MAHSE..

MAHSE..!

Ziaktu - Toni Râlte

"Engtin nge i tih theih zawk? Mawh. I va rapthlak ve" tiin a awm ka chúm a.  Min chhang lo.  A samah ka kek a, ka tap bawk. Ka inthunun thei tawh hlawl lo a ni.

"Aw le, tunah chuan engkim a tawp e. Ka hmaah lo inlan leh tawh ngai suh ang che. "Tiin bianga mittui luang chungin ka hrilh a. Min auh zui lawm lawmna haiderin ka hnuchhawn ta.  Engtin nge hetiang thil hi ka chungah a thlen theih..!

Ka hmangaih a, ka engkim a ni asin. Ka pa thu pawh zah zo lovin ka nei a. Ka zui a.  Ka hun zawng zawng a tan ka hlan a.  Hetiang hian min thungrul ang maw?  Min lo bum a ni thei, ka hmuh loh leh hriat loh hlanin hmeichhe dang bulah a nuiin nuam an lo chen hial a ni thei.  Ka hre miau lo va, ka tan thinrim leh nat ngaihna a awm lo.  Mahse, kan nupa khum ngeia ka laizawn, ka nuhrawn fanu nena nuam an lo chen zet kha chu la tawrh theih phak a ni ta.  Ka tuar zo thlawt tawh lo a ni e.

Kut ruakin ka pa inah ka lut leh ta a.  Ka pa chuan min hau tawh lem lo. A duhzawng mi ni lo pasala ka neih tak avang khan kan inpawh em  em tawh lo va, tunah pwh min ngaihsak em em tawh lo. Ka phutawk chiah a ni. Ka pa thu kha lo zawm ni ila, tunah tawrhna ka hmachhawn lo tur.

"Dingpui, ka awih thei lo. I u chuan chutiangin a ti thei lo vang" ka nuhrawn chuan a rawn ti hluai a!  Rum zeta melh chungin, " ka mit a del lo ania. I fanu chu tan khanglang lo mai teh" ka ti chhum hmak a.

"Tunah pawh a la rawn haw lo, call nghal rawh" ka pain ka nuhrawn tawngka vina a biak ka hriat vawikhatna a  ni hial ang. Ka awm a lo nuam huai thung.

"Rawn haw vat rawh, he in chhungah hian eng nge thleng i hriat duh chuan" ka nuhrawn pawh chu a vin kher mai. A zak ang tih ka ring. A fanu hi control hneh hlawl hek lo. Engvangin nge mi pasal luahlan duhtu chuan fa tha tak a neih theih tehreng ang? 

Ka room, mikhual room atana an hman takah chuan ka lut a.  Ka inkalh khum a.  Tah ka châk.  Nasa taka tah hawm hawm ka mamawh tih ka hria.

Zanriah ei dawnah min rawn ko a.  Kan kil tan dawn tihah Hruaii chu a rawn haw a. Kan lo en thap. A mitmeng sen rám leh a ding bu lúk luk te avang chuan a rui hle tih a lang. Va pan hnaiha khawih ka tum laiin ka pain min lo chelh vat a.  Amah zawk chuan a va pan a.  Eng sawi set set lo vin a hmaiah chuan a beng ta thuai mai a!  A thu hnawk mai. Ka khawngaih eih lo.

Ka nuhrawn (ka nu tiin sawi zel tawh mai ang)  chuan a va dang ve sasawi a.  Ka pa thin a alh tawh tlat, pate thinthawk natzia an la hre lo aniang e.

" I unaunu pasal anih piahlamah mi pasal a ni asin. I nu siar i nu siar. In nufa avang hian ka puakkeh lek lek tawh e.  A theih chuan min chhuahsan ula ka duh a ni" a ti ta khawl khawl mai le. Chutiang taka a ngam thui chu ka lo ring miah lo.

Ka nu chuan,  "U sawm, insúm hram teh khawngaihin, inthen ka duh hleinem. Mateii pawh a dik lo vek bik lo vang, i fanu pawh hian thiam lohna a nei ve thovin ka ring" a ti ngam mawle!  Zawngi mai mai chu..

"Aw thiam lohna chu a nei ve ang. Chutiang anih avang chuan, i fanu hian ka fanu pasal hi a mutpui thei tihna a ni hleinem. Remi, ka nupui Zuali ka tihnat ang chiaha ka fanu lehzel a nat hi ka phal hleinem. Hre rawh, tun tum chu ka insúm ang. Ka mit tikham zawnga in awm nufa leh anih phaet chuan,  tharum hmang pawha nawr chhuah che u hi ka hreh dawn hlek lo a nia" a ti ta siah siah a.  Hmana ka pa kha a ang ka ti hle. 

Ka pain min khap tlat avangin Hruaii chu ka be lo. In chhung khata awm siin mikhual ang mai kan ni.  Ka nu nen eraeh kan inbe zeuh zeuh. A fanuin ka thinlung a tihnatzia hria se, a fanu lam hi a tang reng bik lo vang mawle.

