimin an inmelh ta chawt a. Mipa ta na ná ná chuan chet a la ta nge nge a. Rei tak fawh tawh loh a hmuia rawn fawptu chu tu nge anih chiang takin a hria, a chhungrila a beisei, amahin a tih ngam si loh lo thleng thut chu dan tum angin lang mah se; a tum tak tak lo tih hrethiamtu chuan a rawn nawr na sauh a. A maimichhing a, a lo fawp let ve ta hiam hiam zawk a. An bul maiah Sangtea a mu tih hre mah se, ruah thawm a nat em vang leh a mutui viau nia an hriat vangin an vengthawng tehchiam lo. A hnute a rawn khawih rual chuan a za chuai mai. A hmur te chu a hrual ner ner a. A lo chhing diar diar thung. Zothana tukhum samah a tham nget nget a, a lo insiamrem ve zel bawk. Hnuailam a zen rual chuan a thil tawn rapthlak tak kha a hre chhuak zawk a. Mahse, kir leh turin a chak tawh tlat lo, a bula mipa hîpna chak lutuk avang chuan a tuiral a ni ber mai. A kap a rawn zen lai chuan a lo îp chawih a, Zothana kut chu laksawn a tum a, a tang to mai si. A chhung a zen luh takah chuan a sawt tawh chuang lo tih hriaiin a dawh ta hle hle a. Zothana chuan a kut chu rawn lain a kap chu a zentir ve a. A mipatna khauh tung chu a lo sa ham ham mai, dimtein a thiam aang tawkin a khal ve a, a zei hlawl lo. Zothana pawh a zei tehchiam bik lo. An inhîptawnna chu a nasa lutuk a, an khur der der hial. Zothana chu a thu chhuak a, Ateii chu pawmin kawngka depah zawk chuan a muttir a, amah chu Sangtea bula mu in, Ateii chu a fawp leh tâwn tâwn a, chutah saisirtirin, A hnunglam atangin rem lo chung, rem thlup tho siin hmangaihna chu a chenpui ta a ni. Thlam chu a insawi èm lo vang chu. Nawr nat duh teh mahse, thawm an chhuah ang tih a hlau ve tho si, a changin a han chawl vang vang a, ruah erawh duhthusamin a la sur tam. Ateii hnute khal chungin chet a la sauh sauh a. A taksa nal hen chu a zut kual pah reng bawk. An chet sek vangin Sangtea chu a harh mahna. Zingah erawh Ateii chu a mutna pangngaiah a lo mu diam tawh. An lungawi thawkhat a niang. Thawh an hai hial kha.. 

"Vawiin chu tu emaw tal zawng an lo kal tawh èm ang chu" Lta chuan a ti a. An beisei theuh mai. Tukthuan an ei kham chauh tihin thawm a rawn awm ta a. Putar lam, kamiz var da zet, bal angreng haa puan uk veng hi a rawn lang hlawl mai. An thaw huai hlawm a. Thlamuan hmel zetin thlam lam chu a rawn pan chhat chhat a. Zuitu a nei lo. 

Thlam a rawn thleng chu a makti meng phar a hmuhnawm ngei mai. Mahse, Zothana chuan nelawm thei ang berin a lo dawngsawng a. Mizo tawng chu a hriatthiam loh hmel kher mai. Johny-an a vawi tawng thiam chhunin a han be ve leh, thumal thenkhat chu a hrethiam ve ni ngei tur a ni. A bu nghat nghat a. Kawng an bo thu te, hawn an duh thu te an hrilh a. Hel ho in an man thu erawh sawi chi-ah an ngai lo. A hlauhlawp hmel te pawh zawi zawiin a reh chho a. Zaizirin eng emaw chu a sawi ve a, a rak niah niah bawk. Chawhmeh eng ilo vai tura lo kal a ni a, an zawnpui vek a, a lawm hmel khawp mai. Tichuan, chawhnu herah putara chu an zui hawng ta thliai thliai a. Eng tak tawng ang maw. 

Thui fe an kal hnuah di in chhete te 10 chuang hret tur awmna chu an thleng ta a. Naupang bal ung zet zet, dul kiar ling leng 6 vel awm hi an lo infiam ve zawr zawr a. Mahse, an rawn hmuh takah chuan rak nuai nuai chungin an bo nghal diak!  An hlau a niang chu. An in chhete atang chuan puitlingho chu an rawn dak far a, putara chuan an tawngin thil a sawi zuap zuap bawk. Engmah an sawi an hre thiam ve der si lo. Mihrinng dang hmel an hmu chu an lawm ve em em tawp, beiseina an neih len phah em a sin. Putara in chu in tawp berah a fal deuh nalh hian a lo awm a. A lian fahran lo hle. An inzui lut ta dam dam a. A chhung chu a rimtui chiah lo naa a dai nuam khawp mai. 

Tui te chu ten deuh tho mah se, in tur dang awm hek lo, an han in thlan dai a. Johny chuan putara chu biak a han tum leh ta a. Zaizir nen a beih fe pawn a hrethiam si lo. 

