WHO ARE YOU

WHO ARE YOU?! (Completed)

Toni Râlte

"Nang hi ka nu ni lo vin, ka pa nupui i ni" ka ti chang fak a. A mitmeng ling hlir chu ka ngaipawimawh hran lo. Kei aiin kum 6 chauhin a upa a, ka nu nih a tum a maw? Zakthei lo lutuk. Ka nu a luahlan ahnu hmanah ka pa sum a duh vang chauh a ni tih ka chiang bawk. Ka pa fanu ka lo ni hi pawi ka ti. He mihring hi ka pa atan ka duh miah lo. Nikhua ka hriat tirh ata zu ngawlvei a ni tawh a. Tunah hian a in tlem ta deuh. In lo tawp zawng a ni lo. Tleirawl ka hriat thlengin ka nu kut a thlak a la bang lo va, nuta pakhat laktlak loh zet ka nei ve. Ani erawh mitthi khuaah a awm ta. Thla hmasa ni 8 khan mi kut tuarin râwng taka thah a ni. Ka pain ka nu kawngkasúla a mâk zan atang khan chhungkaw hremhmun nisa kha a zualkai ta a. Ka nu pawh an khua Serchhip lamah a haw ta kha a nia. A tlin rei khawp mai. A duhthlanna ni miah lo va in atanga hnawhchhuah a ni a. Ka pa hian ka nu hi a lo hmangaih miah lo anih ka ring. Hlim taka an innupa hi ka la hmuin ka la hre ngai miah lo. Ka nu erawh mi chhel tak anih vang chauhin kan tan a tuar a, a bei ve thin. Awmzia a awm ngang si lo va. Ka nu bulah chen ve ka tum chu ka pain a phal lo ve khanglang a!  Tin, ka nuin a remti lo bawk. A chhan chu an hausa lo va, rethei taka nunkhua ka hman a hlau a ni. Keipawn ka rilru ka thlak a, ka pa leh a nupui tibuai tur hrim hrima an bula chet ve chu ka duh ta a ni.

Ka pa nupui Ludy chu hmeichhe hmel tha tak, sam bu chhah zet nei a ni a. A hleitling a,  a ítawm bawk. Ka pa te office a an LDC a ni a,  ka pa hmei anih atanga kum 3 hnuah nupui dinhmun a luah thei ta a nih hi.. A tum bawk a. A tumruhna erawh ngaihsan chhan tlak a vâng ka ti tho. Ka nu erawh Ludy letling a ni a, nu te taktè, ze zawi deuh, tawng muang chet chawt a ni a. A hmel erawh ka mitah chuan tha ka ti. Ka putea te bulah a awm a, tum lian tak ka nei ve. Hna tha tak neih vat vata ka nu nena in luaha chawm ve theih hi..

Ludy chu kan chungah a sual ngam lem lo va, a la naupang bawk nen. Ka ú nen phei chuan an inkawm thei phian!  An inrual lek lek vang te pawh a niang. Ka ú hian zirna a chawlhsan tawh a, engmah ti peih tak tak si lo vin a tikual dúm a, dawr a nghak thul, khawdangah a sumdawng thul. Ka pa hian a enliam mai mai.  Kei erawh M. Com zirin MZU ah ka la kal ve a. Kumin hi ka zawh kum a ni a, ka theih ang tawkin ka tang ve a ni.

Ludy pekin tukinah awmpui lak a rawt  a. A hna bansana in a nghah tawh a hnu ber awmpui kan mamawh ka hre lo. Bakah hnial hi ka phur zawng tak a ni ve hrim hrim. Khatia ka hnial kha "I nu ka nih hi" a ti vei khanglang a. Chiang takin ka nu anih loh thu ka hrilh tak kha..

Police siren ri ruai ruai karah tap ri leh mangang aurawl a ri nuaih nuaih a. Boruak pawh a lum hulh hulh mai. Ka bula thu pa pakhat chuan min kawkin, "I hmai kha  a thi nasa hle mai. Nangmah hi i ni maw.. Tualthattu " tih pahin ka kut a rawn la, nghet zetin a hum a. Nasa theihtawpa tangin ka tal aih aih a. Ka harhchhuak leh ta. Huiham.. Mumang rapthlak tak hi chu aw. Mang chhia ka nei ta zeuh zeuh mai. Ka thlanin min bual huh vek a,  thawk ka han la káwk kâwk a. Tuisik vawt raih mai chu in in, ka awm chu ka han tinuam chawp a. Ka ú thih atang khan mang chhia hian min kaiharh ta zauh zauh. Râwng taka thah anih vang khan em ni ang?  A thattu lah an la zawng hmu thei si lo. Ka ú kha ka ngaina em em lo naa "Ú" tih tur ka nei ve kha ka lawm thin a, thisena ka zawmpui zinga min hnaih bertu a nih vangin a thih pawh khan ka tuar ve viau mai. Ka pa pawh a hmelah a tawrhzia ka hmu thei. Ka nu pawh a rawn chhuk a, ka lainat ngei mai. Keimah chiah min nei tawh.

"Sente, hei hi i order em ni? " ka pa a ni. Ka pa hi biak loh hram ka duh a. Pumpelh ka tum thin. Pizza rawn kengtu delivery boy chu ka va melh a, "In hriat sual anih hmel. Ka order lo" ka ti a. "Mahse, ka pi, i order ngei alawm" a ti ta tlat a!  Mai mai hian.. Ka khul ta ringawt a.

"Vawiin chu ka hman si lo va, pawisa va la chhuak ta che" ka pa chuan a ti a. Class kan kal dawn lo nen, ka aw ve mai a. Ludy kaltir ai chuan ka kal poh aniang chu.

Bank lun lutuk hi chu aw.. Ka ph ka hmet niap niap a. Ka lu a rawn hai deuh muai muai a, ph chu ka dah a. Ka han hawikual a. Ka hmelhriat erawh ka hmu lo.  Ka tho ta a.

Cashier bulah chuan va kalin, "ka pi, min va lam har tawh tak. Ka dahna rei tawh nen"ka va ti a. A tarmit phen atanga min rawn melh kur chung chuan, ka hming min zawt a. Ka hrilh a. "Kan lam daih tawh che kha.. " a ti a. Ka hre miah lo. A bengchheng ve bawk nen. Engtin tin emaw pawisa chu min pe chhuak ve ta hram a. Sana ka en chuan ka phu zawk thei mawle.. Dar 10 atanga thu tan khan dar 4ah ka la chhuak chiah!  Chutiang em ema ka thut rei pawh ka hre si lo. Ka lo muthlu nge mawni zawk ni.

