AMEEGO

AMEEGO… 

Toni Râlte

A kut thi zawih zawih chu ka melh tlawk tlawk ringawt a!  Chet nachang pawh ka hre lo. Ka mawl ngawt mai. Rum zet hian min rawn melh a, "Milim a ni mi? " a ti hrawk a. Thu tam a sawi ngai lo vin ka harh zawk a, lapua leh bandage la turin ka vir nghal ta vat a. A kut ka tihfai lai chuan a ngawi reng a. Min en char char tih ka hriat vangin ka khur deuh. A huháng natzia ka hriat tawh vangin ka infuih ru mawlh mawlh a. Uluk deuhin ka tuamsak  ta a.  Fel ka inti ngawt mai. A ban thi chhan ka hrechiang sia.. A bialnu thinchhe zet nen an inhauh vang kha a nia. Kha mimawl nu lah khan a kalsan daih bawk si. Buaipuitu tur dang an awm miau si lo va,  sual hle mah se ka buaipui ta ngawt anih kha.. Chawh chu ka ti ve reng. Sual e lawm. 

"Ngurthan, ti nge i nuih a? " a ti thawt a.  Ka phu zawk.  Ka ngaihtuahna ka lo nuihpui lehpek anih chu.  "Ka nui mai mai" ka ti ve mai a. "Ka kut na chu i lawm a ni maw? " 

"Aih, khatianga awm kher loh tur ania. I chet dan kha a naupangchhia e lawm" ni e,  a bialnu nen an inhauh vang maia bang hnek vak vak kha a tul lo ve em a ni. Thinchhiatthlak lutuk. 

"Ka thu thu" a ti leh hmuk a. Ka chhang peih tawh lo.  Ka painn min lo ko hlauh bawk nen, inhnuaiah ka chhuksan ta a. 

Fahrah satliah nih ngawt pawh a tawrhhlelhawm tehreng nen, vanlaia tla nih zet zawng beiseina hi neihsei a har khawp nia!  Ka mawl hrim a, nuihna turte hi ka la hmu mai mai. Nu leh pate duh loh, bawlhhlawh bawma an hnutchhiah, chhungte tia chhal tur nei miah lo ka nihna hian min hliam vawng vawng chang chu awm mah se; tihtheih ka nei chuang si lo va,  ka lungawi awm ve tawp. Orphanage home atanga seilianin pawl 10 ka pass ve a. Kum 17 ka nih kumin faa min la duhtu ka tawng ve chauh!  Engkim ka hriain duh loh leh hnawl ka ni tih ka hriat vek hnuah chauh nu leh pa ka nei ve anih chu!  Ka nu leh pate chuan Ganja an zuar thin a, an hausain sum leh paiah an buai lem lo khawp mai. A tawi zawngin sawi ila, fa atana min lak chhan chu an sumdawnnain man a tawh  khan ka hrethiam chiah. An jail tan ai tang tur lekin min lo la anih chu!  Chu chu a la nep zawk. An sumdawnna tihlen zel nan hmanruaa min hman an tum a. Min hmatheh fô!  Tleirawl ka ni ve tawh a, ka hmeichhiatna chu an sumdawnna hmanrua atana hman an tum ta tlat si a!  Rapthlak ka ti ngawt asin. Nu nei lo ka  nih vangin virginity hlutzia te kha ka la hrethiam tawk lo va, ka hlauh èm vang leh min hnawtchhuak mai ang tih hlau vin vawi hnih ngawt mipa ka mutpui a ni. A nawmna ka hre reng reng lo bawk.  Hmanraw tangkai tak niin ka inhre chho a, ka hlutna ka hmu thiam lo va, ramsa aia ka chungnun zawkna ngaihtuah thiam miah lo vin ka chhungkaw lem te chuan min khalh rethei a ni. 

Mahse, mi sual kan tih tam tak zingah pawh hian rilru dik pu mi hi an lo awm ve zel a. Kan sumdawnpui thin pa pakhat chuan kan pahniha kan awm laiin thil nihphung leh awmzia min hrilh ta vek a. Min khawngaih vang chu a ni phawt anga, mahse, min puih ngaihna a hre bik hauh lo mai a. Min puih dan kawng erawh a zawn tur thu a sawi a. Ka lo ngaicháng ve tawp. Mahse, a reh hlen ta tho a. 

Ni khat ka nu nen kan bazar chu ganja fun thahnem fe kan pai chhuak a. Report an dawng nge umzui kan ni ta tlat a!  Ka nu hi chu a fing khawp a. Kan kal dun reng emaw ka tih laiin a lo relhru daih!  Ka mawl ka tih tawh kha. Tichuan, man ka tawk leh ta a. Thu min han zawt a, ka nu ka zawng a, ka hmu bawk si lo. Min mantute paw'n min nuih tawp. Lock up-ah min han khung ren rawn a. A hmaa ka lo awm tawh vangin hrehawm pawh ka ti vak lo. Police pakhat lal hmel deuh hi a lo kal a, min kawh zauh zauh pahin a hote chu a bia a. Ka chungchang an sawi anih rinna chu ka nei thiam ve. 

