Comrade

COMRADE…! 

Ziaktu : Toni Râlte

"U, ka kal ania aw.. "Tih leh chhuah ka rual nghal a. Vawiin hi MA (pol. Sc)  zira ka class kal vawi khatna tur a ni a. Ka phur rualin ka huphurh em em bawk. College kha T. Romana college-ah ka kal a, thian mumal sawi tur ka nei lo. Tuai pakhat Lalhmaa nen kan inkawm ve a ni deuh mai a. A hrehawmzia leh a zahthlakzia ka hre tawh a, ka huphurh reng a ni. Lalhmaa lah Singapore-ah a kal daih si a. Ramhlun south-ah mi in hnuai luahin ka pa leh ka u te nen kan khawsa ve a. Ka nu chuan kum 15 ka nih kumin min boralsan tawh a ni. Ka nu khan Thluak cancer a vei a, a inenkawlna senso atan kan in pawh kan tiral ta hial kha a nia. Mahse, natna chu kan hneh thei ta chuang lo. Mi in hnuai kan luah phah ta chu a nia. Mahse, ka nu kan enkawlna senso avang khan kan inchhir ngai lo. Ka pa hi mistiri a ni a, inhlawhna tur hi chu a hmu ve thei mai zel. Ka u erawh puanthui zirin tunah chuan khawl a dawng ve hlauh a, kan in lamah thenawm khawveng te kawr tur thuiin a buai ve tawh hle a ni. Dawr han hawn te pawh a chak viau naa, bultanna tur kan nei ve ngang si lo va. Unau hi pahnih chiah kan ni hrim hrim a, ka nu kha a hrisel lo èm a, ka u nen pawh kan kum a inthlau angreng viau. 

MZU bus chu ka chang ve ta ran a. Mi dang pawh an awm ve nual, min be lo va, kan inhre ngai lo bawk a. Ka mal leh ngawih ngawih dawn nia ka hriatna chuan mahni inkhawngaihna min neihtir leh a, kan hausa ve si lo va, tunlai thawmhnaw an uar ang te hi an uar tawh loh hnu a thin hnu feah ka nei ve thei chauh zel a. College ah pawh khan tu khaw kha ngaihsak ka ni lo reng bawk. Fashion hi thian siam nan pawh a pawimawh tih ka hriat phah. Mahse, ka u leh ka pa te hian min fuih kal ve reng a, tin, ka u hian second hand te hi a fit tha a, tlem chuan ka thawmhnaw pawh a zia ta deuh. Ka pa hian MA min passtir ve hrim hrim hi a tum em a, keipawh ka tumruh phah ve thin. 

Ka hmel tha lo va, luck pawh ka luck lo. Ka vanduai asiamin ka nghawng bawr vel ka âwm thlengin ka tet laia tuisaa ka in leih palhna ser a awm duai a. A langsar si a, high neck hak reng thu a awm si lo va. Hrehawm ka ti thin. Mi lah hian min en duh phah phian lehnghal. Ka vun erawh a pangngai a ni mai. Ka sam a dum a, a ngil a, ka zuah mawl tawp. Aizawla awm mah ni ila, thingtlang nula te pawh ka tluk lo. Ngaihzanwg pawh ka nei ngai lo. Ka tleirawl lai hian ralkhat inngaihzawn ve ang deuhin kan veng thenawm ami nen kan ni ve a. Vawikhatmah kan awm dun lo. Chu chu ka love line awmchhun a ni mai e. 

"Tukverh bulah khan ka lo thu mai. Ka rui thin a" a rawn ti a. Keimah ang rual vel, mi hausa fanu tih hriat tak rimtui leh hmel tha zet a ni a. Ka lo kian ve mai. Ear phone a vuah nghal a, biak zui ngaihna a awm lo. Ka phone ve chu phawrh zen zen chi pawh a ni lo. A man a tlawm ngawih ngawih tih a hriat. Mahse, ka scho lak atanga ka lei ve kha a nia. Ka ngaihlu takzet. Engkim a khawih ve theih tho bawk a. Lehkha tal hi thiam tum ila a tha a ni mai. 

Mzu kan thleng a, kan department awmna chu admission kan lak khan ka hre tawh a. Ka kal ve nghal mai. Class room ka luh chuan an lo thu thap tawh a. Zak leh kimki takin thutna tur ka melh pah a. A hnung ber dawttu chu a la awl a. Ka va pan a. Bus-a ka thutpui nu kha a hnuhnungberah a lo thu a, "kha lai kha chu kan hauh tawh. Kan thiante an lo thu dawn" a rawn ti chang fak a. 

Tlar laia a hmasa ber dawttu chu a la awl a, ka va pan leh a, a hnunga mipa lo thu chuan, "Ka thianpa te thutna tur a nih kha" a lo ti leh bawk si. Ka melh kual ruai tawh. Tlar veilam hmasa berah chuan hmeichhe pakhat a thu a, a bul chu a la awl ringin ka va pan leh a, a bag a lo dah hmak bawk si. 

"Lo kal rawh. Hetah hian" titu lam chu ka va hawi a. A thiannu niawm tak nen an thu dun bawk si. Pahnih thutna tur niin ka hre si. Ka va pan tho va. 

"Terem, a hnungah hian thu mai rawh. Ka bulah thu mai rawh se" a ti a. Teremi a tih chu a hnungah a insawn chho a, thianho vek tho an nih ka ring. 

Chu chu Catherin-i ka hmuh hmasak berna chu a ni. 

Patil a nih duh hmel ka ti a, hmeichhe thawmhnaw a inbel miau lo va, a sam erawh a dar thleng vel a ni a, negro sam phiar ang hian a phiar a. Tshirt dum lose hek hawk a ha a, jean erawh tlemin a mar deuh. A lan dan chu a pa tawp!  A hmel erawh a tha. Make up hmang phei se chuan kan class-ah a hmel tha ber mai thei ni. A mitmeng chu a lian kel kawl hle, a zahawm ru riau. A hmui chu lipstick hnuhma tel miah lo vin sen ham a. A vun erawh a dâng mah mah tih theih tur a ni thung. 

"An inhauhsak vek thin a. A buaithlak anih hi. Tu nge i hming? " a ti zawm zat a. Chewing gum a thial tâwlh tâwlh bawk. 

"Arini ka nia.. Nang " ka ti ve sap a. 

"Catherin ka nia, Cat tiin min ko thei ang. " a ti a. 

Sir a lo lut a, kan ngawi ta a. Introduction kan han nei hlawm a. Zinga busa ka chuanpui kha, Lawmi a ni a, Ramhlun tho a lo ni ve. Cat erawh Chammari a ni thung. Thian ka nei ve dawn ta niin ka hria a, tlemin ka hlim ve deuh. Mahse, Cat chu Teremi te ho chuan an bekbawr leh sar sar thin a, a nuam vak lo. 

"I nghawng ser hi ti nge? " Cat chuan a ti ta a. Ka sawi ve mai a. Kan tawng leh tawh lo. Ka mizia hi mi va be siam siama thian siam thiam tak ang ka ni lo va. Ka zum dûk thin, mize thing deuh ang chi ka ni ka ti mai. Chhun chawlhah chuan an chhuak ta diak a. Ka mal leh ta. Canteena han kal ve pawh chu ka zak!  Riltam ru deuhin ka thu ta reng ringawt a. Ka tah te pawh a chhuak lek lek. Kan college atanga kal ve pahnih an awm a, min hre ngai lo angin an awm. An hmelhriat atan ka zahpuiawm a ni mahna. 

"I rawn lang ve si lo va, i riltam ka ring. Kha ka lo hawn che a' tiin Cat chuan pakora pahnih hi min pe a. Ka han melh háw ringawt. A lo nui saih a. Tui nen ka ei ta a. Ka lawm ngei mai. 

