Fugitive

FUGITIVE  (3)

Ziaktu: Toni Râlte

Rang taka insaseng nghalin savawm melh pah reng chuan an thawmhnaw chu an ha sap sap a. Tumah chiái lo turin Zothana chuan a fuih pah reng bawk a, Savawm pakhat zawk chu ngik hruih chungin a rawn kal thla ta mai le.. 

"Silai kha vat in" Zothana chuan a ti sup a. Tluanga chuan rawn theh phei pahin amah pawh chuan silai pakhat zawk chu pu vein savawm chu an lo hmachhawn dawn ta. 

"Vaukamah sawn phei vek rawh u.. Thuai" Zothana a ti zo chiah tihin savawm pakhat zawk pawh chu a rawn chhuk ve nul nul a. Thawm chhuah ngam si lo vin an thiante chuan vaukam chu an pan vat vat hlawm a, Vanduaithlak takin Siamteii chuan lung a rap pial ta hlauh mai, a tlu ta thlawrh a, chutia a tluk buai lai tak chuan savawm pakhat zawk chuan a va bawh ta rawk mai le.. Silai a puak thuai, a hawk dut duh chauh, Savawmin mihring a zah lohzia chu kan hre awm e. Leh pawh tih hmain Siamteii hmai chu a ham thler ta kawk mai le.. Siamteii rak ri pawh a chuai rawih mai. Silai nena tlan pheiin savawm lu ah chuan a va hlap ta nghek a, Tluanga pawn savawm pakhat zawk chu a lo kap ve mial mial bawk. Siamteii bialpa Rina chuan a bialnu na tuar rawn chhan turin savawm chu a rawn bawh thuak a, an buai ta nuaih mai. Hnai set sawtah zothana chuan savawm chu a tin a, Rina chelh ngai bawk, mahse, an thian dangte chu an rawn thleng thla ve thuai a, an sual rawn a ni ber mai. Savawm pakhat zawk erawh Tluanga kahna kha a dinpui zo ta lo nge a let ngût a, thih erawh a la thi èm lo. 

Savawm hliam tuar chak zet chuan hliam a mual mual zawng a nei nual awm e. Mahse, a ruala an han beih takah chuan a zal ve ta hram a. An han inbengkang hlawm a, Siamteii kaihthawh tuma Rina va kun chu a rak thawt!  Nunna nei tawh lo tih hriat taka a bialnu hmai vun thler vek chu rapawm teh mah se, a kuah ta ngawih ngawih a. Khatia Siamteii a tluk lai khan hmanrua tur zawngin vaukam fai laiah Rina hi a lo vei vel mek a, a tu amah inngaihsak hman bik hek lo. Savawm lah a tuan a lo tha hrep bawk si. Nunna pakhat an chân leh ta. Siamteii ruang chu a rapawm viau naa, tumah hlau leh tih awmin an awm duh lo. Sarah chuan a puan bah pante chu va lain a hmai chu a khuh a. An tap tliar tliar hlawm mai. 

"Engvangin nge hel ho kut atang khan kan tlanchhuah kher?  Khatah khan la awm ila, Siamteii hi a la dam ang? Engvangin nge nunna hloh belh tura kan tlanchhuah? " Sehchilh nawk nawk chungin Rina chuan a rawn ti ta piap piap a. Zothana leh Tluanga bik chu a melh bawk. 

"Silai kha engvanga hmet puak vat lo nge i nih.. Zothansang, ka bialnu nunna hi a hlu a sin. Nangmah vang anih hi.. Nangmah vang" a ti leh tuar tuar a. 

"A dik, engvangin nge sawrkar lamin min zawn chhuah hun kan nghah mai loh? ' Ateii aw fiak chuan a rawn ti ve leh. 

"Rina, ka hrethiam che lawm. Ni e, Siamteii thi hi pawi ka ti takzet.. " tih bak Zothana chuan a sawi thei lo. 

"Anih chuan kir leh ang u. Tihi chuan nunna kan hloh belh zel ang. Ka pa ten min rawn zawng hmu em em ang" Ateii bawk a ni. Rina erawh a bialnu ruang bulah a thu hnawk a, a indawmkun ngawih ngawih mai. 

"Ngawi tawh rawh u. Zothana hi mawhpuh hlek suh u. Amah vanga tuna nungdama la awm kan nih hi.. Engmah thil thleng in hre lo.. " Tluanga chuan a rawn ti tuar a. A thinrim hmel hle nghe nghe. 

"Amah vangin Siamteii a thi" Ateii aw chu a chang kher mai. Tumah mi dang an tawng ve lo. 

"Ate, nang kher phei hi chuan mawhpuh suh.. Nang phei hi chuan.. " a tih mek laiin Zothana'n a rawn mitmei vat. Mahse, mi fing ta ngang chu Ateii chuan a lo man thiam nghal vek. 

"Eng nge kei chu.. Sawi rawh. Keimah vanga rukbo kan ni tih sawi i tum em ni? " a ti nghal et et a. Cho zetin a rawn din hnaih bawk a. 

"Ni lo e, Zothana phei chuan i nunna a chhan tawh a tih sawi ka tumna a nih kha" Tluanga chuan a lo ti tha ve mai a. 

"Anih chuan let ang u.. Min rawn zawn chhuah hun nghak ang u. A rei tawh lo vang" Ateii chuan a ti a. Mi dang chu a melh kual bawk a. 

"Aw le, sawi kan tum tho a, tun hi sawina hun tha tak a ni pawh aniang e. Nizana zanriah kan ei laia Zothana nen kan zuk inthiar khan thil mak tak kan hmu a ni. Kan inthiarna atanga kan rawn chhoh khan, An hotupa awmna inah khan Sir Hruaia leh mi dang pakhat kan la hmuh ngai loh kan hmu a, A tirah chuan kan lawm ru viau a, a la thih loh vang te chuan beiseina kan neih phah a. Mahse, an hotupain "Anih chuan kan that phiar anga ni mai lawm.. Naktuk atangin pakhat tetein kan that ang.. " a tih ri avang chuan kan ding chawt a. Ngaihthlak zel chaknain kan khat a, chhuanlam a vang si. Zothana hian fing takin a pum a tina der ta ringawt a, leiah chuan a tlu a, a vial ta ngawlh ngawlh a, Zothana an buaipui vel chhung chuan an thusawi tlem tlem chu kan hre thei ta a ni. 

Sir Hruaia'n "Engpawh nise, in thil tum a hlawhtling lo anih pawhin ka chanpual kha ka hmu ngei tur a ni" a tih ri leh, "Mizoram sawrkar chuan sipai a kokir a, mahse, inremna kan duh ang min siampui a tum chuang lo bawk a, heng zirlai te hian tangkaina an nei tawh lo, kan nawr nat a ngai dawn tih a lang reng a, ni khatah nunna pakhat zelin kan nawr ang. 10 an thih chuan Sawrkar a ngawi reng thei hauh lo vang" an tih ri chu kan hre thei ta a ni. Sir Hruaia chuan min rawn hmuh kan hlauh èm vangin Zothana pum na pawh a reh chawpchilh nghal a, tikhan kan dinhmun kan hriat takah chuan kawng dang kan nei ta lo a ni. 

Kan tlanchhuak lo anih chuan kan thi vek dawn.. Chuvanga hetia tlanchhuak hi kan ni" Tluanga chuan a ti dap dap mai. An CR kha a ni bawk a, tawngkam a thiam bakah a inti mitak thiam bawk a, a thusawi chuan danglamna zawng a thlen chiang khawp mai. 

