KEHCHHIA THINLUNG KHA (II)

KEHCHHIA THINLUNG KHA..(PART II).

Toni Râlte

A hmui sen hiamah chuan, ka hmui ka va chuktuah a. Uluk leh duhtawh zeta ka fawh vang vang hnu chuan min nemsawn a. A thaw hawk a. Mitmeng no em em hian min melh vawng vawng a. Ka lo tuiral leh tawh. Lungchim zetin ka kuah a, a beng bula ka thawk ham ham lai chuan, "Apate, apate" tiin ka ú fa naupang ber Sophia chuan min lo sawi nawk nawk a. Ka rizai pawm tun chung chuan ka harh ta hlawl a! Ka va ui em. Sophia chu ka melh rum hman tep a ni.

Engtikah tak a zunzam hian min phuar dawn ni maw..

Lu ka sún atanga kum tam a vei hnuah pawh ka lusún hlim lai ang reng kha ka la nih miau avangin, khuarei an tih teivet hi ka haw hlur tawk zawk a. Dik tak chuan khuarei hi a awm tak tak anga, kan sulhnu leh ka hriatrengna te hi a chhilh bo ang tih ka hlau a ni zawk. Ni e, a aiawh mi dang lalut tur hian ka thinlung hian inpeih ni reng a nei ngai dawn lo niin ka hria. Chu chu pawi ka ti hran chuang lo. Amah ang hmeichhia kha ka zawng ngai lo ,'Amah' a ni ka zawn zawk thin ni.

Tukthuan ei khamah dawr nghak turin ka chhuak leh a. Ka nitin hna chu ka ning hran lo a; mahse, engahmah phurna tak tak hi ka nei lo. Ka awm ve tawp keimah hi.

Dawr ka hawn atanga minute tam pawh a liam hmain, putar pakhat tawp ve hnik hnek te leh tleirawl ni mai awm mask vuah hi an rawn lut a. Ka dawr hi thawmhnaw dawr a ni tih ka la sawi lo tak. kekawr chu an en kual a. ka tawng tam lem loh vang hian mi ka dawngsawng thiam vak thin lo a, dawrtu pawh hi ka hmu tam vak lem lo.

"Hei hi engzat nge"? Ka va hawi phei a. A mask in a khuh loh chin a mitmeng chuan min ti phu chiang kher mai. Ka melh ngawt ngawt a. Min melh let ve kal bawk.

"Ka pu, hei hi engzat nge"? A vin lek lek a. Ka harh zawk a. "Áa..ih, 1200 a nia, 1000 in ka lo pe ang che u" ka ti zung zung a. Rin aia awlsamin ka tawng thei a. Ka lawm.

"Aw le kan lo la ange" a mask chu phelh se ka ti. Putar chu a ngawi reng a. pawi min pe fel a, an chhuak nghal a. Hmanhmawh zetin ka umzui nghal. Eng nge ka hriat pawh ka hre  lo. Kha hmeichhia kha ka hriatchian a ngai.

"Thiannu" tiin ka va kai chawt a. Muangchang hian a rawn hawi let a. A mitmeng chu tawrh a va harsa em. Eng sawi set set lovin  mask chu ka phelh sawk sawk a. Karei! Amah a ni. A mah kha a ni tak tak. Engmah ka sawi thei lo, ka kuah thawk a. Ka pawm vawng vawng mai.

"Heiii, i va zak lo ve. Awm sawn teh' a ti fiak thak a! Rum zeta min melh chungin, "Engvanga khatia rawn ti ngam nge i nih a?" A ti a.

Sawi tur ka hre leh ta lo. Ngawi rengin ka kai a, ka dawr lamah ka kai phei hlawk.hlawk ringawt. Ka kut chu thinthlak a tum.nasa, ka hum nghet si, a tawng miah lo thung. A pa nge a pu khan a ngaihna hriat loh hmel zetin min um ve bawk a. Min lo hmutu te tan chuan kan maksak ngawt ang.

"Tu nge i hming?" Ka ti chawt a. Thinrim tih hriat zetin a meng de sawr sawr a. Mawi ka ti lutuk.

"I á Mi? I va mawl ve"

"Mawh, Teteii i ni tiraw?"

"Ka ni lo"

"Lalhmingmawi"

Makti zet hian min rawn en haw a!

"Ka hming pumin min ko suh" a ti ta a.