"Keimahni mizo, hrethiam em? " a han ti ngawt a. Mizo pawh an la hre ngai lo a ni mahna. A hawi â hû ringawt. Tlabung hming te a han sawi sasawi a. A bo telh telh emaw tih tur a ni. 

"Nunsury i hre ngai em? " Mami chuan a lo ti nulh a. Putara chu a rawn hawi zawk. Nunsury chu a hre ve a ni teh chèk ang chu, a bu ta nghut a. Mahse, chu rinngawt chuan awmzia a nei der si lo. A ei rawngbawl chu an han pui sasawi a. Eng hnah hnah emaw ni te chu a chhum kawi hluah a, an ril lah a tam tawh angreng si. Zanriah chu engtin tin emaw an tlingtla ve thei ta mai a. Zanriah ei khamah putara kawtah chuan an lo pung khawm tan ta a. Ani ni erawh putara chhuatah pher phahin an thu far a. Putara chu a va chhuak a, eng eng emaw an va sawi khawm aniang, rei vak lo ah a rawn lut ve leh mai a. Putar sual tak ni chuan a lang lem lo. 

"Ka pu, Radio i nei em? Radio" Zothana chuan a ti ta hlut a. "Radio" a lo ti ve sup a. An lo bu nghut nghut a. Bang kila Radio tawng tawl tawh chu a kawk a. Puia chuan a va ban vat, a han enkual a, a chhiatna a rei tawh tih hriat takin a hlui bám tawh mai. A chhe lai hriat theih pawh a ni lo va, a part a kim tawh lo hle bawk. A beidawnthlak angreng. Engpawhnise, zaninah chuan riah ve phawta a tuka khaw mi te zinga a vengva deuh zawn chhuaha tanpuina zawn chu an tum ta a. 

Putara chu a va chhuak leh zawk a. A rawn luh leh chuan belpui khap 5 vel tur hi a rawn chawi lut tawrh tawrh a. An bulah chuan a nghat a. Amah pawh a thu ve nghal a. Mau thei lo awmsa chuan bel chhung ami chu a thal a, a in ta khalh khalh a. Mau thei chuan a thal leh a, amah hnaih bertu Johny chu a pe ve a. "Johny, in suh. Dawi an hmang thei" Hruaii chuan a lo ti vat a. Johny pawh a lu a lo thing ve mai a. A rawn hnawn tlat bawk si. 

An han en chiang a, zu fáng a lo nia! An chhawl a hal ve tho bawk nen, mipa ho chuan thei khat theuh awm vel chu an in ta a. Tui an ti ngei mai. Hmeichheho pawh chuan a ruih theih loh tih changchawiin an rawn in ve ta liam liam a. Zu fáng chu a zawh thlengin an birh ta tlut tlut hlawm mai. Putara chhuah lai pawh an lo hre lo va, an han hawi chhuaha an han titi chuan a lo awm tawh lo va. Ngaihthat lohna pawh an nei lem lo. 

"Zothan, kei chu ka rui tlat. Ka awm dan hi ka hrethiam lo. Ka ni chuai mai" Ateii chuan pangchang aw deuh hian a ti ngher ngher a. Nizan lama khatiang thil kha a thlen tawh miau avangin an awm dun deuh chawt a, kawngah pawh an inchhawm chawt tawh a ni. 

"Ka ni ve tho. Keipawh. Zu fâng  a ruih theih mi le? " a lo ti ve a. Mi dang ho pawh an meng dava tan a, an su dual dual mai. Hruaii lah kil khatah a lo nui tlek tlek a, eng nge a nuih lah hriat va ni suh. Rema leh Sarah lah an lo inhau bawk. Mami leh Sama erawh an inkuah rial a. An awm dan chu an hrethiam chiah lo naa hlauhthawnna an nei lem lo. Zufáng chu an rui ve ni maiah an ngai aniang. 

An hriat loh karin an lo muhil a ni ngei ang. Thawm bengchheng angreng tak chuan a rawn kaiharh a. An han men nák chuan, Khaw mi puitling ho chuan an lo hual thap mai!  An hmel ung leh chenbeh tak, balh hmel zet chuan an rawn melh run hlawm a. Hmeichhia erawh an tel ve lo. Inbeng kan tumin an han insangmar a, a tu amah chu an che thei der lo. An rilru erawh a fim kar tawh thung. Eng emaw tak chu tih an tum a ni. Dan duh teh mah se, an che thei tlat si lo. Chutah an zawn chhuak a, kawt zau laiah chuan a bialin an mut thap mai. A ngaihna reng an hre lo. An melh phak tawk chu an melh hrek hrek ringawt. 