"Chu chu in sawi thei lo em ni? A tirah te khan" Rina chuan a la ti tâlh a. 

"Sawina hun a la awm em ni?  Zankhuain ruahsur karah thim zingah kan tlan a, tihian kan chawl ve chauh ania" Tluanga aw chu a nelawm vak tawh bik loh. 

"Kei chu ka la awih thei lo, engtin nge Sir chuan min phatsan theih?  Sawrkar pawh chuan eng ati nge sipai a kohkir? " tap pur chungin Dami chuan a rawn ti ve a. 

"Engpawhnise, thiante u, kei chu chakma hel ho kuta thih ai chuan, rampalailenga thih ka thlang zawk. Ka kal zel dawn a. Kir in duh chuan kan dang lo vang che u. Kei erawh ka kal zel dawn" Zothana chuan inringtawk takin a rawn ti ta a. Zui duh hmel an pu vek. 

Lei laihna hmanrua an nei si lo va, Siamteii ruang chu lungin an khuh a, hmawlhin Kross an siam a, An zinga Fel leh Pathian tih ber Hruaii chuan tawngtaina tawite a hmang a. An kalsan dawn ta. Rina erawh a ngawi tlat a, a na tih an hria. An khawngaih takzet a ni. Sama leh Zothana chemte pai hmangin Savawm sa chu an chan a, an ril chu tam viau mah se, silai an kah puah avang khan umzuitute an rawn thlen mai an hlau a, savawm sa an duh ang tawk an hleh hnuin kal an siam tan ta a. 

Lui mawng lam chu an zawh thla zel a, "Tihian zawh ngat ngat ila, lui lian zawk kan zuk pawh mai ka beisei, chutah chuan min zawn chhuah theihna tur hmanrua te pawh kan hmu maithei sin. Mihring tu te emaw pawh" tia a thiante hnem chungin Zothana chuan silai pu chungin hma a hruai a. Silai pakhat zawkah khan mu 8 chiah a lo awm niin, Tluanga khan savawm kah nan a hmang zo vek!  Thih pui loh chi pawh zuk ni lo chuan. 

Dar 10 bawr vel anih a rinawm. An chau tlang tawh bawk a, lui leh lui infinna laiah chuan chawlin, tukthuan an rèl ta a. Buhfai an nei lo va, bungbel an nei hek lo. An lighter lah a alh thei lawk lo zui!  Ruahin a nan huh hnèp si a. A tawpah a alh ta hram. Mei an chhem a, an savawm sa chu an hem hmin ta a. Riltam tawngkhawng tawh nafam chuan duh loh sawi theih tawh hek loh le, hmeichheho pawh chuan an keih ve tâwn tâwn a. Thil tui lo uchuak a ni lem lo bawk a. Tam a dawm viau mai. Reivak lo an chawlh hnuin lui mawng lam bawk chu an zawh leh ta zel a. 

"Ka fapa chu a la dam ang em le?  An kal dawn zana ka mumang kha a tha lo reng a ni. Damin ka hmu leh ang em le" Pi Mawiteii chuan mittui tla chungin a ti a. Zothana farnu leh a nau pawh an inhru ve fap fap mai. Pa ber eraeh a ngawi ngul a, a hmelah chuan na a tuar ve hle tho tih a lang. 

"Kan sawrkar hian a ngaihthah èm lo vang chu.. Mama nu, insum rawh. Tawngtai tam a ngai a ni mai" a lo ti a. 

"Ti nge zawng tura i kal mai loh?  Mi dang a thiante chhungte pawh hian zawn an duh ve vek ang. Sawrkar ngaihchan kher a ngai em ni? In rawnkhawm ula, zawng mai ta che u" an pa demna awka a tel. 

"Sawrkarin a remti tlat lo atin ni.. " a lo ti chuai raih a. 

Sawrkar chu an dem em em, dem awm tak pawh a ni ve reng a. A chhan puangzar si lo va sipai an kokir ngawt kha mi tam tak ngaih dan a ni lo khawp a, mipui thinrim chu thunun hleih theih pawh a ni lo. Mahse, Sawrkar hian dem awmlohna a nei ve tlat bawk si a ni. He lai kar hre ve lo te leh hre si te boruak innâwk vel hi a hahthlak ve khawp ang le.. Pu Vanlalthanga pawh a mumal lo tawp mai. A vei sek a, a chal a dawm leh vung vung thin. Ateii u te ho leh a nu chu an meng sen râm a. An farnu leh laizawn, an duat rawn chu engtin tak awm zel ang maw.. Damin an hmu leh ang em.. Pathian chauh lo chuan chu zawhna chu an chhang thei lo vang. 

"Sir, Engkim hi puanzar mai chi a ni lo maw?  Mipui thinrim hi kan dawl zo rengin ka ring lo" Home Minister chuan a ti chuar chuar a. 

"Ni e, rilru a buai takzet a ni. Puangzar ta ila, mipui tam zawk hian indo an thlang ngei dawn, Sankhara lahin puangzar rih lo tur leh a chinfel tur thuin ngenna a rawn siam ve reng bawk si. Engpawhnise, vawiin lamah chanchin kan ngaicháng leh anga, thil dik lo emaw nunna chân an awm leh chuan anih nih ni turin sipai kan tir ang" a ti ta fak fak a. A mu tlem tih hriat takin a mit chu a sen rám a, a mit hnuailam pawh a val kulh mai. 

"Sir Hruaia kha mak ka la ti reng.. A tir phat atang khan an lo plan vek a ni awm sia" Dami chuan a rawn ti thut a. An boruak uap churh pawh a kiam deuh. 

"Nia, a fel tehreng nen. Ka ngaihtuah hian ngaihbel tura a awm lai awm pawh ka hre miah lo" Zara chuan a rawn ti ve bawk a. 

"Ngaihbel theih tur chuan puka kan awm laia Rangkachak kan hmuh chhuaha lak a hreh danah khan kei chu ka ringhlel ta deuh tlat. Thil rimchhia kha rawn awm mah se, pakhat theuh tal khan keng ila, kan chhuah theih tho ka ring" Sama chuan a rawn ti ve boh a. An sawi zui nak nak lai chuan, "Shhh.. Ngawi ru" Zothana'n a rawn tih rual chuan an ngawi thap. An ding nghal chawt bawk a. 

Tawng thawm niawm tak an hre ta. A ranga rangin vaukam hrui hmunah chuan an inzui lut ta dam dam a. Hrui hnawk kar atang chuan tawng thawm lo chhuahna lam chu an va bih a. Mi pahnih an rawn lang a, silai an pu ve ve, kawr pawl erawh an ha lo. Chakma tawngin an tawng mawlh mawlh a. Tui te chu in in an insil thlandai a. Chutih lai tak chuan kawr pawl ha mi panga an rawn chhuk ta mai!  An va innangching teuh ther ther em. 

