saidingpuii 12

Dr. SAIDINGPUII (12)

Ziaktu: Toni Râlte

"Duati, inhmu lawk ang aw. I hman tiraw?" ka ti a. A ri rawk rawk a, a hnu deuhah, "Tunah maw?" A rawn ti hû. Dar 8 a pel tawh a. Zanriah kha ka ei lo bawk nen, ka pum a ri ruk ruk mai. 

"Aw tunah i hman em?" Ka ti ta hmiah a. 

"Khawiah" a rawn ti a. Ka thu chhuak a, "In inkawtah lo awm la, ka rawn lam ang che." ka ti puat a. 

"Aw le.." A ti ve mai a. Ka inthlak sawk sawk a. Pindan atanga ka va chhuah chuan, ka ni chuan, "Chaw pawh i ei peih si lo va, chhuah i tum mi?" A lo ti há a. 

"A tul tlat" ka ti ringawt a. Ka tunlai awmdan hi an hriatthiam phak bak a nih avangin zawhna pawh min zawt lo tawp niin ka hria. Tul ka tih hunah ka sawi fiah leh mai dawn tih an hrethiam pawh a ni thei bawk. Scooty chabi ka la a, ka chhuak zui nghal. Zaninah hian eng emaw tak chu ka thlentir ve a ngai tlat. 

Duati te in lam chu ka pan nghal a. Káwn lun lai a ni sia, a nuam vak lo. An in piaha Zova te dawr kawtah chuan a lo ding ran a. Ka lawm viau mai. Chutia awlsam taka ka phur chhuak thei tur chu. 

"Hawh le" ka ti nghut a. Engmah sawi tawh lem lo chuan a rawn thu ve mai a. Vengsang lamah ka tlanpui a, High Schoolah ka tlan luhpui nghal. A fál bakah a hráng tia an sawi avang hian tuman an tlawhpawh ngam vak lo, zanah chuan. Ani pawh chu a ti ru hle niin ka hria. School verandaah chuan ka kai phei a, "Thu ang" ka ti leh sup a. A thu ve mai bawk. Zu rim a nam ham ham mai. A zu in vanga sawm thlu thei ka ni pawhin ka hria. Harhfim se min zui duh bik lo maithei a ni. 

"Duati, zaninah hian thu pawimawh tak sawi dun ka duh a ni" ka ti té te a. Tawngsual erawh ka hlau takzet. 

"Eng chu? Min be duh tawh lo maw ka tia" a ti nghat a. 

"Ramropuia hmei tia an sawi che hi eng nge a awmzia? Amah Ropuia lah hi a uang nasa mai sia" ka ti ta pawp a. A ner sak a, "Ve a..tu ten nge sawi a?" A ti hlak a. 

"In thang thui riau tawh. Ropuia hmei lakah te chuan kei pawn engtin nge hma ka rawn lak ngam ang? Ropuia lahin min hmusit nasa mai si a" ka ti leh a. Rilru hah hmel zetin ka thaw hawk bawk. Duati hian min duh hran miah lo tih ka hria, Ropuia rawih a nih vang chauha ka laka sihhnip a ni. Tunah hian kei pawn risk ka la ve takmeuh tho. 

"Ropuia nen chutiang engmah a awm lo. Thian alawm kan nih?" A ti leh mai a. A rui vak lo a niang, a tawng reng a fimkhur rih em mai. 

"Khamizan khan mudun lo mah ila, Ropuia chuan sex hmang leh che dun nasa angin mi dang bulah a lo sawi a. Tunah hian i rin phak bakin kei leh nang hi kan mualpho tawh a nia" ka ti leh a. 

"Nia, sex kha chu kan hmang lo.." A ti dat a, a tawngsual tih a inhriat vang nge a ngawi daih a, remchang ka chuh vat. "Mahse, a tukah khan hmang dun ang chiah khan i rawn sawi sia.. Ropuia khan khatianga ti tur che khan engzat nge a pek che?" Ka ti tlang ta rawp a. Pehhel kual vel kha ka ning tawh. 

A meng phawk khawp mai a. A mitmeng pawh a hnual raih mai. 

"I sawi awmzia ka hre lo" a ti hul hak a. 

"Amah Ropuia ngeiin, 'Duati te ang sum tlemte hmanga dêp theih an lo awm hi chu a tihzia e. Ka hmanrua nih hi nuam an ti em mai' a tih zuah zuah kha mawle..A vulhtu che hian a hmusit mah mah che a ni" ka ti ta miah miah a. A mitmeng a alh phat mai. 

A tawng hmain, "Nang phei chu kan khaw nuthlawiah pawh ka lo chhuan ruk ve thin, fing fel, mipat hmeichhiatna lama fihlimah ka lo ngai che a. Zu te hi chu i lem ve zauh zauh tih ka hre tho naa, hengte chu mi tih loh dan pawh a ni lo va. Ropuia hmanrua i ni hi i chhiatpui dawn a nih hi" ka ti leh hmiah a. Ka dim duh tawh lo. 

"Ropuia chuan tiang chuan min sawi a maw? Tu bulah?" A ti leh that. Rin aiin a sak zêk a! Hmeichhe fing tih takah. 

"Ele! In vengho saw va zawt la, a darh vek tawh ka tih chu, I duh leh amah pawh be rawh" ka ti ta piap a. Be tak tak se ka duh mah zawk, An pahniha an inchhal vel lai chu duhthawh taka lo thlir ka duh. Mahse, a call lo. 

"Ruatpui, Kan doctori khi a duh êm a, ka pui ve mai chauh a nih kha" a ti zawi sap a. A laimu kan kheh tan dawn ta. 

"Ka hria alawm. Doctori'n kei min kalsan theih nan nangin i lo pui a, mahse, a thlawn chuan i puih ka ring lo. Khatiang mualpho theihna thilah phei chuan" ka lo ti vat a. 

"A dik alawm. Ti lo thei lo dinhmunah ka din zawk vang alawm. Ropuia hian min nawrluih theihna tur hmanrua a kawl alawm" a ti dam thlap a. A hmel chu a khawngaihthlak riau! 

"Duati, kan tang dun thei asin. Kan laka fin khekrek chhuahtu hi kan enliam ngawt thei lo vang" ka ti nghet charh a. 

"Kei chuan ka hmachhawn ngam lo. Ka laka a lo insawithei viaua a lo uang viau a nih pawhin tawrh tlawk tlawk bak tihtheih ka nei lo" a ti sep a. A beidawn hmel viau. Kei ai mahin a dinhmun a khirh niin ka hre ta a. 