An puithiam niawm tak, kawr fual èng tak zet ha leh a hnungzuitu mi pahnih te chuan khawnvar kengin an rawn kal hual a. Eng thu emaw ni a chhampual bawk a. An meipui chheh vûm thûrah chuan vaivut niawm tak hi a vawm lut zauh zauh bawk a, van lam hawiin a ban a phar kak huang a, ring zetin thumal maksak zet hi a lam a. Ngaihbel tur tingin tek a rawn tla chuai mai nia!  Chemtè hriam hmel zet chu a hnungzuitu pakhat zawk chuan lek chhuakin, Zothana te ho chu a melh kual a, puithiam chuan a thi awrh lai chu phelhin maimichhing chungin thu a chham leh a, a thi chu a vawr ta vak a. Mami chungah a tla ta tlat! Pungkhawmho chu rapthlak zetin an au dur dur a. Chang an lo tum bawk. Mami chuan a hlau kher mai. 

Mami chu rawn panin an pawm tho nawlh a, meipui bula thing an phunah chuan an phuar bet a, Thil tuiril hnáng thliar thluar hian a chhipah an leih a. A mamgang takzet a ni. Sama chu thawh a tum a, a che thei si lo. A bialnu chhan ngai em em, mangang taka rawn melhtu chu che thei ngat nise zawng a va chhan em em ang mawle.. 

Thawm maksak tak a lo awm ta a. Ramsa ngur thawm ang deuh hi a ni. Puithiam leh a thiante chu an kalsawn a, mami chauh chu a awm ta. A tal aih aih a, tah pawh a tap thei lo, "Sam.. Min pui rawh" a rawn ti leh thin a. A va manganthlak tak em.. Engthil teh hrep nge a chungah sawn tih an tum ang le.. 

"Zothan, insangmar rawh. Mipa i nih kha. Kha chen min hruai tawh, mami saw chhan rawh. Pui rawh. " Ateii chu a au ta lauh lauh mai. Zothana chuan chet a tum a, a zawi em em si. Ateii chuan mipa dangte pawh chu a au phur zel a, hmeichhe dangte pawh chuan an lo zamw ve tliar tliar a, Sama chuan a bialnu mangang hmel thlir chungin a sai ngar ngar a, a tho thei ta. Mahse, chutihrual chuan mami dinna atanga hlam 20 vel awmah chuan chinghne lian zet hi a rawn ding ta ruah mai le.. Khaw mi te erawh an ngawi thap tawh. Mami chu keipui tan an hlan nge chaw chahah an hmang zawk?  Chu chinghnia lah chu a hrawl zet mai! Sum 6 vel zet tur chu a ni. A saseh tur chu a rawn pan ta chhat chhat mai. An mangang tawh takzet, Sama chu thei leh thei lo vin a ding a, hmanrua a melh a, a hmu mai si lo. Zothana leh mi dang pawh chu an rawn thu chhuak thei tan a. Insanmar erawh a la ngai khawp mai. 

Muangchan chi a ni tawh lo tih hriain Zothana chuan vak titihin putara in chu a pan a. Mipui ho chuan an lo dang miah lo. An ngawi dûk ringawt mai a ni. Silai kha a zawng a,  a hmu mai si lo, a chemte chu sit viau mah se, hmanraw dang awm hek lo, chemte hum chung chuan a chhuak leh a. Johny leh Sama chuan Mami phuarna chu an lo phelh mek a, Sangtea'n thingfak hum chungin chinghnia a lo pan mek bawk. Tluanga leh Lta te chuan hmeichhe dangho chu an lo tung tho hlawm a, "Puia, Rema nen khan hmanrua va dap ve ru.. Vatin" Zothana chuan a ti tuar a. 

Chinghnia chu a ding chawt a. Ring zetin a û ta ruah ruah mai. Rapawm tham khawpin a aw a lian. Chutah an piah ngaw atang chuan chinghne lian zet zet 10 chuang zet tur hi an rawn lang ta phak phak mai. Khaw mi te chu an rak ta nuai nuai a, Puithiam thuihruai pakhat zawk chuan Tluanga chu thingbung niawm takin a rawn hlap pawp mai. An phek buai zo ta, chinghne laka inven ngai bawk, khaw miho lakah inven ngai bawk. A hahthlak kher mai. Khaw mi tar chak lo deuh tur chu an insaseng sap sap a. Thalai deuh ho nen chuan an inep ta ran mai. 

"Kan beih let a ngai. Intipachang rawh u. Kan hneh em em ang" Zothana chuan a ti a. Hmeichhia pawh thih leh thih tiin an hmanraw hmuh theih amg ang chu an chuh ve rap rap mai. Mami pawh an phelh fel thei ta a. Chinghne ho lah chuan an rawn thlir thap. Chet rawn la chiah se, an chanin maian chan pawh a tluk kher awm lo ve. 