Chakma tawngin an inbe hlawm a. Thil an zawt a ni ngei ang, an lu an thing nut nut a, an tang tlanchhuak te an hmuh loh thu an hrilh a ni ngei ang. An bihrukna chu a him ta lo riau. Rawn hawi chho se, an rawn hmu ngei ang tih tur a ni. Hrui zam hnwwk zet chu duh aiin a la hnawk tawk lo a ni. An vanneih asiamin kawr pawl ha ho chuan lui mawng lam an pan ta dial a. An thaw huai mai. Mi pahnih te pawh an insil zawhah an lo kalna lam lui peng pakhatah chuan an inzui liam leh ta a… 

"Lui mawng lam zawh zel chu a him ta lo phawt.  " Zothana chuan a ti sap a. Khua a thim lek lek tawh a, riahbuk an sual a ngai dawn a ni. Khang mi panga te bakah khan mi dang an rawn chhuk leh mai thei tiin nichina mi pahnih te lo kalna lui te peng kawrah chuan an inzui chho ta ngawt a. Kawr chu a chhengchhe angreng a, an tlu an tlu mai. Hmeichheho hi an pachang reuh ngawt mai. Dama chhuah leh ngei an tumruh ve hle tih a hriat. 

A tawpa tawpah kawr kam hmun zawl china buk ram tawh lam hi an thleng ta hlawl mai. An thaw huai hlawm a. Chu buk chu a lian lo naa engtin tin emaw an mut theih mai a rinawm. Zanriah tur pawh savawm sa an ei bang kha tlem a la awm a. An hem hmin leh a. An tam zualpui tihreh nan chang tam bik awm lovin an insem thlap a. An zia ta deuh e. 

Thla chu a eng deuh ruai a, mei pawh an chhem ngam lo. Ralkhatah chingpirinu a rawn hram dût dût a. La hre ngai lo an tam zawk vangin an phu dual mai. An phawk hrû bawk. Zothana chuan a han hrilhfiah a. An thaw huai mai. 

Mut zai an rel dawn ta. A sir lam ve veah Zothana leh Tluanga an mu a, a lai lumah hmeichheho. Rema leh Sarah bakah Mami leh Sama hi inngaizawng an ni a. Rina bialnu Siamteii erawh ramsa nunrawng kutah a thi ta si a. An ngaihtuahna kawm mawlh mawlh chungin an muhil ve ta hlawm a. 

Rim thang nghur chuan a tiharh hlawl mai. A han meng a, thla eng ruai karah chuan eng em em a hmu thei lo. Boruak chu a uap churh mai. A thu chhuak ta nge nge a. An thlang lawk kawrteah chuan amah hnungchhawn zawnga thu awmin a hmu ta tlat!  A mit a nuai a, a en nawn leh pawn a thu tho. A thiante muhil chu a chhiar den den a, an kim thap si. A hlau hran lo naa, a thiante an rawn harh a hlauh vangin thawm siam erawh a tum lo. Mutsan leh mai chi em mawni dawn tih a ngaihtuah lai chuan, thla ai ri ni ngei tur chu a rawn rak tuar tuar ta mai le.. 

"Min chhan ru.. Min pui ruu.. " a ti vawn vawn a. A aw atang chuan Siamteii aw ngei a ni. An rawn tho phawk phawk a, an harh kim ta. Thla lah chu a ai uar telh telh mai si a. Kawrte-ah thu reng pawh chu rawn ding chhuakin an lam a rawn pan ta chhat chhat mai le.. 

Thla eng ruai hnuaiah chuan an thiannu Siamteii ngei mai kha a hmai thler vek chung chuan a rawn kal ta zel a. Hmeichheho an rak, mipa ho chu an kuah chawn chawn a. 

"Siamte, duhtawk rawh. I thiante hi min tihthlabar i tum em ni?  A tawk tawh e" Zothana chu a ding chhuak a. Mipa luhlul tak anihna chuan a dawihzepna a hliah khuh a ni mahna. A hlau mang tlat lo. Siamteii chu a ding chawt a. A thiante chu a mit lehlam la tha chuan a melh kual a. Rapawm takin a nui ta uar uar mai. Hei zet chu!  Mami leh Seni chuan nikhua an hre lo zui! Rina meuh pawn a ráp takzet a ni. A duhtawka a nuih hnu chuan thlang lam panin a chhuk ta chhat chhat a. Thla ai erawh a reh ta hmak. 

"Siamteii a ni lo" Rina chuan a rawn ti ta hlawl a. 

"Ni e, a ni lo, siamteii taksa hmangin ramhuaiin min rawn rikrap anih kha. Ani chu thlamuang takin a chawl tawh e" Zothana chuan a lo ti dam diai a. Zan a la rei hmel si a, an kal zelna turah mutthilh tam chu a tha si. Mahse, tu nge muhil ngam tawh ang le.. 

Mipa pahnih chuan hmeichhe pakhat an laitat ta zel a, an indaih bawk si lo. An vaiin hmeichhia 7 leh mipa 9 chiah an ni si. Ateii pawh Zothana leh Sangtea te inkarah a inthawlh than a. A meng kar thung. Buk a te si, an insi lo thei lo va, Zothana phei chu a saisir ngat ngat mai a ni. Zing lam dar 3 vel  a niang e. Kut nem takin a rawn kuah a, a harh kâwk. Mahse, Ateii a lo ni a. Dahsawn sak a tum lem lo. A tiharh dawn si a. Inhal teh mah se, Ateii hian a tawpkhawkah chuan a bel zel roh a, tihngaihna tak pawh a hre lem lo. 

A mitthlaah Jenny nui hmel tak a rawn lang chawpchilh nghal a, tleirawl duhawm zet, vun nalh zet mai kha a ni a. An phak tawk leh ngam tawkah chuan an inhmangaihna kha an lantir ve nasa thin anih kha. Jenny chu an junior a ni a, mahse, khawi kiipah an inzui thin. An rilru a thianghlim a, chance tam tak nei mah se, sex hman duhna rilru an pu ngai lo. Jenny'in a cancer tih a hriat khan rilru dang a pu a. Zothana laka a natna thup siin Zothana chu mutpui ngei a tum tih hriat takin a thiam amg tawkin a lem kual ve thin.. Sangtea chhungte an zin hlana Sangtea rooma chance an neih tumin Zothana pawh a insum zo lo ta nge nge a, Jenny virgin a hawng ta anih kha. Jenny nen an nih hmain nuthlawi pakhat nen tum loh deuhin an chesual tawh a, mipa ta na na na chuan a hrehawm lohzia hai bik hek lo. Jenny nena chutia vanram tlafual an tem thei chu manhla a ti a, a ruk eraeh chuan Jenny chu mak a ti viau. A hma zawnga duh ngai si lo tun ataka a inhawng viau chu. Mahse, chumi hnu lawkah Jenny natna chu a hrechhuak ta a. Jenny rilru a hrethiam ta chiah. Mipa inti ve tawk tak kha a tap hial a ni. 

Jenny dinhmun a hniam zel a, a kan reng ngam bik si lo, Sangtea a tangkai thin. A thih zan ber kher khan an leng lo va. Damdawiinah an chhohpui tih a hriat rualin an han chho ve a, mahse, a dam lai hmel an han hmu hman ta lo. Rei tak chhung chu mi â angin a khawsa a. Zah a dawn zo lo va, mi sawina engahmah a ngai hek lo. Jenny thlanah a kal nitin a, Sangtea'n a zui ziah bawk. A chhungte pawn engkim an hriat ve vangin an hrethiam em em a, mitmei kawi an hmuh ngai lo. Tikhan a hmangaih ve em em chuan damchhunga inhmu leh tawh lo turin a liamsan ta kha a nia. Hmangaih dang a neih leh theih a ring tawh lo. Amah hnaihtu te pawh a chang chuan han hlimpui viau mah se, hne chin leh nin chin a nei zel a. Jenny nen a khaikhin lo thei lo bawk. Chu chuan mi dang a duh ve theihna tur pawh a hmet mit zel thin. Pathianin Jenny ang chiah kha a la pe leh èm ang chu, a pe lo anih pawhin a leng tar mai aniang chu tiin a nun chu a hmang ve tawp mai a ni.. 

