ka savate 19

KA SAVATÊ (19)

Ziaktu : Toni Râlte

Rang takin ka insûk chu ka tleng vat vat a, Sangmuana lah chu min hre ve tawh nen, khawi danga kal bîk lo chuan mi vil ve ran a. A lo chhuah ngawt dan hi ka ngaihtuah thiam hlawl lo. Khawiah pawh kal dawn ila, in hi ka kalh thlap zel, rukru tih vel ka hlauh vang pawh a ni hran lo, ka tiṭhang tawh a, ngaiah ka nei ti mai ang. Sangmuana ka kawl hnuah hian ani ina tawm ta reng chu a lo che hnawk thei phian reuh a. Eng eng emaw a lo seh darh nuaih zel. Kalh hnan tawh a hnu han thlun leh kher kha ka lainat ve bawk nen. Ka insu zo ta a, hmanhmawh takin ka uitê nen chuan kan tlan haw ta a. Insûk sa pawh zâr ta lo chuan inah ka tlan thla nghal. Kawngka chu tlêm a lo inhawng a, tala ka en vat. Chhut chhiat tih hriat tak hian a lo tla bal a. Rawk tlak pawh ka ni meuh lo asin le aw. Ka lut thuai a. Engmah hmun hnawk leh inrawkna hnuhma a awm hran lo. Pindanah lut vatin lukham hnuai ka en vat a. Ka wallet lo mu ran ka hmuh chuan ka thaw huai e. Mahse, ka lakang a. A chhung ka en vat. A lo ruak hiai mai! ₹3740 ka dah kha a nia. A bo a bâng awm lovin an rût fai vek mai. Mahse, kei ka nu fimkhur luat zar ka zo a, pawisa zawng zawng hi ka walletah ka dah ngai lo. Khum mawng lama Aizawl bazara ka lei thingrem chu ka hawng vat a. A mawng dâpa saranga ka tuam ₹ 15000 chu ka la chhuak a. Hei erawh a kim ṭhap e. Mahse, râwlthar lai aṭanga mi inren, tlangval chhuah hnu pawha inhlawhna pawh hmang ṭha phal ngai mang lo ka nih avangin chutia pawisa fai cheng sangthum chuang han bo chu ka ui ve reng. Thil tam tak ka lei thei tlat a tin ni. Thil dang bo a awm leh awm loh ka han dap ngial a. Ka hmu zo lo. Tu tak ni ang maw? 

Zopui khuaah hian zu in mi chu an awm ve nualin ka hria a. Mahse, damdawi han ti erawh ka la hmuh âwm ka hre hauh lo. Zu vanga ruk rûkna hi chu a thleng ngai lo tluk a nia, mahni in chhungkhur thil an lo ru chhuak chu thuhran a nia. Damdawi erawh rukrûk hi a keng tel ve tlangpui a, chutiang mi bakin ka in hi an rawk ka ring lo. Mahse, tu te nge ni ta ang? Ti nge keimah min rawn bitum chat? Zirtirtu mahnia khawsa ka nih vang em ni ang? Tala meuh an chhu chhia a, an va thlamuang âwm ve le..ngaihtuahna mak pui pui ka nei chho a. Ka vei sek bawk. Ka chhuak leh vut a, Sangmuana lah chuan min rawn zui ve zel bawk. Zoa te in lamah ka tlan thla a. Nu Zaii'n an kawtah thing a lo ek mêk. 

"Nu zai, thing i ehna a rei tawh em?" Ka ti nghal tâwng a. Mak tih hmel fâ hian, "Aw rei ve tho, ti nge?" A ti a, a thlan a hru nghal pâwk. 

"He laia rawn teivak tu nge i hmuh le? Thil dang vak chu a ni lo" ka ti ringawt a. Ka sawi thui chuan buaina lian zawk a thlen ka hlau deuh si. A ngawi dat a, thawk la halhin, "Tu êm êm an vei pawn ka va hre si lo eê..Ê..ngawi lawk, nichin ve deuh tawhah khan Kimtea leh Baby te an rawn inzui thla.." a ti leh hluai a. 

"Kimtêa chu sam khuih pial thei deuh kha em ni!" Ka lo ti thuai a. 

"Umm, cher ve lam kha. Ti nge a? Sangzual" ngaihṭhat hmel vak loh hian a ti a. Min rawn thlek ngun hle bawk.

"Ka hre duh mai mai mawle..ka uitê hi a ke a tina a, an lo khawih mawni ka tia" dâwt chiang lutuk ka sawi ta tawp mai. A chinchhuaka ka sawi chuan thil a buaithlak vek palh ang. Ka chho leh ta hnak hnak a. Nu Zaii khan tumah a hrilh êm lo vang chu maw. Kima hmel chu ka mitthlaah a rawn lang a. Maêngi nen khan an inhnaih viau mai a, an inngaizawngah khan ka ngai deuh ringawt a. Ti nge ka inah a luh ngawt ang? An ni chu ni theiin ka hre si lo, hmun dang aṭangin an kal kual a niang ti dawn ila, penna tur a awm si lo, a awmchhun Nu Zaii te kawmthlang aṭanga Vengthar lama chhuah phei kha a ni mai a. Chutiang chuan kal nise Nu Zaii khan a hre dawn tho bawk si. Hmm..

Insûk ka zâr laiin Nu Tlani pangpar tui pe turin a rawn chhuak ve a. "Babyi a awm na nge?" Ka lo ti thuphung a. 

"Aw..Venglaiah ka kal dawn e a tia, a chhuak ta a nih kha.." a ti ṭha ve mai a. Thil dang ka zawt buai duh ta lo law law . Thil hi mi dang hian hre tam vak lo se kan himin kan chhuichhuak awlsam zawk ang. Bakah Nu Tlani sawi hmangah Pa Zawma ngei pawh hi ka ring zo tawh tlat lo. 

Ka zar zawhah khawsak ka rêl a. Ka nute chu engmah hrilh chiah ka ngai lo, a rawn mangang leh vak palh ang. Fate ngaihtuah hi a tina ve ropui si. Savatê pawh biak ngaihna a awm rih si lo va, rilruah erawh a awm ve rêng mai. Khaw thim dawn lêk lêkah Tleipuia leh a ṭhianpa hian chawhmeh an rawn zuar hlawl mai. Ka lo dawr nual. A ṭhianpa mitmei veng ru tho siin, "Bawihpui, i û in eng nge a tih?" Ka ti a. 

