FIGITIVE

FUGITIVE.. 

(Episode- 1)

Ziaktu : Toni Râlte

"Zothansanga han thawh theih lohzia em em hi chu aw.. Tho teh. Dar 8 a ri dawn" Pi Mawiteii chuan a ti hlak hlak a. Zothansanga chu a rum tuah tuah a, "Naa, dar 3 thleng ka meng asin. Ka ning, chaw min eisan mai ru, Saturday a ni tho" a ti nuah nuah a. Puan chuan a in lukhup sauh sauh a. 

"Ninawm lutuk, games in khel a, in meng vak vak ringawt zel. Mut nachang hre lo, thawh nachang hre lo.. " ti chungin anu chuan bawkbawn a chan tau sawk sawk a. An pa erawh hahdam hmel zetin vanglaini a keu nuap nuap a. Zothana û Sawmi chuan tukverh darthlalang a nawt a, a zai pah rát rât a. Zothana û nau rawlthar exer la pawh a la rawn haw leh pek lo. A peng kawi leh a ni mahna. 

"Nu Mawite, Zothana a la tho na nge? " rawn titu Sangtea chu en chungin, "Va kaitho teh. I thianpa ve saw a buaithlak em mai" a lo ti a. Sangtea chu Zothana roomah a lut nghal a. 

"Heii, bawiha, tho teh.. Vawiin kha kal i tum lo mi? Kan group blanket suk kha" tih pahin a va pawt bawrh bawrh a. Thian inkawmngeih leh inzui chawt an ni bawk a. An inpawh viau. 

"Huizz, in va ninawm hlawm tak." Ti chung chuan a rawn tho ve mai a.

"I bike keng mai rawh. Ka bike ke ka siamtir daih" Sangtea chuan a lo ti leh a. 

Tawng tawh lem lovin Zothana chu a tho chhuak a, a ham bai bai a. 

"Ehee, i mu leak lehpek a ni maw.. Huhu" Sangtea rak hlut chu ner nâwngin a zuk melh a. 

"Kei aiin i mu leak zing zawk.. Ngawi mai mai teh" a ti sup a. An inzui chhuak ta a. 

Zothansanga te hi Mission vengah chengin, apa hi Aizawl Govt College-ah Lecturer niin, anu erawh engmah a thawk lo. In lamah a tangkai em em thung. A u Sawmi hian MA (Eng)  a zir zo ve chiah a, an thenawm te school-ah hna zawn pahin a inhlawh ve mek a. A nau erawh BA (Pol. Sc) zirin, nakkumah a graduate ve ang chu. An khawsak a sang falua lo naa, an mamawh tawk erawh an nei ve thei zel a. Apa hi Kohhran Upa a ni bawk a, a nupui fanaute pawh a hruai tha viau, Zothana pawh hi ngaihtuah hmel vakin lang lo mah se; inkhawm leh SS kai te chu a taima fu roh a. Thalai ngang an nia, an lawmzawng a ho ve a. Nimin mai khan MZU-ah Geography Department-ah Admission an zuk la ve a. Class erawh an la tan lo. 

Tukthuan ei khamah phur fahran lo vin a insiam a. An group sumtuak nan Blanket an su dawn a ni. Sairang lam panin Sangtea nen chuan an lim pur pur a. An inbe mang lo. 

Sangtea nen hian kum khat chhuak niin an inhnaih bawk a, tette atanga inkawm an ni. Unau ang maiin an inpawh tawh. Amah aiin Sangtea hi a te hlek a, a nula mi phian nge ngaihzawng a hmu thei fû!  Zothana erawh a mizia hi a boring lek lek em aw tih theih tur chi a ni a, hmelah phei chuan an vengah na nâ na chuan tleirawl ho star rawn a hlawh danah a chhe lem lo tih a lang. A chal arh phak te, a mitmeng dum fim kâk, lian lek lek, a mithmul sei er tan te chuan hmeichhia a hîp viau. A hnar ngul pawh anuin a tet laiin a siamsak nasa bawk a. A bang a sang viau, a hmui chung chiaha khuavang awm hi ani chuan "A tuai" tiin a hnualsuat fó a. Mahse, a inhmeh riau, ruihhloah a talbuai ve lem lo bawk a. A khat tawka meizial a zuk hi a ni mai, a vun a èng a, a nung sarh mai. A ria deuh naa inphut mawi tawk tak eraeh a ni. 6'2ft a ni a, apa nen an inchen chiah. 

