HEY.. KA PI..

HEY.. KA PI..

Toni Râlte

Chu khuangbai thawm teivet chu'h!  Keia muhil thei lo pheng tan chuan a va ninawm tehlul êm. Ka tho ta hlawl a. Ka thu vang vang a, zial ka tan a, ka han hip lut vang vang a. Eng ka ang thei chuang lo. Ka phone chu ka zuk melh a, ka hmet eng chak a, ka duh loh thil ka hmu ang tih erawh ka hlau si. Engvang teh hrep nge mawni hetia ka awm tlat le. Ka va zung a. Ka mut chhuak lo lutuk chuan ka thin a tirim hlur mai. A tawpa tawpah ka phone chu ka lek chhuak ta nge nge a.

"Putarte, mut a va chhuak si lo em" tih thu tawitê chuan ka mit a la hmas ber. Mahse, ka reply ngam lo. A la online vú avangin. Thaw hak chungin ka dah leh a. Ka mu thlawp a. Ka maimichhing a, engkim bul leh hetia a tawp dan hi ka chhui kir ta vawng vawng a.

"Sang, hmanhmawh ve teh. Tlai tawh nia" tia ka thianpain min koh lang lang chu hre reng chungin hmanhmawh zetin ka insiam sawk sawk a. Vawiinah hian zirna thar bul tan turin Tanhril lamah kan liam thla dawn a ni. Hlimna hian min kalsan meuh lo a ni e. Engkim chu a nuam a, a mawi thlawt. Kei leh Rema nen chuan Political Science kan la dawn a, tette atanga inkawmsa kan ni bawk a. Kan pahnih bawkin khawvel thar kan hmachhawn leh dawn chu a nia.

University kan zuk thlen thlak chuan, hmelhriat leh hriat loh kan insul pel nuk nuk a. Class hmasa ber chu a boring lem loh e.  Mipa ni ve ta nafam chuan nula khal leh chhe lo deuhte chu kan lo hisap kual zut zut a. Thian thar pawh kan nei nghal nual mai. Rema hi keia zei leh hrat zawk a lo ni bawk a, hmelhriat pawh a ngah zawk ang.

"Teh, Bro, a'n chhiat lohzia saw.. " tih paha a kawh ruk nula chu ka va melh ve a.  A ngo paw phek mai. Chhe lo tak a ni. Mahse, bialpa a nei chhe lo ngawt ang.

Kar khat lai kan kal tak hnu chuan chinchang te kan hre chho ve zel a. Hlimna tur pawh kan tawng chho ve reng mai. Bike kan inkenchhawk mai zel a, engkimah kan in lungrual thei a. Hei hi inthianthatna zahawmna chu a ni awm e. Lehkha zir lam erawh a la lang tehchiam lo va. Kan zirtirtu zinga nula (?)  awmchhun Miss Ruthi class erawh a danglam thin deuh. Hleitling zuah mai, sam thlah hnúp thin a ni a. Hmel tha em em tia sawi theih ni lo mah se, zahawmna leh mi hípna riau a neihna chuan a class lak a tih boring loh phah ve thin. Tin, a khal hle bawk. A subject lakah a tui tih a hriat a, ngaithlatu tan pawh a zangkhai phah thin.

"Zirsanga leh Remtluanga te kha in inbe lo thei tawh ang em? "

Kan hawi chhuak chiang hle. Kun ngur ngur chungin thil dang kan lo sawi hmanhmawh atin ni. Miss Ruthi mitmeng lian kel kawl chuan min melh tawn sek a. Kan zâm ve hle.

"Ngaihthlak hna in thawh loh chuan, hetia in hnena thu tam sawi hi eng nge a sâwtna ni ang? " a ti leh a. Thil dang a sawi zui ta a. Kha ta tang khan Miss Ruthi chu ka ngei ta tlat!  A hma anga sép kual vel kha ka duh ta hauh lo mai. In la eng emaw hmuh hian ka hmu tlat a, runluih ka chak zek zek thin. Mi puitling anga ngaih tawh kan ni a, zirtirtu pawh nise class-a in tawngkhum fek fek hi ka ngai thei thin lo.

A number ka nei thei ta. Ka ngeiawm ve ang chu aw.  Ka number pakhat hmangin ka be ta zeuh zeuh a. Dp-ah chuan mi lem satliah ka hmang tlat thung. Min hriat chhuah ka duh bik lo va.

"Ruth, i va nalh tak ém.. " tih thu te hi thawn ka ching a. Min reply ngai lem hlei lo va. A induh ve thlawt a ni. Hetiang hmeichhia hian min chó tlat zel!  Eng teh ual erawh ka ni miah lo. Chhungkaw khawsak sang tak kan ni hauh lo. Ka pa hi sipai pension a ni a, ka nu chuan kan in bulah eichawp dawr nghak ve thin. Ka u hian nupui nei tawhin kan la chemgho a. Ka nau erawh ka pu te inlamah a khawsa tam zawk. Unau hmeichhia neih ve hi ka châk thei hle. Mo kan neih hnuah erawh ka u nupui Seni hi ka farnu angin ka en hmiah. Kan in close bawk a, a awm loh hlek chuan ka ngai thei hle. Unau zingah pawh rei tak chhung chu a budelh an tih ang hi ka ni thin a.  Ka nu hian min manganpui deuh thin. Mahse, class XII ka zir kumah ka thang thut a, ka dawk ta zuah zawk mai. Ka nu ka chhun a, ka ngo. A tuai mah mah em aw tih tur khawpin ka ngo thin a, ka thinrim hlur zel. Mipa dangte aia danglamna ka neih awm ka hre miah lo. Thianho zingah a nghal pawl ka ni ve thin tih mai loh chu.

