Boss Amanda Last

BOSS AMANDA.. (Last episode) 

(Serial Killer bik atan chuan, hei hi a tawpna a ni ang. He mi hnua ka rawn ziah leh chuan a hmaa Amanda ang kha a ni leh ang, Episode khata case pakhat awm zel ang kha. 

Chuan ka duatte u, Adds kha aw 😢 ka zak em em tawh e😌

Ziaktu: Toni Râlte

Puar peng pawngin Office ka thleng a, min lo thlen khalh leh tawh. Ruatkima ruang kha an postmortem zawhah a ruang hlawmtu awm hek lo, an in chungte inah bawk a ruang nghah a ni leh ta a. An in chungte hian an dawl zo ngawt mai. Mi tha tak zawng an ni ngei e. 

"Engtin nge case hi.. Tihian a tawp chu a ni mai lawm ni? " ka ti a. 

"Tawp mai lo ve.. Ruatkima inpuanna hi thu tlinga pawm a nih phawt loh chuan" a lo ti fiah kâk a. 

"Ka hre ve châk e.. Ka hre ve thei ang em? " inthlahrung ru deuh hian ka ti a. 

"A hunah chuan i la chhiar chhuak vek dawn nia.. I boss phalnain" a ti kher a! Ka ner nâng, a nuih zawnga a ha var rual thah lo lang hmuhnawm ti zeta ka thlir laiin Court lama kal turin an rawn ko a. Kei erawh ka kal ve dawn lo. 

"Sam, kan thawhrim tehlul nen.. Heti maia a tawp tur hi ka ui tlat nia! Puitham deuha tihtawp a chakawm nen" a ti sap a. A sawi awmzia ka ngaihtuah chhungin a kal chhuak hman. Kei erawh coffee ka in zawhah kan SP in hna tlem a neih avangin pui turin Jerome-a nen kan chhuak ve ta nghal a. 

Zan tirah Amanda in lam panin ka inkhalh phei a. Ka hrilh lawk lem lo.. Door bell ka hmet ri tlang tlang a, a inbual nge mawni a rawn hawng har hrep lehnghal. Min hmuh chuan a khi sak a, "Lo call che ka tum deuh hrim hrim a" a ti a. Kan inzui lut nghal. Chaw a lo la ei lo va, a han ei ve sawk sawk a. A ei chhungin pubg ka lo khel thung. 

"Pubg hi chu khel tawh lo teh, i thluak neih tlem tawh sa nak alaiin, a ngawl i vei tan tlat" a rawn ti a. Ka chhang lem lo. Ni e, zûn hi a nei ve a, ka hunawlah chuan ka lo khel leh mai thin. Insûm deuh chu a ngai. A chaw ei khamah a roomah a va lut a, a rawn chhuah leh chuan, note bu kha a rawn kengchhuak a. 

"Kei chuan ka chhiar vek tawh. I duh chuan i chhiar ve thei ang" tiin min pe ta a. Ka lo la rang ngei mai. Ruatkima inpuanna chu kei aia hre chak pawh an tam ve thoin ka ring. Tv a on a, ka mal chunga mu chungin a en ngei.. Keiin Note chu ka chhiar ta a. 

"Thil pawi rapthlak tak ka khawih tih ka hria a, he khawvelah hian chhungkua tia sawi theih tur ka nei tawh bawk si lo. Amanda-in min hre chhuak tawh nia ka hriat avangin damchhunga jail tan emaw khaihlum emaw nih ai chuan, keimah ngeiin ka nunna hi chhat zawk ila tiin ka ngaihtuah a. Chumi hmain he case hi an tihtawp theih nan ka inpuanna hi ka ziak a ni. 