Bank thlanga Restaurant pakhatah chuan ka lut thla a, min lo melh hrek hrek hlawm a. A nghaktu nu thau sa tha lam chuan, "Bawihi i lo kal leh maw.. Lo thu rawh. Eng nge i ei leh ang? " min lo ti! Ka la chawl awkawng si lo va!

Ka thu ve mai a. Coffee ka lam a. Ka duhtawk mai. Khawi lai hmun emaw atanga Min enthlaa min zuirutu awm tlata hriatna hi ka neihna a  rei tawh a. Tunah hian a zualkai chiah. Mak ka tiru hle. Coffee chu ka in a, dawr nghaktu chuan min biak a châk hmel hlein ka hria. Ka be peih lo. In man ka pe a, ka chhuak ta vut a. Mi pakhat nen kan insu chawrh lehnghal!  Ka pai nawk a. Ka tlu tur chu min lo kuah a. Ka uai ta hnáwp a. Mipa hmel tha tak ka hmachhawn zui ta nghal a.

A sam chu a dum hlap a, a buk lek lek bawk. A mitmeng chu a tak ran mai a, a fiah kelkawl viau bawk. A hmui chu a chhah lem lo naa a nem hmel hlein ka hria. Chutiang zwng zawng ka lo enkim dap chu ka inrâp lek lek!  Mi lepler lo ber ka ni hial awm e tihtheih turin bialpa ka la nei eih lo tlat!  ka ngaihven ngai lo miau a!  Star pawh ka nei ngai lo.

"Thiannu,  ka bán a va kham tawh" a ti thum chhak a. Awii leh!  Ka lo la inkuahtir reng chu niin. Zak deuhin ka inla hrang ta a.  A nui hak a. Kei ai chuan a upa hlekin ka ring.

"Ka tihpalh aw" ka ti a. Ka dang a awk dawnin ka hria. "Nia ka hria lawm. Kei pawh ka kalna ka lo en lo a" a ti tha ve mai a. Kan inkalsan ta kha a nia. Hawi let loh ka tum viau naa a danglam èm vangin ka va hawi let a. A lo hawilet ve chiah! Kan innuih tawp. Ka hmu leh ngai angem le…

In ka thlen chuan ka nuhrawn chu a lo ang hlak hlak a. Awmpui a ngen lehpek a ni ngei ang. La mai mai teh se a. Ka pawisa hawn chu ka pa ka pe a, fim zet hian min lo melh a, "I va lengkual nasa ve, rawn haw vat tur alawm. Mamawh tawh nak alaiin" a ti hluk a.

"I dawthei è mai a" ka ti chhum hmak. Ka len lohzia ka hrechiang ngang sia.

"Ka hmu che lawm mawle aw.  I Pa Thara nupui kanin i nu nen kan han kal a, Hospital peng bula damdawi dawrah tlangval pakhat nen in lo inkaih rial kha. Nilengin i va leng kual a, i nu a buai em em a. Zanriah ei turin mi kan sawm tih i hre ve reng sia"

Ka pa chu ka melh reng ringawt. Tun hnaiah thu mak deuh deuh an sawi reng zel a. Dâwt dáwt an sawi a, ka ning lutuk. Roomah ka lut daih. Darthlalang hmaah chuan ka ding reng a; ka hmai dan zia chu kei pawn mak ka ti. Ka cher tawh hle tih pawh ka lo inchík ngai lo va. Ka thau tawh lo. Tun hnaiah ka u boral sarhú lai nen ka Rilru hi a buai fô a, thil pawh ka ei tha vak lo. Eng em em tisi lo hian ka buai ve em em a. In ei thau ka ngai a ni.  Ka inbual sar sar a. Bathroom kawngka chu rawn inhawng thut turin ka ngai leh tlat pek a!  Ka hlau ru riau!  Mi dawihzep ka ni lo va, ramhuai leh thla tih vel hi ka hlau ngai lo. Mahse, tunah hian hlauhna mak takin min zem chiai mai. Ka fai leh fai loh pawh ka hre lo, ka inleih puat puat a. Ka chhuak ta daih a. Khuma ka thil hmuh avang chuan makti zetin ka ding ta reng a! 

Inthlakna tura ka thawmhnaw dahsa chu thawmhnaw dangin a lo inthllak daih!  Ka thawmhnaw ngainat lem lo, kawrfual par hi a lo awm a. He kawrfual hi ka pa min leisak a ni a. Ka pa lei anih loh vang pawh ni lem lo vin kawrfual hi ka ngaina lo ve hrim hrim. Mahse, ka inbel chhin ta vel a. Ka thawl riau naa ka inhmeh phian chu ka ti. In hnuaiah ka chhuk ta a.

Ludy'n min hmuh chuan a mengphawk hle. "Kawrfual te i lo ha ve duh a ni maw? " a ti a

"Ee.. Ka hak turin in lo dah chhuak sia.. Ka hak mai lohin" ka lo ti hmak. Min chhan hmain inleng an lo lut ta a. A va ngaihven ta zawk a.

Ka ning. Mi lian anga inngai inhmuamup, hur hmel zet zette bula chettlat hi. Nuho lah chu an tai hlar hlawm a; an sam an siam nasa ropui si. Zu no an dawm far a, tikhan zu that lohzia an thenawm khawvengah an va tlangaupui leh awm sia. Uakkk..

An rualin ka kil ve duh lo va. Ka eikham veleh roomah ka chho hmak. Ka mizia hi ka chenpui ten an hriat than tawh avangin min auzui lem lo. Vawiina ka tlangval hmuh kha ka hmu leh châk. Ka vei ve dawn mawni le..

"Sente, vawiin kha nuam in va tih hmel. Nangmah i ang lo tawp. Mipa i ngaihsak ngai si lo va" kan class a ka kawm ve ber, Nunui chuan a rawn text a.

"Awihawm loh e, bankah ka awm char char"

"Awii zep lo mai rawh. Ka hmu chiang che e, kan inbe tam hman lo mai pawha, khatia tih leh si"

"A va mak e aw. Keimah ang deuh i hmu aniang. Ka leng lo tak tak"

Min rawn reply tawh lo. mak ka ti e. Ka ngaihtuah zui peih lo.

Mumang chhe deuh ka nei lo hlauh mai. Mahse, ka tho â pek a!  Bathrooma ka shower laiin ka harh!  Thawmhnaw ha chungin ka lo inbual vel anih chu. Thawh ât hi ka tetlai atangin ka hrat hrim hrim a, mak tih aiin ka nuih a za zawk.