LALHMINGMAWII

Khatia ka dawra kan inchachhuah vak atang khan kar khat a liam leh tawh. A chanchin ngaihven ka sim thei ta lo. Ka chhungte chu an lawm zawk emaw tih tur a ni. Ka nungchang a danglam miau sia lawm le..

Dawr atang khan thinrim zetin min chhuahsan a, ka umzui tawp. Ka zui zel sia, a mangang aniang, police stationah kan inzui lut ta kha ania! Engvanga umzui nge ka nih chu ka sawi hmiah. Police ho chuan min hrethiam riauin ka hre lehnghal. Anih loh pawn mi pangngai pha chiah loah min ngai aniang. Min kaltir ve mai a.

Thana kawtah, "I bialnu ka ni lo" a ti a. Tlem chuan a aw a nèm ve deuh.

'I ni" ka ti mawl tawp a. Ka kalsan.

Mahse, a chenna veng leh a chanchin chhui turin mi ka ruai tawp a. Ni 3- hnuah a rawn hre vek bawk. Luangmualah mi inhnuai luahin a pi leh pu leh a putea te nen an lo cheng ho a lo ni a. An khawsak a harsa ve hle a niawm e. Amah Lalhmingmawii khan cl xii a zir zawh hnuin IGNOU-ah BA a lo zir a, tunah a kum hnihna a zir mek a nih chu. Chumi zir pah chuan, Zarkawta Hardware dawrah a lo inhlawh a lo ni. A putea nen chhungkua an enkawl a nih ber chu.

Ka tan chuan Teteii kha a lo nung leh ta a. Damchhan ka nei leh ta.

"Ka nei dawn che" a number ka neih tak hnuah zantin he thu hi ka thawn thin. Min reply ngai miah lo thung.

Thla chu a eng riai a, Balcony-ah thuin guitar ka perh a. Tih takzetin lung a leng leh ta. Hmana kan huana kan kal tuma, hnahthel ro chunga puah phaha kan mut dun lai te kha ngaihtuah chhuahtir ka ni leh ta a. Khami tum khan kan chesual thelh a! Ani pawh a thaw kha a rang hle tawh a, a mitmeng fim kak phenah chuan 'awm' a awm.ve tih ka hai.bik lo. Tumah an awm lo va, kan free si. Bakah kan awmna hmun zawng zawng nen khan a dangdai dawn em a. Ka insumthei ta mang lo va..

"Lex, insum a va har ve. Mahse, mipa chak zawk i nia, min pui mai teh" a ti tham chhal a. Fing zeta a thusawi.avangin a him leh ta anih kha..kha mihring duhawm lutuk kha engvangin nge khawvel.hian a la chelh loh? ka hriat hauh loin ka biangah mittui a rawn luang a. Ka ngai a ni, ka ngai thlawt..

"Tete, min ngaidam rawh aw. Nangmah nen in inán em vangin Lalhmingmawii kha ka lo ngaihtuah ve ringawt a. Nangmah thlak nan ka ti lo ania. Ka ngaih èm vang zawk che a ni. Ka ti tawh miah lo vang, nangmah chiah ka ngaihtuah tawh ang" tiin ka phun sep sep a. Ka inthiam lohna a nasat èm vangin ka inhaw hial a ni.

Ka mut dawnin Lalhmingmawii number chu ka delete ta a. Teteii ta chauh ka ni.

"Thihna hi ka hua"

Chu.message rawn thawntu chu tu nge niang aw tih ka ngaihtuah buai a ngai lo. Mak takin ka thinlungin kha number kha a lo save a ni ngei ang. Lalhmingmawii ngei a ni. A message ka dawn vawikhatna.

"Why?"

"Ka pi min laksak vangin" Khai aw! A pi a thi anih chu! Dawr ka khar a, an in lam ka pan ve tawp. Vawikhatmah ka la leng ngai lo. Mi an lo awm hmur a. Thenkhat chuan in an lo singsa a. Ka va lut ve tawp. Khuma pitar ruang bawh Chuan a lo tap a.

"Pi, a fair lo e mai. Apu hi engtin nge a awm ang?" Tiin.

Engmah hi a fair ngai hleinem. Mawl lutuk. Ruang kila thut em chu ka hreh sia, pawnah ka thu ta a. Rei fe hnuah aputea nen an lo chhuak a, a mit chu a bui lak.mai. min rawn hmu nghal chat mai. Min zawng ru ve deuh pawh a ni mahna.