"Mami, kan hnena khawsak nge i duh?  Jail-ah" a rawn ti ta a. A hmel chu ka en reng a, pa sang deuh, dul kiar ve lek lek, hrisel hmel deuh hi a nia. A zaidam hmel khawp mai. 

"Ka chhungte… " ka tih mek lai chuan, "i chhungte hian hmanrua atan chiah an hmang che a ni. Chhanchhuah che ka duh a; i remtih ngei ka beisei" a lo ti dam dap a. Ka dinhmun ka lo hriat ve vek tawh avangin inngaihtuah buai miah lo vin, ka aw ta nghal a. Min bail chhuak ta a nih ber chu. 

Chu chu ka unaupa thar Ameego thinchhiaa nena kan intawn bultanna chu a ni.  A tan chuan unaunu ka ni ngai lo va, awmpui ka ni.  Mahse, kei chuan nuta ka neih loh vangin nutaah ka pawm hmak. An in chu a lian a, a simple bawk. Kan in hlui kha chu an chei par chuai a, ka in tharah chuan engkim chu a fel thlarh a. A fai a, a rim pawh a tui ka ti.  Kan in hlui kha chu Ganja rim a nam thei lutuk a. 

Ka pa chu Zoliantluanga a ni a. Ka nu chu Thanpuii a ni. Laizawn  thar pahnih ka nei a. Kei aiin an upa ve ve, U siami leh U teteii te an nia. Min duat a, chuan an piangthar ka ti em em bawk. Ameego chu kan inrual chiah a, sual ka ti takzet. A hmel erawh tha ka ti. A ngo a, a sam a buk mawi tawk a, a fai em em bawk. A mitmeng a zím lek lek a, mahse, a melh a na thei viau! Mut a duh em em a, games khelh a atchilh vangin nunphung pangngaiin a khawsa mang lo. Chaw pawh kan eiho khât angreng. Ka pa paw'n a hau thin a. A luhlul sia,  a hau sim thei lo aniang. U siami chuan MC-ah dawr muk deuh a  nei a, thawmhnaw dawr a nia. Ka nghak ve zeuh zeuh thin. U teteii erawh nurse anih vangin a hah thin hle. Ka chhungkaw thar te zinga fel ka tihber erawh ka nu a ni. Ameego ang chiahin a thinchhia a,  mahse, min duat ber. A fa tak tak ka ni lo chungin a fate ang chiahin min hau a, vawikhat phei chu ka hnungah a beng awk tawh. Mahse, nasa taka ka tihtauh khum ngam, mamawh ka neih changa ka ngenna hmasa ber a ni a. Ka ngaina takzet. 

Ameego chu nitin class kal turin chhuak mah se, a kal loh a tam zawk tih ka hre ve kur. Ka sawi chhuak duh bik lo. Min hau leh vak ang. Bialnu a nei a, hmeltha deuh. Feli ania, mahse, a changkang leh lutuk a, ka nu nen chuan kan ngaina ve miah lo. A lo leng zing thei rap. Thingpui min lumtir ziah bawk. Vawi khat ka sual ka chhuah a, a thingpui in turah ajionomoto ka thlaksak a. A luak vak a, chawh ka ti tawp. Ka seilenna fuh tawk loh vang nge mi tihnat te hi ka awlsam riau. 

"Ngurthan, hei hi lo su rawh aw" a kekawr hman thiam chu thutthlengah a dah a. T shirt var a ha a, kekawr dum fit zaih nen, a pheikhawk pawh saw hmannia cheng 3000-a a chah kha a ni chiang lutuk, thawhchhuah nei mang si lo hian branded lo chu a ti ve tlat bawk sia. Duat sual tih hriat lutuk. 

"Ka chhuak dawn asin" ka ti a. 

"Chhuah hmain su zuai mai la"

"Ninawm" ka lo ti hluk a. Kum khat la tling lo kan chengho tawh a, tiang khan ka la chhang ngai lo. Min rawn melh raw a, ka lo îp chawih. A bulah hian engtin emaw ka awm ziah a,  ka hrethiam bik lo. 

"Su mai rawh" a ti leh a.  A thinrim vak hmel loh. A kekawr chu ka la a, bathroomah ka luhpui a. Ka suk pah chuan ka phun leh mawlh mawlh a. 

"Chhe siah, zawngtea hi.. A bialnu sual sual nen.. Hneawm lutuk" tiin. 

"Hmm.. Ehem.. " a khuh ri chuan ka hmui a tichip chiang ngei mai. Rang zetin ka hawi chhuak a. Kawngka bulah a lo ding reng a. 

