KA PASAL NU

KA PASAL NU..

_ Toni Râlte

Ral lehlama khaw lo pe iar chu ka thlir ngawt ngawt a. Ka hriat loh hlanin ka kut chuan parda a lo hum nghet kher mai. Ti nge hetiang teh hrepa nun ka hman tak le tih ka ngaihtuah a; ka duhthusam leh suangtuahna te kha chu mumang ang chauh a ni tawh. Beiseina tlem erawh ka la nei ve fan a! He inchhung hremhmun chhuahsan thei tura theihtawp chhuah leh chu a tawp nan ka duh a ni.

“Koh i va hre thei lo ve, vawk chaw zu pe vat rawh” ram hmak hian a ti a. He mihring ang em ema sual thiam hi ka pasal nu a ni ang tih rin ngaihna ka hre ngai lo asin le.

Vawkin a chaw a hap bawrh bawrh lai chuan ka ngaihtuahna chu hun dangah a let vawn vawn a. Ka mit ka khap sek sek a, ni e, ka hnuk a ulh lo thei thin lo.

Aizawl atanga hnaitê Keifang khuaah ka nulat lai hun chu ka hmang a. Ka pianna hmun erawh Lunglei bul Haulawng daih a ni thung. Ka pa hna   avangin hmun hrang hrangah kan awm kual thin. Unau panga zinga a milai ka ni a, ka nu chu ka pa aia a let ruk laia upa a ni a, ka pain zu a in lai chhung zawng hah taka hna a thawh thin avang leh fa enkawl tur panga lai a neih avangin a lang tar hma a; a vun te a lo chuar hmain a thu that mai a. Zo nu ve tak, khawpui nun ngaisang bik lem lo leh tha a tih anga chhungkaw tana thawk mai thin a ni. A fate min duatin khauh takin min enkawl a, ka pa laka a dawhtheihzia ka ngaihtuah chang chuan ka pa huatnain ka khat leh thin. Ka pain zu a nghei fel ve tan tihah vanduainain kan chhungkuaah thla a zar ţan a. Kum 17 ka ni ve tawh a, kan upa ber chuan pasal a nei ve tawh bawk. Chutih lai chuan Keifangah kan awm tawh a, ka pa chuan a hnathawhna hmunah hmeichhe pakhat a tawng thar a! Chu nu chu nuthlawi chang ve fa tawh, fa pawh pali lai nei tawh a ni a. A pasal zu ngawlvei vanga inthenin a fate erawh a enkawl lo. Ka pa lah leplerh chi, hmeichhe nalh ngaisang chi a ni a. Chu nu lah chu a invawngfaiin, a inchei parh thei phian bawk si. Ka nu lah chuktuah huan te neiin hna a la thawk reng a. Intuaifaina hun pawh a la nei hleithei lo. Bakah a hriselna a tlahniam ţan a, nupa nun pawh ka pa duhthusamin a hmanpui thei tawh lo pawh a ni mahna le. Inrinlawkna pawh awm hauh loin, ka pa chuan ka nu chu kawngka sùla main a bialnu chu a rawn hruailut ta a ni. Ka nu thinlung na hmel ka mitthla chuan nasa takin ka pa tihnat let ve chaknain ka khat thin.

Ka nu chu ka putea te bula, Zobawkah a awm a. Zui ve kan tum chuan amahin a phal tlat lo. “In hmalam hun atan i pa bula inawm hi a tha, kei chuan induh angin lehkha pawh ka zirtir thei dawn lo che u, i putea te an khawsak a harsa ve tho si a” a ti a. Min hnar fithla thak a ni. Ka nuhrawn chu a sual hran lova, kan hlau bik lo bawk a. Ka nu a ni lo tih loh chu chhungkaw nu anihna a lantir tha ve tho mai. Mahse, thinlung takin ka pawm thei ngai lo. Kei phei hi chu pangchang chi, ka nu fachuam an tih thin kha ka ni a, ka nu ka ngai thei hle. Ka pa nen an inthen atanga thla 5 na-ah ka nu chu cancer avangin a thi a! A thi tih kan hriat rualin a cancer tih kan hre chiah. A chhan chu ka nu khan kan bula sawi a lo khap tlat vang a lo ni a! Nu hmangaihna thûk lutuk hi chu aw..ka nu thihna avang chuan kan unauho chu kan inlungrualna leh ţantlanna a tha zual a, ka pa chu kan haw ru fur a, mahnia inenkawl theiha chhuahsan vat chu kan tumru ţhám vek a ni. Ka pa pawh ka nu thihna chuan a nghawng deuh nge kan lakah a inthlahrungin a zia a zawi khawp mai.