Kum 15 ka nih kumin ka nu leh pa an inthen a, nau mipa pakhat ka nei a.  Ka nu bulah a awm thung. Ka pa chuan thla khat lek hnuah tuna ka nu hi a rawn hruai lut ta a.  A fa chhawm nen hian. Nu sual tak a ni hran lo naa a fanu avang hian kan innghirngho fô. Hruaii hi kei aiin kum 2in a upa a, kan intiat hle thung.  Ka pa an tilawm thiam a, kei lah ka mal din si. Ka pa ka huatna a nasa deuh deuh a, ka nu leh ka nau ka ngaihna a zual telh telh bawk. Anni chu Shillongah ka putea te thlazar hnuaiah an awm a. Kum 2 hnuah ka nu pawhin khasi, pasalah a nei ve ta kha a nia. Ka nau pawh an la awmpui ve zel a ni. Kei erawh ka pa bulah awmin pawnlamah chuan rualawt em em lo vin hun ka hmang ve zel a, ka chhungril nun eraeh a tuihal takzet a ni. Tihduhdahna langsar tak chu ka tawk ngai lo naa, lang lo lam atanga inthlimna, in phiarrukna ka tawk chho reng a.  Hruaii hi a fing si, a nu a hneh thiam piah lamah ka pa lakah a tlatlum em em a. An dâwt sawi vangin ka pa nen kan inhlat sâwt hle. College ka kal tirh chuan Hruaii chu a chhuak ve chiah tawh a.  Lehkha a thiam theiin,  thian tam tak a nei bawk. A hmel chhe lo a, inchei a thiam em em bawk. A harhvángin mi dang tihlawm hi a thiam em em a, kei erawh amah letling hlauh ka ni. Zirnaah ka sak em em a, ka hmel pwh a tha tehchiam lo, ka vun erawh a mawiin a nung sar thung. Hruai'n bialpa pahnih thum vel a neih tawh laiin, kei erawh chuan pakhatmah ka la nei lo. Neih châkna ka nei lem lo bawk. Luck lo thlawt ka ni bik lo, min duh der vetu chu an awm ve. Mahse, ka ngainat chi an ni lo. Ka duhtui luat vang nge ka single rei ngat ngat khawp mai.

Hruaii piancham vawi 24-na kan lawm tumin, lehpek awm thei lo tur khawpa ka hmangaih tak Apuia hi ka tawng ta a ni. Hruaii thiante zinga mi a ni naa a danglam bik chiang. Kil khat atangin ka lo thlir leh ngawih ngawih thin a. Mipa vanga ka lung phu ngai lo kha a phu rang hle tih ka hria. Hruaii chuan a belbul deuh chawt a, a nek salh salh reng bawk. Mipa bula a no tlat zel hi ka lo zak thin. Mahse, a bialpa te hian an duh thei phian lawi si. Apuia nen chuan an inhmeh hlawl lo.

A sang a, cher chhe lem lo, ngo hlung si lo hian a vun a rual em em a. A sam dum hlap chu namnul deuha siam te pawh a ang lek le, a inhmeh viau bawk si.  A hnar ngul chu a sang veh vawh hle, a mitmeng hriam hraih nung zet si chuan min tihlau lek lek hial!  Mahse, a sexy thlawt!  Hetiang em em hian mipa ka en ngun ngai lo asin le..

"Dingpui, i va inthlahrun hmel ve" Hruaii kal bo lawk hlanin ka bulah a rawn thu ve chawt a. Mak ka lo ti ru hle.

"Nia, awm dan a vâng em alawm" ka lo ti ngawt.

"Va lam ve la"

"Aih" ka lo ti vat. Amah melh haw pahin, "Min hria law" ka ti hú!  Ka mawl siah.

"Hre ve bawk ang chu. I ú ka hriatte chuan" a nui suk a. A va'n pa tak. Ka ngaihtuah ngai miah loin min kuah se, min fawp se tih te ka rilruah zuk awm a!  Ka inzahpui tawp.

"Kei pawh hetiang boruak ni hup hup hi ka hne thin" a ti leh a.

"Nia, ka zo ve vak thin lo va" ka lo ti tha ve mai a. Hruaii rawn phei mek chu ka mitsirin a hmu zui bawk.

"Hetah law i lo awm. Hawh, mi ka hmelhriattir ang che" tih pahin a rawn kai nghal bawrh bawrh a. A bialpa chei khawp mai. An ni leh tawh aniang. An hriat miah lohin ka lo na ru teuh.

"Dingpui, ka lo kal leh ang, kan inkawm leh dawn nia" a rawn ti hram a. A nui hmel bula Hruaii mitmeng rum zet pawh ka hmuh hmaih miah lo. Ngawi rengin ka mu ta daih a. Mahse, ka ngaihtuahnaah chuan Apuia a cham veng veng mai. Mipa ka vei vawi khatna a ni bawk a. Ka la na ngang mai. Nuam ka ti em em tho si. Hruaii hian a hria ang tih erawh ka hlau thlawt.

Apuia nen chuan kar hnih hnuah daih kan intawng leh ta chauh a. Restaurant-a keimaha ka chawlh laiin a thiante pahnih nen an lo lut ve a. Ka bulah a rawn  thu nghal chat. Kei ka lo khur thung. Ka zâm em em reng chu ka inhua.

