FUGITIVE 2

FUGITIVE… (Episode- 2)

Ziaktu : Toni Râlte

Pûk chu a chhengchhe èm kher lah tak a! An inchhuih thlu khut khut a, an han nui leh rih thul. Bák an thlawk fua fua bawk a. A rim pawh a thang nghur mai. An lut thuk tel telh a, fangfar te pawh a lo awm thuah thuah a. Ruhro pawh an kal pel nual tawh. Hmeichhe zinga no deuh ho chuan an râp tih a hriat reng, an bula mipa kal te chu an pawt fun hlawm mai. Kawr niawm tak te an han zawh leh rih. Tui lah chu a vawt em em lehnghal. Sir Hruaia chuan hma a hruai zel a, a kal chak duh lem lo. Nulaho tha mil zelin a kal a. Zothana hma chiahah chuan Ateii a kal a. A intipachang thei phian mai. A tlu ve khut khut tho a, a rak ve hlut lem lo. 

"Ehe.." A hmalama kal te chuan an ti thawt a. Pûk chu kawkel hrang hrang a lo awm chuk mai. Khawi kawng ber nge an zawh ang tih an buai ta a. Engpawhnise, an hma zawna kal zel phawt chu tha an ti a, an kal leh ta phawt.pûk bangah te chuan milim maksak zet zet ker tih hriat tak tak a lo awm nual zel a. An han dinchilh renrawn a. Camera pawh a de zing angreng viau mai. Adventures club te kal tawpna an thleng ta. Engvanga tawpsan nge an nih tih chu a hriat theih ruak.. Li dum kuk mai hlam 20 vela thui tur a lo awm ta tlat a ni. Tui chu an han khawih a, a vawh dan chu ril tak a ni. A bul lei phut dupah chuan an han thu khawm thap a. An eitur pai leh tui te chu in in an inhnawhpuar te te a. An kal zel dan tur an sawiho mam mam a. Dar 1 a pel fel der tawh. An kal thui ta viau mai. He pûk hi a thuk hle tih a lang reng mai. 

"Rohlu eng emaw tak zawng a awm ang mawle.. Heti em ema thuk chu" An CR Tluanga chuan a ti a. 

Chu chu a ruka an beisei, an sawi ngam loh a ni thup hlawm a. An zawn ber hre miah lo vin a awm nia an rin si an zawng ve tawp a ni ber. 

"Tui hleuh thiam lo kan awm em? " 

Hmeichhe pali lai chuan ban an rawn phar var a. Ateii pawh a tel ve. 

"Mipa ho khan hleuhpui theih in inring hlawm em? " Sir chuan risk lak a ngai tih a hria. A ruk tak chuan kirsan mai pawi a ti vak tawh lo. Mahse, a nauteho tumruhna chu a zahsak ve bawk si. 

"Kan thei mai turah ngai ang" Zothana chuan a lo ti boh a. 

An bungraw ah lai, a rit deuhho chu an dah chhuak a. Tui vawt eltiang hleuh kaia puk tawp thleng tur chuan an insingsa ta mam mam a. Hmeichheho mawlh hi an huaisen ve reng reng. An fakawm viau a ni. Sir chuan tui chu a han dai tan ta a. A pil dawn ta mai. A bir vut mai a lo ni. A hleuh phei ta pap pap a, a thui over lo bawk a, a hleuh kai mai. Vawt erawh a tih hmel ngang mai. 

Pakhat tetein an hleuh ve ta sap sap a. Tlema tui thiam zual te chuan hmeichhe tui thiam lo te chu an rawn karcheh dawn a ni. Zothana leh Ateii pawh chu an han indinhnaih ve sateh a. Zothana tui thiamzia hre tawhtu a ni bawk a, Ateii chuan hlauhthawnna a nei lem lo. An hma chiaha kal Rema leh Sarah te chu inngaizawng an nia, inngaizawng hi pathum lai an awm ve a. An tan chuan a nuam ngawt ang. Ral lehlam ami ten an lo khai chhuak nghal zel bawk a, harsatna an nei lem lo. Zothana te pawh hmanhmawh lem lo takin an hleuh ve tan a, Ateii kawngah a kuah a, Ateii pawn a banbulah a lo vuan vei tat a. Ngawi rengin an hleuh phei ta a. Umm.. Tui vawt an dai kai thei ta a. Meichher erawh an vawm kai tawh vangin an chhi leh nghal a. Kal zai an rel leh ta. 

"Awihah.. A va na eee" Dami chu a rak thawt a. An hual nghal taih. A tlu sawp niah a. Lung khawk rawk deuh deuh ao ni chhap nen. An han kai tho a, David chuan hmuh a nei ta tlat. Hmanhmawh zetin Dami tlukna bula lung lian zet chu a nam sawk sawk a, a che eih eih duh chauh. A thianten an rawn pui ta vat. Chhei le.. Lungpui an han lum sawn chuan a maka maka tam rangkachak tlang lian pui pui a lo awm nia!  An kuk ta raih raih a. An va hlim em.. Suangtuahna an ngah sawt. 