"I kal tawh maw ka tia" ka ti ta ngawt a. 

"Ngaihtuahna hi sawi chhuah fô loh tur.. Zawngtea pawh ka ni lo" a ti awlsam puat a. Ka nuih a za deuh. A mood a fuh aniang, a thinrim lo reng reng. 

Zanah hla kan zir dawn a, uteteii a hman zan a ni bawk a. Ameego chuan min thlah dawn a, A muangchang lui vel chu ka ngei lehpek khawp mai. Uteteii pawn a vin hrep kha. Car-a kan luh hnu chuan, "U te, Ngurthani bialpa i hria em? " a ti hluk a. Ka va melh kawk. Bialpa ka nei tawp si lo va. 

"Hre nang, tu nge sawi teh. Vat vat" a lo la tizui. 

"Ih.. Kan kawmthlang Hriata" a ti a,  a nui zui hak hak a. Keh hrep ka chak hle mai. Hriata hian min ngaizawng ve nasa thin a. Ka duh miah lo. Hmeltha ka tih loh bakah a thaw a uih thei si. Fel chu a fel reng. 

"Ami.. Ngur.. " uteteii chuan a ti a. A nui zui awr awr a. 

"In chawh" ka lo ti hmuk a. An nui uar sauh a. Ka pa vang vek, min chhaih a ching a, Hriata lah hi a lo leng peih si. Kan chhuk dawn chuan, tu emaw a call a, "zanin chu ka haw tlai thei lo vang, hei ka unau te lam leh an ngai a. " a ti a.  A unauah chuan min chhiartel ve tawh aniang. Mahse.. Ka lawm miah lo. A va mak eee!  A unaunu nih kha ka châk theih nen, engtin emaw hian ka na deuh tlat anih chu.. Aa.. Ho mai mai, zai leh  phawt ang. 

An ina ka awm tirh khan school kaltir leh min duh teh naa ka duh tawh miau si lo va, tikhan ka chawl ta ringawt kha a nia. In ka nghak a, u siami dawr ka nghaksak zeuh zeuh bawk. Ka nu nen chuktuah huan kan siam bawk a. Ka hlim tawk viau. Mahse, a chang chuan ka ning, Ameego ina a awm ni chuan guitar a play ring thei si, thiam chu a thiam. Mahse, thiam ve lo tan chuan a bengchheng fô. 

Inrinni a ni a, guitar a perh leh pek a. Zai pawh hi a tithei zèk!  Mahse, ka fak duh eih lo.  A rukin a studioah ka va zai vak vak zel. Ka nu hian min nuih nasa thei. Chumini pawh chuan a bialnu a lo kal leh a. A nalh leh pek hle. Ameego roomah a lut leh thawr a!  A lo awm si lo va. Min rawn en a. In hnuai ka kawk a. A chhuk ta a. Min tirh leh hmaa huana kal daih tumin ka inthlak sawk sawk a. Mahse, ka room kawngka ka lo kalh lo chu niin, "I va sexy ve" a rawn ti a. Ameego chuan… shit.. Ka kekawr bawp pakhatah ka bawp pahnih ka la thun zui.. Ka tlu ta zuah a. Ka tho mai thei si lo va, min rawn kaitho ta a. A mitmeng chu duh aiin a tak a ni. Ka zâm tlat!  

Kekawr chu ka ha tha mawlh mawlh a. Ka tawng ngam tawh lo. 

"Thingpui lo lum leh la"

"Aih, huanah ka kal dawn"

"Tunah hian maw.. Chhun anih hi"

"Ka kal duh alawm"

Min rawn kuai her lawp a. Kan inhmachhawn ta ran mai. Hetianga hnai hian ka la hmachhawn ngai lo. Ka khur der der mai. 

"Feli hi i hua mi? "

"Haw lo e"

"Nge i inthiarfihlim ziah? Mo atan i duh lo mi? " chu thu zet chu'h! 

"Aw duh lo.  A sual e mai" ka rilru lo pui sawichhuak ve thiam tur khawpin ka fing lo ka tih kha. 

A nui hak a. Ka sam a tuai a, "I â siah" a ti ringawt. A chhuak daih. Ka thaw huai mai. Kawngka ka va kalh a, darthlalangah kekawr hlipin ka inenkual leh mawle.. Ka nalh nge nalh lo tih hriatchakin. Umm.. Nalh ka inti. Mahse, ka te deuh chu a ni. Ka sin lek lek, zak deuhin ka inha tha a. Ka chhuak ta a. 

Huan atanga ka haw chu sitting roomah an lo awm tawh a. Ka nu lah a bazar daih si. An free thei ee. Ka in ve duh tho vangin thingpui chu ka lum a. 

