KA DAMKHAWCHHUAK ANG..

I TEL VE TAWH LO..
.

_ Toni Râlte
.

"I pasal hian a hmangaih lo che" he thu teivet pawh chu'h! Nitin a lo thawn ziah a. A taima hi ka ti khawp a. Ka pasal hmeia a lo ţang ve ngawt pawh zah a hnekin kei a nupui hi min la elsen chamchi a nih hi. Amah ka huatna chuan ka pasal laka ka chanvo hmuh loh te pawh a hliah khuh hial thin a. Ka pasal dik lohna lah min en kân tir fô bawk.
.

Kum 8 zet khum khata ka mut dun pui leh ka innghahna ni thin ka pasal duhlai hian engvanga kei min duh khawp loa hmeichhe dang a thlan zawk le..tih ka ngaihtuah chang chuan, mahni ka inkhawngaihna hian ka tlin tawk lohna leh ka that tawk lohna te a lo enkhum leh thin a. Lepler vang hrim hrima ka pasal chu pelhe ani tih thu ah bawk ka tawp leh thin.
.

Fa naupang te te pahnih kan nei a. A û zawk Mary hi kum 7 ni ve tawhin, a nau Bawihpuia hi kum 4 a hi thung. Ka han en thin. An muhil thaw sak sak te chu. Pa tel loa enkawl seilian turin kei hi ka inringtawk thei hlawl thin lo. Pasal te chunga innghat pumhlum leh derthawng ve tak ka nihna hian mahni maia khawvel hmachhawn min zuamtir loh phah thin.
.

Nupa hlim tak leh inkual reng, thenawm khawvengte pawhin, "In inngai nupa lutuk a" tia an fiam thin kha kan ni thin si a. Kei aiin kum 3 in a upa zawk a.
.

Thla riat kan inzui hnua innei kan ni a. Ka graduate hman lo a, ani erawh a zo hman chiah thung. Kan inneih hnuah M.A (Pol.sc) a zir zawm leh a. Ka pa (kan pa pa) hi zirna ngaisang chi a ni a, keipawh IGNOU a tangin ka exam leh a ni. Kan la upa lem lo bawk a. Khawi i lo chhuah vahnaah te hian nupa ai mahin inngaizawng kan ang zawk thin. Kan pa nau in nupui a neih ve leh thut si avangin, Mary kum 2 anih kumah kan indang ve a. Inhrang han chan takah chuan rilru pawh a puitling chho ve ţan a. Kan pa chu Company pakhatah Manager hna a thawk ve hlauh bawk a. Tlem chuan khawsak a ziaawm chho ţan. Keiin inlamah tuition ka lo pe ve bawk a. Kan in lian lem lo takah chuan kan pali chuan kan khawsa ve rak rak a. Khawhar kan hre hman meuh lo. Mary leh Bawihpuia hi unau dang nei ta lo chu an inkawmngeih em em a, duat pawh an induat thiam. Fa enkawl hi nulat laia suangtuah ang ngawt kha a lo ni hauh lo mai a. Ka rilrua ka hisap.leh tum ve dan te kha chu hman ngaihna ka hre ta mang lo! Zai chhuah ve ve an lo ni bawk nen. Duat dan chikim hian kan duat a ni ringawt mai.
.

Apa office kal rualin School kal turin an chhuak a. Apa hian car 2nd hand a lei ve a. An School kal tur thlah liama an lo haw hmuah leh chu nuam ka ti thei hle. Keima chhungte lam hi ka pa hna avangin Champhai lamah an awm tawh a. Ka ngai ve thin khawp mai.
.

Bawihpuia kum 4  anih atang khan kan pa mizia hi a dang riaua hriatna ka nei tan tawh a. A chhan erawh ka ngaihruat thiam lo. Ruih theih thil a ti ngai lo a, kuhva takngial pawh a ei lo. Mahse, zan khat chu zu rim a rawn nam haw ve tlat! Thinrim aiin mak tih lamah a kal zawk. A inthiam loh hmel bawk nen. Ka hau na vak duh lo a. A chhan ka zawh erawh chuan, "Ka hna hi thawhrim a ngai sia..ka chauh bakah inrefresh ka ngai a lawm" a ti.
.