"Ruth, vawiin chu i nalh hle mai" tiin msg ka va thawn leh a. A seen hnu rei vak loah min rawn reply teh mial a.

"Zirsang, min chhaih thinrim i tum em ni? " tih hi. Ka phu nasa lutuk a, phone ka thlauh tep a ni. Engtin nge min hriat?  Ka number hi ka tlangzarh ngai miah si lo.

"Ka ni lo" ka va ti a.

"E" tih teh tawp a rawn thawn. Biak zawm zel ka chak si, biak dan tur erawh ka hre si lo.

" I bialpa hi ka khawngaih. I thinchhe sia" ka va ti hmiah. A thinchhe ve lah tak bawk a.

Smiley nui uar uar a rawn dah a. A zo leh der.

Class-a a rawn luh chuan ni dang aiin ka melh ngun. Kan lam a rawn hawi duh miah lo chuan min run hle. A chhuah dawn tepah a rawn hawi ve zawk a, kan mit leh mit a intawng chiang hle. A lai hmel ka hmuh tel avangin ka nui suk. A lai ve tak tak alawm.

Kha mi ni atang khan amah ka ngeina leh runluih ka duhna chu lak bo ang hmiah a ni. Ka en dan a danglam ta tlat!  Ka ngaihtuah ringawt paw'n ka zak. Ka kum zat ka ngaihtuah leh lek phei chuan ka tah a chhuak zawk. Miss Ruthi chu ka ngaizawng tan der mai. Kum 10 chuangin kan inthlau a.  Thil ni thei lo avang chuan ka hah ru thei teh e.

"Miss, i assignment min pek hi material ka hmu zo thlawt lo. A har e mai" ka va ti thawr a. Ka biak thinna number tho khan. Ka inzep hni hne peih tawh lo.

"Mahni inhai kaw zo tura puitlinga ngaih i ni tawh" teh hmuk a!

"Puitlin leh  tlin lohna tehna chi pawh nih loh hi"

"Hei kan meeting dawn, nih phawt le"

Zan khuain ka ngaihtuah leh tawh. Ka ning.  Class kal erawh ka phur phah thei. Rema takngial pawh ka hrilh ngam lo. Min nuihzat ang. Miss pawh ka ngaihbel nge kan classa rawn luh hi a phur thar riauin ka hre thin. Mhse, min melh duh ngai miah lo. Kei chu mit tla lo chauhin ka lo melh thin si a.

October thla kan chuangkai a, kan sik leh sain mumal chhuah thei hek lo, ruah a rawn sur zeuh zeuh mai. Vawiin pawh a rawn sur leh pek a, a tam ngei mai. A sur rei si, bike-a hawna chi ni hek lo,  bus kan chang ta ngawt a. kan la chang rei lo, miss chu a car-in a rawn chho a. Kan dinna bulah a rawn ding chawt a. Lo chuang ve turin min sawm ta. Pali lai kan ni a. Front seat-ah chuan ka thu lut ta nalh a.  A bula han awm chiah chuan a huhâng a na ngei mai. A rimtui si, a tawng bawrh bawrh a. A lai hmel reng ka hmu tawh lo. "Zirsang, in vengah khan Ramteii, Pu Chhuanvawra fanu kha i hria em? " a ti a. Ka hriat thu ka lo sawi a. "Pasal a nei dawn a, thlaleh khian, thianah min hmang dawn alawm" a ti liam puat a. Ramteii chu Ni Ramte tiin ka ko thin.

Khatia a motora ka chuan tak hnu atang phei kha chuan ka ngampa sâwt viau a. Mahse, tihsual leh a pawisawi hlau reng rengin ka bia a, a nuam hran miah lo. A pa Doctor lar tak, a nu lah HBC senior Lecturer a ni bawk a. Amah chiah fanu an nei a, a nau mipa te pathum pawh mi fate aia class ngawih ngawih an ni.  An bialah zaipawl member a ni bawk. Kei chu chawhma ka inkhawm tâwk zel.

Kan inbe tam ve tial tial a. Beiseina eraeh min pe ngai lem lo. Ni Ramteii te nen chuan kan lo innel ve bawk nen. Miss chanchin chu ka zawt ta zeuh zeuh a. Mahse, ka fimkhur khawp mai. Ka ngaizawng tih a hriat ka duh lo hrim hrim. Ka cousin U mama'n a star angin ka sawi daih.  Rilru kawi leh kheuhbeuh pu lo na nâ na chuan ka zawh ang ang chu min hrilh ve mai zel a. Bialpa nghet a neih thu te, an inzui rei tawh thute thlengin a sawi ta mai a! Ka hawi lawl lawl ringawt.

Mahse, ka be lo thei si lo. Min reply ve zel bawk si.

"Miss, vawiin chu ka lo kal thei dawn lo va, chapter thar lo kaipui lo mai la" ka va ti a.