"Busin mi i hawn ang" a ti a. 

"Um a ni mai" 

"Scooty chu ka keng a, mahse, Teremi hi ka phur dawn sia"

"Aw, bus ka chang mai ang, a ngai lo ka lawm lutuk" 

"Vawiin chu busin haw phawt la, tih dan kan ngaihtuah tha dawn nia" 

CR kan thlang a, Siama an thlang a, a patling ve deuh bawk a. Asst. CR ah Lawmi kha an thlang thung. An thianho an tam bawk a. Ni khatna chu tluang tak chuan ka hmang ral ve ti tawh mai ang. 

A tukah pawh Lawmi nen bawk kan thu dun leh. Min be lo va, ka be bik lo. Cat te pawh an lo awm tawh a. Lehkha kan zir ngawrh nghal angreng. Sir te ho an taima ropui si. Sir chhuah hnuah Siama leh Lawmi chu platformah an ding a. 

"Kan class whatsapp group kan siam dawn a, in number kha hetah hian in lo ziak theuh dawn nia" tiin lehkha chu tlar hmasa bera thu an pe a. 

"Chuan senior ten fresher social min hmanpui dawn a, items neih ve a ngai dawn a. Eng nge kan tih ang? Sawi khawm ang u" a ti leh a. Lawmi chu a lu a zawh hmel khawp mai. 

"Zai mai ila" kan piaha thu Dina chuan a lo ti a. Kei leh Cat chu kan ngawi reng. Zai chu an titlu ta a. Chawhnuah hla kan zir nghal dawn anih awm chu. Zai hi ka talent lo ve rapthlak a. Ka aw hi a lai tlat zel. Ka phur fahran lo kher mai. 

"Vawiin chu car ka keng a, kan rualin i haw ve dawn nia"/Cat chuan a ti a. Ka rin phak bak a ni e. Mahse, Teremi hian min mil vak lo in ka hria, min thik a ni maithei. 

"Bus pawn ka haw thei tho asin" ka tia. 

"A ho em mai. Bus chu a tawt thei si, a ninawm" a lo ti hlak a. An thian pathum zingah palina ka ni ve a nih mai chu. Cat chu an boss deuh ber niin ka hria. An hausak hmel bawk si. Apa in eng hna tak thawk ang maw.. Canteenah pawh an rualin ka kal ve ta. An thil chah chu a to hlawm ngei mai. Kei erawh egg rice ka chah, ka retheihzia ka hai si lo va. 

"A mak.. Bahkhawr an telh ve ziah. Ka lo hrilh lo ve bawk a ni. Arin, kha ei mai teh.. Paih ai chuan" tiin Clear soup chu ka lamah a rawn hnawl phei a. A man zat tur ka lo mitthla nghal, "A man ka pe vek dawn tho. Ei rawh" a rawn ti. Ka thaw huai, ka zak tho bawk si. Thiante treat ngaia han awm chu. Mahse, egg rice ringawt chu helh a awl sia, soup nen chuan a zia ta deuh. Class-a kan chhuk leh hnuah kan zung a, Cat erawh class roomah a lut nghal. 

"Bahkhawr a ei ngai reng sia, ti nge tikhan a tih le? " Cat thiante zing ami tho Ruati chuan a ti a. Ka hre pha lo emaw an ti a ni ngei ang. 

"A khawngaih aniang, an retheih ve hmel èm a. Awii kei chu ka zah zawng tak, thiante khawngaih ngaia awm hi" Teremi chuan a ti sar sar a. A tawng ring lui bawk. Hria ila a duh a nih ka ring. Ka na zWk zawk. Mahse, engmah ka sawi duh lo, ngawi rengin ka chhuak a. Ka ngawichawi ta khawp mai. 

"I va ngui ve" Cat chuan a lo ti a. 

"A lum èm a" ka lo ti daih. Thian tha tak ka nei ve dawn emaw ka tih laiin a thiante zing amiin min mil leh ta bawk si lo. 

Hla chu kan zir a. Ka thiamsa ni tho mah se; ka zai thiam loh em vangin ka zai ring ngam lo. Vawi 3 vel kan sak hnuah kan chawl lawk a, ka bula ding, Lawmi thutpuinu Sawmi chuan, "Nang chu zai ve tawh lo law law rawh. Phun rem mai rawh. I zai lai sia, ka zai lai ve vek' tiin min rawn kawk ta a. Min melh thup mai. 

"Aw le" ka ti ta ngawt a. Thenkhat chuan thudang an sawi a, mahse, Lawmi te thianho chu ka lam hawiin an phun sep sep mai. Ka va zak tak em.. Mipa ho an awm ve bawk si. 

"Kei pawh ka hrawk hi an zai tawh a, ka aw a chhuak thei vak tawh lo. Arini nen a sirah hian kan lo ding ve anga, kan phunrem mai ang" Cat chuan ring deuhin a rawn ti lawng lawng a. Teremi mitmeng ráng ka hmu nghal. Tichuan, a sirah kan ding a, kan phunrem ta ngawt a. 

A carah chuan kan thu thap a. An titi sap sap a. Lawmi an ei loh thute an sawi. Engmah ka sawi ve lem lo. 

"Arin, in vengah John-a kha i hria em?  A pa chu Zo puan neitu kha.. " Zaii chuan a ti a. Ka lo bu nghat a. "Ka ex anih kha" a ti sap a. Kan nui ho a. Johna chu a hmel tha. Zaii hi engtin nge a duh ni. 

"Arin, zaii leh Teremi hi kan thianhoah an luck ber a, an lerh ber bawk. " Cat chuan a lo ti ve a. 

"Lerh te chu a ho em mai" ka lo ti ve mai a. 

"Lerh te chu luck vang alawm, Arini, nang te chuan bialpa pawh i nei ve tawh mi? " Teremi chuan a lo ti nghat a. A tawngin mei a nei tih ka hrethiam ve. 

Ka chhan hmain, "Hmm.. Kei pawn ka la neih loh hi, Arin, lungngai suh. Bialpa ai chuan games pawh ka thlang zawk" Cat chuan a lo ti var a. Ka thaw huai. He nu hian min va chhan zing ta ve le.. Teremi a tum hmak. 

Kan in peng thleng min thlah a, hlim deuhin ka haw ve ta. Ka in bual a, chaw kan ei nghal. Ka pa chuan min fuih leh char char, ka u pawn a lo tuihnih ve zeuh zeuh. Thian ka chhar thar thu te ka sawi ve luam a, fel ka tihzia te.. Min lawmpui ve khawp mai. Ka u hian bialpa te pawh a nei ve fo, pasal. Nei lo rual pawh a ni tawh bik lo, mahse, keimah leh ka pa vang hian nei thei niin a inhre lo nge a hnar zel a. Tunah chuan a senior pawl a ni ta. Ka khawngaih thin. Kei chu naupang zawk tih takah eng em em ka thawk vak lo, ka u erawh pawl sawm a pass a, a bang a. Tihian puanthui te a zir ve leh a, a zir zawh hnu khawl a neih hma te phei kha chuan vawk te a vulh lawp lawp a. Thawh hreh engmah a nei lo. Ka zah reng bawk. 

Zanah Cat chuan min lo whatsapp a, "Naktukah ka lo kal dawn lo va, inentir ka ngai a" a rawn ti a. Ka hnual rawih. Ka hmaa ding ber kha a ni a. Ka tè leh ngawt ang. Kan class ho groupah pawh min lo add ve a, inhmelhriatsa ho an inkawm char char a, tel vena chiah pawh ka ngai lo. 