An insukna hmun tur an thleng a, picnic paha kal an ni bawk a, an thawm a na nghal hle. Hruaitu te chuan hna an han sem zar zar a, insu ve dang pawh an awm. Khua chuan a zir bawk a, thenkhat chuan tui an lo cheng hmanhmawh bawk a. Zothana pawh a intihlim chawp ve ni ngei tur a ni. A thawh hlim hmel ang nûr kha chu a pu tawh bik lo. Bialnu hi pakhat a nei ve tawh a, vanduaithlak takin Thisen cancer vangin a lo boral tawh a, kum 3 lai chu a liam tawh naa hmeichhia a ngaihsak ta meuh lo. Games chu a rilruah a lian ta ber mai. 

"Zothan, saw lai saw han lai khuar ula, silpouline hi kan phah anga, tui kan chhung mai dawn nia. Heti ringawt chuan suk fai a har dawn tlat" an hruaitupa chuan a ti a. Bawngtuthlawh chu lain a lai turh turh a. Hnathawh hi chu an huanah a pain a hruai fo a, a zei lo lem lo. Blanket chu an han nawp chho zui ta a. A thenin eirawng an lo bawl ve bawk a. Chawhnu lamah chuan an zar zo thei ta hram a. Tui chen a ni deuh mai. An thlanga insu ve dangte bulah li lian ve deuhah chuan an zuk cheng bârh bârh a. Nuam an ti tlang viau. 

An chaw eina tur hnah an sat zo, an rawn phei lai mek chuan, "Tuiah a tla, zuk chhan vat ta che u" tia au tuar tuar thawm an hria a. Rang takin an hnah sah chu an dah a. An zuk chhuk ve nghal a. Li chu a lian ve riau a, a thuk lai phei chu patling hlam 10 vel zet tur a ni reng a. Mipa thenkhat chu an zuangthla sup sup a. An tuitla ber lah tuiah a pil tawh si a, an liluh nghal sap sap a. Zothana pawh a zuangthla ve nghal a. 

A lo zawi nguai tawh a, a pawt a, pawm chungin boruakah chuan a dah chhuahtir a. Mi dang chuan an lo pui ta vat a. Thawm chu a reh dûk mai. A thi nge a dam tih tuman an hre si lo. Vaukam an thlen chuan a mut a. A âwmah nemin a hnungzangte pawh a nem bawk a. Eng a ang thei lo. A hnar hupin a kaah chuan a ham ta vak a. A beisei ang ngeiin a ka leh hnar atang chuan tui a rawn chhuak ta a, a khuh kharh kharh bawk a. A chauh hmel kher mai. 

"Awiii, Ate, i thi dawn emaw ka ti hman a. Ka van lawm tak" a thiannu ni ngei tur chuan a rawn kuah thawk a. Ani erawh a tawng peih lo aniang. A thaw hlawi hlawi ringawt. Zothana ai chuan a û hlek maithei, kum khat velin. Nula hmel tha zet mai, khal zet mai a ni a. Nula hleitling tak erawh a ni lo. A vun mawlh chu a no chèk mai, a hnute kawh lah chu a kawr huh chhanah phei chuan a kawh zual emaw tih tur a ni. A kawng fek rat leh a mawng bawr khal zet chuan mipa a hîp viauin a rinawm. A mitmeng chu a ti deuh riai a, a tillang sexy phian. A hmui chu a chhah lek lek a, a sen chek bawk. Hmel tha ngawih ngawih tih tur ni chiah lo mah se; a bialpa te chuan an hauh na viau ang. 

"Ka.. Ih.. Ka chau" a ti sap a. 