An awmna lai tak chu an han dap kual leh ta a. Duhám hian chinlem a nei lo ve bawk a ni. Bangah chuan mi lem a inker nual bawk a. 

"Sir, hei rawn en ve teh" Zothana a ni. 

An kal hnai hlawm a. Mi lem inker bul maiah chuan lung mak deuh, sen vur mai hi a rawn dawk bik a. Khawih chuan a lum vut vut mai. Sangtea chuan a han nem rawk a. A ri rawk mai. An eee dual a, an tawlh hnung rawk rawk mai. Lung bang chu a tawlh ruai ruai a, kuang niawm tak hi a lo intung ûr mai. A huaisen fal chuan an pan hnai a. Kuang zawng a ni ngei mai. An zawn chhuak a. Hawn chu an ngam lo deuh nge an inmelh hrek hrek a. 

"Sir,  ka hawng dawn em? " Zothana a ni. 

"Hawng ang hmiang" a lo ti ve mai a. A kalhna chu an han vaw chhe phawt a. Kuang thing chu a tha awm kher mai. S rei tawh hmel nen chu chen chen a lo la tha chu. An han hawng ta. Ruhro a lo mu thán a. An hmuh fo tawh mah nise; kuang chhunga zalh a nih zar vang nge a rapawm riau aniang, hmeichhe ho phei chuan an hnaih duh der lo. 

A lu bula lehkhazial chu lain Sir Hruaia chuan a chhiar ta a. English-a a inziah vangin hriatthiam loh tur a awm lem lo. 

"Buddhist puithiam a ni a, heng rangkachak te hi an sakhuana thila an inhlanchhawn zel a niawm e. Lak a nih chuan a latu chungah anchhia a thleng daen bawk" lehkhazial chu an chhiar ve sap sap a. An ti ta hru mai. 

"Engpawhnise, duh kan thlan a ngai. Sakhuana hi ka zah a, kei chuan. Mahse, in thutlukna apiang ka pawm ang" Sir Hruaia chuan a ti a. 

"Sir, kei nin la lo mah ila, mi dang hi an kal hunah an la ve mai lawng maw? " Sama chuan a lo ti ve a. Dik tak chuan an ui tlang a ni. Pakhat theuh pawn insem se, dinchhuahpui tham khawpa lian a ni tlat a ni. 

An han sawi ta mam mam a. Mawhphurtu ber nih an hreh ru thûm tho bawk si. Mahse, kalsan ngawt an ui bawk si. Sir Hruaia tak pawh hian a ui ve tho mai. 

Chutia an rik mam mam lai chuan boruak chu a rawn lum huam huam ta mai. A uap ta churh mai. Tawrh theih loh khawpin an awmna chu a rawn rimchhe ta bawk. An inmelh hrek hrek ta mai. Thawk pawh a harsa tan ta. 

"Tilui lo ngam mai ang u" tiin Sir chuan thutawp a siam ta a. A rang arangin an awmna chu kalsan an tum ta a ni. Pûk luh chhuah chaka za an awm ta meuh lo. Thawk a harsa telh telh bawk si. An lo kal tawhna lamah an let ta a. An hmanhmawh tlang kher mai. Mak an ti a, an hlau bawk. An hriat loh kara boruak rawn danglam ta thut chu. An ngaihtuahna kawm chung chuan chak zetin an kal ta hlawk hlawk a. An kal chak bawk aniang, tui vawt hmun an thleng leh ta hlawl mai. An han thu chawl phawt a. Boruak pawh a zia chho ta bawk nen. An hah lutuk chu an thaw hlawi hlawi mai. An kal dan ang chiah khan tui chu an hleuh leh ta a. Sarahi ten li lai tak an thlen lai tak chuan saphai lian zet hi a rawn invawrh chhuak luau mai. An rak ta teng tung mai. Sarah chuan a balance hlohin tuiah a tla ta. Rema hlauhlawp lah a invai vak vak bawk si. Zothana chu a zuang thla vat a, saphai lah a che tual tual a, Rema chu dawlh ngei tum niawm takin a melh run lehnghal. Mizo nih nawmna pakhat, "Thian chhan thih ngam" chu a takin a rawn lang ta. Mipa ho chu tuiah chuan zuangthlain thenkhatin Rema an pawt a, thenkhat Sarah chhar turin an liluh ve nghal. Zothana khan Sarah chu a zuk man hman a, rawn hleuh chhuahpuiin a thianten an rawn pui ta vat a. Saphai ven ngai bawk, tui tla chhar ngai bawk. Puk chhung a lian em em si lo. Thil manganthlak tak chu a ni. 