Ka pasal nen hian whatsapp group pakhat atangin kan intawng a, thiantha tak kan ni phawt a. Palian tak, hmelchhe lo tak, nuih heh deuh mai hi a ni a, a ngainatawmin pawh taka kawm a awl hle. Kan inbe zing telh telh a, ka ngaina telh telh mai. Ka chanchin engkim ka hrilh a, ngaihzawng lama ka vanduai theih zia te pawh ka hrilh vek thin. A ni lah taka, bialpa hi vawi thum lai ka nei ve tawh a. Min lo kawp zel! Chuvang chuan tawn sual leh hi ka hlau hle.

Sangpuia chu Aizawl Zotlangah an awm a. Aizawl Hospitala clerk hna chelh mek a ni. A puitling a, a rilru pawh a tluang dup mai. Kan inbiak atanga thla hnihah chuan kan inngaizawng der tawh. Fimkhur hle mah ila, ka fimkhur seng lo aniang, min duh thu min hrilh rualin ka lo pawm ve nghal ngawt a ni. Ka hmanhmawh mah mah chu ka ti ve tho mai.

Ka nauin pasal a nei a, ka û in nupui a nei bawk. Kum 25 lai ka ni ve ta bawk a, company pakhatah ka thawk ve a. Hlawh tha tak chu ni lo mah se, hun khawhral ai chuan a tha ve tho mai. Kan naupangber mipa hi Engineer zirin vai ramah a khawsa mêk a, ka nu duhthusam ang takin a hmingin hna chhete kan nei ve vek a; ka lawm thin hle.

Sangpuia rawtna angin kei pawh chuan pasal neih chu ka remti ve ta a. Ka duh dan angin hautak lem lo, holam takin kan innei a. Tih bung bung lam kha ka ngaina ve vak lo. Ka nu la dam se tih ka duh ber a; mahse, ka unau ten min tawiawm thain, ka pa leh ka nuhrawn pawhin ka phu loh bungraw tam tak min leisak a, keima tawkah ka lawi ropui ve viau chuan ka hria.

Sangpuia te chhungkua hi a nu leh pa leh a farnu an ni mai a. Kan felfai hle. A farnu chu Champhaiah hna avangin a awm bawk a, nula fel tak a ni. Ka thlavang hauh tlat thin leh keimah vanga ka nu (ka pasal nu) pawh hau fô a ni thin. Inah a awm tam lo mai pawh a. Ka pa chu Police officer  a ni thung a, ka nu erawh chuan vawk te vulhin in a nghak thin. Nu taima tak, thinchhe ve tak leh an cheh zet a ni a. Ka lawi tirh chuan hrawn nuam tak hmuhin ka hmu a, mahse, ka lawi atanga thla khat pawh tling loah ka chungah sual a chhuah nghal a. Tawrh a nuam fahran lo hle.

“Vawk chaw kha i eipui ve dawn te anih ngawt loh chuan, rawn haw rawh, eirawngbawl a ngai” a rawn ti lang lang a. Kan inlam panin ka chho ta hnak hnak a. Ka nu min tihduhdahna te hi kan pa bula sawi ka duh ngai lova, tawrh zawh hun a la awm ve mai ka beisei vang pawh a ni. Bakah pasal chhungte rel chan ka chang dawn a, nuam ka ti vak lo. Hrehawm erawh ka ti thin khawp mai. A satliah lo ve nasa si a.

“I che te lah hi i muang ropui si a, che ve vat vat ta che; thatchhe lutuk” a ti leh hmuar hmuar a. Englai pawha chet reng hi ka kham ve thawkhat a ni. Zing hma takah ka tho a, eirawng ka bawl a, tukthuan eikhamah ka tifel leh vek a. Ka hna atanga ka ban tak avangin in ka nghak ve mai thin a. Ni lengin eng emaw chetna tur hi a hmu reng zel a, fai taka in ka tihfel a, ka hah ve hle pawhin kut awla ka awm hi a hmu thei hlawl lo a ni ber mai.

Bawkbawn ka chan mawlh mawlh lai chuan ka bulah rawn dingin min en reng a. Min vil rûn zel hi ka ning thin.

“Nang ai hi chuan Jenny pawh kha a laktlak zawk ang, nu tak enkawl loh tih hriat lutuk” a ti leh a. Ka thin a thawk ve ta phat mai.

“Nu, heti  em ema min duh lo anih chuan a tir khan sawi ta che. Kan inneih hma te khan..hetianga min tiduhdaha ka nu lehzel i chham tel hi chu ka ngaithiam tawh lo, Sangpuia bulah engkim ka sawi tawh ang” ka ti ve ta piap piap a. A nui sawng a, “Hrilh rawh. Pawi ka ti reng reng lo” a ti a.

Muthmunah chuan ka pasal bulah chuan engkim chu ka sawi ve ta phiar phiar a; a bu nghat nghat a. Ka thlavang hauhturin ka ngen tawp mai a ni. Nuhrawn ka lo hrawn tawh a, ka pa avang chauhin inthlahrung em em loin kan lo chengho zawk a, eng emaw chenah mitmei ven a ngaih chang a lo awm lo thei lo a. Chupawh tih tawh nak alaia pasal nu sual tak han hrawn kumkhua leh tur chuan ka dawhtheihna hian a tlin ka ring mawlh lo a ni.