Thingfak a rawn thlawk phei fur fur a, lung lian lutuk lo nen. Johny leh Puia chu an tlu hnawk a, an thinrim ta. "Eheee.. Zanwgho chu, mai mai che u chuan" ti chungin an pan ta chher chher mai. Khawtual mi te chu an mitmengah an dawih ru tlat tih an hre tawh a, thih hlau miah lo vin an bawh ve ta rap rap a ni. An inphek sual ta a ni ber. Thenkhat an thum awk awk a, na tuar te thawm pawh hriattur a awm. Hmeichheho pawh chuan zam hlek lovin an hmachhawn ve hmiah a, an ha an hmang tangkai thung. Zufáng hnathawh kha a reh chho ta bawk a, an tha a za zek zek emaw tih turin an beihte thisen lum chuan a rawn tichak thar a. Zothana pawh chuan a chemte chu a hmang hreh ta bik lo. Chinghne lam erawh a mitmei ru pah reng tho. A tawpa tawpah khawtual mi zawk chu an tlu ta phung a, tlu ve lo ho zawng chu hlauhlawpin an tlan chhe ta a. An tam zawk naa an huaisen tlat lo a ni. Eng emaw tak chuan a thunun a ni. 

"Ate.. Bawk rawh" a ti tuar a, a va dawk nghal zawk bawk. Chinghne hrawl takin Ateii a zuan tur chu a va bawh thlu ta rawp a. Chinghne rawn thawh leh hmain a theihtawpa nain a chemte chuan a vit ta hrawih a!  A thi mai lo. Chutih a hnèkin chinghne dang chuan an rawn pan ve nghal, kawng dang an nei lo tih hriain, "Tlanchhe ru" a ti tuar a. Ateii chu a kai tho lawk a, chak mangkhenin a tlanpui ta a. In lo awm Putara inah chuan a tlan luhpui a, mi dang pawh chu an rawn tlanlut ve phak phak a. A hnuhnung bera rawn tlan, a tukhum an hlapsak vanga tlan tha hleithei lo Puia chu an rawn zuan thlu hman tlat!  Mahse, mizo an nih kha mawle.. Mipa ho zawng chu an zuang chhuak nghal a, Puia chu an va pawt ve a. An inchuh titih a ni ber. Mihring zawk na na na chu an zah deuh nge an thlah ta a. Ngur chhur chhur chungin an kirsan ta a ni. 

He khua khua ti ila in 10 emaw lek awmna, mihring pawh 50 erh awrh chauh awmnaah hian eng thil chiah nge maw thleng le.. Khang chinghnia te ei tur khan Mami kha an hlan a ni thei ang em?  Tawng inhrethiam tawn bawk si lo chu engmah an hrethiam lo. 

Chung zawng aia rapthlak leh mak zawk chu a lo thleng leh ta. Puia chu a hliaam na viau mai a, a tukhuma an hlapna chu a thi zur zur mai. Mi dang pawh an han indap chuan hliam an nei vek mai. Zothana phei chuan a nak chu na a tiru viau a, a sawi duh lem lo. A rukin a zuk keu a, a lo thi pur mai a. Puithiam hnungzuitu khan a vit hman tih a hria. Mahse, a chet leh hmain a awmah a vit ve ta thawih kha a nia. A thi nge a dam a hre bik lo. Sama pawh a ban dinglam chu a tiche ngam mang tawh lo va, Tluanga lah a malpui a kak duai bawk. Hmeichhe lamah Ateii chal a kak a, Dami ban vei lam a pelh bawk. Mi dang chuan chetpui ngam awm loh khawp hliam nasa erawh an nei lo aniang. Puia chu a thaw hrawk hrawk a. An han en kual nak chuan, a dar dinglamah chinghne hahnu chu a lo lang kulh mai. A malpui pawh a thi hnu mai. 

Putara ber lah khaw nge a awm hriat va ni suh, a in chu an dap rawk rawk a, meipui an chhep hluah bawk. Ramhmul damdawi eng emaw a kawl tak mialin tiin an han zawng a. Hmuh an nei si lo. Puia chuan tui a lam sek a, tui chu a in sek ringawt mai a ni. 

"Enteh u, Puia hi a mak lutuk" Dami chuan a ti chul a. An kil thap. Puia hmel lan dan chu a danglam tial tial a, a insiamchhe bawih bawih ni berin a lang. Hmeichheho phei chuan an en ngam tawh lo. 

"Puia, hei, thianpa, i dam dawn alawm. Tikhan awm suh" Zothana chuan a ti a. Râp ru ve hle mah se, a lu chu a chawi kang a. 

"Thiante u, dam takin Mizoram chu thleng ngei ang che u" thei leh thei lo hian a ti a. A meng var vek a, a then thu bawk, mak danglam takin a ha chu a rawn thang a, a taksa pawh a mar tual tual a, a kut tin pawh a rawn thang thut bawk, a kawr hak lai chu a pawt tet kâwk a, a taksa chu a rang tial buaih mai. Chutah a invawrh thut a, thlanglam tukverh inkhar phui tlat chu a tâwn kaw hawk a. Kawmthlangah chuan a ri thla ta dup mai. Chutih lai tak chuang chinghne rual an rawn û luah luah a. Boruak chu a uap nghal churh. An zavai mai chuan an khur der der a, Seni chu a khawng titih bawk. Tumah an tawng thei lo. Sawi tur pawh an hre hek lo. An hliam leh nâ pawh an hrechang tawh lo. Bang kil lamah an inhawr khawm a. Chinghne û ruah ruah lah a rawn hnai tial tial mai si. Ateii kut chu nghet takin a hum tlat a, rilru fim put hram hram a tum.. A rilruin a tawngtai bawk. 