Saphai chu li sir dinglam lung bang ah a ding ûr mai. A rapawm takzet. Mahse, tina duhin dawlh duh tak tak nise a dawlh hman daih, chutia rawn rikrap ve hrim hrim chu a tum ni berin an hre ta a. Zothana pawh a let a. Ateii hruai a ngai tlat si a. Ateii pawh a hlauhthawn hmel ve ta hle mai. Saphai chu a melh ngawt ngawt ringawt mai a ni. 

"Heij.. Hmalam en rawh. Melh reng suh. I hria em?  Ka thusawi chu" Zothana chuan a ti sup a. Zothana chu a melh ta kuau a, a pangngai miah lo tih a hrethia.. A lo aikaih hman a ni ngei ang. Tui chu a hleuhpui ta tho va, Sama leh Zara ten an rawn pui ta vat bawk a, harsatna awm lo vin an inthlen leh thei ta hram e. Saphai erawh a la awm reng. Thah kher tulin an hre lo bawk a. Kalsan mai an tum a ni. Sarah pawh a harh ta deuh a. An kal tan leh ta. 

Tumah chu an za tawh lo, an tawng hek lo. An chau a, an hlauthawng bawk. Hmeichheho phei chu an hawi hrek hrek reng mai. A hmaa kal Ateii kal mawp mawp chu a melh zauh zauh a. A la pangngai zan lo tih a hria, tlemin a khawngaih ve. Biaka tawng thlamuan erawh a tum lem lo. 

Dar 4 a ri ta. An kal rei ta kher mai. An chhuak ve tep ang chu. An meichher a mit tan a, kal a sawt mawh ta hle lehnghal. 

"Sir, ka kal thei tawh lo. Riak mai ang u" Dini chuan a ti ta thlawt a!  A thu hnawk mai. An han kil laih a. Zara leh Puia ten an karcheh ta a. Sava chiar nak nak an hre thei ta. An hlim sawt. Puk pawn an hnaih tawh tih an hria. A eng tial tial a, a tawpa tawpah puk ko tlang an thleng ta hlawl mai. Hnim chungah te chuan an tlu hnawk hlawm a. An thaw hlawi hlawi mai. An chau takzet a ni. 

Chutia an mut hahdam lai tak chuan, 

"Tumah che tawh suh u" mizo tawng pai deuh hlekin an rawn ti ta.. An hawi chhuah meuh chuan kawr pawl da zet ha mi 20 vel turin silai nen an lo hual vek tawh.. 

 An hamhaih vek. Che chang tur pawn an chhaw huih mai. An chunga thil thleng teh thut chu an mumang anih ringin harh chhuah mai an inbeisei a ni ngei ang. An ngawi thap a, hlauh nachang pawh an hre lo anih hmel. 

"Engvanga hetia min ti ngawt nge in nih? ' Sir Hruaia chuan a ti a. 

"Kan sakhaw puithiamte pûkah lutin rohlu in haichhuak a, kuang la thlain thuziak in chhiar bawk" 

"Mahse, kan la chuang hleinem"

"Pawi in khawih tho alawm"

"Mi dang keimahni aia lut hmasa pawh an awm. Engtinmah in ti ve hleinem"

.

"An ni chuan engmah an khawih lo va, tui hriam an hleuh kai hek lo" tui vawt zet kha tui hriam a lo nih dawn chu.. 

"Anih chuan engtia min tih nge in tum a? " 

"Chu chu kan hotu te buaipui tur a ni. Mizoram sawrkar beng a thlen hma poh leh in zalen hma a ni mai.. Aw le, tho ula, kan camp-ah kan kal a ngai. Tuman thawm bengcheng in siam tur a ni lo va, luhlul fál in awm chuan, in nunna kha a tawp nghal ang" a ti teng chhuai a. Pawisak chu an neih hmel vak loh. Chakma an ni tih chu chiang takin an hria. Shanti Bahini an ni mai ang em?  Mahse, Mizoram Sawrkar nen an inrem hle si a. He pûk avang ringawt hi chuan an man hauh lo vang, eng emaw ril tak inphum ru zawng a awm chèk ang. 

An puan in leh mutbu te chu an kal lam ang bawk khan an pu bawr leh ta lûk lûk a, tlanchhe eng ang mahse, an bungraw ken chu a rih tham deuh vangin an thlen hlat a rinawm lem loh. Bakah thlamuan rukna an nei ru deuh, Sawrkar beng a thlen chuan inremna eng emaw neiin an zalen theih mai an inring a ni ngei ang. Tin, an la hamhaih deuh bawk a, an hawi â huih a ni ber e. Pûk chhung a vawh tehlul nen, an thlan in a bual huh leh hnèp tawh a. Kawng chu a rualrem lo nasa mai si. An hnu rawn chhui duh tan pawh chhui harsa khawpin a chhengchhia a ni. 