Zinga chokaa ka chhuk chu hmelhriat loh mi tharin min lo hmachhawn a. Nula la naupan hmel tak, hmel fel ren rawn ngo lam hi a ni a. A ngaihna hre vak lo va ka melh reng lai chuan, "kan awmpui thar anih kha. Remi a nia" Ludy a ni. Hmm.. Awmpui thar.

Door bell a rawn ri tlang tlang a. Ka va hawng a. Police pahnih an lo ding a.

"Pu Zosiama te in a ni em? " an ti a. Ka bu nghat a, in chhungah ka hruai lut nghal a.

Ka pa te nen an inbiak lai chuan pot ka tifai a. Ka hre pha vek a.

"Tukin zing dar 4:20 bawr vel khan Pu Remruata kha thia chhar a nia!  An in piaha culvert hnuaiah a ruang hmuh a ni. Kan rawn kal chhan chu a ruang bulah i passbook hmuh a ni a, tin, nizanah in inah chaw in eikhawm a, in inhnial buai deuh niawmin an sawi bawk a. Rawn zawtfiah tur chein kan lo kal a ni" Police sang zawk chuan a ti a.

Ka pa chu a ding hluai a, "Khai aw.. remruata a thi maw?! " tiin a tukhum a dawm vung vung a. Ludy erawh hlauhthawn hmel takin a hmai a hup a.

"Thudik chiah kan duh a ni. Remruata hmu tur hian i va kal em? "

"Pathian hming chhalin nizanah ka chhuak lo hrim hrim.. Engtin nge ka passbook chu a bulah a awm theih ka hre lo… E ni tak.. Seni.. " tiin min rawn melh a.

"Nimin khan pawisa ka lak chhuahtir che a, passbook kha min pek leh pawh ka hre lo"

"Dawhkanah pawisa ka pek rual chein ka lo dah kha" ka ti hlar a.

"Nia a dah a, keiman fridge ipteah ka dah tha leh"

"Ti nge safe-ah i dah loh a? "

"Ka buai ve bawk sia, nakinah ka dah tha mai ang ka ti" tih pahin a tho a. Fridge chu a han en a.

"A awm miah lo. Passbook chu" a ti chuai raih a.

"Eng pawhnise, chhui zui ngai thil ania, thana lamah min lo zui phawt mai ta che" Police te chuan an ti a. Hlauhthawn hmel lem lohin ka pa chuan a zui chhuak ta a.

'I pa chuan a that hauh lo vang.  Chutiang mi a ni lo" Ludy a ni.

"I lo awm ve hmaa ka pa mizia i hriat loh vang anih chu.. "Ka lo ti hmak. Ka pa hian tual lo that pawh nise, ka nu chunga a chet dan avang khan mak ka ti lo vang. Mahse, tualthattu fanu nih erawh ka duh hauh lo.

Class kal turin ka insiam mawlh mawlh a. Ka pa te erawh ka ngaihven ru ve reng. Make up hi ka uar tehchiam lo naa ka ngah ve phian. Ka lawm ve hrim hrim a, ka inhnawih thiam mang lo thung. Ka thiam ang tawkin ka inchei ve a.

"Khatiang khan i inchei ngai si lo va" Ludy chuan a lo ti a. Ka lang danglam viau aniang.

"Ka duh leh" ka ti liam puat a. Scooty chabi ka la a, ka chhuak nghal. Chaw ka ei lo tih ka hre lo.

Tanhril ka thleng tihin scooty a thi thut a. Ka han en vel thin,  dik lo awmin ka hre si lo. Veivak an awm vak tawh bawk si lo. Ka ning. Hmanhmawh nak alaiin.

"Kha.. A chhia elo? " a rawn ti a. Ka hriat ngai pawh ni lo. Tlangval lian thelh thawlh tak a nih hmel. Ka lo bu nghat a.

"Tirawh,  lo lut rawh. Vawiin chu class kal phawt ila, chawhnu lamah leng ila" ka ding ngil zawt!

"Min hria mi?" Ka ti hú a. Keimah aia mak tih hmel zawk hian min en a. "Min hre na nge" a ti thung a!

"Hre lo. Chuan i zak thei lo hle bawk" ka ti chhum hmak a.

"Min hre lo tak tak amaw? Nge nangmah i ni lo zawk..? " a ti leh hú a.

"I thing tlat.. Kal teh. " ka ti a. An ka ngah aniang, min haitu ka tawng zauh zauh tlat. Lungawi loh hmel fe hian a kal ta a. Kei eraeh ka la thu kur. Kha mihring bula chuan ai chuan, hetia awm hi ka duh zawk. Ka ph riin ka ngaihtuahna a la peng a.

"Hello,"

"Sen, i pa lung tha lo a chhuak a, civil hospitalah kan awm. Lo haw mai teh" Ludy aw-a thlaphanna chu ka feel thei. Tlem chuan min nghawng ve. Ka scooty chhiat thu leh motor ka lo chan tur thu ka hrilh a. A dah ta a.  Lung lam tha lo tan chuan, tukina kan thil tawn kha natpui tham a ni ve bawk a ni. 

Ka luhai vang chuan ka tlu thelh a. A hai ve ziah. Ka bp checktir a ngai a ni.
Ka harh chuan, kha mihring min zuam em emtu awm nghengin ka lo mu!  Ani thei lo.  Kei hi..

"Eng tia heta awm nge ka nih? "

"Min lo call khaaa.. "

"Maw.. " ka meng phawk ngang mai. Eng laipawha zui rutu nei anga ka inhriatna kha a dik ta mai em niang. Tih loh lohte hi a ti lo maw hepa hian.. Mahse,  na leh hliam ka nei lo.  A ti bik lo aniang.

"Ka pa hmuh ka ngai" ka ti a. Chhuanlam tha tak a ni.

"Ka hruai ang che"

Ka pa chu a lo chau hle mai a. Police ka hmu tel leh bawk si chu ka thinrim ve deuh. Dam loh lai laia. Ludy chu a mangan ve tak tak hmel.

"Seni, i pa hian tumah a that lo vang tiraw? "

"Ka hre lo le" ka rilru sehhel tang tang chu aw.. Ka va duh bik lo tak.

"Remruata ruang bula kan passbook lo awm ngawt dan kha ka hrethiam thlawt lo a ni. I ú thih lahin a ruang bulah i pa sana a awm tawh bawk. Thil awm dan hi ka hrethiam lo" a mittui a tla a.  Ka khawngaih ve deuh.

"Ka ú thattu kha chu anih ka ring lo" ka ti tawi tak a.  Ka ring lo ve tak tak. Pu Remruata erawh ka buai. Ka pa anih rinhlelhna ka nei lian tho. Chutihlaiin ka awmdan mak tak avangin zawhna chhansen loh ka kawl tún bawk si. Ina hawa intifai tur leh zan lama tlawh leh turin ka chhuahsan ta a.