"I lo kal ve a ni maw" a ti sap a. Ka ding a. "Hawh lo kal teh" tiin ka kai a. Aputea beng.bulah.chuan eng.emaw  a va sawi a. Awlsam takin min zui ve ta mai a. Lumen tur tho ania, khawiah emaw len khawthawnpui ka tum mai chauh a ni.

Motora kan thut hnu chuan, "Miin mak min ti ngawt ang" a ti halh a. Ka ngawi reng. Nia, mak chu an ti maithei. Teteii ka hruai fo thinna hmun ka panpui mek a ni. Ka thinlungah chuan inthiam lohna leh i thiamchawp tumna a insual nuk nuk a. Hmalam ka bih ngur bawk.

Thli thaw chuan a sam a chhem leng delh delh a. Lalhmingmawii ai khan a hmeltha zawk lo a, a hmelchhe zawk hek lo. A lan dan engkim chu hmana ka mit la reng thintu lan dan chiah a ni.

"Thihna hi a na khawp asin" ka ti a. Min rawn melh a, a mitah mittui a tling bawk.

"Ka hrethiam che. I tan phei chuan a na ngawt ang"

"A na satliah lo"

"Ka ring"

Kan inbe thui hleithei lo. Rilrua pai nei run ve ve chungin kawla ni tla tur chu kan thlir a.

Kha a lusun atang khan kan in be ve thei ta viau a. Thil thar ka hriat belh zel bawk. Nula hlim thei, hnual mai ngai lo, mahni tawka luhlul zet leh a changa chimawm thiam si a lo ni a. Chung nungchang leh mizia chu Teteii pawh khan a nei ve tho..mahse, danglamna zawng an nei ve e.

"Nizan ka mumangah Teteii i tih fo kha ka lo hmu a!" A rawn ti.

"Maw.."

"Ih..a nui mawi khawp mai. Kan lo inang ve em tak a nih kha.."

"A  nui maw"

"Umm nui e" sawi belh tur dang a hre tawh lo mi le..ngaihven hi ka la sim thei chai si lo.

"Lex.." Ka harh hlawh a. Khua a lo thim vek tawh. Thlan lung bawhin ka lo muhil leh a ni ngei ang. A kut nem tak chuan ka hnungzang a chul.heuh.heuh a.

"Tete, min kalsan tawh suh..khawngaihin" tiin ka vuan a. A kut chu ka fawp ngawih ngawih a. A thaw hak a, "Alex, tian awm suh. Thil tha ber a  ni lo asin"..ngawi rengin ka pawm a. A lungphu dat dat chu ka ngaithla reng a. Min nemsawn a, "Hawh, haw tawh rawh le.." A ti leh a. Ka insum zo thlawt lo. A hmui soft em emah chuan ka fawp a. Min lo dawngsawng tih ka hriat chuan ka phur sawt. Hman ang tho khan a la zei lo reng anih hi, ka sam chu a tham ve nget nget a. Ka hmangaih Teteii hian min ngai ve chiang a ni. Thlarau ram atangin min hmu turin a lo kir leh anih hi. Ni lo, ka hmangaihna mittuiin a kokir leh anih.hi. Zo zetin ka pawm kang a, ka fawp ngawih ngawih mai. Ka chhungril hi a zang vah a, ka hlim ve a ni.

"A tawk e. Lex, duhtawk rawh. A tha vek e,.." A ti tham thiak a. Harsa tizetin ka in lahrang ta a. A hmel.chu a pherh ve nian a. A mittui pawh a tla. Ka nuih a. Thinlung takin ka nui a ni. A nui ve a. In kai rialin thlanmual chu kan chhuahsan ta a.

"Ka bulah awm tawh rawh aw" motora kan luh hnu chuan ka ti a.

"Ni lo e. Teteii ka ni lo" steering chu ka hmer ngawt ngawt a.

"Lalhmingmawi, ka lakah game i khel a maw? Min lo va hmusit ve. Engvanga ka hmangaih Teteii anga awm ngam nge i nih a?" chutiang em ema ka awrawl vin chu ka la hre ngai lo.

"Alex, i ngai dik lo anih kha..ka.."

"Engmah sawi a ngai tawh lo. Ka hmelhriat i ni lo. Chhuak nghal rawh" ka ti tawn tawn a.

Min rawn melh zawk a, na tuar tih hriat zetin ngawi rengin a chhuak ta a.