Ani telin a danglam tial tial a. A phone hi a hma zawng kha chuan ka khawihsak bawrh bawrh thei thin. Tunah erawh bathroomah pawh a keng lut zel tawh a. A charge lai lahin a vil rūn a. Zanriah eikhama kan chhungkaw bila tv kan en ho thin leh kan infiam hun te a liam ta vek emaw tih turin a reh dâk tawh thin. Ka mangang ta deuh a. A danglam riau chhan chu sawi turin mut hmunah ka dawp ngat ngat a.
.

"A ninawm..min zawt chhen suh. " vin hlurin a ti a. Ka thinrim a, ka mu tau ta ngawt anih kha..ngaihzawng neih lamah chuan ka ringhlel hauh lo, ngaihthat lohna chhete mah ka lo nei lo kha mak ka inti fô! Sex chu kan la hmang ţha viau tho bawk si. Mahse, a hmaa a duhthawhna ang kha a bo telh telh tih erawh ka hria.
.

Nikhat ka cousin te inah ka leng a. An thawmhnaw zawrh chhuah tur te chu ka en pah a. Ka rin loh lutukin ka cousin thiannu, keipawhin ka kawm ve tho Rini chuan, "Sawmi, inpa hi hmanniah Infinite Park_ah hmeichhe pakhat nen ka hmu nawlh a. An ruih.hmel angreng bawk sia, min hmuh chuan inpa khan khanu a kaihna kha a dahthla sawk sawk a, mahse, ka hmu hman tho. Zep loh chuan an inhuat loh.hmel khawp mai" a ti ta a. Rini chu ka melh reng ringawt. Tih vak ngaihna ka hre lo.
.

Tlaiah chuan ka call a, "Zanin chu ka lo haw tlai ang, chaw min lo eisan mai ruu..hna a laklawh" a ti a. Zan dangah pawh a rawn haw tlai fô..ngaiah ka nei deuh tawh hial.
.

Ngaihthat lohna lian tak avang chuan ka muhil thei lo. A lo la haw bawk si lo. Ka fate roomah ka va lut. An lo mu tui hle. An puan te ka sin that tir lai chuan kan pa chu a lo haw ta a.
.

"Chaw i ei tawh ang chu tiraw" ka lo ti a. Ka aw chu a nem hran lo.
.

"Aw..ti nge i lo men a. Nghah ka ngai lo ka tih kha"
.

"Infinite park ah min la hruai ve la a tha ang. Ka kal ve chak tlat. Midang pawh i hruai tho sia"
.

Min rawn melh ralh ralh a. Engmah a sawi lo. Chutia a ngawi te chu ka thinrim tizualtu a ni.
.

"Ngaihzawng i nei tiraw" ka ti ta thawr a. Makti ang pawn a awm lo. "Aw" a ti!
.

Ka khur der der a. Nasa lutuka ankhum bâwih bâwih chu ka chak. Mahse, ka ţawng chhuak thei lo. A ngaihzawng neih pawh zep buai peih tawh lo khawpin ani maw a lo pelhe tawh.
.

"Chuan..engtin nge ni dawn?" Ka aw chu ka va duh lo tak. A tham chhhel a. Khawngaihthla a la hliah hliah.
.

"Ka hre nang. I ngaihdan dan ani mai" leh tawp a. Min then chu a chô hle mai.
.

"Ti nge ngaihzawng i neih? Eng nge tlin lohna ka neih a. Insiamthat ka ngaih chuan min hrilh ta che" ka aw khur chu thup ka va duh êm..
.

"Tlin lohna i nei lo. Ka thiam loh vek alawm. Amahin a lo zir bawk nen. Ka tang laklawh anih hi..sawmte, chance min pe leh la..ka insiamtha vek ang" zaidawh leh ngenngawl zeta a tih chuan ka lo nem.leh ţan thawt thawt ! Hmangaihna zet hi chu aw...
.