Kan awmpui chuan eirawng a lo bawl a, kan inbe lem lo. Roomah ka lut nghal a. Ph call ka dawng bawk. "Class i rawn kal ta si lo va. I scooty lah kawngsirah i hnutchhiah tawp bawk si.. Eng nge awmzia? " nunui chuan a rawn ti lang lang a. Ka chhang mumal lo. Ka contact list chu ka en a, call log ka check leh a. Ludy min lo callna bak hmuh tur a awm lo. Nunui nen. Kha mi makpa ka callna ka hmu hauh lo mai.

Dâwt sawi chu an awm ngei a ni. Ka luhai denchhenin hmanruaah a hmang a, min awmpui tih hriat reng. Tenawm lutuk.

Inbual turin bathroomah ka lut a. Darthlalanga ka hmel lo lang ka hmuh chuan ka rak thawt!  Hmel ngeiawm tak, keimah ni bawk si ka hmu tlat. Ka dáng em em a, ka mitkhur te chu a tla kuamin ka hria. Engtin nge hetiang taka ka tlakhniam theih.. Keimahah hian dik lo a awm em ni ang? 

Ka inbual sawk sawk a. Bathroomah hian hlauh ka nei ziah lehnghal. Ka inthlak fel a. In hnuaiah ka chhuk ve ta a.

Zanah chuan kan thenawm tlangval Zuala nen damdawiinah kan chho leh a. Kantu neuh neuh kan nei ve nual. Ka pa pawh a lo harh ta deuh a. Tlemin hma kan sâwn e. Ludy chuan a riahpui dawn vangin zan a rei tak tak hmain kan haw leh a. Kan awmpuinu chuan tv a lo en a. Min nel lo tih ka hria a, biak chakna ka nei bik lo bawk.

Mu turin ka intintuah a. Ka lu a rawn hai leh thut. A va mak tak. Khumah ka thu vang vang a, hlauhna mak tak hian min tuam chiai a. Ka mur vek. Awm ve an awm niin ka hria. Ka hawi kual a. Engmah a danglam chuang lo. Tumah ka hmu lo. Parda chu ka va zar tha a. Pawnlamah chuan ruah a sur mek tih ka zuk hmu a. A sur a hun ve tawh reng reng bawk.

Phone bih chungin ka muthlu duar duar a.

"I number nei tura ka beih nasatzia hi aw" tih thu rawn thawnntu ka hmuh chuan,  ka harh kawk. Kha pa, hmel tha tia ka enzui vawng vawng kha a ni. Chhan mai dan tur erawh ka hre miah lo.

"Tu nge? " ka ti ta ngawt a.

"Vansangpuia ka nia, Sawmpui tiin min ko thin. Nang chu Senteii tiraw"

"Umm.. Engtin nge ka number i neih? "

"Ka zawt nasa a. Nakinah ka la hrilh ang che"

Ka reply na tur ka type mek laiin mutchhuak nasa lutukin min vel chiai chiai a. Ka nghilh dup mai.

"U sente, u sente" ka room kawngka kik ri chuan min tiharh zawk a. Khai a! Khumah ka mu awzawng lo mai. Chhuat daiah bra leh underpant nen chauh ka lo mu niin.. Ka tho rang ngei mai. Ka inthlak hnuah kawngka chu ka va hawng a, "Ka piin min lo bia a. Chaw kensak tur chein a ti che a"..

Damdawiin lama ka chhoh pah chuan ka scooty siam dan tur ka ngaihtuah chhuak a. A chhiatna lai kha a laklawh vel reuh lutuk a.. Buaithlak.

Damdawiin ka thlen chuan miho chu an zi deuh nuai nuaiin ka hria. Mi tam ve deuh lo awmkhawm taih ka kalpelh lai chuan, "A kal mai ka ring. A hliam kha a thúk e mai" an tih ri chu ka hre pha a. Tu tak ni ang maw..

Ludy chuan min lo dawngsawng vat a, an mut theih thu te a sawi luam a. Sawi tur ka hre ve lem lo. Scooty chungchang ka sawi lai mek chuan, police an lo lut a!  Teivet a.

"Tun tum chu in nula hi thu zawh fiah a ngai tlat" an ti nghal bawrh bawrh a. Ka lo bangbo hle..

"Nizanah khaw nge i awm? "

"Damdawiin atanga ka haw hnu chuan ka mu nghal"

"I chhuak miah lo maw? "

"Chhuak miah lo"

"Tukin dar 6 velah khan tlangval pakhat hliam tuar nasa tak chhar a nia, a lo tlukna hmunah chuan i scooty hmuh a ni" an ti ta a.

Ka scooty chhiat thu leh thil awm dan ka sawi nghal a. Hlauhthawnna ka nei lo bawk.

"Mahse, chu tlangval in a biak hnuhnun ber chu nangmah i ni" chu thu chu tek den ang maia min deng na tu a ni.

"Tu nge chu chu? "

"A hming chu Dampuia a nia. I hmelhriat a nih thu chu i thiante pawn an sawi"

Dampuia tih hmelhriat ka neih awm reng reng ka hre ta lo.

"Amah chu ka hmu thei angem?  Ka hre miah lo" ka ti chu an awih loh hmel ngang mai. Mahse,  min hruai chhuak ta tho a. Chu tlangval dam lo serious tak ka hmuh chuan ka nghing lawih thei  mawle.. Engtin nge anih theih?

Kha mihring, min zuam em emtu, ka luhai remchanga hmanga a motora min phurtu kha a lo nia!  Mak ka ti nasa.. Engtin nge a nih theih?  Police ho hmaah chuan sawi teuh a ngai ang. Ka awmdan mak tak te pawh. An awih kher angem le.. Zuitu ka nei reng tihte hi min rinhlelh nan an hmang zawk angem?  Eng pawhnise, ka phone ka check a. Call log chu a la ngai reng tho si. Dampuia phone call log min hmuhtir chuan ka number ngei a lo call bawk si. Ka buai ta vek mai. Ka number a nei tih pawh ka hre lo a, a number ka nei hek lo. Eng nge ka chunga thleng ta hi le..

Thana lamah min hruai chho ta poh a. Zawh tlak ka awm mang bawk si lo. Ka chhuah lohzia min sawisak turin kan awmpuinu chiah a awm. Ani nen lah kan room a inhlat nasa mai si. Ka chhuak miau lo naa, zinga chhuata ka lo mu daih leh ka thawmhnaw huh hnuang bathrooma lo awm erawh kha chuan ka ngaih a titha mang hlek lo. Police te chuan tih vak ngaihna min hre bik lo. Ka tang na ve bawk sia. Min hawtir ta phawt a. Khawiah mah zina kal bo lo tur erawh chuan order min pe thung.