"Van thu ve" a rawn ti ringawt. Mahse, a lo zirpui bik miah lo mawle. Tlem tlem chuan min ngaichâng ve deuh niin ka hre thin. Mahse, bialpa a nei si. Ni Ramteii te inneih ni chuan ka kal ve a.  A pui khawp mai. An hausa dun bawk a. Senior tawh lama innei ve ve an lo ni bawk nen. Lawmpuitu an thahnem khawp mai. Mo ai chuan Miss chuan ka mit a la zawk. A kawrfual sen duk hak simple zet chu a inhmeh ngei mai. A nui hmel hmuh a nuam bawk. Thla ka lakpui ve zân e. A bialpa niawm tak pawh ka hmu tel e. A palian hrep lehnghal.

Hetih hun lai hian ngawrh zeta betu ka nei ve a. Mami a ni. Kan class ami a ni a,  chhe hran lo. Mahse, Miss in ka rilru a luah hneh zawk miau si a. Ka chhang ve mai dawn mawni le..

"Beisei loh tur beisei renga hun khawhral hian hlawkna pakhat tal a nei em le? " tia status ka up chu comment tu mi pahnih an lo lang nghal thawt. Pakhat chu Mami, pakhat erawh Miss!

"Keimah min sawina mi?' Mami.

"A tu chu nge i beisei a? " miss.

Chhanna inang erawh ka pe thei hauh lo vang. Rilru siam fel a hun tawh. Ka duh aia nasain ka vei tawh tlat.

"Dik tak chuan, ka vei deuh hian ka vei tih a hre si lo va. Ka hrilh ngam bawk si lo va.  A hrehawm. Tin, bialpa a lo nei bawk nen" ka ti ta a. Ka va inpuang teuh tawh tak.

"Bialpa a neih chuan a buaithlak ve bawk anih chu mawle.. "

"Nia, a la hre lo bawk a. Tihian a rukin ka bansan mai ang ka lo tia"

"I thei ang maw? "

"Ka tum ang" chu chu ka biak tawpna nihtir ka tum ta a. Thla 2 pumhlum thak zing tin leh zan tina wish tu ka reh chuan a hrethiam ve mai ang chu. Mahse, sava thlawk lai a ni miau si lo va. Bakah min duh dawn lo nasa. Ani chuan a student angin min en a, min naute chei bawk. Mahse, kha kha nuam ka ti. Ka zep miah lo, naute duata min duat khan nuam ka ti chiang.

Ka harh rualin wish ka tum úk hman a. Ka thulh thei hram. Nilengin ka reh. Ani pawh a rawn kal lo teh tlat!  Zan a lo ni a. Lehkha ka zir ve ngei. Ka in nuihzat angreng. Dar 10 pelhah mut hmun ka pan ve chauh a. Ka phone ka han hmet eng chu, Mami misscall 6 leh Miss misscall 1 a lo awm!  Call hian vawi 4 chiah kan la inbia. Chu pawh ka call hmasak a ni zel thin.

Whatsapp ka han luh chuan, "I va reh"

"I dam lo mi? " "Van mak em em" tih hi Miss hnen atangin ka dawng. Mami msg erawh a tlar thla dul mai. Miss chu kal kánin Mami ka chhang ta zawk a. A harsa reuh tawp!  

Dar 11 a rik tawh pawh chuan Miss chu a la online mawle!  Zan dangah chuan dar 10:30 hi a mut hun a ni. Laklawh a awm loh chuan. A online leh online loh ka check reng bawk si. Ka hah thlawt.

"A harsa ve thlawt" tih tè mai hi ka update a. A rawn view hmasa ber mawle. A view atanga minute tling lovah, "Hun dik lovah kan intawng a ni" tih thu hi a lo update ve chiah!  Status hi a nei ngai mang lo. A neih ve chhunah pawh Pathian thu leh quotes hlir. Engkim a hre ve tawh tih ka hai ta bik lo.

Mahse, engmah sawi tur ka hre lo. Data ka off hma chiah chuan a msg a lo thleng leh a. Ka hawng ang nge hawng lo vang tih ka inngaihtuah hman. Ka hawng lo phal ta ngang lo.

"Inenkawltha rawh aw. Awmze nei lo vang hian intihnat duh loh tur" tih hi.

"Ka tha alawm. Ka la tha ve mai ang" tiin ka chhang ta nge nge a.

"A pawi tiraw? "

"Nia, pawi ka ti"

"Thil hi a hnawk lutuk a" a sawi awmzia ka hre reng. Mahse, ka hre lo der.

"Eng nge hnawk a? " ka ti.

"I hriat kha"

"Nia, bialpa hi nei lo la, a danglam deuh angem? " ka ti ta thlawt a!

"Mai thei"

"Tak tak em? "

"Zirsang, nang leh kei chu gap a tam lutuk alawm. Kum 15 dawnin kan inthlau asin" ka ner sawk.

"Bialpa nei lo mah la, kum vangin min hnar dawn tho tihna tiraw? "

"Ka hre lo. Engmah ka hre lo" a tih zawh rualin, engmah sawi lovin a out nghal.

Beiseina leh beidawnna insual reng vanga ka chhungril nun hrehawmzia chu aw.  A bialpa lah khan then a tum hmel si loh. Mahse, a rilru ka tibuai pha ve tih ka hriatna ringawt paw'n min tihlim tho si. Ka mipatpuite hi rual ú zawk te zúnah an lo uai ve tawh ngai em le.. Eng tin nge an damkhawchhuah bik.. Rema takngial pawh ka share ngam si lo. Hetiang hian ka awm ngai lo asin le.. Kum 10 tala upat thut ka chak ngei mai.