"Hman zan khan i lo mu daih a"

"Nia, ka mut a chhuak lutuk a"

"Ka zawng nasa hman tawp che"

"Ti nge min zawn? " ka ti leh hû..

"I bula awm a nuam ka tia" zei vel e. Sawi tur ka hre leh ta lo.

Thil ka ei zawh chuan, ngawi rengin ka tho nulh!  A rawn ding ve vat a. "Ka va thlah ang che aw" a ti nghal a. Hruaii'n min hmuh ka hlau sia, ka duh lo. Ka number erawh min dil angin ka pe.

Zanah chuan min rawn call. Ka lungphu dup dup chu a hre thei ang tih ka hlau. Eng nge kan sawi pawh ka hre tawh lo. Whatsappah min rawn text zui zat a. Ka number hi Hruaii a dil tawh thu leh a pek duh loh thu a sawi.

"Hruaii nen in ni lo mi? " ka ti.

Smiley a rawn dah tuar a. "Ka thianpa nen zawk an ni. Kei chuan hmeichhe pakhat ka nghak a" a ti a. Ka ngaih a ngam deuh rualin tu tak nghak ang maw..

Kan inbe rei khawp mai. Nitin zantin kan intext awl ta lo a. Inngaizawng ang chiahin kan inbe tawh. Induh thu leh inbem thu pawh kan sawi chuang lo. Report kan pe tawn thlap thlap tawh a. Engkim hi a nuam a ni mai e.

"Dingpui, Apuia nen in inbe thin mi? " Hruaii.

"Aw be ve zeuh zeuh"

"Kan thianho groupah fiamthu thawh nan a hmang thin che nia. 'He nu hian min duh ve sia, hne chung chungin ka biak a ngai thin' a ti ania. Ka zak tawp" a ti ta mai!  Chutiang taka a sawi huai avang chuan dâwt anih ka ring lo hul hual. Engmah pawh sawi lo vin Apuia chu ka block ta a. Ka na chiang teh e. Na tak ka ni. Ka zak bawk si.

A vawi 7 min lo call, -naah ka pick ve hram. Thil awmzia min zawt char char. Ka sawi thei lo, ka tap dawn zel.

"In atang khan lo chhuak la, inhmu lawk ang" a rawn ti. A falin vawi khatmah kan la inhmu lo,  lo len pawh ka phal ngai lo,  Hruaii'n min tihzah ka hlauh vangin. Ka hnial hmain ph a dah daih bawk si.  Ka thinlung chhung chuan rin a duh a, a mamawh em em. Ka chapona hian tlawm a phal si lo. Rei a rial hmain kan kawt maia motor thawm ka hre nghal. Parda keuin ka va thlir dúk dúk a. A car ngei ni chuan ka hria. Min lo call a, ka chhuah hma chu a awm reng tur thu a sawi ta a. Chhuak lo thei lo niin ka inhre ta a ni.

Ngawi renga minute 1 vel kan thut hnuah zawhna min zawt ta a. Hmaichhanah chuan ka sawi thei ta hram a. Mahse, ka mittui ka dang zo ngang lo a ni.

Thinrim takin a ph min pe a. Chhiar vek turin min ti. Ka chhiar ta vek a. Ka thalak an lo up a, captionah,  "Apuia thuro" tih an lo hmang. A hnuaiah Apuia chuan, " Ka hmeichhe tawn tawhah ka rilru a la tibuai ber" tih a dah a. A hnuai leh chiahah, Hruaii'n "Ka hrethiam che lawm, duh lem loh ten min biak renh hi chuan rilru an tibuai ve thin a" tih a lo dah!  Ka sa phat mai.

Mahse, Apuia chhan dan chuan ka natna leh thinrimna zawng zawng a phumbo diak nia mawle.. "Min duhna aiin ka duhna hi a nasa zawk. Nupui atan ka hual a, khawih pwh ka khawih lo vang. Ka venghim zel dawn" tih thu chu..

Group chhuahsanin pvt chat ka en kual leh a.  Thík tur awm chi ka hmu lo. Hruaii nen an inbiakna ka chhiar chuan ka rilru pawh a na lo, ka nuih a za hial zawk.  Min lo rél ngat ngat tih ka hmu thei. A thusawi te chu a awihawm loh hlawm èm vangin ania ka nuih ni. Apuia pawh a nui ve tawp. Tunah chuan kan inpawh leh thei ta. Chumi zan chuan a vawi khat nan kan infawp. Ka tan a hmasa ber a ni bawk.

Min duat a, ka hlim. Awm dun reng ka châk thin. Kan inah pawh a lo leng thin. Hruaii mitmei kan veng peih tawh lo. Ka nu pawh chuan mitmei tha min hmuh ngai lo. Pawi ka ti lo. He in hi ka pa in anih chhung chuan min bei ve mai mai teh se, eng he huah ka ngai tawh lo. Zan khat a lo leng erawh ka sa deuh. Thingpui ka lum chhungin ka nu nen an lo inkawm a. Ka ngaithla ru pah a.