Ludy misscall ka hmuh nual avangin ma call back a. Chanchin a rawn ngaihven ve a lo ni. Dam thlapin ka hrilhfiah ve kha.. Keimah ka ang lo tawp.

Mahnia inngaihtuah veng veng hi ka duh ngai lo va; ka theih chin chinah hun awl neih ka duh lo bawk. A chhan chu ka nu leh paah ka tawp zel a, tawrhna ka hmachhawn leh thin.  Zanin erawh nasa taka inngaihtuah a ngai niin ka hria a ni. Ka awm dan danglam tak, mi ten min hmuh dan te, rinhlelh ka nih dan leh thil thleng zawng zawngte chu..

Mahse, ngaihtuah tur ber erawh ka hre miah chuang lo. Message ka dawng a. Sawmpuia a lo ni!  Ka harh hawkin ka hria. Lo len a tum thu a rawn sawi lehnghal. Inleng ka la nei ngai reng reng lo tih a hre lo aniang. Lo hnar èm chu dikin ka hre lo va. Ka lo nghak ve tawp. Remi erawh a roomah a awm a. Kan la inbe mang lo reng reng.

Sawmpuia nen chuan kan titi thei fú. Tlangval pangngai tak a ni a, sawi tur pawh a hre riau. Ka lo aw e ve mai mai. Ka a dam lo te chu pawi a tih thu  a sawi ve luam a. Rei tak erawh a leng lo. Inngaihzawnna chungchang kan sawi lem lo naa kan inhaw bik lo tih ka hrethiam ve tlat. In a thlen veleh min lo call nghal a. Eng nge kan sawi leh teuh pawh ka hre mang lo. Ka mut a chhuak lutuk a tin ni..

Ni sain ka hmai a rawn chhun na chu lum ham ham a. Ka kutin ka inhliah a. Ka meng diar diar a. Ka thu hlawl!  Ka room balconya thutthleng sei kan hunah ka lo mu chu niin. Zan lama ka thawmhnaw hak erawh ka la ha. Ti nge? Engvang nge?  Ka thluak a buai. Ka tho â satliah anih rinna ka nei tlem ta khawp mai.

Ka phone chu ka hmet eng a, dar 9:32 AM a lo nia. Ka ril a tam angreng. In hnuaiah ka chhuk a, Remi ka hmu lo. Eitur ka dap chung a, ka eita mial mial a. Ludy hi ka chhawk ve a tha in ka hria a. Call tuma ka phone ka han hmet eng leh chu message ka dawn avangin ka open phawt..

"Nizan kha chu ka rin phak bak a ni. A nuam ka ti, ka hlim takzet" he thu hi kan veng tlangval sual ve tak, Robina hnen atangin ka dawng!  Ka ph ka thlauh thelh a ni. Eng nge ka tih tak ang?  Ka khur der der, rang takin bathroomah lut a. Ka inhlip sawk sawk a, kareiii!  Ka kap natzia ka hrethiam chiah. Ka pantya thisen val kulh te chu râp zetin ka melh tlawk tlawk a. Ka duh lo, ni lo a theih loh. A ni thei lo.

Hmeichhe sehhel tak biangah mittui a luang ve ta. A va na em.. Eng nge ka tih hi..

Ka ph riin min kai peng a, Ludy a ni. Ka lak rual chuan a rawn tap! 

"Sente, i pa a awm ta lo.. "Zawngsen… ka au tuarh a, ka thu hnawk. A tawk. a nasa tawh mah mah a ni. Ka pa a thi. Chu chu lawm taka dawngsawng tur ka ni lovem ni?  Ti nge ka hlim si loh?  Ti nge ka nat?  Engmah ka hrethiam tawh lo.

Thil chu a thleng zut zut a. A ngaihna hre lo leh bang bo zetin ka awm ve tawp. Ka pa ruang chu an tah a, mittui tam tak a luang. Ka tap ve lo, mahse, ka chhungril nun hian puahkeh a va chak si em.. Mumang ang ruaiin engkim chu a thleng. Ka chiang lo ruai vek.

Ka pa thih atanga ni 3 chhung chu ka roomah ka tawm niin ka hria. Engmah ka ei thei lo bawk. Ka pa ka hloh a, ka thianghlimna ka hloh bawk. Engkim ka chân a ni ber. Ludy chuan engtin nge a dawnsawn ve tih pawh ka hre lo. Ka nu lo kal leh kal loh pawh ka hre lo. Ka mu chawrh chawrh a ni mai e.

Mahse, ka pa thih atanga ni 5-naah kan kawmthlanga Theihai kungah Robina a inawkhlum!  Chu thu thar erawh chu ka hriat tawh hnu  niawmin ka hria!  Ka sawi thiam chiah lo.

Police an lo lang leh a!  Ka hne. Robina thih hma zanah WBR-a kan inhauh chiam thu an rawn sawi!  In atanga ka chhuah loh thu sawitu Ludy leh Remi te chuan min chhan zo ta lo. A vawi khat nan Lock up rimchhe zetah mutmu ka tuah ve ta. Thilmak deuh erawh ka hmu. Sawmpuia kha police officer a lo nia! 

"A hrehawm em? I muhil thei ang tiraw? " a rawn ti a. Ka lu ka lo bu nghut.

"Pawi ka ti khawp mai. Nangmah chhuizui tura thlan ka ni a. I ú thih atang khan ka enthla tawh che"

"Min zui rengtu an awmin ka hre reng a ni"

"Ka haw miah lo che. Ka khawngaih zawk che. Dam lohna nasa tak i nei a ni"

"Ka tha alawm"

"Ni lo, nangmahah khan awm ve a awm a, a che ve reng a, i hriat loh hlanin thil tam tak a ti thin"

"Multiple Personality Disorder sawi i tum chu a ni em lo maw? "

"I lo hre tawh ni maw?"

Ka nui vak a. Alter ka nei ang tih ka rin tanna bul chu ka pa thih zan khan a ni. Ka chunga thil a thlen zan ni bawk siah khan. A chhan chu Robina khan damdawiin atanga ka haw min thlah thu a sawi tlat a!  Ka pa kha ka thah anih ka ring. Tin,  an vai khan. Mahse, ka tih a ni lo miau a. Ka zám eih lo.

Chumi zan chu tui zetin ka muhil teh khiah a!  A dangdai angreng.