"Ka pui thei maithei che asin. Duati, dik tak chuan kei hi min duh lo va, Ropuia thu angin min charbeh i tum ringawt chauh tih ka hria. Ropuia hi kan pahnihin kan hmachhawn thei ang chu" ka ti ta a. FIR thehluh a tul pawn kan thehlut mai a niang chu..

A aw a thian kharh a. "Ka thlalak tenawm tak a kawl tlat a tin ni" a ti ban chhalh a. 

"I thawn em ni?" Ka ti vat. A lu a thing a. "Ramropuia hi ka bialpa hlui thianpa a nia. Ka bialpa hlui chu nang pawn i la hre maithei, Manuna kha a nia. Ani nen khan kan inpawh bawk nen, ka thlalak te kha ka lo thawn ve nual hman a. Ani Manuna lah chuan kan inthen khan delete nghal mai loin a lo la kawl a. Ropuia hian engtin nge a neih theih ka hre lo. A rawn awm tirh phat atang khan min belbul nghal a.." A ti mawlh mawlh a. Thil chu a lang ta ruak mai. Ropuia hian tum neisa ranin kan khuaa thawh a dil tih a lang reng mai. Saidingpuii a neih theih nan chuan remchang a dap thiam khawp mai. Mahse, thingtlang tlangval hian ka phihàwk ve dawn khawp mai.

"Chu i thlalak hmang chuan a vau che a, kei kha min bawlzan turin a tilui che a..a dik em?" Ka ti khak a. 

"Aw..bakah pawisa min pe bawk a. Kei ka mamawh lai a lo ni bawk nen,. Doctori nen in inthen tawh ber chuan nang chuan thu leh hla i rawn neih vak ka ring tawh lo bawk a" a ti ve ta zel a. 

"A nih Duati, khamizana thil thlen dan i hriat ang ang kha min han hrilh phawt teh..khawngaihin" ka ti a. Ka hnaih sauh bawk. Ani pawh chuan kawng dang neiin a inhre ta lo nge, a aw thian leh kharh kharhin, "Stingah khan pawlh chu a nei a, eng nge a nih ka hre ve lo. Bur hnih i in hnu khan i á vek a. Zu in ngai si lo khan zu te kha i in ve a. Mumalin i khawsa lo ka ti mai. Saidingi'n i zu in a hmuh khan a thinrim a, in inhnial chho a, a ina hruai chhoh che a tum a, mahse, i rui tawh si khan i duh bawk si lo. Ani a thinrim ve tawh bawk si khan i samah a kek che a, i thinrim ta lutuk a. I nawr chhuak ta a ni. Chuan, Ropuia khan thiam takin a vehthlem chho ta che a, kei pawh i bula awma chhai kual vel tur chein min ti a. Ka ti ta reng a. Ruatpui, ka tenawm ngawt mai, ni e, zep loh chuan kan chesual lo hrim hrim. Ropuia kha chuan sex hial hmanpui tur chein min vau a. Mahse, i duh miah lo. A zah pawh ka zah che. Ropuia bulah erawh sex hmanpui ang chein ka insawi, ka thlalak kha tihdarh a nih loh nan..pawi ka ti lutuk aw" a ti ta hliam hliam a. A lung a chhe deuh bawk. 

"Duati, heng thudik hi Saidingi hmaah sawi ang aw. I thei ang tiraw?" Ka ti nghet charh a. 

"mahse, Ropuia'n hre ta se, ka thlalak kha" a ti chuai raih a. Nia, Duati hi zu a lem ve hlek thin tih lohah chuan a felin a tlawmngai a, fak pawh a hlawh. A lem ve thin tih hria pawh kan tam lem lo. A tan hmingchhiat chu a zahthlak dawn lutuk. 

"Aw le, keiman Ropuia ka bitum ang a, Saidingi bulah kan mutdun loh thu erawh min sawisak thung ang" ka ti ta a. Kan inkawmna zawng zawng kha ka record vek tho a, Saidingi bulah sawi kher tawh lo mah se, Fiahna chu nei tha ka inti tawk tho mai. Mahse, hmaichhan ngeiah sawi se chu duhthusam a ni. 

"Thlalak kha a delete phawt chuan ka theihtawpin Ramropuia hi ka timualpho ang" a ti ta hmiah a. Thlalak delete chu a pawimawh ta a nih chu. Kei chu ka fihlim tawh, Mahse ,kan khaw nula hetiang mai maia a kaikual hi ka tihtawp erawh a ngaiin ka hria. 

"A tha e. Chanchin kan inhrilh zel dawn nia. FIR thehlut ringawt dawn ila, ka taksaah a thil pawlh sulhnu kha a awm tawh kher lo maithei. Sawrkar mi leh sa a ni bawk nen, a chet ang chiah hian kan che ve ang" ka ti ta charh charh a. Game nuam tak a ni dawn e. 

Duati chu ka thlah hawng leh thlap a, Ropuia bulah chuan a awihawm thei ang bera la awm turin ka chah a. Lehlamah ka puih ve dawn tho avangin ka thu chu a hnial ngam ka ring lo. In ka thlen chuan Valtea a lo thu leh ran a. Min hmuh rual chuan, "Ka lo nghak che a" a ti nghut a. 

A bulah ka thu ve nghal. Apuii leh ka nite nupa an mu tawh a. 

"Nupuii chu awm tho mah se, engkim a hre vek tawh tho va, ka'n sawi mai ang e. Ka u chu tlaiah khan ka bia a. A harhfim bawk. Thianpa, Ka û hian a phatsan reng reng lo che. Ropuia hi a vehthlem zawk niin ka hria. Huat pawh a haw hek lo che. Ka bulah thu tam a sawi lo naa, " Valte, lo za chung suh u. Ruatpuia hi a kal sual tur lakah lo veng la a ni mai. Ramropuia game khelh hi ka man tawh a, he game-a a hnuhtel leh a hamtel ve te ho harsatna hi ka hriat a ngai a ni. Thil pakhat erawh chuan min mawlh. Vanruatpuia leh Duati kha an chesual em tih chauh hian" a tih khan awmzia a nei fû chuan ka hria. He Ropuia verther lutuk hi engtin emaw tal awhtir ve a ngai a ni" a ti nghat nghat a. Ropuia chu a mil loh hmel viau. Saidingi tawngkam a sawi chhuah rual khan ka záng sawt. Ka ippik rukna leh ka chetlak dan tur ka ngaihtuahte kha vawmbo ang duak a ni. Mahse, ni e, a rilru mawlhtu kha a la awm a. Ka hrethiam khawp mai. Mihring nuna mipat hmeichhiatna pawimawhzia hi chu aw. A dik e, Saidingi nen kan inang reng. Kei pawn ROpuia nen an chesual tawh ang em tih ngaihtuah reng rengin a ni lawm ni ka hun ka hman. Lo chesual ni se chuan ka pawm theih ka ring lo hul hual. 