"Dingpuii hi chu pasal neihtir pawh kan lo tum lo asin. A hrisel si lo va, bakah a taima vak lo nen, mi ina mo tur chuan kan ngaihtuah deuh a"

"Inneih mai kan la tum bik hleinem. Inzrina hun tam tak a nei alawm"

Ka tleirawl chhuah atangin mi thatchhia tia sawi ka ni ngai lo. Tin, ka pasal neih turah an phalna ka lak a ngai lo. Ka pain rem a tih chuan a tawk. Tum búrin ka va phei a. Apuia'n mitmeiin min khap char char. Kan chhungkaw nun hi a hre ve vek bawk a. Min fuih nasa thin khawp mai.

A tawi zawngin sawi ila, ka pa bulah hèm an lo thlak a. Apuia chu leplerh lutuk, eizawnna mumal nei lo, thlep kual reng mai angin an lo sawi a. Ka pa nen hian kan inbe tlem si a, thil han sawi dun dwn pwn ka tím zel si. Ka buai ru thin khawp mai. Ka pa chuan kan inkawp a ngaihtheih loh thu a sawi ta zeuh zeuh a. Kei ka luhlul telh telh bawk.  Langsar taka tihduhdahna tuar lo mah ila, chhungrila min khei ngar ngar reng avang hian ka chau thin. Ka na ve thei tho si a. Ka pa lahin an thusawi a awih si. Apuia nen pawh kan sawi dun nasa thin. T. Romana College-ah Lecturer hna a hmu ta bawk nen, inneih mai a duh thu a sawi ta zauh zauh. Ka la naupang si. Ka graduate veleh tiin kan intiam ta a. Lehkha ka thiam em em loh vang hian zir san chiam ka tum lem lo. Ka pa pawhin min nawrlui bik lo bawk.

Exam lai chuan a rawn leng duh ngai lo va, kei pwn pass ngei tumin theihtawp ka chhuah ve. Pasalte tana zahpuiawm lo tawk vel nih ve hi ka tum, kan khawsak dinhmun chu a inthlau em em chuang lo naa, Kohhran leh khawtlanga kan thawh hlawk dan erawh a inang lo deuh. Apuia te chhungkua chu an vengah an lar, an thawh hlawk èm a. Keini ve chu tu khaw khain min hre tehchiam lo. Kei hi khawhar in velah chuan ka lang ve a ni mai a. Mi dang ho chu an tum lo tawp ni maiin ka hria.

Exam zawh ni chuan kan leng kual ve a. Nuam kan ti hle. Infawh aia thui kan kal ngai lo bawk a, ka ringtawkin a bulah chuan ka him hliah hliah a ni mai e. Engtin nge kei ang hmeichhe satliah leh naran ve mai hi min duh tih zawh ka ching thin. Chhanna ngai reng ka dawng thin.  "Hetiang hmeichhia i nih vang hian lawm ka hmangaih che" tih hi. Hmangaihna hi chu a va duhawm tak em.

Kan dine out nghal avangin dar 8 velah in ka thleng a. Ka call lawk vek tho  a. In ka thleng chu an lo thu thap a. Min lo melh hrek hrek mai. Ka pa chu thinrim insúm tih hriat takin a rawn tawng chhuak ta a.

"Nula puitlingah pawh ka la chhiar lo che a, tichuan, hotelah mipa i tawmpui ngam a maw? "  a ti ta mai. Ka kang awkin ka hria. Dâwt chiang lutuk hmanga beih ka ni mèk tih ka hai lo.

"Ka tawmpui lo. Chaw chu kan ei" ka ti tawi tak a.

"Dâwt i sawi hnem tawh lua e, an hmu vek che alawm. Saw i ngaihzawng saw i then lo anih chuan, ka tuithlar ang che" a ti ta hmak a.

"Pa, dik tak chuan U Hruaii te sawi a nih leh ka ring,  U hruaii hian a ngaizawng ve alawm. Chuvangin Apuia hi an ngaithei lo. Apuia nen hian vawi khat mah kan la chesual lo, hotela tawm dun anga min sawi tute chu min hrilh rawh. Ka chhuahchhal ang. Ka duh miah lo ania. Hetia intih hi" ka ti ve ta phiar phiar a.

"I va zak lo em em, Apuia saw maw eng atanmah ka ti lo. Mi tha a nih loh vangin kan duhpui lo mai che a ni e " Hruaii chuan a lo ti hlak hlak a. Ka pa chuan, "Engmah sawi tawh suh u.  Apuia chu thlah la a tawk a ni mai" a ti nghut a.  A roomah a lut ta daih.