"Ih, eirawng a bawl a. Chuan, Sir, nizanah a û a ṭap asin" a ti ta reuh a. Ka hawnsan hnu khan a ṭap leh vak a nih ka ring. 

"I pa ten an hau leh em?" Ka ti vat a. 

"Aih, hauh pawh ka hre lo. Naktukah Ngûrah kan zin dawn a. " A ti leh daih a. Diki khan zin kha a sawi tak alawm. Ni 2 khat lek Muansangzuali hmu lo va awm pawh chu ka thei ngût ange maw. Hmu lo pawh ni ila, khaw khatah kan awm dun tih hriatna ringawt pawn min ti awm nuam ve asin le. Zin lo hram se aw. Sangmuana chu Tleipuia te ṭhian dun chuan an lawm khawp a, a ni lah taka ka Sangmuana tê hi a chum biang reuh a, ka bualfai hnu phei kha chuan pawn lamah a tal vak lo bawk nen, a faiin a hmelṭha reuh si a, lawmawm tak a ni ve tlat. 

"Sir, i uitê hi eng nge a hming?" A ṭhianpa chuan a ti a. Ka hrilh chuan, "Ehe! A van mak êm êm..a inhmeh lo ê" a ti nang nang a. Ka nuih a za deuh. Tleipuia pawh a tih dan ngaiin dawhkana ka lehkhabu dah ho chu inthlahrun hmel tak hian a va melh leh dâk dâk a. Khua chu thim lek lêk tawh mah se, "Chaw in la ei dawn chuang lo vang. La awm rih r'u, Sangmuana pawn nuam a tih êm kha" ka lo ti var a. Ka rice cake leisa ka pe ve ve bawk. Tleipuia lehkhabu la tur chu carpet ṭet ti mai ang, rualrem lo laiah chuan a inpal khut khut a, dawhkan chu a va bawh deuh rawp..chutih pah chuan Ṭhutthleng sei bân chu a va zût tel pah a. Chhuatah chuan eng emawni hi a rawn tla hlawl mai. Ear phone ang lek lek a ni a, ka lo chhar vat. Eheu! Ka meng kâwk. Voice rocorder a lo ni reng mai le! Tleipuia te ṭhiandun chuan zawhna mitmeng hian min melh ran a. 

"Ka ear phone chhia kha a nih hi, Sangmuana'n a seh chhe daih a" ka ti liam puat a. Ka awmdan danglam thut vang nge an nghet ta lo va, "Sir, kan kal tawh ang, anu ten min hau ang" tiin koh zui hman lohin an chhuak ta a. Recorder chu ka lek valh valh a, He thil phiangsen vang hian ka inah lut rûin inrawkna anga ka ngaih theih nan pawisa te an lo la vel a maw?! Tleipuia te chu an rawn kal lo vang tih ka va hlau tak. Ka hlauthawng leh thut, pindanah lutin recorder an dah rûk theihna tur âwm ka dap zung zung a. Ka hmu zo ta chuang lo. Pindanah chuan an dah lo pawh a ni maithei,. Kan en chho zel ang chu. A awmna ngaiah chuan ka dah leh ta hmak a. Mahse, Tleipuia te nen kan inbiakna kha an man thiam ang em aw. Ka ṭawng ri leh tu te emaw nena kan thusawi ngaihthlak rûk an lo châk a maw?! Hehe, ngaithla mawlh teh se. Tunah zawng a tâwp kan hnaih tak tak ta e. 

Zanriah ka ei khamah in chungah ka chho a. Inleng an lo la nei lo hlauh. Ṭhut pahin, "Vawiin ka insûk hlan khan ka tala an lo chhu chhia a, ka walleta ka pawisa dah an lo la fai vek mai a. Tu te tak ni ang maw?" Ka ti zut zut a. 

Nu Tlani a rawn hawi phâwk hle. Pa Zawma erawh a awmdan a ngai rengin ka hria. Baby thleng sil zo chuan, "Tak tak ami? Tu nge niang le? Pawisa chu a bo tam em?" A rawn ti kual vel. Ben chawrh ka châk mang e. 

"Bo tam vak lo e. A huaisenin a tihṭhan hmel khawp mai. Tala pawh a thar zuk lei a ngai dawn a nih hi" ka ti mai a. Nu Tlani chuan, "Tu tak ni ang maw? Tiang hi kan khuaah a thleng khât asin..a zia lo hle mai. YMA hruaitu te hrilh ve hrim hrim la" a ti mawlh mawlh a. 

" a..rinhlelh takngial pawh ka nei si lo va, ngawi rih phawt ang. A tih leh erawh chuan ka ngawi tawh lo vang" ka ti nghut a. 

Pu Zawma chuan, "Keini pawn kan lo thlithlai dawn nia..keini tan pawh a him lo a nih chu" a lo ti ve chuar chuar a. Thingpui hâng ka in zawhah ka chhuk leh ta a. Tala lei paha Zoa biak ka duh avangin ka chhuak leh vat. Ka sawm thla a, an nu rim a tum tho bawk a, kein venglai lam kan pan ta a. Tah chuan chhuna thil thleng chu ka sawi ta vek a. A chek hluk, "An va ngampa ve le..Kima phei chu hman deuh khan ka hnek tawh asin. A ṭawng thei lutuk a" a ti thur thur a. 

."Zoa, hei hi kan hriat a ngai. Ka rin danin nang leh kei bakah Muansangzuali te nena kan thusawi hriat an duh tihna a nia. Ka ina i rawn kal chuan khalam biahthu kha engmah sawi loh tur aw. An rilru tihbuai nan thil dang daih kan sawi zel dawn nia..pawimawh chu msg-in kan inhrilh zel ang. I phone hi hum reng la, tu emaw kutah dah miah suh. An hack vaih chuan kan chhe vek a ni mai" ka ti sauh sauh a. A buk ve nghut nghut kha maw. Venglai atangin kan kal hrang ta a. Lapuii hi thil a nei chikim khawp a, Tala pawh a lo nei hlauh mai. 