Class kal pawh phur tho si, châk si lo ang hian ka awm. Ka nguai deuh nge thiante pawn min zawt sap sap. Engmah ka hrilh thei der si lo. A class rawn lak hun chu thinphu dep depin ka nghak a.  A rawn lut a. Kurta pawl, simple taka thui leh kekawr dum fit tak a rawn ha a. Chapal kaih changkang zet a bun a. A va nalh tak. Ka lo melh leh ngawih ngawih zel a. Min rawn melh ve zeuh zeuh. Mahse, lecture a pe buai chuang lo.

Break lai chuan ka va text leh ta thlawt a. "I sam kha tawn ve chhin teh. I inhmeh ngawt ang" tiin. Ka hmu chak miau a.

Chawhnua a rawn luh leh chuan a sam chu sang taka tawnin a inhmeh kher mai. Tihian ka thu a awih zeuh zeuh bawk sia, awmngaihna min tihre lo.

Zanah chuan Ni Ramteii'n min rawn be mial a!  Kareiii.. A thu rawn sawi chuan min va tilawmin min va tihrehawm si em.

"Sanga, Ruthi'n ka bulah 'Sanga hi ka rilruah a awm tam ber tawh. A la naupang sia, min tibuai lutuk. Puia (a bialpa)  hian ka thinlungah engmah hmun a chang tawh lo. Zirsanga ringawt ka ngaihtuah tawh a. Ani chuan puitling takin min bansan a tum a, mahse, keimah zawkin ka thei lo' a tia, Ruthi hi ka hrechiang a, a vei tawh chu vei tlur mi a nia. A bialpa hian neih a tum si a, chuvang chuan nangmah zawk hian bansan tum rawh" a rawn ti.

Awm dan ka hre ta hauh lo mai. Miss chuan min lo vei ve lutuk anih chu!  Mahse, a bula ding mipa a nei tlat si. Hun hian nunrâwn chhuahin a hun lo vah min dintir a ni. Ka hua.

"Miss, ka duh che. Min block mai rawh. Ka be lo thei si lo che a" ka va ti tawp!  Ka rui miau a. Ka lungpuam ngei mai.

"I rui  em ni? " a rawn ti nghal chat.

"Rui lo. Hmuh che ka châk. Inhmu ang" ka va huaisar ngai ve le.. Beiseina min siamsak ve miau alawm le..

"Tunah maw"

"Aw. Ka lo leng dawn"

"Chi loh lutuk. Lo kal suh"

"Ka lo chhuak dawn chiah" ka ti ve tlat.

Min lo call nghal. An in piaha a naute nupa in luaha kal turin min hrilh. Chak zetin ka lim phei ta nghal a. A naute inah kawtah chuan a lo ding váng a.  Pyzama leh tshirt senduk a ha a, a awmhmun kawr mai maia a inthuam chuan a lang naupang riau zawkin ka hria. A thinrim hmel lem loh vangin ka awm a nuam huai a. Ngawi rengin a naute inah chuan kan inzui lut ta. Hmeichhe pakhat leh mipa naupang kum 2 awm vel hi an lo awm a.

"Te, hei hi Zirsanga chu, Zirsang, hei hi kan mo Tei a nih hi" a ti satliah a. Tei chuan min nuih sak a. Kan inchibai a. Mipa naupang chu a duhawm turh turh hle. "Ka nau chu a chhuak lawk a.. Hawh he lamah" tih pahin min kai a, room-ah min kai lut ta a. Tei bulah chuan engkim a hrilh vek tawh anih ka ring.  An inclose hmel khawp lehnghal.

Khumah kan thu a. Mikhual room niawm tak a ni.

"Zu chu i in ngei si hi mawle" ngaihnobei vak lo hian a ti sap a.

"Nia, tihpalh" ka ti tawi tak a. Sawi tur vâng ka ti.  Ka zâm chhe lek lekin ka hria. A kut chu ngam leh ngam lovin ka va hum a.  A dai riai mai. Min rawn melh kawk a, tím dúiin ka lo en let ve thung.

"Zirsang, he thil hi  a tha miah lo a ni"

"Ka hming pumin min ko tawh suh" ka lo ti hmuk a.

A nui hak a. Rilru hah hmel deuh hian a awm leh a.

"Miss, ka hrethiam bik lo, hrehawm ka ti ve lutuk. Min block rawh ka tih kha" ka ti ta zung zung a.

"Miss tiin min ko bik suh" kan innuih dun a.

"Ih maw, nia, ka thiam loh a ni. Puia pawh ka zah lutuk, ka hrethiam bik lo" a ti leh sep sep a.

Sawi tur ka hre tawh lo, ka huaisenna zawng zawng sawm khawmin ka kuah thlawp a. Kan lungphu ri chu kan inngaihthlaksak tawn dun a.

"Puia hi then rawh. Khawngaihin" ka ti ta thlawt a!

In lak hran pahin, "Chuti maia awlsam a ni hleinem. Nakkumah min neih a tum asin" a ti ta mai a.

"Anih chuan, ti nge beiseina min siamsak?  Mawh" ka huangtau lui ve tlat a.

"Zirsang, i awki a sang tép ania. Ka hre bik lo, ka thiam loh ka tih kha. Keimah pawh hi keimah ka ni tawh lo aniang" a kun a.

Dimtéin a sam chu ka hui kiang a. A khabe chu chawiin ka damchhunga thlum ber tur a hmui chu ka fawp ta ngawih ngawih a. A hmui ném thlap chu fawh a nawmzia sawi turin ka tawngkam thiamnain a daih lo. A ka chhungah ka lei chu rawlh lutin ani paw'n duhthawh zetin min lo chhang let ve hiam hiam a. Chuti anga kan bur ngar ngar lai chuan naute tap thawmin min rawn then hrang ta a. Kan thaw hawk hawk mai.