Ka nuamsam vak lo bawk nen, ka mutsan ta a. Saidingi ka be chàk. Valtea bula a sawi ang kha a nih chuan, min then tak tak lo tihna a ni ngei ang a. Ka biak hunte hi a lo nghak reng tawh zawk a ngem? Duati chungchang vel kha hrilh vat ila, amah zawk hian Ropuia chu a hmetmit thei ngei dawn si a. Duati nen kan inkawmna ka record kha whatsappah a len loh vangin Telegram atangin ka thawn ta a. Kan khua hi net signal a tha bawk a. A tlang ve mai bawk. Mahse, Telegram a lut khat sia, a ngaithla làwk dawn lo va hriain ka call ta tawp a. A ring ral dawn tihin a rawn la ta hram a. Rui tawng ka hre ta lo. 

"Telegramah thil ka rawn thawn a. Lo en lawk ta che. Khawngaihin" ka ti a. 

"Aw le" a ti a. Ka dah nghal. Ka biak hian kan intawngkhum dan na tak takte avang khan ka tîm zel. Keia pawh tawng insumkar tur ka nih tehlul nen, ka lo duhthawh mah mah zel a. Mahse, a hun lai chuan insûm a har êm a ni. Ka tawngtai a, Pathian hian vanduaina chhum dum hi ka lak ata la bo ve tawh rih se ka va ti ve mawle. 

Ka zing tho pawh ka harh ve ta deuh e. Ka ril erawh a tam ngang mai. Thingpui ka in ta vat a. Apuii rawn tho chu a tûm bûr mai a, engvang tak ni ang maw? Ka niin chaw ei siam a rawt lai chuan, "Ka ei peih lo" a ti hmak a. Roomah a lut daih. Kan naupang hlim thei ber a chutih avang chuan kan ngui ruai hlawmin ka hria. Ka va lut a, "zing chaw ei loh phei chu pumin a hua a nia. Lo ei rawh. Ngati nge ni reng reng a?" Ka va ti a. 

"Daisy lawm, Msa bulah min lo rêl chiam a, Msa nen kan inhauh phah hrep, ka va hnuk hrep dawn mawni" a ti hlaih hlaih a. Msa hi a bialpa kumhlun, mahse, a then zin em em ni lawi si a ni. 

"Chaw ei phawt ila, i sawi dawn nia. Hawh" ka tih chuan chaw nghei em chu a hreh nge, a rawn kil ve ta hram a. Ka nî chuan Nupuii melhin. "Nupui, Valtea hian a duh ve tak tak chein i hria em?" A ti ta thut a. Sawi hreh leh thup kan nei ngai lo ka tih tawh kha. Nupuii antui hawp tur chu a thulh leh daih, zah vanga sen awp awp hian, "Ka hrethiam bik lo, APuii hian a hria ang" a ti ta daih a! 

Pa Rema pawh a khi suk mai. 

"I nauin engtin nge a hriat daih daih ang? I timak e a" ka ni chuan a ti hliai a. 

."Ani te chu bialpa nei thang a nia, a hrethiam zawk ang" a ti leh hmiah. Apuii mood fuh lo pawh a zia ta aniang, "U Valtea hian a duh ve tak tak a nih ka ring. Hawn pawh a hawn duh loh hi..bakah khawpui tlangval a nia, innei rawh se..zin changin Putea te inah chuan kan zum dûk zel a, a ninawm" a ti ta duah pek a. 

Ka ni chuan a chaw bar thulh meuhin, "Teh duah a che. Inngaizawng pawh nise pasal neih ka la remti teuh lo mai" a ti hmuk a. Nupuii chu za lo zetin a nui a nui ringawt. Kei erawh chuan eng ka sawi ve lo, ka sawi ve hian Nupuii a lai zual zel sia, ka khawngaih. 

Kan ei khamah in hnuaiah ka chhuk a. Pheikhawk dahna tur siam a la ngai a, a har lo bawk a, ka peih vatin ka ring. Ka chhoh leh chuan ka nî chuan meizial zial pahin, "Engtikah nge Doctori nen in inkar a chhia tihte chu min hrilh i tum a?" A lo ti ta chat a. Ka lei ka chhuak zuk. 

"A chhia mi?" Ka'n ti ngawt a. 

"Chhe lo em ni? I awmdan leh a awmdanah ka hai i ring em ni?" A ti nghat a. 

A mei zial sa chu lain ka tan nghal a. "Aa..kan la inthen chiang lo" ka ti ta sup a.

"Daisy vang em ni?" A ti a. 

"Teuh lo. Nakinah ka la hrilh vek ang che. Taka ni, ka nu khan chanchin ngaihnawm deuh a nei asin" ka ti hluai a. Apuii te unau an awm hnai lo bawk a, Zawite tein ka nu thuruk kha ka ni chu ka hrilhfai ta vek a. A chek tlat tlat a, a mittui pawh a hnàm deuh.

"A dik ang. Zuali kha misual a ni hauh lo rêng a ni. Kei pawh khan a dik a dik chuan khanglai pawh khan huat tak takin ka haw thei lo. Marawhchu, i pa boral tuma an chhungkaw vua leh vang an rawn lang reng reng lo kha chu na ka ti viau mai" a ti ve ta mawlh mawlh a. Ka nî hian ka nu thuruk a hriat chuan kei pawh ka nu laka ka awmdante avang khan min dem bik dawn lo va, an mitmei ven em em pawh a ngai dawn lo va, ka zangkhai sawt mai. 

Apuii'n , "Mam, i phone a ri" a rawn ti làng láng a. Ka tho vut. Roomah ka charge daih a. Ka va luh chuan Duati a lo nia. Ka la vat. 

"Enteh, Ruatpui, nizana kan inphur kha Ropuia chuan engtin nge a lo hriat ka hre lo. Min lo be nghal a. Rawn hriatchian a chak khawp mai a. Mahse, 'Ka thangah ka awk fel tawh. Sex kan hman tawh vangin a bialnu angin min ngai tawh' ka ti ringawt a. A awih nge awih lo chu ka hre lo" a rawn ti nghal mawlh mawlh a. Hmela chu, engtin nge maw a lo hriat leh hman ni.

"Aw. a pawi lo, khatia tih kha.. Keini pawh lem kan chang ve mai ang chu..a harsa hran hleinem. Chuan thlalak pawh chu zaninah tihbo dan kan lo ngaihtuah ang. I awmdan kha tidanglam lo la, inthunun la a tha mai" ka ti ta a . Duati hi a tawp thleng a tan ngam a ngai. Kei pawhin a mualpho theihna tur lak atanga ka kaihsawn chu a ngai ve ang. Doctor mah nise, kan khaw nula rawn pal theihna a nei hauh lo. 