"Chabi tibo mai mai rual chu i ni tawh lo asin le" a lo ti hlut a. Ka dawr ber a nih avang hian kan innêl tawh viau. 

Kuhva min ṭheh avangin ka ṭhu ve ren râwn a. Thutak deuh zawk hian, "An sawi duh phian lehnghal che a. Sangpuii nen inthlalak avang khan, ka lo ṭan ve hram hram che a nia aw" a ti ser ser a. 

"I ti lawmawm ṭhin. Nia, a zia lo khawp mai.." ka ti ringawt. 

"Engahmah ngai suh, nula tlangvalte chu in inngaizawng ve bawk ang chu..khatia inthla lak kher kha a ṭul lo ê, kei chu a titu rin ka nei" nui chung hian a ti a. Terini a sawina a ni tih ka hrethiam nghal. 

"Tihian an sawi rei peih bîk tawp nang.." ka ti mai a. Sawi thui vak ka duh lo. Thlalak chungchâng kan sawi takah chuan Samua ka tirh kha ka hrechhuak zawk. Ka la be leh miah lo, thildang min tlak buaktu hi a tam êm a tin ni. Lapuii dawr aṭanga ka chhuah hnuah Samua chu ka call ta a. 

"Ka ṭhianpa te kha an in luahtu te pa ber a boral a, an buai ve rih lutuk a, ka la tihtir ngam lo a. A hmanhmawhthlak viau em?" A rawn ti a. Ani pawh a buai a niang, min rawn hrilh vat loh danah. 

"A hman hun hunah a ni mai" ka ti ta ngawt a. Lehlamah chhuichhuak eng ang mah se; kha simcard book tu kha ka hriat ngai a nih ka ring chuang hauh lo. Mahse, kha thla an lak khan eng nge kan buaina nen inzawmna a neih ka ngaihtuah thiam lo. Ka rin dan holam mai mai chu, thlalak kha darhin mualpho vak ila, chawlhte ka lak an beisei emaw he khawtlâng hruai tu ten min sawn chhuah an beisei vang emaw a ni thei a. Chutiang a nih loh pawn Muansangzuali laka a pa rilru hneh nan a ni thei, kha thlalak avang khan Pu Thara'n Sangpuii chu hmumawh se, remchângah hmangin hmun danga awmtira an niin hlâwk nana lo hman an tum a ni thei bawk. Chubak chu ka ngaihtuah thiam miah lo. A darhsarh rih ve bawk êm a ni. An duh ang ngei chuan thlalak chu a darh ta a. Mahse, an rin loh deuhin ka ngaihbel nge tu vak mahin an sawi pawn ka hre lo, ka bula sawi bawrh bawrh thu chu a awm lo naa, Schoolah pawh khan thawhpuite pawh khan ngaihbel tur tingin engmah an sawi ka hre miah lo. Nge min hmaizah anga an sawi duh lo pawh ka hrethiam lo. E. Miss Puii'n, "Nei chhe lo hle mai" a rawn ti a. Sir Peka'n, "Ka rin aiin i lo zei " a rawn ti bawk. Chubak zirtirtu te aṭangin eng thil dang mah ka tâwng lo. Mipa ka ni bawk a, ka zak hran lo. Kan inkuah a ni mai. Mahni Student ngei ngaizawnga nei ta hial ka hre tam ve ê..Hmeichhia a nia, kei mipa ka nia, kan inngaihzawn theih lohna chhan tur ka hre lo, bakah khawtlangin an hre law law chu ka thawveng sawt zawk. Khatia inzêp leh a rûk arala inzui kha ka chêkin a mil ve tlat lo. Sangpuii an sawi dan tur ka ngaihtuah erawh chuan ka khawngaih. 

Pu Ramtea te inah bawk ka pêngkawi leh ta. An ni lo hi chu chhungkhata han zawn tur hi ka nei bîk tlat lo a ni. An lo awm ṭhap a, Nu Mawii'n min hmuh rual rual chuan, "I va reh ve, lo kal teh. Ka hau dawn che" a lo ti nghal bawrh bawrh a. A sawi tur hriain ka inhria. Ka ṭhu nghal a, "Engah nge Sangpuii chu i lo ngaihzawn rêng rêng..a dinhmun sawti saw a nia. Diki te chaw eitituitu ber a ni dawn asin. A pa lah thaibâwihah pawh an lalpa ni mai awma mawi a nia" a ti ta hlak hlak a. A ṭawnghmangah chuan Sangpuii a lainat vang zawka min hau ni berin ka hria. Ka nui ringawt a, "Nui suh. Pawl 12 a pass hunte nghak ve law law zawk ta che. Mi zawng zawngin an chirhtheh hi. Ka lainat reuh asin" a ti ta chiah a. 

"Nia, mahse, kan thla kha la lo se kan mualpho lo vang" ka ti ringawt a. 

U Kaia chuan, "Thlalatu kha i hrechhuak thei tawh em? A zia lo ê..engvanga la kher kher nge maw a nih dawn le" a lo ti ve chuar chuar a. 

"Hrechhuak chiah lo, rinhlelh chu ka nei. Mahse, ka la fiah thei lo va" ka ti puat a. Zuali'n thingpui a va chhuang a. Chutihlai tak chuan râwlthar hmelfai ving veng hi a rawn lut a, "Apu, Apiin "Apu a zual a, va ko rawh u' a ti.." a rawn ti a. Pu Ramtea chuan, "Khai aw! Chami pa chu min peih lohsan nge nge dawn em mawni le..tirawh, nui, i va kal teh ang" tiin a ding nghal vat a. Chami pa an tih fô, cancer vanga reitak bawksawp tawh kha a ni tih ka hrethiam nghal mai. 

An chhuak zui nghal a. U Kaia chuan, "Tu maw i rinhlelh?" Zawi deuh sup hian a ti a. An nu erawh chokaah a awm, an fapain lehkha a zir ve mêk a. 

"Chutia sawi mai chi pawh a ni lo. Thil hi a mak riau a. Engmah hi hre ve lo zawk ula, in him a ni mai" ka ti a. 

Zuali thingpui rawn dah chuan, "Kha Terini te lah kha an inneih hun an sawn leh ta sia. An ni hi an innei tak tak ngût paw'n ka ring lo. Tluanga ṭhiannu Aruati khan, 'Tsa te chuan ngaihzawng nghet a nei reng alawm' te kha a ti mai mai a" a ti niah niah a. Ka tan thu thar a ni zel mai. 