"Rui tawh suh aw"

"Umm.. Puia chu? "

"Mahse, Zirsang, kum 10 chuang lai kan inkarah a tlak hi"

"Chuti ang ka ngaihven lo, Ruthi i nih chhung chuan pitar pawh ni la pawi ka ti lo" ka inla pa ve ngar ngar hle. Ka rilru dik tak ka sawi.

"Thil harsa tak a ni dawn a. Puia thlauhthlak chu. Mahse, ka lo tum ang. Nangmah vangin min hmangaihtu rilru ka tina dawn anih hi"

"Kei pawn ka hmangaih che alawm"

Min rawn melh haw a. A mitmeng nung sar chu ka hmuh hmaih bik miah lo. A hlim ve tih hi ka hre chiang em mai.

A nau lo hawn hmaa hawn a ngaih vangin in kham lo takin kan inthlah ta phawt a. Bike khalh a nuam ngei mai. Kúk phei rawih rawih te kha ka châk ut ut a. Ka hlimzia hi van khian min hriatpui ka ti ngam sak mai.

Kha mi zan atang khan eng lai pawn tih theih deuhthawin kan inbia a, a rukin kan inhmu chamchi a. Puia hian a duh ém vang leh an chhungte ve ve an inhriattawn vek tawh vangin chuti maia kalsan chu a theih bik loh. Min kawp anga a lan pawh chuan ka nép phal chuang lo. A cheap tih chu ka hria. Mahse, ka hlimna a nép chuang si lo va, tin, min duh ve em em tih ka hriatna hian min hlattir thei bik lo  tin ni.

Rema ka hrilh tum chuan a awih lo hmel khan ka nuih a tiza. Kan buaina leh harsatna zawng zawng ka hrilh vek a. Min pui duh leh ngei dawn tih ka hre bawk. Ni Ramteii leh U Tei te nen an pathum chiahin kan thuruk an hria. Tlangzarh chiam chi ni hek lo le.

Class room-ah mawlh hian chimawm ka chhuah châk thei teh e. Tih laih phet ka tum thin a, a thinrim biang tai hlar chu hmuh  a nuam thin hle. Tuma hriatpui si loha induh leh inthlahlel ngawih ngawih chunga hun hman chu nawm dan a thúk bik. Mipa ka nihna angin min zah thiam ve khawp a, a pangchang thiam bawk. "Puia bulah hian ka pangchang ngai miah lo, i bulah chuan ka no tlat zel" tih ve tlat chu!  Amah aiin ka la pangchang zawk chéu! Ka titau hma zawk bawk. A thikthu chhe ve lutuk chu ka hlimpui letling thin. A hmuh laiin hmeichhia ka be ngai lo tihtheih a ni. Mami hnaiah phei chuan ka awm ngam lo hrim hrim. Hlau ve vet vet tak chu ka ni. Mahse, a tawp kharna chu kan hlim dun em em tih hi. Ni khat chu kan bazar dun ve ta a. Mi in min hmu fuh ang tih erawh kan hlau ve hle. Hlauh ang ngeiin a thiannu, Geography department lam ami chuan min lo hmu dun ta hlauh mai. Ani erawh nu a ni tawh thung. An inbe luam a.

"Hei in pa a mi?  " a ti a.

"Ti ang lo em mai. Kan nau anih hi, ka bazarpui a" tiin a lo chhang a!  Ka tek chhawk mai. Na ka ti lutuk. A thiannu kal hnu chuan ka ding reng a. Min rawn kai a, ka lo thing thla dawrh mai. Tím dai hian min rawn en a. Ka haw hlur mai. Min zahpui lutuk leh mi dangin kan ni tih an hria ang tih a hlau lutuk chu ka ngei thar thut mai.

"Ka haw dawn" ka ti hmuk a.

"Hrethiam ve la.. Puia te nen an inkawm thin alawm. Muani kha"

"Puia puia.. Ka hne lutuk tawh. I then thei chuang si lo va, inthen tawh mai ang. Ka hun ka khawhral thei tawh lo. Nih phawt" tiin ka kalsan ta vang vang a. Ka hawilet miah lo. Zanah chuan min rawn call ngat ngat a. Ka ph ka off ta hmak. Ka pride a chochhuak ve tawh tlat. Eng chen nge ka nghah tawh. Puia a la leng kal reng a, Puia bulah a la nui reng. Kei chu a hun khawhralna satliah chauh ka ni. A tawk. Ka tlawm tawh lutuk. Biak hmasaka tihlawm ka tum tawh eih lo. Ani lo pawh hi ka hmu ve lutuk e. A tukah class kan off bawk a, ka cousin te nen an huanah kan kal ta daih a. Ka thinlungah chuan a nung reng. Mahse, ka ngaihtuah lo lui tlat. Min lo call zeuh zeuh bakah msg a hnutchhiah reng bawk a. Chhiar lo leh pick up lo vin ka nuai liam tawp tawp. Tlaia kan haw lam chuan, ka nuin Lunglei atanga ka putea thil lo hawn ngaihven tura min chah angin counter ka pan nghal a. Ka tum loh tawpin Ruthi ka hmu ta a. Puia nen an thiannu niawm tak Raipuar ul tawh leh a pasal niawm tak hi an lo thlah nge an lo hmuak mék a. Ka thin so phut inthunun hman tawh lo chuan, "Hey, ka pi, ka hriat hnu i va ang ve" ka ti thawr a. Makti leh hrilhhai zeta min rawn melh vawng vawng chu nuamti zetin ka lo nuih.