A rin loh karin a lo muhil ve daih a, a harh chuan khua a lo var iarh tawh a. Mak a inti nasa, Ateii nen chuan an lo inkuah chial chu niin. A kut a lasawn rang teh e. A inbeng tho vat a, a hawi kual vel a. A thiante eraeh an la mutui angreng. Mut an hmu tha lo tih a hria a. Kaihthawh a tum lo. A tho chhuak a, a chemte chu lain, kawr chu a zawh chho a, an tukthuan tur dap a tum a ni ngei ang. 

Khatia an tlanchhuah hnu khan vengtu pahnih an hnutchhiat tak te kha che thei hek lo, zinga anmahni thlak tur ten an rawn hmuh thleng chuan an kalsan ang ang khan an awm tawp a. An thianten an han phelh fel chuan thil awm dan chu an sawi zung zung a, thinrim takin an insingsa ta hlawm a. Sir Hruaia pawh a buai pawlah a tang ve. An tlanchhuak vek chu pawi a ti angreng viau, a hlu lo sawt si a!  Rinhlelh a kai ang tih pawh a hlau deuh bawk. Mangang takin a lo tal vel ruai mai. Hmun hrang hrangah insem darh nghalin hnuhmu an zawng a, ruah a sur nasat avangin hnuhma hmuh hleihtheih pawh a ni lo. Lui rawn zawh thla te chuan savawm ruang pahnih kha an rawn hmu ta ngei a, an mi umte sulhnu ngei a ni tih an ringhlel lo. Ramvak tihhlum chu nise, chuti maiin sa ruang an kalsan lo vang, chhawl te pawn an chhin ve em em ang. Hmanhmawh taka tlansan tih hriat takin sa ruang tisa thenkhat lah a hèk huam bawk si a. Hmanhmawh zetin an um zui ta a ni. An nangching hman tep a, mi pahnih ramvak te avangin Zirlaite kha an him ta hram a nih kha. Hmeichheho leh an chauh deuh tawh vangin duh angin an kal chak thei lo miau a. Heng chakma hel te hian an hmuh rualin luhlul an chhuah vaih chuan kah thluk theihna order an hmu vek tawh bawk a, an rorum tlang hle. Thenkhat hi chuan engvanga mana hruai bo nge an nih tih pawh an hre hlawm lo, Mizoram sawrkar hnena an thil ngiat leh heng zawng zawng tihtirtu, a bul tumtu lah an hre hek lo. Thupek anih angin an tihtur an ti ve mawp mawp ringawt mai a ni. Mizo tawng thiam miah lo te pawh an awm ve tho mai. 

"Sangte, harh teh, i thianpa hi a awm miah lo ania" Ateii'n a tih rual chuan, Sangtea chu a meng kâwk a. A thu chhuak nghal zat bawk. Mi dang pawh an rawn harh ve hlawm a. Mut an kham lo tlang ngei mai. Zothana mutna lo ruak hiai chu mak an ti a, an hlauthawng bawk. Sangtea chuan Zothana chemte a zawng vat a, a hmuh tak lohah chuan, "Lungngai suh u, a lo kir leh ang" a ti a. A hmai phih turin kawr lam chu a pan thla hnang hnang a. A sawi ang ngeiin reivak loah Zothana chu tumbu thahnem tham tak khai bawr luai chungin a rawn chhuk thla boh boh a. An han chhawk ta vat. Mau chang tha tak a sah chu a tan a, mau thei chuan tumbu chu a chhum ta a. Han tihpui vak ngaihna an hre lo nge an lo thlir rneg ringawt. A nihna takah chuan Zothana hi an hotu en deuh tawp tawh a ni. Kum thuah phei chuan a naupang pawl a ni ngei ang, mahse, a pa hruai hrâtna hmang tangkaiin a ramvachal ber a ni ve miau si a. An thawmhnaw te chu a teh pheng phung avangin an neih ang ang te chuan an inthlak hlawm a. Eng chen nge an vahvaih dawn tih an hriat loh vangin a tet sa pawh an ak tho bawk a. Pheikhawk pum vek an bun hlauh chu a zia. Kelawnga kalna chi ni nghal lo chuan. 

A tumbu chhum chu a hmin ta maw tihah a sawh sawk sawk a, tumbu khaileng ho a rawh pawh a la chhuak nghal a. Changel hnahah bunin tukthuan atan an han ring leh ta phawt a. Tui zawng a tui tehchiam lo, an ei a ngai miau si a. Vanneihthlak takin Mami chuan an thei eina bang chi thak. a lo la ak hlauh a, tlemin a tizia deuh e. Eitur an pai ve ang ang lah kha pukah khan an ei zo vek si a. An thawmhnaw chhe  tete bak an ak hauh si lo. Mahse, chem leh silai an la nei tal a, kawng chu a kaw ve zel ang chu maw.. 

Hel ho ten thawm an rawn nei ta miah lo chu Sawrkar chuan mak a ti ru viau a. Sankhar chakma an zuk bia a, ani lahin tih dan kawng a hre ikhaw bawk si lo. An that ta phiar mai em ni ang tih chu a ruka an inzawhna a ni ta. Mi bo chhungte ho lah awmngaihna an hre tawh mang lo, ni 7 a liam der tawh si a. An thih leh dam an hre si lo, vui ngawt lah an phal bik si lo. A awmnem zual te chu an tap an tap ringawt mai a ni. Police lam pawh inkau viau mah se, sawrkar atangin thupek khauh zawk an dawng miau si a, chet lak mai theih a ni hrih si lo. An za sek mai. 

Zothana te chuan Kawrte hnar chu an zawh leh ta chawm mai. An kal tumna lamah hel ho an kal miau si a. Hel ho kha rawn lang lo se chuan ramvak te kha be pawpin engtin tin emaw kawng dap dan a awm tur hi a ni a. 

"Awii kha rul.. Rulllll" Sarah chuan a ti tuar a. Mahse, a tlai, a hmaa kal Julie chu a chuk hman tlat!  Julie khawngaihthlaki.. A chawnpuarah a chukna hmuamhma chu a val kulh mai. Rul lah thah hman lohin a tleng bo daih lehnghal. An han buai leh ta laih mai. Julie chu a hlauthawng bawk nen a thaw a hah titih nghal a, a chawn chu a duk chak hle lehnghal, Zothana chuan a khup chungah a tawnkhalh ta vat a, rem deuhin a muttir a, a ko harh reng bawk. Hmeichheho chu an tap faih faih mai. Ni e, an demawm loh, khawpui nula no nalh tak tak, ramhnuai nel ngai reng reng lo te tawn atan chuan an boruak hi a rit lu deuh a ni. 

"Bawiha, changel han zawng rawh. Rawn sat tawp rawh. A kung kha" Zothana chuan chemte pein Sangtea chu a tir a. Sangtea pawh a kal nghal var. Lo harhchhuak ve nghalin, an chem pakhat chu lain Rema chuan a zui ve nghal a. Mi dang erawh chuan Julie chu an buaipui a, a lu an dep hup reng a, a khawng tur chu an hmet reng bawk. Changel pu bawr lûk chungin an rawn thleng a. Rang takin changel chu a tan a, sawr theih tawk velin a tan leh a. A thel leh vek a, a tui chu Julie a intir ta a. Tui a lo pai tam vak lo lehnghal. 