"A va mak dâwn ve. " Ka lo ti ringawt. UKaia erawh a thutak run mai a, ka thil sawi vang kha a ni ngei ang. Engkim hrilh ka châk rualin Julie avangin venthawn chin ka nei lo thei si lo. An lamṭang an nih chu ring chiah lo mah ila, fimkhur tluk a awm lo ka ti ve tlat! Bakah hmanni lawkah U Kaia chu Hriatpuia nen sa te kha an châng dun si a. 

"U Kai, phulraw tlâng saw i fang ve tawh em? Rah tlan a awm em ni?" Ka ti hluai a. 

A ngawih dat hnuah, "Saw lam tlang dûng saw ka la fan awm ka hre miah lo. Ngati teh daih nge?" A ti hû a. 

"Khami zan ka bike chhiat zan khan Hriatpuia'n a han châng a niawm e. Tibuaitu a nei a, a rawn tlanchhe thla a, a silai pawh a rawn thlauh nghe nghe, a hlau ve viau a ni ngei ang" ka ti ta duah a. Zuali chuan, "A va mak ve leh! Ti nge maw hrâng lam hi a tam viau tak le. Tunhmain sawi a awm ngai miah si lo" a lo ti ve mawlh mawlh a. U Kaia chuan thutak fê hian, "A mak hle mai. Hriatpuia chuan tu silai nge a hawh le? A hma nia kan sa zu chân lah khan engmah a sawi si lo va" a ti nuah nuah a. 

"Nakinah va fang ve chhin ila a ṭha ang" ka ti a. Zuali chuan phâwk fahran hian, "Tak a! U Kai, Johna ruang kha saw lai tlang dûng kawrah khan a ni lawm ni an hmuh kha" a ti hluai a. Kei pawh ka lo phâwk kher mai. U Kaia pawh chuan, "Ni e, saw lai kawr kha Ngûr ram nen kan inrîna lai an tih kha a nia. Johna thlâin a tibuai te a ni mai lo maw?" Tiin min rawn melh a. 

"Mahse, Hriatpuia rawn tlanchhiat laite chuan Johna ruang an la hmu hleinem" ka lo ti nghut a, "A ruang an la hmu lo ringawt a, a lo thi daih tawh pawh a ni thei. A ruang an hmuh khan a khawng tawh an ti êm mai, a thihna a rei tawh deuh a niang" a lo ti khauh khauh a. Ka manthiam leh ta vat. Rilru dang erawh ka lo pu thung. Chu erawh sawi chhuah kher ṭulin ka hre lo. 

"Ka tum dan kha chu zaninah zan riaka va chân kha ka tum a nia. Mahse, hei hian a phal tlat lo mai a, eng nge maw a hriat ni? " An nu melh pah chuan U Kaia chuan a ti nuah nuah a. Ni e, a hma pawh khan a sawi tawh reng. 

Zuali chuan, "Ka chhungrilah hian ngaihngam lohna riau a awm tlat alawm..a mak ka ti kei pawn" a lo ti vat a. A sawi zawh rual chiahin Information mike aṭangin thawm a rawn chhuak ta a. Pu Zanghinga boral thu an rawn puang ta a ni. A peih lo ta nge nge a nih âwm chu. Inthurual ang hrimin U Kaia nen chuan mitthi in lam panin kan chhuak dun ta a. An in aṭangin a hla lo bawk a, kan va thlen pawn an lo la tam lem lo. Kan han che zung zung a, an in a zau bawk a, ṭhiah vak tur a awm lem lo. Kan insingsak zawh chuan ṭhalai pawh kan khat hmûr tawh mai. Lumen tur a ni si a, ina hawn phawta a hrana kal leh ka rilrûk a. Ka chho ta a. 

Ka thlen chuan Sangmuana'n min lo zuan tar tar mai. Tei te an lo zin chuan hawn chhoh daih a tum ngei ngei ang. Ran hi a duh khawp a. Zoa'n min lo bia a, ani pawh an inah a lo la awm a lo nia. Lo chho tura ka tih angin reivakloah a rawn thleng a. A hmain engkim ka lo sawi tawh bawk a. Rinhlelh tur lam kha a sawi bik lem lo. 

"Thlengi chu neih i tum hnai em ni?" Tiin thupui ka'n vawrh a. 

"Ka hre thiam tawh lo, patea hi a tâng rih bawk sia, chhungkaw kima tih loh kha ka pain a duh si lo" a ti nuah nuah a. 

"Ni ngawt mai, a zia lo tak tak a ni. Mahse, i nute khuan mo an awt ve tawh sia, an khawngaihthlak" ka ti duah a.  

"Nia, neihte pawh kan la nei ang chu" a ti ve mai a. 

Zial ṭanin, "Sangpuii nen in inbe thei âwm si lo va" a ti a. Awmze nei zet hian min rawn melh ralh. 

"Be thei nang. Ka ngaihzia hi, vawiin a rawn kal bawk si lo" ka ti suam suam a. Ka nui ruh ruh bawk. An ngaihthlak peih loh tur hlir kan sawi a, Zoa lah a phur tulh tulh nge ni, "Nizan ka mu chu zing dar 3 velah zun chhuakin min tiharh a, ka va zung a. Ka mu leh tur rooma ka lut chiah kha ka khum lû zawnah Johna ngei mai kha hmai dâng vekin a lo ding rûn mai a. Ka rak chhuak ṭhawt nghe nghe alawm" a ti zawt zawt a. Ka nui chhuak lek lek, "Ehe! Ka sawi duh lo va, i lo tawng ve elo? Kei pawh khawvar hma leilung lan tawh hnu si khan ka harh a, Sangmuana chik ngher ngher vang a ni pakhat. Ka va zung ta law law a, Bathroom ventilation aṭang khan mi rawn bih vûng vûng a, ka hamhaih deuh nge ka harh chhuah hnuah ka hlau leh hnuhnawh asin aw. A thih danah hian felhlel a awm a nih ka ring tlat! Hetia a inlar danah hian..Hriati lah in chungte bulah ka sawi duh lo va, mumangah nen mang loah nen sawi tur nei niawm tak hian ka hmu zen lehnghal a, Ngaiah ka nei titih tawh. U Faka pawh kha a tibuai hle tak asin" thutak hmel zet hian ka ti ve bawrh bawrh a. 