Cat tel lo chuan a nuam lo. Hla zir pawh ka phur lo kher mai. Chhun chawlh a hun a, Teremi ten min kalsan hmak. Ka zui duh ta bik lo. Ka thu leh tlawk tlawk ringawt. An lo lut khawm tan a, Zirlaibu ka lo keu vel mai mai. Zung turin ka tho a, kawngka ka kan chiah tihin Lawmi leh a thiannu an rawn lut a, kan insu chawrh mai. A dhoi ken chu a thlauh chuai a, a flat varah tak a zu baw ta. 

"Meng ta che. Mawli.. " a ti tuar a. 

"Ka tihpalh lutuk.. " ka lo ti vat. 

"Ka flat hi engzat man nge i hria em?  I dam chhung pawha i neih zawh loh tur a nih hi. Tifai rawh" a ti vin leh thak a. Class rooma awm ve te chuan min en thup. Ka zak takzet a ni. Ka bagah ka romol ka va la chhuak a, "Khatiang romol uih hmel lutuka tihfai ka duh lo. Kha hei hian hru rawh" tiin a romol ah lai chu a phawrh a, ka zuk hru ta a. 

Ka chhuak tur chu, "Kangbangnu, thil ei pawh i titui lo, i nghawng ser te kha thup ve tawh rawh" a ti leh kher a. Ka sa zak. Mahse, chhantu leh thlavang hauhtu ka neih lohzia ka hrechhuak vat. Mittui tling piau chungin zun in lam ka pan ta a.Sap movie velah Bully lam ka en fô!  Ka chunga thleng ve turah ka ngai phal ngai lo. Mahse, Mizorama zirna sang berah ka tawk mèk a ni. A chhan chu ka retheih vang leh ka taksa lan dan vang a ni. 

Ka chhoh leh hnu chuan titi dang an lo sawi tawh nge min ngaihven vak tawh lo. Teremi te erawh an phun ser ser a. Eng nge an sawi ka hre lo. Zaii nen an inkawm char char a ni mai. Kei erawh mal takin ka thu leh ngawt ngawt. Tah hi ka duh ngai lo, Collegeah kha chuan kawm tur em em nei lo mah ila, tihduhdahna ka tawk lem lo. Lalhmaa nen khan kan inzui ve tho bawk a, amah kha an chhaih zawk mah. Hetah erawh ka batchmate te ngeiin min hmusit ta chu a nia. 

Hla zir dawn chuan, "Kei chu ka phunrem tho sia, a hla ka hre chhuak tho bawk a, ka lo han haw mai ang chu" Tiin CR siama chu ka dil a. A tawng hma hmain, "A theih loh, awm vek tur. Zai thiam lo ve hle mah la, a tikimtu atan i tha ve lawm.. ". Lawmi chuan a lo ti leh nghal a. Mahse, vawi hnih kan zai zo a, ka haw daih. Duh leh engtin pawn min ti mai rawh se. 

A tukah Cat a lo kal ta bawk a. A zia ta deuh. Nimin boruak kha ka hrilh lo va, hre lo mah se a pawi lo. 

"Hawn ka phal lo a ni lawm ni?  Eng ati nge i lo hawn tálh a. Cheng za i fine ang., hre rawh. Naktukah lo keng ang che"Lawmi chuan a lo ti nghal hmawk hmawk a. Ka ngawi reng. 

"Chu chu eng rules nge? " Cat chuan a lo ti fiak thak a. An en nghal thup. 

"CR ten rules kan la siam chiah lo naa hawn kan phal loh hnuah a hawng a, min zah lo hrim hrim" 

"Kha la rawh. Cheng za chu.. Ka lo pe ang.. " Pawisa a phawrh nghal. 

"Cat, a ngai lo, ka nei ve reng alawm.. Ka pe mai ang" ka lo ti nghal vat a. Ka purse ka phawrh nghal. Tukina ka û min pek 50 leh nimina ka hman loh 50 chu ka phawrh vat a. 

"A tir te khan phawrh nghal ta che. Thiante tanpui ngaia awm tum ziah" Teremi chuan a lo ti nghal bawrh bawrh a. 

"Naktukah a ti sia" ka ti niah niah. Ei loh hmel. Zetin min melh rám rám. 

"E chuan, nimina ka pheikhawk i tihbalh kha ka bun thei tawh dawn si lo va, i chawi a ngai ang. Cheng 2500 man a nih kha" Lawmi chuan a rawn ti leh. 

"Enteh, ka duh vanga tibal pawh ka nih loh kha. In lo lut ve chiah a, kan insu palh a ni mai a" ka ti ve ta ngat a. 

Cat chuan kan hmaa thu Ruati chu thil awmzia a zawt a ni ngei ang. A hmel chu a tur nghal khui mai. Lawmi chu a va pan a, "Hei nang hi, Asst. Cr i nih vang hian i thu ber emaw inti suh aw. Lal i ni lo ania hetah hian" a va ti nghal tâwng.

"Lo inrawlh suh" Lawmi chuan a ti a. 

"Ka thian a nia, ka inrawlh ang, nanga pheikhawk bal hrufai tur khawpa hniam a ni lo ania. I pheikhawk man a chawi chhan tur a awm bawk lo. I lo tibuai leh anih chuan a pawi viau ang" Cat mitmeng chu a nelawm loh kher mai. Lawmi chuan a ngam lo deuh nge,  a kalsawn ta daih a. 

"Ti nge engmah min hrilh loh? " Cat chuan a ti sap a. Teremi te pawh a melh kual. Kan ngawi thap mai. 

Canteenah pawh ka chawl ve ngam dawn lo nih hi, ka pawisa neihchhun ka pe vek si a. An chhuah sung sung lai chuan, "Arin, kei chu Canteen khi ka hne. Mi an tam thei sia, ka han packtir mai teh ang. Lo awm rawh aw" tiin Cat chu a chhuak ve nghal a. A rilru ka hrethiam ve vek. Teremi te chuan min va ngei leh dawn tak em. An inthianthatna tihchhiat hi ka. Duh lo sin le. Eitur tam deuh kengin a rawn chhuk leh vat. Kan pahnih chuan kan ei dun ta a. Ka hnuk a ulh tlat nia! 

"Cat, ti nge min ngaihsak em em.. Engmah ka ni si lo va" ka ti ta thlawt a. A nui sak a. Kan eitur ei ruahna chu a va paih a. A rawn let leh chuan min rawn thut hnaih a. 

"A chhan chu nangmah ang chiah hi ka lo ni ve tawh thin alawm" a ti ta a. Mak ka ti tho, an hausa sia, ti nge keimah anga thian a neih loh ve tho le.. Zawh chiah ka. Chak a, ka ngam chiah si lo. Engtikah emaw chuan ka la hre èm ang chu. 

Hun chu a kal ve bek bek a, Cat nen pawh kan inzui ve ta zel mai. Ka boss en a ni deuh ber. Teremi pawn min la mil chuang lo. Engah vak ka ngai duh ta bik lo va. Kan inkawmho lo thei chuang si lo va. Cat chu kan inah te a rawn leng ta hial. Ka u nen pawh an inkawm thei phian. A zia hi ka duh a ni tawp. A bula awm te mizia ang zelin a insiamrem thiam thin. An ina leng tura min sawm ngun tak em vangin ka leng ve a, pui tak a ni. A pa erawh a boral ve tawh a, anu chu mizo nu lar tak a lo nia, a tirah khan a sawi si lo va, ka lo hre lo anni. Mizo zingah a chhang siam hre lo chu an vâng viau ang. Tunah chuan dawr ringawt pawh 4 an nei a, Lunglei leh champhaiah pawh an nei. Chuvanga hausa chu an lo ni.. Api in a la dampui a, a nau mipa pahnihte nen an chengho a ni. An fel em em a, a nu phei chuan chaw ei ve nghal turin min sawm nghe nghe. Mahse, ka zak a. Ka hnar. 