“Nuseni (Sangpuia farnu) pawh naktukah a rawn haw anga, hetah hna te zawngin awm ve tawh se a tha ang” ka pa chuan tukthuan kan ei laiin a ti chuar chuar a. Ani hi chu nam deuh reng mai, sual si lo, ngawi chut chut, awm ve tawp chi a nia. Ka nu hian a ankhum nasa mai thin mai thin. Mahse, a thin a rim ve tawh chuan, a mitmeng ling phat atangin ka nu chuan a lo man thiam nghal zel a, a thinrim ngam tawh ngai lo. Mak ka tih deuh chu ka nu nen chauha kan awm lai hi chuan ka nu hi nu huaisar leh rorum zet a ni thin a. Kan pa leh ka pa te an awm ve erawh chuan thinrimna pawh nei se ţi dâk chung hian a ang thin. Mawlhtu nei ang deuh hian a awm ka ti mai, ka sawi thiam chiah bik lo.

“A ţul lo, Champhaiah awm leh rawh se. Heta a awm chuan eitu kan tam belh anga, sum a hek mai mai. Amah a inenkawl ve thei reng alawm” ka nu bawk chu! A mak mang e, a ma fanu ngei pawh hnawksak a ti anih awm chu! Eng ang nu nge maw anih chiah le..

Ka luak chhuakin min hnawh ut ut a, bathroomah lutin ka va uak tuar tuar a. Darthlalanga ka hmel phelh phang chu ka va melh a.. Ka nui sak mai. Sangpuia nen nupa nun kan hman dan ka ngaihtuah let hian a tha thawkhat chuan ka hria. Lehkhabu ka chhiar nasa a; movie pawh ka en nasa. Nupa nun hman kawngah ka pasal ka tilungawi zo lovang tih hlauin theihtawp ka chhuah ve thin. Tin, kan pa pawh hi a tawk china zei a ni ve bawk a, nupa nunah chuan hun hlimawm tak kan hmang thin, ka nu laka ka natna te hi kan khumlaizawl nunin a chhem daiin a tudai ve fô mai.

“Lo kal teh” tiin ka pasal chu ka pawt dawt dawt a, a ngaihna hriat loh hmel zet hian a hawi há a. A kut chu lain ka dul chu ka khawihtir a, “Pa i ni ve tawh dawn asin” ka ti sap a. A hmela hlimna lo langchhuak chu haider phal rual a ni lo, min pawm chuk chuk a. Min fawp bawk a. Min pawm kang a, min virpui chiam mai. Ka va hlim tak êm..

Nau ka pai thu ka nu ten an hriat ruala ka nu hmel ngui nghal rawih chu ka hmu chiang hle. Pawi ka ti tawh nek love, tunah chuan a tu tur ka pai tawh a, min tihduhdahna pawh a zia ve chho tan ka beisei.

“Hmanhmawh rawh. Vatin” ka nu aw vin tuar tuar ri avang chuan hmanhmawh fahranin room atang chuan ka tlanchhuak nghal a. Vawiin chu kan nufain doctor kan hmu dawn a ni.

Ka naupai chuan thla thum hmel a hmu ve tawh a, raino huat leh î ka nei ve lem lo bawk a. Ka hlim thin hle.

“Doctor, kan naute hi paih dawn ta ila, a hlauhawm tawh angem?” Ka nu zawhna chuan phawk zetin min mentir kawk a! Eng thu nge maw a sawi chiah le..min rawn melh thïp ràm a. “Kan paih dawn ka ti hleinem” zaidam aw deuh hian a rawn ti sup a. Min tihlau thin henu hian..

“Nau pai pawh nila hnathawh hi ţhulh inring chuang duh suh” ti tun tuntu ka nu chu enin ka thaw hawk ringawt a. Ni e, ka rai chung pawh hian ka chet engmah ka la thulh lo. Kan pain awmpui lak a rawt te khan ka nuin a phal tlat si lo a.