"Nia, a mak ê..Johna chu ka hmuh leh chuan ka be tawh ngei ngei ang" a ti sup a. 

Thingpui kan in leh tê tê hnuah mitthi lumen tur chuan kan chhuak ta a. Sangmuana pawh eitur ka chhawpsak sa ringawt. Zan rei lamah hian a ril a ṭam ve ṭhin roh a. Bike ka keng ta lo mai. Kea kal tam hi ka duh ve bawk a. 

Kal paha Heleni msg ka chhiar chuan ka ding dat, "Sir, zaninah apa a tlaivar ve dawn sia, Anu lah Champhaiah a zin bawk nen, Sangpuii riahpuiah ka sâwm a. Lo kal la" a rawn ti! Ka khi vur vur chu makti zeta min thlêkin Zoa chuan, "Vur vur a che..eng lam biahthu nge?" A ti chul a. 

Ka hrilh ve mai. "Hmm, i tlanbo dawn ni maw? " A ti nang nang a. 

"Naktukah Ngûrah an zin maithei a. Ka hmuh a ngai" ka ti nghut a. 

"Nia, a ṭha alawm. Thlengteii ka nei ve tho" a ti uang a. Kan nui dun hawk hawk mai. Kan zu thlenthlak chuan an lo awm ve ṭiai tawh a. Thlengi kan va sawm leh tê tê a, kan lut ve ta a. Julie te pawh ka hmu. Zai a nuam angreng hle. Pu Zanghinga hi Zopui khaw lal thlah kal zel a lo ni a. Kum 97 a ni. Kei zawng tar hun hi ka huphurh ngawt mai. Kan la tar vek dawn si a le..

An lo inenkawl rei tawh bawk a, chutiangin ṭap thawm pawh a nasa êm êm lo. An sûn lo e tihna ni lovin, an lo sûn lawk vek tawh a nih hmel. Phone han lek sek kha nuam ka ti si lo va, Heleni bulah, "Dar 11 velah ka rawn kal ang" ka va ti a. Chumi hnu lamah lumennaah chuan ka kal leh mai ang ka ti rilru deuh. Mawng a kham duh ve reuh sia, mahse, chhuah sek hi ka zahna lam a ni ve a, ka insangmar ve hram hram e. Dar 10:50 -ah Zoa chu hrilh ru zauhin ka chhuak ta a. Thingpui lumna velah pawh awm khawmuang lovin ka panna lam tur ka pan nghal char char. Heleni ka call bawk. A lo la var a, "Kan lo la nghak ngat ngat che a. Naktukah Ngûrah an zin daih dawn lehnghal" a rawn ti ser ser a. Ka pen uar phah ngawt chu..Kâr lovah an in ka thleng ta . Kawngka ka kik dat dat a, Heleni'n a rawn hawng vat. A naute an mu vek tawh a. Sangpuii chu an ṭhutkhawmna pindanah a lo ṭhu thluang diai a. A cher riaua ka hriat ni, mihring hi rilru lam natna te, hahna leh thil ngaihtuah nasat avangte hian kan va tla hma tak. Chutiang vang chuan a niang Savatê pawh a tlak dâwk ni. Heleni chuan zawi sap hian, "Ka lo va mu rih ang. " A ti a. Pindanah a lut zui daih. Savatê bulah chuan ka ṭhu a. Sawi hmasak ber tur pawh ka hre mai lo.

Amah zawk chuan, "Sangmuana a ṭha em?" A ti sap a. 

"Umm, chaw a heh reuh sia, châwm a la hautak dawn" ka ti ve mai a. A engvanga han lâi kual vel nge maw ka nih ngawt chu le..

"I pate an kal ve em?" Ka ti a. Ka melh kalh bawk.

"Umm, a tlaivar ve ang. Tiang lamah chuan apa chu a fel thei lutuk. " A ti duah a. 

"Naktukah chuan in zin dawn maw?" Ka ti leh nghut a. 

"Tlaia chaw kan ei lai kha chuan an la sawi a. Ka hre tawh bîk lo..ka peih lo ê" a ti nang nang a.

"Chanchinthar a awm em?" Ka lo ti thung. Inngaizawng awmdun ve siah chuan kan thu khel a bon mah mah a ni. A lohtheih bawk si loh a. 

"Awm lo ti ila, Eirawng ka bâwl laiin nu Diki'n tu emawni a bia a, an pindanah. Ka ngaithla ru leh a, mahse, chutiang lam vak a sawi lo. "Ka la hneh thei hrâm e. Lehpekah chuan ka ṭang zo tawh lo vang. Hmanhmawh a ṭha" a tia. Tu a sawina nge ka hre lo va" a ti ta a. Beng zawng a tivâr hawk tho e. 

"I pawimawh lutuk a nia, tunah hian..kan innghahna i ni titih. Chuvang chuan fimkhur la, Ngûra in va zin paw'n chhuak lo tawp rawh aw. Chance siamsak tum miah suh. " Ka ti charh charh a. 

"Ka hne tawh e, tiang hi..khitah U Hlimi thih lai vel aṭang khan a inṭanin ka hria, thlahrâng an ti thul. U Zoa te in bula kan hmuh kha tu nge niang le tiraw?" A ti leh daih a. A la naupan avangin a thusawi pawh a inzawm lo nuaih mai, ama tâwkah a rilru a buai ve bawk nen. Han tih vak ngaihna lah chu ka hre si lo.

Ka kuah a, a chesawn bîk lo. "A nih thil pakhat. Tunah hian engpawh tâwk la, kan pahnih hian inneih emaw inrûk te emaw ngai ta se, i ngam ang em?" Ka ti a. Ka thutak kher mai. Ani pawh a hmel a tak ngâk mai a, Muansangzuali kum 18 lek mah nise, a hmalam hun piahlamah a hmangaih êm êm a nau hmakhua tur pawh kan sawi tel tih a hrethiam ngei ang. A chil a lem khalh a. 

"Ngam" a ti hniam raih a. Min rawn melh chhoin, "I ring em?" A ti leh sep a. 