A tukah chuan min hruai chhuak a. Hospital min panpui ta a. Hypnosis hmanga min dâwi muta keimaha awm ve chu biak an tum thu an sawi a. Pawi ka ti lo. Video in an cover dawn a, keimah ngei pawh hian hmuh ve ka duh a ni.

"Sente, i mut hmain zawhna ka zawt lawk ang che aw. Inrinhlelhna i nei tawh thin em? " Psychiatrist chuan a ti a. A tarmit fim tak phèna a mitmeng dam dap chuan min tithlamuang riau. Ka chil ka lem khawlh a. Ka mit ka chhing vang vang a.

"Ka û thih zan khan ka mu hma a. A chhuah leh chhuah loh ka hre lo. A hma niah kan inhau chiam a. Ka nuhrawn thlaváng a hauh vangin. Biak tawh miah loh ka tum a ni. Chuan, a thih tuk,  a ruang an hmuh ni khan ka room bathroomah chemtè thisen kai ka hmu a. Khatih lai khan ka chiái èm vangin eng vanga lo awm nge tih ka ngaihtuah miah lo. Thil hrim hrim hi ka ngaihtuah chiam ngai lo a, thawveng leh hahdam thei ang bera awm ka duh thin. Chuan, Pu Remruata thih tukah khan Bathrooma ka inbual laiin ka harh!  Ka tho â emaw ka inti. Ka pa thih tukah khan balconyah ka lo mu bawk. Robina thih zan erawh kha chuan, ka room kawngka bulah thlan tla hluamin ka harh chhuak" ka ti mial mial a. Sawmpuia chuan min lainat hmel takin ka kut a rawn hum a. Huatna ka nei lo. A mi vawnna chuan ka thla a timuang kher mai. Keimah leh keimah hi ka inhlau tawh tlat a!

Darkar 5 dawn ka mutthilh hnua ka harh chuan ka nu hmel ka hmu hmasa ber. A lo nui var var a. Ka chalsam chu a chul mam thuak thuak bawk a. Ka riltam tih a hriatin eitur min chhawpsak a. Ka ei mial mial.

Doctor leh sawmpuia an lo lut a. "Sente, video chu en ve kher i duh a maw? " an ti a. Ka lo bu nghat a. Ka hmaah laptop an rawn chhawp a. Pendrive an vit lut a. Ka hmaah chuan keimaha awm ve mi dang chetla chu ka hmachhawn ta.

Tihian an inbiak dan chu sawi mai ang.

Dr : Senteii ni lo vin nangmah kha biak che ka duh a ni. Lo chhuak teh. Tu nge i nih a, engvanga senteii nuna hmun khuar ve nge i nih han sawi teh..

Ka muhil chung chuan ka hmel chu a rawn inthlak tial tial a. Ka mitkhur thuk lek lek tawhte chu a rawn mam tial tial a, ka hmai dang bai te chu a rawn sen tial tial bawk a. Camera trick anih miah si loh vang te chuan awih loh theih a ni hauh si lo.

Keimah: Ka be duh dawn che mawni le.. (A aw pawh ka aw ai chuan a lian lek lek)

Dr: Tu nge i nih min han hrilh phawt teh. Kawm che hi ka chak viau asin.

Keimah : Hming mawi tak, ka pi duhtak phuah ngat Saroni ngat mawle.. Tu nge i nih ve?

Dr : Hriatpuia ka nia, i aw a zangkhai hle mai. Min kawm duh ang tiraw?

Saron: Senteii ang lo takin kei chuan rual kawm ka thiam alawm.. A nui hak hak a.

Dr : Khawia piang leh seilian nge i nih a?  Kum engzat nge i nih tawh le?  I la upa vak lo tih a lang.

Saron: Champhai District khaw pakhata piang ka nia, Senteii ai hian kum khatin ka upa. Ka huaisen zawk bawk. (A nui leh a)

Dr: Engvangin nge Senteii ber kher?

Saron: Hmm.. Chutiang inzawh te chu a!  A khua a har thei em alawm. Kan inang chiah a, ka puih duh vang ania.

Dr: I puiin i inhria em?

Saron: Tehreng mai. A dawihzep lutuk erawh ka ngei thin. A kawng daltu chu ka thenfaisak zel asin.

Dr: A ú kha a hmasaber a ni em?

Saron: Umm.. A ú kha chu Ka huat vang ania. Senteii hi a ngainep mah mah a; bakah a ú kha ka hmangaih a, mahse, ngaihzawng a nei anih kha.

Dr :  A va ngaihnawm ve. Han sawi chiang teh.. (Nelawm deuhin a ti a)

Saron: Nia, a nu leh pate inthen atanga kar thumnaah chiah senteii bulah hian ka cheng ve a. A ú kha ka hmuh tirh phat atangin ka hmangaih nghal asin. Tianga mipa duh hi ka la nei ngai lo hrim hrim. mahse, bialnu a nei a. Tin, senteii kha a ngaipawimawh lo mah mah bawk. Senteii kha a tap fô thin. Ka unaunu ang a nia, a ú kha ka haw ve bawk sia.. Khami zan khan zan laiah a roomah ka va kal a, a bulah ka va mu ve a. Ani chuan hmusit takin min tawngkhum a; kut te hial min thlak a. Ka thinrim lutukin ama chemte lei ngei, motora a pai ve ziah chu lain, ka vit ta mai anih kha. Inhnuai bera a mut avangin thawm engmah an hre lo. Chuan,  a ruang kha Senteii chakna nen ka hnuk chhuak a. An hmuhna hmunah khan ka va paih anih kha.. A pa sana kha chu ka ruk a nia!  Senteii nen hian apa laka phuba lak hi ksn tum tlat alawm.. I hrethiam em? Senteii kha chuan pawi a ti lutuk a,  a tap reng a. Ka hau hrep nghe nghe.

(Ka ngaihtuah chhuak thei miah lo. Chutiang hun chu) 

Dr : chemte kha bathroomah i hnutchhiah ta mai em ni?

Saron: Senteii kha a chau tawh lutuk a, a meng thei thlawt lo a ni ber. Ka khawngaih ve deuh bawk nen. A tuka paih bo atan ka dah ta mai anih kha. A roomah hian tumah an rawn lut ngai lo bawk a.

Dr: Anih Pu Remruata kha..

