Fugitive

FUGITIVE.. (Last Chapter) 

Ziaktu: Toni Râlte

"Rini, Lalrin, kal suh" tiin Ateii chu a au tuar tuar a. Lta leh Rini hi inkawmngeih tak an ni a, Lta pawn a rang arangin a va umzui a, Rini lah a kal ngut mai si. Kawngka phuarna chu a phelh chat chat a, pawn lam thawm pawh a nasa telh telh. Rema leh Lta chuan an va chelh bet hman hram a, Rini mitmeng an hmuh chuan an tawlsawn dawrh. Engmah hre miah lo ang maiin a mitmeng chu a vai riai mai. Thununtu eng maw tak zawng a nei chiang a ni. 

"Rini, i harh em?  Hawh lo kal teh" Lta chuan râp chung chungin a kuah phei a. Hmeichheho chuan an lo bawihsawm bawk a. Kawngka chu a rawn nam ta sawk sawk mai. Sakei ni pawhin an hre tawh lo, eng ramsa emaw tak a ni ngei ang. 

"Lalpa, tumah thihtir tawh suh, khawngaihin" Hruaii chu kil khatah a lo tawngtai mawlh mawlh a. Thawm chu a nasa mah mah tawh. Pakhat mai an ni tawh lo. An inngur chhur chhur a, thinrim inhrosa an ang ber. Bang kil lamah an inhwwr khawm a, an inkuah khawm raih a. Rini erawh a la harh hleithei lo. 

Kawngka chu a ri thuai a, a rawn inhawng ta phak mai. Mei engin a chhun phak leh thla engin a rawn chhun raih hnuaiah chuan, ramsa hrawl em em mai, an la hmuh ngai reng reng loh, ngho sei zet, mitmeng sen rûm, kut leh ke tin sei em em a rawn ding ta. A hnungah a mah aia lian mah tur a rawn ding zawm zat bawk. An hawi kual hruk hruk a, an hnar an phit dut dut bawk. Tumah chuan thawm an chhuah ngam tawh lo. Seni hlau lutuk chuan zun te a cheh phung mai. Bang kil lam chu an rawn hawi ta.. Ngur chhur chhur chungin an rawn pan ta mai le.. 

Tlanchhiatna a awm lo va, chemte pahnih leh chempui pakhat chiah an kawl. Zothana leh Ateii chu nghet takin an invuan ngawt ngawt a. Zau taka an ka ang chungin an rawn bei ta. An hnaih ber Lta chu chhak lam bang den nan an hmang ta phawt, chechang tur a awm ta lo. A thi nge a dam tih hriat theih a ni lo. 

Sarah chu pakhat zawk chuan a tin hriam zet chuan a rawn ham a, pawhsawm vek tuma a lak kan lai chuan Rema chuan chempuiin a han sat nghek a. Awmzia a neih vak hmel loh, Sarah chu thlahin Rema zawk chu a man leh a, Zothana a rawn dawk zawk, ramsa chu a rawn pawm ve a. Ramsa pakhat zawk chuan a rawn beng thuai a. Chhuatah chuan Rema leh Zothana chu an tlu hnawk mai. Mi dang pawh an ri ta teng tung a. An hmanrua neih ang angin an bei ve ta a, a thim deuh vangin chet a har hle mai si. Thinrim taka inhrosa in chung ramsa te chuan an vai bawrh bawrh a, Tluanga phei chu thlang lam bang den nana hmangin kawmthlangah a tla thla dawrh mai. 

"A theih ang angin insaseng rawh u. Tlan rawh u. Vat" Zothana chu a au tuar a, Hmeichheho chu thei leh thei lo vin chhuah tumin an tlan a. Mahse, ramsa pakhat zawk chuan a tin hriam tak hmangin Seni thinhnun chu a rawn vit tlang zawk mai. A tlu hnawk a, a ka atangin thisen a rawn baw zâwih nghal. 

"Seni.. Awiii ka duh lo,Lapa" Ateii hlauhlawp chu a te ring kher mai. Chu ramsa lah chuan a rawn pan chher chher mai si. "Ate, lo kal rawh" tiin Hruaii chuan a va kai a, mahse, an tlai. Ateii chu a vawrh lawp a, a dar veilam chu a hap ta chat mai!  