Ka lo bu nghut. Ka ring a, ka rin zel pawh ka ring. Nupui atan pawh ka duh. Ka chiang. A chhan chu he nau hi a puitling a, a kawlh a, a huaisen bawk. Tin, a la hmelṭhain a la duhawm lehzel a. Mi ṭhenkhat chuan an dikna ngei ngeiah pawh âwka an chhuah ngam ngai lo, Hmeichhe ṭhenkhat mipa pawhin a cheap kan tih ṭhin, Mualpho leh miin an sawi duh ang tih hlauh vanga an thiamna ngei ngeiah pawh ngawih chuha tlawm dûi ṭhinte ang a ni ve lo ringawt pawh hi ka duh chhan a ni. A luhlula a kawlh tehlul nen, a pa a hmangaih vang leh thil tam tak a ngaihtuah vanga Diki nghaisakna chhel taka a lo tuarte kha a dâwihzep vanga tlawm a ni lo va, a puahkeh hunah a ka a âng mai bawk. Hmangaihna a ngah a, chhungkua hmangaih tlat thin hmeichhia hi ka ngaisang a ni. 

"A nih i ngam tho chuan, zaninah inru ila" ka ti sup a. Ka nui duh si lo, min melh rum ngang mai. 

"Hna min pe a, ka tih i phal leh si lo mi? Misual ho man an ngai alawm" a ti nghat a. Ka la nui duh chuang lo. A thinrim tak tak ni lo va a tûm deuh bâr hian a duhawm reuh êm a ni. 

"Misual kuta i awm ka phal lo alawm, engtin emaw awm ta la, engtin nge ka awm ang?" Ka ti kua vel a. 

"I chhe ê" tih bak a sawi thiam leh ta lo. Ka lamah kuah hnaiin ka pawm ta vâwng vâwng a. 

"Ka ngaihtuah chian hian ka zak ṭhin. I upa si, bakah zirtirtu i nia. Mi in min sawi duh pawh hi a awm ka ti" a ti sêp sep a.

"A ho ê, class viii an nih lai aṭanga ngaihzawng nei an tam lutuk. Kum 14 pawh la tling lo, nang aia zei leh ngam huai an tam mai. Nang chu ka bulah hian zak dûk zel suh, ka confi loh phah zel" ka ti nuah nuah a. Ka rilru tak tak pawh a ni rêng a. Amah a confi loha zah ru deuha min dawnsawn hian ka lâiin nuam ka ti ngai bîk lo. Ka bulah chuan zalên se, ṭawng siam siam se, a awm awmin awm se ka duh zawk. Ṭawng loin chetziain kan induhna chu kan thiam ang tâwkin kan lantir ve mawlh mawlh a, ka fâwp zing tawh bawk a, a zei ve tawh khawp mai. Zei lo mah se, mi dek bertu a ni tho tho. 

Reitawk fang kan awmdun hnuah, "Phei tawh rawh.." a ti hap a. Dar 1 a lo ri ṭêp tawh. Ka lo ngai deuh nge ni rei pawh ka ti meuh lo. Mahse, nia , lumen tura kal hetia lo awm fâl daih chu zia lo ka tih avangin phei tur chuan ka inbuatsaih a. Kawngka bul thleng min rawn thlah.. 

"Naktukah chuan Heleni talin chanchin min lo hrilh rawh se aw" ka ti a. A bu nghat, ka mangṭha a. Ka kal zui ta nghal a. Mitthi in ka thlen leh hma si chuan, "Sangzual" kawngsir thim deuh lai aṭang chuan a rawn ti dût a. Hriatpuia aw a ni chiang. Ka ding dat a, ani pawh a rawn lang zui nghal. Ka rin loh deuhin zu rim a nam hûam a. A meng sen rûm bawk. Zu a in ngai lo ni khan ka hre si a. Sehchilh nak hian, "Ṭhianpa, min la ringhlel em ni?" A ti chhar chhar a. A pai khet khet bawk. 

"Ka ringhlel ngai che em ni?" Ka lo ti vut a. 

"I bialnu nena in thla latuah min ngaih kha..chuan, Zoa nen min thlim char char bawk a. Min phatsan ta mai em ni!" A la ti tak deuh deuh. Nui chungin, "I hresual emaw i ngaihbel mai mai a nih chu..Ṭhianpa,. Ti nge i va rui êm êm ve" ka ti ta daih a. 

"Ka rilru a na alawm, nang leh Zoa te min tihdan hi ka lâwm lo." A ti leh chhur chhur. Eng emaw palha buaina lian zawk a thlen palh ka hlau si a, "Hawh, i ṭha tawh mah mah a nih kha, ka hruai haw ang che" tiin ka kuah a. "Aih, ka tlaivar dawn alawm" a ti nawk nawk. Mahse, chutiang chunga a tlaivar a nih chuan a hmingchhe dawn lutuk. Chuvang chuan ka pawt lui a, an in lamah ka kualpui ta daih a.. a phun nuah nuah reng a, eng nge a sawi ber pawh ka hre thei lo. Step kan zawh dun laiin a phone a rawn ri a, a kekawr ipte chu a zuk zen rawk rawk a, a phawrh thei mai si lo. Ka zuk laksak ta a. Terini a ni.!

A bengah ka vuahsak a, a rûkin volume ka up zawt zawt bawk. Speaker on lo mah se; Terini'n, "Naktukah an zin dawn. Sawta ṭangin thil a awlsam zawk ang. Zingkarah phei ang che" a rawn tih chu hrechiang tak ka ni. Ka chiang mah mah. Hriatpuia chuan ka kuahna kut chu thinthlak pahin phone chu a beng lehlamah a hmehbel chawt chawt a.

"Tu nge aw" sehchilh zet hian a ti a. Mahse, a mitmeng nû bulh tak anga lang phêna fim taka a hawi zawk zawk chu chîk taka ka lo en ve si avangin ka hmuhhmaih hlawl lo. 