"Hei thianpa hian a chhan che a, a hming pawh ka hre lo. Khita insu ve te khi an nia.. A lawmawm tak tak a ni" 

Hmeichhia chuan a rawn melh zawk a. An hruaitu niawm tak chuan Zothana chu rawn panin, "Tlangval, kan lawm hle mai. Kan nau nunna i chhan a. Ani hi Ateii a nih hi, i hriat dan tur chuan kan Minister Pu Vanlalthanga Fanu tlumber a nih hi" a ti dap dap a. Minister fanu maw.. Hm.. 

"Aa.. A ho em mai. Kan tihtur a lawm, tupawhnise kan ti vek ang. " a lo ti ve mai a. Muangchangin an chawlhmunah a chho ta daih a. Ateii lahin engmah sawi bik hek suh. A hamhaih pawh a ni ang e. 

Chaw an ei lai chuan Mipa ho chuan an sawi zui liam liam a, Zothana erawh a ngawi reng. A ngaihven hmel vak loh. Apa zilhna leh fuihna te avang hian veng chhungah pawh a la naupan ngaihtuahin a tlawmngai thei a, a langsar pawl a ni ve fô. Mi uangthuang leh chapo chi a nih lem loh vang hian a intilangsar duh vak lo zawk a. 

Hawn lamah chuan Sangtea'n bike a khalh thung, an tawng leh ta lo. 

An class tan hma chuan apa in an huanah a hruai fo a. Ning ru viau mah se, apa hi a zah ve tlat. Anu erawh a thinchhiat ngaiin a la thinchhe reng mai. A rilru a tha tal alawm.. 

An class tanni chuan phur zetin an inzui thla a, a danglam ve alawm. An department awmna chu a lo hla vau mai. An zuk thlen chuan an lo awm ve nak nak tawh a. An room turah an lut nghal. Roll an call a, an vaiin mi 25 an ni. Hmeichhia chu 11 lek an ni. Geography chu mipa subj anihna chen hi a awm ve a. Hmeichhe zingah chuan hmanni maia tuitla a chhan chhuah Ateii kha a tel ve. Zothana phei chuan a lo hre tawh lo va, Sangtea zawkin a hrilh. Hahthlak thei. 

Class tanni a ni bawk a, urhsun tak chuan an zir rih lem lo. Inhmelhriatna hun atan an hmang ve bawk a. Ateii thiannu Seni chuan a lo la hria ni ngei tur a ni. A rawn be ta vat a. A hnunga ding Ateii bulah chuan a han hmelhriattir ve leh a. 

"Ka nunna min chhansak a, ka lawm e. Mahse, beisei i neih loh ka beisei" Ateii chuan a ti chang rât a. A han melh kâwk, "I lakah hian beisei tur a awm pawh ka hre hleinem" a ti ve hmak. A chhuak zui nghal. Khatiang hmeichhe chapo lutuk kha thian atan pawh a duh awzawng lo. Minister fanu ek e bal e ni raw sek sek, A pa fapa a ni ve tho. 

Sangtea pawh chuan mak a ti deuh aniang, vawikhat chu a sawi zui. Mipa an nia, mi chanchin an sawi zen zen lo. 

Kar khat lai chu class an kal ve ta. Nuam an ti chho ve zel a. An zirtirtute an fel bawk nen. Ateii pawh a nihna vang nge a hmel vang a luck chho hle. Mahse, mi induhtawk tak a nih vangin tumah chu an hlawhtling lem hlei lo va, a thiante tan chuan felin ngainatawm viau mah se; mipa tan erawh keite ang mai a ni. Mipa bulah chuan a vawt raih a, sangha ang mai a ni. Zothana pawn startu a nei ve chiang, Julie a nu a, an class hmeichhiaah a chhe lo pawl tak a ni. Mahse, a dan pangngaitein a ngaihven leh chuang lo. Thian angin a kawm mai a, Sangtea'n han nawr viau mah se a chechang duh chuang lo. A bialnu thi ta Jenny vang kha a ni ang em?  

"Lal pi, Rice artui chhipchhuan aw" Sangtea chuan a ti lauh lauh a. 

"Kei chu coffee ni mai. Ka riltam lo" Zothana chuan a lo ti ve sup a. 

An piah lawka thu Ateii te chuan an rawn melh reng a. An rèl lehpek aniang. An inbe ngai tawh miah lo va, hmelma angin an khawsa chuang lo bawk. 

