Saidingpuii last

Dr. SAIDINGPUII (14)

Ziaktu: Toni Râlte

Tei chuan, "Mam, lo chho vat teh, Ropuia zuruiin buaina a siam nasa mai, U Saidingi pawh a khawih a nia" a rawn tih chuan ka nghing dawt a ni ber e. Valtea lah tukinah khan a thiante accident an serious deuh vangin thlah pawh inthlah mumal hman lohin a hawng si. Hruaia bulah, "Chho ang" ka ti nghut a, ka mitmeng atang chuan a manthiam nge zawhna pawh min zawt ta bik lo chuan a rang arangin thlanmual chu kan chhuahsan ta a. Kan hmanhmawh bawk a, Damdawiin tlang pawh chu kan thleng rang viau. Doctori in thlang kawngpui, Damdawi dawr bulah chuan an lo ding khawm taih mai a. Damdawiin tlangah hian Ambulance Driver Sena te nupa, Pa muana te chhungkua bakah nurse te bak an awm lo va. A hmun hi a han fál deuh bawk nen, Ropuia chuan chet nuam a ti teh ang chu. Pawr zet hian a lo tawng lung lung a, Arema leh Biaka te pawh an lo awm ve. Ropuia chu Pa Muana leh Sawmpuia ten an lo chelh mek a, a laiah chuan Saidingi a lo ding ran bawk. A sam a hnawk niaih a, ka ngaihbel nge a biang veilam chu a vúngin ka hria. Tei pawh thlabar hmel zetin a lo awm bawk a, Hlimi leh U Rengi te pawh an lo ding. Sena chu a awm lo a ni maithei. 

Ropuia'n min hmuh rual chuan, "Zawngchhepa, nangmah vang vek a nih hi, i hria em? " a lo ti nghal tuar a. Ka va pan nghal nal nal, Saidingi bulah dingin, "Kut a thlak che em?" ka ti nghut a. Saidingi chu a bu nghat. Thil dang sawi leh vak tur a awmin ka hre lo. Ropuia hmaah chuan va dingin, "Insual ang. Pa muan, thlah r'u" ka ti ta a.

Tei'n ,"Mam" a lo ti tham tiak. 

"Hmanni lawka rawn awm ve si, boruak i ngam mah mah deuh e. Thianpa, tharumin bul i tan a, tharum bawkin a tawp kan khar ang" tiin ka kut ka hum ruh ta nghal a. Ngaihnep hmel zeta min nuih sáwng chungin, "Thingtlang tlangval satliah, Driver naran hian doctor te min cho ve a maw?" a ti thur thur a. A mit sen rúm danah a rui hle tih a lang. Zing zu a inte pawh a niang e. Saidingi vanga mi pahnih ka sualna tur a nih ngei dawn hi. Min rawn khawih hun ka nghak thei tawh lo, ka pan hnai set sawt a, ka hnek dak awrh, kan intiat viau naa, kei aiin a thau deuh a. Thahrui erawh ka nei zawk ang. Ka chiang. A hnunglamah a pai khut khut a, a kid te pahnih Arema leh Biaka te chu an rawn che ve nghal zawk a. Mahse, Hruaia leh Sawmpuia an rawn thleng rang viau. Hruaia phei chu insual thang, a naupanlai pawha amah aia u te pawn an hlauh tlawn thin kha a ni bawk a. Arema te ang zurui satliah chuan khan lo mai mai tak an ni. Kei erawh chuan Ropuia ka bitum ngat ngat, ka hnek tluk tawh hnu pawn vawi 3 ka hnek leh siah siah a, che thei hek lo, a hnar te chu a thi nuaih tawh. Pa Muana'n ,"Ruatpui, a tawk e. A tawk e..kha a hneh lo che a nih kha" tiin min rawn thelh ta nge nge a. Ka thisen a lum tan dawn chiah asin le. Mahse, Tei bakah U Rengi te pawn min rawn khap nasat èm vangin ka thawhsan ta a. Leiah a mu tlawn reng mai. Chhe zawr lutuk mai..

Saidingi ka pan a, "Chho ang" ka ti sup. A mitmeng ka chhiar thiam lo. 

Hruaia chuan Arema leh Biaka te chu, "Zahpuiawm lutuk, a sum in ei theih vangin a uitea tan pawh in hnial lo a nia. Tenawm hel hul lutuk, a inah hruai thla vat r'u. " a ti khur khur a. An hnial ngam miah nang. Saidingi in lamah awm ve dangte nen chuan kan chho ta dial a. Pa Muana nupui Nu Engi a phun zui hlak hlak mai. 

Kan luh hnu chuan Tei chu thil awmzia ka zawt chiang ta a. 

"A zing zu rui kha tukthuan kan ei laiin a rawn lut a. A rawn ánkhum chiam chiam ringawt a, ka phalna la loin ka phone in khawih a, i bialpa pawh hi ka la tukzal ang. Ka report vaih chuan a nasa lo viau ang te a tia. U Saidingi hi chuan a chhang lem lo. A zu chhuk leh a. Kan ei kham tawh hnuah rawn chho lehin kei chu ka insu a, U Saidingi rooma awm kha a luhchilh a, kut a thlak ta mai a ni. U Saidingi au thawmah ka hre chauh a, Pa Muana te ka ko ta vat hlawm a, an hruai chhuak thei ta hram a nih kha. Ramsa a ni ringawt, a rapthlak lutuk" a ti bawrh bawrh a. A aw atang pawn a la thlabar hle niin a lang. Saidingi biang chu a vúng nasa ta riau a, a kamsir pawh a thi ser ser mai. Tui khalin a biang chu a dep a, a kamsir erawh U Rengi'n damdawi a hnawihsak thung. Kan han thleng chho hma chu a tihzia viau. Arema leh Biaka te kha an awm ve tlat si a, Pa Muana thleng theng chuan kut thlak an lo tum a niawm a. He lai tlangah mipa an awm tam si lo. Ramropuia chu a hnawksak takzet ta. 

Hlimi chuan, "A á vek tawhin ka hria. A mitmeng pawh hi, kei chu mi râp riau" a lo ti ve sap a. 

U Rengi pawh chuan, "Kan hnemhnanpui chuang lo ee, sawn leh daih se ka ti, min tirálti, zu a duh bawk si" a lo ti bawk. 

Saidingi chuan a aw thian kharhin, "VCP khu a pu a nia, chutimai chuan sawn a ni lo vang. Keimah hi buaina bul ka nia, insawn dil ila a tha zawk maithei a ni" a ti sap a. Ka melh nghek ringawt. A thutak ran a, eng emaw ngaihtuah run hmel a pu. 

Pa Muana'n, "I ti ang lo em mai a. I chhuah daihin" a lo ti vut. 

Saidingi chuan, "Vawiin hi raipuar inentir ni a nia, an la rawn lang hman lo chu a tihzia e. Ka'n insiam ang e, in hna theuh thawk leh tawh rawh u. An rawn kal tep ang. U Reng, Damdawi kha lo dah chhuak sa mai rawh aw. " a ti leh ta zung zung a. Kan hrilhhai lek lek zawk. Zirtawpni hi raipuar inentirni a ni a. A bak ni dang zawng hi chu OPD a ni deuh mai. Mahse, khua a lian tham lo bawk a, inentir hi chutin an awm reng bik lo. Keini chu min rawn melh zawkin, "A tha vek tawh e. Zu lai leh tawh r'u, a rawn dikdák ngam tawh lo vang" a ti a. 