Khua a thim chhulh tawh a, an ril a tam ta hle mai. An pai deuh chawn chawn tawh a. Ateii thiannu Seni chu a chau tawngkhawng ngang tawh a niang, a thu ta hnawk mai. 

"Ka ril a tam" a ti tham chhal a. Ateii chuan a buaipui vat. 

"Heii, muangchang hman kan ni lo, tho vat rawh.. " mizo tawng pai lutuk lo hian amah hnaih bertu chuan a rawn ti vin hluk hluk a. 

"I hmuh ve reng hi, a tam chhawl anih hi. Eitur min pe rawh u. Kan thi mai anga sin. Kan ril a tam" Ateii aw fiak thak lam chu an hawi háw hlawm a. 

"Camp kan thleng tep, a bungraw ah kha chhawk rawh u," an hotupa ve deuh khan nèm deuh zawkin a rawn ti ta a. Ruaka a han kal takah chuan a zia ta deuh a. 

Eng a awm tha bawk si lo nen, hmeichheho chu an tap deuh pur tawh a. An kal hma khan an mobile phone an khawmsak vek a, relhrukna hmanrua awm thei zawng zawng an dap chhuak vek bawk. Silai nen ven reng an ni bawk a, tlanchhuah tum hmel an awm lem lo. Nula tlangval puitling tak tak an la ni lem lo bawk a, an huaisen tawk lo pawh a ni mahna. 

Camp chu an thleng ve ta nge nge a. Di in lian lo tak panga awm vel tur hi a lo ding ve far a. Chung in piaha in lian ve deuh hlekah chuan khalh lutin buhpawl an lo chhung khawm chungah chuan an thuttir ta thap a. 

"Ei rawh u" tia an rawn dah chu chaw tlemte dala chawm a ni mai. Changel hnahah an rawn dah a, mahse, riltam tawngkhawng tawh an ni bawk a. An hap zo rang kher mai. Tlem chuan an awm a nuam ta deuh. Tui in tur tuiumin an rawn laksak bawk a. An chauh zualpui pawh a kiam duak mai. 

An kut leh ke te chu an rawn phuar ta mawlh mawlh a, lo dan tumna pawh an nei lem lo. An che chang hleithei lo a ni ber. An chauh luatah kut leh ke phuar chung chuan an muhil ta bawrh bawrh a. An inkhan nulh hlawm a, tumah an insawisel lem bik lo. 

Sava an rawn chiar nak nak a, ni a rawn chhuak a. Boruak pawh a lum uap leh ta churh mai. An awmna lai chu Mizoram chhung a nih an ring tawh lo. 

Vengtu pahnih lo lut te hnenah chuan, "Kan rimchhe em a, inbual kan duh a ni. Heti ringawt chuan a hrehaem em mai. Inbual kan duh" Ateii chuan a lo ti leh pek a!  A dik ang, khawpui nula no, bal ngai lo tan chuan a hrehawm thawkhat viau ang. Puk chhung boruak rimchhe zet kha a la chambang tlat si a. An vamneih asiamin inbual chu an phalsak ta hlauh mai. Mahse, panga tetein an kal ang. An thlang maia luite chu an pan thla ta tham tham a. Vengtu pathumin silai nen an zui bawk. 

Vengtu ten an thlir reg si, an inphelh ruak ngam meuh si lo, kawr chhanah chuan tih loh aiah tiin an inbual a ni ber. An sahbawn ken a lo la awm hlauh zawk a, an rimchhe zualpui zawng a reh chèk ang chu.. Mipa lam an han inbual ve a, annni zawng ruakin an ti ta mai. A zia phian ang. 

Puia leh Johny te chu an phun sur sur a, vengtu te melh pah reng chung chuan an tawlh zeuh zeuh a. Lui hnar lam chu an melh chho zauh zauh bawk a. Vawi leh khatah an tlan ta thut mai. Lui hnar lama chak mangkhena an tlan chu an rawn hmu hman, an rak tuar tuar a, an umzui ve nghal. Thil chu a buai ta nuaih mai. Reivak lo ah silai vawihnih a puak ta thuai thuai a. Engkim chu a reh ta tlawk tlawk mai le.. 

Puia leh Johny te ruang pu chungin vengtu te chu an rawn chhuk thla ta a. An thiante ruang, thisen nena inchiahpiah an han hmuh meuh chuan an chunga thil thleng chu a naran lo tih an hrethiam ta a ni ngei ang. Hmeichheho chu an tap nghal fap fap a, an inngaina tlang tawh a, a hrehawm viau ngei ang. 