"Fimkhur ta che.. " Ateii chuan a ti vin tuar a. An en thup. Waitress in a kekawrah Zothana coffee tur kha a tibaw palh hlauh a ni. 

"Ka tihpalh takzet.. Min ngaidam rawh"

"Ka ngaihdam che avang khan ka kekawr hian ngai a awh leh dawn mi? Mawl lutuk. " a ti chiam a. Mi zawng zawng chuan an lo ngei ru vek. A khawsazia hi an mil loh rukna a rei tawh hrim hrim a. A pa nihna chhuangin a chapo tlat atin ni. 

"Ka tihpalh takzet a ni.. " chu waitress hmel khawngaihthlak tak chu a hmu thei ngang lo nge Zothana chuan a chair chu nawrsawnin a va pan a. 

"Ka coffee tur a nia, a tihbuak man chu ka lo chawi dawn nia" a va ti a. 

"I pa thla khat hlawh pawn ka kekawr man hi a daih lo vang" 

"A thla hnih hlawh ka hmang mai aniang chu"

"Lo inrawlh lo mai rawh. Intihfel viau a ngai lo.. "

"Nasa lutuk" a ti hluk a. Waitress chu a kai a, "Cofffee chu min lo lak leh mai ta che. Engahmah ngai suh" a ti sup a. 

"Ka tui tla min chhanchhuah vang khan min thunun theihna neiin i lo inhre ngawt ange.. Ka tan engmah i ni lo" a ka rawn ti hram. 

"Ka tan phei chuan i ni lo lehzual" a lo ti ve hmak.!  Sangtea mak tih a tling. Zothana hi hetiang hian a tawng ngai lo. A ngei ve hle a ni mahna. 

Ateii chuan ngei rawn a hlawh chho ta der mai. A mize ngeng ngalh leh chapo tak chuan mi a lèm hlawl lo a ni ber mai. Senior te nen an picnic tumte chuan zak map lovin zu a rui ngam. Mahse, a ruka sawi sep sep bak tumah chuan an ngam lo nge a lang apau chuan an be chhe ngam tak tak chuang lo. Sangtea pawn bialnu a nei ve leh ta, Zothana erawh a la mal tluang zel. An picnic ni chuan an senior ami Lpi nen an ck ve zuai! Picnic nikhuaa rui chhe lo tawka zu in ve zauh a ni tih hi an vengah an hre lem lo. Chumini pawh chuan a in ve a, a kai phur ve deuh chu Lpi chuan a ngam hârh hârh bawk a, hmun falah an inkaih chhuah ve ngei kha.. 

Sex erawh an hmang lo. Khawih erawh an inkhawih tawn viau anih hmel, an lungawi tlat! An picnic zawh hnu lamah erawh Zothana chuan hmelhriat ang pawn a be ngai meuh si lo va, Lpi pawh chu a beidawng chhawm ta aniang. A rawn dik dak ta lem lo. 

Kum a thar a, an senior te an chhuak a, senior an rawn ni ve dawn ta. 3rd sem an kal that tak tak hmain a hma zawnga an lo sawi leh rel tawh, an lo intuak tauh tauhna chu tihhlawhtlin zai an rel dawn ta. An phur ngei mai. 

Mizoram khawthlang lama puk an hmuhchhuah pakhat, Ruhro Pûk an tih mai luhchhuak turin thla thar ni 2 ah an zin chhuak dawn ta. He pûk hi tuman an la luhchhuak lo va, a thimin a rimchhia a, a hmuchhuaktu hi Tlabung pa a ni nghe nghe. Ruhro a tam em em a, mihring leh ramsa ruang a ni ber. Mi mak tih a hlawh a, eng emaw tak puk chhungah chuan awmin an ring. Adventures club te pawn zuk tlawh tawhin puk kaw tawp an thleng bik lo, a khirhzia hahîpin an sawi. Geography Department te chuan field trip ni pah fáwmin ngen tak tein an zirtirtute an dil a. Sponsorship te zawngin, Ateii pa ngei pawn a sponsor ve a ni. Sum lamah an pháng ta lo bawk a. Kal hun an rel ni chuan an ri teng tung mai. An class an inpawh tha hlawm bawk a, an chák tawh ngei mai. 