Khawhai khua ka ni a. Ka nu hian fa bik a nei. Ka û Zonunsanga kha a ni. Ka pa chu pa tha tak leh zaidam tawpkhawk a ni a. Ka nu erawh a thinchhiat bakah ka pa te hi a zah lo hlein ka hre thin. A tawi zawngin ka'n sawi ang e. Kan rethei a, lo neia eizawng ve mai kan ni. Mahse, tum khat chu ka nu chuan tlangkam atangin a lo hre ve nge.. Sumdawn a tum ve ta a. Mi sum puksakin Tahan lamah bungrua eng eng emaw a han la ve a, kan khuaah a zuar ve thin. A tifuh chho ve nge kan dinhmun a ziaawm phah ta hle. Kum 2 zet chutianga a sumdawn hnu chuan a zia pawh a dang telh telh a. A fate leh a pasal te chu min hlat sawt ta khawp mai. A fa bik u Zonuna erawh a voh hlur a, kan hriat ve lohin thil thar hi a leisak deuh reng thung. Rual awt rual kan ni ve bawk nen, U Zonuna chu kan thik ru thin khawp mai. Ka nau a boral ta a. Khangah te khan tuar ber awm angin a khawsa vel a. A tuar na lem lo tih ka chiang. Khawhar hmel taka ka pa tei vak ka hmuh fo avangin mak takin ka nu huatna ka nei chho ta a. 

Zan khat ka thiante nen kan leng ho ve a, khaw tawp lam tlema fâl deuhah hian parawl pakhat Pu Changa kan tih mai hi a awm a. Amah chauh a ni bawk a, a hausa phian mai. Chu pa in bula phul hmunah chuan zu kan in ru ve a, kan ri ve mam mam mai. Kan thianpa pakhat hian, "Pu Changa hian hmeichhia a riahpui fo mai an tia.. Hawh u va bihthla ang u" a ti a. Kan kam nam deuh phur bawk si chu kan va phei ru ţham ţham a. Rangva kilhna kua atangin a pindan chu a hmuh theih a, mahse, a thim thiap mai. Kan rin ang ngeiin hmeichhe tawng thawm kan hre ta a, a tawng ring lem lo va, eng nge a sawi kan hre lo. An ri leh khat khat thin a. A hnuah chuan an rum ta hlerh hlerh a, nuam tuar thawm ngei a ni. A thim avangin kan va hmu thei si lo. An thawm chiah kan hria a nih chu.. Kan kalsawn ti ila phulah khan kan va awm leh. A hnu darkar khat bawr velah Pu Changa te chu an rawn inzui chhuak a. An rawn hnai zel.. A hmeichhe tawmpui chu tu dang ni lovin ka nu ngei a ni! Ka zak lutuk chu ka ţap tawp! Ka thiante chuan min hawpui ta ringawt. Ka nu pawh khan ka hria tih a hria aniang, in ka thlen rualin min ko va, ka pa erawh ramah a riak. U Zonuna pawh thingzaiin an riak bawk. Ka nu chuan, "Pu Changa kha a damsam lo va ka va kan anih kha" a'n ti nghal ngawt a! Keia thinin tuar tawh hek lo.. "In thawm kan hre vek e. In mudun chiang khawp mai. Ka pa rawn haw se i châk lo vang" ka ti ta piap piap a. 

"I duh leh sawi rawh. I pa hian engkim a hre vek, min then ngam chuang lo. Ka chawm hlawm in nih hi" a ti ta mai a. Ka pain a lo hre tawh a nih chu! Engtin nge a then loh theih? A chhan chu a fate vang a ni ngei ang. Fate hmangaih em em ka pa chuan rilru na tak chungin ka nu awmdan chu a lo haider zawk a lo nih awm chu! Chumi zan chuan ka tal tlaivar thak a ni. 