Chumi zan chuan ka mu mang lo. Ka mitthlaah Ruthi na tuar hmel, makti leh hrilhhai lutuk kha  a inlar zut zut reng a. Tih kian dan ka hre si lo. Ka tal ka tal a. A number chu ka hmet chhuak a. A reh ta hmak chu ania. A msg te kha lo chhiarsak ve mai mai tur hi ania. Ka dik lo tan, ka lung leng tan chu ka duh lo ru hle naa ka tireh thei teuh si lo.

Pitarte tia ka save a number chu call tumin vawi tam ka hmetchhuak a. Ka chaponain ka kut a thingthla leh nge nge thin. A online kuau a. Min biak erawh a tum tawh lo anih hmel. Ka ngai lutuk chu ka hnukte zuk ulh hial thei a!  A nun hahthlak leh khirh turzia ka lo hriatthiampui ngai lo va. Dik tak chuan Puia pawh vawi hnih lai a then anih kha. Puia'n damdawi a lo bar chiam avanga an kaihthawh zawh loh vangin amah bawk an pun leh nge nge a. A dinhmun hi a khirh ve em bawk a ni. A chhungte zawng zanwgin Puia nupui tur hmuhin an hmu tawh a. Chutih lai kara kei a student nen kan inkawp tih hriattir tawp chu a harsat ve dan tur te.. Aaa.. Ka lo che rang mah mah a ni. Kan inkawp tih mi dangin an hriat huna mak an tih bakah nula khaw lo leh sihhnip anga an sawizui tur te ka ngaihtuah a. Bial zaipawl member anih piah lamah an branch-ah treasurer a ni bawk asin. Hlauthawng chung chungin min thlakhlelh em vangin min kawp ve hram hram a. Engah nge maw ka lo hriatthiam duh miah loh le!?

Ka intipa thei ta ngang lo va. "I va meng rei ve" ka va ti tawp a. A seen duh lawk lo lehnghal.

"Nia, nang pawh"

"Nia, vawiin avang khan min ngaidam rawh aw"

"Tikhan kan inrultawkah ka ngai mai ang"

"Inhmu ang"

"Tunah maw"

"Umm.. Ka lo kal" tih leh thawh ka rual a. Min chhan letna pawh ka ngaihven tawh lo. Ka hmu chak lutuk leh ka ngaihzia chu ka hrechhuak zut zut a ni ber mai. Ka mamawh a ni tawp mai.

An in thlen hma kawiah ka ding a. Ka call nghal a.

"Putarte, i â thei e mai" a rawn ti nghal bawrh bawrh a. An in ka tlanpel phawt a. Hardware dawr kawtah a lo ding vâng mai. Hmanhmawh zetin bike-ah a rawn lawn a. Chak zetin hmalamah ka tlanpui ta vâwk vâwk a. Kalna tur ka hre miah lo. Ka ngaihtuah chhuak thut, ka letpui a, kan in lam ka panpui ta hmiah. Mak a ti deuh chuan ka hria.

Kan in hnuaiah ka kai thla a. Kan inhnuai luahtu Pa Rama te nupa chu ka kaitho a, phak chuapin a rawn tho a. An room lehlamah chuan kan lut phei ta a. Pa Rama te chu ka hrilhfiah leh mai ang ka ti rilru a. Dar 10 a pel duai tawh a. Inru turah min ngai ngei ang. Ruthi chu a hlauthawng tih ka hre mai. Mahse, min ngai ve tawh aniang, ka kuaha ka fawh vel pawh chuan min dang eih lo.

"Vawi khatmah min tina tawh suh aw" ka ti a.

"Nang pawn",  a ti tham chhal a. Ka keih hlawih hlawih a. A tawp thlenpui ka tum ta a. A tang nasa khawp mai. Mahse, ka ta  nihtir ka duh tlat a ni. Ka ta liau liau nise ka ngaih a tha ang.

"Putarte, ti nge hetia i awm? " a aw-ah chuan zauthauna a tel ve tih ka hre ve lutuk.

"Ka ta ni rawh"

"Ka ni sa alawm"

"Puia ta alawm i nih"

A ngawi hmak mai. Ka tan tha leh a. Min dang miah lo. Ka hrilhhai letling. Khumah chuan ka keuh thlu a. A hnute tham tawn tawn chungin a chungah ka bawk a, a bawp chu ka khupin ka nawrkau nghal a, ngawi rengin min chhang let ve miah miah. A kawr chu ka hlim chho a, a hnute var hai chu ka fawp hlawih hlawih a, ka mipatna khawng fur chuan chhuah chakin min nawr et et a. A kekawr chu ka kekthla sawk sawk a. Ka hmanhmawh takzet a ni. A panty sen hak sexy zet chu dimtein ka phelh thung. Ka rum hawk, a nalhzia chu mak ka ti thlawt!  Ka duhthusam tihlawhtling turin dimtein ka nawr a. Ka banbulah a hmer ngat ngat.. Ka inrin hmain ka nawr lut ta pâwk a! A rum hawk. Ka phu chiang hle.