"I theih tawka tam kha lem tum rawh aw" A ti sup a. Thuawih takin a lo lem a. 

Darkar chanve awm velah chuan a rawn harh ta hret hret a, rul chukna hmuamhma kha Tluanga'n a lo zai khalh diam tawh bawk a, a thi nasa khawp mai. Nakinah phei chuan thi duk dum deuh deuh a rawn chhuak ta a. Ruk tûr kha a ni ngei ang. An manganna pawh a kiam ve leh ta deuh a. Julie pawh a hma pha lo mah se, a rawn harh tha ta deuh a, chak lo chung chungin an kal leh ta phawt. Khua lah a tlai chak si. 

Khua a thim dawn ruai tawh si a, riahna tur an zawn a ngai dawn, zanriah tur ngaihtuah ngai bawk. Zothana zarah mipa dang pawh an fing ve tawh bawk a, an tihtur awm ang chu phun hlek lovin an ti sap sap zel a. Zothana tan pawh a hahdamthlak ta deuh. Lengkir sang vak lo an lawn chhuah hnu lawkah lung bang sei fe a lo awm a. Puk angreng deuhin a chung lam chu a awn duai a, riah nan a rem dawn riauin a hria a. Innghah a rawt ta a. 

Ruah pawh sur se, a rwn theh anih loh chuan lung chuan a chunglam chu a zar hneh hle a. A tha an ti khawp mai. Tluanga leh Zara ten hmeichheho an lo awmpui a, a dang zawngin zanriah tur an zawng zui ta nghal a. An vanneih asiamin Ramâr zan riak tur an nang fuh a, pahnih lai an kap hlum. Silai chu a tul feah lo chuan hman duh lo viau mah se; riltama thih mai a hlauhawm si a, bakah an kal zel dawn chuan an taksa in eitur a mamawh miau si. 

Ramâr chu an hem hmin leh ta a. Tui an ti tlang hle. An eikham chuan mei an chhep a, fimkhur erawh a ngai viau tho mai. Mahse, thla eng rinchhan ringawta mutmu tuah chu a hma zana an thil tawn avang khan an hreh ru thûm tawh a ni. Mutna chu an han siam tan a, an thawmhnaw ah thenkhat chu an sin a. A vawt lem lo bawk a, a zia phian. Hmeichhia chu a theih chinah an laitat leh thap a. Zan hmasa ang kha ni tawh lo hram se tiin an tawngtai ru mawlh mawlh mai. 

Ateii chuan a bula mu, amah aia naupang zawk, an zinga rintlak ber ni bawk si chu a ngaihtuah a. A duh vanga ngaihtuah pawh a ni bik lo. A lakah that a chhuah ngai lo va, mahse, mak deuhin a ring tlat lawi si!  A tuitla a chhar ni te kha a ngaihtuah a, a lakah khan hawihawm lo hle mah se, engmah a sawi zui lem lo va, na deuha a tawngkhum pawn a nui mai thei zel a. Mipa mak tak chu a ni a ti rilru neuh neuh a. A chhungte a ngaihtuah a, a mittui a rawn hnâm nghal. Apa mawlh khan a va ngaihtuah dawn em. A pa fanu duat kha a ni miau a. A duatsual ta reng bawk. He a mize chapo leh nasa zet hi apa atanga a chhawm erawh a ni bik lo. Vai rama college a kal tak atang chiah khan a mize duhawm zawng zawng a hloh vek a ni. Thian chu a ngaina, a thiante tan pawh kawm nuam tak a ni. Mipa tan erawh nuhrawn sual ang maiin a khauh a, a nelawm hlawl lo a ni. Mahse,  chu chu a duh dan a ni tlat. 

A thiante hnar sâk sák thawm avang chuan a harh telh telh emaw tih mai tur a ni. In leh chhen chi a ni si lo va, a pang a kham tawh hle. Chet hlek tuma a insanmar lai tak chuan, an mutna hnuaia tui chu dai tu awm ang chiahin a ri berh berh mai. A lungphu a rang ngei mai. Au chhuah chi niin a hre lo. Zothana ban puam chu a va dap a, a sik ta nghek a. A rawn phu zawk a. A muhil leh nghal. Sangtea nakah a va sik leh ngar ngar a, a rawn in let thawk a, a hnar zui leh bawrh bawrh nia. A mangang takzet. A hlau bawk si. Tui lah chu a dai pap pap reng a, a maimichhing ngam der lo. Nasa zeta Zothana a va sih leh takah chuan a rawn harh ta a. A tawng chhuah a hlauh vangin a hmui a va hup chawt!  A meng phar deuh a, mahse, mitmeiin hnuailam chu a kawhhmuh vat a. Ngawi renga an inhup hnu reiloteah tui chu a rawn dai leh ta pap pap a. Zothana pawn a hre ve tih a hria a, a ka a hupna pawh chu a thlah a. 

Zothana chuan a thiante an harh loh nan a hmuiah a kutzungchal dahin a lu a thing nar nar a, Ateiii pawh a lo bu ve nghat mai. Mi pakhat thawm mai zawng a ni ta lo, pathum vel niawm tak an ni. Kalsawn zai reng rel lo vin an riahna hnuai chu an dai berh berh reng a, Chutah, an mutna lai chu rawn pan niawm takin lung chunga lawn chho zawi zawi thawm a rawn awm leh a. Ateii hlauhlawp mangang chuan Zothana kut a va hum ta chawt a, ani pawh chuan lo hum let vein Ateii chuan a hmer ngat ngat mai. Zothana tak chuan hlauh nachang a hre vak lo. Mihring an nih a ring lo va, zawng vel an nih a ring deuh ringawt. An meichhem rem lek lek tawh chu chhemtu an awm tih hriat takin a rawn alh ta hluai a, ke pen thawm erawh an hre tawh lo. Zothana chu rem leh rem lo vin a hawi chhuak a, Mei eng bula mihring ruangam ding chu a va hmu ta mai a!  Pahnih an ni. Tu te nge a hre lo naa a hmuh hnu ang riauin a hria. An hnungchhawn tlat si a. Ateii chuan a elh ngat ngat bawk nen chet lak dan tur a hre mai lo hle. Mi dang erawh an harh lo nge harh ve tho siin thawm an nei ngam bik lo, an reh thap a. A hmaa hnar thawm te kha a reh tak dûk danah an harh ve anih a ring. 

"Kan thiante hian min phatsan chu a nih hi tiraw.. Kan ruang pawh an phum thei lo a nia" Zothana te hnaih lama ding chuan a ti ta sup a. A hrechhuak ta. 

Dawnga leh Sawma, an hmuh lai renga hel ho vin an kah hlum te kha an ni. Nuam tih lohna a nei ve ta deuh. Intihpachan a ngai nasa si. 

"Ramsa leh sava te ei zawh mai mai tura kan ruang an hnutchhiah thei kha chu an mak ve ngawt mai" Sawma chuan a rawn ti ve bawk a. Pangngai taka inbia ni mah se; lo ngaithlatu te tan chuan dawnsawn a va nuam lo em.. Mitthi tawh an ni tih lah an hre kur si. Ti nge maw an thian thi tawhte hmang hlira rikrap an nih mai le.. Chakma ho khan dawi eng emaw an hmang a ni hial ang. 