"Ngurthani hi a intithu ve thei e.. In inah hian" Feli chuan a ti bawrh bawrh a. Min mikhual cheibawl ngei mai. Thingpui sa hian ka leih mai dawn mawni ka tih rilruk laiin Ameego chuan min rawn melh zawk a. Ka insum leh hman. 

"A in a nia, nge a intihthu loh ang? " a ti a. Ka unaupa chuan. Ka lo thaw hawk ringawt. 

La hma mah se, eirawng ka bawl a. An tawng ri hre turin ka beng erawh ka dawh hurh thung. 

"Nizanah pawh min rawn mang tha lo" Feli a  ni. 

"Ka lo muhil daih a.. "

"I games khel lutuk hi lawm. A ninawm, khel tlem ve deuh teh" a ti leh hlak hlak a.. "mawina khel zel rawh" ka lo tirilru a. Ka nui leh vur vur pek ang chu. 

"Time pass nan alawm ka khelh. Bakah inbiak reng ka peih lo tih i hriat kha" Ameego mizia hre thang tan chu chu thilmak a ni hran lo. 

"Min ngaihsak  lo sâwt riau, ka chík che a. I mizia hi a dang tlat"

"I ngaih dan mai mai nih chu"

"Ti ziah.. Ninawm. Ka haw dawn" awii a titau hma thei siah. Pangchang leh lutuk. 

A thlah zo a rawn luh leh lai chuan bawkbawn ka lo chan mek a. Ka bulah a rawn thu a. 

"Ngurthan, zanin chu ka hla phuah sa ang hmiang" a ti a. Ka lo hawi â huih a. Mawl min tih hmel zeta min melh chung hian, "Ka chhuak dawn lo,  i zai thei ve riauin ka hria" a ti leh a. Ka tawng ve hmain a kal leh daih. 

Zanriah ei khamah chuan a lo sawi lawk tawh angin a studio-ah min hruai a. U siami a lo kal ve bawk. U siami hi chuan a nau hi a duat em a. An hauh pawn a tan zel. A hla phuah chu min entir ta a. 

"A ruka vei chea, a ruka suangtuahna hlimpui hi, 

Ka damchhung nun tur reng anih si chuan;

Kei zawng nung reng chunga ral mai tur ka ni ang. 

Hre ve la, engtin ngai ang che maw.. 

Thurúk thuhruk kawltu thinlung hian, 

Ngaih che hi a bansan thei lo;

Hlat tur chea tiamthu tiam thintu hian, 

Hnaih tur chein tiamthu a bawhchhe leh thin.. "

A zai lai hmel chu chiang takin ka en vawng vawng a. A va hmeltha tak. A thinlung zawng zawngin a zai tih a hriat mai.  A phuah chhan nu chu a vannei teh e. Kei pawh ka zai lai chuan thil dnag ka ngaihtuah thei meuh lo. Ka nun nen a inrem riau tlat!  

Balcony-ah coffee kan in dun a. "Tu nge i phuah chhan? " ka ti tawp. Zak lo chu ka inti ve reng. 

"Thurúk ania' a ti mawl tawp. Ka zawt ngam tawh lo. 

"Ngurthan, Hriata hi i duh ve lo mi? " teivet a! 

"Duh awzawng lo.  A thaw a uih si" ka ti hluk hluk a. A lo nui kur kur a. Thla eng chuan a mitmeng chu a kap de sawr sawr a, a duhawm kher mai. Vawi leh khatah ka tukhum samah a rawn tham a. A lama min kuaiherin ka hmuiah tak a rawn fawp ta mai a!  A thim vek. Ka zak lutuk kha. 

Rei pawh a ni lo.  Mahse, engmah ka hre lo.  "Ka thaw a uih ve em? " a ti sak a. Zawngtea hi. "Uih lo" ka lo ti túm búr a. Ka la pangngai chiah loh laia zangkhai vaha a titi leh thei chuan mi rún takzet. 

Khami zan atang khan paih chhuah theih rual loha lianin ka thinlungah hmun a khuar ta a ni. A va buaithlak tak em. Ka unaupa a ni si. Ka ngai veng veng zel hi ka inhua. Chaw kan ei tlan tum hian hrehawm ka ti a, nuam ka ti bawk. Ka tawng ngai lo a, ka lo en leh vung vung zel. Vei taktè hian ka vei a, a kuah leh a fawh thlahlel leh mumanga man chak reng rengin zan hun ka hmang thin. Ka beisei phak a ni lo tih ka ngaihtuah thiam lo va, kan inkar inthlauhzia leh min daidantu boruak rit tak pawh ka ngaihtuah thiam lo. Ka tan ka duh a, ka hauh ve bur a. Ka rilru a hriat erawh ka hlau ngawih ngawih thung.  In khata cheng siin a whatsapp last seen ka check awl lo va;a status view tur ringawta ka phone ka hmet en zinzia te hi aw.. Ngurthanpuii hi a mawl lehzual ta. 