Lawmi leh Teremi min mil lohna a lian chho zel a. A hahthlak tih chang ka va ngah tak. Lawmi thiante zawng zawng chuan, "Kb" tiin min ko thin. Kangbang tihna mai a nia. Ka retheihna hi inbawhbehtir loh hram ka duh viau naa, a chang chuan keimah ka nih vang leh chhungkaw rethei tak atanga lo piangchhuak ka ni hi pawi ka ti thin. Mi chhel tak ka ni bik si lo va. Senior te nen kan picnic dawn a. Ka phur fahran lo hle. Mahse, Cat in min sawm tlat si a. Busin kan kal a, senior te ho hi chu an fel viau. A hmun kan thleng a, chokaah kei chu ka lut nghal. Tui chen ve pawh chak viau mah ila!; ka phur lo. Senior hmeichhe pahnih an lo awm ve bawk a. Min be luam mai. Cat a lo lut ve a', " Ti nge i kal daih.. Tuiah cheng ve phawt ila.. Kan bawl dawn nia" a rawn ti a. Senior pakhat pawh chuan, "Ni e, zuk cheng ru, engmah buaina tur a la awm lo. Keini pawh kan cheng dawn" a lo ti var a. Cat han hnial chu ka hreh èm a, ka chhuk ve ta a. 

Tawnzau nen an ni fur a, kei chuan ka ha ngam teuh lo. Ka ser hi an hmu duh leh dawn em mai. Tshirt phui tak leh kekawr bul ka û min fitsak chu ka ha a. Tui hleuh te hi chu ka hnehsawh ve lutuk. 

"A tui chen kawr lo e, tawnzau i nei lo mi? " Teremi chuan a lo ti nghal. 

"Ka ser hi a lang chiang dawn  em a" ka ti ve mai a. 

"A ho e, kan hmu vek tawh tho" a ti nghat a. Ka chhang zui duh ta lo. Volley ball kan beng a, ka thiam ve vak loh vangin ka bang daih. Choka lama ka chho tur chu Lawmi ball chhar chuan a theihtawpa na hian ka lu ah tak a rawn vawm a, ka pai nghal chawn chawn. Ball a chang si a, ka hai chhalh mai. 

"Sorry.. Kb" a ti a. Pawi a ti tak tak lo tih a hmelah a lang reng. Cat chuan rum zetin a rawn melh a, mahse, mitmeiin ka khap. Senior te chuan thian infiamna angah an ngai maithei. Kan boruak zawng zawng an hre ve si lo va. Ei rawng kan bawl ta daih. Chutah chuan a tet lai chanchin min hrilh ta a ni. 

"Ka nu leh pa an inthen tirh khan kan naupangber saw hnute hne lai a la nia, kei pawh la naupang tak ka ni. Ka nu sawn chawhmeh kharchhawngin a zuar thin a, ka pi pawh a la tar chhe lo va, in lamah nau awm pahin eirawng a bawl thin. A chang chuan ka nu chu ka zui ve fó. Ka khawngaih vangin. Ka nu saw zirna ngaisang chi a ni a, kei pawh school thaa an sawiah zel min kaltir a tum ngat ngat thin. Home mission-a ka kal lai kha ka retheih lai ber a ni. An hausa hlawm si a, thian ka nei ngai lo. Ka nu eizawnna an hria a, kawm enah min en lo a ni ber. Kei lah thian siam thiam chi ka ni bawk si lo. Ka chawhmeh zuar lai te min hmu fo si a, min hmusit a ni ber. Thian mumal sawi tur hre miah lo vin ka kal chhuak ve ngat a ni. Tihduhdahna em em chu ka tawk lo va, mahse, mal taka nun hman hrehawmzia erawh ka hrechiang tawh. College ka kal hnuah erawh a dan a dang ta. Ka nu thawhrimna zarah mi hriat hlawh a lo ni tawh a, in tha tak kan nei tawh bawk. Pawisa ka neih phawt chuan thian ka tlachham ta lo tih ka hre chiang hle. Teremi te ho nen hian kan inkawm chho ta a. An fel khawp mai. 

Ka hmuh tirh ni che khan keimah ang bawka mal taka nun hmang ve thin i ni tih ka hrethiam a. I mal lo tih hriattir che ka duh ta a ni" tiin. Cat hmel chu ka melh ngawih ngawih. Ka lawm a, ka ngaisang tel bawk. 

"Ka lawm lutuk.. Nang chu awm lo la, ka retheih dan tur ka sawi thiam lo zawk" ka ti sap a. 

Mahse, a in cheina danglam tak thin chu a chhan ka la hre chak chèu!  

"Nih, Cat, ti nge i thawmhnaw hi a danglam bik? " ka ti ta tawp a. A nui saih a. A hmel tha takzet. 

"Nia, hei chu ka miziain a than hnan a ni ber.. Ka unaute mipa ve ve an ni sia, ka nu vak lo a niang. Bakah nuam ka ti zawk a.. " a ti ve mai a. 

"Bialpa i la nei bik lo maw? "

"Nei nang, kan nei rual dawn nia.. " a nui kar kar a. Ka nui ve tawp. Mipa a ngaihsak lohzia chu ka hre tawh hrim hrim. Luck erawh a luck tih ka hria. 

Teremi te an lo lut a. An rawn phul hlut. Thudang kan sawi ta daih a. Chaw kan ei a, Lawmi te chu kan piah deuh, min hmu phak siin an thu a. An rui deuh niin ka hria. Senior te pawh an rui ve tho. 

"Kei chu ka ei lui thei tawh thlawt lo. Thil ei titui lo deuhtu ka hmachhawn run a" Lawmi chuan ring fe hian a ti a. A tho nalh a. Min rawn melh bawk. 

"Chaw ei khawm tih velah chuan thu hrang tawh rawh. I hliam ser kha chaw ei titui lo tu a nih kha.. Kb" a rawn ti zui!  Chutiang em ema min hmusit chu na ka ti bawk aniang, ka chaw thial lai ka chawl hmak. Ka lem lui hram a ni ber. 

"Lawmi, min hmusit mah mah lo maw?" Ka ti ve ta sak a. Cat a awm vang a ni pakhat. Ka thlavang a hauh dawn tih ka hre tlat a. Senior pakhat a rawn ding a, "Kan junior te hi duh aiin in nasa tlat. Senior te zahna chang hre bawk si lo. Sawi zui in hlawh viau ang" a rawn ti ta hmak a. Senior zinga a zahawm ber kha a ni bawk a. Tumah kan tawng ngam tawh lo. 

Senior ho nen an in mil lo chho tan ta bawk a. An inrunluih nasa thin teh e. Keini ho chuan kan lo thlir tawp. Lawmi mize chapo tak chu ei lotu an tam tial tial a, mahse, a takah an be chhe ngam chuang lo. An neinung em a tin ni. 

"Mate, games khel ve rawh. Mobile legend hi.. Kan khel dun thin dawn nia" Cat chuan a ti hlut a. Ka khel thiam awm tawp si lo. 

"A phone ah khan a leng nang"Ka chhan hmain Teremin a lo ti leh! 

"Nia, ka phone memory a te lutuk" ka lo ti ve a. 

"Tun ang generationa khatiang la hman" tiin Teremi chu Zaii nen an nui hak hak a. Ka ngawi reng. 

"Kha khel ve hrim hrim chhin teh.. Ka phone ah hian.. I thiam ka ring tlat.. Hei hi enemy base a nia, turet sen ho kha tih chhiat zel tur, mi te tak te te lo lang kha minions an nia, enemy lam kha thah tur aw… lawk.. Aw kap rawh. Tikhan.. " tiin a tihdan tur min hrilh pah a, kan nui tlawrh tlwrh mai. Ka zei lo ve lutuk bawk nen. Mahse,  a nawm hmel ka ti. 