"Ka peih tawh lo e a" ka ti hmuk. Amah Saidingi lakah chuan a chhan ka hriat si lohin ka lungawi lo ve ringawt. A mak thei. Min melh zawk a, "Nih tihian lo awm u la, ka zuk en sawk sawk ang a, thingpuite kan in dawn nia" a ti ve mai a. Ka bu nghut ringawt. Hruaia pawh chu a let peih chiah tawh lo nge a thu ve ta reng e. Ropuia hnek ve a chakzia a sawi sup sup kha. Saidingi a chhuk a, Tei'n a insuk a pho a, TV kan lo en mai mai. Kan VCP a rawn lut ta hlawl mai a. A mitmengin ngaihno a bei tehchiam lo khawp mai. Ropuia ten an zu bia tih hriat reng. VC secretary Dina a rawn lang ve zat bawk. 

"Ruatpui, hei a lawmawm loh viau mai. Kan doctor thar in lo khawih rawn chiam a niawm a. A lungawi loin min rawn bia a, Police koh a rilruk hial a, mahse, kan khaw tlangval in ni tiin ka khap bet thei hram a. Eng nge inbuaina ni reng reng a,." a ti ta chiah rêng a. Hruaia ter at chu ka mitmei vat. 

Ka thu tha a, "Pu Ramte, a zia lo khawp mai. Mahse, kan khawih rawn lo ve. Mita hmutu an awm nual mai. Keimah nen kan insual a nih kha, a chhan pawh Ka bialnu Saidingpuii kut a lo thlak avangin" ka ti nghet ta charh a. A mitmeng a buai ve nak mai. Mahse, tlawm duh ta lo chuan, "Aa..in insawithiam ve ve si a, in lo khawih na riau a niawm a. Chutia sawifel chi a nih loh chuan police kan pun mai dawn mi?" a ti ta a. 

."A lawmawm viau zawk ang, Police ngeiin rawn enfiah se. A hna thleng hian a tuar hial maithei a ni. A zing zuruiin doctori kut a lo thlak ngawt kha case a tling tawh sa" ka ti ta hmiah a. Chutia ngam sárha ka han tih chuan a buai ru hle tih a lang. Ka zám duh der si lo, zám tur pawh ka ni lo rêng a. Ka dik lohna ka hre tlat lo, ka bialnu thlavang hauha kutthlaktu ka khawihlet hi sual a nih chuan misual ka ni mai ang. A ho sihsah êm mai. 

"Amah Ropuia pawh kan zuk hmu ve reng reng ang e, khawtlang mualphona a nia, khawtual miin hetia doctor rawn awm thar lo khawih zêk chu..a khaw pum mualphoin kan mualpho thei tlat. Ngaihdam dil mai hi a finthlak" a ti leh hmuk a. An motor ka khalh laia min duhsak ang kha a ni ta lo khawp mai. Mahse, khawtlang hruaitu a ni a, zahpah lo leh chaltlai taka biak chu ka duh bik lo. 

"Aa..pu Ramte, ngaihdam dilna chhan tur ka neiin ka hre tlat lo. Ni e, zuk hmu ve phawt teh u" ka ti a. An chhuak zui nghal. Hruaia a phun zui nang nang mai. Thingpui in turin Saidingi a rawn chho a, Chanchin kan lo hrilh ve a. A nui hak mai. "Police chu ko lo mah se, ka ko tawh..keiman" a ti ta mai a..a sawi miah si lo. 

"Engtikah" ka lo ti vat. 

A sana bih zauhin, "An lo thleng tep ang" a ti nghat a. 

Hruaia nen chhuk tuma kan intintuah laiin Police chu an rawn thleng ta a. Ramropuia chu a quarter atangin an zu la chhuak ta a. A pawr kher mai, a thiamthu lah chu a sawi zut zut bawk a. MAhse, thiamthu tihtlak a ni meuh lo. Zu rui chungin mi inah a lut a, inneitunu kut a thlak a, engti zawng pawhin han sawithiam ngaihna a awm lo. Vcp pawh a hawihil viau, han tih vak dan a hre si lo, "Ani hi in lak dawn chuan Ruatpuia leh Hruaia hi inlak ve a ngai ang. Kut an thlak alawm" tih mai mai. Saidingi'n ,"Pu Ramte, i zahawm viau naa, i tupa hi hum tum duh suh. Ruatpuia kha chuan a bialnu ka nih angin kut a thlak a nih kha.. " a ti hmiah mai. Police te chuan an hruai ta vang vang. Kan thaw huai e. keini pawh kan chhuk thla ta a. Ka ní te bulah pawh engkim ka hrilh ta vek a. 

Ka inbual zawhah Pa Rema chuan, "I patea chu kan va bia a. A lawm vur vur khawp mai. Karthar nilaini zanah va len an tum a nih awm chu" a ti ta a. Ngaihzawng nei ngai lo a thuchàng, ka'n zak leh hnuhnawh a. Ka phi sek mai. Saidingi pawh ka hrilh a. A chhungte a lo hrilh ve mai ang chu maw.

"Zin chhuahna tur a awm vak lo bawk a, intuak rih ka duh dawn a. Zawlseiah ka farnu makimi pasal kha mistiri a nia, a helperah ka va tang dawn mawni ka tia. Eng nge buaina te a awm ang em?" ka tih chuan, "Awm hran lo e. Mahse, zawlsei daih daihah chuan ngaihtuah i va na dawn ve. Intuak vak a ngai em ni" a rawn ti a.

"Ngai ve e. In milian sia, ropui deuha lawm vete pawh a ngai dawn asin" ka ti a. 

"Ka pawisa puk mai la" te chu a rawn tia. "Aih, ka duh bik teuh lo" ka ti ve tlat. Kan inrem dawn leh dawn loh pawh hre hawt loin kan han tawng vel chu a nia. Ngaih chu a tha hle a nih dawn hi. Ramropuia pawh case siamsak niin a hnain a tawrh mai bakah jail a tan a ngai dawn. Hnawksak ni lo se khawngaih thlate pawh a la tur, mahse, a chetdan a hlauhawm riau a. Dahbo vat mai hi a finthlak awm e. Hetih rual hian a pu VCP Pu Ramtea te ngaihdan a ni lo kher mai a. An tihtheih tawk ti vein Doctori zu in thin thu an sawi darh ta ngei e. A tira ka lo rinlawk a ni bawk a, min thawng vak lo. Daisy nu te, Duati nu te bakah Pi Chawii te ho sawi nuam tihzawng tak a lo nia. Hmunpui lama hotu liante hnena doctori sawn dilna thehluh te pawh an sawi barh barh mai. Mahse, Kan khawtlang mihring hmun thuma thena hmun hnih chu Saidingi lamtang kan ni. A hnuaia thawkte hlei hleiin a thlavang hauh an tina. 