Tei ka bia a, "Nakinah ka lo text ang che. Ka buai rih" a ti a. Thil sawi a rem lo a ni maithei. Hnathawh pawh tum ila ka ni ten an phal dawn lo tih ka hriat avangin ka tum buai peih lo. Awmhmunah pheikhawk bawm tur chu ka siam a, pheikhawk ka ngah lo bawk a, lian vaka siam pawh a ngai hran lo e. 

Chhun thingpui in laiin Tei msg ka chhiar ta a. 

"Ropuia hian a rawn bialnu chei tawp a. Vawiin pawh Zawlseia kalpuiah a rawn sawm a. Mahse, U Saii'n a awm nawm loh thu a sawi a. A thu ve ta reng a. Valtea pawh a thu ve tlat. A ngei ve niin ka hria. 

" Ruatpuia leh Duati pawh tawnsabawp ang chauh mah nise, an inkawp rem phian mai" te a tia. Doctori chuan engvakmah a sawi lo. Amah hrim hrim hi a ngui" tih thu a ni. Han ngaihthat chi hluai chu a ni lo naa, Thinrim viauna tur chu a awm hran chuang lo. Zaninah Saidingi ka rim dawn..chu chu a ni tawp mai. Bul kan tan tawh a, mize inang miah lo, duhzawng leh ngainat zawng, thiam thil pawh inang reng reng lo ni mah ila, he hmeichhe te taktê, kawlh deuh hi ka damchhung nun hmanpui atan ka thlang tawh a. Mi dang an inrawlh vanga bansan hni hne chu ka tum leh tawh lo. A mak ngawt mai! Hmangaihna leh inngaihzawnnaah hian rilru hi a va danglam zing tak. Nghet deuh hian a awm hleihtheih loh. Duati nen kan inkawmna kha a ngaithla tawh awm sia, ti nge engmah a sawi loh le..a awih lo nge Ropuia lakah remchang a dap zawk..

Zanriah pawh ka rin aiin ka ei tam. Ka tukhum a rawn na leh at at zel a. Zorina ka call a, nachhawknain min rawn jection a. Ka zia deuh. Thian pawh hruai lova Saidingi han hmuh ka duh tlat si a. Tei pawh ka hrilh lawk a. Chance min pe turah ka ngai. Ka chhuak tur leh Valtea rawn leng tur kan intawk a, kan innuih ringawt. Ani hi a serious ve riau mai. Ka farnu hi a duh tak tak a nih chuan makpa atan ka iai lo khawp mai. Zu te chu lem ve chang nei mah se, chhungkaw din tawh hi chuan insiamthat a har lem lo. 

Saidingi quartera ka luh hmain Damdawiin bul kawng penga Arema leh Biaka te chhuk thla chu ka va hmu a, An boss Ropuia an va hmu dawn a ni mahna le. Kawngka chu Tei'n min lo hawn a. Zawi sap hian, "A roomah a awm" a ti a. Ka bu nghut. A room kawngka bula ding chungin ka call a. A reject em bik lo ve. 

"Lo chhuak la, inkawm ang" ka ti nghut a. 

A dah daih. Mahse, reivak loah a rawn chhuak a. Kawrfual par a khup khup chiah chiah a ha a, a sam chu a hnawk niaih bawk. A eng emawti duhawm riau. Ka lo en vung vung a, ka hmaah tak a mawng a rawn hung. A mitmeng chu a ngui viau. A chauh hmel bawk. Ka nu sulhnu vangte pawh a ni mahna le..a tuar viau khan ka hria a ni.

"Eng nge i lo tih dawn?" A ti sep a. A awah pawh chauhna a lang thei. Mut a hmu tha vak lo a nih dawn hi.

"vawiina ka thil lo thawn kha i ngaitha tawh em?" Ka ti sup a. 

"Aw.." A ti ro hak.

"Chuan.." Beisei nei takin ka ti a.

"A tira nise ka tih rûk kha a tak tak a lo nia. Ka lawm" a ti leh tawp. A hmelhmaiah a lawm hmel chuang si loh. Ka hrilhhai deuh.

"Ropuia chu i la ring zel a maw?" Ka ti a. Zawh dan ber tur ka hre lo atin ni. 

"I zu ruiin min hnawtchhuak kha na ka ti..ti nge i ruih khan ka bula awm i chàk zawk lo mi?" A ti ta daih a. Ka hamhaih viau. 

"Ka ruih em kha" ka'n ti ngawt a.

"Nia, i rui êm a, ka bula awma ka bula mut kha i chak ka lo ring a" chiang deuha min melhin a ti a. 

"Ka hrethiam tawh bik lo. Engmah kha ka hre lo tawp a ni ber. ZU ka in lai pawh ka hre chuang lo" ka ti ta ringawt a. Chubak sawi dan tur ka hre hlawl lo a ni. 

"Engpawhnise, Ruatpui, Doctor ka nih vang hian min chán phal lo zawk niin ka hria" a heh liah zauh pahin a ti tawi tak a. 

A meng riai bawk. Ka thaw hawk a. "Ka hmangaih che" ka ti hmiah. Mi rawn melh zawk a. Hnuai lam a melh lehnghal. 

"Hloh che ka duh lo va, mipa tiha mawi loin vawi tam ka khawsa tih i hria. Duati te kha ka hmu chák miah hleinem, mahse, min rin leh theih nan ka tlawm a, a tul a nih chuan Ropuia pawh ka hmu mai ang. Engkim hi a nih dan tur angin kal rawh se" ka ti ta bawrh bawrh a. Ka khatliam deuh pawh a ni ang e. 

"Hrai ruih theiha i awm kha i á a ni" a ti hul hak a. Hah hmel deuha thaw leh hakin, "Ropuia lahin Duati a thunun tlat bawk si..tin,.englo.." Tiin a chil a lem khawlh a. Ngunthluk fahranin ka lo melh. Eng emaw tak chuan a mawlh a ni, kan doctori hi.

"Eng nge sawi rawh." Ka ti vat a. Tei chu damdawi dawrah a chhuk tawh a, venthawn tur an awm lem lo. 

Min rawn melh a, "I hlauh deuh thil kha thleng thei a ni" a ti ban chhalh a. Ka káng zawk. A sawi danah chuan ka rilru kamtu, min mawlh nget ngettu, Ropuia nen sex an hmang ang em tih ka ngaihtuah fo kha a thleng taah ka ngai. Ka na vawng vawng a ni e. 