Zanriah kan ei laiin ka pain ka nu lungphun chungchang a sawi a. "Kan intuak chho ve hret hret dawn nia.. Mipui sawm hut hut lem lo vin, thenawm hnai leh chhungkhat te nen chawhlui kan kil ve anga" tiin. Ka u nen pawh tha kan ti. Ka pa hi a dam phawt chuan hna a nei ve reng a, an hlawh te a lo sang chho ve ta bawk a. A zia ve viau mai. Ka u lahin tlem tlem a lo lalut ve reng bawk a. 

"Mate, engtik nge i birthday khah? " Cat msg chu ka chhiar a. 

"Mahatma Gandhi nen kan piang rual' ka va ti a. Smiley a rawn dah tuar. 

Note kan nei chho tan a, lehkha zirna lamah ka insawrbing tan. Cat buaithlak vena chu note a copy peih thlawt lo hi a ni. A tana ka tihtheih tawk tiin ka note neihsa hi ka xerox sak ve thin. 

"I tlawn thiam ngei mai" Teremin min tih pawn ka pawisa lo. Ka tan thian tha a ni a, a awmchhun a la ni bawk. Cat. Chu a lawm em em zel bawk a, chu chuan min tihlim ve thin. 

"I birthday chu kan inah hmang ila.. Kan thianho hian" a ti a. Awii, lawm pawh ka tum tawp si lo va. 

"Pawisa ka nei lo lawm.. Ka nu lungphun ve kan tum a, kan inkhawl ve sia' ka ti tawp. Ka zep peih tawh lo. 

"Pawisa a ngaih loh chuuuuu… ka nu chhang kan siamtir anga, tlaiah chaw kan ei mai dawn lawm.. I â siah" min ti èrh. Ka nui hawk. Ka pawm leh ta nge nge. A tawngkam tha ka um zel mai loh chuan.. 

Chutih lai vel chuan History department ami Ruatfela hian min rawn be ve nawlh zel a. Kan department a inhnaih a, kan inhre ve tawp. Ka thiante pawh ka la hrilh lo. Amah hi kan inrual vel viau ang, sang deuh mai, hmel chu pangngai thawkhat a ni a. A dress vel atang chuan kei anga rethei chu an nih hmel loh, bike pawh a nei nghe nghe. A zawhna ka chhang a, chu zawng chu. Ka. Be thiam ve der lo. Canteeenah kan bulah a rawn thu ve tharh a. Min rawn be nghal. Ka lo lai em em zui. 

"Vawiin tlai chu haw rual ila, min lo nghak la" a ti a. Ka nui tawp. Mawl min ti ngawt ang. 

"In ni mi? " Cat chuan a ti hû a. Ka chhan hma hmain, "Kan ni tèp.. A mah hi a la zak tlat a" a la tizui. Ruatfela mai mai chu. An nui thaw hlawm a. Cat pawh a khi sang reng mai. 

"A fel hmel kha, nihpui rawh.. " a kal hnuin a ti a. 

"Nei rual ang i tih kha. Nei ve phawt rawh" ka lo ti thung. 

"Hmm.. Tu nge ka neih ve ang le.. " tiin a ngaihtuah kual vel a. 

"A ho, neih rual kher.. A thing" Teremi chuan a lo ti leh hluk. 

"Ka hria.. Khitah Geography mi khan min la duh ang ka ring. Ka lo nih pui ve chhin dawn nia" a rawn ti hlawl. Kan khek tuar. 

Ni 3 a liam a, bialpa ka nei ve ta reng mai. Mak ka inti. Ka zak ngawih ngawih. Ruatfela nen chuan kan inphur ve det det ta a. Cat pawh a mi sawi Lawmsanga nen an ni ve ta. Kei ang bawka zei lo ve tho a ni a, kan sawi dun thin a, kan va hlim dun thei tak. Lawmsanga chu hmeichhe tam tak star rawn a ni. A changkang a, a hmel tha bawk. Kei pawn lo melh vung vung ka hrat. Ruatfela pawn min care thiamin min zahpui lo a. Ka lawm em em. Infawh bak ka ngam lem lo. 

Ka birthday chu a lo thleng ta a. Cat sawi tawh angin ka u te phalnain an in lamah kan hmang dawn a ni. Mipa erawh kan sawm ve ta lo mai. Kei man ka duh tlat lo. Mi va insenso tir vak kha ka zak ve a ni ber. Nu Rami (Cati nu)  chuan hlim takin min lo welcome a. Cati nau Lawmzuala chu hmel tha elkhen hi a ni tawp. A tuai mah mah zawk tih. Tur a ni. An naupangber Nunpuia erawh a sual hmel reuh. A luhlul tih a hriat reng. An fel em em vek tho mai. Nu Rami chuan chhang a lo ur diam tawh a, mahse,zanah kan zai dawn chauh. Eirawng te kan bawl a, bawl vak a ngai lo. Awmpui an nei a, a fel si, kan tih ve vak a phal lo. Cat roomah kan awm khawm a, guitar a lo nei khiau a, a man a perh a. Kan zai vak vak. Ka hlim ve thlawt. Teremi ten min tawngkhum vak bawk si lo. Ka birthday kha a ni ve miau a. 

"Arin, maimichhing rawh le.. I birthday present ka pe tawh ang che" Cat chuan a ti a. Ka lo hamhaih. Ka chhing ve mai a. 

"Lem.. Meng tawh rawh le" a tih rual chuan ka meng a, kareiii!  Smart phone ka awh ngawih ngawih, ka neih zawh ngai tura ka lo ngaih loh, Redmi Note 8 Pro chu ka hmai bulah a lo lek vá a. Ka hrilhhai letling. Amah chu a nui sen sen bawk. A hmelah khan Isua hmel ka han hmu ni maiin ka hria. Ka mittui a hnám a, ka hnuk a ulh. Tah èm chu ka hreh si. 

"Cat, ka la thei lo vang. A to em mai. Hetiang chu.. "Ka ti thei tâwk! 

"I piancham ka lawmpui vena che anih hi. I lak duh loh chuan ka paih anga a ni mai" a ti a. A ner deuh bawk. Lawm em emin ka la ta a, ka khur hial. Teremi mitmenga itsikna pawh chuan ka lawmna chu a hmetmit zo lo a ni ber. Ka hlim ber awm e. 

A games ngainat ber Mobile Legend chu min rawn thawn nghal. Chaw ei hmain kan khel ho nghal. Ka thiam lo lutuk chu min nuih char char mai. Mahse, ka hlim. 

Zanriah kan ei dawn a, Nu Ramin hunserh a hmang a, an dawhkan lian puiah chuan chawhmeh tuihnai tak tak a khat dul mai. Ka va puar tehlul em. Ka pa te ei ve atan ka awt mang e. Chaw eikhamah kan han chawl khawmuang a, dar 8 velah cake chu kan zai ta a. Kan hlim ve dar dar khawp mai. Cati pi pawh a titi ve siam siam mai. He chhungkua hi kristian chhungkaw diktak chu an lo ni ngei mai. Cat chuan min thlah leh thlap. Cake pawh ka u te eitur ka hawnsak ve a. Tui an ti ngei mai. Zanah ka muhil thei lo. Ka lawm lutuk chu ka khi tha reng mai a. Ka phone thar chu ka fawp thul.. 

Class kan la kal chho ve zel a. Zanah mut dawnah games kan khel thin bawk. Ka thiam. Ve tawh viau, Nana leh Chang'e pro ka nih hi.. Haha… Cat chuan Assasin a hmang thin. A bawn rap.., (ML khel ve lo te tan a ninawm takin sawi tam lo mai ang). 

"Mi hausa fanu thianah i siam a, i vannei lellawl khawp mai. Phone thar te i dawn phah a. Mahse, thiante zara nung i nih kha.. Zah nachang i la hre lo fo hi a mak" Lawmi chuan toilet bulah min ti siah siah mai. Hmeichhe pali an awm ve a. Min en thap. 