"A mimal nun chu engpawhnni rawh se, a duh leh a thawhchhuahsa hmangin zu chu rui ang hmiang, a zu in avanga a duty a hlen lohna sawi tur hre mang si lo va, a zu ruih vang maia hetiang doctor thiam leh fel lutuk in sawn chhuak a nih chuan kan khawtlang chu thuang hnihin kan kal kumkhua tawh ang" tih chu Branch YMA pathumte thutlukna a ni rup mai. NGO lian ber YMA chu do ngam hek lo le, awmhmuna rêla sawichhiat ngawt bak tihtheih an nei ta lo. Lohtheih lohin kei leh ani inlaichinna pawh chu pholan loh theih loh a lo ni ta bawk a. MAwi lo leh zahpuiawm takin kan khawsa ngai der si lo, kei thleng thlenga min hmer tel tum sateh mah se; min tantu hi ka rin aiin an lo tam a. Kan tawnga kan auchhuah ve ngai loin min eptute chu an hmetmit thei a ni deuh mai e. Doctori lah a kal ngaiin a kal zel a, "Zu ka in ngai lo" pawh a ti chuang lo. A mawhphurhna a hlen a, a tawk viau mai. Ni e, ka bialnu a nih vang ni loin kan khuaah hian PHC din a nih atangin doctor pathum kan hrawn tawh a. Pakhatna kha mipa a ni a, a fel viau nain mipat hmeichhiatna lamah a hming a chhe palh hlauh mai a, a nupuite lamin sawn chhuah an dil ta kha a nia. A dawt leh ami kha hmeichhia tho niin sawi tawh ang khan zahawm a tum luatah a inkhar khip a, damlo tan pawh hlauh tlawn ngai ang chi, tumah zahpah lem lo va tawngkhum bawl bawl ching kha a ni a. Hmunpui lam an pan phah nasa. Saidingi a rawn thawh ve atang chiah hian damlo pawh inentir an tamin, Dentist a ni lo nachungin ha lam thlengte, Ortho lam thleng te pawn an entir sup sup mai chu a nih hi. Tin, a bial a fang peih a, Zote leh Zawlsei khawtlangte pawn an fak em em a ni. A mimal nun lo kher ve sek kha a tul hranpa lo, amaherawhchu, a hna leh nihna avang chuan zu han in chu thil mawi a ni hauh lo tih ka hria. Chuvanga simtir tum em em pawh ka ni. A sim ngei ang tih pawh ka chiang, dik tak chuan a tunhma nun ngaihtuahin a stress lutuk te, a rilru kalding lutuk tur ven nana a lo lem ve zauh pawh hi a demawm em em hran loh. A thil tawnte kha a namai bik lo bawk a ni. 

Kei pawh ka lo sawi lawk tawh angin Zawlsei lama phei tur chuan ka intintuah a. Ka awm loh chhung chu Hruaia'n a lo khalhsak mai aniang chu. An innel ve tawh tho bawk a. Amah Saidingi chuan min ngaih luat vang nge ka kal dawnte kha chuan a túm ang bár a. Intuak vel kha tul a ti vak lo a nih hmel. Mahse, tul ka ti tlat a ni. Patea nen pawh kan inbia a, theihtawpa a lo tan ve tur thute pawh a sawi kha a..tin, ka nu ú pu Zaia te nupa pawn an theihtawka insen an huam thute pawh an sawi ve bawk. Saidingi chhungte lam hi lo rem lo ta se ka zak ngawt ang. Amah hian a ngaih awlsam êm vangin a nia hetia palai tirh a hmaa ka inpuahchah vak ni. Zawlseia ka phei zanah Patea leh an thenawmpa te chu Saidingi te in lamah chuan an va leng ta a. Ka helhhawlh nge ka za sek mai. Makimi ten min nuih min nuih mai. Ka pahrawn ka nu pasal kha Pa Hminga a ni a. An fapa naupangber nen chauha an khawsa tur chu ngaingam loin Makimi pasal chhungte remtihnain Makimi te chhungkuain an va fin ta rih a. Makimi te hian fapa hlir pathum, harh zet zet an nei a, kan ni nuai mai. A khawharthlak vak loh. Makimi pasal hi Lianmawia a ni a. Mawia kan ti mai a, kei aiin a la nau ve lehchhawng a, mahse, hnathawh leh engiloah chuan ka tluk lo khawp mai. Tawng tam lo tak, mi pawisawi lo tak a ni a, mi pawh a zahthiam ve hle. Dar 9 velah Patea chuan min rawn be ta a, "Aa..mi tihdan ang tho a ni e. Chhungkua kan lo inrawnkhawm ang a tiin kan inthlah a. Kartawpah kan va leng leh ang chu, ka beisei ai daihin min lo dawngsawng tha e" a rawn ti ta a. Ka khi vur vur mai. Doctori pawh ka va hrilh ve a, ani chuan a hma lama inneih a duh. ENgvanga hmanhmawh ta thut nge a nih pawh ka hre bik lo e a. 

Mawia nen chuan an pastor quarter sakna lamah kan inzui ve ta det det zel a. Hna a thiamin vai ho anga phakarna nun nei lo ang kha a nia. A helpera tan pawh a nuam viau mai. Saidingi nen zing thawh hlim, chhun chawlh leh zan mut dawnah kan inbe ngei ngei zel a. Kan awmdun loh vang nimaw thlakhlelh a na zual..

Palai an kal leh dawn zinga kan inbiak chuan, "Hlimi pawh a bialpa khan a rawn luhkhung a. " a ti a. Hnawksak thei tur ang ang chu an dai tan e. 

"A va tha ve, a mualpho leh kha a hlauhawm sia" ka ti mai a. 

"Tunah chuan hnawksak tih pakhat chiah ka nei tawh" a rawn tih chuan, makti ru deuhin, "Tu?" ka ti hú a. 

"Ruthi mawle..inla inbe zeuh zeuh tih ka hria a nia aw" a ti ta a. Ka nui hawk. Ni dawn tak, Ruthi nen hian inbe reng chu kan ni lo naa, a khat tawka min rawn call emaw min rawn text emaw hi a la ching a. Ka lo chhang ve mai zel bawk a. Doctori ngaih a lo tha lo tihna a nih chu. 

"Zanina palaite thu hawn dan azirin nupui ka neih tur thu ka lo hrilh ang. A tha em?" ka ti a. 

"A lo biak che pawn chhang tawh lo la a tha a ni mai..mipa leh hmeichhia inbiak reng chuan thil awm a awm mai zel, ka chiang" a ti chang fak a. 

"Aw ka lo be tawh lo vang" ka ti duam a. Ka hnial vaih chuan inhauh kan tan leh dawn sia, a buaithlak. Ruthi kher hi chu hetiang lam zawng hian ka en lo ve lutuk a, a thik pawh hian ka nuih a za zawk thin. Mahse, nia a sawi dik ve tho. Mipa leh hmeichhia, thian tha ni bawk si lo han inbiak kur dup reng chuan feelings hi a lo piang ve mai zel. Chutiang chiah chuan kan tawngtai tama Pathian kan auh tam hi chuan Pathian nen kan inzawmna pawh a that theih êm hi maw..

Pastor quarter kan thleng phei a, min hre ve tawh hlawm viau. An fel a, fiamthu an thawh bawrh bawrh a, min en mikhual vak lo. Ka hlawh hi chu a hlawma lakah tiin Makimi kutah ka dah mai zel a. Hmanna tur em em ka nei lo bawk nen. Chhun chawlh lai chuan ka bialnu chu ka call a, a la thei lo. Vawi 3 ka call hnu pawn a la thei si lo va, a buai deuh a niang ka ti mai a. Mahse, chhun chawlhah hi chuan a indah free ve ziah sia, mak ka ti ru deuh. Tei call ka tum lai takin amah Tei zawkin min lo call ta a. 

"Mam, U Saidingi a zin thut a, Zoteah..a phone a theihnghilh lehnghal. I lo call khan ka lak dawn veleh a tawp daih a" a rawn ti a. 