Ngaihdam min dilna avang pawhin hun siamsak leh chu ka remti lo thei lo. Chubakah ka then ngam tlat lo alawm.
.
A hma anga nupa inngai leh inthlahlel taka awm leh tumin ka thawkrim ve asin. Tihlawm dan kawng lah ka zawng nasa. Ani pawh a rawn haw tlai tawh ngai lo a, ngai kan awh leh ţêp tawh tihin a bialnu hnen atangin thlalak leh ţawngkam maksak tak tak ka dawng chamchi ta anih kha..
.

An infawp lai te, saruak in an mu tih hriat theih tur te leh ka pasalin nui chunga a kuah lai te..a tam.mai. ka en lai chuan ka mittui a tla lo, ka thinrim zawk. Mahse, zanah ka thlir tawh thlalak ho avang leh ka pasal a lo haw hma loh avangin ka ţap a ni. Ka hmeichhiatpui te thil tawn ang chu ka tawng ve ta si a. Hmachhawn dan ka hrethiam lo. He hmeichhia hi kei aia a hmelthat bikna ka hre lo. Ti nge ka pasal hian a zui duan duan si le...ka neih ve loh thil he nu hian a kawl ani ngei ang. Kan nupa nun ka han ngaihtuah a. Khumlaizawl nunah duhthusam loh lai kan neih awm ka hre lo. Kan inpawh a, inzah ţit ţet kan nei ngai lo. A vawrtawp lah kan thleng dun ziah bawk. Eng thil nge ka pasal lungdum lo tu chu ni ta ang? Eisiam em ni? Ka tleirawl chhuah atanga eisiam ka atchilh tlat avanga eisiam thiam tia sawi ka lo ni ve thin. Ka awmdan hrim hrim hi em.ni ang? Tlaiah fai varin ka pasal ka lo hmuak ziah a. Nupuite tihtur nia ka hriat ang chu ka apply lo bikin ka hre lo. Kim lo eng nge awm ang le? Zah lo taka ka ţawngkhum hun ka ngaihtuah chhuak zo lo a, pawisa chungchanga ka fel hlelhna lah ka chhui chhuak zo hek lo.
.

"I duhthu ka sam lohna min hrilh rawh. Khawngaihin. Inthen ka duh lo a ni." Tia ka ngen ngawih ngawih zanah chuan, "Ka hre lo. Hmangaihna hi a lo dai ve thei aniang" min tih khum! A na . na tak a ni.
.

Khami zan atang khan nitin maiin a bialnu chuan ka pasalin min hmangaih lo tih min hrilh chamchi a! Ka reply ngai lo. A aia ril leh thui zawk min hrilh ang tih ka hlau. Ka pasal chu a message ka.hmuh tir a. Engmah a sawi lo. Hetiang khawpa mi ngampa hi engvangin nge a hmangaih le? Engtin nge?
.

Ka rilru a chau a. Nitin ka awm a nuam ngai lo. Ka fate avangin ka nui lui a, an hmuh loh hlana ka mittui ka hrukhul pawh a tam ta. Hlimna leh nuihna chhan tur thil hi ka hmu zo thlawt lo ani ber. Ka chhungte ka hrilh ngam lo, then mai turin min ti dawn tih ka hria. Mahse, Sama hi ka then ngam dawn si lo. Ka inhuaa , nep ka inti thin. Mi dang hrim hrim hi zahawm ka ti a, a pasalin ngaihzawng a neihsan nupui nih hi ka zak a. Tihngaihna erawh ka hre si lo.
.

"Anu, apa kan hmu a maw? Ih..hmeichhia nen an bazar.aniang, bag pawh a khai" Mary a ni. "Kei chu apa in JCB  min lei dawn a" Bawihpuia thung.
.
"Nu, ti nge apa hi zanah chaw kan ei ho ngai tawh loh a?" Ka fanu zawhna chu harsa titakin, "Apa chu hnaah a.buai thin a. A lo haw hman lo thin alawm" ka ti a.
.