"A va mak ve. Duati nen mudun anga min ngaih vang pawh lo nise, Daisy nen kan khatih pawha min ringngamtu i nihna kha han lantir leh hram la a tha tur..Ropuia thangkamah chuan kan vaiin kan áwk a nih chu..A nghak rei tawh bawk che a, innei r'u..hman zanah khan em ni thleng a?" Ka ti ta nghut nghut a. Ka khur thei hial mai. 

Makti hmelpu lek leka min melhin, "Thinchhia min ti ziah a, i lo thinchhe fe zawk a nih kha. Zeldin rengpa, ti nge i insum theih miah loh a?" A ti ta hrep a. Ka melh vung vung ringawt. 

"I rilruah khan ti nge sex ringawt a awm a?!" A ti leh hluai a. Ka melh nasa ngang mai. 

"Sex a ni lo mi?" Ka ti hû a. 

"I hlauh deuh mai ka tih chu miin zu ka rui thin tih an hriat kha a nia. Ka zu in lai leh ka rui lungpuam ka tahna vel video a kawl ka tihna a nia" a ti ta a. Ka ding thut. Ka lung lah a phu nasa, Ti nge a tir khan a sawi tlang loh le? Min tihhrehawm dan hi a hre sia a. Rum zeta melhin, "A tir khan sawi ta che" ka ti hlur a. A nui deuh. Mahse, a la nui tha duh vak lo. 

"Chu chu Pi Nguri thih zan ami kha a ni em? Min lo call vel kha" ka ti leh a. 

"Ni phiangsen e. Zu kan in dun a, Khata tang khan alawm Ropuia game chu ka hriat tak ni. Nia, ka thinrim leh rilru ná vang khan thudik kha ka lo hmuh kán daih a, Duati nen in mudun tih bak rilruah a leng lo va, ka thluak a nû a, Kawng dangin thil kha ka la thlir thiam lo a nih kha. Mahse, Zu kan in dun atang chiah khan Ramropuia hian kan lakah game a khel a, a thawhpuite pawh hi a thuhnuaia dah theihna hmanrua a nei tih ka man thiam ..a tawngkam hman dan atangin. Ka lo fimkhur tlai a, Camera a lo kam ru reng sia..A tukah min entir a, min la blackmail chiah lo naa.." Khawmi te hian an hmu ve ang tih a hlauhawm..ka'n kawl tha khiau ang e" a ti kual a. Engtin emaw chet la la, a darh nghal ang. Nang i hrehawmin i zak ang a, ka thlavang i hauhna lamah nuihzat i hlawh bawk ang. In khaw miten hmeichhe zu in an ngaihdan piahlamah Doctor zu rui an en dan ngat phei chu a ropui loh turzia ka hai lo.." A ti ta mawlh mawlh a. 

Mahse, ho ka ti. Ka thawveng ta lutuk chu ka inzahpui zawk . 

."Thingpui va lum teh, in ang" ka ti ta daih a. Makti zet hian, "Vanruatpui" a ti thawt. 

Ka nui a, "Kan inngaihzawn leh lawm nan thingpui in ang..mawh..va lum teh" ka ti leh a.

"Hmela" a ti nghat. A bulah ka va thu a. "I zu in lai video tih mai mai, chhan tha tak a tling lo. A ngam phawt chuan tidarh ang hmiang,. A tihdarh chhan kha thiam takin kan sawi ve mai ang chu. Hmanni maia rawn awm tharin Doctor a rawn tihmualpho chuan chhan tha tak a nei ve dawn tho alawm le..ni lawm ni? Tidarh zawk se ka va ti e" ka ti hmawk hmawk a. Ka bengah a rawn pawt, "A naa" ka ti tuar a. 

"Vcp hi Ramropuia nu nen unau an ni tih i hria em? Kei hi a bialnu min nihtir theih loha a ngaihnep Ruatpuia bialnu ka nih dawn ai chuan, mualpho taka in khua atanga min sawntir pawh hi a duh zawk ring rawh. Ramropuia hi mi hlauhawm a nih hi" a ti ta charh charh a. A dik ang, a rawn awm hma atang rengin plan fel tak a nei thlap a. Duati a tanga tanin ka ngaihtuahna tibuai leh inthiam lo tura thiam taka min siamin ka bialnu min chhuhsak a tum vel ta chu a nih hi..mahse, a fing ziktluak lo eee..doctor a nih vanga hmachhawn ngam lo tur leh beilet ngam lo turah min ngai ringawt a. Mikhual a ni tih hi a inhre miah lo a niang. 

"Ka hlau ve hleinem. Kuttum hian thil a tithei ve tho a nia" ka ti nghet churh a. A nui deuh. 

"Nanga pawh zu i in thawt thawt a, zu hian eng thil tha mah a thlen lo tih vawitam ka sawi lo em ni? Ti nge i inpui vel ni?" Ka ti leh duah a. Ka lungawi lo thar leh vel. Mahse, he lungawi lohna hi chu nizante , zan hmasatea ka lungawi lohna nen chuan a dan a dang tlat. Keini pahnih hi kan naupangchhia viau a nih dawn hi. Thinrim engphiarin kan inhau a, tawngkam na theihtawpin kan inbei a. Mahse, ngaithlatu ve ve kan niha fim taka kan han ngaihtuah chuan inthen hlenna tur khawpa chhuanlam tling kan lo nei lo ve ve thung si. Hetiang hi a lawm inngaihzawnna chu..hote ni si, tak em em tho si..

"In lo thei lo va min siamtu kha tu nge?" Tiin min rawn melh run run a. Hmun dang ka lo en daih. 

"Nia, zu vanga thleng a nia..chuvang chuan.." A tih mek laiin kawngka an rawn kik a. 

"Amah a ni ngei ang. Game khel ang aw" a ti zawi sap a. "Lo lut rawh" a ti lang láng. Rin ang ngeiin Ropuia chu a rawn lut ta zan zan a. Min hmuh chuan a danglam ve deuh. Mahse, kei chu ka tûm bûr a, nasa taka thinrimna nei niawm takin ka awm a ni. 

"Lo leng rawh, i lo chho har ka lo tia.. Lo thu rawh" Saidingi chuan a ti siam siam a. Saidingi bulah a thu tharh mai. 

."Ruatpuia chu, Duati te inah i leng emaw tia" nelawm si, min hal ru em em si hian a ti a. 

"Chul hnu ka rawn fang zuai a" ngeiawm zetin ka lo ti ve hmiah. 

Saidingi chuan min melh ráwm ráwm chungin, "Ve khanglang a che. Min tihmualpho i duh vang chauha lo kal i nih kha" a lo ti hlak hlak a. 

Ropuia chuan, "Engtia mualpho maw?" A lo ti vat. 