"Ate" tiin Zothana chuan thei leh thei lo vin a rawn pan a. A hnunglam atangin ramsa chu a chemte chuan a vit ta thawih a. A tha tawpa vit a ni bawk a, Ateii pawh a thlauh tawp mai. Mahse, Ateii chu a che chang hauh lo. A dar chu a thi puat puat a, hmeichhe dang an lo rak chul bawk. Ramsa pakhat zawk lah chuan ngur chhur chhur chungin nunna nei tawh lo tih hriat zeta meng kuau Rema pumpui chu a hai mek a. A ril te chu phawrhin a sam vel a. Tumah chuan tina turin chakna an nei tawh lo. Johny lah a malpui dinglam a thler hawk a, a a lu atangin thisen a chhuak zur zur bawk. Sama erawh ramsain a paihna lamah a lu a tauh fuh kher a. A tlu reng ringawt. Tluanga eraeh kawmthlanga zairum kung bulah a let reng a. Sangtea erawh chu chemtum hum chungin din a lo tum ve ngar ngar bawk. 

Engkim chu a rapthlak vel vek mai. Chutah thawm danglam takn an hre zui leh ta. Chinghne rual thawm ni ngei tur, û ruah ruah chunga an lam pana lo kal thawm a ni. An beidawng famkim ta. An thi vek dawn tih chu an ngaihtuah theih awmchhun a ni. 

Mahse, chinghne rual thawm an hriat rual chuan an hawi hruk hruk a, an chhuak ta zul zul a. Pawn lamah erawh an la hmuh ngai reng reng loh, hmuh pawh an duh tawh ngai loh tur a thleng ta a ni. Chinghne rual leh chung ramsa rapthlak tak pahnihte chu an insual ta chiam mai le. An thawm chu thihna rim a nam. An insual buai lai denchhenin an theih ang angin chet an la ve a. 

Zothana chuan a nak thi puat puat chungin a thiante chu a bawihsawm a. Hruaii leh Mami chuan tap chungin an thian te chu kaihthawh an tum ve bawk a. Rini leh Julie erawh an thidang nge hliam nei lem lo vin an mu reng ringawt. 

Sarah erawh a bialpa, nunna nei tawh lo ril chhuak pura let reng chu a melh ngawih ngawih a. Tah pawh a tap thei lo. 

"Thiante u, in tha em? Tluanga aw chuan a rawn ti lauh lauh a. A la dam tih an hriat chuan an thaw huai mai. Mahse, nunna pahnih an chân leh ta si. Ateii chu a rawn che tial tial a, a bul lawka a thiantha ber nunna nei tawh lo Seni chu a va bawh a, a tap ta tlawk tlawk mai. Thihnain ro a rel a, a damchhuak bik nih pawh a inthlahrunawm lek lek. Pawn lam thawm reh ta dûk pawh an hre thei lawk lo va, a hnua chinghne û thawm an hriat takah chuan an va bih dèk dèk a. Thla eng hnuaiah chuan chinghne hrawl zet zet paruk lai chuan thu chungin an awmna lam chu an rawn thlir thap a. Tihnat tum hmel ni lo va venhim tum hmel an pu tlata hriatna an nei. An rilruah warewolf-a chang ta an thianpa Puia kha a rawn lang nghal. 

Khua a rawn var tan a. Chinghne te erawh an la thu reng. Ramsa kawlh pahnih erawh an hnawt bo nge an thi ta nge an awm tawh lo. 

Khua a rawn en takah chuan Rema leh Seni ruang chu an mut duntir rial a, thlam chhunga thawmhnaw chhe zet zet lo awmsa khan an taksa chu an khuh ve a. An hliam te chu inenkualin Lta erawh an la kaitho zo lo, a mar erawh a la phu ve. Julie leh Rini pawh an rawn harh tawh a. Ateii dar hliam chu Zothana chuan nghet zetin a tuamsak a. Ani pawh a nak hliam chu an en chiang a, a nak hliam tawh saah tak ramsa khan a hám a, a thi duh kher mai. Mahse, a thiante ai chuan a la zia zawkin a inhria a. Sangtea a zia ber. A chal ko a kak tih mai loh chu hliam dang em em a nei lo. A thiante chu a bawihsawm vat vat reng a. Tluanga pawh thei leh thei lo vin a rawn chhuak chho a. Vanneih asiamin a ban rek chiah na a ti. A tliak a ni maithei. A hmang ngam der lo. Sama te pawh rawn intiharh hlek hlekin anmahni chu an insaseng ve thei tan a. Rema leh Seni thihna chuan tupawh chu a vaw chau a ni ber. Sarah a khawngaihthlak ta ber mai. Rema nen hian kum 7 zet an inzui tawh si a. Thih ve daih duh hmel a pu a ni. 

Khua a var chian hnuah chinghneho pawh chu an kal kiang ta a. Anmahni. Vengtu an ni tih an ringhlel ta lo. Tu amah chuan riltam an sawi lo. An thu tlawk tlawk ringawt. Hmun dang pan thei chi an ni bawk si lo. 