"Kan fate avang tal pawh hian i nun i sim thei lo mi? A harsa viau anih pawhin kan fate avang pawhin zanriah ei hman turin lo haw thin la" ka thil beisei te chu a va te tham tawh em..
.

"Ka lo tum ang"
.

Khum khata kan mut dun lohna pawh a rei ta. Ani chuan englaipawha khumpui a luah pui theih tur a nei alawm. Kei erawh ka khawhar a. Ka tuihal a ni. Ka cousin thu min rawn angin vawiin chu a bialnu hmuh ka tum a ni. Ka hmai te chu ka han chei ve a. Thlarau te pawh ka ang lek lek alawm..
.

"Min hmuh i duh hi ka ring reng a" hmeichhe zahawm tak hmelpu a ni si a! A hmui erawh a hnawihsen mah mah a nih hi. A perfume rim ka hriat chuan ka na zawk zawk..nizanah khan ka pasalin a lo hawn a. Zingah a awm tawh lo. He nu tan hian a lei a ni maw..
.

"Mi pasal duhlai chhuhsak tum hmeichhia atan chuan i uiawm hle mai" ka ti ngat.
.

A nui har har a. Mahse, a nuih a za miah lo tih ka hria. "I pasal duhlai tan chuan nupui duhlai i ni ve meuh maw?" Ka sa zak mai. A sawi dik phian bawk si.
.

"Anih chuan min luahlan i inring em ni?" Confi luih hi a lo harsa a ni.
.

"I chhuah hun hi kan nghak reng tawh alawm"
.

"Ka fate sawn nuhrawn an hrawn ka phal i ring em ni?"
.

"I duh chuan i hruai thei alawm" ka kut ka humruh a. Ka ding phat. Ka hmaa tuisik lo inhung chuan a hmaiah ka theh ta hmiah mai. Ring leng lawngin, "Mi pasal pawmlai lo ngaizawnga a bialpa nupui vau thintu hmeichhe tenawm leh hur tak a nih hi...ka pasal hmei nih a zah loh phawt chuan pasal in ngaihzawng a neihsan nupui nih hi ka zak bik lo e" ka ti tuar tuar a. Ka chhuak nghal. A rin loh lutuka ka chet avang khan a hamhaih viau ta ve ang chu. Ka thiltih chu atthlak teh mah se..ka thawl hawk si a nih hi..
.

"Engvangin nge mipui tamna hmunah i tihmualpho kher a?" Ka pasal chu a sen vek. A thintirim phak ka ni thin kha ani a. Tunah erawh a thin ka tihrim dan erawh a dang ta.
.

"Ani khan mualpho pawh a huam tur a lawm...mi pasal hmei nih a zah loh te chuan" ka awki pawh a ring ve viau.
.

Engmah sawi loin a chhuak leh nulh. A bialnu chuan whatsappah min rawn tâwng leh nasa ngang mai. Ka nui tawp. Ka pasal hi kei aiin a lo hmangaih zawk aniang e. Chu thu avang chuan ka chau rawih rawih thei hial mai.
.
Khata tang khan ka beidawng pawisak nei tawh si lo chuan kawng dang ka zawh ve ta. Tlangval upa lam, hmel tha angreng tak, abialnu in a thihsan avanga hmeichhe dang ngaihsak hlei thei tawh lo nen kan inbe ta tluk tluk mai. A bialnu nen kan lo inang ani chêk ang chu..min ngaina a, kei lahin thinrimna hrilthlakna atan ka lo hmang bawk nen. Ka nihna leh ka hun tawn pawh zep awm miah loin ka hrilh fai vek. Min hnem a. Min khawngaih bawk. Ani telin ka ngaina telh telh a. Hmuh phei zawng kan la inhmu hauh lo. Tlangval zaidam leh pawisawi lo tak niin ka hria. Ka sihhnip hmel tehlul.nen nulat tlangval na kawng ang zawngin min kawm ngai lo.
.

Inhmuh kan sawi ve ta a alawm...a lo leng a. Kan innel tawh bawk a, kan titi bawrh bawrh a. Kan nui dun hawk hawk bawk. Mak takin ka nuih theihna tur thil a sawi thiam em em a. A bula awm chu nuam ka ti.
.