Nula thianghlim maw a lo la nih?  Ka hmeichhe hmangaih em em virgin chu ka hawng ta. Hlim tur ka nih laiin chhungrilah nuam tih lohna erawh ka nei chiang hle. Kan zawh hnu thleng pawn mahni ka inthiam thei miah lo. Mahse, ka ngaihsanna chu a nasa zual a, ka hmangaihna pawh a thúk sauh. Kum 30 chuang a thianghlimna a vawnghim thei chu ka va chhuang em..

Haw ka phal tawh si lo, hawn a duh si. Min ngen ngawih ngawih vangin dar 2 velah ka va thlah leh ta nge nge a. Sex kan hman atang phei chuan nikhatah vawi khat tal inhmu lo chuan kan awm thei ta meuh lo.

Mahse, vanduaina chuan thla a rawn zar tan ta. Puia chuan Ruthi râwn miah lovin palai a tir ta tlat mai. A chhan chu kan inkawp tih a hre ru tlat atin ni. A hlauthawng phèng chuan thawt lawk miah lo vin neih tumin a siruk lain tan a rawn la ta tlat si a!  Ruthi pawh a thinrim kher mai. Kha hun atang chiah khan hmeichhiate hian an duhnaa pawisak an neih lohzia ka hriat phah.

Ruthi chuan min rawn ko va, an ina ka vawi 3 kalna tur chiah a ni. Zum deuhin ka lut a. An lo thu thap mawle!  Ka va zâm tak em.

"Pa,  hei hi ka hmangaih chu a ni. Zirsanga ka tih kha" ka thut hma hmain a lo ti nghal a. Ka hamhaih atalangin ka let leh zuk nghe nghe. Min rawn kai a. Hnai taka min enin, "Neih ngei pawh ka duh a ni" a ti ta a. A tarmit fim zet chu siamthain apa chuan min rawn melh vang vang a. Thinrim hmel a pu lo. Anu erawh a meng rum ngang mai. A nuta lo awm ve erawh chuan ngawi rengin a farnu chu a melh tlawk tlawk thung.

"Zirsanga maw.. Lo thu teh' apa chuan a ti thum chhak a.

"Hei Ruthi hi ka fanu neihchhun a ni a. Kum 30 a pel tawh a, nang lah a zirlai naupang mai chauh i ni. Engtia hmalak nge i tum le? " a ti ta mai. Ka lo ngaihtuah ngai miah loh thil chu a ni hran lo, mahse, fimkhur taka ka chhan a ngai tih ka hria.

"Ka pu, Miss Ruthi hi ka hmangaih a. Neih ngei pawh ka duh. Mahse tunah chuan hnathawh ka la nei lo va, min nghah theih phawt chuan, hna ka hmuha ka chawm theih veleh neih ka tum a ni" ka ti a. Ka inhum ruh hle tih ka hria. Ka hah hle bawk.

"Puia hi chuan hna sang tak a thawk a, mipa puitling tak a ni bawk" anu chuan a lo ti hlur a.

"Mahse, ka hmangaih hleinem" Ruthi aw chu a fiah fai hle.

"Lalmuanawm, hei chen hi in inzui tawh a, zah pawh i zak lawm ni?  Heti ang naupang laka lo awm kual vel hi" a nu chu a vin ta khawp mai. Sawi tur reng ka hre ta lo. A nuta chuan ka dara rawn bengin a mitmeiin min kaitho a, kan inzui chhuak ta ngawt kha a nia. Ka vai ruai mai.

"Ruthi chu i hmangaih tak tak em ni? " a nuta chuan a ti a.

"Aw ka hmangaih" a mitmengah khan min lainatna ka hmu tlat mawle. Mi sual tak ni chuan ka hre lo.

Kar khat chuang Ruthi ka hmu ta lo. A chhan chu anu nen pune-ah an zin tlat alawm. Kei min then theih nana an hmanrua chu thing ka ti. Darkar tin kan inbe thei tho. Puia palai te chu an hnar phawt a. Mahse, beng thara an inngaihchan leh vat ka ring tho. Chet lak dan ka hre miah si lo lai hi a buaithlak ta em em a ni. Tunah chuan kan inngaizawng tih hria an awm ta fur a!  Ka chhungte beng hial pawh a thleng ta. Ka nu leh ka niin min zilhhau ve hlak. Mi duhlai leh mi ngaihzawng chhuhsak chan ka chan miau avangin. Ka pa erawh a ngawi tlat! Ka nu te pawh chuan min hau na em em hran lo tlat!

Ruthi te an lo haw a. Kan inhmu thei chuang lo. Anu hre hru khan a veng tlat. Puia erawh a la leng kal reng thung. Puia pawh hi a mawl reng reng ti ila nula duhawm chungchuang vangin indona mualah kan inhmachhawn ve a ni mai a. Chak zawk zawng kan la awm ngei dawn si a..

"Putarte, ka rilru ka siam fel tawh a. Puia hi ka nei mai ang e" chu thu zet chuan khum atangin min kaitho zawt mai. Ka mit ka nuai a. Dâwt a ni si lo.

Ka call nghal a. A pick up lo. Ka hrilhhai em em a ni.

"I duh tak tak a maw? " ka va ti a.

"Thutlukna harsa tak chu a nia. Mahse, ka tum ta a ni. Thla leh ni 17-ah kan innei ang"

A tawp ta vek mai. Kei chu khawvel danga leng leh leng lo va hnawh luih ang maiin ka chép ta a. Na ka va ti tehlul em.