"Thiante u, tawngtai rawh u" a ti a. Ri lo vin an tawngtai vek ngei ang. Chinghniain in chu an hual tih a hriat, an thaw ri leh an ngur thawm atang chuan. Mutthilh ngam chi a ni lo. Tukverh lah a kaw huau si. Mahse, a sang deuh a, an rawn zuang lut thei lo turah ngai ang. Kawngka chu Johny chuan a va en dik leh a. Pher chungah chuan khua an nghak tlaivar ta a ni. 

Khua a rawn en chuan an chechang tan a. Chinghne ho pawh an thawm a reh ta. Hlauhnain an thauah a la man deuh a, an la ti hru mai. Zothana thawh kan tum chu a thu leh hnawk. Ateii chuan a lo dawm vat a. Zothana ner sawk chu a hmuh hmaih loh, a taksa a han en kual chuan a kawr dinglam chu a hnawng chap a. A han keu a, a nak chu a lo thi buai mai a. Thlaphang takin a melh a, engmah sawi lo turin a lo mitmei thung. Ateii chuan a bag a hai rak rak a. A puan bah thler hnu tawh chu la chhhuakin a ruk thei ang berin Zothana nak chu a tuam ta a. Thisen a chhuah reng chuan a chau vat dawn tih a hria, a mangang tan ta hle. Kawngka chu a ri rak a, putara kha a lo lut ta chhut chhut a. A hmelah chuan a hlauthawng tih a lang reng mai. Tunah chuan an mamawh rih vangin engtinmah an ti lo. 

An hliam te chu an kawhhmuh a, damdawi ngaihtuahsak turin eng tin tin emaw an ti thei ta hram a. A bungbel. Dahna chu a va hai rak rak a, hnahthiala tuam hi a rawn la chhuak a, a han phelh a, lei nawi ang deuh, dum vek si dip zet hi a lo awm a. Chu chu la in tui tlem a pawlh a, a rawt diak a. An hliamah chuan a hnawihsak ta a. Ateii pawh chuan va la ve in, Zothana nakah chuan a hnawih a, chhah deuhin a bel bawk a. A tuam hnan leh ta thlap a. Engtin nge chet an lak dawn tih chu an hre lo. Zan khat lek pawh he lai hmuna riah chu an zuam meuh lo a ni. Khaw mi te lah khan an beihrawn leh lo vang tih a hriat si loh. Hnam mawl chi khat an nih chu an ring bur tawh. An chet dan, an awm dan chu engmah an hrethiam lo. Mami kha engvanga phuarbet nge an nih tih te, zufang khan engvanga hrai rui nge an nih tih leh Puia kha chinghniaah engtin nge a chan theih tih chu an zawhna kumkhua tur a ni reng tawh dawn a ni. A chhan chu chhansak tu tur an hmu miau si lo va. Zaizir ringawt chuan engmah hriat theih ni nghal lo chuan… 

Tukthuan chu putara pawh zah lem lo vin an inbawl ve hmiah. Chaw a awm chuan a tawk mai. Tlem tal an ei loh chuan an chau hma dawn si. Fehrehsan awm velah chuan putara buhfai an ah theih tawka tam chu akin, a bel leh a chempui chu an laksak a. A in chu an chhuahsan leh ta. 

Pawn an han chhuak chiah chu a thang nghur mai. Eng sa them nge tih pawh hriat loh a lo darh nuaih a. A reh dûk thung. An kal lai pawh chuan tumah rawn dikdak an awm hauh lo. Khaw dawihzep tak zawng an ni e. A lehlam zawng chuan an khawngaihthlak phian. 