"Buaina ka duh lo ania" ka ti sap a. 

"Bialpa ka nei e te i ti ve a.. Haha.. Nawmchen nan bak a ti lo vang che".. A ti leh zui a. Ka chhang tawh lo. Buai hluai ka duh tawh lo. 

Ruatfelan an inah min hruai lui tlat!  Tumah an awm lo a tih vangin ka zui ve ta mai kha a nia. An lo awm lo tak tak. An in chu a thar vak tawh lo naa a tha khawp mai. A roomah min luhpui a, Almira tangin zu a phawrh a. A in nghal. Ka in ve duh loh vangin coke a va la a, min pe a, ka in ve mai. Kha coke kha lo in malèk tur hi a nia. 

A damdawi pawlh in hna a rawn thawh takah chuan ka danglam hneh khawp mai. Min bawh a, min ei huam huam a ni ber. Min phelhruak vek a, ka zawi nian mai. Rei tak ka lo hum ve tawh ka thianghlimna chu a chen ta. Ka hnar thei hlawl si lo va. Ka rilru pawh a fim vak lo. Sex kha a taste pawh ka hre mang lo. Nat erawh a na deuh. 

A tuka class ka kal chu mi zawng zawngin min melh!  Min en hrek hrek a ni ber. Cat chuan ngui zetin min lo melh a, "Ti nge" ka ti hû. 

"En la" tiin a phone min pe. Karei leh… nimin thil thleng kha chiang takin ka hmu ta. Ruatfela chu a hmel a lang hauh lo. Ka khur hlawk hlawk a, awmdan tur ka hre hauh lo. Ka tlan chhuak a, Catin min rawn umzui nghal. 

"Mate, hei.. Khaw nge kal i tum.. Tikhan awm suh" a ti lawm lawm a. Ka tap thawthang a ni ber. Kan inpawh buai laiin Mi dang an rawn pungkhawm a. 

"Kan kangbangnu chu i lo nasat kha le.. I nghawng ser pawh a lang chiang khawp mai. I lo turu reuh hle mai. Natna tha lo te hi i lo pai ru reng tawh lo maw? " Lawmi aw chu a ring bawk a, hre lo an awm ka ring lo. Khur zawih zawih chungin ka ding reng. 

"Khatianga tawngkhum theihna kha i nei lo aw. A hmang ve a ni mai. A mipa hian hremna a hmu khawp ang" Cat chuan a ti chang fak a. A mitmeng a ling hlar mai. An phun sup sup a, tupawh chuan uire melhin a ni min melh ni. Kha video ah khan inpawngsualna engmah a awm si lo, ka zahna ai chuan Ruatfela min bumna chuan min tina zawk. Amah lah a rawn kal lo nge a rawn dikdak hauh lo. 

"Cat, kei chu hetiang mihring kawm hi ka duh tawh lo.. Miin min hmusit zo vek tawh" Teremin a tih chuan ka harh chhuak nge tuma umzui hman lohin ka tlan ta vak a. Dar 12 chhuak bus ka nghak ngat ngat. 

Ka pa leh ka u ten thil awmzia an han hre ta chu rapthlak an ti ngei mai. Mahse, min hau miah lo. Khumah lukhama hmai phumin ka tap char char si a, hauh leh chuan tur ka awm lo. Zirna pawh bansan mai ka tum. Zan tirah Cat a rawn lang ta hlawl mai. 

"Pa Muan, FIR kan thehlut ngei tur a ni. He thil titu hian hremna a hmu tur alawm" a rawn ti. Ka pa te chu an ngawi reng a. A hnuah, "Mahse, kan dinhmun heti hi a nia, mi ten min hmuhsit phah zawk lo vang maw? " ka pa chuan a ti ta a. 

"Engvang ngawt chuan nge an hmuhsit ang che u, huaisen takin awm rawh u, an duhthlanna thlapin sex an hmang emaw hmang lo emaw video-a cover theihna leh tlangzarh theihna kha a nei hleinem.. Keiman ka buaipui vek ang.. " a ti a. A inringtawk hle. 

"Kei pawh chu chu tha ka ti, an hmu vek tawh tho a, hei aia mualpho lehna tur chuang a awm tawh lo. Chuvang chuan hremna chu hmu ngei rawh se" ka u pawh chuan a rawn ti ve ta a. 

Chumi zan chuan Cat chuan min riahpui!  Hetiang mihring hi an awm thei dawn em ni? A tukah Police stationah Lawmsanga te nen ka u te nen kan paliin kan kal ta a. Ruatfela chu an zuk man ta nghal. Damdawi a pawlh tih kha fiahna ka nei lo naa aman a puang ta vek mai. Mahse, thilmak deuh a puang tel. 

"Teremi khan pawisa min pe alawm.. He thil titur hian.. Arini tihmualphoa a awm theih nan hian" tih chu.. Cat ka va en a, engmah a lantir lo. 

Class erawh ka kal ta rih lo. Ka ngam ngang lo a ni. Teremi chuan min rawn be nawlh, Ruatfela dawt theihzia te a rawn sawi. Ka awih lo. A tel ve chiang ang. Cat hi a lak atanga ka lak a hlau tlat alawm.. A awm. Ve tho e, hetiang khawpa thian tha nih tling chu hloh mai a hlauhawm ve bawk a ni. 

Kar hnih lai ka chawlh hnuah exam a hnai tawh si a. Mahni infuih mawlh mawlh chungin class ka zawm ve ta. Ruatfela khan pawisa a chawi a, thla 3 chhung jailah a tang dawn bawk. Ka khawngaih lo va, ka lo hmangaih lo tih pawh ka hre nghal. Cat leh Lawmsanga te erawh an tha zel. Ka lawmpui, an inhmeh si. Min en duh tawk la awm mah se, Ruatfela hremna kan pe ngam kha min ngaisang tawk an lo awm ve pah a. A hma ang em em chuan min bawr ta lo. Lawmi erawh a la rak tam hle. 

"Heng ho rak satliah hi chu engah mah ngai suh, i kephah hnuaiah dah la, an ni aia san tum tlat ang che" tiin Cat chuan min fuih thin. Teremi te erawh kan kawm ta mang lo. Ruatfela inpuanna avang khan. A insawithiam nasa a, mahse, "Terem, kan inkawm tirh atang khan rinna che ka nei ngai lo, thinlung taka ka pawh theih i ni ngai lo va, ka hausakna sum leh pai min eipui ve thei a, i mizia hi mi hausa leh changkang ngaina chi i ni tih ka hria, Arini nen min pawh then i tum tih ka hria. Ka nu bulah zualko vin 'Arini hi kawmtir tawh suh. Hetiang mi hur' te i lo tia. Ka nu saw nu mawl a ni lo ania. I zia hi ka. Hre hnehsawh tawh lutuk a, tun tuma thil thlengah pawh hian i tel ve tih pha buai duh suh… ka thian ni tlak i ni tawh lo" Cati'n a tih tak salh salh hnuah kha chuan min pawh vak ngam ta lo a ni. 

Kan exam a, ka zir nasa bawk a, har ka ti vak lo. Cat chu a hriatna a zau bakah english a thiam a, eng tin tin emaw a chhang thei zel mai. A zir peih vak lo tih chu ka hria. A tana ka tih theih tawk hi a tlem ve èm a, ka inthlahrung thin. Exam chawlh lai chuan Nu Rami dawr pakhat zawkah kan inhlawh thin. Anmahni dawrah a inhlawh ve tho anih chu!  Keimah vang bawk a ni ngei ang. Christmas a lo hnai tan ta a. Hmanho ngei kan tum. Ka u leh ka pa hian an ngaisang ngang mai. Chaw te a rawn ei ve lawp lawp thin a, ka u bai siam hi tui a ti thei tawp. Chu chu kan tan pawh a nuam ve thin. 