"Ka sawi peih lo e a.." A ti nghat a. Ka lo inngaihtuah deuh, Saidingi thluak ka chelh lo mai ang tih chu ka hlau ru si. 

Ropuia chuan thutak angreng tak hian, "Eng nge a awmzia? Ruatpui" a ti a. Min melh ngun kher mai.

"Eng nge ni vak ang? Nang hian ka bialnu min chhuhsak a, dik lo takin min hrai rui a, thudik tawk lo hmangin min inpuantir bawk a. Mahse,ani khan min rinna chhete tal pawh a neih tawh miah loh avangin ka tihtheih ka ti ve mai dawn a ni. " ka lo ti bung nghut nghut a. Tlemin a hmel a buai deuh,insiamrem leh vatin, "Eheu! Hman zan thil thlengah khan min puh i tum elo? Zu kha ka tulh lui miah lo che a nia. Chuan, Saidingi i ngaihzawn chhan kha chu amah Doctori ka lainat leh khawngaih vanga hmuhtir ka ni e. Khatiang rilru kha mipa i nih chuan pu suh" a ti chang rût a. 

"Energy drink rui hmasa ber ka nih ka ring. Mizoramah hian..hehe, i thil pawlhte kha hre lo turah min ngai em ni? Chuti em emin ka mawl lungrun bik lo a nia" ka ti ve salh a. 

"A eng chu nge maw pawlh se min tih le..i zahpuiawm mang e. I bialnuin a then hnuah che pawh mi dang mawhpuh tumin i la phe buai zak zak chu a ni sia, Duati bula thu mai mai tur i nia sin. " a ti bawrh bawrh a. 

"Ni lo ve. Saidingi leh nang hian min tihnatna man hi in chawi ve ngai a ngai tlat. Saiding, Ropuia hi ka hrilh mai dawn asin. A tha em?" Tiin ka ding hluai a. 

"Chhuak vat la a ni mai" Saidingi'n a ti thawt. 

"Eng nge a? Eng thil nge?" Ropuia chuan a lo ti vat thung. 

Ka phone chu lek kangin, "He khawl chhungah hian thil ropui tak a awm a mawle..mi dangin an hmuh ruala an hmel landan tur ka ngaihtuah hian ka phur viau a ni" tih pahin ka nui sâng a. Ropuia hmel chu hmuhnawm tawh tak a ni. 

Saidingi lah chuan titak fe hian, "Ruatpui, eng nge i duh?" A ti fiah kák a. 

Va din hnaih pahin, "Ka bialnu ni leh rawh" ka ti hniam raih a. Saidingi chu rilru buai hmel tak hian a a ding ran a, Ropuia chu a rawn ding ve hluai. 

"Ruatpui, i lo va pa lo ve mawle..bialnu hluite vau vau te chu..a zah pawh i zak lo mi? Saiding, FIR thehlut rawh. He pa lakah hian tlawm suh" mangan hmel ru deuh hian a ti a. Saidingi chuan, "Ni lo, A thil kawl hi a namai lo. Aw le, Ruatpui, zanin hun min pe la..naktukah ka thutlukna ka hrilh ang che" a ti sap a. Ropuia mitmeng a hmuhnawm kher mai. 

"A tha alawm. Ka'n haw ang e. Ropui, Duati bulah heng thil hi i sawi a nih chuan..Thil thleng tur i hriat kha" ka ti sup a. Ka chhuak nghal. Kan game chuan eng ang tawpna nge a siam ang tih ka hre lo. Saidingi ráwn loin ka kalpui tawp a, kan duhdan sawi theih a ni tawh bawk si lo. Ka ruahman dan chuan Ropuia kha a rilru a buai ngei dawn. A video kawl ve kha Saidingi tan a hnawk tham lo tih a chiang ngei ang a. Ka video kawl chu tihbo vat a duh ngei dawn. Chuta a rawih tur nia ka beisei chu Duati a ni. Duati bulah thil awmzia ka sawi ang a, Duati a vehthlem ang chiah khan Amah chu kan vehthlem ve thei dawn a ni. Saidingi zu rui lai video tih vel kha chu Saidingi'n phumbo dan a hre turah ka ngai. 

Ka hawn pahin Duati te inah chuan ka peng ta ngei a. A chhungte an lo mu tawh a. A tihzia hle. Ka thut rual rualin,"Hei Ropuia msg hi" tiin min entir nghal.

A che rang teh e. "Ruatpuia hian Saidingi video eng emaw a kawl a. Delete tir dan lo ngaihtuah ang che. Tichuan, i buaina kha chu phumbo ang a ni nghal ang" tih a ni. Ka nui vur vur mai. Kan thangkam a fuh ve dawn e. Duati erawh chuan a ngaihna a hrethiam vak lo niin ka hria. 

"Duati,Saidingi nen kan idea a nih kha. Ngaithla rawh. I pawimawh tawpkhawk a nia. I thlalak te kha a delete i duha a darh i duh lo takzet a nih chuan, ka sawi anga i tih a ngai dawn. Ropuia bulah theihtawp i chhuah tur thu i sawi ang a. Mahse, ngiat i nei ve thung ang. 'Ka thlalak i kawlte kha ka hmuh lai ngeiin i delete ve tur a ni. A nih loh chuan, Ruatpuia video kawl hi leak out mahse ka tan a pawina a awm miah lo va,.engmah ka ti lo vang' tiin i nawr ve ang. A kawtawpah chuan a tang zo bik lo vang. I fihlima i thlalak a delete vek tih i chian hunah Ropuia chu hremna kan pe tawh ang" ka ti ta a. A ngaithla uluk hle. 

"Ka lo tum ang. Ka thiam zawng tak alawm. Mahse, nang pawh ka bialpa, keimah min duh em em angin lang ang che. A fing sia, a hrethiam palh ang" a ti a. Ka bu nghut. Kan game khelh chu naupangchhia viau angin lang mah se, a nghawng tur thil a ril miau si a, kan inrintawnna chauh lo chu hmanrua kan nei hauh lo bawk. Saidingi a ngaihtuahawm ta lo bawk a, ngaihngam zetin ka mut ve tak kha.. Tihbuai hi ni fo tawh lo ila ka duh mang e. 

Zing kara kan kawmchhakte thingzai Mawia nilum rawn ai chuan, an thingzaina piah lawka sunhlu tlan sakhi an awm thu a sawi nasa mai a. An thingzaina hi khawhlui thlanmual mawng a ni a, a hla vak bawk si lo nen, Valtea ka hrechhuak rauh rauh mai. Ka tukhum na chu rawn awm leh thin mah se, chutia tawrh hrehawm em em a ni tawh lo bawk a, Sakhi chu zuk chan ka rilruk ta a. Zorina patea silai ka kawl bawk a, hlawhtling lo pawh ni ila, ina tawm reng ai chuan a harh te pawh ka harh deuh ang ka ring. Valtea ka call ta a, a phur ngang mai. Tukthuan kan ei laiin Apuii chuan, "Daisy saw ka la sawp duh mai dawnin ka hria" a ti thut mai a. A la lungawi lo reng a niang chu maw. Ka niin, "Ngati lehpek nge!" A ti a..