"Ngurbawih, Ngurbawih" ka nu a ni. Room atangin ka chhuak vat a. 

"Zanin chu i u nen chiah in lo awm a ngai dawn a ni. I ú siami te nen Lungdaiah kan zin thut a ngai. I pa ú nupui a boral a, bawiha nen in in lo nghah a ngai dawn a" a ti a. Ka hrawkah hnawhtu a  awm. Ka hlau nge ka phur ka hre lo. Mahse, min lensan leh daih awm sia! 

"Bawiha, Ngurbawihi hi amahin lo awmtir miah suh. Lensan miah suh ang che" tia ka nuin a hrilh lai chuan min rawn en a. A bu ve nghut mai. 

Ka nu te kal hnu chuan eirawng ka bawl a. Room atangin a rawn chhuak a, inchei deuhin. 

"Ka chhuak lawk dawn. Ka lo haw tlai lo vang,  chaw min chhumkep duh suh aw" a ti satliah a. Min chhun na zawk thei. 

"Ngurthan ka biak che chuuuu"

"Umm aw le" ka ti liam puat a. A ner sawk chu ka va hmu hman. A chhuak ta  nghal a. Khami zan min fawh thut atang khan an ina ka awmtirh ang chiah kha a  ni leh tawh a. Min be hmasa vak tawh ngai lo. Bakah a chhuak tam zual. Ka ngaihbel pawh a ni maithei. Tui tilo zetin zanriah chu keimahin ka kil a. Eikhamah tv ka en ta mai mai a. A whatsapp status ka view bawk.  Status hi a nei vak ngai lo va,  tun tum erawh,  " Kei chuan lâwn lo va ársi lak ka tum a, nang chuan leilawn awm lo i zawng thung" -C Thuamluaia tih hi a hmang a. A awmzia ka hre hauh lo.  Lehkha zir hniam nen ka pawh pha ve teuh lo. Rilru kim lo zetin tv chu ka en a. Groupah ka nawi zeuh zeuh bawk. Thilmak deuh ka hmu bawk. Family groupah chuan, ka patea fanu mimi hian, "U Amee chu U Feli nen an inthen tih ka lo hre lo re re.. An nih rei ve tawh tehreng nen" tih hi a rawn post a!  Thil ka hrechhuak thut. Feli a rawn kal tawh ngai lo. Ka tho thut a. Lam titihin fridge ka hawng a. Tuivawt ka in khawlh khawlh a. Hlim ruk riauna ka nei. Mahse,  a lo haw har tawh e. Ka call ngam bawk si lo. 

Ka nu nen kan inbe zuai a. Ameego awm loh thu ka sawi duh bik lo. An va call anga, min hauh phah ang tih ka hlau sia. Hriata a lo leng.. Awii ka ning. Fiamthu ka thawh ve e a tia, ka nuih a za der si lo. Min thut hnaih viau lehnghal. 

"Ngurthan, ka rilru i hre vek tawh a. Eng nge ka laka i rilru chiah hi" a ti leh tawh. Phoneah pawh kan inhrilh tawh reng sia. 

"I hriat tawh kha" ka ti hmuk a. 

"Ka hre lo. Ka hrethiam lo alawm"

"Ih.. Bialpa ka nei alawm" ka ti ta tawp a!  A ngawi vung vung a. Ka kut a rawn vuan chut pek a. Ka hamhaih hmain min rawn fawp ve ngawt anih chu!  Zu rim a nam lehnghal,  a fel viau emaw ka tia. Nemsawn tuma ka tanbuai lai tak chuan, Ameego a rawn lut a. Rang zetin ka inla hrang nghal. Min rawn hmu hman tih ka hria. Ka zak lutuk. 

"Hetah chuan ni lo ve" a ti tawi tak a. A sawi awmzia ka ngaihtuah chhuah hmain Hriata a chhuak. Min hmachhawn zawngin a thu ngawi ngul a. Min melh char char. A rui deuhin ka hria. A thinrim tih ka hria, ka hlau deuh. 

"Min fawp lui ve ringawt anih kha.. " ka ti tham chhal a. Insawifiah kher ka ngaih loh nen. 

"I sawifiah a ngai lo e" a ti hmuk a. 

"Ih.. Anu ten min lo bia a.. " sawi tur ka hre thlawt lo a  ni. 

"I nu a ni ve lo" ben chawrh ang chiah ka  ni.  Ka nghilh dup nghal. Na ka va ti ve le.. 

Sawi tur ka hre tawh lo, tawng turin ka chak tawk lo bawk. Ka mittui rawn tling chu khaplet tumin ka chhing sawk sawk a. 