Mipa lam chu ka hawi ta lo law law, ka thianghlim tawh lo va, bakah ka ring zo tawh kherin ka ring lo. Cat leh Lawmsanga pawh an serious chho ve zel a, Cat pawn a sawi zing ve ta viau. A duh. Ve tak tak annih ka ring. Christmas vuakvet chu kan hmang ho vek, a chang leh kan leng a, Single mah ila nuam ka ti. Lawmsanga lah hian min care tel ve zel a. Mi hausa tak tak. Ho hian tumah an hmusit ngai lo ni berin ka hria, intichangkang tawk leka hausa ve ho hian mi hmuhsit an tina. 

Kum a lo thar a, Class pawh kan kal ve leh tan. Mahse, Cat chu a dang riau. A cool tlat!  Rawn kal loh zeuh zeuh a hrat bawk si. A chhan ka zawh lahin ka damsam lo a ti ringawt zel a. A ngaihna tak pawh ka hre lo. Lawmi kha vanduaithlak deuhin a rai a, a rawn kal zawm tawh lo. Min tawngkhum peih ber a awm ta lo bawk a, Teremi te chu ka kalpah thei ve mai. Ni khat erawh thu rapthlak zet ka hre ta a ni. Zung tura ka chhuk chu Teremin min lo zui ve nghal zat a, min dinchilh ren rawn a, "Mi mawlnu, engmah lah hi i hre ve si lo va, Cat ten an biak that em em chhan che hi i hria em?  I kal (kidney) an duh vang aw.. Cat hi a kal a chhe tawh a. Thlak a ngai a, a mil tur an zawng kal reng a, nangmah hi an hmu ta che a ni. Tichuan, i lakah that chhuahin an uite ang maiin an phuar tawh che a nih hi. Harh rawh ". ati ta a. Kei chu ka zawi rawih rawih mai. Mak ka ti.. Ni e, a mak! Ngaihbel tur tingin Christmas hma lawk khan Damdawiinah in check up turin kan kal dun a, Doctor khan min exam ve vek kha a nia. Hei hi maw an thil tum chu.. An lak atanga tal chhuak thei tawh lo turin min phuar bet a, min khawngaih vang emaw min ngainat tak tak vang ni lo va a natna vang mai maia min lo kawm chu na ka ti ngawih ngawih!  Kei chuan a awmchhunah ngaiin ka lo hmangaih em em tawh a, Tha takin a kal chhiat thu sawi nise ka pe phal lutuk asin le… chawhnuah ka haw daih. 

Zanah Cat chuan min rawn bia a, ka chhang mumal lo. A tukah a rawn kal a, a hmel dâng zet te chu ka ngaihbel vek tawh. Thinlung taka hnaih chu harsa ka ti. 

"Ti nge i va ngawi chawi ve? " a ti a. 

"Ka nuamsam lo va" ka ti ve mai. 

"Mate, karlehah vellore-ah kan kal dawn a".. A ti a. Rilru mawlhtu nei hmel a pu. 

"Ti nge?  Eng nge in tih dawn? "

"Ka dam lo a" a ti chuai ta raih a. Teremi thusawi ka hre chhuak nghal. 

"Eng nge i dam lohna chu"

"Ka kál thlak a ngai a,. Ka fit nge fit lo kan zuk test dawn a" a ti ta a. Ka ngawi hmak. Ka hrawkah hnawhtu a awm. Cat chu ka hmangaih èm vangin ka hua!  Min lo hmang tangkai chu. A tirah sawi se ka inhuam em em, kei chuan thian tha tak takah ka lo ngai asin. 

An zin hma kar zawng chuan class ka chawl zeuh zeuh a, ka kal ve chhunah ka be tha ngai mang lo. Zawhna min zawt awl lo va, ka chhang tha duh hek lo. An kal dawn zanah chuan, ka insum thei ta ngang lo va, "Cat, ka tan pathian ang deuhthaw i ni thin. Ka thiantha tak takah ka lo ngai che a, nang chuan min lo hmang tangkai a, na ka tihzia hi i hrethiam lo vang. Ka kal hi ka ui lo asin, mahse, min bum a, lem i chang a, min duhsak ve tak tak niawmin i awm a. Tunah chuan ka phal tawh bik lo. I thil min leisak zawng zawng hi ka lo dahkir vek ang. Tun atang chuan nang leh kei hi thian kan ni tawh lo" tiin msg ka thawn ta a. A seen a. A reh vang vang. Ka mittui a tla, ka tap ta hial a!  Rethei taka ka awm laia ka thlavang hauha ka hmaa ding thin, ka awh ngawih ngawih phone min petu leh thawmhnaw ka awh zawng deuh chu min leisak mai thintu khan min lo hmang tangkai mai chauh a lo ni si a! Ka ngainat leh hmangaih tawh em vangin ka hua a ni. Ni e, ka haw takzet.. 

"Mate, i thu hriat kha a dik lo a ni"/tih thu chiah a rawn thawn a, a reh nghal vang vang. Ka be tawh awm lo em mai. 

A tukah chuan an zin ta nge a rawn kal ta lo. Mahse, chawhnuah Sir Hruaia a rawn lut a, a thusawi chuan min thawng det!  

"Catherin chu nizan khan nikhaw hre lo vin a awm a. Tunah ICU-ah a awm mèk anih chu.. A kal kha thlak a ngai a, tin, brain tumor a nei bawk.. A khawngaihthlak takzet a ni" tih thu a sawi. Ka huat tehlul nen ka va na tho si em… banah haw lo vin Damdawiinah ka tlang nghal. Nu Rami leh Lawmzuala thlaphang hmel ka va hmu nghal a, min lo dawngsawng vat. 

"Nizan khan a chau zual thut a, a tumor lam ai mah chuan a kal lam a nih zawk ka ring. Hei a la harh miah lo va" tiin Nu Rami chuan ngui zetin a lo ti a. Ka va bih a. Ka va khawngaih tak em.. 

"Nu Ram, a kal thlak tu tur in hmu tawh mi? " ka ti a. Ka hre chak em a ni. 

"Hei Lawmzuala hian a pe thei dawn a, mahse, hei tunah natna dangin a tlakbuak leh bawk nen, an inpe thei kher lo vang. Taksa a fit a ngai si a" a ti ta. Kei chu ka puakdarh lo chauh. Engmah kha lemchan a tel reng reng lo. Cat chu ka tan thiantha a ni a,  ani reng bawk ang. Chaw ka zuk ei sawk sawk a. Ka chho leh. Tihtheih kan nei si lo. 

A tumor chu an zai tawh naa, mahse, a dam ta chuang lo a nih hi. A natna chungchang hi vawikhatmah a sawi ngai lo va, mak ka ti ngawih ngawih. Nikum class tan hma daih tawh khan a tumor chu an lo hmu tawh a, a kal erawh a rei tawh. Lawmzuala hian natna neuh neuh a lo neih ve fo vangin doctor ten thlak an la phal lo a lo ni. 

Ni 2  hnuah Cabinah kan insawn thei ta hram e. A chau a, a dáng em em bawk. Min hmuh chuan a nui sak a. A hlim hmel chu hmuh a nuam. Mahse, a dam lo tlat si. Nu Rami remti lo chung ka awmpui tlat. Class te chu a ho em mai. Ka thian neih chhun hian ka tan thil tam tak a ti tawh a, ka rulhlet ve theih hun hi bawhpelh ka tum lo. Lawmsanga pawh a rawn lang zing ngang mai. Kan pathum. Chuan kan hlim. Ve em em mai. Lehkhabu ka chhiarsak thin a, aniin a harh deuh laiin english min zirtir thin. Ka thiam vak lo ve bawk a. Teremi te erawh an rawn lang ngai lo. 