"I fate ka hmu ve chak asin le aw..thil ka lo ken sak ania" a ti a. Ka fapa in a awh em em, JCB control theih, lian zet chu ka fapa tan a lei sak a! Mary tan erawh Tea_,set changkang deuh a lei bawk. A thlawna han dawn ngawt chu ka inthlahrung deuh si..lawmthu ka hrilh zing khawp mai.
.

Chutianga nitin zantin inbiaa nui dun reng ta chu mi khawhar ve ve tih takah inngaihzawnnaah kan tlu lut ţan ta a. A tha lo tih chu sir kil khat atangin ka hria. Mahse, ka nun hremhmun khan vanram a hnaih telh telh niin ka hre bawk si. Ka pasal lah a hming chauhin ka pasal a ni a. In ka chhuahsan hun a nghak ngawt ani tawh mai si a.
.

"Sawmte, uirena suala kan tluk luh hma hian i pasal hi then phawt mai ta che. I ngam em?" U zuala chu ka en ngam lo. Diktak chuan ka zah em em rualin ka pasal ka hmangaihna pawh kha a la bo vek lo tih ka hria. Mahse, ka pasal chuan min hnawl tawh.
.

"Nia..a dik alawm..mahse, ka fate hi.." Ka sawi zawm thei lo.
.

"Ngaihtuah suh. I fate tan pa tha tak nih ka tum ang."
.

"Uzual, fa ka nei thei tawh lo tih i hriat kha.."
.

"Fa te chu hei kan nei tawh alawm..i fate hi ka fate an ni mai. "
.

"I chhungte"
.

"Ka patea te in atangin ka indang tawh alawm..ka hrilh tawh che kha..thil i hrerei thei lo e mai" Uzuali hi a nu leh pa an thi tawh a. A patea bulah seilianin, tunah keimah vangin a indang tawh a ni. Ka tana a inhuamna te chu zahawm ka tih rualin nakinah fa (a ma fa) a la awt anga. Kei lah ka fate pahnih zai an nih tawh vang leh ka hriselna vangin doctor ten nau pai min khapsak tawh si. Ngaihtuah tur a tam viau.
.

" Ka lo inngaihtuah ang e" tiin ka tlip ta a. Ka fate pawh hian an ngaina hle. A lo leng ve zeuh zeuh bawk nen. Kan pa nen tak hian an la inhmu lo. Kan pa hi inah a awm tlem em bawk a.
.

Zirtawp zan a ni a. Rooma ka awm laiin ka fanuin min lo ko a. Ka va chhuah chuan ka phu zawk. Ka pasal leh a bialnu chu sofaah an lo thu a. An harhfim hmel.hle.
.

"Sawmi, hei Seni hi chaw eiah ka sawm a. Chaw kha chhuan belh mai rawh. Chawhmeh tur pawh ka rawn hawn kha" umm..kawngkasula mâk ka ni dawn emaw ka lo inti hman tawh a. U zuala lo lan hma kha chu nise chutiang em ema inhmuhsitna chu ka pasalzam hauh lo ang. Mahse, ka thinlung beidawng tawh lutuk avang chuan na pawh ka hre tawh lo ani ta ve ang. Chumizan chuan dawhkan khat kilin zanriah kan ei ho ta a. Ka fate tihlawm tuma seni a han ţawng vel te chu ka lo uak ţêp.
.

Seni a va thlah chhung chuan ka thawmhnaw te chu Suitcase ah ka rem a. Ka fate thawmhnaw nen. Rooma a lo luh chuan a ding det a.
.

"Eng nge i tih a?"
.

"Inthen ka duh a ni. Ka chhuak dawn. Ka fate pawh ka hruai dawn"
.

"I va hmanhmawh ve a"
.

"Nia..a ţul tlat a ni"
.

Khumah a thu a. Ka chevel chu ngawi rengin a en a. A chiâi ve deuh tih chu ka hai hauh lo.
.