Apuia bula ka sawi chuan a thinrim ve deuh niin ka hria. Eng pawh nise, buaina a nasat chuan inruk mai a duh thu te a sawi ta a. Kei pwn pawi ka ti hran lo. Ka â vek tawh. A that lohna hi ka hre miau si lo a ni. Ka pain min khuahkhirh tak deuh vangin kan inhmu thei ta vak lo va, tawrh harsa kan ti ta hle mai. Tichuan, rem a ruat a. Kan tlan dun ve ta rawih mai a ni. A pute khua Lungdaiah kan kal ta daih a. Thla khat dawn kan va awm a ni. Ka chhungten min rawn ngaihven duh si lo va. Tichuan, kan haw leh a, an inah kan lut ta a ni. Palai te a hmingin an kal tir ve a, chutiang a nih tawh vang chuan ka pa chuan haw ve phawt turin min ti ta a. Min tuithlar hi chu ka ring lo ve hrim hrim a, a chhhan chu a fanu hi min hmangaih tih ka hria. Keimah zawk hian ka pawh duh tlat lo ve bawk a ni. Ka hawn zana ka nuin ka pa a biakna ka hriat chuan an rilru dik tak ka hre chiah,  "Tuithlar leh ngam tak tak si lo, nep lutuk. Ngaihsak miah loh tur alawm" a ti. Ka pa erawh chuan, "Ka fanu neihchhun a nih hi, ka tuithlar thei lo. A ropui thei anh berin inneihna hi ka buatsaihsak ang, ka thu awih zo lo vin tlangval a um a, mahse, tihtheih a awm tawh chuang lo. Engmah lo sawi ve suh" a ti hmak!  Khata tang khan ka pa ka en dan leh ngaih dan chu a danglam ta a ni. Pawh taka inkawm erawh kan nei ngai chuang lo. Apuia ka kawp leh chuan tuithlara min vau atang khan ka nuhrawnte nufa chuan Apuia then tur leh thlah turin min ti tawh ngai miah lo anih kha.. Ka nu phei chuan, "Hetiang taka i duh anih chuan, i pa pawh ka lo sawipui ang, beidawng lo phawt rawh" a ti anih kha. A chhan chu Apuia ka then an hlau tawh zawk. Then lo ila, nei lui ila; ka pa chuan min tuithlar se an duh. A thleng ngai lo vang.

Inneihna chu hautak si lo, ropui ve tho siin kan lawm ta a. Ka pa rilru chu ka hneh tihna  a ni chuang lo. Kan inneih hma zanah chuan ka roomah a rawn lut a. "Naute (ka tet laia min koh dan)  hei ka rilrem vak lo chungin pasal i nei dawn a ni a, mi inah i awm tawh dawn a ni.  I thiam ang tawkin i pasal chhungte tihlawm i tum tur a ni. I pasal chauh i nei dawn lo va, a chhung te pwh i theih ang anga i hmangaiha i puibawm tel ve an ngai tih hrereng ang che. Ka ngai khawp ang che" a ti sup sup a. Ka pa chu chiang takin ka en a. A lang tar ta hle mai. Ka lo chík ngai lo va.

"Pa, hetia min thlauhtha lo va min pawm leh thei hi ka lawm. Kei pawn ka ngai ang che. Ka nute hi an lo kal ve ang em? " ka ti a.

"Rawn kal chu an duh viau a, mahse, a pasal u a boral a, an rawn kal thei dawn ta lo a ni" ban deuh hian a ti chuar chuar a.

"Ka nu chu ka ngai thin khawp mai"

"Kei pawn ka ngai thin. Bawiha pawh ka ngai. Eng pawhnise, i nu chuan biak che a duh viau ang, inbe ru.. Ka va chhuak tawh ang e" tiin a chhuak ta a. Ka nu nen kan inbia a, thu tha tak tak min hrilhin min fuih a. Awm vein ka pasal te hi hmu ve thei se ka duh khawp mai.

Apuia chhungte chu an fel a, Apuia nau mipa in nupui a lo nei ve bawk nen. Inpui luahtu tur kan ni lo bawk a, thla 3 erh awrh kan chengho tihah in hrang kan chang ve ta a. Kan awmho chhung khan harsatna ka tawk lo. Ka chungah an tha vek, mi sual an ni miah lo tih hi ka sawi ngam. Ka mopui nen pawh kan inngeihin unau ang chiahin kan in en thei a ni. Ka lawina ten an zir èm bawk a ni. Apuia te college hnaih thei ang berah ka pa (Apuia pa)  in in ding lai, lian tha tawk tak min leisak a. Nupa rek chauha awm chu a khawharthlak lek lek mai. Awmpui lak a rawt a, mahse, ka duh lo. Engmah ka thawk chuang lo va, tihtur ka nei nang ka ti ve tlat. A class bang lo haw lo hmuaha lo dawnsawn chu ka hna nuam tih ber a  ni a. Nupa inngai leh inngeih tak chu kan ni vein ka hria. A thiante hi an fel bawk a, kan khawharzia hriaiin chaw an rawn ei fô a, khawhar an hnem thin khawp mai. Fa neih pawh kan châk ve hle, vawi hnih lai Doctor kan pan tawh. Hmanhmawh lo va nghak hram hram turin min lo ti thin. Dik lohna kan nei lo ve ve bawk a, ngaih a tha tho mai.