"Kan thiante an ni lo. An ni lo" tiin a rilruin a infuih mawlh mawlh a, Ateii khur nasa lutuk chu a kut dinglam chuan a chelh pah bawk a, a kut lehlam a chelh tlat bawk si. 

"Kan titi pawh hi an ngaithla kur alawm.. An harh tih ka hre vek,.. "Sawma'n a tih leh lai tak chuan, Julie hlauhlawp insangmar nasa lutuk chu a rawn puakkeh ta tuar a. A rak thawt mai. A aw-a thlabarna chu a rapawm lek lek zawk. Thawm a chhuah rualin an bo nghal. Hmuh tur pakhatmah an awm tawh lo. A mak mang e aw. Mei chu Zothana chuan a va chhawm ta hluah zawk a, mutthilh theih a inring chiah tawh lo. Siamteii ai mah khan a tirilah nuam tih lohna a nei nasa zawk. Ni e, a thiante kha an ni ve bawk a, an thi lai a en liam ringawt kha amahah nuam tih lohna a riak reng ve bawk a ni. Tihtheih a nei mawlh si lo va. 

"Mutthilh tum rawh u. Kan chau lutuk ang. An rawn kal tawh lo vang" a ti dam thlap a. 

"Ti nge kan thiante zelin min tihthaih le" Dami chuan tap tiau chungin a rawn ti a. Julie khawn pawh a reh ta deuh. Khua lah a la var mai dawn si lo. Muhil thei se an duhthusam, mahse, a harsatzia kan hrethiam in a rinawm. 

"Ate, nang pawh muhil rawh. I chau lutuk ang" a ti satliah a. 

"Tihian i kut hi ka chelh reng anga, ka muhil ang. Eng emaw zawngah ngai miah suh ang che" a ti hriam hraih a. Zothana ban puam chu a pawm titih a. Thim zingah Zothana chu a khi suk. Chapo hle mah se, amah a rinchhan lo thei lo tih a hria. Chu tak chu Ateii chuan hrehawm a ti viau ang tih a hria. 

Kawlah ni a lo chhuak suar suar a, sava chiar nak nak thawm chuan a rawn thlamuan a ni chèk ang chu. An muhil ta bawrh bawrh a, Zothana pawh zangthalin a mu a, a mutui ve khawp mai. A ban dinglam lah Ateii chuan a pawm tlat si. Chet hleihtheih pawh a ni lo. 

Mizoram lamah ve thung chuan buaina chu a thuk telh telh emaw tih mai tur a ni a. Mipui lungawi lo thawm a ring tulh tulh a, Police lamin order an nghak thap tawh bawk. Mahse, Sawrkar pawh buai ru tak an ni. Hel ho hnen atangin engmah an dawng thei bawk si lo, an be pawp thei bawk si lo. Thu mum neih a harsa ta hle mai. 

Hel ho pawn an mi umzuite an la zawng ve ngat ngat reng a. An tam tham avang khan an relhbo hlen an ring lo ve ngawt a, rin aiin an vâng ta hrep si a, thenkhat chu an beidawng lek lek. An thu bul engmah an hre ve lem lo nen.. Sir Hruaia pawh mangang takin a vei ruai a, hel hotupa lah chuan a melh no vak tawh bawk si lo. An tum dan chuan, an tlan chhuah tukah khan Sir hian a naute chu thlema sawrkar biaktir tura nawr a tum kha a nia. Hel ho duhthusam tihlawhtling mai tura sawrkar ngentira ani pawhin a chanpual a lak hnua kal bo daih a rilruk kha a nia. Mahse, an lo relh bo ta diak si, an hrilhhai kher mai. Tunah chuan a rangkachak tlangte kha an tangkai dawn ta lo a ang hle mai. A ni nunna mai mai chu an hlut dawn tehchiam si lo. 

Thudik chu hei hi a ni. Pu Hruaia pathlawi niin, a fate pathum chu an nuin a kawl a. Amah maia awmin a tawp ru riau a, a lang apau chuan Kohhran leh khawtlangah a langsar tawk vela inhman a thiam a,  hmingthat pawh a la nasa reng a. A hna a lo zahawm tel ve zel bawk a. Mahse, a rukin nula tawp tak tak a kawp fó a, a inah a hruai lut a, a chang phei chuan pahnihte a ruala a riahpui chang a awm. A quarter hi a lo fâ ve deuh bawk nen, hmutu leh ringhlel tur an awm lem lo va, a la lang mawi zel a ni. Chawngte lama hna kaihhnawih thila a zin tumin tuna buaina bul hi a lo intan ta a ni. A thlen in pa unaupa lo zin lai a ni a, chu pa chuan Ruhro pûk chungchangte sawiin rohlu awm thu te pawh a sawi zauh a. Hriatchian a chak kher mai. A ngaihven bawk a, a hre ta nual. Mahse, chu Pûk chu Chakma hel pawl pakhat ten an hauh bik thu leh an ven thu a sawi a. A hnual rawih mai. Mi duhâm tak a ni a, Rohlu te chu neih theih a duh takzet. A thleninpa û chuan chuti taka duh chu hel ho nen inremna an siam thei maithei asin tih thu a sawi hmuh ta zauh a. Mahse, hmalak dan tur a hre lem lo. A haw hnu fe-ah an rawn be hlawl a, Offer an rawn chhawpsak a ni ber mai. 

Tichuan, a tum tihlawhtling turin zirlai te rilruah Ruhro pûk kal châkna a tuh a, an intuak ta tauh tauh reng a. Tikhan an kal ta reng a, engkim a hre lawk vek tawh. Mahse, lem a chan a ngai miau si a,Bus Driver a hruai duh loh chhan te pawh kha a chiang mai awm e. Patling leh patling inbum chu harsa deuh turah a ngai a mahna le.. 

Tichuan, Rangkachak va hai chhuakin hlauhlawpin an kir leh ta kha a ni a, anihna takah chuan pûkah khan awm ve mi dang an awm reng zawk a ni. Thil rimchhia pawh kha siam chawp vek a ni. A rin aiin anaute kha an tumruh a, tui hriam te kha an kal kai a ring lo ania, an kal kai ta si a, rangkachak lah an hmu chhuak ta bawk si. Mahse, a buai rukna chu hel ho vin rawn tihkiansakin thlabar takin an rawn umkir kha a ni a. Puk pawn an thleng a, man an ni nghal a. Ruahsur zana an rawn koh chhuah khan khawi dangah a kal lo, an hotupa nen zu an rui a ni. Julie pawngsual a nih zan pawh khan a tel ve. A thim em a, Julie hlauhlawp, mangang khan engmah a hre thei tawh lo mai zawk a ni. A duhâm luat vangin a ram a hralh a, a hnam a timualpho a ni. Mahsee,  a duh ang chu a hmu dawn ta bik lo a ang hle mai. Chuvang chuan, a naute chu hmuh kir leh ngei a duh takzet a ni. Tin, a tira hel ho thil duh kha sawrkar tan pawh tihhlawhtlin harsa lo turah a lo ngai ve bawk a. Hauruang thleng an ram china dah tura nawr kha a ni mai, mahse, a tira an sawi ang kha a ni leh ta si lo bawk nen. Hel ho pawn an bum ve deuh bawk a. Mi tenawm tak erawh a ni ve reng reng mai. 