"Malsawna bulah min lo sawi nasa lutuk a, ani Malsawma lah a mawl si, kan inhauh phah hrep a. Nge maw min lo sawi vak le, a pawi ka sawi tawp si lo va" a ti tán tán a.

"Malsawma nen in ni leh tawh law?" Nupuii'n a lo ti hû.

"Ni lo..mahse, malsawma bula khatia min lo sawi vak kha a ngai lo, dawt lehnghal" a ti hlar a. A hmeichhe thuhla deuh bawk a, ka ngaihven duh lo. A inchingfel ve leh mai ang chu maw. Kan sakhi chan tum thu vel ka sawi chuan, "I la damkawr rih kha mawle" ka ni chuan a i ti dat a. 

"Chhunah ka mu dam dawn alawm" ka lo ti. Eng an sawi zui tawh lo. Eikhamah Saidingi msg ka dawng ve leh ta nawlh e. 

"Kan thangkam a per, Ropuia a mangang viau. Duati kha hnaih deuh la a tha ang. A rin theih nan" a rawn ti. Ka idea ka hrilh thuak a, nizan mut hma khan. Min pawmpui ve a nih dawn hi..

Che buai ve teh se..Ropuia chu,. A nuam tan dawn e. Sakhi chan chu chawhnu lam daih a ni bawk a. Inla awlthawng takin Duati ka va rim ta a. Mak an tih hmel angreng, nidangah kan inbe liam ve satliah mai zel kha a nia. Hetia nula tlangval anga kan han inrim hi a mak tih loh rual a ni bik lo ve bawk a. Duati lah a lo zeihawi bawk a, kan inngheng deuh chial mai a. Phone kan inkhawihsan daih ve ve lawi a. Arema leh Biaka te hi a hran ve vein an rawn lut a, Ropuia tirh an ni ngei ang. Eng em em an rawn ti pawh a ni si lo. Keini lah an rawn luh rualin kan han inhnaih leh sauh a, kan meng tlang teh e. Duati chuan a lo kar ve ta chiah a. Ropuia erawh chuan engmah a la sawi lo. A fimkhur viau a niang e. Hman ata tawh a lo ngaihzawn em em Saidingi a ngaihzawn theihna a nih dawn phawt chuan engpawh a ti duh mahna. Saidingi lahin, "Kei chuan tihtheih ka nei lo. Ropui, Ruatpuia hi i hmehmih theih chuan ka lawm viau ang. " tiin a lo kar ve bawk si. Saidingi rilru hneh nan kei chu min target nawn leh ta poh chu a nia, A tharum leh a inphiarru zawnga a chet leh leh erawh a hlauhawm a. Ka fimkhur a ngai viau ang. 

Dar 3 velah Valtea a rawn thleng thla a, a phur surh surh lutuk chuan nuihte pawh a tiza deuh. Ka insiam chhungin Nupuii nen pawh eng emaw chu an sawi dun sep sep kha maw.. Ka insiam zawh chuan kan chhuak ta a. 

"In insawifel thei ta mi? Û-i hmel hmuh khi a va nuam leh tawh ve" a ti sur sur a. Dawnsawn a va nuam tak. 

Saidingi nena kan thangkam dan, Duati puih tel kan duh vanga lem kan chan dan velte chu ka hrilh ve mawlh mawlh a. A nuih a za khawp mai, "In va naupangchhia tak" a ti duh lek a. 

Sawi hun tak nia ka hriat avangin thutak deuh zawkin, "Valte, Nupuii hi i chhaih kual vel mai mai lo tiraw?" Ka ti ta a. Ani pawh a thutak ve nghal mai.

"E! Thianpa, a mak khawp mai. I hriat angin kei chu ka lerh vak lo va, mahse, han biak leh han kawm fal deuhte hi chu ka nei ve zul zel. Nupuii ka hmuh khan vawmbei ang thlawrh ka ni ka ti mai. Lo ngai haw lo la, dik tak chuan Aizawlah pawh amah aia hmeltha leh zeihawi zawk pawh hmu lo ka ni bik lo. Mahse, ka sawi thiam lo, Nupuii hi ka duh tak tak. Ka khawngaih tel te pawn ka hria. Ka sawi awmzia chu a nu si lo va, mahse, hmeichhe rilru a pu tho sia, ka bula a lai chhe em em zel te hi ka lainat. Amah hi a ngheh phawt chuan kei chu ka ngaihtuahawm loh" a ti ta duah a. Dawt sawi hmel a pu lo bawk a, ka ringtawk viau.

"I kiss tawh em?" Ka ti thut a. A nui hawk. "Chhaih miah lo la, ka kiss hmasak ber khan ka nui chhuak lo chauh. A zeia a zei loh dan chu e. Ngaih hi a tha veng veng mawle" a ti a, kan nui dun hawk hawk. Nupuii hmel ka mitthla a, nuih a za lo thei lo. 

"Ropuia hi chu ka la hnek tho ang. Ka thin a Dam dawn lo" ka ti leh daih. 

"Hneh teh, ka hnek ai min hnek kep la..kei pawn ka mil hre hru lo. A hmeichhe mitmen a, a dik hlawl lo" a lo ti ve nghut a. 

Kan sa channa hmun tur kan zu thleng thla a, thingzaina atang chuan a lo hla lo hle tak mai a. Sunhlu chu a rah hnem ngiang mai. Sa channa khàn remchang ka han melh a. Sunhlu kung atanga pen 13 velah ram theihai a ding luah a. A kakpui chu a rem dawn riauin ka hria a, Valtea chu ka lawntir ta a. A thu than mai. Kei erawh sunhlu kung chhak lamah hnawmhnawk karah rem deuha thut dan ka zawng a. A awih lek lek vangin a nuam lutuk thei lo thung. Valtea chuan kap zawk se ka duh vang a nia chan khán rem zawkah ka thuttir ni. A lawm ve dawn êm a sin. Khaw thim tak tak hmain kan chaw pai chu pum ruak dalah kan bar thuak thuak a. Zial kan zuk leh vang vang hnuah kan chànna tur lam ve veah kan kal ta a. Khua pawh a thim tan a, Thawm pawh a reh chho tan ta bawk. Valtea chuan phone a hmet eng sek mai a. A dik dawn lo va hriain msg-in hmet êng tawh lo turin ka zu hrilh a. Ani Nupuii nen an lo intext chu niin..aa..inthakhlelh zual lai hun a ni ve bawk a. Ka hrethiam tho mai.