"Engtin nge Seni leh Rema te ruang hi kan tih tak ang le? " Tluanga chuan a ti sup a. 

"Ka hre bik lo. Phum dawn pawn lei lai thei khawp kan awm si lo. Halral lah ka phal si lo"Zothana chuan a lo ti a. Nakin lawkah an rawn rimchhe dawn tih erawh an hai lo. Ruang pahnih bula hahdam taka awm chu a harsa zet mai. Sarah lahin a kalsan duh der lo va. Ateii nen ruang pahnih chu an kil chawhma thak. 

Sipai te kha insemdarh lehin mi 10 in an kalna kawng kha an rawn zawh mek a. An khaw luhna lamah erawh an kal lo hlauh. 

"Chu helicopter" Julie chu a au tuar a. Pawnah a tlanchhuak nghal. A theihtawka auin a kut a vai a, mahse, a thlawk liam leh ta mai. Zothana chuan ngaihdan thar a nei ta nghal a. Thlam kawt fai laiah chuan mei a chhem a, a khu atang chuan an rawn zawng hmu maithei asin. 

"Sarah, Ate, thil sawi nuam chu a ni lo va, mahse, Rema leh Seni te chu kan bulah an awm ve ta lo chu ania. An ruang hi engtia tih nge in duh le? " zothana chuan a ti charh charh a. Rim an nei tan tawh si a. A buaithlak tan tlat a ni. 

"Kei chu min that ve law law ru. A bulah hian ka awm duh" Sarah chuan tap hlawp hlawp chungin a ti a. Ateii erawh a ngawi reng. 

Dami chuan a zuk kuah a, "Ka hrethiam lutuk che. Mahse, i la dam a ngai alawm. Rema pawn dama haw ngei turin a duh ang che" a ti sep sep a. Ani pawh a tap ve tho. 

Zothana chu a chhuak vut a, huan chu a fang a. Thei lam bak a awm meuh lo. Rilru hrehawm takin serthlum kung nghengin a thu hnawk a. A thiante an kal zel a, chhan turin theihna a nei tam tawk si lo. Dam chakna pawh a nei taeh bik lo. Haw mah se, rilru nuam taka hun a hman leh theih a ring lo hial. Ateii a ngaihtuah a, tlemin a hahdam deuh. Eng thil nge an la hmachhawn leh zel dawn a hre lo. Amah pawh hi a thi ve maithei, Ateii zawk pawh. Ateii zawk thi tura a dah chuan na a ti em em a, a khawngaih bawk. Tuna la dam ho hi chu thih belh tawh lo se a duh takzet a ni. An kiam tam tawh hrat. 

"Zothan" a hawi let a. Ateii a lo ni. 

"A la na em? " tiin a dar hliam chu a melh zauh a. 

"Na lutuk tawh lo e.. Nangmah zawk hi i tha em? " ngaihtuah hmel takin a ti a. 

"Ate, kei chu ka beidawng tan tawh. I sawi kha a dik, ti nge hel ho kutah khan kan lo awm mai loh le.. Kan thi vek kher awm si lo va, keimah vangin nunna chân an tam ta hle mai" an piah ral tlang chu a thlir vawng vawng a. 

"Enteh, khatin ngaihtuah suh. Hel lo kutah khan la awm ila chuan kan mang vek tawh maithei asin. I thiam loh engmah a awm lo. Theihtawp i chhuah tih kan hria alawm.. " 

An ngawi dun ta reng a. A hnuah, "Eng thil nge kan la tawn zel dawn ka hre lo va, ka lo dam chhuak ta lo anih pawhin kan thiante hi chu lo damkhawchhuahpui rawh aw. A chhan chu i huaisen a, i tumruh bawk. I fuih kal reng an ngai dawn ania" 

"Sawi tawh suh ka tih kha.. I thih chuan ka dam duh bik lo" a ti ta thlawt a. Inmelh vawng vawngin an inkuah ta hle hle a. Tawngri an hriat avangin an inthen ta phawk a. 

"Zothaaaaannnnn…. Min rawn zawng hmu tawh ania" Tluanga awrawl chu a ring tha kher mai. Rang takin an va tlan a. An thil hmuh chu awih harsa an ti kher mai. Sipai thuam famkima inthuam, silai kenga lo ding thap an hmuh chuan an tlu lo chauh a ni. Engmah an sawi thei hlawm lo. Kil khata lo tap ngawih ngawih pawl an awm a, Pathian hnena lawmthu sawia lo tawngtai mawlh mawlh lah bang hek suh. 