A hnu ni 4-naah ka nu chu kan loah Maipawl phur turin a kal ve a. Ka pa erawh a ramriak kha a rawn khawsik haw ta si a, maipawl phurh a ngaih tawh vangin ka nu chu a feh lo thei lo a ni. Kei erawh luia kan kal tur thu sawiin ka zui duh lo. Mahse, a rukin ka zui thung! Ni e, ka nu kha ka thah a ni. Remchang ka hmu kha ka lawm teh asin. A ruang kha ka thukru a, khawtlangin kan zawn chiam pawh khan kan hmu lo. Ka inngaihtuah harh a, a ruang tal chu vui ve ila ka pa lung pawh a dam deuh ang tiin ka thuhrukna tangin ka la chhuak leh a, a lo rimchhe hman tawh viau. An hmuh theih ngeina turah ka dah ta a ni.. Ka nu thih dan kha khawtlangin mak an ti a, U zonuna phei chuan a tuar thiam loh bakah thah a nih a ring bur.. Rinhlelh tur an hre der si lo. Ka pa erawh ka ngaihbel nge thaw huai hmel a pu zawk a. A phurrit ka chhawksak a nih hi ka ti ta mai. 

Tichuan, a kum lehah ka pain min boralsan ve leh a. Ka farnuin pasal a um bawk. Tikhan U Zonuna nen kan han khawsa ve ren rawn a. Kan inngeih tehchiam lo. Pawisa a ngah a, ka tan a ui si. Zan khat a bialnu a lo leng a, ka nawmsam loh vangin nachhawkna eiin ka mu daih a. An titi chu ka ngaithla kar mai. Inneih chungchangte an sawi ve a, "Kan inneih rualin Aizawlah kan chhuk daih dawn nia" U zonuna chuan a ti a. 

"Kima hi engtin nge niang? " A bialnu chuan a ti a. 

"Ani te chu a awm awmin a lo awm ve tawh mai ang chu.. He in hi a pa in a nia" tiin a chhang a. 

"In hi neih tum ila.. A hmun a that bakah huan te khu ka ui kei chu.. Hralh dan ngaihtuah la, bultanna kan nei thei dawn asin" U Puii chuan a ti ta a. Ka inhum ruh nasa khawp mai. Rilru chhe lutuk pahnih avang chuan ka muhil leh thei ta lo. Tichuan, kar khat hnu lekah U Puii insu tur ka zui ru ta a. Tuikhurah mi dang an awm ve si avangin chet ka la thei lo. A lo haw lam ka chang ta a. Awlsamtein kawng thlangah ka pawtthla ta a. Leh pawh a tih hmain ka rekhlum leh ta a ni. A ruang chu zan thleng ka thutpui a. A bed sheet suk lai ngei hmanga inawkhlum angin ka khai ta a ni. Theihai kung lian vak lo a awm a. Harsa takin ka khai thei hram.. A rawn zawngtu ten min nangching thelh a ni. Mahse, ka pit bo thei hram. U zonuna chuan a tuar khawp mai. Nuam hi ka'n ti em em khawp a. Ka nui var var reng mai. Tichuan, a lu sun te a ziaawm deuh hnuah Aizawla chhuk chu a tum ta a. Mak pawh ka ti lo. Ka dang lo bawk. A chhuk hnu lawkah ka patea te bulah ka khawsa a. Kan in leh lo kan tiral ta bawk. Ka patea te chhungkua pawh hi tih chimih ka duh em em, mahse, ka pa thisen zawm a nih avangin kut ka lek ngam lo mai zawk a ni. Tin, man chhuah ka ni rang dawn bawk nen.. 

Aizawlah ka rawn chhuk ve ta rawih a. U zonuna bawk ka rawn bel leh. Ani chu a lo piangthar ta nge ka beisei loh deuhin min lo dawngsawng tha a. Ka huatna pawh zawi zawiinna reh ve tial tial mai. Hna te ka thawk ve a, tikhan inrenchem takin kan khawsa ve ta kha a nia. Tual thah châkna ka nei tawh lem lo. 