Saron: Zawhna i va ngah tak. Mahse, ka hrilh vek ang che. Kha mihring râwp uchuak lutuk khan Senteii a ît tlat anih kha.. A rooma a mut tawh hnuah rawn lutin a rawn zut kual vel a, Senteii lahin engmah a hre si lo a. Ka haw lutuk.  Senteii chuan vei deuh a nei baek sia. Kha police kha hmeltha deuh kha maw.. Chuan, Ludy'n passbook a dah that kha ka keng chhuak a. Senteii pa an rinhlelh theih nan bawk. Pu Remruata chu ka call a, ka ko chhuak ta a. A tirah chuan mak a ti deuh a. Mahse, zu rui ang deuhin ka awm khum a. Min zuam ta hle anih kha.. sex hmanpui min tum a. Ka hnar hram. Senteii a la virgin sia!  Ka taksa a zut kual vel lai takin ka vit ta hrawih a nih kha. Ka la duhtawk lo chéu!  A hrawkah ka zai leh bawk..

Dr: Dawt i sawi tlat!  Senteii chuan Pu Remruata a hre vak lo. A lakah engtinmah a awm lo. Thudik sawi ve mai la..

Saron: I va fing tak.. Haha.. Nia, Ih maw, Pu Remruata kha ka pa nau a nia!  Ka tleirawl chhuahtirha an bula ka awm laiin min pawngsual tawh a ni.

Dr :Awih chin tur hriat a ngai hle mai. Anih leh Dampuia ve thung hi.

Saron: (A ngik faih faih a)  a la dam tiraw?  (Khawngaihthlala deuhin a tawng a)

Dr: Dam chu a la dam a, nikhua a la hre mumal lo. Tu nge khawiha tu in nge thah tum pawh a la sawi thei lo.

Saron: Mi khawngaihthlak Dampuia!  Ani kha ka ngai hle mai.. Min duat asin. Senteii a duh zawk tlat si a!  Ka hua a ni. Ka duhzia a hrethiam lo aniang. Senteii, banka a kal ni khan kha tlangval nen khan kan thudun a. Kan titi nasa khawp mai. Chhuahpuiah min sawm a. Pawisa la tur an tam thoa tiin ka chhuahpui a. Kan leng kual nasa alawm.. A caring a, a fel takzet. Mahse..

Dr : Eng nge mahse?

Saron: Kei ni lovin Senteii alawm a duh.. Mawl lutuk. Senteii chuan a thinlunga a vei em em a nei a. Kei hi ti nge tuman min ngaihtuah ve loh? Ka hmel tha asin. Ti nge an hriat theih loh?

Dr: Chuvang chuan maw thah i tum?

Saron: Ni mai e. Khamini Senteii scooty chhiat ni pawh khan a bula awm kha ka la thlahlel ngawih ngawih a. Mahse,  Senteii a ngaipawimawh zawk anih kha. Ka thinrim a, ka rilru a na bawk. Zanah khan ka call a, kan inhau hrep bawk. Chuan ka che ta vak mai a ni. Khawih kha ka duh bik lo.

Dr: I call hian i delete leh ngjal zel em ni?

Saron: Yes.. (A nui har har a)

Dr : Senteii pa leh Robina chiah kan hmabak ta.

Saron: Ka mut a chhuak tawh viau naa ka hrilh leh hram ang che. Senteii pa kha chu ka that lo. Engtinmah ka ti lo. Ka han hmu ringawt. A lo tha tawh viau lehnghal. Engtia thi ta mai nge ka hre bik hauh lo. Robina kha chu a ninawmin a kamtam mah mah a, senteii rilru a tihrehawmin a timangang bawk si. Ka dah tha ta mai anih kha. Ka dah that dan chu in hre tawh tho.. Ka sawi peih tawh lo. Senteii hi a ril a tam tawh lutuk. Kei pawh ka muhil lawk dawn. (A hám bai bai a)

Chuti zawng chu. Ka thil en chu. Ka kut ka lo humruh nasa deuh nge ka hah vek. Mak ka tih deuh chu Sarona chu ka haw miah lo. Ka ngaina angreng zawk. Awm ta lose ka damzo tawh kher angem?  Thil ka ngaihtuah vak vak loh chhante ka ngaihtuah a. Saroni vang zel niin ka hria.

Pu Hriatpuia chuan lainat hmel deuhin min en a, "Mizo mi nawlpui tam zawk hian an hrethiam daen lo va. Dan anga hrem che hi an phút ngei dawn a ni" a ti dam dap a.

"Ka tuar ngei tur alawm" ka tih chu rang deuhin,  "Nangmah i ni hleinem" Sawmpuia chuan a lo ti vat a. Min thlamuan chuang lem lo. Ka nu nen chuan min kalsan ta rih a. Ka nu ka ngaihzia leh hlutzia ka hre thar. Ka pa a thi tawh bawk si. Ka neihchhun a ni ta.

"Mate, i pa kha thah a ni kher dawn em ni? " a ti sap a. Ka pa a hriatrengzia a puangzar lek si a.

"Ka hre lo le.. An sawi dan chuan damdawi chak tak a lungah kah luh ani an tia. Kha kha a thihpui niin an sawi"

"Tu nge lo that duh ang aw. "

"Ludy pawh a ni thei"

"Anih ka ring vak lo asin. I pa kha a hmangaih ve em a. Bakah thah nachhan tur a nei hleinem" Ni ve tho, Ludy kha haw viau mah ila, ka pa a hmangaih chuan ka hria. A thihna in a den natzia leh a tawrh natzia ka chiang tlat.

Mahse, tumah mi dangin an riahpui ve si lo va..

Ka thiltihte a hraw èm vangin mi hlauhawma chhiar ka ni a. Pawi tih nachang pawh ka hre chuang lo. Ka tih ni lo mah se, ka tih a ni miau a!  Nia, ka thunun thei tlat si lo va. Saroni chuan min uap reng niin ka hria, ka kawm chak viau naa sawi tur em em ka hriat ka ring chuang lo. Tualthattu ka nih miau avang leh ka natna chu rin harsa an tam èm vangin jail run thimah ka luh a ngai ta a ni. Ka nu bak laina ka nei lo bawk a. Jail tang lo mah ila, hlimna tur leh damchhan tur neiin ka inhre meuh tawh lo. Saroni chu a kal bo nge min la chenchilh tih ka hre lo bawk. A reh vung vung mai si a. Jaila ka luhthlak tirh kha chuan zantin ka mutna bulah vengtu an awm thin. Ka chet dan an hriat chak vang nge ka chet leh an hlauh vang ka hre lo. Mahse, saroni chu a bo hmak!  A reh tawp. Ka haw angreng, min phatsan a ni. Jailah min hnuklut a, a rawn tel ve duh tawh si lo.

Ludy'in min rawn kan zeuh zeuh!  He nu hi mak ka ti angreng. Min ngaihsak ve reng duh chu. Ka pa a thi tawh si. Min lainat hmel taka min melh vawng vawngte chu a der niin ka hre thei hauh lo.