Zothana te thianho zingah hian Rina hi Kolasib khua niin, Mami hi Lunglei lam ani bawk a. Zara hi Khawzawl khua a ni bawk. A bak mi dang erawh Aizawl khaw tui liaka seilian vek an ni. Thingtlang atanga seilian si an va ramvachal lo em inti anih pawhin a nihna takah chuan an khuaah an awm tlem ve èm bawk a, tette atanga hostela awm, an len hnua khawpui lama zirna chhunzawm an ni ve vek a. An khuaa an hawn chang pawn ram hna an thawk ngai bik tlat lo atin ni. Tunah chuan an vakvai rei ta bawk a, an inpawh tawhin an inhmangaih tawn vek tawh a, damkhawchhuah tumin an theihtawp takmeuh an chhuah ve a ni. 

Sangtea chu a harh hmasa berah a tang a, a han tho chhuak a, khua chu a thiang nuam kher mai. Zan lama an thil tawn teh hrep kha hlauh leh ngaihna pawh a hre tawh chuang lo, thim leh eng hi chu a inthlau ve bawk a ni. A hmai a phih laiin mi dang pawh an rawn harh ve ta hlawm a. 

"Tukthuan chu hetah ei lo vin kal leh phawt ila, kan riltam tawpah kan chawl zawk dawn nia" Zothana chuan a ti a. 

"Zothan, tihian kan kal reng mai dawn mi?  Khawiah nge kan chhuah ang le.. Kei chu ka beidawng tawh. Min chhanchhuak tur te tan pawh zawn hmuh kan harsa ngawt ang" Ateii chuan ram hmakin a lo ti a. 

"Kal lo vin khawiah emaw awmhmun khuar ila i ti deuh em ni? " Ateii chu a melh zauh a. 

"Ka hre lo. Engmah ka hrethiam lo"

"Ka rin danin kawrtè hi zawh chho zel ila, khawi lai ram emaw khua emaw chu kan pawh mai ka ring deuh a. Mihring dang te pawh kan hmu maithei, kan hmuh mial chuan kawng a kaw ve mai turah ka ngai a ni" a ti dap dap a. Beisei bo mahnise; kawng dang an hre miau si lo. An thil neih hlu ve zawng zawng chhuhsak an nih vangin dar engzat nge.. Eng ni nge tih pawh an hre hleithei tawh lo. Chu chu a pawimawh ber pawh a ni lem lo ve. Kal zai chu an rel leh ta phawt a. 

Mizoram lam erawh thawm an nei ring tial tial a, Mipui nawrna a nasat em vangin Sipai, Tlabunga la chambang te chu mibo te zawng tura thupek an ni leh ta. An kawng ngai zawhin beihpui an thlak leh ta a. Shanti Bahini lam ten an pui ta bawk. An ni hian ram chinchang an hre zawk a, beiseina pawh a de chho ve leh ta. Mi bo chhungte tan erawh nitin mai chu hlauthawng reng renga hman a ngai a, thaw dèp dèpin eng emaw lo thleng tur chu an lo thlir thin. 

Kawr chu a chheng chhe ta lo deuh a, luite ang maiin a lo lian ta deuh bawk. Hmanhmawh lutuk lo vin an kal leh thauh thauh a. An hmel hmai chu a dam pial lem lo, an hmai te chu hlîngin a chhunna leh a thai ranna niawm takinn a chik hrup a, a pem hni hne bawk. Lui kuang zau lai deuh an thlen chuan an chawl ta a, tukthuan tur zawng turin Zothana leh Sama chu an vak chhuak a. Mami leh Seni chuan insil pain lungte chu an phawk satliah a. An rak ta hlut mai. 

"Awii hei kaikuang, a tam lutuk, kaikuang" an ti chul a. An man hleithei bawk si lo. Mipa dang awm ve te chuan rang takin kaikuang chu an veh ta a. Thiam leh thiam lo chuan an man ve ruih mai. Zothana te ramchhuak pawh an rawn hawng ve a, hruizik chi khat hi thiam mamg lo vin an rawn kheh haw ve a. Ei tlak tur chuan an chhuah ve mai e. Mau theiah an chhum leh ta barh barh a. Kaikuang erawh an rawh ta mai. 

An eitui phian. Muangchang khawtlai lo vin kal zai an rel leh ta a. 

An kalna hmun chu a dang ta deuh a, ngaw dur khup ang kha a bo tial tial a, thing dingte pawh a khât ta deuh, a hmun chu a zawl tial tial bawk a. Luite pawh a kuang a zau telh telh mai. Hel ho vin an zawng mek tih hrechang lo lèkin an kal sauh sauh a, khawi lai emaw tak thleng tur ang maiin. 

"Awii ka duh lo reng reng, hei vangvat anih hi.. Rina, la vat teh" Hruaii chu a rak chul a. A chawn puara vangvat seitial lian zet bet tui chu râp hmel zetin a melh a. Rina chuan hmawlh in a va thai a, a thai thla lawk thei lo lehnghal. Vangvat avang chuan hmeichheho awm a nuam hleithei lo, an taksa thak deuh emaw engtin emaw a awm deuh chuan an inkeu thuai thuai zel a. Mipa lam nuih a za thung. Harsatna lian tham em em tawk lo vin ni tlak dawn suar suar ah leilet niawm tak, phaizawl zau ve angreng an pawh ta hlawl mai. 

An ding khawm laih a, thawm an ngaichang a. Engmah an hre lo. Thlam lian lutuk lo lo awmah chuan an lut ta tháwr a. In pangngai thleng ang mai an ni. Thlam chhuatah te chuan an bawk thlawp hlawm a. A lian lem lo naa an tan chuan a zia tawh reng reng e. 

"Khua chu kan hnaih ve tawh a niang a" Sangtea chuan a ti a. 

"Pathian zarah thenkhatte nen kan nui ho leh thei ngei dawn e" Zara chuan a lo ti ve bawk a. An tlanchhiat atanga an hlim ve ber tum a la ni awm e. 

"Hei buhfai a awm.. Buhfai" Dami a rak hlut. Fairel belah chuan buhfai a khat tânin a lo awm tak tak nia!  An tihtur theuh an hai lo kher mai. An che ta suau suau a. Bel lian ve tawk takah chuan buhfai chu an chhum ta a. An chhum tui ve ngut ange maw. Mahse, chaw pangngai an ei lohna a rei tawh a. A lawmawm hrim hrim. Leilet mualah mipa ho chuan zanriah tur an vai a. Bawkbawn, fur behlawi leh samtawk tih vel chu an khawm ve ta ruih a. Chung chawhmehte chu Ateii chuan, "Ka lo bai ang. Bai na nâ na chu ka thiam ve lawm" a lo ti a. Minister fanu ka atanga chutiang a han chhuak chu mak an ti deuh. Zanriah ei hmain thlam kawt maia tui an khawhthlaktirah chuan an inbual a. Bangla sahbawn lo awm bak chu awm hek lo, bangla sahbawn rim an nam hum hum mai. Mahse, an lawm. An harh hawkin an inhria. An thuamhnaw te pawh an su fai a,.. 

"Zothan, hetah hian eng chen nge kan awm ang? " Tluanga chuan a ti a. 

"A neitu te lo kal hun hi kan nghak law law dawn mawni ka tia. An lo kal chuan engtin tin emaw min puih dan an hriat ngei ka ring" a ti a. Ni e, dik tak chuan kal ngawt ngawt kha an ning ve tawh. Chawlh hahdam ve tete pawh an duh ve, a neitute lo kal hun nghah chu an titlu ta a. 