An kal ni tur chu a rawn inherchhuak ta. Zothana pawh a tho hma ve kher mai. Apain tawngtaina nen a thlah thlap a, phur takin innghahkhawmna lam chu a pan ve ta a. MZU bus-ah chuan an thu thap a, An sir Hruaia chuan tawngtaina neiin an tum ram panin an chhuak ta a. 

Sialsukah tukthuan an ei a, an hlim tlang dar dar khawp mai. Ateii'n boruak a siam leh hat pek a.

"In arsa hi a dai, chhuang lum teh u. Arsa akara dai lehnghal ka ei ngai lo" a ti a. An buai ve bawk si, an lo ngaihsak tha hman vak lo nge ni, plate chu a la lawk a, amahin chokaah a va lut a, a va chhuang hmiah. Hotel neituten zai an ngai hlauh a, bakah an lo tidik bik lo bawk a, an ngawi zui thei hram. Thil mak tak pawh a ni lem lo. 

An tlanchhuah hnu reivak lo ah chuan an muthlu ta hlawm a. Zothana leh sangtea chu a hnung ber dawttuah an thu a, Sangtea hian bialnu a nei leh tawh lo pek a!  Single rei erawh a tum lem lo. An ni pawh chu an muthlu ve bawrh bawrh a. Motor rui an awm lem lo. Thenzawlah an ding zuai a, an kal leh nghal. Lunglei la kal ngai lo an ni deuh thup bawk a, an hawkdak chho tan. Pukpui an luh phat atangin an harh tha hra tawh mai. An lut thuk zel a. Lungleiah chuan an ding leh zuai a. Mamawh eng emaw te an lam khawm a, an tum ram an pan leh ta. 

Lunglei thlang lawka khaw lian lo tak Hauruang chu a khww dung a sei hlein an hria a, Hauruang an pelh hnu lawkah an muhil leh tan ta. Phairuangah thingpui an in a. Muangchang vak tawh lo vin an tlan leh ta par par a. 

Zan dar 7 velah Tlabung chu an thleng ta a, Kawng a tha ve tawh bawk a. Hmanhmawh vak lo vin an tlan bawk a, an thleng tluang viau tho mai. Lodge-ah innghatin an insingsa ta nak nak a. 

Zanriah chu zan dar 9 ah an ei hman ta hram a. An chau tlang bawk a, an mu deuh nghal mai. A tukah Ruhro Pûk lam panin an chhuak leh dawn a ni. 

Khua a lo var a, zing kar mah nise; a lum hle tho mai. Tukthuan an ei kham chuan an insiam leh ta sap sap a. Bus-in Ruhro pûk a thlen theih dawn loh vangin an mutbu te pawh a zangkhai thei ang berin an keng kha a ni reng a, inpu bawr luk lukin an chhuak leh ta. An vaiin mi 21 an ni, Hmeichhia 8 an ni. An sir Hruaia a kal tel bawk a. Ani hi heti ang lama tui ve tak a ni bawk a, naupangho zinga tal nuam ti mi a lo ni lehzel nen, a phur ber berah a tang a ni. 

Tipirigat an thleng a, bangla thil an mamawh tur angte chu an han lei leh sap sap a. Bus-in thui tak lo an tlan hnuah an bungrua nen chuan an chhuk ta sap sap a. Ke in an kal tawh dawn a ni. Bus driver leh hadleman te erawh an kir leh a ni. A tuk maiah va lam leh a ngai dawn tho a, va kal chauh ve vak ai chuan tiin a hmun an lo nghak dawn a ni. 