Khawi lam kawng nge an zawh leh tak ang tih chu an han sawiho liam liam a. An kalsan tak leilet lama leh leh ngawt chu thil tihchi berah an ngai chiah lo va, kawng tum thar ber lo awm, zal nuam deuhah chuan kal zel phawta a remchan dan ang zela ruahmanna siam chu an titlu ta a. Ngui nghiaiin an kal leh ta tâuh tâuh a. Kawng chu a zawl nuam viau, ni erawh a sa deuh. Chawlh pawh chawl khawmuang lo vin an kal ngat ngat a. Puia chungchang sawi chhuak hmasatu nih an hreh nge tumah chuan an sawi lo. An rilruah erawh a cham reng mai. Thin thip vung vung khawpa riltama ngaw dur khup an luh hnu chuan chawlh zai an rel ve ta a. Ngaw thelh nuam tak a ni. Kawng bul maia bung thing lian zet, a thlar pawh awm sung hnuaiah chuan riahbuk sual mai an tum ta a. Silai kha an hmuh zawh tak miau loh vangin an keng tawh lo. Zothana leh Sangtea chuan hnah an sat a, Tluanga leh Lta'n tui an chawi a, mipa dang zawng chawhmeh zawngin an chhuak. Hmeichheho chuan an awmna bul vela thing tang ro chu an lo fawm ve bawk a. Ngaw chu a dur tha bawk a,  a thim chhulh tawh mai. An han thleng khawm tan a, Buhfai an ah sa chu an bel kenah chuan an chhum ta a. Chawhmeh tur a lo váng phian a, tumbu leh changel lairil bak an hmu lo. Chaw a hmin chuan hnahah an khawrh ruak a, an chawhmeh neih ang ang chu an chhum leh ta a. Chi leh hmarcha rep thahnem tham tak Putara hnen atang khan an la tel bawk, a tui chawp ve mai ang chu maw.. Eirawngbawl chhungin mipaho chuan an thiam ang angin buk chu an lo sa ve a. An zei lo hlawm viau. Mahse, bang nei lo vin a chungah changel hnah phahin tawmhulna khawp chu an sual chhuak ve hram. Dik tak chuan chulai hmuna riah. angai chu an phur lo tlang kher mai. A hrán duh hmel ropui bawk si. Ramsa hram thawm mak tak tak an hre reng bawk a. An za lo tlang kher mai. Zanriah chu an ei ta a. An riltam ang huin an ei thei meuh lo. Tam hnem tak tak bak an ei lo tih theih. ani. A chhan pawh an hre lo. An riahbuk tualah meipui an chhep hluah a, mut zai an rel nghal ta mai. Mut hmain Zothana chuan a nák tuamna chu a phelh a, mak tak maiin a lo hil tlul mai. Na pawh a hre tawh lem lo. Mi dang te pawn an hliam an sawi tawh lem lo. An han mut takah chuan zan hmasa lam an lo tlaivar bawk nen, chhunah ni sensa hnuaiah an kal nileng bawk si, an chauhzia an hre chhuak a. An muhil ta bawrh bawrh hlawm a. Ateii pawh Zothana ban lukhamin Zothana kuah chial chungin a muhil ve ta a. 

Zing lam dar 3 velah chuan Sava thla zap ri niawm tak ri hluap hluap thawm vangin an harh a, an vai chuan an harh lo. Sama leh Rema an thuchhuak hlawl. Sama chu a ban ná avang khan a mu nghet vak lo hrim hrim a. Thla eng chuan ngaw chhung chu a rawn chhun lut raih a, èng tak erawh a ni lo. An meipui chu a lo rem duak tawh a, an va chhawm tha a. Sava thlawk ri chu a ring telh telh mai. A tawp lamah phei chuan an mutna chunga bung thing zarah a fu ni maiin an hria a. Mi dang pawh an rawn harh tan. 

An ngawi thap mai. Hlauhlawp reng renga awm chu an ning tawh, an kham takzet a ni. Chutah an mutna chunga an hnah phah chu thil eng emaw rik takin a rawn tum ni awm takin a ri dawt a, an rak tuar. Mahse, lo tla thla engmah a awm si lo. Johny insum thei tawh lo chu buk tuala meipui bulah chuan a va ding set sawt a, "Tu nge i nih a?  Eng nge i nih? Rawn chhuak la, tha takin indawr ang" a ti ta piap piap mai. Chuveleh ramsa hram thawm nge mihring awrawl tih pawh hriat hleih theih loh hi a rawn rak tuar tuar a. Nui ri awr awr ang te, tap leh na tuar thawm ang tak te a ri ta nuai nuai mai. An invuan thap a, engpawh tawk se inthlah loh tur an ti a ni. An rilruin an tawngtai mawlh mawlh bawk. 

Thla zap fuap fuap thawm chu a rawn ri leh ta a, a rawn thlawk hnai zel a, an meipui sirah chuan a rawn tum ta chhak mai le.. Johny pawh a rang arangin bukah a tlan lut nghal a. Chu ramsa mak tak, a lu mihring lu tiat vel tho, a taksa erawh kal kun kho mai chu a then thu a. A taksa rawng chu a hring lek lek ni maiin an hria. Tumah an tawng ngam tawh lo va, chet pawh an che tha ngam meuh lo. 

"He ram hi ka lalna ram a nih hi. Chhuahsan thuai rawh u" a ti thum ta chher chher mai. Ramhuai a ni tih an hrethiam ta chiah. 

"Zanin chauh chu kan lo riak anga, naktukah kan chhuahsan ang" Khur lek lek hian Zothana chuan a ti a. A nui uar uar a, a thla a zap a, hmuh phak lohah a thlawk bo ta a ni. An thaw huai a. Anmahni tina zawnga a chet loh vang chuan an lawm takzet a ni. An insangruh nasa bawk a, an chau hnâwp mai. 