Engtik lai atang chiah khan nge ka pasal chu a danglam tak ka chhui thiam meuh lo. Kum 1 a liam a, a kum hnihna bul kan tan vel atang khan fa a awh thu ngawt hi a sawi thin a. Hrehawm ka va ti thei tak. Ka tawngtai nasa thin. Ka pai thei bawk si lo. Khatia fa a awh em vang khan min ngainatna te a lo tlahniam ta deuh nge nupa nunin a kentel ve reng ka hre lo, inneih tirh kan tluk lo nasa ta mai a. Kei pawh ka inthlahdah ve tho mai. Ka pa te hi an rawn leng ngai meuh lo naa, Hruaii erawh kar khatah vawi hnih tal a lo lang ngei ngei. Apuia a awm ngai chuang lo va, pwi ka ti hran lo. Bakah a sual em em tawh lo vin ka hria. Vawi khat phei chu a bialpa a lo hruai a, mikhual roomah an awm dun nghe nghe. Ka laizawn diktak a nih loh piah lamah ka thusawi a zawm dawn chuang lo bawk a, ka hau duh lem lo.

Chuan, khami ni khan ka mopui Teseni nen kan bazar ve a. Bazar na tur pawisa pawh ka pasal hian min pe thlap tho. Mahse, kan nupa nun chu eng emaw ti hian a inhlat ru riau a!  Keimahah hian hriatna a awm tlat. Rinhlelhawm chuan a awm ngai miah lo. A phone pawh ka check sak thei reng, mit tikham tur ka hmu ngai lo. Ani paw'n a tih dan lo ang deuhin ka ph en a ching thar a. Hei hi a danglam ka tihna tak pawh a ni deuh. Nupa nun erawh kan hmang khât. A chau thin a, kei ka lo châk teh huam ngai lo bawk nen. Han inkuaha inchul nel ang kha kan nei ngai ta meuh lo. Siam that duh viau mah ila, bultan dan tur ka hre hauh si lo a ni. Teseni hi ka hrilh ang ka ti nghe nghe. Kan bazar zo kan inhnawhpuarnaah chuan ka hrilh ta nge nge a. Tih vak dan tur a hre bik lo. Zanah ka lo be ve chhin ang a ti ta ngawt a. Kan haw ta kha a nia.

In ka thlen chuan kawngka a lo inkalh lo va, a haw hma a ni maw tiin hman anga phur sarha dawnsawn ngei tumin ka lut a. A reh thap mai. In chungah ka chho nghal a. A inbual a nih ka ring deuh. Kan roomah chuan thawveng ru takin ka lut a. Ka hawi chhuakin ka thil hmuh vanga ka thil ken ka thlauh vek hma kha chuan ka hlim asin le..

Kan nupa khumzau puiah chuan, Ka unaunu Hruaii chu saruak ngal ngatin a lo mu kak suah a. A chungah ka pasal, ka hmangaih awmchhun chu lo bawkin kan nupa chanpual chu lain an lo tibawrhbang mèk a ni. Ka rak thawt chuan ka lam a rawn hawitir a. Rang taka insiamthain stepa ka tlan thla hlawk hlawk chu min rawn umzui ta a.

Kei erawh ka kehchhe ta vek mai.

Ka pa ina ka hawn hnu pawh khan min rawn zai hlek lo va. A reh tlawk tlawk mai a ni. Kei erawh uiresan ka nihna chuan nitin leh zantin min viilh ngut ngut reng a. Tawrh zawh hun ka nei thei ang em ka hre lo. Hruaii chu ka hmu duh hlawl lo va, a chang eraeh chuan thawt lawk awm hauh lo va a thin hnúna va vih thawih ka châk thin. Ka nun a tihchhiat a hnu hmanah a la thawveng reng a, tihsual nei miah lo angin a awm leh thei si chuan mi run takzet a ni. Ka laizawn tak tak pawh nise ka ngaihdam theih ka ring lo. Kan in chhung chu a nuam lo ta khawp mai. Ka pain an nufa chu a be tha duh si lo, ka pa lungawi loh hlau reng renga khawsa thin an ni sia. An chawh ve khawp mai.

"I thiltih hi i hrechiang lo a ni. Tihian kan bulah i chentir leh ngawt chu ania. Kan nufa chan hi a bo leh vek ang e aw. Inneihtir hle hle tur che nia. I pa hian thurochhiah a tidanglam ngei ang" sum kan chhuah dawn zana ka nuhrawn leh a fanu inbiakna ka hriat ruk a ni.

"Ho ee, kan chan tur chu a bo chuang lo vang. Liandingpuii aia hniam hi ka tum lo hrim hrim, ka mipa hmangaih em em min chhuhsak a, min tizak a sin. Mi zawng zawngin kan inngaizawng emaw an ti vek tawh a, he nu hian a rawn tichhe ta vek a. Phuba ka la ve a ni mai" tia Hruaii'n a chhanna chu insehruh chungin ka lo ngaithla a.