"Ka inghah rei tir lutuk che u a. Min hrethiam ang che u. Tunah chuan a tawp ka thleng ngam ve tawh e" ka aw ah chuan inrintawkna a lang ve tlat.
.

Ka fate chuan a ngaihna an hre lo a. An hawi â ruai ruai mai. U Zuala ka call a.
.

"Anu, khaw nge kan kal dawn?"
.

"Bawihpui, apa Zuala bulah kan cheng tawh dawn. Chumi hma chuan api Tluangi (Ka nuteii) te inah kan awm phawt ang"
.

U Zuala a lo luh  chuan engmah sawi tawh loin kan bungrua chu a khai chhuak a.
.

"I bialpa maw?" Kan pa chuan ka hnunglam atangin a lo ti a.
.

"Aw" a tawi tek tawk khawp mai.
.

"Tenawmnu leh..."
.

"Hehhe"
.

"I lo tenawm zawk anih hi..vawi engzat nge i uire tawh"
.

"Vawikhatmah. Ka bialpa hian sex hman a duh tlat lo a..a hun hma chuan"
.

Ka biang a thip zawk. Min beng a ni. U Zuala chu a rawn tlan lut. Ka mitmeiin ka lo khap.
.

"Khuma khawhar taka ka mut lai khan nang chuan mutpui i nei thin a. I rilru mai nilo i taksa pawh a uire thin. Ka pasal ni chunga hmeichhe dang i ngaihzawnna khan tun dinhmunah hian min nawr thleng anih hi..na taka min siam lai khan Uzuala a lo lang a. Ani hian fa ka hrinsak thei tawh dawn lo tih pawh hre reng chungin ka fate nen min pawm vek a ni.
.

Mualpho leh zahna tih vel chu ka ngaihtuah peih lo. He inchhung hremhmun hi ka chhuahsan vat lo anih chuan rilru natna leh beidawn vangin ka thi vat dawn tih ka hria. Ka chhuah hun innghak ngat ngat bawk a. Tunah chuan hun ka siamsak ta che u alawm..lawmthu min hrilh zawk ta che..chuan ka fate hi i bialnu khan ka hruai ve min phalsak a. Min rawn chuhpui hlek suh ang che. I hmei mi hurnu nen khan nuam chu chen dun huam huam tawh ruuu...i sawi tiraw...hmanah khann..hmangaihna hi a lo dai thei anih hi i tih kha..kei pawhin chu thu chu zaninah hian ka sawi ve e..'Sama, ka hmangaihna che hi a lo dai ve thei anih hi' tih hi" ka tawng chhung chuan a lo inhumruh a. A thisen zam te chu apawng ţâwlh ţâwlh a. Na tak tuar hmel a pu a. A mitmeng pawh inchhirna hlirin a khat a ni.
.

"Kal suh. Bulţan tha leh ang. Kan fate a vang pawhin" ka kut a vuan.
.

"Aih..a tlai tawh. Nangin min tihnat ang chiaha min hmangaihtu ka tihnat ve chuan ka inthiam thei dawn tlat lo. An pa in a chhungkaw chhuahsan in hmeichhe dang a buaipuiin zu leh sa nen nuam a chen thin tih an rawn hriata an rawn seilenpui ai chuan tuna pa anga an pawm thlap theih bula an seilen hi ka fate tan a tha zawk. Inenkawltha ang che" zep loh chuan sama chu ka khawngaih tho  mahse, ka hmangaih em tih erawh ka hre tawh lo.
.

"Sawmte, min hmangaih kha.." A ri chhuak chang chang a ni.
.

"A nunah i tel ve tawh lo ani tih hi pawm tum hram rawh" U zual aw ah chuan elsen rawng a kai hauh lo.
.

Min dinhliahtu mipa ka tawng tawh tih hriaiin tlan tauhna tur ka nei tawh tih hre miah lose ka pasal hi a inlamlet tak tak angem?
.
Ka ring lo.
.

Hei hi hringnun chu a ni. A inthên kual vel.mai mai alawm. Hmangaihtu hi tina suh. A rilru a let huna mal taka na tuar tur chu nangmah i ni e.