"Hehhe.. A na viau a ni maw?  Kan in hi awmpui te nawmchenna tur a ni lo a nia. I duh chuan zuk kal chilh rawh"

Ka melh ngawt ngawt. Tah vak vak ka chak bawk. Ti nge hetia a awm.. 

"Ka bialpa a ni lo.. "

"Chu zawng chu maw.. Bialpa lo pawn an fawp hmiah hmiah thei che nia"

"Nang pawn ka inrin loh laiin min fawh tho kha"

"Ni chiah e.. I seilen dan ngaihtuah chuan a mak hran lo" 

Hei zet zawng.. Ka tuar thei lo. 

"Ganja vanga mipa mutpui thei kha a nia.. I ngaihsanawm ve hrim hrim" a tawng ring miah lo. Ka bengah chuan ring tak a ni. Ka chesawn thei lo. Ka na tlawk tlawk mai. 

"Mi hur ho hian an zia an thup rei thei meuh lo" a ti leh.. A va mak em.. 

"A tawk" ka ti tuar a. Ka tap thawthang a ni mai e. Ka khur hlawk hlawk a. Ka ding lui hram a. Melh ngawt  ngawt chunga mittui luang chungin, "Hetiang khawp hian min hmusit tih ka lo hrethiam ngai lo a ni. Ka awm thei tawh lo vang. Ka nu te awm loh hlan hian ka chhuak ange" ka ti thei ta a. 

Engmah a sawi leh hmain roomah ka lut a. Ka thawmhnaw ka siam mawlh mawlh a. Ka ngik faih faih bawk. Tihnat ka nih khât tehlul nen a ruka ka vei ngawih ngawihin tawngkam dengkhawng tak hmanga min tawngkhum chu tawrh a har takzet a ni. 

Airbag lian lo takah ka thawmhnaw tlem azawng ka dah a. Ka ak a. Room atang chuan ka chhuak ta a. A lo awm tawh lo. 

Pawn chu a lo vâwt vur mai a. Mahse, ka thinlung so bulh bulh chu a hmet dai thei hauh lo. Gate atang chuan ka in lo ni ve tawh thin chu ka thlir a, ka ngai ngawt ang. Ka ta a ni ve miau si lo va. Vakvai turin ka chhuahsan ta a ni. 

Ka vak ka vak a, riahna tur ka hmu mai si lo, thiante in pan tur ka hre lo a. Chhungte tia sawi tur ka nei bawk si lo. Thihna hial ka ngaihtuah thleng, nia, ka zep lo mai ang. Thih ka duh a. Engtia thih nge nuam ber ang tih ka ngaihtuah mek laiin min ko tu ka hre ta a. Ka hawi let a. Amah a lo ni a. 

Thli thaw chuan ka sam chu a chhem leng vawn vawn a. Zan reh tawh takah he lai thleng thleng hi min lo zui a maw?  

"Haw ang" a ti a. Min kai a. Ka tal aih aih a. "Tal buai lo mai rawh. Mi kan tiharh palh ang" a zaidam leh tawh lutuk chu ka hua. 

In kan thleng a, sitting roomah kan thu dun ran a. 

"Ka lo tawng hnem deuh a. Ka rui bawk nen, tihpalh"

Ka ngawi reng. Mu turin ka luhsan ta a. 

Min delhtu awm tlata ka hriat vangin ka harh a. Ka rak chhuak lo chauh, ka hmui rawn hup lo se chuan ka au ring  gawt ang. Makti zetin ka melh a. Nui saih chungin min kuah thawk a. Ka hamhaih vek. Room kawngka kha ka kalhin ka hre sia. Engtin nge ka bulah a mut theih. Ka tap muhil ngei bawk kha a nia. A ban chu ka awm chungah a nghat tlat si a, ka thaw a chham tep. A bawp sei thlurh chuan min khan tung lehnghal  a. Thawh ka tum a. Min kuai mu leh hnawk. Nghet zeta ka nghawnga rawn kuahin min rawn fawp a. A vawihnihna. 

Hnar ka duh. Ka tal ve. Mahse, ka thinlung hian a hnar tak tak lo. Ka tal loh chhung chu min fawp ngawt ngawt a. A nghawnga kuaha ka fawh let ve hnu chuan nem zetin min fawp a. A lei chu ka ka chhungah rawn rawlh lutin a rawn hawl kual ner ner a. Nuam ka ti, ka za vek. Fit tih hriat zet hian a tho kang a, a kawr a hlip a. Ka kawr pawh a hlip ve nghal. Ka tang buai lo a ni satliah lo,  ka lo welcome hiam hiam a ni mai. Sex ka hman tawh vangin ka bangbo lem bik lo. Kawng achin chunglam chu a sawisa a ni ber mai. Ka hnute chu duhtawkin a khal a, a hrual ne ne a. A lei hmangin a sawngbawl chikim hnehsawh lutuk hi ka â lo chauh tawh. Ka kekawr chu engtik laiin nge a phelh ka hre miah lo. Panty nen chauh ka lo awm tawh. Ka kap bawr chu a kut lum ham ham chuan a tham tawn tawn a. A khur der der tih ka hria. Engmah sawi lo hian thahnem kan ngai dun em em a ni. 