Mipa ho chu an bawr lehzual a, zan an riah dawn avangin eirawngbawlna bungbel leh bawlhlo te an ken a ngai miau si a. Tumah inphût awm lovin phur takin an inchhawk ta liam liam hlawm a. Ruhro pûk hi a hla lutuk lem lo naa a kal khán hi a nuam fahran lo va, chuvanga tlawh pawh loh a ni reng a. Khua lah chu a lum huam huam mai a, mahse, phunnawi an la awm lo. Chawhnu thlangherah an tum ram chu map en chungin an thleng ta. Pûk chu a biru fû mai. Mahse, engkim zir chiang tawh an nih vangin an hai tawh lem lo. Pûk thlang kawrah chuan tui tlem a lo awm ve hlauh a, an zuk chawi a. Thenkhatin riahbuk an sual a, thing fawm tawk an awm bawk. Zothana pawh hah sawi lovin a che zung zung a, hnathawh hi chu a zei ber pawl a ni ngei ang. Hmeichhe ho erawh an puan in kaihah chuan an tlu phung a. Mipa ho chuan an phût bik lo. 

An ril a tam tawh bawk a, eirawng an bawl ta vat vat hlawm a. An chawhmeh ken dal leh alu, bawkbawn tih vel chu a awlsam thei ang bera siamin chaw an chhum a. Khaw thim tak tak hmain an ei ta a. An eitui hlawm phian mai. Puan in chu hmun li-ah an kaih a, zanah thla a lo eng ve kher nen, meipui chhepin an han titi mam mam a. 

"Sir, naktukah kan luh chhuak hman ang maw? " zothana chuan a ti sap a. 

"Ka beisei chu a nia, Siama (bus Driver)  te pawh kha tlaiah rawn kal turin ka hrilh, zanriah chu Tlabungah kan ei hman turah ka ngai. Nileng te chuan kan luhchhuak hman turah ngai ang" a ti duah a. 

"Sir, lut ve lo ila a pawi em? " Rinawmi chuan a lo ti ve a. 

"Lut tur lo chu hei chen i va kal peih ve" Ateii chuan a lo ti leh hlak a. An nui dar dar a. 

"Ka hah sia, ka peih leh lo ee.. Bakah ka hlau deuh" Rinawmi chuan a ti ve mai a. 

"A hlauhawm loh, a rim erawh a chhe deuh maithei.. Vawi khat pian ve manah i lut ve ang chu" Sir chuan a ti a. 

Mu turin an insingsa ta hlawm a. 

Harsatna em em tawk lovin zan chu an tumtawi ve thei ta phawt. An chau tlang bawk a, an mutui phian. Hmeichheho erawh an zun dawnin an inkaitho zel a. An tho zut mai. Mut eraeh an kham ve tho ang chu.. 

Ni chu a lo chhuak leh ta sur sur mai. Zothana chu a tho hma ber a!  Mi dang thawh hmain tui a zuk chawi ngah vek a, eirel a buatsaih ta nghal a. An rawn tho ve tak tak a, an rawn pui ta hlawm a. 

"Zothana hi chu a fel reuh ngawt mai, ngawi reng hian a thawk mual mual reng a"Seni'n a ti sap a. A bula ding chuan ner sâwng chungin, "Inlak mark that a tum anih saw.. " a lo ti hmak. Seni chuan a enzui vawng vawng ringawt. "Ti nge i nunna chhanhimtu hi i huat viau le" a ti zui sap a. Hmai phih turin a kal ve nghal a. 

Pûk ko-ah chuan an ding khawm laih a, an thuam famkim nen an intam at tawh. Meichher pawh an hum far a, Sir Hruaia chuan hma a hruai a, an lut tan ta. Zothana'n hnu a rawn dawl a, pûkah an lut fel tihah anmahni lo thlir rengtu an piah lawk Far thing phena biru chu rawn chhakin, a biakhlatna chu a hmet nung a. 

"An lut fel chiah e.. " a ti sup a. 

"Mi 20 ka rawn tir e, an rawn chhuah rualin in tingmit dial tur a ni" lehlam ami chuan a rawn ti fiak thak a. 

Mizo tawng an hmang lo va, ngaihthlak chian chuan chakma tawng tih hairual erawh a ni lo. 

Pûk chhungah erawh an zinga phawk zet mai Zara chuan, "Kan luh chhuah hun chuan ka intithei ang chu aw.. Aizawl tlangah ka hawi champ viau ang" a ti vau vau a. A khawk rum rum bawk a. Zara leh a thian te chuan Aizawl tlang an hmu leh thei kher ang em le…? 

To be cont…