"Tupawh tlanchhuah tum in awm leh vaih chuan, in thiante chan ang hi in chantur ve tho a ni.. Ruang hi va paih rawh u" ti nghal zatin an hotupa chu a au tial ruan a. 

"Ka pu, khawngaihin ruang hi kan lo phum ange. Paih ngawt ai chuan" Zothana a ni. 

An thiante ruang chu phum phalsak an ni ta a. Thuk lotein lei an lai a, Sir Hruaia a tawngtai a, ruang chu an phum ta. An ngaihtuahna a mang zo va, sawi tur reng an hre lo. Tlanchhuah chu ngaihtuah ngam chi lah a ni hek lo. 

Nilengin an khung leh ta ngawt ngawt mai. Sawrkarin a hre tawh ngei anga, engtikah nge an chhungte nen an inhmuh leh theih ang le.. 

Zanriah tui lo deuh an rawn pe leh a. An ei lui hram hram. Kawl a rawn phe zawr zawr a, vanah khawpui a kal ruah ruah bawk. Chhumte chu a let but but a, ruah a sur dawn chiang. Reiloteah ruah mal chu a rawn tla ta fuap fuap a, a sur tam telh telh a, an awmkhawmna hmun pawh a rawn far tan ta a. Di in mai kha a nia. An kut leh ke phuar a ni tawh lem lo va, an theih ang angin an tawmhul hlawm a.

Ruahpui vanawn sur lai takin Sir Hruaia chu an rawn ko ta a. Thu tam sawi hmain an khalh chhuak ta. 

"Engtin nge Sir kha in tih dawn" Zara chuan mangan hmel zetin vengtute chu a zawt a. 

"Kan hotupain a hmu duh a ni" an ti mai a. A tu amah an tawng ta lo. An ngaihtuahna an kawm tih mai loh chu. 

 Tlabung khawtlang erawh an buai ngang mai. Aurinna hmangin zirlai naupangte bo zawng turin hnatlang an ko a, Driver te khan an va lam ngei a, mahse, nghah chhuah a awm thei si lo, an la ngaihtha lo lutuk lem lo. Puk chu a thuk deuh vangin an rawn chhuak hman rih lo ah an ngai deuh a. Busah riakin an lo nghak tawp mai a ni. A tuk chawhnu her thleng pawha an rawn lan tak si loh avangin an mangang tan ta a. Tumah an call tlang thei bawk si lo. Tlabungah kirin khawtlang hruaitute an pun ta ngawt mai a ni. 

Tichuan, Mi 10 bawr vel nen puk lam an pan a, khua lah a tlai chak si. Luh pawh lut lem lo vin puk bul vel chu an dap ta ngawt a. Mak deuhin eirawngbawlna bungbel vel let rum siin an mutbu vel chu a bo diak bawk si. Mutbu em em te chu pukah ken luh awm loh tak a ni si. An ni khawiah emaw kalna tur dang an nei zawk em mawni le.. Bungbel te chu ken awm tak a ni bawk si. An buai tlang kher mai. Chumi zan chuan an haw leh ta phawt a. Zanah ruah a sur nasa mai si, khang ruah sur khan an hnu zawng zawng a rawn thup bo leh ta vek bawk si. 

A tukah tha tharin khawtlang huapin an zawng leh ta a. Hetih lai mek hian rukbo an nih thu chu social media leh newspaperah chhuah a rawn ni zui ta bawk a. Zoram a deng chhuak rang hle. Zirlai naupang leh zirtirtu mi 22 lai rukbo an ni chu sawi hlawh lo thei pawh a ni lo. Chakma hel an nih ring an tam ber a, sawrkar erawh a la ngawi. 

Ruhro puk leh a chhehvel ram chu an dap chhuak titih tawh, hnuhma reng reng hmuh tur a awm lo va, khua a thim thet thet tawh tihin Hel ho camp kha an va pawh ta hlawl mai. Fimkhur em emin an veh a, an hual a. Mahse, chu camp chu zing khawvar tirhin an rauhsan vek tih an hre lo mai zawk a ni. Chu Camp-ah chuan zirlai naupangte mutbu bak engmah hmuh tur a awm lo. Rukbo leh hruaibo an nih a chiang tawh a, zawn hmuh mai theih pawh an beisei,. 

"Sir, ka fanu a tel ve tih i hria em? Tunah hian a zawng tur i tir lo anih chuan eng nge ka tih ang tih ka hre lo" Minister Pu Vanlalthanga chuan thinrim zetin CM chu a bia a. A khur hlawk hlawk mai. 

"Inbengdai hram hram rawh. Emergency meeting ka ko tawh a, thil chu a fel mai ang" CM chuan a lo ti dam dup a. 