Mahse, ka han ngaihtuah a, Hruaii thiam loh vek a ni lo tih kil khat atang chuan ka hmu thiam  ve tho. Kan inngaihzawn lai atanga min chawhbuai tum reng Hruaii a lo mutpui ve  mai duh avang khan ka pasal hi Apuia dik tak nia ka hriatna atang khan a tla fel der tawh. Hmeichhe dang chu a ruk pawn a lo mutpui a ni thei. Hruaii kher kher hi chu pawmzam a harsa, a theih loh tluk a ni e. Apuia chhungte pawn min rawn call reng a, ka nu phei chu a rawn tap titih hial, a mo zinga a duat ber leh pawh bertu kha ka ni miau a. Mahse, an fapa bawlhhlawhna hi an mittuiin a tleng fai zo si lo a ni. Sum kan chhuah ni chuan, ka pasal chu pawr deuh fap hian ka hmu a. A mu tlem anih hmel a mit hnuai te chu a val kulh mai. mahse, engmah a sawi lo. Inthen chu a chak et et tawh anih ka ring. Kan chhuah dawn chuan kan inneih zungbun chu phawiin a kut ka la a, ka pe ta a. Eng thu mah ka sawi bik lo. Ka la hmangaih em em tih erawh ka hria.

Tichuan, nuthlawi dinhmunah chuan ka lo ding ve ta der mai chu ania. Ka pa chuan nakinah a la tangkai ang tiin Computer zir turin min nawr ta a. A thu hi hnial tumna ka nei tawh lo hrim hrim. Bakah ka natna te pawh ka theihnghilh ve maithei asin. Nitin Computer zir tur chuan ka chhuak ve thin. Hruaii hian designing a zir a, thiam pawh a thiam tawh khawp mai. Ka tui zawng erawh a ni ve lem lo. Kan computer operator Mama nen chuan kan inkawmngeih ta khawp mai. Ani pawh pathlawi fa pakhat nei tawh a ni a. A fapa chu an awmpui a, a rawn hruai zeuh zeuh thin a, a duhawm khawp mai. Kan titi duhzawng a inang a, kan dinhmun a lo inang em em bawk. Nupui uiresan ve tho a lo ni a!  Kan sawi nasa thin.

Apuia leh Hruaii inzui lai ka hmu zeuh zeuh a, Hruaii kher ni lo hmeichhe dang nena an inphur pawh ka hmu tho. Ka la hmangaih em vangin ka na leh ngei ngei thin. Min thlauhthla hmak thei leh enh vanga min phatsan nge anih chhanna min pek a tum buai miah lo chuan min tina zual a, chutihrualin ka huatna a tipung telh telh bawk.

Private a zir ka ni bawk a, kan tam lem lo. Ni khat chu hmana Hruaii'n a lo hruai a bialpa kha ka hmu nawlh mai. A lo zir ve reng chu niin. Kan nupa inthen thu pawh a lo hre ve reng reng lo va, pwi a tih thu te a sawi luam a. Hruaii nen an inthenna a rei tawh thu leh intihthiam lohna pawh awm lo va a rawn then tawp thu te, hriatthiam harsa a tih thu te a  sawi ve nasa mai. Hruaii pawh chuan a timak ka ti khawp mai.

Mama nen kan pathumin kan inkawm ta fô a. Tluanga (hruaii ex)  hi keini aiin a nau deuh a, mahse, kan inkawm thei fu hlawm. Apuia thiante nen pawh kan la inbe zeuh zeuh. Friday zan a ni a, kan pathumin chaw kan ei chhuak dawn a. Mama carin kan kal a.

A lo lun hle mai. Kan dawhkan kan kil tawh hnuah ka bul maiah Apuia a rawn ding a. Min chhuk melh run chungin, "A tawpa tawpah chuan" a ti sup a. A awmzia ka hre miah lo. Kan piah lawkah Hruaii te nen an lo kil ve a lo nia!  Confi taka awm turin mama chuan Tluanga nen min fuih char char. Kan titi vak vak a, ka nui lui ve nasa mai. Kei leh kei lo angin. Washroom ka pan tur chu min lo chelh ding leh a.

"Kei aiin a tinuam che aniang maw, kha i hlim khawp alawm" a ti leh a. Eng nge maw a sawi teivet ni. Hruaii mitmeng ráng chu ka zuk hmu a. Engah mah ka ngai duh tawh bik lo.

"Nang ni fee, in zalenna chu in hmang nuam khawpin ka hria" ka ti ve hmak a. Ka kalsan. Ka insangmar teuh erawh ka duh lo ru viau thung.

Chumizan chuan Apuia thianpa Sama'n min lo text hlawl mai a.

"Dingpui, dik tak chuan a hma kha chuan ka tan hram hram zel che a. Tunah chuan i lo tenawm em vang hian ka be tuitang taeh lo che" a rawn ti mawle..

"I sawi awmzia ka hre lo" ka va ti a.

"In inthen tirh kha chuan thiapa kha kan dem rawn vek a, Hruaii pawh kan ngei vek. Mahse, zaninah in inthen chhan dik tak kan hria a. I lo mak reuh khawp mai. Hetiang hmeichhia i nih hi kan ring lo asin le"

"Sawi chiang teh. Engmah a awmzia ka hre lo tak tak"

"Tang tang che chuan aw.  I uirenapa pawh Hruaii bialpa a nih kha.. Zanina i chaw eipui kha" a rawn ti anih chu!  Ka darh vekin la hria.

Thinrim sai hlawk hlawk chunga msg type thei ka nij si loh avangin ka call ta ngawt a.