Zing dar 1 thleng motorah chuan ka thu a. Thawm chu a reh vawng vawng mai. Thinrimna leh Teteii laka inthiam lohnain ka khat a. Keimah leh keimah ka in chum chawrh chawrh mai. Engtin nge ka hriat loh theih? Engvangin nge ka fawh? Engtin nge ka ngam zawk? A tam lutuk.

"Alex, i phatsan a ni. I hmangaih Teteii i phatsan a ni" tiin ka inhrilh mawlh mawlh a. Ka rilruah eng thu mah a awm lo. Ka tuar thei thlawt lo, ka hmangaih ber an zalhna thlanmual lamah ka inkhalh thla leh ta nge nge a. Zingah ka haw ta chauh.

Lalhmingmawii chu a reh ta hmak a. Nitin zantin lo inbiak tawh chuan a khawharthlak ve reng. Mahse, biak tawh loh ka duh. He nu hian Teteii lak atanga min lak hran a tum alawm. Ka phal lo chu chu.

Ka dawr Opposite chiaha mipa leh.hmeichhe inzui lut chu ka va melh zawk a. Ka thinlung a nghing dawt! Kekawr dum fit zaih a ha a, kawr buang a taksa rem thlap thui mawl tawp a.ha bawk a. Flat a bun.bawk. A hma khan hmeichhe incheiin a inchei ngai mang lo va, tlema pa lam lek lek a inbel thin. Bakah inchei uar.vak chi a ni lo bawk. Mipa chuan a kai a, pheikhawk an en kual tih ka hria.

Ka dik miah lo kei hi! Ka thík ringawt. Laptop ka bihsan a. Mahse, ka mitsir hian a.melh reng tho. Ka dawrah an lo lut ang tih ka hlau. Ka hlauh ang ngeiin an rawn lut ta. Pangngai taka dawnsawn ka va duh em.

Kamiz an en a. Mipa ta tur chu. Ka kamiz ngainat zawng hlri chu a kawk kual vel a. No taka a bula mipa a melh vel te chuan ka kut min humruhtir a ni. Min hre awmin a lang lo va, dawr nghak satliah angin min bia. Tawrh.a va har ve.

"Congratz" zanah ka insum zo ngang lo va. Ka va thawn. Ka rin phak aia nasa in ka lo ngaihven em mawni le.

"Thanks" a rawn ti duh chauh a. Mi run hle.

"I hlim tiraw" ka va ti leh a. Tlawm ka inti..a vawtuin ek ka cheh a nih mai Hmel.

"Hlim a ni mai ang chu"

" A tha"

"Nia, nang pawh lo hlim rawh"

"Aw le" ka pride a chhuak leh tawh. Hun lo thei siah.

Zira'n min lo bia a. Ka leng phei khat bawk nen a rawn vui ve niah niah a. Ka va leng ta a. An chhangchhe ve nen, khua a har Lem lo khawp mai. An nu hi ka ex mah nise, kan inpawh tlang a. A nuam phian. Bialnu neia nupui nei tur hian min fuih chamchi reng a. Lalhmingmawii chanchin pawh ka hrilh chuang lo. Min ngaihven ru ve reng a, an lo hre leh daih tawh maithei zawk a ni.

" Bawiha, vawiin chu Teteii nena danglamna nei miah lo ka hmu a" Zira chuan kuhva thial nuan nuan pahin a ti a. Lalhmingmawii bak a nih ka ring lo.

"Va mak awm ve"

"Ti teh, Bawiha, i khawvel hi her danglam ve tawh teh. Teteii chu a thi tawh. A rawn kir tawh dawn lo. Chu chu pawm rawh' a ngaite bawkin ..

Ka haw hnu chuan Zira thusawi te chu ka ngaihtuah zui a. Hmanah kha chuan ka ngaithla liam.mai zel a. Ngaihtuah that ngai ka ti ve tan ta mawni le..kir tawh lo tur ngaia hun khawhral hi a satliah viau em.le..ka.hmangaih si a. Ni e, a dik, Lalhmingmawii pawh kha ka haw lo. Ka huat lohzia chu Teteii nen ka ngaih chhawk ta hial anih hi. Mahse, khamizana Teteii emaw ka tih laia engmah sawi lo va min lo dawngsawng khan min hmusit nia hriatna ka nei tlat a! Chu aia nasa chuan Teteii'n min hmu reng tura ka inngaihna khan inthiam lohna min neihtir nasa lutuk a ni. Ka thinlung.hi hmangaihtu ngaiin a tuihal a, hmangaih ka nei ngam si lo. Tunah min hnaih vetu ber lahin ngaihzawng a nei leh tawh bawk si.