"Tuin nge hruai?" ka ti vat. 

"Hruaia nen an kal. E chuan, Asha kha ka tling ve aw. Hlawh tam lo mah se, a zia ve êm a" a ti hliai a. 

"Ka va lawmpui che ve..aw..a nih chuan ka dah rih ang aw" tiin ka dah ta a. An zin dawnte chuan msg tal pawn rawn sawi awm ka ti deuh. Mahse, an hmanhmawh viau a nih hmel. 

Fiamthu duh zet mai Lala kan tih mai chuan, "Ruata zawng i babu mai dawn chu a niah! Kei pawh nurse chhai tur hi ka duh riau a ni. Tun laiah chuan min chawm thei tur nupui hi melh mai tawh chi" a ti a, a nui súng bawk.

Kamlova chuan, "Dik chiah, kan hmeichhiate hi an tang tawh nasa si a, mipa lah ruihhlo leh a kaihhnawih vang hian kan hniam tulh tulh lehnghal. Office pawh hi han dawr ila, hmeichhia hi an lo thu tam zawk zel tawh mai..nula senior tamna chhante pawh hi heng vang hi a niin ka hria" thutak angreng tak hian a lo ti a. Ngaihtuah a tithui viau, a tawngmawh ber Mawia pawh chuan, "Saw Julie te pawh saw pasal neih peih tawh miah loh saw, aman sum a thawkchhuak tam si, an inah a lalin a awm nuam bawk sia, pasal neiha mi dang va hrawn leh chu ka peih tawh lo a tih hmiah kha. Tiang reng a nih chuan kan nulate hian sawn pawma pasal nei lova fa neih hi an la duhtawk hmiah ang" a ti ve chuar chuar a.

Kamlova chuan,"Tiang leh em em hi chu tha ka ti chuang miah lo, Pathianin chi thlahpung turin min tia, lentar lo tum ngawt hi chu a kristian zia lo deuh ka tia. Mahse, sawi leh sawi hnu, mipa lam hi chu kan tan deuh chu a ngai a ni. Thingtlang lam hi chu kan la zia viau a, sawrkar hna thawk lem lo pawn kan thawh theih ang ang kan la thawk a. Khawpui thalai tam zawk hi chu inah hian nalh deuh hian an awm reng ni mai hian ka hria. Games an atchilh a, Fb tih velahte hian eng nge ni kha..troll an ti mi. Khatiang khan an páwt zuah zuah a. Hmeichhe thenkhat an zuam zawngte an sêl vak vak bawk a. Hmeichhia kei ka ni inti ve chin tan chuan neih hi kan chakawm loh ve ngawt ang, an lo intodelh thlip thlep tawh bawk nen" a ti duah a. A vei ve hle niin ka hria. Kei Social media hi ka khawih tam lem loh vangin a sawi ang vel chu ka hre tam ve lem lo va. 

"A dik reng mai. Amaherawhchu, hmeichhe lam pawh thawhchhuah ka nei e tih vanga mipa chaldelh leh thuhnuai tum ve ringawt hi an awm ve cháwk a, hetiangho hi chu eng ni lo mah ila neih tlakah ka ngai mang bar lo" ka ti ve a. Kan khuaa Sawmi ka hrechhuak lo thei lo. Nula hmeltha tak chu a ni lem lo va, mahse, High Schoolah thawkin a hlawh a tam a, a han hausak tak deuh hnu khan kan khaw tlangvalah khan amah phú zo kha kan awm ta tlat lo pek a. Tupawh mai kha a enhniamin a thu thua dahtheih emaw a ti ni maiin ka hria. Tlangval lam pawn kan ngaihven ta lo rêng a. A tawpah Aizawl tlangval, ngo piak puak, hmel chu tha angreng tak a nei ta a. Kum 1 pawh an inneih hmain a pasal kut a tawrh tak reng vang leh ngaihzawngte hial a neihsan vangin an inthen ta kha a nia. Kutthlak kha tha ka ti miah lo naa, a pasal khan, "Kutthlak loh theih lohin a khawsa a, mipa ka nihna ang pawh ni lo pasal ka nihna ang pawn min zah hlek si lo va, ka nei peih tawh lo" a ti hmiah mai a ni. Tun laiah hmeichhe dinhmun chawisanna an uar em em a, he dán hmanga mipate min palzút an han tum ngawt mai zel hi chu mipa rilru atang chuan ngeiawm tak a ni ve. Engtik khawtikah mah mipa leh hmeichhia hi kan dinhmun a inang thei dawn lo. Chutihrualin mipa mawlmang ve tak, hmeichhia an nih vanga ngainepa hnuaichhiah tum tlat an awm thin. Hetiang mite hi chu an seilenna chhungkua hi han zir chiang ila, thilmak a ni vak lo. Chhungkuaah chuan Pa berin rorel se, Nuin backup bawk se, a kal dikin chhungkua a zahawm mai. Arpa aia arpui a khuan rin zawkna in chhung nuam tak a awm ngai lo. Chutihrualin mipate hian kan mawhphurhna hi kan hlena zahtlaka kan khawsak erawh a ngai. 

Saidingi ka duh em emna pakhat chu, Vawikhat an duty laiin damdawiina pangpar khawina tur ka siam a. A thawhpuite bulah, "Ka thuhnuaia ka dah theih mipa ka ngaisang ngai lo, ka ngaihsan loh mihring chu ka zah thei lo bawk ang. Mipa chu mipa ni tawp se, mipa nihnain a kentel mawhphurhna hlen se, min zah rawh a tih a tih a ngai lo. Ka zah em em ang" a ti a. Ka rilruin ka vawng rauh rauh mai. Doctor a ni a, a hlawh pawh a tam, chapo thei pawh a ni. Mahse, a thil thlir dan kha a fingin a dik ka tia..ka duh phah sauh mai a ni. 

Zanriah ei hma deuhin ka inbual zo ka lu ka hruk hul laiin a lo call ta a. Ka la rang teh e. 

"Zoteah kan kal a, phone ka theihnghilh daih alawm. Min lo ngai em?" a ti a. A aw chu a dik lo tlatin ka hria. A sehchilh deuh bawk nen, ngaihtha fahran lo hian, "Ngai e. A va pawimawh awm ve, zin thut chu" ka ti ve mai a. 

"Nia, min lo ko thut a" a ti ringawt. Ka ngaihbel nge a tîm ru tlat. 

"I tha em?" ka ti a. 

"Umn ka tha" a ti hmuk a. 

"I harhfim tiraw?" ka tih chuan a reh dat a, "Ruatpui,..ka tihpalh. " a ti ta a. Ka ner sawk. Zu a in leh a maw?!

"Engvang nge?" ka ti nghek. Makimi'n min rawn melh vat mai. Pindanah ka lut ta a. 

"Englo a nia,Johny kha inawhhlum a lo tum a. Mahse, an chhan hman a niawm e" a ti ta a. Ka na zawk mai. 

"Aw le" ka ti ringawt. 

"Thinrim suh, amah ka ngaihtuah vang a ni lo, nasa takin min rawn vau a. Nang ka nei che a nih chuan a thih tur thu..chuan, ka neih tur thu che ka sawi a, tikhan intihhlum a lo tum a" a ti mawlh mawlh a. 

"A thih dawn ai chuan min neih loh i thlang ta a" ka ti nghut. 