"A la na em?" Ateii chuan a ti sa sa a. 

"Aih, a mak tawp, damdawi kha a tha aniang, a na tawh miah lo" A lo ti ve a. An kut chu a insuih reng a. Hmangaihna thu sawiin induatna thu sawi hliak lo mah se, thil thlen zan atang khan an inkarah inhriatthiam tawnna leh invenhim tawn duhna a awm tawh a. An mitmei hmangin thu tam tak an sawi thei bawk. 

"Kan haw hunah eng nge i tih hmasak ber ang? " Ateii chuan a ti leh a. Mi dang pawh an titi ve tho bawk a. 

"Ka hre mai lo. Nang? "

"Kei chu vawksa ka ei chák ber a, ka ei teuh ang" an nui dun hak hak a. Hlauhna in a kiansan tawh bawk a. An engthawl riau. 

"Dama ka haw ve ta lo anih pawhin ka chhungte i va tlawh chhuak hrim hrim dawn nia" 

Ateii nui lai chu a tawp chawt a. A mitmeng chu a ngui nghal vek. "Chutiang thu sawi suh. I thi dawn lo" a ti thawp sat a. A aw ah chuan thlaphanna a tel. 

"Naktukah kan kal leh dawn sia, mutthilh tum rawh" tih pahin a lu ah a rawn chul a, a chalah a fawp zauh bawk. Amah aia naupang zawk mahnise, mipa anih angin a duat thiam ve tlat. Thlamuang takin a muhil ta a. 

Anmahni zanwgtu sipai te khan an chawlhna thlam an rawn thleng ve chiah!  An va innang teuh tak em. An zawng tih hria se, an lo nghak mai tur. 

Hel ho erawh chuan zawn an bansan tawh a, an hlawhchhamna chuan a tithinur hle. An hotupa ber hmuh pawh an hreh khawp a, Sir Hruaia pawh khan a zui ve zel rih a. A chanvo pawh a dil ngam meuh tawh lo. Mahse, beisei erawh a la nei ve tho. Mizoramah haw ngawt se, amah maia a hawn chuan thil a kal dik loh a hlau ve bawk si. A dinhmun chu a khirh riau, a chantawk a phutawk reng a ni e. 

Mizo sipai te chuan ro an rel mam mam a, an hmuh hma loh chuan zawn an tum bur mai a ni. Chakma kah tur hmu se kah thal tawp tawp an chak ber. Hei hi hriaiin, Mizoramah chakma te pawh an chhuak ngam lo va, an tawmîm tlat a ni. An chakma pui hel te vangin an nunnain a tawrh phah thei tlat si a. 

Sipai ten thlam an thlen khan vanneih asiamin, Dami samtawnna leh Rini bra theihnghilh an hmu ta hlauh a. An phur kher mai. An awmna hmun chu Mizoram chhung a ni tawh lo va, anmahni pawh bo mai thei an ni tih hriain an fimkhur em em a, inbiakpawh theihin an hmanrua te an check chhen a ni. Thlamah khan riak vein a tuk lama thapui thawh an tum ve a. An vaiin mi 24 an ni. 

Zothana te pawh tukthuan an ei zawhah chu ramhuai ram chu an kalsan ve leh ta a. Mahse, zuitu neiin an inhre tlat!  An han hawi let a, tumah an hmu bawk si lo. An chhehvel thing hmun atangte chuan lo thlir rengtu leh veh rengtu awm niin an hre tlat a. An tiril a khur der der reng mai. Kawng chu a chhuk chho tan ta a. Ni a sa nasa si, an chau hle mai. Mahse, tumah an phun lem lo. Zui tlattu nei anga an inhriatna pawh ngaiah an nei zui ve mai a. Engmah thil hlauhawm an tawng chuang si lo va. Khua pawh a tlai lam a lo ni leh ta der mai. Kawng chho ulh zet an chhuah chho meuh chuan an tha a khur a, an ril a tam tawh bawk si, an kal hleithei lo achha a ni ber e. Kawng chu a zal nuam leh ta deuh a, kham tih ve theih mai an kal pelh hnu lawk chuan, huan niawm tak mau hmanga hung thap an pawh ta hlawl mai. Di in lian vak lo, pahnih a lo ding bawk a. Phur takin an pan ta sawt sawt mai. Huan hungna mau chu a mawih tawh hle a, an pal tliak tliak rawp rawp mai. In lo hnai zawkah chuan an lut a, kawngka pawh a nei lem lo. In chhunga lut hmasa ber Zothana chu a lo let vut a. "Chhuak ru" a ti tuar a. A uak tuar tuar bawk. 