Engtik lai tak khan nge ka angchhungah a lo luh a, a lo tlakzeh tih ka hre lo. Ka hriat chhun chu khawvel nuam leh lum tak, chhungril nawmna fawn hlup hlup chu a  ni mai. Nghet zeta kuahin ka thaw ham ham a. Ka chik ngher ngher bawk. Ka duh vang a ni lo, thawm bengchheng siam lo tur khawpin ka inthunun zo thlawt lo a ni. 

A zo ta.. Hnai zeta inmelhin kan innuih sak a. He pa hian na takin ka thinlung a hliam a ni lawm ni?  

Ka saisir a. Min rawn kuah a. Thil tam tak ka ngaihtuah hmain ka muhil daih. Ka harh chuan ka bulah a lo mu tawh lo. 

Engkim kha a danglam a ni. Ka zah takzet. Ani chu a rui a, pawisak a nei lo a ni mai a. A harhfim zawk khan ti nge ka lo dan loh?  Keimah leh keimah ka inhau a, ka inphun khum mawlh mawlh mai. Ka hmuh ngam pawh ka ring tawh lo. Ka nu te lo hawn thlengin ani nen chuan kan inhmu leh ta miah lo.  Kei hi heta awm reng chi ka ni lo. Ka chhuak ngei tur a ni. 

Zanriah pawh kan rualin a ei leh ta lo. Mi dang tan chuan a mak lem lo. Ka tan erawh ngaihbel tur thil a tam lutuk. Zanah ka mu tur tui intur ka la leh a lo haw kan intawk chiah. Ka en ngam eih lo. Min hria anga awm lo vin a roomah a lut zui nghal. Ka na vawng vawng mai. 

"Ngurthan" whatsappa min rawn biak vawihnihna chiah. 

"Eih" sawi tur dang ka hre lo atin ni. 

"Sawi duh i nei lo vem ni? "

"Nei lo aniang" ka ngah lutuk. Engtin nge ka sawi ngam ang?  Kei hian ka unaupa ka ngaizawng a, sex hial ka hmanpui si a. 

"Anih chu.. Muttui le" 

"Mang tha le"

"Mang tha i ti maw?  Okkk" 

Ka reply hmain min block!  Ka tal tlaivar thak. 

Ni 3 a liam tawh. Hma ka la sawn thei lo. Kan in chu chhuahsan ka duh a, harsa ka ti si. An mut vek tawh hnuah ka chhuak mai ang ka tih lahin Ameego rawn haw tlai thei lutuk hian min tilaklawh zel si. Amah hi hmuh tam loh tumin ka pehhel hram hram thin. In khata cheng na nâ na chu inhmuh hun a lo awm lo thei lo va;hrehawm ka va tithei tak. Min be ngai lo va, mi dang pawh a be ngai lo. A roomah a tawmim tam zawk. Ka nu te pawn an sawi an sawi mai. "Bawiha mizia hi a mak ee.. Feli nen an inthen kha a tuar viau amawni dawn le" tiin. Chu chu ka lo natpui a. Ka tahpui leh thin. Hetianga mi â ang maia a khawsaka, a chhungte pawh a biak duh loh ai chuan Feli nen chuan ni leh mai se ka duh. Thík mah ila, ka chhungte hlim nan chuan ka tuar mai ang. 

Feli chu ka bia a. Min hmuhsit thin nen, min be tha khawp mai. 

"I u khan maw ngaihzawng a  nei alawm.. Min then tawp. Tihngaihna ka hre bik lo. Lo sawipui ve chhin teh" a ti nia. 

Ka sawipui ngam teuh lo mai. Tu nge a ngaihzawng chu ni ta ang le.. 

In chunga puan pho ka seng lai chuan a rawn chho a. "Feli i lo bia ni maw?  Be turin ka ti che em ni?  I inrawlhna tur i hai a  ni" a ti a. A thinrim hmel kher mai. 

"Ka tihpalh.. I hlim si lo va, ka va be ve tawp a"

"Ka hlim leh hlim loh chu i lo buaipui a ngai lo vang. Ka chungchangah hian vawikhatmah inrawlh tawh suh" a na thei fak fak mang e. 

Chumi tuk chuan U siami nen Delhi-ah an zin ta a. Thawveng huai tur ka nih laiin ka ngai lutuk. Min haw mah se ka hmuh zeuh zeuh pawh khan ka hlim tho asin. 