Nikhat ka inbual zo ka rooma ka lut tur chu ka nute room atanga tu emaw tlanchhuak zuai hi ka va hmu a! Ka phu nasa hle. Ka mitvai pawh a ni maithei. A hnu lawkah ka nu chu inchei deuha lo chhuakin, “Ka chhuak dawn a, tha takin in hi i lo nghak dawn nia” a ti hluk a. Ka thawveng huai mai. Eirawngbawl a la hun chiah loh avangin khumah magazine ka chhiar mai mai a. Mutchhuakin min zem chiai chiai a, ka lo muthlu sek aniang. Ka mumangah mi pakhat kut hrawl deuh hian min lo rek ngat ngat mai a, a hmel ka hmu thei bawk si lo. Nasa takin ka tal a. Ka hneh ngang si lo, mangang taka thaw hrawk hrawk chungin ka nam ve ngat ngat a; ka tlin dawn ta loin ka hria. Ka pasal leh ka pa ka mitthlaah an lo lang a. Heti ringawta thih chu tiin ka ngaihtuah a, vawi leh khatah ka ke chu ka leng dawrh a, ka harh hlawl mai, ka harh rual chuan kan room kawngkhar chu a ri khap a, a inkhar nghal ţhuai a. Ka thuchhuak nghal a. Ka thlan hluam mai. Ka thaw hlawi hlawi a, ka hrawk chu a na ţhûmin ka hria. Kha thil kha mumang a ni lo tihna em ni ang. Anih chuan mi an lo lut tihna em ni ang? Chiái zetin ka tho a, eirel ka buatsaih tan a. Ka tha a khur nasa hle. Ka nu a lo haw a, nasa zet hian min melh raw raw a. Ka chhungril a khur thei mawle!

Zanah kan pa bulah chhuna thil thleng chu ka hrilh nep nep a. A kut dam dap chuan ka samah a chul heuh heuh a. Ka hahdam sawng sawng mai. Zanlaiah ka zun chhakmmuakin harh hlawl a. Zung turin choka bathroom lam ka pan a. Kawngka ka hawng tur chu kawngka chu a rawn inhawng zawk a, ka phu zawk mai. Ka nu a lo chhuak a. Hmel sen ţeuh hian min melh a. Ka.hlau takzet a ni. An roomah bathroom a awm ve reng sia, ti nge hetah kher a kal ni?

Chutiang chuan hun nuam lo leh thinthawng tak tak ka tawng fô a. Ka nu inrawlhna niawm tak hian ngawi rengin rapthlak zetin min melh reng thin.

Ka naupai thla 7 lai a ni ve ta a. Ka rit ve tan tawh a, inchhung chet pawh ka ti hleithei meuh tawh lo. Tichung chuan ka nu chuan min phût zel tho si. Ka pasal bulah ţap chungin indan ka ngen ta tawp mai! A lu a thing mut mut ringawt. Ka nu be turin ka nawr ta ringawt a.

“Ka nu, i mô hi engvanga ngeih lo leh tiduhdah em em nge maw i nih le..i duh lo anih chuan ka neih hma khan sawi ta che” ka pasal a ni.

“Ka duh lo a ni tawp mai a ni. I tan a tha lo alawm. A tling tawk lo. Henu aia tha zawk hi i la hmu em em ang tih ka chiang” a ti hlar a. Ka lo insehruh nasa hle.

“A lakah hian that chhuah ve ang che. I tiduhdah thin tih ka hriat leh vaih chuan ka rapthlak ngawt ang, eitur te hi lo pe tha hle ang che”

Khamini atang phei kha chuan ka nu min tihhrehawmna chu a zual zual a. Rooma ka tawm chang leh min ko chhuak a, rooma ka awm loh leh roomah min nawrlut thul. A kawchhungah hian ramhuai a lut anih ka ring hial tawh. Anchhe hrang hrang min lawh thul, bathrooma tui pipe te hi a lo herh haw ngat ngat zel a! Tui kan lei phah leh fô! “Tui herh haw nachang hriat chuan herh tawp nachang hriat leh tur” tiin ka pa te bulah min hek leh zaih zel. In ka tihfai changin a tei sek a; a lo tibal leh zung zung bawk a. Sualthiam ve tak chu a ni. Chawhmeh ka siamsa te hi hmarcha emaw chi tam fe min lo telhbelh sak thin a. Ka pa leh kan pa hmaizah a na duh thin hle.

“He inah hian i awm ve ka remti tawh lo, chhuak rang rawh” min tih fawk fawk te hi a ching thin. Ngaia neih hleih theih si loh, ngaia neih loh laha tawrh hrehawm deuh si a ni. Tlin loh mai te pawh ka inring rum rum thin.

Inchungah puanpho ka seng a, ka naupai a rit deuh tawh bawk nen, ka che pawh a muang lo thei tawh lova. Engtik laiin ka nu chu ka bul a lo thlen ka hre lo, ka hmu thut chu ka phu zawk nghe nghe. A mitmeng chu a sen rûm a, a rapthlak hle. A kut a rawn pharchhuak dû a! Min namthlak a tum anih chu!

Ka rak ţhawt a, vanneihthlak takin rod lo lawrah ka inhamtang a, ka vuan ta tlat a, min namthla zo lo. Ngawi rengin a chhuk leh daih a. Ka thaw a sa phat phat mai. Ka tiril khur der der pawh thup a harsa hle.

“Ka chenpui ngam tawh lo, khawngaihtakin indang mai ang” tiin ka pasal bulah ka ngen ngawih ngawih a. Zaidam zetin ka hnungzang a chul heuh heuh a.