A awmdan a vang chuan hmuh an chak sauh emaw tih tur. ani, an va lut ve ta hlawm a. Hlauhlawpin an lo kir leh nghal. In chhung zimteah chuan nunna nei tawh lo thlabar tih hriat taka meng kuau ruang pali lai a lo let phung mai a ni. An hnaih ber ami chu hmeichhia a ni a, a sari kaih chu a phelh nian a, a dar lehlam chu a hek hlawk bawk. Anmahni chu a rawn melh kuau mai a, rapawm tak a ni. A piah chiah ami erawh mipa naupang kum 12 awm vel a ni a, a ril a chhuak pur a, a hmai erawh chuan bang thlanglam a hawi vangin eng ang hmelpu nge an hre lo. Bang thlang lam nghengin mipa puitling hi a phar huang bawk a. A mitmu chu a uai pur a, a ni pawh a ril a chhuak pur bawk. Tukverh bula mi ve thung chu putar lam deuh a ni a, ani erawh dam lai te thut dan ang takin a thu a, bang a ngheng thung. Mahse, a ke veilam chu a malte atangin a chhum hlawm a, thisen erawh a khang tawh. 

A rimchhiatzia chu rapthlak khawp a ni. In pakhat zawkah chuan an va lut a. Hei erawh a him pial. Tumah an awm lo va, eirawngbawlna hmun ni ngeintur a ni, bungbel te a awm a. In pakhat zwk kha mutna atana an hman a ni maithei. Choka chu a te zawk a, thawmhnw chhe pui pui a inbang nghûk mai. Ruahmanna siam a ngai ta. Khua chu a thim a ni deuh mai a. Kal zel ta se, riahbuk sual chawp ngaiin ramhnuaiah an riah leh a ngai dawn. He inah hian riak ta se, heng mi te thattu hi a rawn kal leh mai ang em?  Tin, a rimchhe lutuk chu an tuar thei kher ang em?  

"Engpawhnise, kawng pakhat chu a awm. Mahse, kan ti thei ang em ka hre lo, sawng ruang te saw hlawm ila, kan hal ral mai dawn em ni ang? " Zothana chuan a ti ta a. An thaw hak hlawm mai. Ruang senghawi chu thil huphurhawm fe a ni ngei ang le. Kawng dang tha zawk hria an awm si lo. In pakhat zawkah chuan an innghat ta nge nge a. Chaw ei thei pawh an ni lo hrim. Hrim, an chaw ei chakna a bo vek tawh. 

An theih ang anga an hnar tuamin, ruang senghawi tur chuan an thawk chhuak ta a. Intipachang luiin, an khawih ta bawrh bawrh a. Hmeichhia erawh choka lamah an tawm tlat. Seni phei chu a luak hial. In atang chuan an zawn chhuak hlawm a, an lo kal tawhna lamah chhuk thlak puiin kawng fai laiah chuan an mut tlar tir a, huan hungna mau chu an lakhawm sawk sawk a. An hal ta hluah mai. Mihring taksa rimchhiatzia hi aw… 

Choka inah chuan lut khawmin in kawt maia tui khawhthlaah chuan an inbual ta hlawm a. Mahse, an hnarah a cham tawh lak lawh a, anmahni pawh rimchhe ve niin an inhre tlat tawh. An inbual hlanin Zothana leh Johny chuan an piah lawka balhla chu an va tuk a, ei chak viau lo mah se, an taksain a mamawh si. An ei lui ta hram hram a. Lo uak tawk lah an la awm tho mai. 

Mei an chhem leh teng teng a, khang mi te thattu kha mihring a nih an ring lem lo, ramsa kawlh tak kuthnu niin an hria. Zaninah a rawn kal leh ang em tih chu an zawhna ber a ni. Ruang awmna hmuna puan kawp an tel ve chu an va la a, a rimtui fahran lo hle. Vanneih thlak takin buhpawl tlem a lo awm bawk a. Mutna tur khawp chu an phah ve thei mai. Kawngka chu hruiin an phuar vek a, nghet tawk nia an hriat hnuah mut zai an rel ve ta a. 

Thawm an ngaichang pah reng a, an mut pawh a chhuak vak lo. Chutah le in lehlam atang chuan ramsa ngur thawm an hre ta thut mai. Inhrosa niawm takin a hram kuk kuk a, a rawl a lian si, sakei a nih an ring ringawt. Va fiah ngam awm. Hek suh. A mihring sa ei bang an hal ral sak tak vanga thinrim a ni ngei ang tih an  ring. 

Kawngka chu a rawn hiat tan ta. Au chhuak lo turin hmeichheho chu an inhup tlawl tlawk a, zothana chuan Ateii chu a pawm bet tlat a, Ateii khurh nasat a hriat chuan a khawngaih takzet a ni. Ramsa lah chuan rawn luh ngei a tum tih hriat takin thawm a thlah duh miah lo lehnghal.. 

"Ka va en ang e" tiin Rini chu a ding ta thut mai. A tu amai pawh chu an hamhaih a, Rini lah chelh beh hman rual lohin kawngka lam a pan ding ngar mai a… 

Next-ah chuan tawp tawh mai rawh se..