Sunday zinga kan vawksa chhum rim vang nge ka luak a chhuak lutuk a. Ka uak tuar tuar a. Ka luak thei chuang hlei lo va. Ka nu chuan i pum that loh vang aniang a tia.. Ka awih ve mai. Mahse, tun hnaiah hian ka chau thei riau, ka luak a chhuak thei bawk si. Zantirah hian ka khua  sik ser ser ziah lehnghal. Ameego te zin pawh an lo haw ve ta a. U siamin kawr nalh zet min lo hawn a. Ka lawm tawp. Ameego chuan mitmeng rum deuh min lo hawn.. 

Ka pum na lutukin min tiharh a, ka va inthiar a. Kal pawh ka kal tha thei meuh lo. Kareiii… ka kap atang chuan thisen khar hlir a rawn chhuak!  Ka rak tuarh a. Ka tlu zui ni maiin ka hria. A thim mup mai. Ka harh leh chuan damdawiinah ka lo awm reng a. A ngaihna ka hre lo tawp mai. Ka nu chuan nui hmelpu in min lo en a. A bulah Ameego a lo thu ve! 

"Ngurbawih, i harh tawh maw.. I ril a tam em? " a ti a. Ka lu ka thing a. Engmah ka ei chak lo. Ka pum na kha chu a awm tawh lo. Mahse, ti nge thi khar kha… 

"Nu.. Thisen kha" ka ti hman chiah a. 

"Ngurbawih, i nu ka ni lo vem ni?  Engah nge ka lakah zep i neih?  Nau i chhiat anih kha.. I ruak lo ang tih rinhlelhna chang reng ka lo hre lo " inthiam lo hmel deuh hian a ti ta a. Ka vir muai muai mai. Ka rai maw?  Ka hre lo chu a ni sia.. Engtin nge?  Engvangin.. 

Damdawi in atanga ka chhuah zanah chhungkaw tawngtaina hun kan hmang a. Ka pa chuan min zilh pahin ka rai tih an hriat loh vanga pawi a tihthu te a sawi a. An thiam loh a ni miah lo asin. Khamizana kan chawhmehah khan huat deuh ka nei nge engvang nge nau ka chhiat mai le ka ti. Rai ka duh vang hrim hrim aiin ka rai anih rau rau chuan hrin ngeia enkawl ka duh asin le.. Ameego fa a ni asin. 

Chumizan mut tawh hnuah min lo call a. Pawna lo chhuak turin.. Ka hreh viau naa sawi duh te pawh ka nei ve tho a. Ka chhuak ta a. Carah kan thu a. A ngawih vang vang hnuah,.. 

"I titla tiraw? " a ti sap a. Thinrim hmel pawh a pu lo. 

"Ka rai tih pawh ka inhre lo"ka lo ti thung. 

"I mawl em alawm" hei chu ka ngai haw lem lo. A dik,  ka mawl ve em bawk a. Inrinhlelh nachang ka hre bawk si lo. 

"A dik. Pawi ka ti. Fa neih ka duh asin' ka ti hlawl a! 

Min rawn en haw a. "Ti nge fa neih chu i duh? "

"I fa a nih vangin"

"Ngurthan"

"Min hau tawh suh." Ka ti tawp. Inhauh ka peih lo. Ka mamawh ber chu a awmnghenga muang taka mut a ni. 

"Kha thil avang khan pawi ka ti. Ka insum zo thlawt lo a ni"

"Nia, nau ka chhiat pawh i lawm ru ngawt ang"

"Ka lawm lohzia hria la, mak i ti awm"

"I lawm ang. Naute pa kha min zawh hunah tu nge ka tih tak ang? "

"Thudik i sawi mai ang chu. Ameego fa i ti ang chu"

Ka va melh kawk a. Nui hmelpu deuh hian min lo en kiau a. 

"I á nih chu' ka ti leh tawp. Min rawn kuah a. 

"Engmah i sawi a ngai tawh lo. Engkim ka hrilh vek tawh. Fa neih leh i duh em tih min hrilh la ka duh"

"Ameego" ka ti tuar a! A nui hawk. 

"Mawli, min hmangaih lutuk tih pawh hi i inhrethiam lo. I inhriatthiam hma khan ka hre tawh"

Ka hmai ka hup tawp. Ka zak. 

"Chuan.. Kei chuan i lo awmtirh atang khan.. "

Ka hmai hupna ka la thla vat a, phawk zetin,  "Maw?! "Ka ti vak a. Ka hmui rawn hupin, "Umm" a ti nghut a. Awii ava hmeltha ee.. 

"Mahse,  i sual thei eee ka chungah khan"

"Hmamgaihna kha chapona hmanga do let ka tum a. Ka hlawhchham ta anih hi"

Ka tawng leh hmain min kuai vak a. A lama min pawt hnaiin, duhthawh em emin min fawp ta a.. 

A tawp atawpah chuan hmangaihtu ka  nei ve ta..