Mahse, ka hnathawhpui te hian Aizawl nu ho uire nasat theihzia an sawi thin a. Fiamthua sawi mah nise, ka nu sulhnu la hre chhuak lo thei lo. An mi hriatchian uire thinte an han sawi fo takah chuan ka thinlunga huatna leh phuba lak duhna chu a rawn nung thar leh tan ta a. Vanlalruati kha an thenawm lawk tlangval te nen hna kan thawh hona tanga ka hriat a ni. Engtin nge ka thah ang aw tih ka ngaihtuah nasa a. Ka u in min zirtir ve fo avangin taxi kha ka khalhthiam ve sawih sawih tawh a ni. Vanlalruati number neih dan ka ngaihtuah a, min rinhlelh ka hlau bawk si. An thenawm tlangval bulah chuan, "Pi Ruati number kha i nei mial lo maw? Ka bawl chak tlat.. Ka chhai thlu thei maithei ania" ka ti ta tawp a. Nui huah huah chungin, "Chhai ve tak teh.. A sum eisak la, zu i show deuh reng ang a" tiin min pe ve ta mai a. Vanlalruati chu ka be chho tan ta a ni. A tirah chuan a induh ngang ngang khawp mai. Mahse, ka biak reng takah chuan min nel ve chho a, a mizia ka lo hriat ve nual tawh avangin a sawi duhzawng ka sawipui thin.. Ka u Zonuna thlalak hi Dpah ka hmang bawk a, ani a lo hmel chhe lo bawk nen.. Min be chhe ta lo chho viau. Inhmuh vr pawh kan tum chho ta kha a nia. Khamini khan Balu kan lak loh kar a ni bawk a tiin ka u bulah, "Awm tawp ai chuan taxi khalh tur min zawnsak ve la.. " ka ti a. Vanneih asiamin a thianpa U Muana nupuiin nau a nei a, an buai deuh vangin a chawl rih a, chu chu ka khalhsak rih dawn a ni. Tichuan, Ruati nen inhmuh kan tum ta a. Mak deuhin ka û-in a lo phur ve kher a! A rawn inreport nghe nghe kha. Khaw thim hnuah kan inphur phei ta a, a tawng siam siam a, lukhum ka khum tlat avangin ka hmel pawh a hmu chiang lo ang. Ka u aiin ka hâng tih inhria a, hmelah erawh ka nu ka chhun a, U Zonuna nen inanna kan nei ve tho. Tichuan, Pu Rinliana huan thlen hma kawng zau laiah khan ka dinpui a,. 

"Ruati, i uire thin tiraw? " ka ti a. Mak ti zetin min rawn melh. 

"Sawi rawh.. I uire tiraw? " ka ti vin thak a. A hlau chu chhuk a tum a, ka va pawt let dawrh a, a inrin hma hauhin a hrawkah khan ka zai thler ta a ni. A thaw bawrh bawrh a, a chat fel der. Tichuan, a phone kha ka la a, a sim card tichhiain a phone pawh leiah ka phum ta daih a ni. Ruang chu thlam piahah khan ka hnutchhiah ta a ni. 