“Bawihi, nghak hram hram rawh; nau kan nei anga, a zia mai ang. A chhul lam hi a chiang vak lo a, keimah vang talin hrethiam hram hram teh” a ti a. Ka pasal ka hmangaih si, ka chhuahsan phal bik si lo, mahse, in khata ka nu nena awm dun leh chu inven reng a ngai dawn si, ka hreh takzet tawh a ni.

Sangpuia leh ka pa te chu kan chhungte, Kolasib lam chhiat tawh vangin an zin dawn a. Min hruai ve tura ka ngen pawhin an remti tlat si lo, ka nu tal hi kal ve se ka huphurh lovang. Ka nu nen chauha awmdun kha thih hrehin ka hreh a ni zawk. Kan pa phalnain ka pa te bulah awm ka tum ta a.

Sam theu re ru hian a lo ding ngawi reng a. A mit a sen rùm a. A ţhen ţhu bawk a. Min rawn kawkin, “Hetah hian awm hlen ang che..rawn let tawh suh” a ti thum chher chher mai a!

Thlan tla hluamin ka mumang chu ka ngaihtuahkir a. Kha nu kha ka nu chu a ni hauh lo mai. Mahse, ka nu nen ka ngaibel lo thei lo. Zingah ka nuhrawn leh ka pa an chhuak a, eirawng ka bawl surh surh a. Mahni in ngeia han awm chu thawkrim mah ila a thlamuanthlak bakah ka zalên a, nuam ka ti khawp mai.

Ka nuhrawn pawh chuan min duat ve hle. Naupai puar luah ka ni tawh bawk a, chet vak pawh a phal lo a. Ka nau neih thleng awm turin min ti reng bawk a. Kei pawn chu chu ka duh. Ka nu bula let leh chu ka hlau tlat tawh.

Ka pa te bula ka awm atanga kar khat hnuah nikhat chu ka nu a rawn lut hlawl mai. Ka nuhrawn nen kan awm a.

“Thu tam pawh sawi ka tum lem lo a, mahse, ka thusawi hi ngun takin lo ngaithla ang che. Hetah hian cheng tawh rawh, rawn let tawh suh. Ka mô atan ka duh lo che tih chu ka chetdan engkim atangin i hria ang, sawi tam a ngai lo,.” A ti ta phiar phiar a. Ka nuhrawnin min hmusit ang tih hlauin ka nu chetdan zawng zawng kha pakhatmah ka sawi si lo, ka zakin ka thin a rim em em a. Ka nuhrawn chuan ka rin loh lutukin, “Ka fanu hi nanga duha duh loh theih a ni lo e, a pasalin a duh miau chuan sawi theih i nei lo. Chhuak nghal rawh” a lo ti ve hmak mai! Tha te tea indawrna pawh awm ta lo chuan kan intha then leh ta tawp a. Kei erawh ka ngawi reng mai.

Ka nu rawn kal atanga ni thumnaah kan pa a lo kal a, min rawn hruai a. Ka nu chetdan kha phone atanga ka lo hrilh tawh avangin ka chhungte bulah thupha a rawn chawi nghal bawk a. Ka pa te chuan thutlukna chu ka kutah an dah a. Ngun taka ka inngaihtuah hnuah ka fa lo piang tur tan ka pasal chu zui haw leh phawt ka tithlu ta a ni. Nuhrawn ka lo hrawn tawh avangin keimah ang leh ka lo paltlang tawh te ka fa in a rawn chhui ve tur chu ka ngaingam lo a ni. Inthen ta ngawt ila, ka pa te bula ka invawmluh leh a ngai anga; a tirah nuam mah ila khuareiah innghirnghona a thleng leh si ang tih ka hlau ve bawk si. Tin, beiseina ka la nei bawk a, ka pasal chu inhrang chanpui tura ka kherhthluk theih ka inbeisei ve a ni. Ka hneh theih hlauh chuan kan chhungkaw biltein kan awm thei anga, ka nun pawh a nuam ve deuh tawh ang chu..

Kan pa thu min rawn angin hna hahthlak leh rum deuh chu ka ti lo lui ve ta hmak hmak a, ka nu mitmeng ràng hmu fô mah ila hlau angin ka awm duh tawh bik lo. Zan khat chu thla a eng hle mai a, kan room tukverh atang chuan a rawn inkhawhlut sur mai a. Kan pa a hnar bur bur hnuah pawh ka la muhil ve thei hlek lo mai a. Raipuar lai chuan zun a chhuak sek thin bawk nen, ka va zung a. Ka chhuak chiah chu Kawngkapui atanga ka nu rawn lut chiah nen ka hmu ta a. Min hmu ve miah lo niawm takin an room lam a pan leh nghal a. Eng nge maw a tih ang le..tun ang zanrei tawhah te..