Fawh a nawmzia pawh ka la hria..

"Alex, ka duat, ka ngai lutuk che" a kut zungtang sei sal chuan ka biang a zut kual a. A taksa chu a dai riai bawk. A hmel hlim lo tak chu ka.hmuh hmaih si lo.

" Tete, ti nge i va hlim loh.hmel.ve"

"Ih maw..ka hlim tan dawn a. I tichhe leh zel alawm. I thinlunga pindan ruak pakhat bak kha ka tan ka.hauh lo. I damchhungin min theihnghilh dawn lo.tih.ka hria, kha kha a tawk. I nunah mi thar tan hmun i dah ruah ve tawh a ngai a ni. Kei chu i thinlungah.ka cheng reng.tho dawn alawm..kei pawn hliam i nih loh nan ka veng zel ang che. Ka nui hmel hmuh i duh chuan, keimah tluk chiaha hmangaih i neih a ngai" a ti ta mai.

"Ni lo, ka thei lo. Ka phatsan thei lo che"

"Min phatsan ngai reng reng lo. Keiman alawm phatsan che. Hetiang tak hian i hringnun a chhe dawn tih Hria ila hruihrual kha ka thlang lo tur..ka phatsan che avanga min ngaihdam nan tu emaw tihlimtu ni rawh. Mawh..min kaltir tawh rawh"

"Aih..ka phal lo"

"Ka kalsan hlen dawn hleinem che. Englai pawhin i tan ka awm reng dawn alawm..khawngaihin i thinlung pindan kha tiruak tawh rawh"

Ka vawnna a thlah a, chelhzui tumin ka pan hnai ruak a. A tawlh hla telh telh a, ka um ve zel. Kawngkaah ka intauh ta bur a! Ka rak thawk.

Mumang satliah a ni chiah angem?

A ni telin duhthlanna chuan min nawr na telh telh a. Ka hlimpui thin games leh groupa ka nawi vak vak thinna te chuan ka ngaihtuahna an luah lo.telh.telh bawk. Lalhmingmawii Dp leh status ka bel ngun tulh tulh bawk si. Teteii min ngenna tihhlawhtlin ka.duh.vang nge ka thinlung hi hmangaih nei turin a inpeih tawh zawk...ka hrethiam lo.

"Lalhmingmawi" ka va ti ta thlawt a!

"Hawrawppuiin min ko ziah suh"

"In hmuh ka duh"

"Ka duh ve a mi?"

"I duh a ngai..tlaiah ka rawn lam haw ang che"

"I hmelhriat ka ni lo emaw ka tia" ka chhang tawh lo.

Tlaiah chuan ka lam haw ta ngei a. Kan inbe mang lo. Tlangah bawk ka hruai leh a.

"Eng nge a chhan?" Ka ti a.

"Eng chu?'

"Hman zana thlan muala thil thleng kha"

"Teteii nih kha ka châk thut a"

"I ni thei ngai lo vang"

" ka hre tawh alawm"

"Lalhmingmawii i ni alawm.."

"Chuan.."

"I bialpa kha then ang che"

"Ka nei lo"

Ka va.melh a. Chimawm zetin a lo nui sawng a. A rilru diktak.ka hrethiam chiah. Zawngi mai mai.chuh!

"Mahse, ât thut chang ka nei thin dawn ania aw" ka ti hmuk a.

"I ât thut chang chuan lem ka chan a ngai ziah dawn anih chu" reuh hian a..

"Tunah hian kan bulah a awm angem?" Ka ti leh sap a.

"Ka beisei. chuan a nuih pawh ka ring"

"Lalhmingmawi, min chhanchhuah i Duh vang ringawtin engmah thlentir suh"

"Keipawh hian khawvel thar chu ka mamawh ve tho asin"

A hmel tak ran phèna min mamawhna chu ka haider thei ngang lo. Ka kuah a.

A vawi khat nan Teteii theihnghilhin ka fawp a! Ni lo, Teteii chu ka hre tho anih hi..

Mahse, Teteii hrereng chungin khawvel thar ka din dawn. Chu chu a fair lo angem?