Rinsangi thung kha chu a bialpa Nunmawia nau hian taxi a khalh ve thin a. Kan inkawm thei phian a, zu te kan in dun a, Rinsangi chuan a lo call ta a. An inbiak zawhah a u bialnu a nih thu leh pasal a neih reng thu te a sawi ta a. Ka ngaithla uluk hle. A dawr awmna te ka hriat takah chuan ka va kal ve a. Ka mamawh miah lo chungin ka va dawr ve ringawt. A lo fel khawp mai. Ni thum lai a zawnin an dawrah ka kal ta a, tichuan, khami tlai khan taxi ka khalh thei tawh si lo chu ka buai ru viau. Mahse, balu lakna tanga kan hawn khan Lui kal tur te nen kan intawk a, "Kawng sirah khan Van kan hnutchhiah tawp a. Min lo ensak ve leh teh u aw" tia min chah kha ka hre chhuak a. Zan 3 lai an riak dawn tih ka hre bawk. Remchang ka ti ta a. Taxi ka hmang thla a, Van chu ka ru ta a ni. Ka direct ta tawp a, ka khalh chhuak thei ta mai. Tichuan, Rinsangi scooty chu a rukin khawihsak ta a. Ka khawih chhiat leh chhiat loh pawh ka hre lo. A khawl thil ka hre ve vak lo nen.. Mahse, ka beisei ang ngeiin a chhe ta hlauh a. Workshop kawta a din laiin Van chuan ka tlan thla ve a. "I haw dawn mi? Ka haw ve dawn tho asin.. Lo kal rawh.. Ka lo thlah ang che" ka ti ta a. A dawra ka kal fo vangin min hre chiang ve tawh nen, bakah a tlai ve tawh si a. Khatih lai khan a bulah hmeichhe pakhat a ding ve tho a, ani chuan taxi a hmang thung. Vai naupangin taxi-a chuang anga a sawi kha amah chu a ni. Tichuan, Rinsangi nen chuan an veng lamah kan kal a, khua a thim tawh. Chhuk a tumna hmunah chuan ding lovin, "Thil min lampui lawk rawh.. " ka ti tlat a. A lungawi hmel vak loh. Ka tlanpui zel a, kawng reh deuh laiah ka dinpui a, zu ka phawrh a, "I in ve duh em? " ka ti a. A lu a thing nasa mai. Ka in zo va, "Let ang aw" ka ti a. A ngaih a ngam leh hmel ta deuh. Ka chet vat loh chuan hun tha ka nei dawn lo tih ka hria. Ka inkharphui sauh sauh a, eng thu mah sawi lem lovin ka lamah ka pawt hrâwk a, a hrawk ka zai ta nghal a ni. A thih fel hnuah Pu Rinliana huan lam ka panpui leh a. Tikhan ruang kha ka dah thla leh ta a ni. A phone leh sim card ka tichhe vek bawk. 

Thanpuii thung kha chu an pa nen khan ni 2 chhung kan inhlawh ho a. Thian dangte tawngkam atangin an nuin a lerhsan ve thin tih ka hre ta a. Ka ngaihven leh kher mai. Awlsamtein ka hre ta vek a. Ani kha chu a awlsam zual. An dawrah ka chawl a, a piah dawr kawtah ka lo châng a, "In pa te nen hna kan thawk ho tawh a. Ka hmu duh sia, in in ka hre si lo va" tiin Van bawk chuan ka phur leh a. An in thlen hmain khua a thim bawk a, ka che leh ta mai a ni. Tichuan, Zemabawk lamah ka tlanpui a. A ruang kha ka va hnutchhiah leh ta a ni. 

U Zonuna ka thah chhan chu min ringhlel a, engtin nge min rinhlelh ka hre lo. Min lo chhui ru nge ka zan mu ka tawngvai zawk.. Min veh ru tih ka hre ta a. Khami zan khan loh theih lohin ka inpuang a, Ka u chuan police a hrilh tur thu a sawi ta a. Ka that lo thei ta lo a ni. Ka han thinrim takah chuan ka nu nen min thlim dan zawng zawngte ka hre chhuak leh a, ani lahin min report ngei a tum si.. Ka that ta mai a ni. 

Taxi khan a ruang kha ka va dah a nih kha.. A bak zawng chu in hre tawh ang. 

Chipchiarin ka sawi hman tawh lo. A tawp nan hei hi ka sawi duh. Ka thiltih zawng zawngah hian inchhirna ka nei lo va, min man lo ula chuan thah belh zel pawh ka la tum a ni" 

Amanda chuan, "Eng nge i ngaihdan? " a ti a. 

"Ka ngaihdam theih a ni lo naa, a rilru piansual vang hian ka hrethiam" ka ti tawp. A bu nghat a. 

"Sam, chhungkaw kehchhia leh inuiresanna hi chuan thil tam tak a nghawng thei a ni. Ruatkima hi kei pawn ka khawngaih letling zawk" a ti ta duah a. 

"Vanram a kai awm si lo va" ka ti chuai raih.. A nui sak a. 

"Mu ang. Ka chau riau" tiin a tho nalh a. 

"Ka riak dawn maw? " lawm zet hian ka ti a. 

"Ka pangchang ve chak a" tih pahin min rawn siai zeuh. A pindanah ka lut rang kher mai… 

A tawp ta.