Tiharhtu awm ang maiin ka harh zawk mai. Ka muhil thei lo ka let ka let kha ka lo muhil zui ve ta aniang. Tihian zing dar 3 pelhah ka harh leh ta chu ania. Mutthilh leh tuma ka han saisir chuan kan pa ka hmu ta hauh lo mai. Harsa ti takin ka thu chhuak a. Khaw nge a kal ang aw..a zung a  ni maithei. Ka han ngaichang ren rawn a, a lo let thei si lo. A ngaihna hre lo zeta ka hawikual lai chuan tukverh atanga eng rawn lutin tu emaw ding lai a chhun chu ka va hmu thut a! Ka rak chhuak teuh hle. Kan pa ka tih dawn chuan a sam a sei hnulh si, ka nu lah a sam a bul mut a a ni thei chai si lo. Ngawi rengin minute khat vel a ding a, chumi hnuah zawi muangin a ral tial tial ni maiin ka hria, ka hriat loh hlanin ka lo inhumruh nasa hle a niang ka hah hle. He inah hian eng nge maw thleng le..khuh kharh thawm ka hria a, kan pa a lo lut a. Ka thu a hmuh chuan a phu zawk ni hian ka hria a.

“I lo harh elo?”

“Umm..saw laiah sawn mi pakhat ka hmu ania” ka aw chu a khur hlek hlek a.

“I mitvai a niang, tumah an rawn kal lovang” a mitmeng pha dai chu mak ka lo tia! Engmah ka sawi zawm tawh lem lo thung.

Fapa ka nei ta. Ka va hlim em. Ka nau vei laia ka na te kha ka theihnghilh fai vek mawle. Ka pa leh kan pain min buaipui a. Ka nu hmel erawh hmuh tur a awm ve lo. Mak pawh ka ti lo. Ka nuhrawnin min rawn awmpui ve bawk. Nu sual tak hi chu a ni lo mawle..ka nu a luahlan mai pawh a! Ka fapa hmingah chuan Malsawmdawnga tih ka phuah a. A hmel te chu tha ka ti asin aw..

Kar hnih a tlin zan chuan a tlei lo zual a, tihngaihna tak pawh ka hre tawh lo. A tahbelh loh êm vanga kan lo lawm tawh nen. Chumizan chuan a ţap reng ringawt mai, nachhawkna ka pe thul. Kan pa nen kan buaipui nasa mai a. Ka nu erawh a rawn tho chhuak eih lo! A tupa a ni asin le..

Zing lamah a muhil ve thei ta hram a. Ka chau hluah hluah mai.

Thla 3 hmel a hmu ve ta reng mai. Khang thla 3 chhung khan ka nu hian ka hmuh laiin vawikhatmah pawm chu sawi loh a lawm pawh hi ka la hre lo. Mak ka ti mang e aw.

Bawihtea buala ka buai em em laiin a rawn kal a. “Bual zo la, haw pui ang che. I fapa nen hian ka hmu peih tawh lo che u, i chhuak lo anih pawhin ka namchhuak tho tho ang che” a ti a. Ka ngwwi reng. Rooma ka awm laiin a rawn lut a, ka suitcase a la a, ka thawmhnaw a khung hmawk hmawk a, ngawi rengin ka lo thlir tawp. Mitmeng hriatthiam harsa deuh hian, “I chhuah ngei ngei a ngai. Zaninah i aiawh tur ka lalut dawn” a ti ram hmak a.

“Ka nu, i ti lutuk lo maw? Ka pasal i nih loh hi hre rawh’ ka lo ti a.

“I pasal hi ka fapa a ni a, anu thu chu a zawm em em ang. Kalbo thuai rawh” tih pahin ka banah a rawn man lawk a, min hnuk ta mai. Ka fapa a ţap bawk.

“Nu, hetiang hi chuan ti suh” ka ti ţâwk ţâwk a. Vanneihthlak takin ka pa a lo haw hlauh mai. Ka thaw huai a.

Ka nu nen an inhau nasa ta mai a. “Bawihi hi a chhuak dawn anih chuan nang pawh i chhuah ve a ngai ang. Ka tupa hringtunu anih hi. I rilru hi a va chhe zozai ve” a tih te chu ka lo ngaithla ve kar a.

“Ka duh lo a ni, he nu hi. Ka mô ni tlak a ni” tih bak ka nu chuan a sawi lo. Engvanga min duh lo em em nge a nih le? Ka fel famkim bik lo tih chu ka hria, mahse, theihtawp chu ka chhuah ve asin. Mak hi ka ti lutuk.

Khata tang khan ka nu chu roomah a tawm ta tlat a! Chaw pawh ka pa hlirin a kensak thin. Thawveng huai tur ka nih nen ka thawveng hawk chuang lo. A lo awm ve kha hnawksak thin teh mah se, eng emaw ti zawng hian a khawharthlak ru riau a.

Kan chaw eikham tv ena kan thut atanga reiloteah ka mut hi namên loin a rawn chhuak a. Ka meng hleithei lo a ni ber mai. Bawihtea lah a harhvang nasa si, a pa kutah ka dah a. Ka.mutsan ta daih a.