"I hriat tirh khan engvangin nge i koh vat tawh loh zawk?  He thil serious zia hi kan hria a ni lawm ni? " CM mahnise; a zah buai duh tawh bik lo. A dik, an bo tukah khan CM hi hrilh hriat a ni tawh. Mahse, a lo la ngawihpui a, chu tak chu a hrethiam lo a ni. Hetia thuthang leh zeldin thu a rawn darh tak hnuah chuah chet lak a tum chu a ngaithiam thei thlawt lo a ni. 

An meeting atanga darkar khatah Zirlaite zawng turin sipai tirhchhuah an ni ta a ni. An zawng hmu em ang chu. Mizorama la thleng ngai reng reng lo avang chuan mitinte ngaihven a ni a, titi dang a leng mawlh lo. Chakma lo ngeia social media lama tuan ta lah an kuh ten tun a, Opposition lamin sawrkar beihna hmanrua atan an lo hmang bawk. 

Hetih mek lai hian Zothana te erawh an Sir Hruaia tel lo vin an hruai kual ta zel a. An sir kha an that ta nge an hmu tawh lo. Chu chuan a tithlabar zual a, Sawrkarin a zawn chhuah hun an nghak tawp mai a ni. An hruai kualna lah chu chhinchhiah harsa khawpin a khawkrawk a, an pilhin an pem pheng phung tawh. An camp pahnihnaah riak lo vin zanriah an ei a. A zan azanin camp dang an panpui lehnghal. Thim tham hnuaia ramhnuai khawkrawk lutuka kal chu khawpui thalai tan phei chuan a khirh khan lu deuh a ni. Mipa pawh an intipa thei meuh lo. Hmeichhe ho phei chu an ngik faih faih reng mai. 

An camp pui ber an thlen chuan khua a var titih tawh. An chauh dan chu namèn lo tak a ni. In pakhatah an khungkhawm leh a. An mu nghal thlawrh hlawm. Tumah an chechang peih lo. 

An bo atangin ni 5 a liam ta. Chanchinthar a awm thei meuh lo. Sipai tam tawk tak khawthlang panin an inzui kawi nguah nguah a. Thenkhat zawlnei nia inchhal ten, indona hmahruai tiin thu an lo cheh ve reng bawk a, awih tawk awmin buaina pumpelh dan kawng lo dap tawk an awm chho reng bawk a. Zoram chu a buai ru ta viau mai. 

"Nang hi lo kal teh, kan hotupain a hmu duh che" Julie,  Zothana ngaizawng vetu kha a rawn pawt tho lawp a. Hmeichhe zingah chuan a hmel tha ber a, a pian a dik ber bawk. 

"Ka duh lo, khawngaihin min thlah ru.. Ka duh looo" tiin a tap tuau a. Silaia tin reng an nih vangin tuman an chhan ngam si lo. 

"Ka pu, a duh lo chung chu tilui lo ula, Sawrkar lamin thu an rawnn nei tep tawh ang" Zotnana a insum thei ngang lo. 

"Engmah lo sawi suh. " tih pahin a silai kawmin a chalah a chhu nghek a, Julie chu an kalpui ta. Zothana chu a tlu hnawk a, a bek chu a rawn thi nghal puat bawk. A beng chu a kiu vawng vawng hial,  a na khawp ang le. Rang takin hmeichheho chuan an rawn buaipui a, Ateii chuan a puanbah chu pawtthlerin a rawn tuamsak nghal var a. Mak a lo ti deuh. 

Mitmeng nelawm tehchiam lo vin, "Ka ba ka rulhna a nih kha" a ti sap a. Zothana erawh a ngawi reng. 

Julie mangang aurawl chu hriat loh duh teh mah se, an hre lo thei si lo. 

"Ka duh lo,. Min pui ru.. Nu, pa, ka duh lo.. Min khawih suh.. Min thlah rawh.. Ramhuaipa" a ti tuar tuar a. Pawngsual a tawk tih chu hai rual a ni lo. Mipa ho chu awmhmunah an insehruh ngawt ngawt mai. Silai pakhat tal zawng nei ve se chuan chet an la ngam ve mahna. Vengtu panga, silaia tin reng ten an hual miau si a, nunna hi a hlu si, chet hlek pawn an rawn hnaih nghal zel si a. An tan an mizopui hmeichhe mangang chu chhan ngaihna a awm ta lo. 

Julie chu an rawn dah let tawh lo va. Zankhuain an pawngsual a ni mahna. 

"Ate, i pa pawh minister a ni a, an va che har em em ve mawle.. " Sama chuan a ti bai bai a.. 

"An che em em ang, min la zawng hmu lo mai chauh a ni ang" zawi sapin a lo ti a. Tawng an phal thin bawk si lo. An nun chu a hahthlak tan ta ngei mai. 