"Doctor ka ni a, nunna hlutzia ka hria asin. Keimah vanga nunna chân an awm ka duh lo" a ti ta a. Na ti em emin, 'Aw le, ka patea ka lo bia ang a. Zanin chu thulh turin ka lo hrilh ang e" ka ti nghet churh a. 

"Ruatpui" a ti tham tiak. 

"Engkim i sawi a. Ka lawm e. A nih phawt le" tiin ka dah ta a. Ka natzia chu sawifiah mai chi a ni lo. Ka sa pup pup a, ka bíng mum mum mai. Makimi'n chaw ei turin min rawn ko a, "Nakinah ka ei ang. Ka chák rih lo" ka ti ta ngawt a. Ka awmdanah chaw lem lui thei rual ka ni mawlh lo ve. In atangin ka chhuak a, kalna tur lam pawh hre loin ka hma zawnah ka pen pawp pawp, ka mittui a hnám thei nia. Ka zak êm a ni. A hun a thleng dawn tihin hnar ka ni leh ta chu e.. Mi dangin hria se min va hmusit dawn tehlul êm..intuak pawh tulin ka hre ta lo va, hawn mai ka duh. Teii'n a lo call a, lak loj ka tum zet naa, ka la lo thei lo. 

"Mam, Doctori dinhmun hi hrethiam la, a hnar che a ni lo a nia. Tlem nghak hret turin a duh mai che a ni" a ti nghal táwng a. Doctorin a hrilh tawh a nih hmel.

"Haw rawn, Tei, chhuk rawh. Kha nu bulah khan awm suh" ka ti hmiah.

"I á em mai, fim deuhin ngaihtuah rawh. Doctori thutlukna a ni lo, U Saidingi chhungkhat ten a mualphothlak an tih vangin nghak hret turin an duh zawk che alawm" a ti leh a. Ka dam zo chuang lo. 

"Engkim tawp rawh se, chutia kaihkual mai mai theih ka ni lo" ka ti hmuk a. Ka dah nghal daih. Ka patea ka call a, a la tlang thei lo zui. Pa Rema ka call leh a, engkim chu ka sawi fai ta vek a, "A va zia lo ve aw. Thihna leh nunna hi chu a serious ve bawk alawm. Mampui, Saidingi pawh a rilru a hrehawm viau ang, thutlukna siam rawp rawp suh" a ti nghut nghut a. 

"Aih, ka peih tawh lo. Engkim a nih tur ang a ni dawn tihah buaina bawk. Johny nen innei leh se a tha mai e. Kei pawh naktukah ka rawn haw ang, chuan Aizawlah patea te bulah ka va awm rih ang e" ka ti hmawk hmawk a. Ka thinrim leh rilru nà avang chuan engkim chu ka zuam a ni ber e. 

Saidingi pawn a rawn call nasa, ka la duh si lo. A hnuah phei chuan ka block ta vek a. Tei call pawh ka la duh lo. Johny a la care chuan na takin min hliam a ni. Duh leh lo thi ang hmiang, kan mawhphurhna a ni tawh lo. Makimi'n min lo call a, dar 9 a lo pel vah tawh. Middle schoolah ka lo awm reng a lo nia. Ka â huih a, ka kalna lam pawh ka lo chiang lo a ni. Min ngaihtuah lutuk ka hlauh avangin ka haw thla ta chhat chhat a. Ke pen a va záng mawh ve mawle..

Chaw pawh mangthat nan tal tiin bar hnih thum chu ka bar ve hram kha. An mitmenga zawhna chu ka chhang ngam rih lo, ka zak rih êm mai. Khum ka deh rualin mut dawn apianga ka biak thin nen kan inbe ta lo chuan min tina a..ka chhing vang vang..Johnyan heti em ema a la beiseia a la hauh hi amah Saidingi pawh hian beiseina a pe a ni mahna le..ngaihtuahna kaipeng thei thil reng reng a awm si lo. Ka hui leh pawp thin. Tlangvala pumpa ka va chau ngai ve le..hunbi ka chhiar kauh kauh a, mutchhuah chu khawilamah. Dar 12 a ri lek lek tawh tihin kawtah motor a rawn inhúng dawt a. Ka meng kar mai. Kar loah kawngka chu an rawn kik ta a. Ka chechang peih lo. Pa Hminga'n a va hawng ta niin ka hria. 

"Khaw nge Ruatpuia" titu aw chuan mi deng dawt. He aw hi chu ka hai ngai lo vang. Pa Hminga'n ,"Ruatpui, lo tho teh. Hei Saidingi te an lo kal" a rawn ti ta a. Phur lo zetin ka thu chhuak a. Eng nge maw an lo tih dawn le..

Ka va chhuah phei chuan Hruaia, Tei leh Saidingi te chu an lo thu ran mai a. Mit nuai chawt chawt chungin, "Eng nge in lo tih dawn?" ka ti hmuk a. Saidingi chu a rawn ding a, min rawn panin, "Ka tihpalh" a ti sap a. Mitmeng ngui em emin min melh bawk. A tahna vang nge a mit pawh a pherh niaih a, a hmai a dáng lep bawk. 

"A tlai tawh" ka ti nghut a. 

"Khawngaihin" a ti leh hap. Mi dang an thu ve kur si..nuam ka ti lo. 

"Chumi thu sawi tur ringawt chuan maw in lo kal" ka ti hlur a. 

Hruaia chuan, "Thianpa, i hriatthiam a ngai. A dinhmun kha a khawlh lutuk. Johny khan lehkha te a lo hnutchhiah thlap a, Johny chhungte lamin hmalak hialte an tum asin. A thi hman ta lo hlauh zawk a, mahse, Doctori vanga thleng a ni tih an hre vek tawh. Doctori chhungte tan pawh ngaihchán mai loh kha chu duhthlan tur a awm rih lo a ni. Hrethiam rawh" a lo ti zung zung a. 

"A nunna i laksak dawn hleinem, amah leh amah a intihlum dawn a, a duhthlanna a ni. Tel vena i nei lo, i mawhphurhna a ni hek lo. Ti nge i a care tlat ? Va innei law law u la a ni mai lawm. Kei chu min ngaihtuah suh" ka ti ta duah a. Ka inhrithla a nih ber chu. 

"Ka tan engmah a ni tawh lo, mahse, Johny chhungte thiltihtheihzia i hre lo. Ka hna thleng hian a tawrh phah thei asin" Saidingi aw ah chuan ngenna a tel. Mahse, ka ngaipawimawh duh lo, "I hna chu chán mai la ti nia..i hna vanga ngaizawng che ka ni hleinem" ka ti leh hmiah. A insút hraih a. 

"Aw..a nih chuan, nangin min thena min kalbosan dawn ai chuan a rang thei ang berin kan innei ang a a ni mai lawm.." a ti nghat a. 

"Ka rilru i tihel vek tawh " ka ti hmuk thung. 

Makimi'n thingpui a va lum a. Awmdan tur pawh ka hre lo, Tei leh Hruaia'n min zilh malh malh a. Ka dik lohna ka hmu thei chuang lo. Ka dik miau a. Amah Saidingi chu ka dem em em a ni, ti nge a pasal hlui chu a la care a, a thih a hlauh em em. Ka lung hi a awi thei ngang lo a ni e. Ka bulah a rawn thu a, ka kut a rawn vuan. 