Ka dangro lutukin min tiharh a; rang zetin ka tho..a chhan chu khumah keimah chauha ka lo mut vang a ni. Choka lamah ka phei a, tumah an awm lo. Living roomah tumah. Ka pa te room kawngka ka kik a, tuman min chhang lo. Na zet zetin ka kik ta a. Chik ngher ngher thawm ka hria, sazu a nih ka ring. Pawn lama chhuah tuma ka inher lai tak chuan ka pa te room atang chuan thei leh thei lova rawn rak thawm hi ka hre ta a. Ka sawithiam dan chuan hmui hup tlat chunga auchhuahtum thawm hi ni maiin ka hria. Kawngka chu ka han enchian nak chuan tala hian a lo inkalh bur mai. Eng nge thleng ta le.

Hriatchhuah thut nei niawm takin roomah ka lut leh a, kan pa call ka tum; switch off! Shit..

Ka pa te room lamah ka kal leh, thawm chu ka han ngaichang leh a. A reh dùk mai.

“Ka nu, ka pa” tiin ka ko a. Kawngka chu ka chum bawk a. Ri ţhuai thawm ka hre ta. Dawhkan emaw stool emaw tlu ri niawm tak a ni. Ka chiái vek tawh. Tuboh ka va la a, tala chu ka chhu ta bur bur mai. A te si a, a chhe har zêk mai si. A tawp atawpah ka chhu thlawn ta hram a!

Ka’n lut chu light ka on nghal a. Kareii! Ka nu chu khum mawngah a kut leh ke phuar chungin a ka hnawh sak nen a lo tlu niai mai a. Ka phelh sawk sawk a. Kan in hi an rawk anga, kan pa leh ka pa leh bawihtea an ru bo emaw an that a ni ngei ang. Ka tap pur tawh a. Ka nu ka hnawhna ka lakchhuah rual rual chuan, chauh hmel zet aw tham chhel hian, “Kal ang. Kal nghal ang. Bawihtea an that dawn” a ti ta mai! Ka zuangtho zawk a, tui a in khawlh khawlh a. Ka lo khur hlawk hlawk thung.

“Bawihi, tunah chuan engvanga kan in atanga chhuak tura duh em em che nge ka nih i hriat a hun ta. A chhan chu ka pasal leh i pasal te hi setanist an ni a, zaninah pawh i fapa kha inthawina atan hman an tum a, an tihlum dawn” a ti ta..ka puakkeh vek ni maiin ka hria. Dawt sawi hmel a pu si lo.

Mumang ang ruaiin engkim chu ka hre rei ruai a. Min kai a, ka zui ve mai. Tu emaw hi a phone a, taxi driver a ni ngei ang. Motorah kan lut a, Bawngkawn lam kan pan a. Bawngkawn kan a, kan la tlan zel. Ka ngawi reng a, an ni pawhin engmah an sawi lo. Thil thleng chu a rang teh thut lutuk a; dawnsawn dan ka hre hlawl lo a ni. Tin, ka nu thusawi kha awih harsa ka ti em em a. A tak ngei ka hmuh phawt loh chuan ka nu laka fimkhur tur pawhin ka la inchah ru mawlh mawlh tho mai.

Hmun pakhat kan thleng a; min chhukpui a. Ka zui ve zel. Ruam kan thleng a. Kawng peng pakhat kan zawh leh a, kan chhuk leh ngat ngat a. Kawr kan thleng a. Kan zawh chhoh leh hnu thui vak loah min dinpui a. Min kuaithu a. Kan hmazawn chu min kawhhmuh ta a.

Mi sawmhnih bawr vel tur hi an lo inbial khawm laih a. An hmazawn lung inchherchhuanah chuan bawm lian vak lo a inhung a. A sir tawn tawnah chuan ka pasal leh ka pa an lo ding a. An vai mai chuan kawrfual dum an ha hnulh vek a. Tu te nge an nih erawh ka hre thei lo.

Va pawh mai ka tum a, ka nu chuan a lo phal lo nasa mai. Min pawtlet dawrh a. Ka thu hle hle mai.

Naute ţap ri ngák ngâk ka hre ta. Ka fapa ngei a ni. Ka auchhuah loh nan ka ka hup a. Ka mittui chu a dir zung zung mai.

“Helaia lo kalkhawm te ka lo lawm che u a. Kan lo tiam tawh angin zaninah ka fapa chu intan ka hlan dawn a ni. Kan lalpa Lucifera thupek angin,. He nausen pawisawi lo, sual kai lo thisen hi kan ina kan inthen thianghlim hunah chuan thiltihtheihna nasa zawk nen rawng kan bawl thei dawn a ni” titu ka pasal chu ka thlir vawng vawng a. Mak ka tihna hi a va nasa êm..