Mizoram sipai te pawn camp-1na kha an rawn thleng mek a. Zawn hmuh mai an inring khawp mai. Mahse, sipai an rawn intir tih hel ho vin an hriat chuan, nunrawng takin chet an la leh ta.. 

"In sipai te hi in kokir lo anih chuan, nunna kan ren lo vang" tih paha Dawnga leh Sawma an kap thal tawp chu áwng kar atangin an lo thlir thap a. An hmui an hup tlawk tlawk ringawt. Mami phei chu a thidang titih hman hial. Chu video chuan CM hnen a thleng rang kher mai. An han inkokhawm leh chuk chuk a, rorel dan tur pawh a váng ta hle mai. 

"Inrem kan duh e" han ti ngawt dawn se, an thil ngiat chu a rapthlak mah mah a ni. Mipuiah puanzar a la ni lo a, puanzar ni ta se, ngaihdan a inang lo khawp ang. Chung hel ho chu shanti Bahini lak atanga hel ve lehchhawng an ni. Tu nge an hruaitu nia, tuin nge an mawngah lo hiat tuman an hre lo. Chakma Minister Sankhar chakma pawh rilru buai hmel takin a vei nghut nghut mai. Engmah a hriatpui lo a ni maithei. Ramri chungchanga buaina zawng zawng an chingfel tawh a, chutah buaina khirh zetin a rawn nang leh ta si. He thil hi a namai dawn tlat lo a ang. 

"Hei hi hre vek rawh u. Mizoramah thuneihna kan lekkawh theih hma loh chuan, kan kut ata hi in chhuak dawn lo tih hi" a hmel hlauhawm zet chu râp zetin an lo thlir thap a. 

"Chu chu a thlen loh hram ka beisei" Zothana chuan a ma hriat tawk lekin a lo ti a. "Mizo in nih ve ai chuan ka nunna ka hlan phal e" a rilru dik tak a ni. Mahse, sawi chhuah chi a ni lo tih a hria. Tunah chuan tlanchhuah dan kawng an dap a ngai ta tih a hai lo. Anmahni an inhai chhuah loh chuan buaina hi a ril telh telh anga, hawng leh tur an awm dawn lo tih a hai lo. An sir a awm tawh lo va, mahse, a tam zawk mipa an la ni. Pathian an nei bawk. Kawng chu a awm ngei ngei ang. 

An thiante ruang chu phum a dil leh a, phalsak an ni ta lo. Khawiah nge an thehthang an hre lo. Mi panga an hloh ta. An ngainat te vek.. 

Tunah chuan,  Mipa 9 leh hmeuchhia pa 8 an ni ta. Julie an rawn dah kir a, a chau tih a lang reng mai. A melh ngai a melh ngawih ngawih ringawt. Hmeichheho chuan an mittui an hru fap fap a. Engtikah emaw chuan an hun a la thleng ve ngei awm si a. Zanriah an ei lai chuan a thiante chu eng emaw hrilh a duh, vengtu ten an hual reng si. An inthiar pawn vengtu pahnih talin an zui zel si a. Kawng chu a vâng a ni. Mahse, a beidawng lo vang. 

Mizoram Sipai te pawh Sawrkarin ko kirin Tlabungah awmhmun an la khuar a. Nunna hlutzia hriaiin engtin emaw inremna siam dan an ngaihtuah ve reng a ni. Mipui engmah hre ve lem lo te chuan an dem a,nasa taka sawisel an hlawh. Chakma laka tlawm ta angah an ngai a ni ber. Anihna chen pawh a awm deuh. Mahse, khang nunna hlu tak te kha an siam a ni lo va, an chhungten an hmangaih ngawih ngawih lai an ni. Duhthlan tur a vâng bawk a ni e. 

Ruah a rawn tla leh phuar phuar a, chu tak chu Zothana chuan remchanga hman a duh a ni. Vengtu te inthlahdah hun lai a ni tih a hre tawh bawk a. An phuarna chu a han sawi a, a nghet kher mai. Ruah chu baw hawk hawk a, "Lalpa, a aia tam aw" a ti rilru mawlh mawlh. A bula mu a thianpa Sangtea chu a kheuh zauh zauh a, ani pawh a rawn harh. Anmahni vengtu pahnih te chuan zu an in a. Mei an chhem ve kha a nia, a rem deuh tawh vangin a thim angreng. 

"Mei saw kan chhawm ange" a ti ni ngei tur a ni. Pai deuh chha chha chungin mei chu a va chhawm tha a. A rawn eng leh ta deuh. Sangtea beng bulah, "I theihtawpin insangmar la, ka kut phuarna hi phelh han tum teh" a ti sa sa a. Hnungkhirh an nih tlat avangin anmahni mai chuan phelh theih rual a ni si lo. An saisirna lamah an taksa te chu a na thûm tawh a, tun ni khat kalta atang khan an khirh zual a, an phuar tha leh vek kha a nia.phuar lohin an mu ve reng tawh kha a nia. 