Dar 7 pawh a la ri lo ang tihin ka beisei aia hmain Sakhi ni ngei tur chuan thawm a rawn nei tham tham a. Sunhlu rah tla chu a thial bawp bawp mai. Valtea chuan chet lak a tum lo nge mawni le, ka ngaichang rei angreng si. Kan chhuah palh mai ang tih ka hlau bawk sia, Ka sihdêt chu la chhuakin vawi leh khatah ka én ta thut a. Ka silai a puak nghal dur bawk. 

"A tlu e" Valtea aw chu a ring ngei mai. Ani ka kah hun a lo nghak ngat ngat chu niin. A va buaithlak e aw. Phur leh thatho zetin sakhi chu kan han ên kual vel a, a lian lem lo, a patuai a ni a. A chek a tui dawn turu lutuk. Pa Rema'n a siam thiam nasa sia..kan input chhawk ta a. Khua atangin a hla lo bawk a, kan hah lutuk lo ve. In kan theng chu kan ri ta hlut a. Ka sakhi kah ve vawikhatna a lo ni bawk nen, ka khi vur vur reng mai. 

Pa Rema leh Hruaia pa Pa Hmuna ten an chan ta a. Tlem azawng chu kan hralh ve ang chu. Valtea chu sabawp man a ni bawk a, sabawp mai bakah a sa dang pawh a hawn nual mai. Saidingi'n nunrawng min ti leh maithei a ni. Ka inbual zawh meuh chuan dar 9 a lo pel vah tawh a. Chhuah lehna chi pawh ni lo chuan..phone pawh ka la khawih hman meuh lo. 

In hnuaiah ka insawn thla tawh bawk a, muangmarin mu turin ka chhuk a. Phone te chu ka han hmet ve leh hram a. Duati miscall a lo awm. Ka call back ta nghal a. 

"Aw..Ruatpui, Ropuia chu i sawi ang khan ka ti ve a. Zan tirah khan a rawn kal a. Min rinhlelh hmel tlatin ka hria. Ka rilru a hah" a ti niah niah a. 

"Lungngai suh. A fel vek mai ang. Hmanhmawh lo la aw" ka ti a. 

"Umm..nia..theihtawp kan chhuah zel ang chu. Doctori nen pawh kan inbia a" a ti a. 

"Eng nge a sawi?" Ka tih chuan, "Thil dang daih min zawt..nang leh kei kha kan mudun lo takzet em tih min zawt a" a ti a. 

"Chuan" ka ti vat. 

"Thudik ka hrilh. Kan mudun lo tih ka hriilh" a ti fiah kák a. Ka nui suk.

Saidingi'n a lo call ve mek avangin, "Hei a lo call a, ka'n be lawk ang e" tiin ka dah a. Saidingi call ka pick nghal.

"I chau viau naa, Zoteah kal a ngai a" a rawn ti sap a. A mak thei. 

Min ban tawh tih a theihnghilh lo va, keimah nena Zotea kal a duh tihna..

"Ka'n insiam ang e" tiin ka tho var a. 

"Ka lo nghak ang che.." A ti sep a. A dah nghal. Ka chau ve tho nain ani nena zankhuaa hun hman ka thlan zawk tho avangin ka insiam a. A hmaa ka hlawh min pek kha ka ak chhuak bawk. Scooty-in ka chho a. Ka thlen chuan a motor bulah a lo ding reng tawh a. A hmanhmawhthlak viau em mawni le..

"Kan kal nghal dawn mi?" Ka ti nghut a. 

"Aw" a ti tawi tak. Kan lut a. A hnung seatah chuan eng eng emaw a let rum mai. Ka tlan chhuak a, Zote khaw lam pan chuan kan lir phei dat dat a. Zote nena kan inrina bula kawng peng bulah chuan, "Ding rawh" a ti hap a. Ka ding ve mai. 

"Hetah hian peng rawh" a ti ta mai a. Ka makti hmel a hmuh chuan, "Tun ang zanah Zoteah eng nge ka va tih ang a? Zanin chu kan picnic dawn,nang leh kei" a ti ta a. Ka melh vung vung ringawt. 

."Vanruatpui, vung vung a che. Peng vat teh" a rawn ti hlar a. Ka harh zawk. He lai peng hi chu Kan khawhlui ram a ni a. Motor erawh thui tak a tlan thei lo. Hmun nuam tak, han lenvahna atan pawha nuam deuh mai a ni. Engtin nge maw a lo hriat teh daih ni. Motorin a tlan theih chin chin ka tlan a. Hmawng kung lian zet bula kawng zau laiah chuan ka park ta a. Thla lah chu a eng viau mai a. Boruak a nuam tawk bawk si. Saidingpuii chet duhdan hian min la tihrilhhai zel dawn chu a nih hi maw..

Tent a lo keng vei thlap a. Nileng khan a lo inruahman tawh a nih ka ring. Eitur a keng nual bawk. Tent kan kaih zawhah mei ka chhem a, Lui hnaivai a awm lo bawk a, tu te emaw ramkal emaw lui kal haw emaw chuan min rawn hmu lo turah ka ngai. Bakah khawhlui ram hi chu mi ram a ni deuh a, a ram neitute an kal loh chuan tuman an tlawh ka ring hran lo. Puan inah chuan insi rialin mei alh lam hawiin kan bawk dun a. Ka la hamhaih leh ka laih deuh run avangin ka la tawng mang lo, a tih ang ang chuan ka awm tawp. 

"Ropuia hi mi vanduai tak a ni. A khawngaihthlak bawk. Engtin nge a hrai ruih ngam che le tih ka ngaihtuah hian, pawisak nei zo tawh lo khawpa min atchilh vang a nia. Chuvang chuan a hlauhawm tawh a ni" a ti sep sep a. A sam rimtui zet hnîm veng veng pahin,"Mahse, ka hlau ve lo" ka ti hram a. 

"Min neih loh dawn ai chuan min thah mai pawh a pawisa lo vang. Chutiang zawng chuan a hlauhawm pha tawh" a ti leh a. 

"kan inneih vat a ngai a nih chu, ka venhim theih nan che" ka ti a. Min rawn melh háw a. 

"Min nei la" a ti zawi sap a. Thla eng chuan a mitmeng phur vanga de sawr sawr chu a rawn ên chiang si, a duhawm hlawm tawp a ni ber e. 

"Zaninah innei ila" tiin ka hnaih ruak a..

 Hehe..