"Min ngaidam rawh. Khawngaihin..i lo hriatthiama min pawmpui ve mai ka lo beisei a, ka chhungte lah an hlauthawng si nen, ka dik lo a ni. Ka tihpalh takzet..Inthen ka duh lo. I nupui nih ka duh" a ti khur ta dat dat a. Ka chil ka lem khawlh. 

"Sawi tur pawh ka hre tawh lo" ka ti ringawt. A inchhir takzet tih a hmelah a lang bawk si. Ka la hel ve laklawh bawk si. Makimi thingpui rawn dah chuan, "Mam, khauh tung suh, tihsual te chu a awm ve tur alawm. Naktukah palai te pawh va leng leh se, inrem u la innei vat ru, buaina a tam hma hian" a lo ti ve a. 

Pa Hminga pawh chuan,"Ni e, kan sawi phak zawng a awm lo naa..inrem rawh u, hei inkhua atangin a zan azanin an rawn kal vang vang a nia. Ruata, fim tak khan ngaihtuah rawh" a lo ti ve bawk. 

Saidingi chuan, a phone phawrhin tu emaw a call a. Lehlam amiin a rawn lak chuan, "Pa, Ruatpuia nen kan sawidun leh a, a ranglama inneih kan duh a ni. Naktuk zingah Ruatpuia palaite rawn kal se, engkim lo sawifel mai ru aw. " a ti ta a. Min ràwn leh miah lo, mahse, ka na ut ut erawh a kiang hawk thei. Ka dik lohna erawh ka la hmu thei chuang lo. Thingpui an in zawh chuan Pa Hminga chuan, "Riak ve mai ru..a tlai tawh si..in haw leh chuan in mu hman lo vang" a lo ti a. 

Tei pawh chuan, "Nia, kei chu pawi ka ti lo. Ka mut a chhuak" a lo ti var a. Saidingi erawh chuan min melh ran a, ka mitmei a veng tih ka hre mai. 

Hruaia chu melhin, "Riak mai ta che u" ka ti sup a. A lo bu nghut mai. Ka khumah Tei leh Doctori an mu ang a, kei leh Hruaia chu thutthleng seiah kan mu thung dawn a ni. Ka nêm tawh reng naa, doctori bulah erawh ka la túm búr thung. Lungawi leh nghal mai anga lan kha ka tlawmla a ni ber mai. Muthmunah Hruaia chuan Zoteaa an va kalna lama zu an in dun dan a sawi a. 

"A rilru a hah ngang niin ka hria, a nuteii nge a ní in a lo biak reng thute, , Johny chhungten chetlak an tum dante, a mimal nun a zu in velte thlenga hotu sang hnena thlen an tum dan bakah ukil rawih an tum dan thleng ten a rawn sawi a nniang, chungte chu a sawi ve vek a. A phone pawh a theihnghilh luih thu a sawi alawm. Khatiang thu vel hriat kha a hne lutuk avangin..thianpa, engpawhnise, A hmangaih tak tak chein ka hria. Kan khua leh Zawlsei inkar kan rawn tlan chhung zawng pawn a tap char char" a ti mial mial a. Zantira ka natzia leh awmngaihna ka hriat bik loh thu erawh ka sawi duh ta bik lo. 

A tukah pawh tukthuan an ei ve nghal a. Makimi hi a fel thar thar thin khawp mai. Tei nen pawh an inpawh nghal viau mai. Kei pawh kan khaw lama hawn ka tum tehlul nen ka thulh ta rih mai. Zingkarah Patea ka be leh a, zingkara va len chúk chúk kha a buangbar kan tih avangin zaninah an va leng dawn a niawm e. Nizan khan ka call tlang thei si lo kha Pa Rema ten nuteii phone atanga lo biain leng lo turin an lo hrilh a lo nia. Zaninah erawh an hlawhtlin beisei ang. 

An haw dawn chuan pindanah kan pahnihin kan awm a. A inthlahrung lutuk chu ka khawngaih leh lo thei lo. "Va haw u la, chanchin engkim min rawn hrilh ve dawn nia. Johny chu ngaihven tawh lo la ka lawm viau ang. A awm awmin awmtir rawh" ka ti charh charh a. 

"Aw le, chuan lo haw vat rawh aw. " a ti sep a. 

"Ka la hlawh tlem lutuk a" ka ti mai a. 

"A pawi lo, ropui taka lawm búng búng ka duh lo. Sawm bik nei ila a tawk. " a ti a. 

"Aizawl atanga rawn kalte zo taka kan lo dawl ve a ngai alawm..mi hausa kan nih loh hi" ka ti kher a. A ner sak, "Aw le..aw lalber" boruak tihzangkhai tum takin a ti a. Ka nuih a za hran lo naa ka nui lui. Eng emaw a la awm rún a, hun kan la duh deuh dawn a nih hmel e. Pindan atanga a chhuah dawn chuan min rawn pan hnai a. "Min fawp dawn lo mi?" a ti sap a. Ka mitah a melh kar bawk. Ka kun hniam a, a hmuiah a fawp ta zauh a. "Zu in tawh suh ang che. " ka ti sup a. 

"Tun tum chu ka tiam tawh ang che. ZU ka in tawh lo vang" a ti nghet charh a. Ka ringtawk viau..ka fawp nawn leh a. Chhungrilah eng emaw a bet run mah se, hlim takin kan inthlah ti tawh mai ang. Buaina hi kan tawk a, rang taka kan chingfel leh thei nghal zel hi a nawmna a ni. Mahse, nizana ka nat anga nat leh kha chu ka duh tawh hauh lo. A rei lo naa, a ná em em a ni. 

A tawi zawngin sawi ila..Patea te pawh an va leng a, kan inrem thei ta. Inneih hun atan November ni 7 chu an ruat ta a. Thla khat erh awrh chauh inbuatsaihna hun kan nei a nih chu. A pawi lo e. Buaina dang a rawn awm leh palh a hlauhawm tlat. Kei pawh ka la intuak ve tauh tauh a. Pathian zarah ka dam a tha a, Pastor Quarter kan sak zawh hnuah pawh YMA Library tur kan sa leh a. Ka hlawh pawh a chuti lua lo naa ka khawl ve tang tang a vangin a tling khawm ve nual tawh. Sunday hmangin vawi khat chu ka va haw ve a. Saidingi laka ka lungawi lohna te pawh a lo kiam ta bawk nen, Damdawiin tlangah ka khawsa a ni ber e. Kohhranah kan inneih tur thu puan a ni tawh a, Min lawmpuitu an thahnem ve hle. Chhung leh khat nei le lu lo mah ila, Thenawm khawvengten min lainatin, "Kan Vanruatpuia nupui man tur chu ka lo tum ang" an tih loh leh "Theihtawpin kan tang tlang ve ang chu" an ti liam liam a. A ngaihthatthlak hle a ni. Nu Thari te lai laiin, "I khum siamna te chu a man zahve kan lo tum ve ang e" an han tia. A lungchhiatthlak angreng zawk. Ka pa ka ngai vawng vawng mai,min la dampui ve nise a va lawm ve dawn tehlul êm. Khum pawh kan khaw mistiri thiam ber mai Pu Nghaka kan siamtir a. Doctori design a ni thung. Min lawmpui lo tlemte zingah Pi Chawii te leh Daisy te an langsar viau. Pu Ramtea te chuan eng an sawi em em tawh lo. An fing thiam ve bawk nen. 