"Min hrethiam rawh, ka rui deuh a. Nakinah kan inbe dawn nia" a ti a. A off ta hmak. Ruih hmel zeta min rawn melh hâin, "Sangzual,ka tibuai hle mai che a" a ti bah nak a. A zahzêl a ni tih ka hai bîk lo. Mahse, ngaihbel theih miah loh tura inthununin ,"I ho êm mai a, ṭhiante lakah chutiang an sawi ngai lo, khawi kal ang, Fimkhur la. I rui ropui si" ka ti nghut nghut a. Zu rui tak takte aiin rui dêr ho hi ven an lo hahthlak a nih dawn hi..mahse, stepah te chuan pai awt awt si kha a lum duh bik ṭhak nang. An in kan thlen chuan a nuin a lo chiau âu vat a. 

"I va zahpuiawm e aw. Ti nge khatianga i awm le?" A lo ti hlaih hlaih. Mahse, ka chawngkawr mit hian tupawh a rinhlelh tawh avangin Nu Zoi thinrimna chu a lem anna riau neiin ka hre leh bawk. A fapa fel tak, Khawtlangah pawh active tak, mite zahkai kha zaninah mu leh mal nei vak loin a rui chhe der a, thinrima âng hlawk hlawk tur a nih loh pawhin rilru na taka a ruih chhan zawt tur a niin ka hria. Rei pawh awm loin ka chhohsan ta daih. Ka pik mup mai. Buaina dang ka nei leh ta chu a nia. Step chu chhuk lama kan kal rei nen, ka ngaihtuahna a kaldîng deuh nge kawng ka chuang chhuak rang khawp mai. Zâwl ka thlen chuan ka ding chat a. 

"Engvangin nge kan pahniha kan awmdun lai kher kherin Terini khan a rawn biak a? Khang thute kha a lo hrilh ni ang?"..engvang ngawtin nge khalai kawngsîr aṭang khan Hriatpuia'n min lo koh din a, an ina hruai lo thei lo tura rui der nge a nih ang? Buaina hlîr. Ngaihtuahna pawh hi a chawmawlh zo tawh a nih ber hi a. Engpawhnise, naktuk khua var se la, thil chu a nih dan tur angin a inzial fel leh mai ang chu maw?! Muansangzuali chungchâng an sawi tih hai rual a ni lo va. Ngûr khua aṭanga rukboa sumdawnna atana hman an tum a ni tih kha ti nge ka hriat ve kher an duh chhan? Hun dangah pawh sawina hun a tam laiin ti nge ka awm lai kherin? Thim zingah ka khi ta sak a. "Kan inhrechhuak tawn ve ve ta bawk a. Kan inhmachhawn thuai ang chu le..a ṭha vek e" ti sup sûp chungin mitthi in lam chu ka pan leh ta a. 

An hla hriltu zet chu'h! A va han thiamin lung a va kuai reuh êm. Nula tê lam, aw lian zet si hi a ni a. A hla thu lam a fiah bakah a thlûk dan zawng zawng chu a dikin zai a châwi ngawih ngawih. A zai pawh kan zai tui rêng a. Eitur ka nang hman hram. Inthlahrung lem loin ka ei ve mai bawk a. Zoa nen bawk kan insi leh ta rial e. Ani bak hi han rinngam ka nei ta miah bawk si lo. Ani lehzel hian min lo bum a nih teh chuan, Zopui khuaah hian ka lu ka phûm lo vang tih a sawi theih loh. Mahse, chutiang chu a thleng lo hrâm turah ngai teh ang. Muthlu miah lovin khawvar chian thleng ka zai ve ṭhak nia. Rilruin tum a neiha hmachhawn a cho zek zek hi chuan taksa pawn hah leh chauh a lo hre vak lo a nih hmel. Kan bân hnu lama eirawngbawlna leh eng emaw tihfel ngai ang erawh a veng neitute kutah kan dah ta mai. 

Kan hawn kawngah zawitê têin Hriatpuia chungchangte chu ka hrilh ta a. Ani mutchhuak tawh lam, ngaihtuahna fim pu tawh si lo chuan, "Ngûrah va kal khalh ila ni mai lawm" a'n ti ngawt a! Ka chek hluk. 

"Khalam chu msg in ka rawn hrilh ang che" ka ti nghut a. An inah min pensanin kei pawh in ka thlen rualin tlêm tal chhing ve turin ka mu ta thlawp a.

Mumang mak danglam tak ka nei zui ta a. Mumang hi kei ka ngaihtuahzui khâtin mang hian awmzia a neih teh vak ka ring ngai lo. Kelchâl mang man an tih ang erawh Aizawlah khan Siami te nî hian vawi hnih lai a mang tawh a. Leivûng thar deuh leh mei vâp darh nuaih a hmuh ṭumin an thawhpuinu hi heart attack vangin a boral a. Mei vâp a hmuh ṭum erawh chuan, an ṭhenawm workshop a kang a, a neitupa fapa naupangtê hi a kanghlum bawk. Chutiang a nih avang chuan tlem chuan han rinna chen ka nei ve ṭhin. Keia mang ve erawh ngaihbel ka tum ngai lo bawk a, ka rin angin a thleng ngai lo rêng a. 

Tukin ka muhil erawh, U Faka hi ka lo hmu a. Lianpuia kan kal ṭuma tlang zâwla ka ṭhutna laiah khan a lo ṭhu a. A ngui viau nghe nghe. Ka en reng lai chuan, Muansangzuali hi tlang pang atangin a rawn vak chho zawt zawt a. U Faka chuan lawm êm êm hian a lo pawm a. Sangpuii pawh a hlim hle. Makti zeta ka melh reng lai chuan, U Faka chuan, "Zalên tawh rawh aw. I kâwlte hi hlihin lo awm tawh rawh se. Tunah chuan thlamuang takin i muhil thei tawh ang" a lo ti mawlh mawlh a. 

Chutia an hlim dun viau lai chuan U Faka chuan a kekawr kawng atang hian chemtê a phawi ru ta zâl zâl a. Au ka tum a, ka thei bawk si lo, chutah U Faka chuan ka savatê chu a nâk veilamah a vit ta thawih mai a! Ka rak ṭhawt..ka lo rak chhuak ta hial a! Hah zetin ka hawi kual a, ka lûng a phu dup dup mai. Ka mut lah chu namên loin a la chhuak tho bawk si. Mahse, maimizial nia ka hriat avangin ka khum bula tui chu ka in ta khawlh khawlh a. Harh ka duh. Ka muhil ngam tawh lo. Ka tho a. Tuilum ka va in nghek. Ka lû erawh a nâ bûr mai.