"Tu in nge ka uire ti a?  Tuin nge sawi?  Hetianga min ti tur hian dikna in nei lo. Sawi rawh u, tuin nge uire min ti? " ka ti ta chiam a. Ka au rin èm vangin ka nu leh pa an lo lut ve nghal. Ka khur zawih zawih thei mawle. Hruaii erawh a la rawn haw lo thung.

Ph a dah khap a. Whatsappah thlalak a rawn thawn thung. Ka'n en nak chuan ka ph ka thlauh tawp. Ka nu chuan a lo chhar vat a, a en ve. Chek tlak tlak chungin ka pa a entir ve a. Ka pa chuan makti hmel pawh a pu lo.

"Keimah ka ni lo.. Pa, ka uire miah lo" ka ti chhuak thei hram.

"Ka hria e.. Ka hria e. I uire lo.. Ka fanu, engkim a chiang ta e" a ti nghut nghut a.  Ka nu erawh chuan, "A tirah khan sawi tur che lawm, Apuia zawk kan lo dem vak a. Hruaii ngei pawh i pain kut a thlak hial anih kha, nangma dik loh vek a lo ni sia" a ti. Uichonu leh!

Thlalakah chuan Tluanga, Hruaii bialpa hlui nen saruak veka khuma kan mudun lai a lang a ni. Ka hmel ngei chu a ni sia. Mi râp takzet. Apuia nen takngial pawh khati anga thlalak kha ka duh ngai lo.

"Naute, mu phawt rawh. Engmah ti hrih suh aw. Keiman ka chingfel ang" ka pain aw dam taka min tih chuan ka tap hlawp hlawp. Ka nat dan chu turu tak a ni. Puahkeh ka châk takzet.

Ka muhil thei dawn chuang si lo. Tihtur ka hre lo. Mama ka va call ta tawp a. Engkim chu tap chungin ka hrilh. Theihtawp chhuaha min tanpui a intiam a. Tluanga ka va be leh. Thlalak pawh ka thawn ve. Kei aimahin mak a ti.

"Hei te chu Hruaii nena kan click kha a va âng em. In inah khan" a rawn tih chiah chuan ka harh chhuak ta. Rang taka tho vin ka pa ka au nghal a. An roomah ka pawtlut a, Hruaii a rawn haw ve chiah bawk.

Tluanga msg te leh a hmaa kan ina an lo kal thu te ka sawi zung zung a.

Ka pa chuan a mit fim taka min en chungin,  "A tir atang khan engkim ka man vek alawm. Engtinnnge lang chhuak leh mai tur thil hi a tih ngam tiin ka ngaihtuah zawk" a ti diam a.

Pawisak ka nei ta lo bawk a. Hruaii chu ka kek bu lawp a, ka nam thlu thuai mai. A te tuar tuar a. Kan insual chu a ni ta mai.

"Nangmah in nih kha. Tluanga pawh i va be ru ziah a, ka hmu leh vek zel alawm, khami ni pawh khan Madam Sangi'n min lo call vangin ka chhuahsan che u a. In lo mudun anih kha" a la ti ngam mawle.. Hmeichhe dawheh leh bawlhhlawh lutuk..

"A tawk e. A tawk ta e. Hruaii, i nu nen hian min chhuahsan rawh u. " ka pa aw ki chang zet vang chuan an ding khawng lah a. An dâng sawp sawpin ka hria.

"I fanu hur herh zia kan man chhuah tak avang chuan min hnawtchhuak ang maw?  In lo tenawm pafa khawp mai." Ka nuhrawn chuan a ti hlawih hlawih a. Kei erawh chet lak dan tur reng ka hre lo. Sawintur pawh ka hre hek lo. Ka pa chuan a nawr chhuak dawn tho tho tih a lan reng avangin hreh zetin an insiam a, an chhuak ta. Ka pa chuan a vawi hnih nan nupui a then leh ta.

A tawi zawngin sawi tawh mai ang. Thil chu a kal zung zung ti mai ang. Mama'n kha thlalak kha edit a nihzia a rawn proof ta a. Tluanga lah in thudik a sawi hmiah hmiah bawk si. Hruaii chan chu a chhe ta hle mai. Mahse, tlawm a la tum eih lo, thuhretu nei miah lo chungin Tluanga nen chuan min la hmehbel ngat ngat mawle. Apuia'n thudik a hriat takah chuan..

Ngaihdam dilna thu ka dawng chamchi a. Hruaii khan thlalak kha a thawn thu leh chiang tak taka a lo hrilh thin vangin a danglam chho tan a. Mahse, min hmangaih em vanga ka insiamthat hun a nghah thu te a sawi. Khamini an lo mutdun ni pawh khan a ruih thu te, a tum loh tawpa Hruaii a chetsualpui thu te.

Tihian ka chhang, "Uirena te, phatsanna te hi tihpalh a ni ngai lo. Kan duhthlanna a ni a. Thudik hriat tuma i ke pen loh rah chu kei chuan ka tuar zo tawh. I tawrh ve hun a ni tawh e. Kei chu ka thinlung hliamtu bulah thlamuang takin ka muhil leh thei tawh ngai lo vang" tiin.

A tawp thut aw.  Hman lo chunga type ania,  ngaihnawm em em tura beisei a ni lo bawk. Min ngaidam ru 🙈😂