Tei pawh damdawiinah a chhawr theih ang anga chhawr zuiin a hlawh tur pawh a thawkten an thehkhawmsak ve liam liam zel a, Asha lam atang chuan han tih em em tur a tam lo bawk nen. A nun a hlim chho vein a hriselna te pawh a tha chho a, a hmel pawh a tha chho khawp mai. Muana leh an nu Hmingi erawh rin ang ngeiin Muana chhungte vang bawkin an intitaurau leh reng mai a. Hmingi chu Zote khuaah na na na chuan a neinung pawl leh a pa pawh Middle School Headmaster a lo ni bawk a, Tei ai ngawt chuan a tawrhhhlehawm zawk a ni maithei. An thenawmte sawi hmangin Tei awm lai nen chuan an in leh lo pawh inthlau tak a ni a niawm e. A hnawk niaih reng a, Pi Chawii hian áng hmuar hmuar chungin rawng a bawl kút kút zel a, Teremi nen pawh Hmingi chu vawi 3 lai an inbakkaih tawh. An duh ang ngawt chuan an bawlzan thei lo ni tur a ni. An mo tur an mo a, Hmingi pawh a lawina turah a lawi ti tawh mai ang. Muana erawh a palhnawkah a táng a, a cher kuam mai. A school kal tur ka hmuh phei chuan ka hai tep nghe nghe. Tei a beisei ngam tawh si lo, Hmingi then leh kha mualphothlak a ti tawh bawk si nge, a laklawhah a táng a. Tei pawh a lo be leh niawm tak a ni. zawlseia ka awm hlan khan Tei chu Hmingi leh Teremi ten an lo tim leh hrep a niawm e. Diau duh ta bik loin Tei chu ka ní nen an inah va kal ve ngatin Muana'n a rawn biak dan zawng zawng entirin an va inchhal ve ta hrep a. Muana lahin Tei a biak thu chu zep duh hek lo, "Tei aia hmangaih ka nei lo va, ka bia a ni mai. I duh chuan i chhuak thei e" tiin Hmingi chu a lo hrilh hmiah mai a. Hmingi lah chhuak ngam hek suh. DIk tak chuan nuthlawi fa pahnih nei a ni a, a fate chu a chhungte kutah a hnutchhiah kha a nia. Muana aia tha leh fel hmu zo tawh lo turah a inngai nge, inrem si lo, inhal ru thám chungin an khawsa ve ta nawk nawk a ni ber. Tei erawh Sawmpuia khan a hneh ta nge ni, an inkawp rem vei phian a. Pa Muana te lahin Tei chu an lo iai bik lo nge ni, an be tha thei em em lehnghal. Thil a kal dik chho dawn ta e. 

Zawlsei atanga kan khuaa ka haw dawn zanah ka pawisa khawlsa chu Makimi'n min pe a. Ka'n chhiar a, Rs. 23000 lai a lo tling mai. Mak ka tiin ka lawm bawk si. Ka inhlawh rei vak loh nen..Rs. 2000 chu ka pe ve a, an la hreh viau naa, ka bel lui tlat. Hei aia tam pek pawh ka duh naa, hmanna tur ka la ngah ve si. 

Pa Hminga'n, "Ruata, a sum pai ang zawngin kan inpui thei si lo va, a chawhmeh azawngin kan lo tang ve ang e. Ar kan lo tum ve ang. Kan vulh nual a, ei an tling deuh vek tawh bawk a" a ti ta mai a. Ka lawmin ka inthlahrung ngang mai. Ka han hnial dawn lahin a nghet churh mai si a. Ka pawmsak ta tawp mai. Ka nu hian pasal a va nei fuh êm aw. Tihian kan damchhungin chhungkua kan ni reng tawh bawk ang. 

Inneih ni a hnai tual tual a, ka zám telh telh thung. Hruaia ka dinpui dawn a, Doctori pawn chawlh a la ta bawk a. Ani hi chuan Zuii a dinpui dawn thung. Remchang hmasa berah kan paliin Aizawlah kan chho ta a. Mo kawr leh mamawh eng ilo lam a ngai ve tlat a ni. A mawihnai e tiin patea te inah kei leh Hruaia chu kan innghat a. Valtea a rawn leng nghal vut. "Rawn hruai ve tur che u lawm le..ka ngaih tehlul nen" a ti nuah nuah a. Nupuii kha kan kal dawn khan ka sawm ve reng, "A zahthlak e a. An inah te khan min lenpui vel ang a. " a ti bau mai sia. 

Nuteii pawh a fel thar thar ngei mai, hmana a hmuhsit, a lo ngaihnep thin khan ka phu loh Doctor ka nei dawn miau a. That a chhuah ve ang chu. Patea fate pawn min hnualsuat ta vak lo. Kan inbe tam lo hrim a. Kan han bazar ta a, Mo kawr chu thuitir lova hawh mai a duh a, a tha mai ka ti kei pawn. Engkimah a hautak lo thei ang bera chet a duh a, min tilawm daih zawk. Kan dinhmun a hre ve bawk a. Hruaia nen erawh nakin zel atan tiin kan suit tur chu kan thuitir a. Ka tum vek tur a ni naa, Hruaia pa Pa Maliana'n, "Mai maia an harsat em saw. Tumtir a ngai lo" tiin amah leh amah a intum ve leh hmiah dawn. Mi hi an va tha tak êm aw. Patea'n a pawisa eng emaw zat a la chhuak bawk a, Nuteii pawn a sawisel ngam lo. Nia, Patea hi chuan min hmangaih alawm. A ú, ka pa khan a hmangaih tih a hrechiang êm a. Aizawla kan awmchhung pawn Saidingi chu ka va rim zut tho a, a chhungte nen lah kan inpawh tawh bawk si. Ka nuna hun nawm ber lai ka ti lo thei lo. Kan haw hma niah chuan Saidingi nen chauh kan chhuak a, Remsiama thlan kan va tlawh leh. Remsiama thlan hmaa din vang vang pahin, "Tunah chuan nangmah ang maia min hmangaihtu leh rintlak ka nei tawh dawn asin. Van atang khan min lo thlirin min lo lawmpui ve rawh aw. " a ti sap a. A kutah ka va vuan a, mittui tling pam chungin ka darah a bei a, "Ka kalsan tawh ang che aw. Engtikah emaw nangmah hriatrengna lung hi ka la rawn phun ngei ang" a ti leh sep a. Kan haw chho ta. 

"Innei phawt ila, remchang hmasa berah a lung chu kan phun dawn nia" motora kan luh hnu chuan ka ti a. A bu nghat mai. Remsiama chu ka thik lo, ka lainat em em zawk a ni. An in kan thlen chuan garage bulah an lo ding khup mai a. Eng nge maw thleng ni..

Kan va chhuah rual chuan Johny ka va hmu nghal. Ka ner sawk mai. Saidingi a hmuh rual chuan a rawn pan ding nghal nalh a. A hmaah tak dingin, "Pasal chu i nei dawn ta maw? Ka tihtur i hria tiraw?" a ti nghal táwng a. Johny chhungte lam niawm tak chuan,"Khatia vau vau a ngai lo, kan tihtheih kan lantir mai ang. Lo kal rawh. Haw ang" a rawn ti a. 

"Saidingpui, nunna hi i va hlut lo ve. Tunah hian i hmuh lai ngeiin ka hnuk hi ka chhat dawn a ni. Tichuan, tualthattu i ni tawh ang. Mi dang ta i nih dawn ai chuan i damchhunga jaila i awm a tha zawk e" tih leh blade lek a rual a, a ban chu a tin ta mai. Awmve dangte pawh chu kan phu dual mai. Nu Sangi a rawn rak tuar a, U Pari pawh a hmui hupin a rawn mengphawk viau. Saidingi chuan Johny chu a melh ran a. Kei erawh ka hamhaih luat vang nge ka ding ngawi reng ringawt. 