Thlan laih ve hram ka duh bakah Heleni hmuh lawk ka duh. Tukṭhuan chu ka namnul liam deuh tawp. Ka ei tlem viau. Mumang ngawr ngawr khan min tibuai. Phur fahran lovin ka insiam a. Sangmuana chaw ka pek zawhah muangmarin ka chhuak leh ta hnak hnak a. Damdawi in veng lam thlanmualah khan laih tur a ni. Zoa erawh a lo la mu burh burh mai. A tlaivar chiang bawk a, a chau tawngkhawng ve deuh a niang e. Kalpui pawh nei lem loin ka chhukthla hnak hnak a. 

Heleni ka call ta a. 

"A haw phei tawh. Zin an tum leh tum loh ka la hre bîk lo" a rawn ti a. 

"Lo hriat tum vat teh aw..khawngaihin" ka ti a. Thu hi a awih thei viau zel a. A lawmawm e. Hriatpuia ka call leh nghal zat, "I tho ve thei maw?" Ka tih chuan, "Ka lû a na tawp..thlan laih i tum em?" A ti a. 

"Tum e, insiam rawh nang pawh" ka ti a. 

"Aw..chaw ka'n bar zuai ang e aw. Ka lo kal ang" a ti sawk sawk a. 

"Aw le" tiin ka dah ta a. 

Khawi danga pêng tawh loin thlanmual lam ka pan a. Msa te ka han umpha hlauh a, an rualin ka kal ve ta a. Kan thleng a, kan tam kher mai. Ka nu sawi ve ziah, "Fai piakte khan i rawn haw ang e aw" a tih hi thlan ka laih chuan ka hrechhuak ve ziah. Thlan lai hmingpu ve si, thlan chhungah tak ngial pawh luh loh chu thlan laiah a ngai tehchiam lo ni tur a ni. 

Lei a hnip ṭha bawk a, laih pawh kan lai rei lem lo. Kan ṭhahnem bawk nen, thlan khurah vawi khat chiah ka lut! A nuam lo letling zawk. Fiamthu nen kan ri huau huau a, Mizo society-a bet tlat chu kan ṭhian, kan pi leh pu, kan unau te thlan chu hlim takin kan laihsak a, kan hun a thlen ve hunah kan ṭhiante bawkin hlim takin min rawn thlah liam ve dawn a ni. Huat leh lungloha lâk chi pawh a ni lem lo e. 

Ruang kan nghah laiin Heleni'n min lo call ta a. 

"An zin dawn. An insiam mêk. Mahse, phum zawhah a niang" a rawn ti ta a. 

"I bulah sawi a nei em?" Ka tih chuan, "Nei lo. Bakah Nu Diki'n a veng run maiin ka hria..a mitmei reng a" a tih chuan ka sa zawk. Mahse, ka inbengdai leh hram. 

Hriatpuia kha a rawn kal ta miah lo. Chhan dang vangte pawh a ni mahna le..zaninah hian eng nge thleng dawn tih tuman kan hre lo. Engkim hi risk a ni. Chu risk umzui tur chuan mi mawl ber anga ka chet pawh a ngai mahna..engmah ka pawisa tawh lo ve. 

Ruang a rawn thleng a, mi nawlpui hawn hnuah thlan kan vur leh vek a. Hmanhmawh lo takin mi hnukhawiah ka haw thla ve hnak hnak a. Ṭhiante nen kan in hlat ta deuh maw tihah ka phone phawrhin, ka hmet kauh kauh a. 

"Hello' a rawn tih chuan, "U Kai, zaninah sa a zâwnga sa nghal ber mai chu i châng ang aw" ka ti thâwp sup a. 

Thawk la hawkin, "Ka inring reng e" a rawn ti nghet charh. 

Ni e, U Kaia nena nizana mitthi in singsaa kan va kal khân, kan singsak zawhah kawtah kan ṭhu dun a. 

Midang hriat phak loh tur khawpa zâwi hian, "Muansangzuali nen in thla latu kha Hriatpuia a ni tiraw? Ti nge kei i û bulah zêp i neih? Hlimpuii borâl aṭanga Johna ruang an hmuh inkar chhung zawngah hian i ṭhianpa Hriatpuia mizia hi a danglam nasa tih i hria em? Sa kan va chân dun khan ka chiang ngam chiah" a ti sur sur a nih kha..buichhia laih lohin ka inpuan phah a. A tâwp thlenga min thawhpui turin a intiam ta hial a nih kha..mahse, lângsar taka kan inzawma kan inmitmei erawh a rem lo thung. Ni e, U Kaia hi mi â a lo ni reng reng lo. A phak ang tâwka a thil lo chîk dan kha a chhuanawm ka ti lutuk. A rinhlelhna bul ber erawh mak deuh a ni. Zopui khuain thaw ri hulh hulh an hriat ṭhin lai khan, ani U Kaia hi zan lên dêngin a lo kal daih a. Ani a deng hlawhchham tlawmla lutuk chu zing dar 2 bawr vel thleng a deng ta mai a. Khua a rawn thlena Aidu veng lam aṭanga rawn short cut chuan, Aidu veng hmâwr lama in lian lo tak, in rawp tawh lam sir lam aṭanga Hriatpuia rawn chhuak chho hi a va hmu ta a. Ani Hriatpuia erawh chuan hmu loin hmalam panin a kal ta a. A tukah kha lai veng ami ten thaw ri an hriat thu an sawi tâkah chuan U Kaia chuan zing dar 2 bawr vela a mi hmuh kha a hrechhuak lo thei ta lo a ni. Mahse, tuma bula sawi lovin chutianga a chet chhan hriat a duh avangin Hriatpuia chu a hnaih hret hret a, a hmain Julie avangin an lo innêl sa bawk nen..Tichuan, fiahna êm chu nei lo mah se; a lo ringhlel ve tawp mai a ni. Keiin engkim ka hrilh ta bawk nen..U Kaia nen tuman an hriat ve loh hna chu kan thawk ṭan dawn ta a nih hi..

Vanduaithlak tâk leh hlauhthawnâwm siin ka savatê Muansangzuali chu tawktarhah kan hman a ngai tlat bawk si…huiham..