Sipai te pawh an lawm tih an hmelah a hriat kher mai. An meikhu kha rawn hmuin beiseina nen an rawn pan vang vang a lo ni. A tawpa tawpah chuan. 

Sipai te chuan helicopter dilin hotu lian zawk te an be pawp nghal chuk chuk a. Zirlai naupang te dinhmun an han hmuh chuan an lainat kher mai. Thil chu a thleng zung zung a. Helicoper pawh a rawn thleng ta. An chhak tlang zawlah a rawn tum a. Rema leh Seni ruang erawh sipai ten an thlan tur laihsakin puithu takin an vuiliam a. Hawn ta se an rimchhe tawh tlat si a ni. Khua a thim tan dawn tawh a, an chet vat vat a ngai. Ruahmanna fel fai zawk neiin chumi zan chu chulai hmuna riah phawta a tukah in hruai chhuah an tithlu ta zawk a. Zoram lama lo hmuaktu te pawh an lo inbuatsaih tha thei zawk ang chu. Mi bo te hmuh an nih thu chuan Zoram a deng chhuak nghal a, mipui hlim thawm a ring Kher mai. 

Hel ho pawhin engtin tin emaw hmuh an nih thu chu an lo hre ve a. An hmunpui atanga koh let nghal an ni. Hruaia erawh a dinhmun a buaithlak zo ta. Hel ho a zui ve zel dawn nge?  A ramah a haw ang? Khawi emaw zawk zawk chu a thlanawm loh ve ve mai. 

Chumi zan chuan an tlan atanga a vawi khat nan sipai venna hnuaiah thinthiin an muhil ve ta. 

A tukah helicopter in a thiar ta a. An awmna hmun kha Bangladesh ram daih a lo ni tawh a, kawng an bo thui hle a ni. 

Mi bo chhungten an lo hmuak a. Thenkhat erawh an kim ta si lo. Tah leh nuihna boruak a ni ringawt. Zara kha a ramsa paihna lamah a kawchhung lamah thi a lo put nasa deuh a, mizoram leilung an rah atanga darkar hnihah a chatuan hmun a pan ve ta a ni. A la dam ho pawh an hlim chuang miah lo. An thian thi ta te avangin. 

Chakma hel avanga buaina chu a punlun zel loh nan leh thil thleng a awm leh tawh loh nan, sawrkarin theihtawpa hmalak a tum thu a puang ta bawk. 

Thla 2 lai a ral tawh hnuah pawh ngai an la awh hleithei lo va, Sarah phei chu mi pangngai a pha zo ta lo. Lta pawh a hriatna a hloh a, a biak tlak mang loh. Rina a ke a bai hlen ta bawk. Mi dang erawh an hliam lang chin chu tha taka enkawl an ni a. An dam mai. Mahse, an chhungrila hlauhna leh mawlhtu chuan a kiansan thei mawlh si lo. Zirna pawh an chawlhsan ta rih a. Sir Hruaia chungchang kha an sawi chhuah avangin zawn chhuah anih ruala hremna pek tur a ni ta bawk. Ruhro puka thil awm hriat anih rualin venhimna tha tawk tak nen luhchhuah a ni a. Mahse, rohlu lak tur a lo awm tawh lo. 

"Bawiha, Dami nen inhmuh kan tum a, nang pawh intiharh ve tan tawh teh" Sangtea chuan Zothana chu ngaihtuah hmel takin a ti sap a. A lo nui suk ringawt. Ateii nen an la inbe zui zel a. An inhmu zeuh zeuh bawk. 

A mutna tukverh atanga thla eng lo lut raih chu a dul tial tial a, chhum chu vanah a let but but bawk. Thawm erawh a reh tlawk tlawk a, chutih lai tak chuan, an kawmthlang kawr ruam atang chuan, chinghnua a û ta ruah ruah a.. A harh kawk mai. A thu chhuak hlawl a. A rilruah thil pakhat chiah a awm. "Puia" a ti sap a. 

Engthil nge an hmachhawn leh tak ang tih chu a hre hauh lo. 

The End

. 

(In duhkhawp lo hle ang tih ka ring. Mahse, short story lama ka insawrbing a ngai leh tawh tlat. Tin, hmeichhia ka ni miau a, ram chinchang ka hre vak bik lo bawk. Mipa te anga pasaltha ziah ka tum pawh ka bansan. Mipa hi an lo bawn a ni e. Ramhnuaiah na na na chuan hmeichhe laminn an nè pawh kan ek lo. Ka ngaisang hle a ni. 

Ka lawm e)