Ka nu chuan a kawr awm chhung atang chuan geletine niawm tak hi a rawn phawrh a. Ka lo en reng ringawt. Chutah taxi driver khan meitalh a rawn la a, zawi te te hian a hmet a. A dep ling ta. Ka nu chuan kan pa te lamah chuan a thehpui vuai a. Rei nghah a ngai lo, a puak ta dur mai. Chumirual chuan an rak noh noh a, thlabar ri te pawh ka hria. An darhsarh zo a, an buai hmel hlawm hle. Ka nu chu an buai lai chuan a va tlan nal nal a, an zinga mi niawm takin buai hmel zetin a vir kual vel a. Driver erawh kha chu biru dan dan chungin a phei a. Kei erawh ka khurh nasat êm vangin ka thu hle hle mai. Ka nu chu a rawn let leh a. Naute a pawm! Ka va lawm êm..

Chak mangkhenin kan tlan a. Driver pawh kha a rawn tlanchak ngang mai. Min rawn um thawm chu kan hre thuai a. Bawihtea chu mitthi ang maiin a ngawi tlat a! A zawi nen bawk si. Ka ngaih a tha lo em em a, han endikna hun a awm ngang si lo. Lehlamah chuan a tap lo chu a vanneihthlak letling tho mai.

Taxi awmna kan thleng a. A chhunga ka lut chiah chu ka pasal leh ka pa an rawn lang ve nghal. An mitmeng chu a dava riai a, thinrim em em hian an insehruh a. Motorah chuan rawn luh ve tumin an rawn nem sawk sawk a. Driver chuan tinungin chak zet hian kan lim chhuak ta nghal a. Ka va hlau tak êm..

Bawihtea chu ka han endik vel a, a marphu chu a lo la awm a. Ka lawm lutuk chu ka tapchhuak hial mai.

“I rawn lawi hma kum khat kaltaah khan setana an be thin tih ka hre ve chiah a. Ka hriat dan pawh thla bial zan apianga ka pasal, zanlaia a tho ziah kha ka ngaih a tha thei lo a. Ka enthla ta a. Sangpuia nen hian an chhuak dun a, kan veng thlanmualah ka zui lut a. Hlau chung chungin ka zui ve zel ringawt mai a ni. Chumitum chuan hmeichhe pakhat a tel ve a, ani chuan nau a pua a. Rei vak loah a nau puak chu phelhin, naute chu a nghawngah an zai a. Thisen chu no tung sawlah dawhin an in ta hlawm a ni..ka thidang lo kha  a mak zawk. Hmeichhia chuan sangpuia chu enin, “Tun atanga kumkhatah i hun a thleng ve ang. I thisen, i rilarah ngei hlan a ngai dawn a ni” a ti a. I pa leh inpa chuan îhe loin an zawm tawp mai. Hlauthawng takin ka hawng a. Ka dam lo reng nghe nghe. Tichuan, rei pawh in inngaihzawn hmain in innei a, kei chuan i nun chhanhim ka duh vangin i chhuah ngei theih nan suahsual ka chhuah anih kha..

Khatia nangmah vanga i pa nen kan inhauh chiam tum khan ka thuruk hriat zawng zawng chu ka sawi ta phiar a. Tichuan, min rek hrep a, ka kut leh ke phuarin ka ka a hnawh a. Min khung bo tawp anih kha. Min thah êm kha chu a hreh ve anih ka ring. Ka fanu pawh heta a awm ka duh loh chhan chu kan chhungkaw thuruk hi a hrechhuak ang tih ka hlau êm a ni. Ih maw..bawihtea hi ka tupa a ni a, ka hmangaih asin. Mahse, ka pawma ka lawm chuan ka hmangaih nasa zual dawn a; thil ni lo lo te ka tih phah ang tih ka hlau atin ni..” Ka nu a ni.

Khami zan la la khan in atanga chhuakin ka nu te nen ka pa kan pan a. Ka nu pawh a haw ngam tawh bik lo a ni. A nunna atan a hlauhawm tlat si a. Sangpuia leh ka pa hmel chu hmuh tur reng a awm lo. Ni thum a liam hnuah news an rawn puan atangin thlanmuala an inthawi lai man an ni tih kan hre ve chiah. Engvanga setan be ta mai nge an nih ang aw tih ka ngaihtuah thin. Ka nu rindan chuan, ka pa khan kaisan a chak hle thin a, a qualification in a phak miau si lo. Malsawm dawnna emaw tiin setana  chu a be ta tawp mai aniang tih ngaih dan a nei a. Sangpuia pawh hna a hmu thei lo mangang tal vel a nih ngei kan ring.

Ka nu chu ka tan a hlu hle mai. Khawiahmah a kal ka phal lo a. Sangpuia leh apa ten min zawnchhuah theih lohna hmun tur nia kan ngaih Thingtlang khaw pakhatah kan pem ta daih a. Nufa diktak ni mai awm kan ni.

Bawihtea lah chuan hlimna min thlen nasa deuh deuh mai si a!

Tawk lo chungin tawk mai rawh se.