Zanriah chu changel hnah chungah an han thet ta a. Chaw chu a urh deuh naa tui ti takin an hap bawrh bawrh tho mai. Ateii bai lah chu a tui kher lah taka, puar èl euhin an ei thei ta. Chaw eikhamah thlam hnuai leh bul vela buhpawl chu an la a, thlam chhuatah chuan an phah ta a. Mut pawh a nuam deuh ang chu. Tapah mei an chhem a. An thu bial laih mai. 

Tawng an inchuh ve nak nak ta mai. Rina pawh Siamteii vanga a nguina pawh a kiam ta deuh a, an titi a rawn zawm ve zauh zauh. 

"Kan thian thita te hmang khan tihthaih kan ni leh ang em le? " Ateii chuan a ti thut a. An ngawi dâk hman. Mahse, "A thleng tawh lo turah ka ngai. Thleng leh pawh nise, min tina chuang lo bawk a" Zothana chuan a lo ti vat a. 

"Ti ta daih ila, Mizoram Sawrkar hian min zawng ang em le?  Chanchin engmah kan hrilh thei bawk si lo" Johny chuan a ti a. An sawi zui leh mam mam a. 

"Kan tlanchhuah zan khan mobile phone emaw compass emaw tal kan lo ru chhuak lo kha chu a pawi a ni. Mahse, kan hun neih khan a zir bawk si lo" mipa zinga tlema a nu deuh hlek tih tur Lta chuan a ti a. Ni e, eng emaw zawk zawk chu la chhuak thei nise tih dan eng emaw tal chu a awm ngei ang. 

Mu turin an insingsa tan a. Thlam kawnga depah Zothana a mu a, a dawtah sangtea, Sama, Rema, Sarah, mami, Dami, Ateii, Seni, Hruaii, Rini, Tluanga, Lta, Rina, Johny leh Zara te an ni. Sama leh Mami, Rema leh Sarah te hi inngaizawng an ni. An tlanbona lamah Sangtea leh Dami pawh an inhnaih chho riau a, thuchiang erawh an la sawi dun lem lo. Ateii leh Zothana inhal em em pawh a reh tan a, mahse, tuman an inngaihzawn an ring ngai lo vang. 

A thiante hnar bur bur karah chuan a meng kar a, ralkhata sakhi huk thawm leh eng ramsa emaw ni hram nghur nghur te chu a ngaithla kur mai. Leh chhen chi a ni lo va, a zun lah a chhuak nasa si. A cheh lek lek tawh si a, a insum thei ta ngang lo, a tho them them a, a bula mu chu a kheuh thin, a harh thei si lo. Zothana aw thian kharh avang chuan a hawi phei vat a, a thaw huai mai. 

"Ka zun a chhuak lutuk a" a ti sap  a. 

"Lo kal rawh. I tiharh ange aw" a lo ti a. A thiante chu a kan thauh thauh a. Zothana nen chuan thawm dim takin zung turin an chhuak ta a. Thla ral lam tawh chuan an thlang lui tui chu a en tle suar a. Thil dang erawh a hmuh vak theih loh. Thlam luhka lerah chuan a inphelh sawt sawt a, a va zung ta sur sur a. A hnungah Zothana a ding a. Hlauhna pawh a nei lem lo. An luh leh hma chuan, "I muhil thei lo mi? " a ti sup a. 

"Umm.. Ka thei ve mai ang. Muttui aw" a lo ti a. Thim zingah an khi dun sak. Eng emaw thleng ta le.. 

"Min khawih suh. Ka duh lo, pasal ka neih hunah chauh sex hman ka tum.. Ka duh lo" a ti tuar tuar a. Mahse, tharumah a hneh mawlh si lo. A rawn bawh a, a kawr chu a pawtthler kâwk a. 

"Ka ta i nih hma loh chuan ka thlamuang dawn hleinem.. Ka naute.. Ka ta liau liau i ni anga, tichuan, i inpeih hunah ka nei ang che" a ti sur sur a. Râp zetin a lo thle sawn. A theih tawpa insangmarin a nam vak a, mahse, a biangah a kuttum lian zeta a rawn hnek bur chuan a zal ta der mai. Ramsa ang maiin chet a la zui a, a thawmhnaw zawng zanwg a hlip a, a thaw huam huam mai. Ani erawh rilru na leh taksa na tak chungin chunglam a melh tlawk tlawk a. A taksa chunga duhtawk a ngah lai te chuan engmah hre miah lo angin a melh ngai a melh ngawt ngawt mai a ni. A taksa na ai chuan a thinlung hliam chuan a thawk a tiharsa zual a. A mittui luang kara a mitmeng huatnaa khat chu a chunga mipa ramsa ang maia rapthlak chuan a hmu hauh lo. 

A bialpa neih ve hmasak ber, a hmangaih nia a hriat chuan a damchhunga a theihnghilh tawh ngai loh turin a pawngsual ta a nih kha.. Khami zan atang khan, "Mipa hi ka hnaih leh tawh ngai lo vang" tiin darthlalang hmaah amah leh amah a fuih a. A mitmeng chuan a tumruhzia a pholang chiang kher mai. Chuvang chuan a ni mipa tan chuan sangha ang mai a nih tak.. Kan Ateii hringnun zet chu.. 

A hriat loh karin a lo muhil ve a ni ngei ang. Mumang pawh a nei lo. 

Mahse, a bula mu Seni rawh rak chhuak tuar chuan a mutui lai chu rawn kai harhin mi dang pawh an rawn harh ve nghal a, Seni chu a meng pual hrû a, chunglam a kawk vû bawk. A hmela thlabarna nasa zet chu hmuh a hrehawm ngei mai. 

"Min that dawn.. Min… that dawn" harsa ti zet hian a riat nawk nawk a. 

"Seni, sente, hei.. Harh rawh. I mumang anih kha.. Harh teh" tiin Ateii chuan a lu a sawi nawk nawk a. Mi dang pawn an rawn dawm ve a.. 

"Min hruai ve an tum.. Khaw maw min thlah teh u, Siami.. Ka duh lo,.. Puia min thlah rawh" a ti tuar tuar a. An thian thi ta te hming a lam danah hmuh zawng a nei chiang  a ni. Mami leh Hruaii an lo ngik faih faih a. Zothana chuan Seni chu a pawm tho lawk a. 

"Thian te u, kan thian in nih takzet chuan khawngaihin min kiansan tawh rawh u. Kan damkhawchhuah nan min pui zakw ta che u" a ti hrâwk a. Seni chu a zawi hnawk nghal. Tui taka muhil chiah chiah hmel a pu a. A mar an han dek a. A lo phu tha hle. An thaw huai a. Thinthiin an muhil ve tawh ang chu tih nak alaia buaina bawk an hmachhawn leh chu an thinrim ru teuh tawh mai. 

"Engpawhni raw sek sek, thlarau leh ramhuai emaw pawn min rawn tibuai mah se, he thlamah hian a neitute nghakin kan awm tho ang" Fiah zetin Zothana chuan a ti leh a. Thawm a reh dûk.. Muthmunah inbe mang lo vin an ngaihtuahna an kawm ta melh melh hlawm a. 

A tukah eng nge thleng ang.. Leilet neitute chu an lo kal ang em?  Beiseina insiamchawpin an hmalam hun chu suangtuahna nen an rem chho ve a. Damin nge an haw anga, ramhnuaiah ramsa te ei ral mai mai turin an zál hlen zawk ang..