Sangtea pawh chuan hrethiam vatin a insiamrem a, Zothana kut phuarna chu a seh chat chat a. Hnang hruia phuar a ni naa a nghet fû mai. Thawm neih ngam rual a ni bawk si lo. Vanneihthlak takin ruahsur riin thawm ring zual tur a khuhbo hlauh zawk a. Darkar chanve dawn a seh chat chat hnu chuan a phelh thei ta hram. Sangtea hah lutuk taksa kham bawk si chu a thaw hlawi hlawi a. Zothana chuan rang takin sangtea kut phuarna chu a phelh ve nghal a. Zu an ruih tawh vangin an rawn ngaihsak vak lo va, an ngaih a tha ve pawh a ni ang. Tlanchhuah tum awm hmel an hmu tawh ngai si lo va. Bakah ruahpui vanawn sur kara tlanchhuah an ring lo teh chèk aniang chu. Anmahni tawngin an tawng bual bual a. An nui leh huk huk thul. 

An vanneih asiamin an hmeichhiate chu an hotupa thinrim aleiah tumah an rawn la chhuak lo hlauh. La chhuak ngat se, an buai zualna tur a ni dawn si a. Zawi zawiin an bula mite kut phuarna theuh chu an phelhsak ta hlawm a. Inhrethiam tawn takin tuman thawm an siam lo. Mahse, engtin nge chet an lak zel dawn tih chu Zothana kutah a awm. Ateii hman tangkai a ngai dawnin a hria a, a chhan chu hmeichhe zingah a huaisen ber tlat a ni. Mahse, Ateii nen an inkarah mi pahnihn an mu tlat!  A bula mu chu a hrilh ru a, an inhrilh chhawng ta a. 5 mins vel an nghah hnuah, 

"Pute u, ka zun a chhuak lutuk, ka cheh takngial dawn.. Khawngaih takin min zuntir ru" Ateii chuan a rawn ti ta a. Vengtute tawng lai a tawp chawt. Meichher a va chhi a, an kut chu hnunglama dahin an saisir thap a. An thaw dèp dèp ringawt. 

"Tun ang hunah te.. Tikhan zung mai rawh" pakhat chuan a ti pawr huar a. 

"Anih loh tal pawn ka kekawr hi min phelhsak la, ka zung mai ang" 

Kiai suk chungin a rawn pan a, a thianpain meichher a keng. Ateii kekawr phelh tuma a rawn kun chiah chu a kapah na theihtawpin a pet ta thuai a. Meichher keng a hamhaih lai takin Zothana a inperh tho at a, a han bawh nghal rawp. Mi dang pawh an rawn che nghal. Sangtea leh Tluanga ten silai an chuh nghal rap. An tin ta vang mai le.. Thawm nei deuh mah se, ruahsur riin a la chhanhim ta zel.. 

An thiante nunna laksaktu te zing ami ni mah se; an nunna han laksak em chu an hreh tlang aniang e, an hmui tuamsakin, an phuar hlawm a. An bungraw la neih ang angte siamfelin, silai pahnih keng chung chuan hmanhmawh zetin ruahsur karah chuan an tanin chu an chhuahsan ta a.. 

An chetlak hun hi zing lam dar 2 vel a ni a. Zing dar 6 velah chuan ramhnuai ngawpui karah an awm ta. Thim zingah leh ruahsur karah chuan kal a harsa ngang mai. Lum tawk te pawh an awm. Mahse, kha tanina kir leh duh tawh lo vek an ni bawk a, an tum a ruh tlang kher mai. An thawmhnaw te chu a berh lei luai a, an taksa hmun thenkhatah pem leh hliam an nei fur bawk. Mahse, an pawisa lo. An hmalam panin an kal ta ngawt ngawt kha ania, khaw nge an awm tih hre lo mah se, hel ho lak atanga an tal chhuak thei chu an lawm tawh hrim hrim mai. 

An ril chu tam teh mah se, umzuitu an nei ngei dawn tih an hriat avangin an hmalamah an kal char char phawt a. Zing dar 8 bawr velah lui lian angreng tak an thleng ta hlawl mai. Ruahin nan huh hnèp mahse, vawt hre chang lo lèkin tuiah chuan an inchiah ta sap sap a. An bal tlang tawh bawk a. Zah lah an sawi thei hek lo. Chutia tuia an inchiah far lai chuan, thwwm danglam tak an hre ta a. Ramsa ngur thawm niin an hria. An hawi chhuah meuh chuan, an chhak lawka lungpui tohlawt lian fahran maiah chuan, Savawm lian zet pahnih an lo ding luau mai nia! .. 

To be cont..