"Mate, vawiin chu zuk kal tawh rawh. Note a pawimawh. Kei ka awm bawk sinlo, mi note hawh tur kan nei lo vang"a tih tlat vangin ka zuk kal ve a. Ka rilru erawh damdawiin lamah hlir a awm. 

Zanriah kan ei kham a, ka inbual a, riahpui leh ka tum. Lawmzualan min lo hruai nghe nghe dawn a. Ka inbual mek laiin ka phone a ri tlang tlang, ka û in a la a. Tui ka herh haw vangin an inbiakna ka hre hleithei lo. Ka chhuak a, ka u chu a thu ngawi reng. Ka pa erawh a awm lo va. 

"Tu nge a? ' ka ti satliah a. 

"Cat-i chu a thi tawh" a ti ta mai!  

"Heiii" ka ti tuar. A fiamthu a nih ringin ka va melh a,  a lo tap nia! Ni lo, a ni thei lo. A theih loh reng reng. Ka duh lo, ka phal lo. Eng tin nge ka thawmhnaw ka hak tih pawh ka hre lo. Ka u nen inkaiin stepah kan chho zawt zawt a. Taxi kan hmuh hmasak berah min nawrlut a, a mah pawh a rawn lut ve. Ka awih thei lo. Ka chiái vek. 

Damdawiin kan thleng, mi chu an tlan khut khut a, A cabinah kan va lut. Karei!  A theih thlawt loh. He khawvela ka mihringpui, ka thisen zawm ni hauh si lo va min hmangaih bertu chu nunna nei tawh lo tih hriat takin khumah chuan an lo zalh nia!  A thaw nge thaw lo hreturin a bulah ka ding a, a dul ka en, a che thin si a. A che tawh lo. A mit ka khawih, a chhhing tlat! A kut ka vuan leh a khawng tawh. Ka tap thei lo. Ka melh ngawt ngawt ringawt. Hei hi dawt vek a ni. A thi thei lo, Cat hi a thi dawn lo… 

Lawmsangan min rawn kuah. "Arin, i thiannu hi ka va ui em… a mak tiraw? " a ti tuau a. A mit a sen vek. He pa pawh hian min bum a ni. Ka la awih thei chuang lo. A ruang chu an zawn chhuak a, Lawmsanga leh ka u chuan min kuah thla. Ka kal ve mawp mawp. An in kan thleng a, a khum, vawi tam tak kan lo mut dun tawhna games khela kan lo nuih hawr hawrna hmunah khan an muttir a, Couple Tshirt amah ngeiin a chah, a ruala thla kan lakpui ngei mai kha a nuin a rawn phawrh a, an haktir. A hmai chu an chei a, chei chawp a ngai lo asin le.. Nu Rami chu a tap hawm hawm a, mi dang pawh. Kei erawh hnawhtu ka nei. Ka mumang anih ringin ka insik fan a. A hmel chu ka en ngawih ngawih. 

"Mate, ka dam huna ka tih chak ber chu maw.. Nang leh Lawmsanga te nen Tam dilah zu kal ila, zan hnih vel zu riak ila" a tih laia a mitmeng nung sar te kha.. 

"Khum khatah kan pathumin kan mu anga.. Haha.. I lo muhil der ve mai anga" tia a sawi lai te.. 

"Kan inrual chiah naa.. Ka nau ang mai i ni. Min û tawh rawh.. " a tih te. A mah ka rinchhan zia leh ka innghahna a nihzia chu a hai lo.. Ti nge min kalsan… 

"Kan la thi vek dawn sia, thi hmasa la ka ti… ngati han ti teh" a tih a.. Ngati nge ka tih tuma, "Kawm tur i nei leh lo anga.. " a tih lai te kha.. Ni e, Cat, engkim i hre vek sia, ti nge min kalsan si?  Mal taka hringnun hmang leh tur in engvangin nge min hnutchhiah leh si? A fair hlawl lo aw… 

Tap miah lo vin a bulah ka thu tlaivar zak. A hmai ka chul ka chul ringawt. A tuka an vuina te, thla ka lakpui te.. Engmah mumal taka hriat ka nei lo. Lawmsanga leh ka u in min buaipui chawt. Cat te inah chuan ka riak leh zel. A ruang an zalhna khumah ngei chuan ka mu a. Phum anih tawh hnuah a khumah chuan tap chungin ka au thin. Khawvela na tawrh theih ang zawng zawng hi tuar ta ila, hei aia. Na ka tih hi a awm ka ring lo. Ka nu thihna ai pawn ka tuar zawk. A awmchhun a ni asin. A awmchhun. 

Khatia class ka zuk kal hnu lawkah khan a hnar a rawn thi vak a, thiin. aluak bawk a. A chau viau aniang, chawhnu lamah a thaw a buai tan a, ICUah an nawrlut nghal a. Mahse, tuma dawmhlum hlawh lo vin a kal ta mai a ni. Kar hnih kan hman dun chhung khan vawikhatmah buaipui ngaiin a awm lo asin. Ti nge class ka kal ni ber kherah… zawhna hi ka va ngah tak em.. 

Nu Rami chuan ka mumal deuh hnuin inhnip hlawp hlawp chungin "Ih e, Arin, Ka fanu khan a hmangaih che asin. Nangmah ang bawkin retheihna a lo paltlang tawh a, thian a nei ngai lo. In inhmuh hmasak. Ber ni khan hlim deuhin a lo haw a, 'Nu, tunah chuan thian dik tak ka nei ve thei dawn tain ka hria' a rawn ti a. Ka lo hlim ve em em ringawt. A chhan chu college a kal. Lai te kha chuan thian nei nual mah se, a tu amah kha thinlung taka pawh a nei ngai lo. Kim lo tlatin a inhre thin. Mal taka awm hrehawmzia a hriat tawh vangin, 'Arini hi chu ka theihtawpin tihhlim ka tum ang, amah vang hian dam reng ka duh. Ka thihdan daih chuan a mal leh dawn si a. Ka khawngaih'. ati thin che asin.. Mahse,  anatna kha a hneh zo ta ngang lo va, khatia a chauh lai a thaw a buai hma si khan, 'Nu, Ka thih hunah Arini nen kawr inang kan lei kha min haktir rawh aw. Chuan, keimah ang chiahin lo enkawl la, i fanu angah lo ngai ang che.. Hmana thian tumah nei ve ngai lova ka awm vanga ka hrehawmna leh natna te kha amah vang hian a bo vek tawh.. ' tiin a rawn tawng a. Ka fanu tan khan i hlu takzet a ni" tiin. 

Kei chu ka ral leh ta. Ka na nawn reng mai anih hi. Pathian ka dem lek lek thin. He khawvel mihring heti zozai zinga Cat min laksak vang hian. Natna thuk tak a nei chungin ka hlim loh hlauin a thup a, hlim. Hmel a pu reng thei a. Ka tana thilhtih kha nuam a ti reng anih kha.. A tan engmah ka la tihsak ve si lo. Bat ka la ngah lutuk asin.. 

Kum 5 a ral ta. Ka hmaa thlan lung chu chiang takin ka melh a. Ka tap lo. Vawiinah chuan hmana nula rethei tak khan hna zahawm tak neiin a pa leh a u te pawh nuamsa takin a awmtir ve thei ta. Mahse, a nunah kim lo erawh a awm a. Chu thil kim lo chu tuman an hnawhkhat thei ngai lo vang. 

"Mang tha aw.. Cat.. "Tiin, a pangpar ngainat ber Rose Sen duk chu ka zuk dah a. Rose kuanga ka thil ziah chu ka zuk chhiar a.. 

"Comrade" 

The End

(A ziaktu mah ni ila, ka mittui an tlak ngawt chu 😂😂