"A chhan tal ka hre thei ang em? "

"Pitari hi pitar ka nih tak tak hunah chuan, nang chu tlangval i lo la ni chauh dawn a. Putartea i nih tak tak hunah chuan, kei chu ka thlan lung hnuaiah zalh ka ni tawh ang"

"Hei hi a chhan dik tak a ni lo. Thu dik tak sawi rawh. Kum vangin kan buai ngai loh kha"

"Ka buai ta aniang e. Putarte, min ngaidam ang che aw. Ka hmangaih lutuk che. Mahse, ka thutlukna hi i tan vek a ni tih i hriatthiam hunah chuan harsa taka ka lawn chhuah tlang sang tak avang hian min dem miah lo vang. Eng ang pawhin min ngen mah la; rawn kir leh ka tum tawh lo a ni"

"Pitarte"

"Ka hmangaih che. In be tawh lo vang aw. I tuar chhuak thei dawn tih ka hriat avangin lung muang takin ka kal dawn a ni"

Min block nghal. A va na ém.. Sawi tur ka ngah asin. Hrilh tur tam tak ka nei. Chah duh pawh ka la nei asin. Mipa intipa ve thei tak mitah hian a kuanga leng lo mittui a tling a,  luang mek a ni. Ruthi, Ruth, eng vang nge? Pitarte, engvang nge? Mawh.. Heti hi chuan ti lo hram rawh.

Kar hnih chhung vel chu mu leh mal ka nei lo. Class ka kal ngai lo va. Ka ei a, ka mu a. Chu chu ka khawvel a ni. Hetiang em ema tawrhna min hmachhawntir hi maw a duh le?  A chhan hi chu a awm ang mawle. Kum chu number mai mai alawm kan tih kha..

"Kei chu ni ila, amah hmuh tumin a chhan dik tak ka zawng chhuak ngei ang" ka khum bula ding chungin ka pain a sawi.

Ka harh kâwk. Ka tho a. Ka intifai a. Ka chhuak nghal. Mahse, an in ka va thlen chuan, Puia bula thua  a nui hmel ka va hmachhawn a. Min be lo va, min melh hek lo. Puia chuan a kut a vawnsak a. Ani chu a nui a!  Ni e, a nui. Ka kehchhe ta vek mai.

Mahse, dam ka hnaih phah ta thung. Ka intiharh a, class ka kal a, nunphung pangngai hmanga ka thinlung na chu diriam ka tum a. Hma ka sawn chakzia chu kei pawn ka hai lo. Class a rawn kal ngai lo va. A bang anih ka ring. Ka ngaihven  a tulna ka hre tawh lo. Ani pawn a theih chuan ka thei lo vang maw.. Ka theihnghilh ngai lo naa tawrhna nasa tak erawh ka pai ta reng bik lo.

An inneih dawn zanah chuan min unblock a. "Putarte, mut a va chhuak lo em" tih thu kha..

Ka reply lo.

Zing nichhuak chuan ka hmangaih awmchhun a kal liampui dawn tih ka hria. Kan hun tawp hi keimaha hman ka duh avangin, class ka kal lo va. Nilengin roomah ka tawm. Ka hmangaih chu ka sún a. A dam lai ngeiin ka tah chu anih hi. Ka dam ta vek emaw ka tih laiin mi dang tana a vul tan ni chu ka tan ni anchhia a lo la ni reng si a.

Zan a lo thleng a. Ka hmangaih, pangchang taka ka nu ang hiala ka nghen thin, naupangchhia taka ka tihtauh khuma ka tihnat thin, ka laka pangchanga ka theihtawpa ka lo duat thin kha Puia'n a khawi kual vel dawn chu a ni si a!  Na ka va ti tak. Ka tal ka tal a. Saruak veka an mu dun tur ka mitthla a. Ka puakkeh lo chauh. Ka hui pap pap mai. A va harsa em.. Miss..

An inneih atanga ni 3-naah ka nu nen kan bazar haw lam kan tawk ta a. A taksa cherzia leh a mitkhur tla dâk avang chuan a hlim miah lo tih ka hre thei. Ka rilru a nuam huai chuang lo. Ka thinlung nat turzia hre reng chunga thutlukna a lo siam avang khan huat ka duh a.. Mahse, ka haw miah lo. Ka hmangaih lutuk.. Ka la hmangaih takzet.

Ka nu mangangin Lungleia ka putea te bulah zin turin min nawr liam ta kha a nia. A nuam chuang lo. Pitari hlimthla chuan min umzui zel si a. Ka ngai lutuk chu ka mualpho lo chauh zel. Mahse, rilru kil khatah erawh tumna beithamtè chuan bu a lo khuar ve kék a. Hmeichhia zawkin min hnawl anih chuan, mipa chuan ka chelhzui tur a ni bik lo tih thu hmanga intihchak ka tum nitin thin. Putea te inah chuan ni 4 ka cham tawh a. Nuam ka ti tan dawn chiah tihin, khawvela ka thu hriat duh loh ber ka hre ta a.

"Ruthi a thi! " tih thu chu..

Thutlukna harsa ber a siam chhan kha ka damchhungin ka hre ngai dawn lo anih hi. A thutlukna siam chhan a sawi kha.. Dâwt a  ni tih ka thinlung hian a hre fiah si a. Thudik min hrilh hman lo va, thihna in min pawt then ta hi a chhan dik tak a lo ni zawk em ni ang le..?

Pitarte, ka ngai takzet che…