Jail ka tan atanga thla nga zet a liam hnuah thu thar duhawm lo zetin min rawn nang leh ta a.

"Ludy a thi"

Nuhrawn mahnise, thih a phú em em bik lo asin le.. sawmpuia khan min rawn kan a, hreh zetin a sawi. Amah ngeiin Ludy ruang chu a va endik a, ama roomah ngei a bán veilam vein zaichatin a lo thi a ni. Jail ka tan hnu khan Ludy chuan a nau tlangval a awmpui a. Hetah pawh hian min râwn ve thlap. Kan awmpui nula kha a la awmpui reng bawk a. A nutapa chuan nupui a ru ve a, palai te an tirh kual vel lai takin a thi ta a ni. A vuinaah pawh ka kal thei ta bawk si lo va. Ka chungs thil thleng rapthlak tak tak chu ngaihtuah loh hram ka tum paw'n ka thei ta bik lo. A rapthlak èm a ni. Kum 25 èm pawh ka la pel lo asin. Thih ve daih te ka châk tan ta a. Mahse, jail chhungah chuan thihna tur ka hmu lo.

Sawmpuia ka tan a tha em em a, kar khatah vawi khat tal min rawn tlawh thin. Mitmeng hian tumah a bum thei lo bawk a, min duh ni hian ka hre fö!  Heti mai hi ka ni tawh a. Duh chhan tlak ka awm ngang si lo. Mahse, zantin ka suangtuah ve fo chu amah chauh a ni. Thil thleng ngai lo tur ngaihtuahin mahni ka ka intihlim chawp a. Thihna tam takin min hmachhawn mah se, ka mittui a tla ngai lo. He pa vang hi chuan vawi tam fè ka tap ve tawh a ni. Ka ta a ni ve ngai lo tur chu nâ ka ti a, ka lo piang ve kher kher chu pawi tihnain ka khat leh thin.

Ludy thihna chuan min nghawng teh naa tihtheih ka nei si lo. A thih zan khan a nutapa leh awmpui nula te nen an awm a. Engmah an hriat loh thu an sawi. A nau phei chuan a tuar viau aniawm e. Tu tih nge ni ta ang le..

Ludy thih atanga kar linaah chiah ka nu a rawn kal a!  Min rawn tlawh lohna a rei ta viau!  Lehkha eng emaw a rawn keng a. Ka signature a mamawh thu a sawi bawk. Mak ka ti deuh a.

"Englo ania. In khi i hmingin a awm a. I luah thei chuang si lo va, ka hmingin dah mai ila ka ti deuh a. I in a ni dawn tho a, ka hminga a awm loh chuan ka luah thei si lo a" a ti a. Mak ka ti hran lo. Awlsamtèin ka lo sign a. Min rawn tlawh fô tur thu sawiin min kalsan leh ta a.

A tukah Sawmpuia a rawn kal a, a meng sen ram mai. Mutmu a tuah tha lo a ni maithei ni.

"Sente, mak i tiin a thawng viau ang che tih ka ring. I pa leh Ludy thattu kan hre tawh a"

"Tu nge? "

"I nu! "

Ka zuang lo chauh. Ka luhai muai muai avang chuan ka tlu thelh a!  Dâwt a sawi anih ringin ka melh kal a. A ngawi reng si.

"A ni thei lo. Ka nu chu chutiang mi a ni lo"

"Thil dang pawh a la awm asin"min lainat hmel lutuk hian a ti leh a. Ka hre ngam angem?  Thih daih mai hi ka va chak em.. Saronin min kalsan tawh bawk si.

"Ih.. I nu hian fa dang a nei a. In awmpuinu kha a nia"

Ka thaw  a chham mai dawnin ka hria. Thil ka ngaihtuah thiam tan. Kha kan awmpuinu leh ka nu chuan remruatna fing tak hmangin ka chhungkua min lakbosak a ni. Ka natna remchanga hmangin kei min mawhpuh vek theih nan.. Ni lo,  ka nu kha nu tha tak a ni asin.

"Kan chhui nasa a, rinhlelh tur awm zawng zawng kan dap kim tawhin kan hria a. Mahse, in awmpuinu leh i nu inhmu lai kan hmuh fuh atang khan kan hnuchhui dan kan thlak ta a ni. Ludy kha engkim kan hrilh vek bawk a, a hlauhthawn vangin a nau kha awmpuiah a sawm ta reng kha ania. I pa thih zan khan in awmpuinu khan chaw a han pe anih kha. Ludy sawi leh danin chaw a eikham atanga darkar khat hnuah a mut a chhuak ta lutuk a, i pa pawh a ngaihtuah hleihtheih loh thu a sawi anih kha.. A mut hlan khan i nu chu lutin damdawi chak tak kha i pa thisenah a thun lut ta a ni. I nu chu a inpuang vek tawh. Ludy pawh in awmpuinu puihna hmanga a thah thu te, a harsat lem loh thu te a sawi. Mak deuh erawh in awmpuinu kha a fa anih theih dan a sawi erawh nang pawhin mak i ti ve thoin ka ring.

I pa khan chhan nei lo vin i nu kha a haw lo. In awmpuinu kha nang aiin kum hnihin a upa tih i hre lo vang tiraw?  I ú kum 3 lek anih laiin i nu kha a uire a!  I pain a hnawtchhuak daih tawh. Nau hial a pai a. Nau a hrin hnuah naute chu a chhiat thu sawiin i pa hnenah ngaihdam a dil a, awmpui ang leka awm pawh a hnial loh thu te  a sawi a ni. I pa khan lo khawngaihin a lo pawm leh a. Nang i lo piang ta bawk a. Mahse, i pa thinlung kha a hmin tak tak thei lo. Ngaihzawng a  nei ve ta anih kha.

Nia, i pa kha i demin i hua a, i thiamawm tho mai. Mahse, i pa kha a chhel khawp zawk asin."

Ka maimichhing ngawt ngawt a. Puahkeh ka va chak tak èm.. ral daih ka duh. Ka beidawng famkim ta. Tumah ka nei ta lo.

Sawmpuia'n min lo tlawh paw'n ka chhuak duh tawh lo va, ka tawm tawp. Thih ka duh ber. Pathian hi a awm angem? Awm se ti nge hetianga min piantir ve ringawt? 

Ni khat chu warder a lo kal a. Thu mak tak a rawn sawi a.

"I chhuak dawn. Bail phalsak i ni e." Tiin.

"Tu in? "

"Saroni inti ania… i unaunu niin a insawi"

Khawvel hi a tawp thei dawn lo anih hi..

The End..