"Johny, i duh chuan i nunna i la thei. Nunna siamtu erawh i ni lo. I thu thu. I thih leh damah hian mawhphurhna ka nei lo. I duh chuan thi rawh" Saidingi aw chu a fiah kekkawk kher mai. Chu thu Johny'n a hriat rual chuan a meng phar nghal káwk a, kei chu min rawn en lehin, "Nang..nang daikil kara fahrah hian he hmeichhia hi neih i tum ve a maw? I nei tawp lo vang. Ka nupui a nih hi..ka phalna tel loin min chhuahsan a, ka nupui a la ni reng" a ti tuar tuar a. A mitmeng atangin a fim lo tih ka hrethiam nghal. Ropui kha chu neptê a ni. Chuti taka inchhira ngai leh tur si chuan engvangin nge a hunlai khan a phatsan le..mawl lutuk. 

Saidingi ka kai a, "Lut ang..he mi â pa hi chu a duh leh thi mai rawh se. Kan tel ve tawh lo" ka ti nghet charh a. Ka luhpui nal nal. Johny chu a rak zui tuar tuar a, mahse, Valtea aw hriam zet hian, "I va ninawm ve le" tih pahin a hnek ri chawrh niin ka hria. In chungah kan chhohzui daih avangin engtin nge an awmzui zel kan hre tawh lo. Hei erawh chiang takin ka hria, Saidingpuii hi ka nupui a ni dawn tih hi. 

Johny chu an hmetmit thei ta nge, kan ngaihven zui tawh lo bawk a. Kan khaw lamah kan haw ta bawk nen, inbuatsaihna a kal chho reng bawk a. Saidingi duhdanin in hnuai ka roomah chuan Almira fix kan dah a, lian tawk takin..room pawh tlem kan zauh belh. Puitu kan nei liam liam reng a, engkim chu a famkim ka ti mai. Khum pawh kan hung lut ta rup mai. A mawi dangdai viau. Valtea kha kan rualin a rawn phei ve bawk a, a hmeichhe lam mah nise, kan inah a chengkual tam zawk. Zan khat ka leng haw phei chuan ka phawk titih a, shawl inzawnin thutthlengah an lo insi rial a, an lo indút ve ngawr ngawr mai. Ka aw ka thian kharh a, Nupuii lai leh zak lutuk chuan Valtea chu a'n tlawhthla hmiah mai a! "aiahh.." valtea'n a ti tuar..ka nui khur char char. Ka mutsan ta daih a. A tuka Nupuii rawn tho chuan min en ngam lo reng reng. Ka chhaih duh ta lo va. Kan Apuii pawh Malsawma nen an inkuan leh reng tawh. Malsawma pawh a fel chho ve ta deuh a niang, an inhau vak lo. Daisy vang khan an ngheh zual phah a ni mahna le..Apuii, Malsawma ,Nupuii leh Valtea te nen luiah te an lo zu kal thul..nuam hi an va ti tak. 

Kan inneih hmaa chawlhni hnuhnungber kan inkhawm tur chu Sitting rooma ka pheikhawk ka nawhfai laiin Apuii hi an room atangin a rawn nui chhuak awr awr mai a. Ka ní te nen a ngaihna hre mang lo zeta kan lo melh laiin, "U Nupuii saw..mascara a inhnawih ve a, a meng thiam lo reng reng" a ti a, a nui uar uar mai. Nupuii a rawn chhuak, "Lalmuanpui, min nuih suh. Ka menthiam reng hi" a rawn ti. Mahse, a men dan chu meng dere kan tih ang deuh hi a ni si, kan nui lo thei lo. A titau ta. "Ka nu ve loh vangin min hmusit" tiin a thu tau ta ngût mai a. 

Pa Rema'n, "Nu taka i awm kher a ngai hleinem. Make up i hman loh hian i hmeltha daih zawk. " a lo ti dam thlup a. 

"Apuii pawh mawnglem te, bra puar te in lei a. Ka duh ve tho. " a ti leh nghat. Aizawl atang khan Apuii'n min chah nasat vangin ka lei hawnsak kha a nia. 

"Mama te inneih niah mawnglem chu i ha dawn ni" Apuii'n a ti vat. 

Ka níin, "I bialpain a duh hleuh hleuh em tho che hi, mawnglem tih vel a ngai lo, i naute chu a lerh em a, hrethiam ta che" a lo ti thliam a. 

A ding thut a. "Ka inti nula ve tawh dawn. Min nuih tawh miah suh ang che u" a ti leh hmak a. A lut daih. A nau hian a tilui peih vel lutuk a, a tawpah a titau leh nge nge zel. 

Inneih hma ni 2-ah Aizawl lam atangin an rawn thleng tak tak a. Patea te pawh an chhungin an rawn kal ve e. Kan ni nuai nuai mai. Zawlsei lama ka chhungte pawh an rawn thleng a, Pu Zaia te inah an innghat thung. Mi zawng zawng chu an hlim niin ka hria. 

Biak in dar a ri val val a, chu dar ri tluka dar ngaihnawm chu ka beng hian a hre leh kher ang em? Vawiinah hian ka hmeichhe hmangaih em em Saidingpuii nen kan innei dawn miau a, khik súng reng a mawi si lo. Ka chhungril erawh lawmin a khat a ni. Saidingpuii chu Valtea'n a rawn kai lut ta hnalh hnalh a. A sawi ang chiahin veil a khim lo. Mahse, a va hmelthain a va duhawm si êm. Ka bul a lo thlen chuan kan innuih sak a. Bialtu Pastor Rev. Laldingngheta chuan inneih thutiam min chhamtirin nupaah min puang ta. In khawm kan tamzia te, min lawmpuitu an tamzia te ka hmuh chuan, Vanruatpuia, fahrah riangvai ni thin, vanin a ensan emaw tih hial tura vanduai thin kha Van hian a lo ensan ngai reng reng lo tih ka hria a ni. Ka nu leh pa ten van atangin min lo thlirin kan tan kut an lo beng ve ngeiin ka ring a ni. Mi zawng zawng chu kan nalh a ni tawp mai. Valtea thianpa Puia kha thlalatuah kan hmang a, a thiamin a fit zak zak khawp mai. Saidingi chhungte lam pawh an rawn thahnem bawk a, mikhual an tam khawp mai. 

Inneih zan hi a lo awm chiang a ni..hehe...Inneih zan atang chiah khan sex pawimawhzia ka hmufiah. Saidingi chu khumlaizawlah nawhchizuar ang maia a chetthiam avangin Vanruatpuia hi tlangval virgin tlaw tak ka lo ni hauh lo mai..

Zing dar 5-ah khumah kan mu meng ran a..

"Ka lawm e..Ruatpui, ka pasal i nih vangin.." a ti sap a. Kuah thawk pahin, "Ka hmangaih che. Ka nupui i ni hlen dawn.." ka ti sup..

"Mawngno,..i tan nupui tha ber ka ni ang. Ka tiam a che" a tih chuan, a biangah ka piai hlak a. 

"Duhawmnu" ka ti hluk a. 

A tawp ta. 

(Season 2 te a la awm mahna le..comment hnutchhiah theuh ang aw 😍